1, 2. Aha do sipata na dipingkirhon angka na poso, jala aha do poda na dilehon di Bibel?

ADONG donganta borua di Britania. Dongan sasingkolana mandok tu ibana, ”Boasa pola porsea ho tu Debata.” Donganta baoa di Jerman manurat, ”Didok gurungku, turiturian do isi ni Bibel. Nasida pe mandok, porsea do sude muridna tu evolusi.” Donganta borua di Prancis mandok, ”Longang do angka gurungku mangida molo adong muridna na porsea tu Bibel.”

² Godang do na so porsea molo Debata manompa hita. Molo hamu sahalak na poso manang marsiajar dope taringot tu Jahowa, olo do ra dipingkirhon hamu cara laho patuduhon molo Debata i Sitompa hita. Diurupi do hita marhite Bibel asa manat mamingkiri na tabege manang na tajaha, jala mangarimangi i. Dipaboa di Bibel, ”Roha hapantason mangaramoti ho.” Aha labana? On mangurupi hamu manundalhon pamingkirion na so sintong jala patoguhon haporseaon tu Jahowa.​—Jaha Poda 2:10-12.

3. Aha do na laho taulas di artikel on?

 ³ Asa togu haporseaonta tu Jahowa, ingkon tangkas do tatanda Ibana. (1 Tim. 2:4) Alani i, tingki tajaha Bibel dohot publikasi, mansai ringkot do mangarimangi aha naung tajaha. Marsitutu ma mangantusi na tajaha. (Mat. 13:23) Molo songon i caramuna marsiajar, dapotmu ma godang bukti na patuduhon Jahowa do Sitompa hita jala sian Ibana do Bibel. (Heb. 11:1) Taulas ma songon dia caranta mangulahon on.

4. Aha do persamaan ni halak na mangkaporseai evolusi dohot na mangkaporseai panompaon? Alani i, aha do na ingkon taulahon?

⁴ Ra, adong na mandok, ”Porsea do ahu tu evolusi, alana tutu do i didok ilmuwan. Boasa porsea tu Debata, hape ndang adong na hea mangida Ibana.” Godang do na mandok songon i. Tutu do, ndang adong na hea mangida Debata jala mangida Ibana manompa. (Joh. 1:18) Alai, songon dia do halak na porsea tu evolusi? Nasida pe porsea do tu na so boi diida. Ndang adong ilmuwan manang halak na asing na hea mangida molo na tinompa ni Debata muba gabe bentuk na asing. Umpamana, ndang adong na hea mangida bodat muba gabe jolma. (Job 38:1, 4) Alani i, ingkon taboto do buktina, tarimangi, jala ingkon taboto do aha na dipatudu bukti i. Godang do na mamparrohahon nasa na mangolu di tano on jala mangantusi adong do Debata. Diboto nasida, Debata do Sipanompa, pargogo na so hatudosan, jala denggan do sude pangalahoNa.​—Rom 1:20.

5. Aha do bahan riset na mangurupi hita mandapot godang hatorangan taringot tu panompaon?

⁵ Tingki taida tompaan di tano on jala tarimangi, taboto ma mansai denggan do cara ni Debata manompa i. Gabe porsea ma hita adong do Debata, nang pe ndang boi taida. Taboto, denggan do pangalahoNa jala  marbisuk do Ibana. (Heb. 11:3, 27) Boi do taparsiajari taringot tompaan marhite manjaha hatorangan sian angka ilmuwan. Pigapiga hatorangan i adong di bahan riset, songon video Keajaiban Ciptaan Menyingkapkan Kemuliaan Allah, brosur Benarkah Kehidupan Diciptakan?, Asal Mula Kehidupan—Lima Pertanyaan yang Patut Direnungkan, dohot buku Apakah Ada Pencipta yang Mempedulikan Anda? Di majalah Sadarlah! jotjot do adong wawancara taringot tu angka ilmuwan dohot na asing na patorangkon boasa nasida gabe porsea tu Debata. Artikel ”Apakah Ini Dirancang?” marisi hatorangan taringot binatang dohot angka na adong di tano on, jala paboahon songon dia angka ilmuwan maniru cara kerja ni tompaan.

6. Aha do laba ni bahan riset tu hamu?

⁶ Donganta baoa di Amerika Serikat na marumur 19 taon mandok taringot tu dua brosur i, ”Mansai denggan do brosur on. Nunga jotjot huparsiajari brosur on.” Donganta borua di Prancis manurat, ”Artikel ’Apakah Ini Dirancang?’ mambahen longang rohangku! Dipaboa disi, nang pe angka insinyur maniru cara kerja ni tompaan, alai ndang boi dos dibahen nasida songon denggan ni tompaan i.” Natuatua ni donganta di Afrika Selatan mandok, ”Artikel di Sadarlah! na jotjot dijaha borunami, i ma artikel ’Wawancara’.” Publikasi on mangurupi hamu mangida bukti na patuduhon adong do Debata, jala boi ma hamu pasidingkon ajaran na so sintong. Lam togu ma haporseaonmu, dos songon hau na togu uratna jala martahan nang pe ro udan habahaba.​—Jer. 17:5-8.

7. Boasa lomo roha ni Debata asa marsitutu hamu mangantusi hataNa?

⁷ Sala do manungkun, ’Boasa porsea ahu tu isi ni Bibel?’ Ndang sala. Ndang lomo roha ni Jahowa molo porsea hamu holan alani mangihuthon halak. Las do roha ni Jahowa molo marsitutu hamu mangantusi Bibel jala mandapot bukti na patuduhon Bibel i sian Ibana. Lam godang parbinotoanmu taringot tu Bibel, lam togu ma haporseaonmu. (Jaha Rom 12:1, 2; 1 Timoteus 2:4.) Sada cara laho mangantusi isi ni Bibel, i ma mamparsiajari topik na porlu botoonmu alusna.

8, 9. (a) Taringot tu aha do na jotjot diparsiajari halak? (b) Songon dia do pigapiga halak mandapot laba ala mangarimangi na dijaha?

⁸ Adong do na lomo rohana mamparsiajari surirang ni Bibel. Adong na mambandingkon isi ni Bibel tu sejarah, sains, manang arkeologi. Umpamana, hata di 1 Musa 3:15. Dung mangalo si Adam dohot si Hawa, dipaboa Jahowa ma surirang on. On ma surirang na parjolo di Bibel na mangurupi hita mangantusi songon dia Harajaon ni Debata patuduhon, holan Debata do na tama mamarenta jala songon dia sitaonon disalpuhon. Songon dia do hamu mamparsiajari 1 Musa 3:15? Bahen ma daftar angka ayat ni Bibel na mangalehon gumodang hatorangan na paboahon songon dia surirang on digohi. Dung i, botoonmu ma nandigan ayat i disurat jala susun ma hombar tu  tingkina disurat. Botoonmu ma, nang pe angka panurat ni Bibel mangolu di tingki na so sarupa, alai sude na disurat nasida mambahen lam tangkas surirang i. On mangurupi hamu mangantusi, tondi parbadia ni Jahowa do na manogunogu nasida.​—2 Ptr. 1:21.

⁹ Donganta baoa di Jerman paboahon, ganup buku di Bibel marisi hatorangan taringot tu Harajaon ni Debata. Didok ibana, ”Hombar do sude isi ni Bibel nang pe adong hirahira 40 baoa na manurat. Nasida pe mangolu di tingki na so sarupa jala ndang marsitandaan.” Donganta borua di Australia mamparsiajari artikel di Joujou Paboahon jala mangantusi adong do hubungan ni Paska tu 1 Musa 3:15 dohot tu Messias. ^[1] (Ida catatan.) Disurat ibana, ”Parsiajaran i mambahen longang situtu rohangku tu Jahowa. Mansai longang do rohangku alani pengaturan na dibahen tu bangso Israel najolo na digohi tu diri ni Jesus. Hurimangi ma hatorangan i, jala las situtu do rohangku mamboto i!” Boasa songon i pangkilalaan ni donganta on? Dirimangi jala diantusi do na jinahana i. On mambahen lam togu haporseaonna jala lam solhot tu Jahowa.—Mat. 13:23.

10. Songon dia do hajujuron ni angka panurat ni Bibel patoguhon haporseaonta tu Bibel?

¹⁰ Rimangi ma taringot tu hajujuron ni angka na manurat Bibel. Dipaboa do na sintong jala ndang mabiar nasida mangulahon i. Di tingki i, jotjot do angka panurat holan manurathon angka na denggan taringot tu bangsona dohot pemimpinna. Panurirang ni Jahowa ndang holan manurathon angka na denggan, alai disurat do taringot tu hajahaton ni bangso Israel dohot rajana. (2 Kron. 16:9, 10; 24:18-22) Disurat nasida do hasalaan ni nasida sandiri dohot naposo ni Debata na asing. (2 Sam. 12:1-14; Mrk. 14:50) Donganta baoa di Britania mandok, ”Jarang do adong jolma na jujur songon i. On paposhon rohanta, Bibel i sian Jahowa.”

11. Songon dia do tudutudu sian Hata ni Debata paposhon rohanta molo Bibel i sian Debata?

¹¹ Molo tapaloas Hata ni Debata manogunogu hita, tahilala ma pangkorhon na denggan. Pos ma rohanta, Bibel i sian Debata. (Jaha Psalmen 19:8-12.) Donganta borua di Jepang manurat, ”Las hian roha ni keluarganami mangulahon na niajarhon ni Bibel. Dame ma pangkilalaannami, marsada ni roha, jala masihaholongan.” Ala marsiajar Bibel, diboto godang halak ma ndang sintong sude na dihaporseai nasida. (Ps. 115:3-8) On mangurupi nasida marhaposan tu Jahowa, na manjanjihon ngolu na dumenggan. Alai, halak na mandok ndang adong Debata, mambahen angka na di tano on gabe debatana. Adong na mandok, jolma boi mambahen lam denggan ngolunta. Alai molo taida sian angka na diulahon jolma, ndang boi nasida pasohon hasusaan di portibi on.​—Ps. 146:3, 4.

12, 13. Songon dia do caranta martungkar pingkiran taringot tu panompaon dohot Bibel?

¹² Tingki martungkar pingkiran taringot tu panompaon manang Bibel,  ingkon jolo taboto do na dihaporseai sasahalak. Ingot ma, halak na porsea tu evolusi pe porsea do tu Debata. Nasida mandok, marhite evolusi do Debata manompa nasa na mangolu. Na asing porsea tu evolusi ala diajarhon do i di singkola. Adong do na so porsea be tu Debata ala jut rohanasida mangida agama. Alani i, ingkon jolo tasungkun do na dihaporseai sasahalak jala boasa i dihaporseai. Dung i, denggan ma tangihon alusna. Molo songon i diulahon hamu, lomo ma rohana manangihon hamu.​—Tit. 3:2.

¹³ Molo adong na mangarehei ala porsea hamu tu Debata, aha do alusmuna? Lambok ma sungkun ibana asa patorangkon songon dia do hangoluan on ditompa. Dung i, boi ma tadok tu nasida, molo tutu do adong evolusi, sasintongna tompaan na parjolo boi do mambahen dirina sandiri asa adong muse. Alai, sahalak profesor kimia mandok, asa boi tompaan i mambahen dirina sandiri gabe godang, porlu do adong (1) kulit laho mangalinggomi, (2) kemampuan asa mandapot jala mamangke gogo, (3) informasi laho mangatur rupa dohot perkembanganna, jala (4) kemampuan laho mambahen asa godang informasi i. Didok muse, ”Sel na ummetmet pe nunga mambahen longang rohanta, ala maol antusan.”

14. Cara na songon dia do na dipangke hamu tingki mangulas taringot tu panompaon?

¹⁴ Tingki mangulas taringot tu panompaon, boi do dipangke hamu cara na denggan songon apostel Paulus. Disurat ibana, ”Ai ganup bagas, adong do na paulihonsa; alai sipauli saluhutna, Debata do.” (Heb. 3:4) Tontu, adong do na merancang jala paulihon jabu. Alani i, gari jabu adong na mambahen, tarlumobi ma angka na mangolu, tontu adong na merancang jala manompa. Hamu pe boi do mamangke publikasinta. Donganta borua mangkatai tu sahalak baoa na so porsea tu Debata. Dilehon donganta on ma tu baoa i dua brosur taringot panompaon. Dung hirahira saminggu, didok baoa i ma, ”Saonari, nunga porsea ahu tu Debata.” Marsiajar Bibel ma baoa i jala gabe Sitindangi Ni Jahowa.

15, 16. Aha do na ingkon taulahon andorang so patorangkon tu sasahalak molo Bibel i sian Debata? Aha do na ingkon tongtong taingot?

¹⁵ Molo adong na so porsea tu Bibel, songon dia do martungkar pingkiran dohot ibana? Songon naung taulas, jolo tasungkun do na dihaporseai ibana. Boto ma aha na dihalomohon ibana. (Poda 18:13) Molo lomo rohana mangulas sains, lehon ma hatorangan sian Bibel na paboahon hombar do isi ni Bibel tu sains. Molo lomo rohana mangulas sejarah, paboa ma na masa na disurat di Bibel. Patudu ma songon dia Bibel manurirangkon sada situasi  andorang so masa dope. Ra, olo do halak manangihon hamu molo dipatudu hamu hatorangan sian Bibel, na mangurupi nasida lam denggan di parngoluon, umpamana Jamita di Dolok.

¹⁶ Ingot ma, unang marsoal tu na asing. Las do rohanta molo lomo rohanasida mangkatai tu hita jala marsiajar Bibel. Alani i, denggan ma sungkun jala tangihon ma alusna. Tingki tapatorang haporseaonta tu na asing, ingkon pantun do hita, tarlumobi molo umtua nasida sian hita. Molo diargai hamu na asing, nasida pe mangargai hamu. Longang do rohanasida mangida haporseaonmu, nang pe poso dope hamu. Tontu, molo adong sasahalak na laho marsoal manang paleahon hamu, unang pola alusi ibana.​—Poda 26:4.

17, 18. (a) Aha do na mangurupi hamu porsea tu Bibel? (b) Aha do na laho taulas di artikel na mangihut?

¹⁷ Ra, taboto do ajaran dasar ni Bibel, alai ndang sae holan i laho patoguhon haporseaon. Ingkon bagas do tasulingkiti hasintongan i, dos songon mangalului arta na buni. (Poda 2:3-6) Sada cara laho patoguhon haporseaon, i ma manjaha sude isi ni Bibel. Ra, olo do hamu manjaha i di bagasan sataon. On mangurupi sahalak sintua kaliling lam solhot tu Jahowa di tingki haposoonna. Didok ibana, ”Sada cara na mangurupi ahu mamboto molo Bibel i Hata ni Debata, i ma manjaha sude isi ni Bibel. Marlaba do sude hatorangan sian Bibel naung huparsiajari di tingki haposoonku.” Pangke ma bahan riset na adong asa boi mangantusi na dijaha hamu. Ra, adong do di hamu DVD Watchtower Library, PERPUSTAKAAN ONLINE Joujou Paboahon, Indeks Publikasi Menara Pengawal, manang Panduan Riset untuk Saksi-Saksi Yehuwa.

¹⁸ Angka natuatua, ingkon ajarhononmu do tu ianakhonmuna taringot tu Jahowa. Songon dia do hamu mangurupi nasida asa marhaporseaon na togu tu Jahowa? Diulas ma i di artikel na mangihut.