1, 2. a) ¿Tiʼ jaku kubʼ kyxjelin qeju kuʼxun in che ajbʼen te Jehová? b) ¿Tiʼ in tzaj tqʼamaʼn Tyol Dios?

TOJ tnam Gran Bretaña tqʼama jun tukʼil jun ermana toj tja xnaqʼtzbʼil jlu te: «Atlo teya nim tnabʼil tuʼn t-xi tnimana qa at Dios». Juntl ermano te Alemania, kubʼ ttzʼibʼin jlu: «Aʼyeju aj xnaqʼtzal jatumel in chin xnaqʼtzane, in xi kynimen qa nya ax tok at jun bʼinchalte tkyaqil ex qʼuqli kykʼuʼj tiʼj qa nimen quʼne qa mintiʼ jun bʼinchalte tkyaqil». Ex toj tnam Francia tqʼama jun ermana tzma txin jlu: «Aʼyeju aj xnaqʼtzal jatumel in chin xnaqʼtzane, in netz kywitz tiʼj qa ateʼ junjun in che xnaqʼtzan in xi kynimen aju tkuʼx toj Tyol Dios».

² Toj ambʼil jaʼlo, nim xjal mintiʼ in xi kynimen qa tuʼn Dios o qo kubʼ bʼinchaʼn. Qa tzma kuʼxun teya ex in najbʼena te Jehová moqa tzma in xnaqʼtzane tiʼj, jakulo kubʼ t-xjelina alkye tten jaku txi tyekʼuna qa a Dios Bʼinchal tkyaqil. In qo tzaj tonin Tyol tuʼn qximen toj tumel tiʼjju in jaw quʼjin ex tiʼjju in nok qbʼiʼn, ex in qo tzaj tonin tuʼn tten qex qximbʼetz. In tzaj tqʼamaʼn Tyol Dios jlu: «Aju mejor tnabʼla ex tojtzqibʼla che okel te kolil tiʼja».  ¿Alkye tten kkolil tiʼja? Aj tel tikʼuna qeju nya bʼaʼn ximbʼetz ex aj tchʼiy qʼuqbʼil tkʼuʼja tiʼj Jehová (kjawil uʼjit Proverbios 2:10-12).

3. ¿Tiʼ qo xnaqʼtzal tiʼj toj xnaqʼtzbʼil lu?

³ Tuʼn tten nim qʼuqbʼil qkʼuʼj tiʼj Jehová, il tiʼj tuʼn tok qojtzqiʼnxix (1 Timoteo 2:4). Tuʼntzunju, aj tjaw tuʼjina Tyol ex qe quʼj, nim toklen tuʼn tkubʼ tena ximel tiʼj. Qʼonka tilil tuʼn tel tnikʼa tiʼjju in jaw tuʼjina (Mateo 13:23). Tojju xnaqʼtzbʼil lu qo xnaqʼtzal tiʼj qa ma xnaqʼtzana ikju, kkanetel nim yekʼbʼil tuʼna qa a Jehová Bʼinchal qe ex qa te t-ximbʼetz tkuʼx toj Xjan Uʼj (Hebreos 11:1).

4. a) ¿Tiquʼn in xi qqʼamaʼn qa chʼixmi junx taʼ aju tuʼn t-xi qnimen qa mintiʼ jun bʼinchalte tkyaqil tukʼilju qa nimen quʼn qa at jun bʼinchalte tkyaqil? b) ¿Tiʼ il tiʼj tbʼant quʼn qkyaqilx?

⁴ Jakulo tzaj tqʼamaʼn jun xjal jlu teya: «Nimen wuʼne qa mintiʼ jun bʼinchalte tkyaqil tuʼnju in tzaj kyqʼamaʼn xjal at kynabʼil qa ax tok jlu. ¿Tiquʼn in xi tnimana qa at Dios, mintiʼ jun o tzʼok qʼonte twitz tiʼj?». Nim xjal ik kyximbʼetz. Ax tok mintiʼ jun xjal o tzʼok tqʼoʼn twitz tiʼj Dios nix tiʼj alkye tten kubʼ bʼinchaʼn jun tiʼ (Juan 1:18). Noqtzun tuʼnj, aqeju nimen kyuʼn qa mintiʼ jun Bʼinchal qe, ax ikx nimen kyuʼn aju mintiʼ o tzʼok kyqʼoʼn kywitz tiʼj. ¿Tiquʼn in xi qqʼamaʼn jlu? Tuʼnju mintiʼ jun xjal at tnabʼil o tzʼok tqʼoʼn twitz tiʼj qa at jun tiʼ at tchwinqlal o tzʼok te junxitl tuʼntzun tten tchwinqlal. Jun techel, mintiʼ jun o tzʼok tqʼoʼn twitz tiʼj qa o tzʼok jun iguana te tigre (Job 38:1, 4). Qkyaqilx il tiʼj tuʼn qxnaqʼtzaʼn tiʼjju o kubʼ bʼinchaʼn ex tuʼn tetz qiʼn qex qojtzqibʼil tiʼj. Nim xjal o tzʼok kyqʼoʼn kywitz tiʼjju at twitz Txʼotxʼ ex o tzʼel kynikʼ tiʼj qa at Dios. Ik tzeʼn in tzaj tqʼamaʼn Xjan Uʼj, o tzʼelxix kynikʼ tiʼj qa a Dios bʼinchalte tkyaqilju at ex qa at nim tipumal, ex qa ateʼ tbʼanel tmod (Romanos 1:20).

5. ¿Alkye junjun onbʼil jaku qo tzaj kyonin tuʼn tel mas qnikʼ kyiʼj tbʼinchbʼen Dios?

⁵ Aj tok qqʼoʼn qwitz tiʼjju at twitz Txʼotxʼ ex qa ma qo ok tenxix ximel tiʼj, in nel qnikʼ tiʼj qa kykyaqilx bʼinchan maj qe toj jun tten in qo jaw labʼin kyiʼj. «Tuʼn qokslabʼl nneʼl qnikʼ tiʼj» qa at jun Bʼinchal tkyaqil, maske mintiʼ  qʼanchaʼl. In nel qnikʼ tiʼj qa at tnabʼil ex at tbʼanel tmod (Hebreos 11:3, 27). Jaku tzʼel mas qnikʼ kyiʼj qeju tiʼchaq o kubʼ tbʼinchaʼn aj tjaw quʼjin aju o tzʼel kynikʼ qeju xjal at kynabʼil tiʼj. Ex ateʼ junjun xnaqʼtzbʼil lu kyoj junjun onbʼil ik tzeʼn aju video Las maravillas de la creación, ax ikx qeju uʼj Obra de un Creador ex El origen de la vida, ex aju nimaq uʼj ¿Existe un Creador que se interese por nosotros? Ex nim maj in che etz junjun etrevista kyiʼj xjal at kynabʼil ex junjuntl xjal toj uʼj ¡Despertad! tuʼntzun ttzaj kyqʼamaʼn tiquʼn in xi kynimen jaʼlo qa at Dios. Ex toj xnaqʼtzbʼil «¿Casualidad o diseño?» tkuʼx tqanil kyiʼj txkup ex junjuntl tiʼchaq at twitz Txʼotxʼ, ex in tzaj tchikʼbʼaʼn alkye tten kyajbʼil xjal at kynabʼil tuʼn tel kykanoʼn alkye tten in naqʼunan junjun tiʼ.

6. ¿Alkye tten jaku che onin qeju uʼj in che etz tuʼn ttnam Jehová tiʼja?

⁶ Tqʼama jun ermano lu te 19 abʼqʼi te Estados Unidos kyiʼj kabʼe uʼj ma qo yolin tiʼj toj taqikʼ ma kyaj: «O che onin nim wiʼje ex o che kubʼ wuʼjine nim maj». Ex jun ermana te tnam Francia kubʼ ttzʼibʼin jlu: «Aqeju xnaqʼtzbʼil ‹¿Casualidad o Diseño?› in che etz, kukx in chin jaw labʼine kyiʼj tbʼanel xnaqʼtzbʼil tkuʼx kyoj. In tzaj kyyekʼun qa aqeju mas tbʼanel ingeniero in nel kykanoʼn aju bʼinchabʼin mas kwest kyiʼj tiʼchaq at twitz Txʼotxʼ, noqtzun tuʼnj, mintiʼxix in bʼant tuʼn tel kykanoʼn kyiʼj». Ex toj tnam Sudáfrica, aʼyeju tman jun txin te 15 abʼqʼi kyqʼama jlu: «Chʼixmi tkyaqil maj, aju tnejel in jaw tuʼjin qmele, moqa qmyale, aju xnaqʼtzbʼil ‹Entrevista› tkuʼx toj ¡Despertad!». Ax ikx jaku che onin uʼj lu tiʼja. ¿Alkye tten? Ok tzul kyyekʼun yekʼbʼil tiʼj qa at jun Bʼinchal tkyaqil ex che onil tiʼja tuʼn tel tnikʼa kyiʼj xnaqʼtzbʼil nya ax tok tuʼntzun miʼn txi tbʼiʼna. Ax ikx, ok che onil tiʼja tuʼn ttenxix qʼuqbʼil tkʼuʼja ik tzeʼn jun tzeʼ aju at tlokʼ maʼxix ex in nikʼx nim kyqʼiqʼ tuʼn (Jeremías 17:5-8).

7. ¿Tiquʼn tajbʼil Dios tuʼn tajbʼen tnabʼila tuʼna?

⁷ Nya jun il qa ma kubʼ t-xjelina jun xjel ik tzeʼn jlu: «¿Tiquʼn il tiʼj tuʼn t-xi nnimane aju in tzaj tqʼamaʼn Tyol Dios?». Nya taj Jehová tuʼn t-xi tnimana jun tiʼ noq tuʼnju in xi kynimen txqantl. Tajbʼil tuʼn tajbʼen tnabʼila tuʼna tuʼntzun tok tojtzqiʼna Xjan Uʼj ex tuʼn kykanet yekʼbʼil tuʼna qa te t-ximbʼetz tkuʼx toj. ¿Tiquʼn tajbʼil tuʼn tbʼant jlu tuʼna? Tuʼnju qa mas ma tzʼel tnikʼa tiʼj Tyol mas kchʼiyil qʼuqbʼil tkʼuʼja tiʼj (kjawil uʼjit 1 Timoteo 2:4 ex Hebreos 5:14). Jun tten tuʼn tel nikʼbʼaj tiʼj Tyol Dios, aju qa ma xnaqʼtzana kyiʼj junjun xnaqʼtzbʼil tajxixa tuʼn tel tnikʼa kyiʼj.

8, 9. a) ¿Tiʼ kygan junjun xjal tuʼn kyxnaqʼtzan tiʼj? b) ¿Tiʼ tbʼanel o tzaj tiʼn kye junjun xjal tuʼnju in che ximen tiʼjju in jaw kyuʼjin?

⁸ At junjun xjal kygan tuʼn kyxnaqʼtzan kyiʼj yol e kyaj qʼamaʼn toj Tyol Dios. Atzun junjuntl, kygan tuʼn tok kymojbʼaʼn aju in tzaj tqʼamaʼn Tyol Dios tukʼilju in tzaj kyqʼamaʼn xjal at kynabʼil tiʼjju o bʼaj ojtxi, tiʼjju kyxnaqʼtzbʼil xjal moqa tiʼjju yekʼbʼil in kanet kyuʼn xjal. Jun techel, ximana tiʼj Génesis 3:15. Tqʼama Jehová aju yol nim toklen jlu tej otoq tel tpan tibʼ Adán ex Eva tiʼj alkye tten in kawin. Atzun tnejel yol kyaj qʼamaʼn kyxol nimku, aqeju in che onin qiʼj tuʼn tel qnikʼ tiʼj alkye tten kkolil Tkawbʼil Dios tiʼj toklen tuʼn tkawin ex tuʼn tkubʼ tnajsaʼn tkyaqil nya bʼaʼn. ¿Alkye tten jaku kubʼ t-xnaqʼtzaʼna aju yol kyaj qʼamaʼn toj Génesis 3:15? Jaku kubʼ ttzʼibʼena jun kyajlal versículo aqeju in tzaj kyqʼoʼn mas tqanil tiʼj alkye tten in japun twiʼ  yol lu. Yajxitl, jaku txiʼya jyol tqanil tiʼj alkye ambʼil e kubʼ tzʼibʼin qeju versículo jlu ex nukʼunka kyten. Nya nim ambʼil kxel tiʼn tuʼn tel tnikʼa tiʼj qa e anqʼin qeju e kubʼ tzʼibʼin te toj junxitl ambʼil, noqtzun tuʼnj, teyele junjun onin tiʼj tuʼntzun chebʼe chebʼe tel qnikʼ tiʼjju yol lu. A jlu kʼonil tiʼja qa onin Jehová tukʼil xewbʼaj xjan kyiʼj qeju e kubʼ tzʼibʼinte Tyol (2 Pedro 1:21).

⁹ El tnikʼ jun ermano te Alemania tiʼj qa teyele junjun uʼj tkuʼx toj Tyol Dios in yolin tiʼj Tkawbʼil Dios maske kubʼ kytzʼibʼin junlo 40 xinaq. Ax ikx, nimku e anqʼin toj junxichaq ambʼil ex mintiʼ ok kyojtzqiʼn kywitz. Jun erman te Australia in kubʼtoq t-xnaqʼtzaʼn jun xnaqʼtzbʼil tkuʼx toj uʼj La Atalaya. Akux in kubʼtoq t-xnaqʼtzaʼn el tnikʼ tiʼj tiʼ toklen Xjan Qʼij tukʼil Génesis 3.15 ex tukʼil Mesías ^[1] (tqanil jun). Kubʼ ttzʼibʼin jlu: «Tuʼn xnaqʼtzbʼil lu el nnikʼe tiʼj qa tbʼanel te Jehová. Etz nwitze tiʼj tej t-xi tqʼamaʼn kye aj Israel tuʼn tkubʼ kyikʼsaʼn Xjan Qʼij ex tuʼn tjapun twiʼ tiʼj Jesús. El npaʼne ambʼil tuʼn nximane tiʼjju t-xilen Xjan Qʼij tej tkyaj qʼamaʼn». ¿Tiquʼn kubʼ tnaʼn ikju? Tuʼnju kubʼ ten ximel tiʼjju jaw tuʼjin ex iktzun tten el tnikʼ tiʼj. A jlu onin tiʼj tuʼn tchʼiy qʼuqbʼil tkʼuʼj ex tuʼn tok laqʼeʼ mas ttxlaj Jehová (Mateo 13:23).

10. ¿Tiʼ mas jaku tzʼonin tiʼja tuʼn tok qeʼ tkʼuʼja tiʼj Tyol Dios?

¹⁰ ¿Tiʼ mas jaku tzʼonin tiʼja tuʼn tok qeʼ tkʼuʼja tiʼj Tyol Dios? Aju qa ma ximana tiʼj qa ten kyipumal qeju e kubʼ tzʼibʼin te ex qa kukx tzaj kyqʼamaʼn aju axix tok. Toj ambʼil aju, ateʼ nim aj tzʼibʼil oʼkx in tzajtoq kychikʼbʼaʼn junjun tbʼanel in bʼant tuʼn kytnam ex kyuʼn qeju aj kawil. Noqtzun tuʼnj, aqeju t-sanjel Jehová nya oʼkx e yolin kyiʼj tbʼanel tiʼchaq bʼant kyuʼn aj Israel ex qeju e kawin kyibʼaj. Ax ikx kyqʼama junjun tiʼchaq nya bʼaʼn (2 Crónicas 16:9, 10; 24:18-22). Kyqʼama aju kyex kypaltil ex kypaltil junjuntl tmajen Dios (2 Samuel 12:1-14; Marcos 14:50). Tqʼama jun ermano te tnam Gran Bretaña jlu: «Chʼixme tkyaqil maj mintiʼ in tzaj kyqʼamaʼn xjal aju axix tok ik tzeʼn jlu. Tuʼntzunju in nok qeʼ nkʼuʼje tiʼj Xjan Uʼj ex qa atz tzajni tukʼil Jehová».

11. ¿Tiʼ jaku tzʼonin qiʼj tuʼn t-xi qnimen qa ax tok tzajni Xjan Uʼj tukʼil Dios?

¹¹ Qa ma txi qqʼoʼn ambʼil tuʼn ttzaj tyekʼun Tyol Dios qbʼe, in nok qqʼoʼn qwitz tiʼj tbʼanel in tzaj tuʼn. Tuʼn jlu in nok qeʼ qkʼuʼj qa tzajni Xjan Uʼj tukʼil Dios (kjawil uʼjit Salmo 19:7-11). Kubʼ ttzʼibʼin jun ermana tzma txin te tnam Japón jlu: «Tuʼnju in xi kybʼiʼn toj njaye aju in tzaj t-xnaqʼtzaʼn Tyol Dios, tuʼn jlu kubʼ qnaʼne axix tok tzalajbʼil. Kubʼ qnaʼne kʼujlabʼil ex mujbʼabʼil qxole». O tzʼonin Tyol Dios kyiʼj nimku xjal tuʼn tel kynikʼ kyiʼj junjun tiʼchaq nimen kyuʼn tnejel ex nya ax tok qe (Salmo 115:3-8). Axpe ikx, o tzʼonin kyiʼj tuʼn tok qeʼ kykʼuʼj tiʼjju Dios at nimxix tipumal. Ateʼ junjun xjal nimen kyuʼn qa mintiʼ Dios, in nok kyqʼoʼn jun tiʼ at twitz Txʼotxʼ te juntl dios. Ex junjuntl in tzaj kyqʼamaʼn qa tzul kyqʼoʼn xjal jun tbʼanel ambʼil qe. Noqtzun tuʼnj, aj tok qqʼoʼn qwitz tiʼjju o bʼant kyuʼn, in nel qnikʼ tiʼj qa mintiʼ kyipumal xjal tuʼn kykyaj nya bʼaʼn toj ttxolil. Oʼkx Tyol Dios jaku tzaj qʼonte jun tbʼanel qʼuqbʼil qkʼuʼj (Salmo 146:3, 4).

12, 13. ¿Alkye tten jaku yolina tiʼjju tbʼinchbʼen Dios moqa tiʼj Xjan Uʼj tukʼil jun xjal?

¹² Aj tyolina tiʼjju tbʼinchbʼen Dios moqa tiʼj Xjan Uʼj tukʼil jun xjal, tnejel bʼaʼn tuʼn t-xi  tqanina te tiʼ nimen tuʼn. Ateʼ junjun nimen kyuʼn qa mintiʼ jun bʼinchalte tkyaqil ex ax ikx nimen kyuʼn qa at Dios. Aju kye in tzaj kyqʼamaʼn qa ajbʼen evolución tuʼn Dios tuʼn tkubʼ tbʼinchaʼn kykyaqil qeju tiʼchaq at kychwinqlal. Junjuntl in kubʼ kyximen qa ax tok aju qa mintiʼ jun bʼinchalte tkyaqil noq tuʼnju in tzaj xnaqʼtzaʼn kye toj tja xnaqʼtzbʼil. Ex junjuntl mintiʼ in nok qeʼ kykʼuʼj tiʼj Dios tuʼnju o tzaj kybʼis tuʼn kypaj okslabʼil. Tuʼntzunju, aj tyolina tukʼil jun xjal, tnejel qaninxa te tiʼ nimen tuʼn ex tiquʼn in xi tnimen. Qa ma tzʼok tqʼoʼn twiʼya tiʼjju in tzaj tqʼamaʼn, jakulo tzʼok bʼiʼna tuʼn (Tito 3:2).

¹³ Qa at jun ma tzʼok ten xmayil tiʼja tuʼnju nimen Dios tuʼna, ¿alkye tten jaku txi ttzaqʼweʼna? Bʼaʼn tuʼn tok tqʼoʼna toklen xjal ex qaninxa te tuʼn ttzaj tchikʼbʼaʼn alkye tten tzaj tzyet anqʼibʼil. Jaku txi tqʼamaʼna te qa ax tok aju qa mintiʼ jun bʼinchalte tkyaqil, aju tnejel chwinqlal tenlo nim tipumal tuʼn kyten mas anqʼibʼil. Nya oʼkxju, tqʼama jun aj xnaqʼtzal tiʼj química qa iltoq tiʼj tuʼn tajbʼen jun protector tuʼn, jun tten tuʼn t-xi kʼamet ipumalj ex tuʼn tajbʼen tqanil lu tuʼn tuʼntzun t-xi tkʼuʼn tzeʼn keʼyin ex alkye tten tzaj chʼiy (aju ADN), ex tuʼn tkyaj tcopiarin tkyaqil tqanil lu. Tqʼamatl qa «jaw labʼin kyiʼj chwinqlal mas tal chʼin qe ex qa kwest tuʼn kyxi chikʼbʼet».

14. Aj tyolina tiʼj tbʼinchbʼen Dios, ¿alkye techel nya kwest jaku tzʼajbʼen tuʼna?

¹⁴ Aj tyolina tiʼj tbʼinchbʼen Dios tukʼil jun xjal, jaku tzʼajbʼen jun techel nya kwest tuʼna aju yolin Pablo tiʼj. Kubʼ ttzʼibʼin jlu: «Tkyaqil ja at jun o bʼinchante; pero atzunju o bʼinchante tkyaqil, ate Dios» (Hebreos 3:4). Ax tok nya tuʼnx tibʼ jun ja in bʼant. At jun in kubʼ ximente tzeʼn kbʼel bʼinchet ex kbʼel tbʼinchaʼn. Mas kwest tuʼn tel nikʼbʼaj kyiʼj qeju tiʼchaq at kychwinqlal twitz jun ja. Tuʼntzunju, at jun kubʼ ximente tzeʼn tuʼn kykubʼ bʼinchet ex kubʼ tbʼinchaʼn. Jaku che ajbʼen qe quʼj tuʼna aj tyolina tiʼj tbʼinchbʼen Dios. Yolin jun ermana tukʼil jun kuʼxun aju mintiʼtoq nimen tuʼn qa at Dios ex xi tqʼoʼn qeju kabʼe uʼj te aqeju ma qo yolin kyiʼj toj taqikʼ jweʼ. Tej tikʼ juntl seman tqʼama kuʼxun jlu: «Jaʼlo nimen wuʼne qa at Dios». Xi tzyet tuʼn t-xnaqʼtzan kuʼxun tiʼj Tyol Dios ex tej tbʼet ambʼil jaw aʼ twiʼ, moqa bʼyan.

15, 16. a) Naʼmxtoq t-xi tchikʼbʼaʼna te jun xjal qa tzajni Xjan Uʼj tukʼil Dios, ¿tiʼ il tiʼj tuʼn tbʼant tuʼna? b) ¿Tiʼ il tiʼj tuʼn ttzaj tnaʼna?

¹⁵ Qa at jun mintiʼxix in nok qeʼ tkʼuʼj tiʼj qa tzajni Xjan Uʼj tukʼil Dios, ¿alkye tten jaku yolina tukʼil? Ik tzeʼn ma qo xnaqʼtzan tiʼj, tnejel jaku txi tqanina te tiʼ nimen tuʼn ex bʼinxa alkye jun xnaqʼtzbʼil tgan tiʼj (Proverbios 18:13). Qa tgan aju in che xnaqʼtzan xjal tiʼj, jaku kubʼ tqʼoʼna qe techel aʼyeju in tzaj kyyekʼun qa tzʼaqli Tyol Dios aj tyolin kyiʼj xnaqʼtzbʼil lu. Qa tgan aju o bʼaj ojtxi, qʼamanxa jun tiʼ bʼaj aju tkuʼx kyoj uʼj in che yolin tiʼjju bʼaj ojtxi ex qa otoq tzikʼ nim abʼqʼi tkyajlen tqʼamaʼn Tyol Dios. Jakulo tzʼok bʼina tuʼn jun xjal qa ma txi t-xnaqʼtzaʼna jun tiʼ tiʼj Tyol Dios te, aju jaku tzʼonin tiʼj tuʼn ttzalaj toj tanqʼibʼil. Jun techel, jaku txi  t-xnaqʼtzaʼna junjun nabʼil tkuʼx toj tchikʼbʼabʼil Jesús twi jun witz.

¹⁶ Aj tyolina tukʼil jun xjal, bʼaʼn tuʼn ttzaj tnaʼna qa nya qajbʼil tuʼn qqʼojin. Qajbʼil tuʼn ttzalaj aj tyolin qukʼil ex tuʼn tel tnikʼ tiʼj Tyol Dios. Tuʼntzunju, toj tumel qaninxa qeju xjel te ex bʼinxa aju in tzaj tqʼamaʼn. Tukʼil tbʼanel yol, qʼamanxa te aju nimen tuʼna. Nim toklen jlu, mas qa mas matij tabʼqʼi xjal twitza. Tuʼn jlu mas nya kwest kʼelel te tuʼn tok tqʼoʼn toklena. Nya oʼkxju, ax ikx kjawil labʼin tiʼja tuʼnju tzma kuʼxuna ex in nok tqʼoʼna twiʼya tiʼjju nimen tuʼna. Qatzun oʼkx taj jun xjal tuʼn tqʼojin moqa tuʼn t-xmayin, nya il tiʼj tuʼn t-xi ttzaqʼweʼna te (Proverbios 26:4).

17, 18. a) ¿Tiʼ jaku tzʼonin tiʼja tuʼn tchʼiy qʼuqbʼil tkʼuʼja tiʼj Tyol Dios? b) ¿Tiʼ qo xnaqʼtzal tiʼj toj juntl xnaqʼtzbʼil?

¹⁷ Maske ya ojtzqiʼn junjun xnaqʼtzbʼil tiʼj Tyol Dios tuʼna, noqtzun tuʼnj, at juntl tiʼ il tiʼj tuʼn tbʼant tuʼna tuʼntzun kukx tchʼiy qʼuqbʼil tkʼuʼja. Il tiʼj tuʼn tjyona tiʼj tuʼntzun kykanet junjun xnaqʼtzbʼil kwest tuʼn tel qnikʼ kyiʼj toj Tyol Dios, ik tzeʼn in jyona kyiʼj qʼinumabʼil ewin ateʼ (Proverbios 2:3-6). Jun tten tuʼn tchʼiy qʼuqbʼil tkʼuʼja, aju qa ma jaw tuʼjina tkyaqil Tyol Dios. Bʼaʼn tuʼn tok tilil tuʼna tuʼn tjaw tuʼjina toj jun abʼqʼi. Iktzun tten chʼiy tamiwbʼil jun Ansyan in bʼet kyojele Ja te Chmabʼil tukʼil Jehová tej tzmatoq kuʼxun. In tzaj tqʼamaʼn jlu: «Aju onin wiʼje tuʼn tok qeʼ nkʼuʼje tiʼj qa ax tok Tyol Dios aju Xjan Uʼj, aju tej tjaw wuʼne tkyaqil. Iktzun tten el nnikʼe kyiʼj txʼolbʼabʼil otoq tzʼok nbʼiʼne tej tzmatoq kʼwaʼl qiʼne». ¿Tiʼ juntl tiʼ jaku bʼant tuʼna? Jaku che ajbʼen onbʼil tuʼna aqeju at tukʼila tuʼntzun tel mas tnikʼa tiʼjju in jaw tuʼjina. Jun techel, jaku tzʼajbʼen tuʼna aju Watchtower Library toj DVD, aju KʼUBʼIL UʼJ TOJ INTERNET Watchtower, aju Índice de las publicaciones Watch Tower moqa aju Onbʼil tuʼn kyxnaqʼtzan testigos de Jehová.

¹⁸ Aqeye mambʼaj, aqeye mas jaku chex xnaqʼtzante kye kykʼwaʼle tuʼn tel kynikʼ tiʼj Jehová. Tuʼntzunju, toj juntl xnaqʼtzbʼil qo xnaqʼtzal tiʼj junjun tten jaku bʼant kyuʼn mambʼaj tuʼntzun kyonin kyiʼj kykʼwaʼl tuʼn kukx tchʼiy qʼuqbʼil kykʼuʼj.