1, 2. Sɔntɛnde wetin sɔm yɔŋ wan dɛn we de sav Jiova kin tink bɔt? Us advays di Baybul gi wi?

WAN yɔŋ sista we de na Briten, in klasmet tɛl am se: “Yu luk gɛt sɛns pasmak fɔ lɛ yu biliv Gɔd.” Wan brɔda na Jamani rayt se: “Mi ticha dɛn si di stori na di Baybul bɔt aw Gɔd mek di wɔl as lay lay stori. Ɛn i nɔ min natin to dɛn we di studɛnt dɛn biliv se ɔltin kam bay chans.” Wan yɔŋ sista na Frans se: “Di ticha dɛn na mi skul kin sɔprayz se sɔm studɛnt dɛn de we stil biliv di Baybul.”

² Bɔku pipul dɛn tide nɔ biliv se na Gɔd mek wi. If yu na yɔŋ pɔsin we de sav Jiova ɔ we de lan bɔt am, sɔntɛm yu go de wɔnda aw yu go pruv se na in mek wi. Di Baybul de ɛp wi fɔ tek tɛm tink bɔt wetin wi dɔn yɛri ɔ rid ɛn aw wi go tink di rayt we. Gɔd in Wɔd se: “Yu go gɛt pawa fɔ de si fa ɛn ɔndastand.” Aw dat go bi? I go ɛp yu nɔ fɔ biliv lay lay tin dɛn ɛn fɔ gɛt fet pan Jiova mɔ ɛn mɔ.—Rid Prɔvabs 2:​10-12.

3. Wetin wi go tɔk bɔt insay dis atikul?

³ Fɔ gɛt fet pan Jiova mɔ, wi fɔ no am gud gud wan. (Fɔs Lɛta To Timoti 2:​4) So we yu de rid di Baybul ɔ wi buk ɛn magazin dɛn, i rili impɔtant fɔ stɔp ɛn tink bɔt wetin yu de rid. Tray fɔ ɔndastand wetin yu de rid. (Matyu 13:​23) If yu de  stɔdi dis kayn we, yu go kam fɔ no bɔku tin dɛn we de sho se na Jiova mek ɔltin ɛn na frɔm am di Baybul kɔmɔt. (Di Ibru Pipul Dɛn 11:​1) Lɛ wi tɔk bɔt aw wi go ebul du dis.

4. Aw di wan dɛn we biliv se ɔltin kam bay chans fiba di wan dɛn we biliv se Pɔsin de we mek ɔltin? Wetin wi ɔl fɔ du?

⁴ Sɔntɛm sɔmbɔdi go tɛl yu se, “A biliv se ɔltin kam bay chans bikɔs sayɛnsmɛn dɛn dɔn se na tru. Aw yu go biliv se Gɔd de we nɔbɔdi nɔ wande si am?” Na so bɔku pipul dɛn de tink. Na tru se nɔn pan wi nɔ ɛva si Gɔd ɔ si we i de mek sɔntin. (Jɔn 1:​18) Bɔt we dɛn pipul dɛn we biliv se ɔltin kam bay chans? Dɛnsɛf biliv sɔntin we dɛn nɔ de si. No sayɛnsman ɔ ɛni mɔtalman nɔ wande si usay sɔntin we gɛt layf de chenj to ɔda kayn tin. Fɔ ɛgzampul, nɔbɔdi nɔ ɛva si usay snek ɔ kondo de chenj to ɔda animal lɛk layɔn ɔ ɛlifant. (Job 38:​1, 4) So wi ɔl fɔ luk fɔ tin dɛn we na tru, tek tɛm tink bɔt dɛn, ɛn disayd if na so dɛn rili bi. Bɔku pipul dɛn dɔn luk di tin dɛn we Gɔd mek ɛn “no gud gud wan” se Gɔd de. Dɛn dɔn si klia wan se na in mek ɔl dɛn tin ya, i gɛt pawa, ɛn i gɛt bɔku wɔndaful kwaliti dɛn.—Lɛta Fɔ Rom 1:​20.

5. Wetin-ɛn-wetin go ɛp wi fɔ lan mɔ bɔt di tin dɛn we Gɔd mek?

⁵ We wi luk ɔl di tin dɛn we Gɔd mek ɛn tink gud gud wan bɔt dɛn, wi go si se ɔltin we i mek rili wɔndaful. Pan ɔl we wi nɔ de si Gɔd, “wi ɔndastand se” Pɔsin de we mek ɔltin. Wi dɔn kam fɔ no se i gɛt fayn kwaliti dɛn ɛn i rili gɛt sɛns. (Di Ibru Pipul Dɛn 11:​3, 27) Wi kin lan mɔ bɔt di tin dɛn we i mek bay we wi de rid bɔt wetin sayɛnsman dɛn dɔn kam fɔ no. Wi go fɛn sɔm pan dɛn tin dɛn ya na di fim we nem The Wonders of Creation Reveal God’s Glory, di smɔl buk dɛn we nem Was Life Created?, The Origin of Life—Five Questions Worth Asking, ɛn di buk we nem Is There a Creator Who Cares About You? Bɔku tɛm, insay di Awake! magazin dɛn, dɛn kin intavyu sayɛnsman dɛn ɛn ɔda pipul dɛn we de ɛksplen wetin mek naw dɛn biliv se Gɔd de. Ɛn di atikul dɛn we nem “Was It Designed?” kin tɔk mɔ bɔt animal ɛn ɔda tin dɛn we Gɔd mek ɛn ɛgzampul dɛn bɔt aw sayɛnsman dɛn dɔn tray fɔ falamakata di we aw dɛn tin ya de wok.

6. Aw di tin dɛn we yu go yuz fɔ stɔdi go ɛp yu?

⁶ Wan brɔda we de na Amɛrika, we ol 19 ia bin tɔk bɔt di tu smɔl buk dɛn we wi jɔs tɔk bɔt. I bin se: “Dɛn buk ya rili impɔtant to mi. A dɔn stɔdi dɛn smɔl buk dɛn ya bɔku bɔku tɛm.” Wan sista we de na Frans bin rayt se: “Di ‘Was It Designed?’ atikul dɛn kin rili mek a kɔle! Dɛn atikul dɛn ya kin sho se di bɛst injinia dɛn go tray fɔ falamakata di tin dɛn we Gɔd mek bɔt dɛn nɔ go ɛva ebul fɔ mek di tin dɛn we Gɔd mek.” Wan mama ɛn papa na Sawt Afrika, we gɛt gyal pikin we ol 15 ia bin tɔk se: “Di fɔs tin we wi gyal pikin kin rid insay di Awake! na di ‘Intavyu’ atikul dɛn.” Dɛn buk ɛn magazin dɛn ya  de ɛp yu bak fɔ si pruf dɛn fɔ se Pɔsin de we mek ɔltin, ɛn yu go ebul fɔ no ɛn nɔ gri wit dɛn lay lay tin dɛn we dɛn de tich. Yu go gɛt fet mɔ ɛn mɔ ɛn yu go tan lɛk tik we in rut dɛn dɔn go dɔŋ dɔŋ na di grɔn, we de ɛp am fɔ mek i kɔntinyu fɔ tinap ilɛksɛf big big briz blo.—Jɛrimaya 17:​5-8.

7. Wetin mek Gɔd want yu fɔ tink as yu de lan wetin de na di Baybul?

⁷ Yu tink se i bad fɔ aks kwɛstyɔn dɛn lɛk, ‘Wetin mek a biliv wetin di Baybul se?’ Nɔ, i nɔ bad. Jiova nɔ want yu fɔ biliv sɔntin jɔs bikɔs ɔda pipul dɛn biliv am. I want lɛ yu “de tink” we yu de lan wetin de na di Baybul ɛn fɔ mek yu gɛt mɔ pruf fɔ se na frɔm am di Baybul kɔmɔt. Di mɔ we yu no wetin di Baybul se, na di mɔ yu go gɛt fet. (Rid Lɛta Fɔ Rom 12:​1, 2; Fɔs Lɛta To Timoti 2:​4.) Wan we we wi go no di Baybul na bay we wi de stɔdi tɔpik dɛn we wi go lɛk fɔ no mɔ bɔt.

8, 9. (a) Us tɔpik dɛn sɔm pipul dɛn kin ɛnjɔy fɔ stɔdi? (b) Aw sɔm pipul dɛn dɔn bɛnifit we dɛn de tink gud wan bɔt wetin dɛn de rid?

⁸ Sɔm kin ɛnjɔy fɔ stɔdi tin dɛn we di Baybul bin dɔn tɔk se go apin lɔng tɛm bifo dɛn apin. Ɔ dɛn kin lɛk fɔ kɔmpia wetin di Baybul se wit wetin di wan dɛn we de rayt istri, sayɛnsman dɛn, ɔ dɛn wan dɛn we de dig fɔ lan aw dɛn fɔstɛm pipul dɛn bin de, kin se. Lɛ wi tek fɔ ɛgzampul Jɛnɛsis 3:​15. Jiova bin tɔk wetin de na da vas de jɔs afta Adam ɛn Iv bin pwɛl in lɔ ɛn nɔ gri fɔ mek i rul dɛn. Na di fɔs tin dat we Gɔd bin tɔk we ɛp wi fɔ ɔndastand aw Gɔd in Kiŋdɔm go pruv se na Gɔd nɔmɔ na di bɛst Rula ɛn aw di Kiŋdɔm go mek mɔtalman nɔ sɔfa igen. Aw yu go stɔdi Jɛnɛsis 3:​15? Yu kin rayt sɔm Baybul vas dɛn we de tɔk mɔ bɔt aw wetin di Baybul se gɛt fɔ apin. Dɔn, tray fɔ no ustɛm dɛn bin rayt dɛn vas dɛn ya ɛn arenj dɛn di we aw dɛn tɔk bɔt dɛn. Yu go kam fɔ no se di wan dɛn we rayt di Baybul bin liv difrɛn tɛm dɛn ɛn dɛn ɔl bin rayt sɔntin we mek wetin di Baybul bin dɔn tɔk se go apin klia to wi mɔ. Dis go ɛp yu fɔ pruv se Jiova bin yuz in oli spirit fɔ gayd dɛn.—Pita In Sɛkɛn Lɛta 1:​21.

⁹ Wan brɔda na Jamani bin tink bɔt aw di buk dɛn na di Baybul tɔk sɔntin bɔt di Kiŋdɔm. I bin tɔk se: “Na so i bi pan ɔl we na 40 man dɛn bin rayt di Baybul. Ɛn bɔku pan dɛn bin liv difrɛn tɛm ɛn dɛn nɔ bin no dɛnsɛf.” Wan sista na Ɔstrelia bin de stɔdi wan atikul na Di Wachtawa ɛn i bin lan aw di Pasova gɛt sɔntin fɔ du wit Jɛnɛsis 3:​15 ɛn di Mɛsaya. ^[1] (Luk di ɛndnot ɔnda di las paregraf.) I bin rayt se: “We a stɔdi da atikul de, i bin ɛp mi fɔ si klia wan aw Jiova wɔndaful. Fɔ mek pɔsin tink bɔt dis arenjmɛnt fɔ di Izrɛlayt dɛn ɛn fɔ mek dɛn sem tin ya apin to Jizɔs bin mek a kɔle. A bin nid fɔ stɔp ɛn tink gud wan bɔt aw da Pasova it bin wɔndaful!” Wetin mek dis sista bin fil dis kayn we? I bin tink gud gud wan bɔt wetin i rid ɛn i bin ɔndastand am. Dis bin ɛp am fɔ gɛt fet mɔ ɛn mɔ ɛn fɔ gɛt tayt padi biznɛs wit Jiova mɔ ɛn mɔ.—Matyu 13:​23.

10. Aw di ɔnɛs we di wan dɛn we rayt di Baybul bin ɔnɛs, go ɛp wi fɔ gɛt mɔ fet pan di Baybul?

¹⁰ Tink bak bɔt di we aw di man dɛn we rayt di Baybul bin ɔnɛs. Dɛn bin de tɔk tru ɔltɛm ɛn dɛn nɔ bin de fred fɔ tɔk tru. Na gud tin dɛn nɔmɔ di wan dɛn we bin de rayt buk dɛn da tɛm de bin de rayt bɔt dɛn kɔntri ɛn dɛn lida dɛn. Bɔt Jiova in prɔfɛt dɛn nɔ bin jɔs de rayt gud tin dɛn nɔmɔ, bɔt dɛn bin de rayt bak bɔt di bad tin dɛn we di Izrɛlayt dɛn ɛn dɛn kiŋ dɛn bin de du. (Sɛkɛn Kronikul 16:​9, 10; 24:​18-22) Dɛn bin ivin rayt dɛn yon mistek ɛn di  mistek dɛn we ɔda pipul dɛn we bin de sav Gɔd bin de mek. (Sɛkɛn Samiɛl 12:​1-14; Mak 14:​50) Wan yɔŋ brɔda na Briten bin se: “I nɔ izi fɔ si pɔsin we ɔnɛs lɛk dat. Dis mek wi biliv mɔ ɛn mɔ se di Baybul rili kɔmɔt frɔm Jiova.”

11. Aw wetin de na di Baybul go ɛp wi fɔ biliv gud gud wan se di Baybul kɔmɔt frɔm Gɔd?

¹¹ We pipul dɛn alaw di Baybul fɔ gayd di we aw dɛn de liv dɛn layf, dɛn de si aw dat de mek dɛn du wetin gud. Dis de mek dɛn biliv gud gud wan se di Baybul kɔmɔt frɔm Gɔd. (Rid Sam 19:​7-11.) Wan yɔŋ sista na Jepan bin rayt se: “We mi famili de du wetin di Baybul de tich, wi rili gɛt gladi at. Wi gɛt pis, wanwɔd, ɛn lɔv.” Di Baybul dɔn ɛp bɔku pipul dɛn fɔ no se sɔm pan di tin dɛn we dɛn bin biliv nɔto tru. (Sam 115:​3-8) I de gayd pipul dɛn fɔ abop pan Jiova we na di ɔlmayti Gɔd, ɛn fɔ abop pan di tin dɛn we i dɔn prɔmis fɔ du tumara bambay. Dɔn, we sɔm pipul dɛn de se Gɔd nɔ de, i tan lɛk se dɛn dɔn tɔn di tin dɛn we Gɔd mek to gɔd. Ɔda pipul dɛn de se na mɔtalman go ebul mek bɛtɛ de tumara bambay, bɔt we wi luk di tin dɛn we dɛn dɔn du, wi dɔn si se dɛn nɔ ebul fɔ sɔlv di prɔblɛm dɛn we de na di wɔl.—Sam 146:​3, 4.

12, 13. Aw wi go tɔk to ɔda pipul dɛn bɔt di tin dɛn we Gɔd mek ɔ di Baybul?

¹² We yu de tɔk bɔt wetin Gɔd dɔn mek ɔ we yu de tɔk bɔt di Baybul to ɔda pipul dɛn, i fayn lɛ yu fɔs no wetin dɛn rili biliv. Mɛmba se sɔm pipul dɛn we biliv se ɔltin kam bay chans biliv bak se Gɔd de. Dɛn se na Gɔd mek ɔltin kam bay chans so dat i go mek ɔltin we gɛt layf. Ɔda pipul dɛn biliv se na tru se ɔltin kam bay chans bikɔs na tin we dɛn de tich na skul. Ɛn sɔm dɔn stɔp fɔ biliv se Gɔd de bikɔs dɛn gens wit rilijɔn. So aks di pɔsin fɔs wetin i biliv ɛn wetin mek i biliv am. Dɔn, tek tɛm lisin to wetin i de se. If yu du dat, in bak go gladi fɔ lisin to yu.—Taytɔs 3:​2.

¹³ If sɔmbɔdi tɛl yu se yu na fulman bikɔs yu biliv se Pɔsin de we mek ɔltin, aw yu go ansa da pɔsin de? Tɔk to di pɔsin wit rɛspɛkt we yu de aks am fɔ ɛksplen aw i tink se layf bigin. Yu kin tɔk se if layf bin de chenj, dat min se di fɔs tin we bin gɛt layf bin nid fɔ ebul mek in kayn dɛn fɔ insɛf. Infakt, wan masta sabi bukman we stɔdi kɛmistri bin tɔk se di fɔs tin we bin gɛt layf, go nid tin dɛn lɛk, (1) kanda fɔ protɛkt insɛf, (2) i fɔ ebul gɛt ɛnaji ɛn yuz am, (3) i fɔ ebul sabi di tin dɛn we de kɔntrol aw i tan ɛn aw i de gro, ɛn (4) i fɔ ebul kɔpi di tin dɛn we de insay am we de mek i liv. I bin tɔk bak se: “Pɔsin go rili wɔnda we i tink bɔt aw i at fɔ ɔndastand ivin di smɔl tin dɛn we gɛt layf.”

14. Us simpul we yu go yuz fɔ tɔk bɔt di tin dɛn we Gɔd mek?

¹⁴ We yu de tɔk bɔt di tin dɛn we Gɔd mek, yu kin yuz wetin di apɔsul Pɔl bin tɔk we i rayt se: “Os nɔ de we nɔto pɔsin bil, bɔt na Gɔd mek ɔltin.” (Di Ibru Pipul Dɛn 3:​4) Na tru se na pɔsin de dizayn ɛn bil os. So di tin dɛn we gɛt layf we at fɔ ɔndastand pas os, go mɔs gɛt pɔsin we dizayn ɛn mek dɛn. Yu kin yuz wi buk ɛn magazin dɛn bak. Wan sista bin tɔk to wan yɔŋ man we nɔ bin biliv se Gɔd de. Di sista bin gi am di tu smɔl buk dɛn we wi bin dɔn tɔk bɔt, ɛn afta lɛk wan wik so, di yɔŋ man bin se: “Naw a biliv se Gɔd de.” Di yɔŋ man bin stat fɔ stɔdi di Baybul ɛn leta i bi Jiova Witnɛs.

15, 16. Wetin wi fɔ du bifo wi ɛksplen to pɔsin se di Baybul kɔmɔt frɔm Gɔd? Wetin wi fɔ mɛmba ɔltɛm?

¹⁵ If sɔmbɔdi de dawt di Baybul, wetin yu go du fɔ ɛp am? Lɛk wetin wi bin dɔn tɔk, i go fayn lɛ yu aks am fɔs wetin i biliv.  Dɔn, tray fɔ no wetin i rili lɛk fɔ no mɔ bɔt. (Prɔvabs 18:​13) If i lɛk sayɛns, gi am ɛgzampul dɛn na di Baybul we de sho se wetin di Baybul tɔk bɔt sayɛns kɔrɛkt ɔltɛm. If i lɛk istri, yu kin tɔk bɔt sɔm tin dɛn we istri buk dɛn dɔn tɔk bɔt, ɛn sho am aw di Baybul bin dɔn tɔk bɔt dɛn tin dɛn de lɔng tɛm bifo dɛn apin. Ɔda pipul dɛn go lisin to yu if yu sho dɛn sɔntin na di Baybul we go mek dɛn layf go bifo, lɛk di advays we Jizɔs bin gi we i bin de tɔk to sɔm pipul dɛn ɔp wan mawnten.

¹⁶ Mɛmba se wi nɔ want fɔ agyu wit pipul dɛn. Wi want fɔ lɛ dɛn ɛnjɔy fɔ tɔk wit wi ɛn fɔ lan mɔ bɔt di Baybul. So aks kwɛstyɔn wit rɛspɛkt ɛn tek tɛm lisin to dɛn. We yu de tɔk bɔt wetin yu biliv to pɔsin, tɔk fayn wan mɔ if di pɔsin big pas yu. If yu rɛspɛkt ɔda pipul dɛn, dɛnsɛf go rɛspɛkt yu. Ɛn dɛn go kɔle yu bikɔs yu dɔn tink gud wan bɔt wetin yu biliv pan ɔl we yu stil yɔŋ. Bɔt if di pɔsin jɔs want fɔ agyu wit yu ɔ provok yu, yu nɔ nid fɔ ansa am.—Prɔvabs 26:​4.

17, 18. (a) Wetin go ɛp yu fɔ gɛt fet mɔ ɛn mɔ pan di Baybul? (b) Us kwɛstyɔn wi go tɔk bɔt insay di nɛks atikul?

¹⁷ Wi go no di men tin dɛn we di Baybul de tich, bɔt wi nid fɔ no mɔ pas aw wi bin no fɔ lɛ wi gɛt fet mɔ ɛn mɔ. Jɔs lɛk aw wi de luk fɔ dayamɔn ɔ gold, na so wi nid fɔ fɛn ɛn luk gud gud wan fɔ di tru tin dɛn we de na di Baybul. (Prɔvabs 2:​3-6) Wan fayn we fɔ lɛ wi gɛt fet mɔ ɛn mɔ na bay we wi rid di wan ol Baybul. Sɔntɛm insay wan ia yu go tray fɔ rid di Baybul. Dat bin ɛp wan sakit ovasia fɔ kam nia Jiova we i bin yɔŋ. I bin tɔk se: “Wan tin we bin ɛp mi fɔ no se di Baybul na Gɔd in Wɔd na we a bin de rid di wan ol Baybul. Ɔl di Baybul stori dɛn we a bin dɔn lan frɔm we a yɔŋ, dɔn rili mek sɛns to mi.” Dɔn, yuz di difrɛn tin dɛn we yu gɛt insay yu langwej fɔ ɛp yu fɔ ɔndastand wetin yu de rid. Yu kin yuz di Watchtower Library we de pan DVD, Wachtawa LAYBRI NA DI INTANƐT, Watch Tower Publications Index, ɔ Di Buk we De Sho Usay Jiova Witnɛs dɛn Go Fɛn Wetin Dɛn Want.

¹⁸ Na mama ɛn papa dɛn fɔ tich dɛn pikin dɛn mɔ bɔt Jiova pas ɛni ɔda pɔsin. So aw yu go ɛp yu pikin dɛn fɔ gɛt mɔ fet pan Jiova? Insay di nɛks atikul, wi go tɔk bɔt sɔm we dɛn we yu go du dis.