1, 2. Ki bann zenn serviter Zeova i kapab demande par ler e ki konsey Labib i donnen?

EN KANMARAD lekol ti dir en zenn ser Grannbretanny: “Ou paret tro malen pour krwar dan Bondye.” En frer Lalmanny ti ekrir: “Mon bann ansenyan i vwar bann resi Labib lo kreasyon konman en lezann. Pour zot i normal ki bann zelev i krwar dan evolisyon.” En zenn ser Lafrans ti dir: “Bann ansenyan dan mon lekol i sirprann ki i annan bann zelev ki ankor krwar dan Labib.”

² Bokou dimoun ozordi pa krwar ki Bondye ki’n kree nou. Si ou en zenn serviter Zeova oubyen ou pe etidye, par ler ou kapab demande ki mannyer mon kapab prouve ki i nou Kreater. Labib i ed nou pour byen reflesir e rezonn lo sa ki nou tande oubyen lir. Parol Bondye i dir: “Abilite pour reflesir pour vey lo ou.” Ki mannyer sa? I pou ed ou rezet bann nide ki pa vre e ranforsi ou lafwa dan Zeova.​—Lir Proverb 2:10-12. ^[1] (Vwar lezot not.)

3. Ki nou pou diskite dan sa lartik?

 ³ Pour annan en lafwa for dan Zeova, nou bezwen konn li byen. (1 Timote 2:4) Alor ler ou lir Labib ek nou bann piblikasyon, i vreman enportan pour reflesir lo sa ki pe ganny dir. Esey konpran sa ki ou pe lir. (Matye 13:23) Si ou etidye dan sa fason, ou pou trouv plis levidans ki Zeova i nou Kreater e ki Labib i sorti kot li. (Ebre 11:1) Annou vwar ki mannyer nou kapab fer sa.

4. Dan ki fason krwayans dan evolisyon i parey avek krwayans dan kreasyon? Alor ki nou devret fer?

⁴ En dimoun i kapab dir ou,“Mon krwar dan evolisyon akoz bann syantis in dir ki i vre. Ki mannyer ou kapab krwar dan Bondye vi ki personn pa’n deza vwar li?” Bokou dimoun i mazin koumsa. I vre ki personn pa’n deza vwar Bondye oubyen vwar en keksoz ki pe ganny kree. (Zan 1:18) Me ki nou pou dir lo bann ki krwar dan evolisyon? Zot osi zot krwar dan en keksoz ki zot pa’n vwar. Napa okenn syantis oubyen imen ki’n deza vwar en kalite zannimo evolye pour vin en lot. Par egzanp, napa personn ki’n deza vwar en reptil vin en manmifer. (Zob 38:1, 4) Alor nou tou nou bezwen get byen bann fe, reflesir byen lo la e deside ki zot vreman prouve. Bokou dimoun in obzerv bann keksoz dan lanatir e zot in ‘disernen’ ki i annan en Bondye. Zot in “war” ki i annan en Kreater ki pwisan e ki i annan bokou bann bon kalite.​—Romen 1:20.

5. Ki bann zouti ki kapab ed nou konn plis lo kreasyon?

⁵ Ler nou get lanatir e medit lo la, nou kapab vwar ki tou keksoz i ganny fer dan en fason merveye. “Par lafwa, nou konpran ki” i annan en Kreater, menm si i envizib. Nou realize ki i  annan en zoli personnalite e en gran lasazes. (Ebre 11:3, 27) Nou kapab aprann plis lo bann keksoz ki i’n kree par lir sa ki syantis in dekouver. Serten sa bann lenformasyon i kapab ganny trouve dan nou bann zouti resers tel parey sa video The Wonders of Creation Reveal God’s Glory, sa brosir Was Life Created? ek The Origin of Life​—Five Questions Worth Asking e sa liv Is There a Creator Who Cares About You? Dan bann magazin Awake!, souvan i annan bann entervyou avek bann syantis ek lezot ki eksplike akoz zot krwar dan Bondye aprezan. I osi annan sa seri lartik ki apel “Was It Designed?” ki enkli bann detay lo bann zannimo ek lezot keksoz dan lanatir e osi lo ki mannyer bann syantis in esey kopi fason ki sa bann keksoz i marse.

6. Ki mannyer bann zouti resers i kapab ed ou?

⁶ En frer Leta-z-ini ki annan 19 an i dir sa lo sa de brosir ki nou fek mansyonnen: “Zot in en gran led pour mwan. Mon’n etidye sa de brosir apepre douz fwa.” En ser Lafrans ti ekri: “Sa lartik, ‘Was It Designed?’ ti sirprann mwan! Sa bann lartik i montre ki bann pli gran enzenyer i kapab imit bann keksoz ki dan lanatir, me zot pa pou zanmen kapab arive fer li sitan konplike parey lanatir.” Paran en fiy 15 an Sid Afrik ti dir: “Premye keksoz ki normalman nou fiy i lir dan Awake! i sa lartik ‘Interview.’” Sa bann piblikasyon i kapab ed ou osi vwar laprev ki i annan en Kreater e ou pou kapab rekonnet e rezet bann fo lansennyman. Ou lafwa pou sitan for ki ou pou zis parey en pye dibwa ki son rasin i al dan fon e ki reste debout menm si i annan gro divan.​—Zeremi 17:5-8.

7. Akoz Bondye i anvi ou servi ou abilite pour reflesir?

⁷ Eski i mal pour demann kestyon tel parey, ‘Akoz mon krwar dan Labib?’ Non. Zeova pa anvi ou krwar dan en keksoz zis akoz lezot i krwar ladan. I anvi ou servi ou “abilite pour reflesir” pour konn Labib e prouve ki i vreman sorti kot li. Pli ou konn sa ki Labib i dir, pli ou lafwa dan li pou agrandi. (Lir Romen 12:1, 2; 1 Timote 2:4.) En fason pour konn Labib i par etidye bann topik spesifik ki ou ti a kontan konn plis lo la.

8, 9. (a) Ki topik serten i kontan etidye? (b) Ki byenfe serten ti gannyen ler zot ti reflesir lo sa ki zot lir?

⁸ Serten i kontan etidye bann profesi oubyen konpar bann resi Labib avek sa ki bann istoryen, syantis oubyen arkeolog i dir. Pran par egzanp Zenez 3:15. Zeova ti donn sa profesi vreman enportan zis apre ki Adan ek Ev ti rebel kont li ek son fason dirize. Zenez 3:15 i premye parmi plizyer profesi ki ed nou konpran ki mannyer Rwayonm Bondye pou prouve ki fason dirize Bondye i pli meyer e ki mannyer i pou met en lafen avek soufrans. Ki mannyer ou kapab etidye Zenez 3:15? Ou kapab fer en lalis bann verse Labib ki donn ou plis detay lo ki mannyer sa profesi pou ganny akonplir. Apre ou  kapab rode kan sa bann verse ti ganny ekrir e met zot dan lord. Si ou fer sa, ou pou vwar ki bann ekriven Labib ti viv dan diferan lepok e ki sakenn ant zot ti ekrir en keksoz ki ti fer sa profesi vin pli kler. Sa i kapab ed ou prouve ki lespri sen Zeova ti gid zot.​—2 Pyer 1:21.

⁹ En frer Lalmanny ti reflesir lo ki mannyer sak liv Labib i donn plis lenformasyon lo sa Rwayonm. I ti dir: “Sa i vre, menm si apepre 40 zonm ki’n ekrir Labib. Laplipar zot ti viv dan diferan letan e zot pa ti konn kanmarad.” En ser Lostrali ti pe etidye en lartik dan Latour Veyer e i ti aprann ki mannyer Lapak i relye avek Zenez 3:15 e avek Mesi. ^[2] (Vwar lezot not.) I ti ekri: “Sa letid ti ouver mon lizye pour vwar ki mannyer Zeova i merveye. I ti vreman enpresyonn mwan pour vwar ki mannyer Zeova ti mazin pour fer en tel laranzman avek bann Izraelit e pour sa laranzman ganny akonplir par Zezi. Mon ti bezwen aret en kou e reflesir lo ki degre sa profesi lo Lapak ti enkrwayab!” Akoz sa ser ti santi koumsa? I ti reflesir seryezman lo sa ki i ti lir e i ti konpran sa lenformasyon. Sa ti fortifye son lafwa e fer li vin pli pros avek Zeova.​—Matye 13:23.

10. Ki mannyer lonnekte bann ekriven i fortifye nou lafwa dan Labib?

¹⁰ Mazin osi lo lonnekte bann zonm ki’n ekri Labib. Zot ti toultan dir laverite e zot pa ti per pour fer li. Bann ekriven sa letan ti souvan ekri zis bann bon keksoz konsernan zot nasyon ek zot sef. Me bann profet Zeova pa ti zis ekri lo bann bon keksoz, me osi lo bann move keksoz ki bann dimoun Izrael ek zot lerwa ti fer. (2 Kronik 16:9, 10; 24:18-22) Zot ti menm mansyonn zot prop fot ek fot lezot serviter Bondye. (2 Samyel 12:1-14; Mark 14:50) En zenn frer Grannbretanny i dir: “Lonnekte koumsa i rar. Sa i asir nou ki Labib i vreman sorti kot Zeova.”

11. Ki mannyer gidans Labib i konvenk nou ki Labib i sorti kot Bondye?

¹¹ Ler dimoun i les Labib gid zot fason viv, zot vwar sa bon lefe ki i annan lo zot. Sa ti konvenk zot ki Labib i sorti kot Bondye. (Lir Psonm 19:7-11.) En zenn ser Zapon ti ekri: “Ler mon fanmir ti aplik bann lansennyman baze lo Labib, nou ti vreman ere. Nou ti eksperyans lape, linite ek lanmour.” Labib in gid bokou pour realize ki serten keksoz ki zot ti krwar ladan pa ti vre. (Psonm 115:3-8) I ed dimoun pour depan lo Zeova, sa Bondye tou pwisan ki promet en meyer lavenir. De lot kote, serten ki dir napa Bondye zot in fer lanatir vin zot Bondye. Lezot i dir imen i kapab donn nou en meyer lavenir, me ler nou get sa ki zot in fer ziska aprezan, zot pa’n kapab arive rezourd bann problenm sa lemonn.​—Psonm 146:3, 4.

12, 13. Ki mannyer nou kapab koz avek lezot lo kreasyon oubyen lo Labib?

¹² Ler ou koz lo kreasyon oubyen lo Labib avek lezot, premyerman rode ki  zot vreman krwar. Rapel ki serten ki krwar dan evolisyon i osi krwar ki Bondye i egziste. Zot dir ki i’n servi evolisyon pour kree lezot keksoz. Lezot i krwar ki evolisyon i bezwen vre akoz i ganny montre dan lekol. Serten i aret krwar dan Bondye akoz zot dezapwente avek larelizyon. Alor, premyerman demann sa dimoun sa ki i krwar ladan e akoz i krwar sa. Apre ekout byen sa ki i dir. Si ou fer sa i pou pli pare pour ekout ou.​—Tit 3:2.

¹³ Si en dimoun i dir ki ou bet pour krwar ki i annan en Kreater, ki mannyer ou pou reponn? Avek respe, demann sa dimoun pour eksplik ou ki mannyer i krwar lavi ti konmanse. Ou kapab dir li ki si lavi in evolye, sa premye keksoz vivan ti pou’n bezwen kapab fer bann kopi son prop lekor. Anfet, en profeser chemistry ti dir ki i ti pou bezwen annan lezot keksoz, (1) en keksoz parey en lapo pour protez li, (2) sa abilite pour ganny e servi lenerzi, (3) lenformasyon pour kontrol son laform ek groser e (4) sa abilite pour fer kopi sa lenformasyon. I azoute: “Nou emerveye ler nou konpran ki en senp keksoz vivan i sitan konplike.”

14. Ki rezonnman senp ou kapab servi ler nou pe koz lo kreasyon?

¹⁴ Ler ou pe diskit lo kreasyon, ou kapab servi sa rezonnman senp ki zapot Pol ti servi. I ti ekri: “Tou lakaz i ganny konstrir par en dimoun, me sa enn ki’n konstri tou keksoz i Bondye.” (Ebre 3:4) Byensir i bezwen annan en dimoun ki fer plan e konstri en lakaz. Pareyman, bann keksoz vivan ki pli konplike ki lakaz in bezwen ganny plàn e fer par kelken. Ou osi kapab servi nou bann piblikasyon. En ser ti koz avek en zenn onm ki pa ti krwar ki i annan en Bondye. I ti donn li sa de brosir ki nou’n koz lo la pli boner e apepre en semenn pli tar sa zenn onm ti dir: “Aprezan, mon krwar dan Bondye.” I ti konmans etidye Labib e pli tar i ti vin enn nou frer.

15, 16. Ki ou devret fer avan ou eksplik en dimoun ki Labib i sorti kot Bondye? Ki nou devret toultan mazinen?

¹⁵ Si en dimoun pa tro krwar dan Labib, ki mannyer ou pou rezonn avek li? Parey i’n ganny mansyonnen avan, premyerman demann ki i krwar ladan. An plis, rode kwa ki enteres li. (Proverb 18:13) Si i kontan lasyans, donn li bann legzanp sorti dan Labib ki montre ki sa ki Labib i dir lo lasyans i toultan vre. Si i kontan listwar, ou kapab servi en levennman ki ganny dekrir dan bann liv listwar e montre li ki Labib ti’n predir sa levennman bokou letan avan ki sa levennman ti vreman arive. Lezot i kapab ekout ou si ou montre zot en keksoz dan Labib ki kapab amelyor zot lavi, tel parey  bann konsey dan Sermon lo Montanny.

¹⁶ Mazinen, nou pa anvi argimante avek dimoun. Nou anvi ki zot kontan pour koz avek nou e aprann konn plis lo Labib. Alor demann bann kestyon avek respe e ekout zot byen. Ler ou eksplik ou krwayans avek en dimoun, demontre lapolites, espesyalman si sa dimoun i pli vye ki ou. Si ou annan respe pour lezot, tre probab lezot zot osi pou annan respe pour ou. Zot pou enpresyonnen ki ou konn byen ou krwayans menm si ou ankor zenn. Byensir si en dimoun i zis oule argimante oubyen boufonn ou, ou pa oblize reponn li.​—Proverb 26:4.

17, 18. (a) Kwa ki kapab ed ou fortifye ou lafwa dan Labib? (b) Ki kestyon nou pou diskite dan sa lot lartik?

¹⁷ Nou kapab konn bann lansennyman de baz lo Labib, me nou bezwen plis ki sa pour ki nou annan en lafwa for. Nou bezwen rode e dekouver bann laverite pli profon ki ladan, konmsi nou ti pe rod en trezor kasyet. (Proverb 2:3-6) Enn bann pli bon fason pour fortifye ou lafwa, i lir Labib an antye. Anfet ou kapab esey lir li dan enn an. Sa ti ed en sirveyan rezyonal vin pli pros avek Zeova ler i ti zenn. I ti dir: “En keksoz ki ti ed mwan pour apresye ki Labib i Parol Bondye i par lir li an antye. Bann zistwar Labib ki mon’n aprann ler mon ti ankor zenn ti finalman fer sans.” Ou osi kapab servi bann zouti resers ki ou annan dan ou langaz ki pou ed ou konpran sa ki ou lir. Ou kapab servi Watchtower Library lo DVD, Watchtower BIBLIOTEK LO ENTERNET oubyen Liv resers pour Temwen Zeova.

¹⁸ Paran, ou ki annan sa responsabilite pour ansenny ou zanfan lo Zeova. Alor, ki mannyer ou kapab ed ou zanfan pour annan en lafwa for dan Zeova? Sa lot lartik pour diskit lo konman ou kapab fer sa.