1, 2. (1) Cov hluas uas teev tiam Yehauvas tau ntsib li cas? (2) Phau Vajlugkub cob qhia peb li cas?

NYOB hauv tebchaws Askiv, muaj ib tug tub kawm ntawv hais rau ib tug muam tias: “Koj ntse npaum ko, koj tseem ntseeg Vajtswv thiab.” Muaj ib tug kwvtij nyob tebchaws Ntsaws Mes Nis hais tias: “Kuv cov xibhwb qhia ntawv xav tias zaj uas phau Vajlugkub qhia txog ntuj tsim teb raug yog dab neeg xwb. Lawv xav tias ntshe tag nrho cov tub kawm ntawv puavleej ntseeg tias ib puas tsav yam txia los xwb.” Muaj dua ib tug ntxhais nyob Fab Kis teb hais tias: “Kuv cov xibhwb qhia ntawv xav tsis thoob tias tseem muaj ib co tub kawm ntawv ntseeg tej uas phau Vajlugkub qhia thiab.”

² Niaj hnub no, coob leej tsis ntseeg tias muaj ib tug Vajtswv tsim peb. Tej zaum koj yog ib tug hluas uas twb teev tiam Yehauvas lawm lossis tseem tabtom kawm Vajlugkub. Puas muaj lwm tus yaum kom koj ntseeg tias tsis muaj ib tug Tswv Tsim? Puas muaj leejtwg qhia kom koj ntseeg tias ib puas tsav yam txia los xwb? Yog koj twb ntsib li no lawd, rau siab ntso kawm Vajlugkub koj thiaj tuav tau kev ntseeg ruaj nreeg. Vajtswv Txojlus qhia tias: “Kev txawj ntse yuav tsom kwm koj.” Yuav tsom kwm koj li cas? Yuav pab koj zam lub qab ntuj no tej  tswvyim thiab tuav kev ntseeg ruaj nreeg rau Yehauvas.​—Nyeem Paj Lug 2:10-12.

3. Hauv zaj no peb yuav kawm txog dabtsi?

³ Peb yuav tsum paub Yehauvas zoo, peb thiaj muaj kev ntseeg rau nws. (1 Timaute 2:4) Thaum koj nyeem phau Vajlugkub thiab tej ntaub ntawv uas lub koom haum luam tawm, tsis txhob nyeem ib lwm thoob plaws xwb. Koj yuav tsum muab ua tib zoo xav koj thiaj nkag siab. (Mathai 13:23) Hauv zaj no peb yuav kawm txog qhov ntawd. Yog peb rau siab kawm li no, peb yuav pom tseeb tias Yehauvas yog peb tus Tswv Tsim thiab nws yog tus npaj phau Vajlugkub rau peb.​—Henplais 11:1.

4. (1) Cov ntseeg Vajtswv puas tau pom Vajtswv ib zaug li? (2) Cov uas ntseeg tias ib puas tsav yam txia los xwb, puas tau pom ib yam dabtsi txia li? (3) Ua ntej peb ntseeg ib yam twg, peb yuav tsum ua li cas?

⁴ Tej zaum koj twb hnov coob leej hais li no: “Kuv ntseeg tias ib puas tsav yam yog txia los vim cov neeg tshawb txujci tau qhia li ntawd. Peb twb pom tsis tau Vajtswv, ua cas koj tseem ntseeg nws thiab?” Peb lub qhov muag yeej pom tsis tau Vajtswv thiab peb kuj tsis tau pom nws tsim ib yam dabtsi tiag. (Yauhas 1:18) Tiamsis cov uas ntseeg tias ib puas tsav yam txia los xwb, kuj ntseeg yam uas lawv tsis tau pom thiab. Twb tsis tau muaj leejtwg pom liab txia ua neeg ib zaug li, ua cas lawv ho ntseeg thiab? (Yauj 38:1, 4) Peb txhua tus yuav tsum muab tej no los ua tib zoo xav ua ntej peb ntseeg. Coob leej tau siv sijhawm los kawm txog tej tsiaj txhu thiab lub qab ntuj no lawv thiaj pom tias yuav tsum muaj ib tug Vajtswv. Lawv pom tseeb tias Vajtswv yog tus tsim ib puas tsav yam, nws muaj hwjchim, thiab nws zoo kawg nkaus li.​—Loos 1:20.

5. Cov ntawv thiab cov yeeb yaj kiab twg yuav pab peb kawm txog tej uas Vajtswv tau tsim?

⁵ Thaum peb saib tej uas Vajtswv tsim nyob puag ncig peb thiab ua tib zoo xav txog tej ntawd, peb pom tias Vajtswv tsim txhua yam zoo kawg li. Txawm peb qhov muag pom tsis tau Vajtswv los “vim peb ntseeg peb thiaj nkag siab tias” muaj Nws tiag. Peb pom tias Yehauvas yog ib tug Vajtswv uas muaj tswvyim, muaj kev hlub, thiab txawj xav heev. (Henplais 11:3, 27) Yog peb nyeem tej uas cov neeg kawm txujci tau tshawb txog, peb yuav kawm tau ntau yam txog tej uas Vajtswv tau tsim. Daim yeeb yaj kiab “Koj Tej Npoj Xav Li Cas Txog Kev Ntseeg Vajtswv” thiab Phau Tsom Faj lub 6 Hli tim 1 xyoo 2015, sab 3 txog 7, muaj tej ntsiab lus uas pab peb kawm txog tej uas Vajtswv tau tsim. ^[1] (Saib cov lus qhia rau zaj no.) Tsis tas li ntawd xwb, muaj tej zaj hauv phau Awake! uas qhia txog cov neeg tshawb txujci seb yog vim li cas lawv ho los ntseeg Vajtswv. Muaj dua tej zaj hu ua “Was It Designed?” (Puas Muaj Ib Tug Tsim?) uas piav txog tej tsiaj txhu thiab tej paj ntoos seb cov neeg tshawb txujci tau muab tej ntawd ua qauv tsim tej ub tej no li cas.

6. Cov ntaub ntawv Vajlugkub yuav pab tau peb li cas?

⁶ Ib tug kwvtij muaj 19 xyoos nyob tebchaws U.S.A., hais tias muaj 2 phau ntawv uas qhia txog tus Tswv Tsim pab tau nws heev. Nws hais li no: “Kuv twb muab kawm 10 tawm lwm lawm.” Ib tug muam nyob Fab Kis teb hais tias: “Tej zaj hu ua ‘Was It Designed?’ ua rau kuv xav tsis thoob li! Kuv pom tias hauv lub qab ntuj no cov kws tooj  kws hlau uas txawj tshaj, twb tsim tsis tau ib yam zoo npaum li tej uas Vajtswv tsim.” Muaj ob niam txiv nyob Afika Qab Teb tau hais li no txog nkawd tus ntxhais uas muaj 15 xyoos: “Thaum ib phau Awake! twg tawm, wb tus ntxhais xub nyeem zaj hu ua ‘Interview.’ ” Cov ntaub ntawv no yuav pab koj pom tias yeej muaj ib tug Tswv Tsim tiag tiag li. Thaum koj ua zoo kawm tej no, koj txojkev ntseeg yuav cog ruaj khov ib yam li tsob ntoo uas tej cag ntsia av tob heev, txawm cua daj cua dub nplawm npaum li cas los tsis vau li. (Yelemi 17:5-8) Cov ntaub ntawv no yuav pab koj luj seb tej uas koj tau hnov luag qhia puas muaj tseeb los tsis muaj.

7. Ua cas Yehauvas xav kom peb “txawj cais tias yam twg zoo yam twg phem”?

⁷ Puas zoo rau peb muaj lus nug txog phau Vajlugkub? Yeej zoo rau peb ua li ntawd. Yehauvas xav kom peb “txawj cais tias yam twg zoo yam twg phem” peb thiaj paub tias peb nrhiav tau qhov tseeb lawm tiag. Nws tsis xav kom peb lam caum luag tej ntseeg Vajtswv xwb. Zoo rau peb muab tej uas peb kawm los ua tib zoo xav, peb thiaj to taub qhov tseeb. Thaum peb paub qhov tseeb lawd, yuav pab peb tuav kev ntseeg ruaj nreeg. (Nyeem Henplais 5:14; 1 Timaute 2:4.) Yog koj xav paub Vajlugkub zoo dua, siv sijhawm los kawm cov ntsiab lus uas koj xav paub txog.

8, 9. (1) Ib txhia nyiam tshawb nrhiav dabtsi txog phau Vajlugkub? (2) Ib txhia tau hais li cas txog tej lawv tau kawm?

⁸ Ib txhia nyiam kawm txog tej lus faj lem hauv phau Vajlugkub. Muaj dua ib txhia nyiam muab tej zaj uas lawv tau kawm hauv phau Vajlugkub piv rau tej keeb kwm lossis tej uas cov neeg kawm txujci tau tshawb pom. Xav txog thawj lo lus faj lem hauv Chiv Keeb 3:15. Tom qab Adas thiab Eva fav xeeb tawm tsam Yehauvas lub hwjchim kav, Yehauvas thiaj hais cov lus no. Zaj lus faj lem ntawd pab kom peb nkag siab lub ntsiab hauv phau Vajlugkub txog Vajtswv lub Nceeg Vaj. Vajtswv yuav siv nws lub Nceeg Vaj los ua rau sawvdaws pom tias Nws tib leeg xwb thiaj tsim nyog kav ib puas tsav yam. Yav tom hauv ntej lub Nceeg Vaj ntawd yuav muab kev txom nyem tshem tawm huvsi mus. Koj yuav tshawb nrhiav Chiv Keeb 3:15 li cas? Siv sijhawm los tshawb nrhiav lwm cov nqe Vajlugkub uas piav txog Chiv Keeb 3:15. Tom qab ntawd, muab cov nqe Vajlugkub sau cia seb nqe twg sau rau lub caij twg. Thaum koj ua li no, koj yuav pom tias ib tiam dhau ib tiam cov neeg sau Vajlugkub puavleej sau txog tib lub ntsiab hauv Chiv Keeb 3:15. Tej no yuav pab koj pom tias Yehauvas lub hwj huam dawb huv yeej pab lawv sau phau Vajlugkub tiag.​—2 Petus 1:21.

⁹ Ib tug kwvtij nyob tebchaws Ntsaws Mes Nis pom tias txhua phau ntawv hauv phau Vajlugkub qhia tsi ntsees txog lub Nceeg Vaj. Nws hais tias: “Txawm tias muaj txog li 40 tus txivneej sau phau Vajlugkub los, ua cas lawv sau txog tib lub ntsiab xwb. Nyias nyob nyias ib lub caij thiab coob tus twb tsis tau sib ntsib li.” Muaj dua ib tug muam nyob tebchaws Australia [au·xi·ta·lia] tau nyeem txog txoj Kevcai Hla Dhau hauv Phau Tsom Faj. Nws pom tias txoj kevcai ntawd muaj feem nrog Chiv Keeb 3:15 thiab tus Mexiyas. ^[2] (Saib cov lus qhia rau zaj no.) Nws hais tias: “Thaum kuv kawm tau li ntawd, kuv pom tias Yehauvas zoo npaum li cas tiag. Ua cas Yehauvas tseem npaj tej kevcai no rau cov Yixayee coj kom thiaj muaj tiav rau Yexus. Ua rau kuv xav tsis thoob li. Kuv thiaj siv sijhawm los ua tib zoo xav txog pluas hmo uas cov Yixayee noj ua Kevcai Hla Dhau tias tshwj xeeb npaum li cas tiag!” Ua cas tus muam ntawd xav tau ntom ua luaj? Rau qhov nws ua tib zoo xav txog tej uas nws tau nyeem thiab nws khaws tau lub ntsiab los siv. Qhov ntawd ua rau nws hajyam txav ze Yehauvas thiab tuav kev ntseeg ruaj nreeg.​—Mathai 13:23.

10. Vim cov neeg sau phau Vajlugkub tsis zais siab, pab tau peb hajyam ntseeg phau Vajlugkub li cas?

¹⁰ Kuj zoo rau peb xav txog cov txivneej uas sau phau Vajlugkub. Lawv ib txwm sau qhov tseeb  xwb, lawv tsis zais siab. Cov sau keeb kwm txheej thaum ub, tsuas sau tej yam zoo txog lawv cov thawj coj thiab lawv haiv neeg xwb. Tiamsis Yehauvas cov tub qhe tsis txaj muag sau qhov zoo qhov phem txog tej uas cov tibneeg thiab cov vajntxwv Yixayee tau ua. (2 Vaj Keeb Kwm 16:9, 10; 24:18-22) Lawv tseem sau txog tej yam uas lawv thiab lwm cov tub qhe tau ua yuam kev thiab. (2 Xamuyee 12:1-14; Malakau 14:50) Ib tug tub hluas nyob Askiv teb thiaj hais tias: “Tsawg tsawg tus thiaj qhia ncaj hlo li ntawd. Lawv cov lus ua rau peb hajyam tso siab tias phau Vajlugkub yog Yehauvas npaj tseg rau peb tiag.”

11. Ua cas peb thiaj paub tias Vajtswv yog tus npaj phau Vajlugkub rau peb?

¹¹ Thaum tibneeg coj lawv lub neej raws li phau Vajlugkub qhia pab tau lawv lub neej heev. Qhov no ua pov thawj tias phau Vajlugkub yog Vajtswv npaj tseg rau peb tiag. (Nyeem Ntawv Nkauj 19:7-11.) Ib tug ntxhais hluas nyob Nyiv Pooj teb tau sau li no: “Thaum kuv tsev neeg coj raws li phau Vajlugkub qhia ua rau peb zoo siab heev. Pab kom peb nyob sib haum xeeb, koom ib lub siab, thiab txawj sib hlub.” Phau Vajlugkub tso tau coob leej dim tej kev lig kevcai cuav uas pab tsis tau tibneeg. (Ntawv Nkauj 115:3-8) Phau Vajlugkub pab tibneeg tso siab rau Yehauvas, uas yog tus Vajtswv muaj hwjchim loj kawg nkaus, thiab pab lawv muaj kev vam kev cia siab rau yav tom hauv ntej. Ua li, cov uas ntseeg tias tsis muaj Vajtswv ho tso siab rau dabtsi? Lawv tso siab yuam kev rau tej uas Vajtswv tau tsim. Lawv qhuas txog tej xyoob tej ntoo, tej roob tej hav, thiab lub hnub lub hli yam li tej ntawd yog ib tug vajtswv. Muaj dua cov ho xav tias tsim nyog peb tso siab rau tibneeg. Tiamsis tej keeb kwm qhia tseeb tias neeg twb kho tsis tau tej teeb meem hauv lub qab ntuj no.​—Ntawv Nkauj 146:3, 4.

12, 13. Thaum peb qhia lwm tus txog tus Tswv Tsim lossis txog phau Vajlugkub, peb yuav qhia li cas?

¹² Thaum koj nrog tibneeg tham txog tus Tswv Tsim lossis txog phau Vajlugkub, koj yuav tsum xub nug seb lawv ntseeg li cas. Muaj ib txhia ntseeg tias muaj Vajtswv, tiamsis lawv xav tias nws tsim kom ib puas tsav yam txawj txia. Muaj dua ib txhia ntseeg tias ib puas tsav yam txia los vim lawv ib txwm kawm li ntawd hauv tsev kawm ntawv. Tiamsis ho muaj ib co uas tsis kam ntseeg Vajtswv rau qhov lawv tsis txaus siab rau tej kev ntseeg. Tus yuav ntseeg li cas los muaj. Yog li ntawd, xub nug seb lawv ntseeg li cas thiab nug seb yog vim li cas lawv thiaj ntseeg li ntawd. Ua tib zoo mloog thaum lawv teb koj. Yog koj cuab pob ntseg mloog lawv ces thaum koj qhia lawv, lawv yuav cuab pob ntseg mloog koj thiab.​—Titau 3:2.

¹³ Yog leejtwg thuam tias tsis tas ntseeg tus Tswv Tsim, koj yuav teb li cas? Zoo rau koj nug seb nws ntseeg li cas. Nug seb txhua yam uas ciaj sia xeeb txawm los li cas. Yog tias ib puas tsav yam txia los xwb, ces thawj thawj yam uas muaj sia yuav tsum txawj faib txawj huam. Ib tug xibhwb kawm txujci tau hais tias yuav kom thawj thawj yam uas muaj sia huam tau li ntawd, yuav tsum muaj 4 yam no: (1) Yuav tsum muaj ib txheej tawv qhwv yam ntawd; (2) Yuav tsum muaj lwm yam los yug yam ntawd; (3) Yuav tsum muaj ib co genes [ntsis] uas qhia tias yam ntawd yuav hlob li cas; thiab (4) Yam ntawd yuav tsum txawj faib thiab xya ib co ntxiv. Tus xibhwb ntawd hais tias txawm tej yam uas tsuas muaj tib lub keeb (cell) xwb los, twb ua rau peb xav tsis thoob thiab paub tsis tas.

14. Thaum peb qhia tibneeg tias Vajtswv tsim ib puas tsav yam, zoo rau peb qhia li cas?

¹⁴ Yog koj tsis pom qab qhia tibneeg txog tus Tswv Tsim, koj kuj siv tau tej lus piv txwv zoo li tus tubtxib Povlauj tau siv. Nws sau tias: “Vim txhua lub tsev muaj tus uas ua, tiamsis tus uas tsim txhua yam huvsi yog Vajtswv.” (Henplais 3:4) Txhua lub tsev yeej muaj tus ua tiag. Txhua yam tsis hais tej me nas me noog tej xyoob tej ntoo, tseem nyuaj ua tshaj tej vaj tej tsev ntawd.  Yog li ntawd, yuav tsum muaj ib tug tsim thiaj muaj tau tej ntawd thiab! Thaum koj qhia lwm tus, koj kuj siv tau tej ntaub ntawv uas lub koom haum luam. Muaj ib tug tub hluas uas tsis ntseeg tias muaj Vajtswv. Ib tug muam tau nrog nws tham thiab muab 2 phau ntawv uas qhia txog tus Tswv Tsim pub rau nws. Lub lim tiam tom qab, thaum tus muam rov ntsib nws, nws hais tias: “Nimno kuv ntseeg tias muaj Vajtswv lawm tiag.” Nws thiaj pib kawm Vajlugkub thiab los ua ib tug Timkhawv lawm.

15, 16. (1) Ua ntej peb qhia tibneeg tias Vajtswv yog tus npaj phau Vajlugkub rau peb, peb yuav nug lawv li cas? (2) Peb yuav tsum nco ntsoov li cas thaum peb mus qhia tibneeg?

¹⁵ Yog peb nrog ib tug uas tsis ntseeg phau Vajlugkub tham, peb yuav qhia li cas thiaj rub tau nws lub siab? Zoo uas peb xub nug seb nws ntseeg li cas thiab nws nyiam kawm txog tej ntsiab lus twg. (Paj Lug 18:13) Yog nws nyiam kawm txog kev tshawb fawb txujci ces qhia nws txog tej zaj hauv phau Vajlugkub uas tham txog tej ntawd. Yog nws nyiam kawm txog keeb kwm, ces tham txog tej zaj lus faj lem hauv phau Vajlugkub uas tau muaj tiav raws nkaus li keeb kwm. Ib txhia nyiam kawm txog tej ntsiab lus uas yuav pab tau lawv lub neej. Tej zaum cov ntawd yuav nyiam Yexus zaj lus qhia saum roob.

¹⁶ Nco ntsoov tsis txhob nrog tibneeg sib cav sib ceg. Peb xav kom lawv zoo siab nrog peb hais lus thiab kom lawv xav kawm Vajlugkub. Txhob nug tej yam uas yuav ua rau lawv txaj muag lossis npau taws. Thaum lawv teb ua tib zoo mloog. Thaum peb qhia lawv txog tej uas peb ntseeg, peb yuav tsum paub cai, txhob hais lus siab lawv. Yog peb nrog cov laus tham, peb yuav tsum hajyam ua zoo xaiv peb cov lus. Yog peb saib taus lwm tus, ces lawv yuav saib taus peb thiab. Lawv yuav pom tias txawm peb tseem hluas los, peb txawj xav. Yog tias lwm tus xav thuam peb lossis sib cav xwb, zoo rau peb tsis txhob teb lawv.​—Paj Lug 26:4.

17, 18. (1) Yuav ua li cas koj thiaj hajyam ntseeg phau Vajlugkub? (2) Peb yuav kawm txog dabtsi rau lwm zaj?

¹⁷ Peb yeej paub cov ntsiab lus tseem ceeb hauv phau Vajlugkub, tiamsis yuav kom peb tuav rawv peb txojkev ntseeg peb yuav tsum rau siab kawm ntxiv. Tshawb nrhiav tej ntsiab lus tob tob hauv phau Vajlugkub yam li nrhiav nyiaj nrhiav kub. (Paj Lug 2:3-6) Zoo rau peb siv sijhawm los nyeem phau Vajlugkub kom thoob plaws. Npaj seb ib xyoos koj nyeem puas thoob ib lwm. Ib tug kwvtij uas saib xyuas thaj tsam hais tias thaum nws tseem hluas twb yog nws nyeem Vajlugkub li ntawd nws thiaj txav ze rau Yehauvas. Nws hais ntxiv tias: “Kuv pom tias phau Vajlugkub yog Vajtswv Txojlus tiag tiag. Thaum kuv nyeem li ntawd, kuv mam li to taub tej zaj kawm uas kuv tau kawm thaum kuv tseem yau.” Tsis tas li ntawd xwb, muaj tej twj tshawb nrhiav Vajlugkub uas lub koom haum tau npaj tseg. Peb muaj LUB VEJ XAIJ TSHAWB NRHIAV VAJLUGKUB thiab Yehauvas Cov Timkhawv Phau Ntawv Tshawb Nrhiav Vajlugkub. Peb kuj muaj daim DVD Watchtower Library thiab phau Watch Tower Publications Index ua ntau yam lus.

¹⁸ Cov ua niam ua txiv, nej yog cov uas yuav cob qhia nej cov menyuam txog Yehauvas. Nej yuav ua li cas pab kom nej cov menyuam tuav kev ntseeg ruaj nreeg? Hauv zaj tom ntej peb yuav kawm seb cov ua niam ua txiv yuav cob qhia lawv cov menyuam li cas.