ຄົນໜຸ່ມນ້ອຍທັງຫຼາຍ, ເສີມຄວາມເຊື່ອໃຫ້ເຂັ້ມແຂງ
“ຄວາມເຊື່ອ . . . ເປັນຄວາມແນ່ໃຈເພາະມີຫຼັກຖານຊັດເຈນວ່າສິ່ງທີ່ເບິ່ງບໍ່ເຫັນນັ້ນມີຈິງ.”—ເຫບເລີ 11:1, ລ.ມ.
ເພງ: 41, 69
1, 2. ບາງຄັ້ງຜູ້ຮັບໃຊ້ຂອງພະເຢໂຫວາທີ່ຍັງໜຸ່ມນ້ອຍອາດສົງໄສແນວໃດ ແລະຄຳພີໄບເບິນໃຫ້ຄຳແນະນຳຫຍັງ?
ໃນປະເທດອັງກິດ ພີ່ນ້ອງຍິງຄົນໜຶ່ງທີ່ຍັງໜຸ່ມນ້ອຍຖືກນັກຮຽນຄົນໜຶ່ງໃນຫ້ອງເວົ້າໃຫ້ວ່າ: “ເຈົ້າກໍເບິ່ງຄືວ່າເປັນຄົນສະຫຼາດຫຼາຍ ແຕ່ເປັນຫຍັງເຊື່ອເລື່ອງພະເຈົ້າ.” ພີ່ນ້ອງຊາຍຄົນໜຶ່ງໃນປະເທດເຢຍລະມັນ ລາວຂຽນວ່າ: “ພວກອາຈານຖືວ່າບັນທຶກເລື່ອງການສ້າງທີ່ຢູ່ໃນຄຳພີໄບເບິນເປັນພຽງນິທານ. ເຂົາເຈົ້າໃຫ້ນັກຮຽນເຊື່ອເລື່ອງວິວັດທະນາການ.” ໃນປະເທດຝຣັ່ງ ພີ່ນ້ອງຍິງຄົນໜຶ່ງທີ່ຍັງໜຸ່ມນ້ອຍ ລາວເວົ້າວ່າ: “ພວກອາຈານຢູ່ໂຮງຮຽນຂ້ອນຂ້າງຕື່ນຕົກໃຈທີ່ມີນັກຮຽນບາງຄົນຍັງເຊື່ອໃນຄຳພີໄບເບິນ.”
2 ໃນທຸກມື້ນີ້ ຫຼາຍຄົນບໍ່ເຊື່ອວ່າພະເຈົ້າສ້າງເຮົາ. ຖ້າເຈົ້າເປັນຜູ້ຮັບໃຊ້ຂອງພະເຢໂຫວາເຊິ່ງອາຍຸຍັງນ້ອຍ ຫຼືເປັນຄົນໜຸ່ມນ້ອຍທີ່ກຳລັງຮຽນຮູ້ກ່ຽວກັບພະອົງ ບາງຄັ້ງເຈົ້າອາດສົງໄສວ່າເຈົ້າຈະພິສູດແນວໃດວ່າພະເຢໂຫວາເປັນຜູ້ທີ່ສ້າງເຮົາ. ຄຳພີໄບເບິນຊ່ວຍເຮົາໃຫ້ຄິດຢ່າງຖີ່ຖ້ວນໃນສິ່ງທີ່ເຮົາໄດ້ຍິນຫຼືອ່ານ ແລະຫາເຫດຜົນໃນສິ່ງນັ້ນ. ຄຳພີໄບເບິນກ່າວວ່າ: “ຄວາມຄຶດຕຶກຕອງຈະເຝົ້າຮັກສາເຈົ້າ.” ໂດຍວິທີໃດ? ຄວາມຄຶດຕຶກຕອງຈະຊ່ວຍເຮົາໃຫ້ປະຕິເສດຄວາມຄິດທີ່ບໍ່ຖືກຕ້ອງ ແລະຊ່ວຍເສີມຄວາມເຊື່ອຂອງເຮົາໃນພະເຢໂຫວາ.—ອ່ານສຸພາສິດ 2:10-12
3. ເຮົາຈະພິຈາລະນາຫຍັງໃນບົດຄວາມນີ້?
3 ເພື່ອຈະມີຄວາມເຊື່ອທີ່ໜັກແໜ້ນໃນພະເຢໂຫວາ ເຮົາຕ້ອງຮູ້ຈັກພະອົງເປັນຢ່າງດີ. (1 ຕີໂມເຕ 2:4) ດັ່ງນັ້ນ ເມື່ອເຈົ້າອ່ານຄຳພີໄບເບິນແລະສັບພະໜັງສືຕ່າງໆຂອງອົງການ ເປັນສິ່ງສຳຄັນຫຼາຍທີ່ຈະຢຸດແລະຄິດກ່ຽວກັບສິ່ງທີ່ກຳລັງອ່ານ ແລະພະຍາຍາມເຂົ້າໃຈໃນເລື່ອງນັ້ນ. (ມັດທາຍ 13:23) ຖ້າເຈົ້າສຶກສາແບບນີ້ ເຈົ້າຈະເຫັນຫຼັກຖານຫຼາຍຂຶ້ນວ່າພະເຢໂຫວາເປັນຜູ້ທີ່ສ້າງເຮົາແລະຄຳພີໄບເບິນກໍມາຈາກພະອົງ. (ເຫບເລີ 11:1) ໃຫ້ພິຈາລະນາເບິ່ງວ່າເຮົາຈະເຮັດເຊັ່ນນີ້ໄດ້ແນວໃດ?
ວິທີເສີມຄວາມເຊື່ອໃຫ້ເຂັ້ມແຂງ
4. ການເຊື່ອເລື່ອງວິວັດທະນາການແລະເລື່ອງການສ້າງຄ້າຍຄືກັນໃນແງ່ໃດ? ດັ່ງນັ້ນ ເຮົາທຸກຄົນຕ້ອງເຮັດຫຍັງ?
4 ບາງຄົນອາດເວົ້າກັບເຈົ້າວ່າ: “ຂ້ອຍເຊື່ອເລື່ອງວິວັດທະນາການເພາະພວກນັກວິທະຍາສາດເວົ້າວ່ານັ້ນເປັນຄວາມຈິງ. ເຈົ້າຈະເຊື່ອເລື່ອງພະເຈົ້າໄດ້ແນວໃດໃນເມື່ອບໍ່ມີໃຜເຄີຍເຫັນພະອົງ?” ຫຼາຍຄົນຄິດແບບນີ້. ເປັນຄວາມຈິງທີ່ວ່າ ບໍ່ມີໃຜເຄີຍເຫັນພະເຈົ້າຫຼືໄດ້ເຝົ້າເບິ່ງຕອນທີ່ບາງສິ່ງກຳລັງຖືກສ້າງຂຶ້ນມາ. (ໂຢຮັນ 1:18) ແຕ່ສຳລັບຄົນທີ່ເຊື່ອເລື່ອງວິວັດທະນາການເດ? ເຂົາເຈົ້າກໍເຊັ່ນກັນເຊື່ອໃນສິ່ງທີ່ຕົນເອງບໍ່ສາມາດເຫັນໄດ້. ບໍ່ມີນັກວິທະຍາສາດຈັກຄົນຫຼືມະນຸດຄົນໃດເລີຍທີ່ໄດ້ເຝົ້າສັງເກດເບິ່ງວ່າຊີວິດໃນຮູບແບບໜຶ່ງວິວັດທະນາການໄປເປັນຊີວິດໃນຮູບແບບອື່ນ. ຕົວຢ່າງເຊັ່ນ: ບໍ່ມີມະນຸດຄົນໃດໄດ້ເຝົ້າເບິ່ງວ່າສັດເລືອຄານວິວັດທະນາການໄປເປັນສັດລ້ຽງລູກດ້ວຍນົມ. (ໂຢບ 38:1, 4) ດັ່ງນັ້ນ ເຮົາທຸກຄົນຕ້ອງເບິ່ງຄວາມເປັນຈິງ ຄິດກ່ຽວກັບເລື່ອງນີ້ຢ່າງຖີ່ຖ້ວນ ແລະຕັດສິນໃຈວ່າສິ່ງເຫຼົ່ານີ້ພິສູດເຖິງເລື່ອງໃດແທ້ໆ. ຫຼາຍຄົນເບິ່ງສິ່ງຕ່າງໆທີ່ມີໃນທຳມະຊາດແລະ “ເຂົ້າໃຈ” ວ່າມີພະເຈົ້າ. ເຂົາເຈົ້າ “ເຫັນ” ຢ່າງຈະແຈ້ງວ່າພະອົງເປັນຜູ້ສ້າງ ພະອົງມີລິດເດດ ແລະພະອົງມີຄຸນລັກສະນະຕ່າງໆທີ່ດີເລີດ.—ໂລມ 1:20
ເຄື່ອງມືຄົ້ນຄວ້າສາມາດຊ່ວຍເຈົ້າໃຫ້ອະທິບາຍຄວາມເຊື່ອກັບຄົນອື່ນ (ເບິ່ງຂໍ້ 5)
5. ເຄື່ອງມືຄົ້ນຄວ້າອັນໃດແດ່ທີ່ຈະຊ່ວຍເຮົາໃຫ້ຮຽນຮູ້ຫຼາຍຂຶ້ນກ່ຽວກັບເລື່ອງການສ້າງ?
5 ເມື່ອເຮົາເບິ່ງທຳມະຊາດແລະຄິດຢ່າງເລິກເຊິ່ງກ່ຽວກັບສິ່ງນີ້ ເຮົາຈະເຫັນວ່າທຸກສິ່ງຖືກສ້າງຢ່າງໜ້າອັດສະຈັນ. “ດ້ວຍຄວາມເຊື່ອ ເຮົາທັງຫຼາຍເຂົ້າໃຈວ່າ” ມີຜູ້ສ້າງ ເຖິງວ່າເຮົາບໍ່ສາມາດເຫັນພະອົງກໍຕາມ. ເຮົາສຳນຶກວ່າພະອົງມີນິດໄສໃຈຄໍທີ່ດີງາມແລະມີສະຕິປັນຍາທີ່ຍິ່ງໃຫຍ່. (ເຫບເລີ 11:3, 27) ເຮົາສາມາດຮຽນຮູ້ຫຼາຍຂຶ້ນກ່ຽວກັບສິ່ງຕ່າງໆທີ່ພະອົງໄດ້ສ້າງໂດຍການອ່ານສິ່ງທີ່ນັກວິທະຍາສາດໄດ້ຄົ້ນພົບ. ຂໍ້ມູນບາງຢ່າງນັ້ນມີຢູ່ໃນເຄື່ອງມືຄົ້ນຄວ້າຕ່າງໆເຊັ່ນ: ວິດີໂອເລື່ອງສິ່ງຊົງສ້າງທີ່ໜ້າພິດສະຫວົງເຜີຍໃຫ້ເຫັນຄວາມລໍ້າເລີດຂອງພະເຈົ້າ ຈຸນລະສານມີຜູ້ສ້າງສິ່ງທີ່ມີຊີວິດບໍ? ຈຸນລະສານຕົ້ນກຳເນີດຊີວິດ—ຫ້າຄຳຖາມທີ່ໜ້າຄິດ ປຶ້ມພະຜູ້ສ້າງຜູ້ໄຝ່ພະໄທໃນຕົວເຈົ້າມີບໍ? ແລະໃນວາລະສານຕື່ນເຖີດ! ຫຼາຍຄັ້ງມີການສຳພາດນັກວິທະຍາສາດແລະຄົນອື່ນໆເຊິ່ງອະທິບາຍວ່າເປັນຫຍັງຕອນນີ້ເຂົາເຈົ້າເຊື່ອເລື່ອງພະເຈົ້າ. ນອກຈາກນັ້ນໃນບົດຄວາມຊຸດທີ່ຊື່ວ່າ: “ຊີວິດມາຈາກໃສ?” ມີລາຍລະອຽດເລື່ອງສັດແລະສິ່ງອື່ນໆທີ່ຢູ່ໃນທຳມະຊາດເຊິ່ງລວມເຖິງຕົວຢ່າງຕ່າງໆທີ່ນັກວິທະຍາສາດພະຍາຍາມຮຽນແບບວິທີການເຮັດວຽກຂອງສິ່ງເຫຼົ່ານີ້.
6. ເຄື່ອງມືຄົ້ນຄວ້າສາມາດຊ່ວຍເຈົ້າໄດ້ແນວໃດ?
6 ພີ່ນ້ອງຊາຍຄົນໜຶ່ງໃນປະເທດອາເມຣິກາເຊິ່ງອາຍຸ 19 ປີ ລາວເວົ້າວ່າ: “ຈຸນລະສານມີຜູ້ສ້າງສິ່ງທີ່ມີຊີວິດບໍ? ແລະຈຸນລະສານຕົ້ນກຳເນີດຊີວິດ—ຫ້າຄຳຖາມທີ່ໜ້າຄິດ ເປັນປະໂຫຍດຫຼາຍແທ້ໆຕໍ່ຂ້ອຍ. ຂ້ອຍໄດ້ສຶກສາປະມານ 12 ຮອບແລ້ວ.” ພີ່ນ້ອງຍິງຄົນໜຶ່ງໃນປະເທດຝຣັ່ງ ລາວຂຽນວ່າ: “ບົດຄວາມຕ່າງໆທີ່ຢູ່ໃນຫົວເລື່ອງ ‘ຊີວິດມາຈາກໃສ?’ ເຮັດໃຫ້ຂ້ອຍຮູ້ສຶກງຶດງໍ້ຫຼາຍ! ບົດຄວາມເຫຼົ່ານັ້ນສະແດງໃຫ້ເຫັນວ່ານັກວິສະວະກຳສາດທີ່ເກັ່ງທີ່ສຸດອາດຈະຮຽນແບບສິ່ງທີ່ມີໃນທຳມະຊາດໄດ້ ແຕ່ຈະບໍ່ມີວັນເຮັດໄດ້ທຽບເທົ່າກັບຄວາມສະຫຼັບຊັບຊ້ອນທີ່ມີໃນທຳມະຊາດ.” ພໍ່ແມ່ຂອງເດັກຍິງຄົນໜຶ່ງເຊິ່ງອາຍຸ 15 ປີທີ່ຢູ່ອາຝຼິກກາໃຕ້ ເຂົາເຈົ້າເວົ້າວ່າ: “ສິ່ງທຳອິດທີ່ລູກສາວຂອງເຮົາມັກອ່ານໃນວາລະສານຕື່ນເຖີດ! ແມ່ນບົດຄວາມ ‘ສຳພາດ.’” ສັບພະໜັງສືເຫຼົ່ານີ້ສາມາດຊ່ວຍເຈົ້າໄດ້ເຊັ່ນກັນເພື່ອຈະເຫັນຫຼັກຖານທີ່ສະແດງວ່າມີຜູ້ສ້າງ ແລະເຈົ້າຈະເບິ່ງອອກແລະປະຕິເສດຄຳສອນທີ່ຜິດໆໄດ້. ເມື່ອເຮັດແນວນັ້ນ ຄວາມເຊື່ອຂອງເຈົ້າກໍຈະເຂັ້ມແຂງຄືກັບວ່າເຈົ້າເປັນຕົ້ນໄມ້ທີ່ມີຮາກຢັ່ງລົງເລິກແລະຈະບໍ່ລົ້ມລົງເມື່ອປະສົບກັບພາຍຸທີ່ຮຸນແຮງ.—ເຢເຣມີ 17:5-8
ຄວາມເຊື່ອຂອງເຈົ້າກ່ຽວກັບຄຳພີໄບເບິນ
7. ເປັນຫຍັງພະເຈົ້າຢາກໃຫ້ເຈົ້າໃຊ້ຄວາມສາມາດໃນການຄິດຫາເຫດຜົນ?
7 ຜິດບໍທີ່ຈະຖາມວ່າ: ‘ເປັນຫຍັງຂ້ອຍຈຶ່ງເຊື່ອໃນສິ່ງທີ່ຄຳພີໄບເບິນສອນ?’ ບໍ່ຜິດເລີຍ. ພະເຢໂຫວາບໍ່ຢາກໃຫ້ເຈົ້າເຊື່ອໃນບາງສິ່ງຍ້ອນວ່າຄົນອື່ນເຊື່ອ. ພະອົງຢາກໃຫ້ເຈົ້າໃຊ້ “ຄວາມສາມາດໃນການຄິດຫາເຫດຜົນ, ລ.ມ.” ເພື່ອຈະຮູ້ຈັກຄຳພີໄບເບິນແລະເຫັນຫຼັກຖານຢືນຢັນວ່າຄຳພີໄບເບິນມາຈາກພະອົງແທ້ໆ. ເມື່ອເຈົ້າຮູ້ວ່າຄຳພີໄບເບິນສອນແນວໃດ ຄວາມເຊື່ອຂອງເຈົ້າທີ່ມີຕໍ່ຄຳພີໄບເບິນກໍຈະເຂັ້ມແຂງຂຶ້ນ. (ອ່ານໂລມ 12:1, 2; 1 ຕີໂມເຕ 2:4) ວິທີໜຶ່ງທີ່ຈະຮູ້ຈັກຄຳພີໄບເບິນກໍໂດຍການສຶກສາຫົວຂໍ້ທີ່ສະເພາະເຈາະຈົງເຊິ່ງເຈົ້າຢາກຮູ້ຫຼາຍຂຶ້ນກ່ຽວກັບເລື່ອງນັ້ນ.
8, 9. (ກ) ບາງຄົນມັກສຶກສາຫົວເລື່ອງໃດ? (ຂ) ບາງຄົນໄດ້ຮັບປະໂຫຍດແນວໃດເມື່ອຄຶດຕຶກຕອງໃນສິ່ງທີ່ເຂົາເຈົ້າອ່ານ?
8 ບາງຄົນມັກສຶກສາຄຳພະຍາກອນຕ່າງໆທີ່ຢູ່ໃນຄຳພີໄບເບິນ ຫຼືເຂົາເຈົ້າອາດມັກສົມທຽບບັນທຶກທີ່ຢູ່ໃນຄຳພີໄບເບິນກັບສິ່ງທີ່ນັກປະຫວັດສາດ ນັກວິທະຍາສາດ ຫຼືນັກບູຮານຄະດີເວົ້າ. ຂໍໃຫ້ເບິ່ງຕົ້ນເດີມ 3:15 ເປັນຕົວຢ່າງ. ພະເຢໂຫວາບອກຄຳພະຍາກອນນັ້ນທີ່ສຳຄັນຫຼາຍ ທັນທີຫຼັງຈາກທີ່ອາດາມກັບເອວາບໍ່ເຊື່ອຟັງແລະຂັດຂືນຕໍ່ການປົກຄອງຂອງພະອົງ. ນີ້ເປັນຄຳພະຍາກອນທຳອິດໃນຫຼາຍໆຄຳພະຍາກອນທີ່ຊ່ວຍເຮົາໃຫ້ເຂົ້າໃຈວິທີທີ່ລາຊະອານາຈັກຂອງພະເຈົ້າຈະພິສູດວ່າການປົກຄອງຂອງພະອົງແມ່ນດີທີ່ສຸດ ແລະເຂົ້າໃຈວິທີທີ່ລາຊະອານາຈັກນີ້ຈະກຳຈັດຄວາມທຸກລຳບາກໃຫ້ໝົດໄປ. ເຈົ້າຈະສຶກສາຕົ້ນເດີມ 3:15 ແນວໃດ? ເຈົ້າອາດເຮັດລາຍການຂອງຂໍ້ພະຄຳພີຕ່າງໆທີ່ໃຫ້ລາຍລະອຽດເພີ່ມເຕີມກ່ຽວກັບວິທີທີ່ຄຳພະຍາກອນນີ້ຈະສຳເລັດເປັນຈິງ. ຈາກນັ້ນ ເຈົ້າອາດຄົ້ນຄວ້າເບິ່ງວ່າຂໍ້ພະຄຳພີເຫຼົ່ານັ້ນຂຽນຕອນໃດແລ້ວກໍຈັດຕາມລຳດັບເວລາ. ໃນທີ່ສຸດເຈົ້າກໍຈະເຂົ້າໃຈວ່າຄົນທີ່ຂຽນຄຳພີໄບເບິນມີຊີວິດຢູ່ໃນໄລຍະເວລາທີ່ແຕກຕ່າງກັນ ແຕ່ເຂົາເຈົ້າແຕ່ລະຄົນຂຽນສິ່ງທີ່ເຮັດໃຫ້ຄຳພະຍາກອນນີ້ແຈ້ງຂຶ້ນ. ການເຮັດແບບນີ້ຈະຊ່ວຍເຈົ້າໃຫ້ພິສູດວ່າພະລັງບໍລິສຸດຂອງພະເຢໂຫວາຊີ້ນຳຄົນເຫຼົ່ານີ້.—2 ເປໂຕ 1:21
9 ພີ່ນ້ອງຊາຍຄົນໜຶ່ງໃນປະເທດເຢຍລະມັນໄດ້ພິຈາລະນາວ່າພະທຳແຕ່ລະເຫຼັ້ມໃນຄຳພີໄບເບິນມີລາຍລະອຽດແນວໃດກ່ຽວກັບເລື່ອງລາຊະອານາຈັກ. ລາວເວົ້າວ່າ: “ມີປະມານ 40 ຄົນທີ່ຂຽນຄຳພີໄບເບິນ ແລະຫຼາຍຄົນໃນນັ້ນມີຊີວິດຢູ່ຄົນລະສະໄໝແລະບໍ່ຮູ້ຈັກກັນເປັນສ່ວນຕົວຊໍ້າ.” ພີ່ນ້ອງຍິງຄົນໜຶ່ງໃນປະເທດອົດສະຕຣາລີໄດ້ສຶກສາບົດຄວາມໜຶ່ງໃນຫໍສັງເກດການ ແລະໄດ້ຮຽນຮູ້ວ່າການສະຫຼອງປັດສະຄາມີຄວາມກ່ຽວຂ້ອງກັນແນວໃດກັບຕົ້ນເດີມ 3:15 ແລະເລື່ອງເມຊີ. [1] (ເບິ່ງຂໍ້ສັງເກດສຳລັບຜູ້ອ່ານ) ລາວຂຽນວ່າ: “ການສຶກສານັ້ນເປີດຕາຂອງຂ້ອຍໃຫ້ເຫັນວ່າພະເຢໂຫວາດີເລີດແທ້ໆ. ການທີ່ບາງຄົນຄິດໄດ້ໃນເລື່ອງການຈັດຕຽມນີ້ສຳລັບຊາວອິດສະລາແອນແລະເພື່ອຈະໃຫ້ຄຳສັນຍານີ້ສຳເລັດເປັນຈິງໃນພະເຍຊູ ສິ່ງນີ້ປະທັບໃຈຂ້ອຍຫຼາຍ. ຂ້ອຍໄດ້ຢຸດແລະຄຶດຕຶກຕອງເຖິງຄວາມເຫຼືອເຊື່ອທີ່ການສະຫຼອງປັດສະຄາເປັນພາບທີ່ບອກເຫດການລ່ວງໜ້າ!” ເປັນຫຍັງພີ່ນ້ອງຍິງຄົນນີ້ຈຶ່ງຮູ້ສຶກແບບນີ້? ກໍຍ້ອນວ່າລາວຄິດຢ່າງເລິກເຊິ່ງກ່ຽວກັບສິ່ງທີ່ອ່ານແລະເຂົ້າໃຈໃນເລື່ອງນັ້ນ. ສິ່ງນີ້ຊ່ວຍເສີມຄວາມເຊື່ອຂອງລາວແລະເຮັດໃຫ້ລາວໃກ້ຊິດພະເຢໂຫວາຫຼາຍຂຶ້ນ.—ມັດທາຍ 13:23
10. ຄວາມສັດຊື່ຂອງຜູ້ຂຽນຄຳພີໄບເບິນເສີມຄວາມເຊື່ອຂອງເຮົາແນວໃດໃນຄຳພີໄບເບິນ?
10 ຂໍໃຫ້ຄິດເຖິງຄວາມສັດຊື່ຂອງບຸກຄົນທີ່ຂຽນຄຳພີໄບເບິນ. ເຂົາເຈົ້າເວົ້າຄວາມຈິງສະເໝີແລະບໍ່ຢ້ານທີ່ຈະເຮັດເຊັ່ນນັ້ນ. ຫຼາຍຄັ້ງ ຜູ້ຂຽນໃນສະໄໝນັ້ນຂຽນແຕ່ສິ່ງດີໆກ່ຽວກັບຊາດແລະຜູ້ນຳຂອງຕົນເອງ. ແຕ່ຜູ້ພະຍາກອນຂອງພະເຢໂຫວາບໍ່ໄດ້ຂຽນສະເພາະສິ່ງດີໆເທົ່ານັ້ນ ເຂົາເຈົ້າຍັງຂຽນສິ່ງບໍ່ດີທີ່ຊາວອິດສະລາແອນແລະກະສັດຂອງເຂົາເຈົ້າໄດ້ເຮັດ. (2 ຂ່າວຄາວ 16:9, 10; 24:18-22) ເຂົາເຈົ້າຍັງເວົ້າເຖິງຂໍ້ຜິດພາດຂອງຕົນເອງແລະຂອງຜູ້ຮັບໃຊ້ຄົນອື່ນໆຂອງພະເຈົ້າ. (2 ຊາເມືອນ 12:1-14; ມາລະໂກ 14:50) ພີ່ນ້ອງຊາຍຄົນໜຶ່ງຢູ່ປະເທດອັງກິດ ລາວເວົ້າວ່າ: “ຄວາມສັດຊື່ແບບນັ້ນຫາໄດ້ຍາກຫຼາຍ. ເລື່ອງນີ້ເສີມຄວາມໝັ້ນໃຈໃຫ້ເຮົາວ່າຄຳພີໄບເບິນມາຈາກພະເຢໂຫວາແທ້ໆ.”
11. ຄຳແນະນຳໃນຄຳພີໄບເບິນເຮັດໃຫ້ເຮົາໝັ້ນໃຈແນວໃດວ່າຄຳພີໄບເບິນມາຈາກພະເຈົ້າ?
11 ເມື່ອຜູ້ຄົນຍອມໃຫ້ຄຳພີໄບເບິນຊີ້ນຳແນວທາງການໃຊ້ຊີວິດຂອງເຂົາເຈົ້າ ຄົນເຫຼົ່ານັ້ນກໍຈະເຫັນວ່າປຶ້ມຫົວນີ້ຊ່ວຍໄດ້. ເລື່ອງນີ້ຈຶ່ງເຮັດໃຫ້ເຂົາເຈົ້າໝັ້ນໃຈວ່າຄຳພີໄບເບິນມາຈາກພະເຈົ້າ. (ອ່ານຄຳເພງ 19:7-11) ພີ່ນ້ອງຍິງຄົນໜຶ່ງທີ່ຍັງໜຸ່ມນ້ອຍເຊິ່ງຢູ່ປະເທດຍີ່ປຸ່ນ ລາວຂຽນວ່າ: “ການນຳໃຊ້ຄຳສອນທີ່ຢູ່ໃນພະຄຳພີເຮັດໃຫ້ຄອບຄົວຂອງຂ້ອຍມີຄວາມສຸກແທ້ໆ. ເຮົາພົບຄວາມສະຫງົບສຸກ ຄວາມເປັນອັນໜຶ່ງອັນດຽວກັນ ແລະຄວາມຮັກ.” ຄຳພີໄບເບິນຊ່ວຍຫຼາຍຄົນໃຫ້ສຳນຶກວ່າບາງສິ່ງທີ່ເຂົາເຈົ້າເຊື່ອບໍ່ໄດ້ເປັນຄວາມຈິງ. (ຄຳເພງ 115:3-8) ຄຳພີໄບເບິນຊີ້ນຳຜູ້ຄົນໃຫ້ໝາຍເພິ່ງພະເຢໂຫວາຜູ້ເປັນພະເຈົ້າອົງມີລິດເດດທີ່ໃຫຍ່ທີ່ສຸດ ແລະຄຳພີໄບເບິນກໍສັນຍາເລື່ອງອະນາຄົດທີ່ດີກວ່າ. ແຕ່ສຳລັບບາງຄົນທີ່ເວົ້າວ່າບໍ່ມີພະເຈົ້າ ທີ່ຈິງແລ້ວເຂົາເຈົ້າເຮັດໃຫ້ທຳມະຊາດເປັນຄືກັບພະເຈົ້າ. ບາງຄົນກໍເວົ້າວ່າມະນຸດສາມາດເຮັດໃຫ້ມີອະນາຄົດທີ່ດີກວ່າ ແຕ່ເມື່ອເຮົາເບິ່ງສິ່ງທີ່ມະນຸດເຮັດມາຈົນຮອດປັດຈຸບັນນີ້ ເຮົາກໍເຫັນວ່າເຂົາເຈົ້າບໍ່ສາມາດແກ້ໄຂບັນຫາຕ່າງໆໃນໂລກນີ້ໄດ້.—ຄຳເພງ 146:3, 4
ວິທີຫາເຫດຜົນກັບຄົນອື່ນ
12, 13. ເຮົາຈະລົມກັບຄົນອື່ນແນວໃດໃນເລື່ອງຄຳພີໄບເບິນຫຼືເລື່ອງການສ້າງ?
12 ເມື່ອເຮົາລົມກັບຄົນອື່ນໃນເລື່ອງຄຳພີໄບເບິນຫຼືເລື່ອງການສ້າງ ທຳອິດໃຫ້ເຮົາພະຍາຍາມທີ່ຈະຮູ້ວ່າລາວເຊື່ອແທ້ໆໃນສິ່ງໃດ. ຂໍໃຫ້ຈື່ໄວ້ວ່າບາງຄົນທີ່ເຊື່ອເລື່ອງວິວັດທະນາການກໍເຊື່ອວ່າມີພະເຈົ້າ. ເຂົາເຈົ້າເວົ້າວ່າພະເຈົ້າໄດ້ໃຊ້ວິວັດທະນາການເພື່ອສ້າງທຸກໆສິ່ງທີ່ມີຊີວິດ. ບາງຄົນເຊື່ອວ່າວິວັດທະນາການຕ້ອງເປັນເລື່ອງຈິງເພາະມີການສອນຢູ່ໂຮງຮຽນ. ບາງຄົນກໍເຊົາເຊື່ອໃນພະເຈົ້າຍ້ອນວ່າຜິດຫວັງກັບສາສະໜາ. ດັ່ງນັ້ນ ທຳອິດຂໍໃຫ້ຖາມຄົນນັ້ນວ່າລາວເຊື່ອໃນສິ່ງໃດແລະເປັນຫຍັງຈຶ່ງເຊື່ອແບບນັ້ນ ແລ້ວໃຫ້ຕັ້ງໃຈຟັງສິ່ງທີ່ລາວເວົ້າ. ເມື່ອເຮັດແບບນັ້ນ ລາວອາດເຕັມໃຈຫຼາຍຂຶ້ນທີ່ຈະຟັງເຈົ້າ.—ຕິໂຕ 3:2
ໃຫ້ຖາມຜູ້ຄົນດ້ວຍຄວາມນັບຖືວ່າເຂົາເຈົ້າເຊື່ອສິ່ງໃດ ແລ້ວໃຫ້ຕັ້ງໃຈຟັງສິ່ງທີ່ເຂົາເຈົ້າເວົ້າ
13 ຖ້າບາງຄົນເວົ້າວ່າ ເຈົ້າໂງ່ແທ້ທີ່ເຊື່ອວ່າມີຜູ້ສ້າງ ເຈົ້າຈະຕອບແນວໃດ? ໃຫ້ຖາມລາວດ້ວຍຄວາມນັບຖືໂດຍໃຫ້ລາວອະທິບາຍວ່າ ລາວຄິດວ່າຊີວິດເລີ່ມຕົ້ນແນວໃດ. ເຈົ້າອາດເວົ້າວ່າ ຖ້າຊີວິດມາຈາກວິວັດທະນາການ ສິ່ງທຳອິດທີ່ມີຊີວິດຕ້ອງມີຄວາມສາມາດໃນການສ້າງຕົວເອງໃໝ່. ທີ່ຈິງ ສາສະດາຈານເຄມີສາດຄົນໜຶ່ງໄດ້ເວົ້າວ່າ ຢ່າງໜ້ອຍຈຳເປັນຕ້ອງມີ (1) ສິ່ງທີ່ເປັນເຍື່ອຫຸ້ມເພື່ອປ້ອງກັນຕົວເອງ (2) ວິທີການເກັບແລ້ວໃຊ້ພະລັງງານ (3) ຂໍ້ມູນເພື່ອຄວບຄຸມຮູບຊົງແລະການຂະຫຍາຍຕົວ ແລະ (4) ຄວາມສາມາດໃນການຄັດລອກຂໍ້ມູນ. ລາວເວົ້າຕື່ມອີກວ່າ: “ຄົນເຮົາປະທັບໃຈຫຼາຍເມື່ອເຫັນວ່າສິ່ງມີຊີວິດທີ່ບໍ່ສະຫຼັບຊັບຊ້ອນທີ່ສຸດກໍຍັງສະຫຼັບຊັບຊ້ອນຫຼາຍ.”
14. ເມື່ອລົມກັບຄົນອື່ນໃນເລື່ອງການສ້າງ ເຈົ້າສາມາດໃຊ້ເຫດຜົນອັນໃດທີ່ງ່າຍໆ?
14 ເມື່ອລົມກັນໃນເລື່ອງການສ້າງ ເຈົ້າອາດໃຊ້ເຫດຜົນງ່າຍໆທີ່ອັກຄະສາວົກໂປໂລໃຊ້. ລາວຂຽນວ່າ: “ເຫດວ່າເຮືອນທຸກຫຼັງຄົງມີຜູ້ສ້າງ ແຕ່ວ່າຜູ້ໄດ້ສ້າງສັບພະທຸກສິ່ງເປັນພະເຈົ້າ.” (ເຫບເລີ 3:4) ແມ່ນແລ້ວ ເຮືອນກໍມີຜູ້ອອກແບບແລະຜູ້ສ້າງ. ແນ່ນອນວ່າສິ່ງຕ່າງໆທີ່ມີຊີວິດເຊິ່ງສະຫຼັບຊັບຊ້ອນຫຼາຍກວ່າເຮືອນກໍຕ້ອງມີຜູ້ອອກແບບແລະຜູ້ສ້າງ. ນອກຈາກນັ້ນ ເຈົ້າຍັງສາມາດໃຊ້ສັບພະໜັງສືຕ່າງໆຂອງອົງການ. ພີ່ນ້ອງຍິງຄົນໜຶ່ງໄດ້ລົມກັບຊາຍໜຸ່ມຄົນໜຶ່ງທີ່ບໍ່ເຊື່ອວ່າມີພະເຈົ້າ. ລາວເອົາຈຸນລະສານມີຜູ້ສ້າງສິ່ງທີ່ມີຊີວິດບໍ? ແລະຈຸນລະສານຕົ້ນກຳເນີດຊີວິດ—ຫ້າຄຳຖາມທີ່ໜ້າຄິດ ໃຫ້ກັບຊາຍໜຸ່ມຄົນນັ້ນ ແລະປະມານອາທິດໜຶ່ງຕໍ່ມາ ລາວກໍເວົ້າວ່າ: “ຕອນນີ້ຂ້ອຍເຊື່ອໃນພະເຈົ້າ.” ຊາຍໜຸ່ມຄົນນັ້ນເລີ່ມສຶກສາຄຳພີໄບເບິນແລະຕໍ່ມາກໍໄດ້ເປັນພີ່ນ້ອງຂອງເຮົາ.
15, 16. ເຮົາຄວນເຮັດຫຍັງກ່ອນທີ່ຈະອະທິບາຍກັບບາງຄົນວ່າຄຳພີໄບເບິນມາຈາກພະເຈົ້າ? ແລະເຮົາຄວນຈື່ສິ່ງໃດໄວ້ສະເໝີ?
15 ຖ້າບາງຄົນມີຂໍ້ສົງໄສກ່ຽວກັບຄຳພີໄບເບິນ ເຈົ້າຈະຫາເຫດຜົນກັບລາວແນວໃດ. ດັ່ງທີ່ກ່າວໄວ້ກ່ອນໜ້ານີ້ ທຳອິດໃຫ້ຖາມວ່າລາວເຊື່ອແນວໃດ ແລະຈາກນັ້ນໃຫ້ຊອກຮູ້ໃນສິ່ງທີ່ລາວສົນໃຈ. (ສຸພາສິດ 18:13) ຖ້າລາວມັກເລື່ອງວິທະຍາສາດ ໃຫ້ລາວເບິ່ງຕົວຢ່າງຕ່າງໆໃນຄຳພີໄບເບິນເພື່ອສະແດງໃຫ້ເຫັນວ່າຄຳພີໄບເບິນເວົ້າຖືກຕ້ອງສະເໝີກ່ຽວກັບເລື່ອງວິທະຍາສາດ. ຖ້າລາວມັກເລື່ອງປະຫວັດສາດ ເຈົ້າອາດກ່າວເຖິງເຫດການໜຶ່ງທີ່ບອກໄວ້ໃນປຶ້ມປະຫວັດສາດຕ່າງໆ ແລະໃຫ້ລາວເບິ່ງວ່າຄຳພີໄບເບິນໄດ້ບອກລ່ວງໜ້າເລື່ອງເຫດການນັ້ນເປັນເວລາຫຼາຍປີກ່ອນທີ່ມັນຈະເກີດຂຶ້ນ. ບາງຄົນອາດຟັງເຈົ້າ ຖ້າເຈົ້າໃຫ້ເຂົາເຈົ້າເບິ່ງສິ່ງທີ່ຢູ່ໃນຄຳພີໄບເບິນເຊິ່ງສາມາດປັບປຸງຊີວິດຂອງເຂົາເຈົ້າໄດ້ ເຊັ່ນ: ຄຳແນະນຳທີ່ຢູ່ໃນຄຳເທດເທິງພູເຂົາ.
16 ຂໍໃຫ້ຈື່ໄວ້ວ່າ ເຮົາບໍ່ຕ້ອງການທີ່ຈະຖຽງກັບຜູ້ຄົນ ແຕ່ເຮົາຕ້ອງການໃຫ້ເຂົາເຈົ້າມ່ວນໃນການລົມກັບເຮົາແລະໃນການຮຽນຮູ້ກ່ຽວກັບຄຳພີໄບເບິນ. ດັ່ງນັ້ນ ໃຫ້ຖາມຄຳຖາມໃນແບບທີ່ສະແດງຄວາມນັບຖື ແລະຈາກນັ້ນກໍໃຫ້ຕັ້ງໃຈຟັງ. ເມື່ອເຈົ້າບອກບາງຄົນກ່ຽວກັບສິ່ງທີ່ເຈົ້າເຊື່ອ ຂໍໃຫ້ເຮັດຢ່າງສຸພາບ ໂດຍສະເພາະເມື່ອຄົນນັ້ນອາຍຸຫຼາຍກວ່າເຈົ້າ. ຖ້າເຈົ້ານັບຖືຄົນອື່ນ ອາດເປັນໄປໄດ້ທີ່ເຂົາເຈົ້າກໍຈະນັບຖືເຈົ້າເຊັ່ນກັນ. ນອກຈາກນັ້ນ ເຂົາເຈົ້າຈະປະທັບໃຈແທ້ໆກ່ຽວກັບສິ່ງທີ່ເຈົ້າເຊື່ອເຖິງວ່າເຈົ້າຍັງນ້ອຍກໍຕາມ. ຖ້າບາງຄົນພຽງແຕ່ຢາກຖຽງຫຼືເຍາະເຍີ້ຍເຈົ້າ ເຈົ້າກໍບໍ່ຈຳເປັນຕ້ອງຕອບລາວ.—ສຸພາສິດ 26:4
ຄົ້ນຫາຄວາມຈິງໃນຄຳພີໄບເບິນແລະເສີມຄວາມເຊື່ອໃຫ້ເຂັ້ມແຂງ
17, 18. (ກ) ສິ່ງໃດຈະຊ່ວຍເຈົ້າໃຫ້ເສີມຄວາມເຊື່ອໃນຄຳພີໄບເບິນ? (ຂ) ໃນບົດຄວາມຕໍ່ໄປເຮົາຈະພິຈາລະນາຄຳຖາມຫຍັງ?
17 ເຮົາອາດຮູ້ຈັກຄຳສອນພື້ນຖານໃນຄຳພີໄບເບິນ ແຕ່ເພື່ອຈະມີຄວາມເຊື່ອທີ່ເຂັ້ມແຂງເຮົາຕ້ອງຮູ້ຈັກຫຼາຍກວ່ານັ້ນ. ເຮົາຕ້ອງຂຸດຄົ້ນແລະຄົ້ນຫາຄວາມຈິງທີ່ເລິກເຊິ່ງທີ່ຢູ່ໃນຄຳພີໄບເບິນ ຄືກັບທີ່ເຮົາກຳລັງຊອກຫາຊັບສົມບັດທີ່ເຊື່ອງໄວ້. (ສຸພາສິດ 2:3-6) ການອ່ານຄຳພີໄບເບິນໝົດຫົວເປັນທີໜຶ່ງທີ່ດີທີ່ສຸດໃນການເສີມຄວາມເຊື່ອຂອງເຈົ້າ. ບາງທີເຈົ້າອາດພະຍາຍາມອ່ານໃຫ້ຈົບພາຍໃນໜຶ່ງປີ. ການເຮັດແບບນີ້ໄດ້ຊ່ວຍຜູ້ດູແລໝວດຄົນໜຶ່ງໃຫ້ໃກ້ຊິດພະເຢໂຫວາຫຼາຍຂຶ້ນຕອນທີ່ລາວຍັງນ້ອຍ. ລາວເວົ້າວ່າ: “ການອ່ານຄຳພີໄບເບິນຕັ້ງແຕ່ຕົ້ນຈົນຈົບເປັນສິ່ງໜຶ່ງທີ່ຊ່ວຍຂ້ອຍໃຫ້ເຂົ້າໃຈວ່ານີ້ເປັນພະຄຳຂອງພະເຈົ້າ. ເລື່ອງຕ່າງໆໃນຄຳພີໄບເບິນທີ່ຂ້ອຍໄດ້ຮຽນຕອນຍັງນ້ອຍໆ ໃນທີ່ສຸດມັນກໍເປັນເລື່ອງທີ່ມີເຫດມີຜົນສຳລັບຂ້ອຍ.” ນອກຈາກນັ້ນ ໃຫ້ໃຊ້ເຄື່ອງມືຄົ້ນຄວ້າຕ່າງໆທີ່ມີໃນພາສາຂອງເຈົ້າເພື່ອຊ່ວຍເຈົ້າໃຫ້ເຂົ້າໃຈໃນສິ່ງທີ່ອ່ານ. ເຈົ້າອາດມີດີວິດີສຳລັບຫ້ອງສະໝຸດຂອງວັອດທາວເວີ (Watchtower Library) ຫ້ອງສະໝຸດອອນລາຍຂອງວັອດທາວເວີ (Watchtower ONLINE LIBRARY) ດັດຊະນີສັບພະໜັງສືຂອງວັອດທາວເວີ (Watch Tower Publications Index) ຫຼືຄູ່ມືຄົ້ນຄວ້າສຳລັບພະຍານພະເຢໂຫວາ (Research Guide for Jehovah’s Witnesses).
18 ພໍ່ແມ່ທັງຫຼາຍເຈົ້າມີບົດບາດສຳຄັນ ເພາະເຈົ້າສາມາດສອນລູກກ່ຽວກັບພະເຢໂຫວາ. ດັ່ງນັ້ນ ເຈົ້າຈະຊ່ວຍລູກແນວໃດໃຫ້ມີຄວາມເຊື່ອທີ່ເຂັ້ມແຂງໃນພະເຢໂຫວາ? ບົດຄວາມຕໍ່ໄປຈະເວົ້າເຖິງບາງວິທີທີ່ເຈົ້າສາມາດເຮັດເຊັ່ນນີ້ໄດ້.
^ [1] (ຂໍ້ 9) ຫໍສັງເກດການ 15 ທັນວາ 2013.
ເລື່ອງທີ່ເຈົ້າອາດຈະມັກ
ໝູ່ຂອງເຈົ້າຄິດແນວໃດ
ໄວລຸ້ນເລົ່າເລື່ອງການເຊື່ອວ່າມີພະເຈົ້າ
ໃນວິດີໂອຄວາມຍາວ 3 ນາທີນີ້ ໄວລຸ້ນບາງຄົນເລົ່າວ່າອັນໃດເຮັດໃຫ້ເຂົາເຈົ້າໝັ້ນໃຈວ່າມີຜູ້ສ້າງ.
