1, 2. Yaˬhoˉvaˬ ve kanˉ te ve yaˇ nehˬ teˇ pawˆ pawˆ kʼo, aˬ htoꞈ ma htawˇ dawˇ nawˬ dawˇ cawˬ ve le? Awˬ lawn chi ve Liꞈ hpu aˬ htoꞈ ma beˆ maˍ laˇ ve le?

 Awˬ chawˇ teˇ gʼaˇ awˬ viˉ awˬ nyi yaˇ miˇ htaꞈ kʼoˆ piˇ ve, “Nawˬ chi hkʼe taw cuˇ yiˍ cawˬ ve kaꞈ Gʼuiˬ sha htaꞈ yonˍ ve yoˬ hehˉ?” awˬ viˉ awˬ nyi hawˉ hkʼaˆ paˍ teˇ gʼaˇ kʼoˆ ve, “Liꞈ hpu hkʼaw hpanˍ taˍ ve awˬ lawn kaˇ puiˇ kaˇ lao ceh hpehꞈ ve, ngaˬ ve saˍ laꞈ hui dawˇ ve yoˬ. Yawˇ hui dawˇ ve liꞈ henˇ yaˇ lehˬ a shaꞈ teꞈ ve yawˇ hkʼaˇ yawˇ cawˬ la gʼa ve htaꞈ yonˍ ve yoˬ.” Awˬ viˉ awˬ nyi yaˇ miˇ teˇ gʼaˇ kʼoˆ ve, “liꞈ henˇ yaˇ Liꞈ hpu htaꞈ yonˍ chehˇ sheˍ ve cawˬ ve saˍ laꞈ hui anˇ ve yoˬ.”

² Chi beuꞈ teˇ co˗e, chaw laiˉ gʼaˇ Gʼuiˬ sha ngaˬ hui htaꞈ te hpanˍ laˇ ve maˇ yonˍ ve yoˬ. Nawˬ Yaˬhoˉvaˬ ve kanˉ te ve maˇ heˆ kʼo, yawˇ ve awˬ lawn henˇ chehˇ ve yaˇ nehˬ hpehꞈ ve kʼo, teˇ pawˆ pawˆ kʼo yawˇ ngaˬ hui htaꞈ hpanˍ laˇ ve kʼoˆ maˍ piˇ ve awˬ hkʼaˇ nawˬ htawˇ dawˇ nawˬ dawˇ cawˬ tuˬ yoˬ. Ngaˬ hui gʼa kaˇ leh gʼa gʼaw ve awˬ ceuˬ hkʼa dehꞈ dawˇ nyi leh awˬ hkʼaˇ ca tuˬ, Liꞈ hpu ngaˬ hui htaꞈ ga laˇ ve yoˬ. Gʼuiˬ sha ve tawˇ hkawˇ hkʼawꞈ kʼoˆ ve, “nawˬ ve dawˇ shiˍ puiˉ ve nyi ma lehˬ, nawˬ htaꞈ haꞈ shaˉ laˇ” ve yoˬ. Hkʼaˬ hkʼe haꞈ shaˉ tuˬ le? Maˇ  cawˇ ve dawˇ hkʼaˇ maˇ na leh Yaˬhoˉvaˬ htaꞈ yonˍ maˇ la tuˬ, chi lehˬ ngaˬ hui htaꞈ ga laˇ ve yoˬ.—Tawˇ naˉ ve 2:10-12 gʼaw ve.

3. Awˬ lawn chi ngaˬ hui aˬ htoꞈ ma gʼa henˇ tuˬ le?

³ Yaˬhoˉvaˬ htaꞈ yonˍ maˇ la tuˬ, yawˇ htaꞈ hkʼaˬ dehꞈ gʼa shiˍ daꞈ ve yoˬ. (1 Tiˆmoˉseˍ 2:4) Chi htaꞈ pa taw, Liꞈ hpu leh ngaˬ hui ve liꞈ kʼoˆ teˇ hpaˍ gʼaw htaˇ, nawˬ jehˇ leh hkʼaˬ dehꞈ dawˇ nyi ve a yeˇ uiˍ jaˇ ve yoˬ. Nawˬ gʼaw chehˇ ve awˬ lawn htaꞈ coˇ caˇ leh hkʼaˬ dehꞈ na gʼa sheˍ. (Maꞈhtehˍ 13:23) Nawˬ chi hkʼe te henˇ ve kʼo, Yaˬhoˉvaˬ te hpanˍ shehˍ hpaˇ hpehꞈ ve leh, Liꞈ hpu yawˇ geh la taˍ ve awˬ tehˬ hpehꞈ ve nawˬ gʼa shiˍ tuˬ yoˬ. (Heˍbrehˇ 11:1) Ngaˬ hui hkʼaˬ hkʼe te gʼa tuˬ, teˇ geh nyi sheˍ.

4. A shaꞈ teꞈ ve yawˇ hkʼaˇ yawˇ cawˬ la gʼa ve leh hpanˍ taˍ ve awˬ ceuˬ htaꞈ yonˍ ve hkʼaˬ hkʼe shuˍ daꞈ ve le? Ngaˬ hui teˇ gʼaˇ le le aˬ htoꞈ ma gʼa te ve le?

⁴ “A shaꞈ teꞈ ve yawˇ hkʼaˇ yawˇ cawˬ la gʼa ve maˍ laˇ ve chi, chaˬ nyi tehˆ nyi paˍ awˬ tehˬ hpehꞈ ve kʼoˆ laˇ ve pa taw, ngaˬ yonˍ ve yoˬ. Chaw teˇ gʼaˇ kaꞈ Gʼuiˬ sha htaꞈ maˇ mawˬ jaw hkʼaˬ hkʼe te yonˍ hpehꞈ tuˬ le?” tehꞈ, awˬ nu ve chaw nawˬ htaꞈ kʼoˆ laˇ ve yoˬ hehˉ. Laiˉ gʼaˇ chi hkʼe dawˇ ve yoˬ. Awˬ tehˬ yoˬ, chaw teˇ gʼaˇ kaꞈ Gʼuiˬ sha leh yawˇ te hpanˍ chehˇ htaˇ maˇ mawˬ jaw. (Yoˇhanˬ 1:18) Yaꞈ hkʼaˇ, A shaꞈ teꞈ ve yawˇ hkʼaˇ yawˇ cawˬ la gʼa ve htaꞈ yonˍ ve chaw laˇ? Mawˬ maˇ hpehꞈ ve awˬ ceuˬ htaꞈ yawˇ hui kaꞈ yonˍ ve yoˬ. Tawˇ pa haˉ te kʼo, paˍ tehˉ nehˆ faˆ chaꞈ pa kai ve chaw teˇ gʼaˇ kaꞈ maˇ mawˬ jaw. (Yawˇbaˆ 38:1, 4) Chi htaꞈ pa taw, awˬ lawn teˇ hpaˍ htaꞈ ngaˬ hui dawˇ nyi leh hkʼa dehꞈ gʼa chaˬ nyi ve yoˬ. Laiˉ gʼaˇ suhˆ cehˬ hawˆ cehˬ htaꞈ gʼa mawˬ ve lehˬ Gʼuiˬ sha htaꞈ “gʼa mawˬ ve” hkʼe yoˬ. Gʼuiˬ sha hpanˍ shehˍ hpaˇ hpehꞈ ve yoˬ, kanˇ paˆ uiˍ jaˇ ve, awˬ hoꞈ awˬ han daꞈ jaˇ ve cawˬ ve, yawˇ hui hkʼa tawˍ lehˆ gʼa mawˬ ve yoˬ.—Roˉmaꞈ 1:20.

5. Hpanˍ taˍ ve awˬ lawn na gʼa tuˬ, hpfuhˆ nyi kuiˬ laꞈ caˉ aˬ htoꞈ ma cawˬ ve le?

⁵ Ngaˬ hui suhˆ cehˬ hawˆ cehˬ nyi leh hkʼaˬ dehꞈ dehꞈ dawˇ nyi htaˇ, teˇ ceuˬ le le te hpanˍ taˍ ve anˇ lawꞈ lawꞈ ngaˬ hui gʼa mawˬ tuˬ yoˬ. Te hpanˍ shehˍ hpaˇ htaꞈ maˇ mawˬ ve htawˇ, ‘yonˍ  ve htaꞈ pa taw ngaˬ hui gʼa shiˍ ve yoˬ.’ Yawˇ awˬ liˇ awˬ hkʼaˇ daꞈ jaˇ leh cuˇ yiˍ cawˬ jaˇ ve ngaˬ hui gʼa shiˍ ve yoˬ. (Heˍbrehˇ 11:3, 27) Chaˬ nyi tehˆ nyi paˍ hpfuhˆ gʼa ve awˬ ceuˬ ngaˬ hui gʼaw htaˇ, Gʼuiˬ sha hpanˍ taˍ ve awˬ ceuˬ htaꞈ ngaˬ hui gʼa henˇ shiˍ maˇ jaˇ ve yoˬ. Awˬ lawn chi ngaˬ hui VDO Hpanˍ taˍ ve awˬ ceuˬ anˇ lawꞈ lawꞈ ve chi Gʼuiˬ sha ve kanˇ paˆ htaꞈ hpeuꞈ maw laˇ ve, leh liꞈ kʼoˆ A shaꞈ teꞈ ve awˬ ceuˬ te hpanˍ shehˍ hpaˇ cawˬ˗aw laˇ? leh Awˬ hkuiˉ puiˍ ve a shaꞈ—Na hkawˇ 5 maˬ dawˇ nyi cawˇ ve, Nawˬ htaꞈ dawˇ nawˇ ve te hpanˍ shehˍ hpaˇ cawˬ˗aw la? hkʼaˬ shuˍ shuˍ hpfuhˆ nyi kuiˬ laꞈ caˉ hkʼaw ca gʼa ve yoˬ. Tu loˬ! liꞈ kʼoˆ hkʼaw laiˉ pawˆ kʼo chaˬ nyi tehˆ nyi paˍ leh, awˬ nu ve chaw teˇ hpa chi teˇ hkui Gʼuiˬ sha htaꞈ yonˍ la ve kʼoˆ maˍ laˇ ve na nyi piˇ ve cawˬ ve yoˬ. Leh “Dawˇ nyi shehˍ hpaˇ cawˬ˗aw laˇ?” awˬ lawn chi ve hkʼaw to nuˇ to shaˆ, suhˆ cehˬ hawˆ cehˬ awˬ nu ve awˬ ceuˬ htaꞈ caˉ daꞈ ve leh chaˬ nyi tehˆ nyi paˍ chi teˇ hpaˍ htaꞈ henˇ yuˬ tuˬ coˇ caˇ ve awˬ hkʼaˇ kʼoˆ maˍ laˇ ve yoˬ.

6. Hpfuhˆ nyi kuiˬ laꞈ caˉ nawˬ htaꞈ hkʼaˬ hkʼe gʼa laˇ ve le?

⁶ Awˬ viˉ awˬ nyi hawˉ hkʼaˆ paˍ a shaꞈ 19 hkʼawꞈ kʼoˆ ve, “liꞈ kʼoˆ chi teˇ hpaˍ ngaˬ htaꞈ ga laˇ maˇ jaˇ leh 10 pawˆ hpaˆ gʼaw peuˬ ve yoˬ.” Awˬ viˉ awˬ nyi yaˇ miˇ kʼoˆ ve, “‘Dawˇ nyi shehˍ hpaˇ cawˬ˗aw laˇ?’ ngaˬ dawˇ cawˇ jaˇ! Awˬ lawn chi ve, chaw yaˇ hpehꞈ ve dawˇ nyi shehˍ hpaˇ henˇ yuˬ tuˬ coˇ caˇ ve htawˇ, suhˆ cehˬ hawˆ cehˬ hkʼe maˇ daꞈ ve htaꞈ gʼa mawˬ ve kʼoˆ maˍ laˇ taˍ ve yoˬ.” Yaˇ miˇ teˇ gʼaˇ a shaꞈ 15 hkʼawꞈ ve awˬ pa awˬ e kʼoˆ ve, “ngaˬ ve yaˇ miˇ Tu loˬ! liꞈ gʼa htaˇ, ‘Na nyi piˇ ve’ awˬ lawn teˇ tawn yawˇ awˉ lawˉ peuˇ gʼaw ve yoˬ.” Liꞈ kʼoˆ chi ve teˇ hpaˍ te hpanˍ shehˍ hpaˇ cawˬ ve yonˍ maˇ la tuˬ leh, maˇ cawˇ ve maˍ hkʼaˇ htaꞈ shiˍ leh maˇ na tuˬ, nawˬ htaꞈ ga laˇ ve yoˬ. Nawˬ ve yonˍ hkʼaˇ yonˍ maˇ la jaˇ leh, suhˆ cehˬ awˬ geu tcuhˆ naˉ jaˇ ve mvuhˇ haw la henˇ jaˇ ve htawˇ maˇ pai˗eˬ gʼa ve hkʼaˬ shuˍ yoˬ.—Yeˍraˍmiˆ 17:5-8.

7. Aˬ htoꞈ ma te Gʼuiˬ sha nawˬ htaꞈ hkʼa dehꞈ dawˇ nyi tcuh gaˇ ve le?

⁷ ‘Liꞈ hpu hkʼaw bvuhꞈ taˍ ve awˬ ceuˬ aˬ htoꞈ ma te ngaˬ yonˍ ve le?’ Chi hkʼe te na ve yaꞈ ve laˇ? Maˇ yaꞈ. Shu yonˍ ve htaꞈ pa taw nawˬ kaꞈ yonˍ ve, Yaˬhoˉvaˬ oˇ hkʼe maˇ te tcuh gaˇ ve yoˬ. Nawˬ Liꞈ hpu htaꞈ shiˍ leh, Gʼuiˬ sha geh laˬ ve hkʼaˬ dehꞈ yonˍ gʼa tuˬ, yawˇ nawˬ htaꞈ hkʼa dehꞈ dawˇ nyi tcuh gaˇ ve yoˬ. Liꞈ hpu hkʼaw hkʼaˬ hkʼe bvuhꞈ taˍ ve htaꞈ nawˬ shiˍ maˇ la ve kʼo, nawˬ yonˍ hkʼaˇ uiˍ la mvuh la tuˬ yoˬ. (Roˉmaꞈ 12:1, 2; 1 Tiˆmoˉseˍ 2:4 gʼaw ve.) Awˬ hkʼaˇ teˇ ma chi hkʼe te tuˬ nawˬ shiˍ gaˇ jaˇ ve awˬ lawn teˇ lawn htaꞈ henˇ ve yoˬ.

8, 9. (a) Teˇ hpaˍ hpaˍ aˬ htoꞈ ma awˬ lawn henˇ ve dawˇ cawˇ ve le? (b) Yawˇ gʼaw ve awˬ lawn htaꞈ hkʼa dehꞈ dehꞈ dawˇ nyi ve yawˇ aˬ htoꞈ ma awˬ bon gʼa ve le?

⁸ Teˇ gʼaˇ gʼaˇ Liꞈ hpu hkʼaw ve tcuh kaˍ paˍ ve tawˇ hkawˇ henˇ ve dawˇ cawˇ ve yoˬ. Chaw teˇ hpaˍ, Raˍsaˍvanˍ leh chaˬ nyi tehˆ nyi paˍ ve dawˇ hkʼaˇ Liꞈ hpu geh tehˆ daꞈ ve dawˇ cawˇ ve yoˬ. Awˬ hkuiˉ puiˍ 3:15 htaꞈ dawˇ nyi sheˍ. Aˍdanˍ leh Eˇvaꞈ Yaˬhoˉvaˬ leh yawˇ uˉ peunˍ ve awˬ hkʼaˇ htaꞈ hpfuhˆ ve peuˬ hkʼawꞈ nawˉ maˇ maw, yawˇ a yeˇ uiˍ jaˇ ve tcuh kaˍ paˍ tawˇ hkawˇ chi piˇ ve yoˬ. Gʼuiˬ sha uˉ peunˍ ve daꞈ jaˇ ve leh, tuꞈ ve hkanˍ ve hkʼa peu˗eˬ te mehˉ kai tuˬ ve awˬ hkʼaˇ, Gʼuiˬ sha ve mvuhˇ miˬ hkʼaˬ hkʼe te hpeuꞈ maw laˇ tuˬ, chi lehˬ Liꞈ hpu hkʼaw ve tcuh kaˍ paˍ tawˇ hkawˇ ngaˬ hui na gʼa tuˬ ga laˇ ve awˉ lawˉ peuˇ hpehꞈ ve yoˬ. Awˬ hkuiˉ puiˍ 3:15 ngaˬ hui hkʼaˬ hkʼe te henˇ tuˬ le? Tcuh kaˍ paˍ tawˇ hkawˇ chi biˇ la tuˬ  ve awˬ hkʼaˇ kʼoˆ maˍ laˇ tuˬ Liꞈ hpu awˬ tawn teˇ hpaˍ yuˬ tawˆ leh bvuhꞈ sheˍ. Peuˬ leh, Liꞈ hpu hkʼaˬ ve awˉ lawˉ bvuhꞈ leh hkʼaˬ ve awˬ hkʼawꞈ nawˉ bvuh ve yuˬ cehˇ sheˍ. Liꞈ hpu bvuhꞈ paˍ awˬ tcuhˉ awˬ yanˇ chehˇ ve maˇ shuˍ daꞈ ve htawˇ, bvuhꞈ ve awˬ ceuˬ teˇ ceuˬ le le tcuh kaˍ paˍ tawˇ hkawˇ chi hkʼa dehꞈ na gʼa tuˬ ga piˇ ve yoˬ tehꞈ, nawˬ gʼa mawˬ tuˬ yoˬ. Awˬ lawn chi ve lehˬ, Gʼuiˬ sha ve awˬ ha hpu yawˇ hui htaꞈ dawˇ pawnˍ piˇ ve nawˬ gʼa shiˍ tuˬ yoˬ.—2 Peˍtruˆ 1:21.

⁹ Awˬ viˉ awˬ nyi hawˉ hkʼaˆ paˍ Liꞈ hpu hkʼaw cawˬ ve awˬ tawn teˇ tawn le le Gʼuiˬ sha ve mvuhˇ miˬ htaꞈ caˉ daꞈ ve awˬ hkʼaˇ htaꞈ dawˇ nyi ve yoˬ. Yawˇ kʼoˆ ve, “teˇ gʼaˇ leh teˇ gʼaˇ maˇ shiˍ daꞈ ve htawˇ, awˬ lawn chi hpehꞈ kai gʼa ve, aˬ lanˬ hkʼe 40 gʼaˇ Liꞈ hpu bvuhꞈ ve leh yawˇ hui awˬ tcuhˉ awˬ yanˇ chehˇ ve maˇ shuˍ daꞈ.” Awˬ viˉ awˬ nyi yaˇ miˇ teˇ gʼaˇ Shaw nyi kuiˬ taꞈ yehˬ hkʼaw ve Paˍsaˍhkaˍ chi Awˬhkuiˉpuiˍ 3:15 leh Meˍsiˉyaꞈ geh hkʼaˬ hkʼe te caˉ daꞈ ve henˇ ve yoˬ. ^[1] (Awˬ maiˉ hkʼawꞈ nawˉ lo cawˬ ve.) Yawˇ kʼoˆ ve, “ngaˬ awˬ lawn chi henˇ htaˇ, Yaˬhoˉvaˬ daꞈ jaˇ ve, na gʼa tuˬ ga laˇ ve yoˬ. Iˉsaˍreˍlaˆ chaw awˬ pon Gʼuiˬ sha gu tehˬ taˍ laˇ ve awˬ hkʼaˇ chi Yeˍsuˆ awˬ lawn chi htaꞈ te biˇ la ve, ngaˬ dawˇ cawˇ jaˇ ve yoˬ. Paˍsaˍhkaˍ mvuhˇ haˉ awˬ caˇ ve awˬ lawn chi gʼaw htaˇ, hkʼaˬ hkʼe taw taw daꞈ ve ngaˬ jehˇ leh hkʼa dehꞈ dawˇ nyi ve yoˬ!” Yawˇ aˬ htoꞈ ma te chi hkʼe dawˇ ve le? Awˬ lawn kʼo, yawˇ gʼaw ve awˬ lawn htaꞈ hkʼa dehꞈ dehꞈ dawˇ nyi leh na gʼa ve yoˬ. Chi hkʼe te ve yawˇ ve yonˍ hkʼaˇ uiˍ la mvuh la leh Yaˬhoˉvaˬ htaꞈ meuꞈ daꞈ maˇ la tuˬ yoˬ.—Maꞈhtehˍ 13:23.

10. Liꞈ hpu bvuhꞈ paˍ ve ka tiꞈ yeˬ ve awˬ lawn ngaˬ hui Liꞈ hpu htaꞈ yonˍ maˇ la tuˬ, hkʼaˬ hkʼe ga laˇ ve le?

¹⁰ Liꞈ hpu bvuhꞈ paˍ ve ka tiꞈ yeˬ ve kaꞈ dawˇ nyi sheˍ. Yawˇ hui hkʼaˬ htaˆ kaꞈ awˬ tehˬ ve tawˇ tiˉ yaw ve maˇ kawˆ ve yoˬ. Oˇ htaˇ teˇ co˗e, liꞈ bvuhꞈ ve chaw lehˬ, yawˇ hui ve mvuhˇ miˬ leh sheh kʼai paˍ ve daꞈ ve awˬ lawn ceh tiˉ bvuhꞈ ve yoˬ. Yaꞈ hkʼaˇ, Yaˬhoˉvaˬ ve tcuh kaˍ paˍ daꞈ ve awˬ lawn ceh tiˉ bvuhꞈ ve maˇ heˆ. Iˉsaˍreˍlaˆ chaw leh yawˇ hui ve jawˇ mawˇ maˇ daꞈ ve awˬ lawn kaꞈ bvuhꞈ ve yoˬ. (2 Raˍsaˍvanˍ 16:9, 10; 24:18-22) Yawˇ leh awˬ nu ve chaw Gʼuiˬ sha kanˉ te ve te yaꞈ ve awˬ lawn kaꞈ kʼoˆ taˍ ve yoˬ. (2 Saˍmo˗eˍlaˆ 12:1-14; Maˍkuˆ 14:50) Awˬ viˉ awˬ nyi hawˉ hkʼaˆ paˍ yaˇ nehˬ kʼoˆ ve, “ka tiꞈ chi hkʼe te yeˬ ve ca haˍ jaˇ ve yoˬ. Awˬ lawn chi Liꞈ hpu Gʼuiˬ sha geh laˬ ve yoˬ tehꞈ, ngaˬ hui yonˍ maˇ la tuˬ ga laˇ maˇ jaˇ ve yoˬ.”

11. Liꞈ hpu hkʼaw maˍ ve awˬ hkʼaˇ suh gʼaꞈ te htaˇ, Liꞈ hpu Gʼuiˬ sha geh laˬ ve ngaˬ hui htaꞈ hkʼaˬ hkʼe ga laˇ ve le?

¹¹ Yawˇ hui Liꞈ hpu hkʼaw maˍ ve awˬ hkʼaˇ suh gʼaꞈ te htaˇ, awˬ bon gʼa ve yoˬ. Chi lehˬ Liꞈ hpu Gʼuiˬ sha geh la ve tehꞈ yawˇ hui yonˍ ve yoˬ. (Chiˇ mvuh ve 19:7-11 gʼaw ve.) Awˬ viˉ awˬ nyi yaˇ miˇ yaˇ nehˬ teˇ gʼaˇ kʼoˆ ve, “ngaˬ ve yehˬ kʼa Liꞈ hpu hkʼaw maˍ ve awˬ hkʼaˇ suh gʼaꞈ te htaˇ, ha lehˬ jaˇ tehˬ ve yoˬ. Ngaˬ hui dawˇ sha gaˇ sha ve, cawˇ daꞈ hawˍ daꞈ ve, leh haꞈ pehnˇ ve cawˬ ve yoˬ.” Yawˇ hui yonˍ hkʼaˇ teˇ hpaˍ, maˇ cawˇ ve tehꞈ shiˍ tuˬ, Liꞈ hpu laiˉ gʼaˇ htaꞈ ga piˇ ve yoˬ. (Chiˇ mvuh ve 115:3-8) Liꞈ hpu lehˬ, uiˍ jaˇ mvuh jaˇ ve Gʼuiˬ sha Yaˬhoˉvaˬ htaꞈ gʼaˇ va tuˬ, ngaˬ hui htaꞈ ga laˇ leh awˬ gʼuˇ suhˍ hpawˇ, daꞈ jaˇ ve ka tiꞈ te laˇ ve yoˬ. Yaꞈ hkʼaˇ, chaw teˇ hpaˍ Gʼuiˬ sha maˇ cawˬ tehꞈ kʼoˆ ve, awˬ tehˬ kʼo suhˆ cehˬ hawˆ cehˬ yawˇ ve gʼuiˬ sha hkʼe te shawˍ chehˇ ve yoˬ. Awˬ nu ve chaw kʼoˆ ve, awˬ gʼuˇ suhˍ hpawnˇ daꞈ ve htaꞈ chaw yaˇ te gʼa ve yoˬ. Yaꞈ hkʼaˇ, chaw yaˇ te laˬ ve chi teˇ hkui hkʼa gaˬ miˬ gʼuiˬ chi hkʼoˆ lo  shoꞈ shaꞈ ve awˬ lawn yawˇ hui gu maˇ gʼa ve htaꞈ gʼa mawˬ ve yoˬ.—Chiˇ mvuh ve 146:3, 4.

12, 13. Gʼuiˬ sha hpanˍ taˍ ve awˬ ceuˬ leh Liꞈ hpu awˬ lawn nawˬ shu htaꞈ hkʼaˬ hkʼe kʼoˆ piˇ ve le?

¹² Gʼuiˬ sha hpanˍ taˍ ve awˬ ceuˬ leh, Liꞈ hpu ve awˬ lawn kʼoˆ maˍ piˇ htaˇ, yawˇ aˬ htoꞈ ma yonˍ ve awˉ lawˉ gʼa shiˍ cawˇ ve yoˬ. A shaꞈ teꞈ ve yawˇ hkʼaˇ yawˇ cawˬ la gʼa ve htaꞈ yonˍ ve chaw teˇ hpaˍ, yawˇ hui Gʼuiˬ sha htaꞈ kaꞈ yonˍ ve taˇ leunˇ sheˍ. Yawˇ hui kʼoˆ ve, teˇ ceuˬ le le hpanˍ tuˬ, Gʼuiˬ sha awˬ hkʼaˇ chi htaꞈ yehˇ ve yoˬ. Awˬ nu ve chaw kʼoˆ ve awˬ hkʼaˇ chi awˬ tehˬ hpehꞈ ve awˬ lawn kʼo, liꞈ henˇ yehˬ lo maˍ ve yoˬ. Leh chaw teˇ hpaˍ Gʼuiˬ sha htaꞈ maˇ kʼawꞈ yonˍ ve awˬ lawn kʼo, bon liˇ bon hkʼaˇ yawˇ hui nyi maˬ na ve te piˇ ve yoˬ. Chi htaꞈ pa taw, awˉ lawˉ peuˇ yawˇ htaꞈ na piˇ ve, nawˬ aˬ htoꞈ ma yonˍ ve le leh aˬ htoꞈ ma pa taw le? Peuˬ hkʼawꞈ nawˉ, yawˇ kʼo ve htaꞈ hkʼa dehꞈ na sheˍ. Nawˬ oˇ hkʼe te ve kʼo, yawˇ nawˬ hkawˇ kaꞈ na gaˇ tuˬ yoˬ.—Tiˇtuˆ 3:2.

¹³ Nawˬ te hpanˍ shehˍ hpaˇ htaꞈ yonˍ ve cuˇ yiˍ maˇ cawˬ tehꞈ, shu nawˬ htaꞈ kʼoˆ laˇ ve kʼo, hkʼaˬ hkʼe te hkʼawꞈ piˇ tuˬ le? Nawˬ dawˇ kʼo, a shaꞈ hkʼaˬ hkʼe te tanˬ ve le tehꞈ, yawˆ yan ve hkʼaw yawˇ htaꞈ na piˇ gʼa ve yoˬ. A shaꞈ teꞈ ve yawˇ hkʼaˇ yawˇ cawˬ la gʼa ve kʼo, a shaꞈ teꞈ ve awˉ lawˉ teˇ ceuˬ, yawˇ hkʼaˇ yawˇ laiˉ pawˆ gʼa kʼawꞈ te tawˆ la ve yoˬ tehꞈ, nawˬ kʼoˆ piˇ gʼa ve yoˬ. Awˬ tehˬ kʼo, a shaꞈ teꞈ ve awˉ lawˉ teˇ ceuˬ (1) awˬ guiˬ kʼuˉ gʼa cawˬ ve, (2) awˬ shaˉ htaꞈ haꞈ yuˬ leh gʼa yehˇ ve, (3) awˬ hoˆ ve awˬ lawn leh uiˍ la mvuh ve awˬ lawn gʼa cawˬ ve, leh (4) awˬ hoꞈ awˬ han ve awˬ lawn leh uiˍ la mvuh ve awˬ lawn htaꞈ gʼa kʼawꞈ te tawˆ la gʼa ve yoˬ. Leh awˬ nu ve awˬ ceh kaꞈ gʼa cawˬ ve, saˍ laꞈ teˇ gʼaˇ kʼoˆ taˍ ve yoˬ. “Hkʼa sha sha˗ehˬ ve a shaꞈ teꞈ ve awˬ ceuˬ hkʼe ceh ve kaꞈ, awˬ hkʼaw lo laiˉ ceuˬ cawˬ maˇ jaˇ ngaˬ hui anˇ lawꞈ lawꞈ cawˬ ve yoˬ” tehꞈ, yawˇ kaꞈ kʼoˆ ve yoˬ.

14. Gʼuiˬ sha hpanˍ taˍ ve awˬ lawn hkʼaˬ sha sha˗ehˬ nawˬ hkʼaˬ hkʼe kʼoˆ maˍ tuˬ le?

¹⁴ Gʼuiˬ sha hpanˍ ve awˬ lawn kʼoˆ maˍ piˇ htaˇ, Pawˇluꞈ kʼoˆ maˍ piˇ ve hkʼa sha sha˗ehˬ ve awˬ hkʼaˇ hkʼa shuˍ nawˬ kaꞈ yehˇ hpehꞈ ve yoˬ. Yawˇ bvuhꞈ ve, “yehˬ teˇ yehˬ le le lehˬ, te shehˍ hpaˇ cawˬ ve yoˬ. Yaˇ hkʼaˇ, teˇ ceuˬ le le htaꞈ te shehˍ hpaˇ lehˬ Gʼuiˬ sha yoˬ.” (Heˍbrehˇ 3:4) Awˬ tehˬ yoˬ, yehˬ dawˇ nyi paˍ leh te paˍ cawˬ ve yoˬ. Oˇ hkʼe kʼo, a shaꞈ teꞈ ve awˬ ceuˬ yehˬ a kehˉ, oˇ ve awˬ hkʼaw lo laiˉ ceuˬ cawˬ maˇ jaˇ ve pa taw, dawˇ nyi pa leh te hpanˍ shehˍ hpaˇ gʼa cawˬ ve yoˬ. Nawˬ ngaˬ hui ve liꞈ kʼoˆ teˇ hpaˍ kaꞈ yehˇ hpehꞈ ve yoˬ. Awˬ viˉ awˬ nyi yaˇ miˇ teˇ gʼaˇ, hawˉ hkʼaˆ paˍ yaˇ nehˬ Gʼuiˬ sha htaꞈ maˇ yonˍ ve teˇ gʼaˇ htaꞈ tawˇ yaw daꞈ ve yoˬ. Liꞈ kʼoˆ a shaꞈ htaꞈ caˉ daꞈ ve awˬ lawn yawˇ htaꞈ 2 kʼoˆ piˇ leh teˇ shinˉ peuˬ hkʼawꞈ nawˉ hawˉ hkʼaˆ paˍ chi teˇ gʼaˇ kʼoˆ ve, “chi teˇ hkui ngaˬ Gʼuiˬ sha htaꞈ yonˍ ve yoˬ.” Yawˇ Liꞈ hpu htaꞈ tanˬ henˇ leh chi teˇ hkui ngaˬ hui ve awˬ viˉ awˬ nyi hpehꞈ la ve yoˬ.

15, 16. Liꞈ hpu Gʼuiˬ sha geh laˬ ve maˇ kʼoˆ maˍ piˇ sheˍ htaˇ, ngaˬ hui aˬ htoꞈ ma te cawˇ ve le? Ngaˬ hui hkʼaˬ htaˆ kaꞈ aˬ htoꞈ ma dawˇ nawˇ taˍ cawˇ ve le?

¹⁵ Liꞈ hpu htaꞈ maˇ yonˍ ve chaw cawˬ kʼo, nawˬ yawˇ htaꞈ hkʼaˬ hkʼe ga piˇ gʼa tuˬ le? Aˬ sheh htaˇ ve hkʼa shuˍ, nawˬ aˬ htoꞈ ma htaꞈ yonˍ ve le tehꞈ, yawˇ htaꞈ na nyi piˇ ve yoˬ. Yawˇ aˬ htoꞈ ma ve awˬ lawn dawˇ cawˇ ve kaꞈ ca nyi cawˇ ve yoˬ. (Tawˇ naˉ ve 18:13) Yawˇ chaˬ nyi tehˆ nyi paˍ dawˇ cawˇ ve kʼo, Liꞈ hpu hkʼaw cawˬ ve chaˬ nyi tehˆ nyi paˍ ve awˬ lawn hkʼaˬ htaˆ kaꞈ hkʼa dehꞈ cawˇ ve htaꞈ kʼoˆ maˍ piˇ ve yoˬ. Yawˇ raˍsaˍvanˍ ve awˬ lawn dawˇ cawˇ ve kʼo, raˍsaˍvanˍ liꞈ kʼoˆ hkʼaw cawˬ ve  awˬ lawn yaw daꞈ htaˇ, chi ve Liꞈ hpu hkʼaw awˬ gʼuˇ suhˍ htaˇ laiˉ ha hkʼawꞈ bvuhꞈ taˍ ve kʼoˆ maˍ piˇ gʼa ve yoˬ. Hkʼaw pui hkʼoˆ lo ve bon maˍ hkawˇ hkʼa shuˍ, Liꞈ hpu hkʼaw cawˬ ve awˬ lawn yawˇ ve a shaꞈ htaꞈ ga piˇ gʼa ve awˬ ceuˬ yawˇ htaꞈ nyi tcuh ve kʼo, chaw teˇ hpaˍ nawˬ ve hkawˇ na gaˇ tuˬ yoˬ hehˉ.

¹⁶ Ngaˬ hui shu htaꞈ maˇ deˇ daꞈ gaˇ ve tehꞈ taˇ leunˇ sheˍ. Yawˇ hui ngaˬ hui geh tawˇ yaw daꞈ leh Liꞈ hpu henˇ gaˇ tuˬ, oˇ hkʼe te tcuh gaˇ ve yoˬ. Chi htaꞈ pa taw, yawˆ yan ve na piˇ leh yawˇ tawˇ yaw ve htaꞈ hkʼaˬ dehꞈ na sheˍ. Chaw teˇ gʼaˇ htaꞈ nawˬ yonˍ ve awˬ hkʼaˇ kʼoˆ maˍ htaˇ, yawˆ yan piˇ cawˇ ve yoˬ. Chi lehˬ yawˇ nawˬ a kehˉ a shaꞈ maˇ ve kʼo, a yeˇ uiˍ jaˇ ve yoˬ. Nawˬ shu htaꞈ yawˆ yan piˇ ve kʼo, shu nawˬ htaꞈ yawˆ yan laˇ tuˬ yoˬ. Leh a shaꞈ i ve htawˇ, nawˬ yonˍ ve htaꞈ hkʼa dehꞈ dehꞈ dawˇ nyi ve htaꞈ yawˇ gʼa mawˬ leh, dawˇ cawˇ jaˇ ve yoˬ. Yaꞈ hkʼaˇ, nawˬ htaꞈ deˇ daꞈ leh kʼoˆ guiˇ gʼuiˬ guiˇ laˇ ve kʼo, yawˇ htaꞈ taˇ hkʼawꞈ piˇ.—Tawˇ naˉ ve 26:4.

17, 18. (a) Liꞈ hpu htaꞈ yonˍ maˬ la tuˬ aˬ htoꞈ ma ve teˇ ceuˬ nawˬ htaꞈ ga laˇ gʼa ve le? (b) Awˬ gʼuˇ suhˍ teˇ lawn ngaˬ hui aˬ htoꞈ ma awˬ lawn gʼa henˇ tuˬ le?

¹⁷ Yonˍ hkʼaˇ maˇ la tuˬ ngaˬ hui heuˆ gaˇ ve kʼo, Liꞈ hpu hkʼaw ve hkʼaˬ sha sha˗ehˬ ve awˬ lawn teˇ hpaˍ shiˍ ve ceh tiˉ maˇ lawꞈ. Shehnˉ shiˍ duˇ ve hkʼa shuˍ, awˬ tehˬ ve awˬ lawn naˉ jaˇ ve gʼa gʼaꞈ ca ve yoˬ. (Tawˇ naˉ ve 2:3-6) Daꞈ jaˇ ve teˇ hkʼaˇ lehˬ, Liꞈ hpu teˇ kʼoˆ hkʼa peu˗eˬ gʼaw ve yoˬ. Nawˬ teˇ hkʼawꞈ ve hkʼaw hkʼa dehꞈ coˇ caˇ leh gʼaw ve yoˬ. Hto toˇ nyi sheh hpaˇ yaˇ nehˬ htaˇ, awˬ hkʼaˇ chi ve yehˇ jaw ve leh Yaˬhoˉvaˬ awˬ paˉ lo meuˆ daꞈ gʼa ve yoˬ. Yawˇ kʼoˆ ve, “Liꞈ hpu teˇ kʼoˆ hkʼa peu˗eˬ gʼaw ve chi, Gʼuiˬ sha ve tawˇ hkawˇ hpehꞈ ve ngaˬ gʼa shiˍ tuˬ ga laˇ ve teˇ hkʼaˇ hpehꞈ ve yoˬ. Yaˇ ehˉ htaˇ gʼa gʼaw jaw ve awˬ lawn, chi teˇ hkui kaꞈ ngaˬ hkʼa dehꞈ na gʼa ve yoˬ.” Gʼaw ve awˬ ceuˬ na gʼa tuˬ, nawˬ ve tawˇ hkawˇ hkʼaw cawˬ ve hpfuhˆ nyi kuiˬ laꞈ caˉ teˇ hpaˍ kaꞈ yehˇ sheˍ. DVD hkʼaw Shaw nyi kuiˬ liꞈ teh kuiˬ bawehˇ (Watchtower Library), Shaw nyi kuiˬ liꞈ teh kuiˬ bawehˇ in teu neꞈ hkaw, Yaˬhoˉvaˬ ve Shaˉhkiˆhkanˍ ve chaw awˬ nu ve liꞈ kʼoˆ hpfuhˆ tuˬ ve liꞈ cawˬ ve yoˬ hehˉ.

¹⁸ Awˬ pa awˬ e, nawˬ nyiˇ gʼaˇ shu aꞈ kehˉ, Yaˬhoˉvaˬ ve awˬ lawn nawˬ ve yaˇ htaꞈ maˍ piˇ gʼa ve yoˬ. Chi htaꞈ pa taw, yawˇ hui yonˍ hkʼaˇ maˇ la tuˬ, nawˬ hkʼaˬ hkʼe ga piˇgʼa tuˬ le? Awˬ gʼuˇ suhˍ teˇ lawn awˬ lawn chi htaꞈ gʼa henˇ tuˬ yoˬ.