1, 2. 1) ¿Toni kemansa uelis motajtaniskej telpochmej uan ichpochmej akin kitekitiliaj Jiova? 2) ¿Toni kijtoua iTajtol Dios?

ITECH ueyi altepet Gran Bretaña, se ichpoch akin iuan momachtia se tokniuj siuat, kiluij: “Tikneltoka Dios maski moita ke semi titamatkej”. Itech ueyi altepet Alemania, se tokniuj kijkuiloj: “Notamachtijkauan kijtouaj ke keman ika motajtoua tachijchiualis sayoj se tetapouilis uan senkis kineltokaj ke akin techmachtiaj tikneltokaj ke nemilis iselti peuak”. Uan ompa Francia, se tokniuj ichpoch kijtoj: “Tamachtianij itech kaltamachtiloyan semi kimoujkaitaj maj moajsikanok momachtianij akin kineltokaj tein kijtoua Biblia”.

² Axkan, miakej amo kineltokaj ke Dios techchijchiuak. Komo titelpoch oso tiichpoch uan tiktekitilijtok Jiova oso yankuixtok peuak timomachtia keniuj tamati yejuatsin, xa kemansa timotajtania keniuj uelis tiknextis ke yejuatsin toTachijchiujkauj. Biblia techpaleuia maj titanemilikan ika nejmachkayot itech tein tikixtajtoltiaj uan tein tikakij, uan techpaleuia maj tikajsikamatikan tein techmachtia. ITajtol Dios kijtoua: “Mokuali  tanemililis mitsnejmachpias”. ¿Keniuj? Keman mitspaleuis xikixtopeua tanemililmej tein amo melaujkej uan xikchikaua motakuaujtamatilis iuan Jiova (xikixtajtolti Proverbios 2:10-12).

3. ¿Toni tikitaskej itech nejin tamachtilis?

³ Moneki kuali tikixmatiskej Jiova, porin nejon techpaleuis maj okachi titakuaujtamatikan iuan (1 Tim. 2:4). Yejua ika, keman tikixtajtoltis Biblia uan toamaixuan, motelneki ximotsakuili uan xitanemili. Xiktemo tikajsikamatis tein tikixtajtoltia (Mat. 13:23). Itech nejin tamachtilis tikitaskej ke komo ijkon timomachtia, tikajsis miak taman tein kinextia ke Jiova toTachijchiujkauj uan ke yejuatsin itanemililuan tein ijkuiliujtok itech Biblia (Heb. 11:1).

4. 1) ¿Keyej tikijtouaj ke se kineltokas ke nemilis iselti peuak tamati kemej se kineltokas ke Dios tachijchiuak? 2) ¿Toni moneki tikchiuaskej tinochin?

⁴ Aksa uelis mitsiluis: “Nejua nikneltoka ke nemilis iselti peuak porin tamatinij kijtouaj ke nejon melauak. ¿Keniuj ueli tikneltoka ke Dios nemi, ta amo akin kiitani?”. Miakej ijkon tanemiliaj. Melauak ke nion semej tikitanij Dios nion ijkuak kichijchiua teisa (Juan 1:18). Sayoj ke akin kineltokaj ke nemilis iselti peuak no kineltokaj se taman tein amo kiitanij. ¿Keyej tikijtouaj nejin? Porin nion se tamatkej nion okse taltikpaknenkej kiitani maj se taman tein yoltok mopata itech okse taman. Kemej neskayot, amo akin kiitani maj se kouat mopata uan maj mokepa se león (Job 38:1, 4). Tinochin moneki tikitaskej tein yekmelauj panoua, ika nejmachkayot itech titanemiliskej uan tikixejekoskej ox yekmelauj ijkon. Miakej kiitanij nochi tein onkak uan kiajsikamatinij ke Dios yekmelauj nemi. Kemej kijtoua Biblia, senkis kiitanij ke Dios kichijchiuak nochi nejon uan ke kipia miak chikaualis uan miak kualneskayomej (Rom. 1:20).

5. ¿Toni nepaleuilmej tikpiaj tein ika uelis okachi tikixmatiskej tachijchiualis?

⁵ Keman tikitaj nochi tein onkak uan titanemiliaj ika nejmachkayot itech tein tikitaj, tikajsikamatij ke nochi tel kuali chijchiujtok.  “Kuak titakuautamatij iuan Dios, ijkuakon tikajsikamatij” ke moajsi se tachijchiujkej, maski amo tikitaj. Tikajsikamatij ke semi tamatkej uan ke kipia kualtsitsin kualneskayomej (Heb. 11:3, 27). Uelis okachi tikmatiskej ika tein yejuatsin kichijchiuak komo tikixtajtoltiaj tein tamatinij kiajsinij. Seki taman tein kiajsinij moajsi itech nepaleuilmej kemej video Las maravillas de la creación, folletos Obra de un Creador uan El origen de la vida, uan amatajkuilol ¿Existe un Creador que se interese por nosotros? Miakpa, itech amaix ¡Despertad! kinextia netajtanilmej tein kinchiuilijkej seki tamatinij uan okseki taltikpakneminij akin kijtouaj keyej axkan kineltokaj ke nemi Dios. Uan taxelol “¿Casualidad o diseño?” kimelaua keniuj chijchiujtokej seki tapialmej uan okseki taman tein onkak, uan kijtoua keniuj tamatinij kitemouaj kiixkopinaskej kemej tekitij.

6. ¿Keniuj uelis mitspaleuiskej toamaixuan?

⁶ Se tokniuj akin kipia 19 xiujmej uan nemi Estados Unidos, kijtoj nejin keman ika tajtoj folletos tein achto tikijtojkej: “Semi nechpaleuianij. Miakpaya nimomachtiani tein kijtouaj”. Se tokniuj siuat akin nemi Francia, kijtoj: “Kisentoka nikmoujkaita tein kijtouaj tamachtilismej ‘¿Casualidad o Diseño?’. Kinextiaj ke ingenieros akin okachi kuali tekitij kitemouaj kiixkopinaskej tein onkak tein semi ouij kemej chijchiujtok, sayoj ke amo keman uelis kichijchiuaskej teisa maj senkis tamati kemej tein kiixkopinkej”. Uan ompa Sudáfrica, itatuan se ichpoch akin kipia 15 xiujmej, kijtojkej: “Miakpa, tein yekinika kiixtajtoltia toichpoch itech ¡Despertad! yejua taxelol ‘Entrevista’”. Nejin amaixmej no uelis mitspaleuiskej tejua. ¿Keniuj? Mitsnextiliskej tein kinextia ke moajsi se Tachijchiujkej uan mitspaleuiskej xikinixmati uan xikinixtopeua tamachtilismej tein amo melaujkej. Uan no, mitspaleuiskej maj motakuaujtamatilis chikauak moajsi ijkon kemej se kouit tein uejkatan toktok uan taxikoua keman tetsaujkaejeka (Jer. 17:5-8).

7. ¿Keyej kineki Dios xiktekitilti motanemililis?

⁷ Uelis timochiuilis netajtanilmej kemej nejin: “¿Keyej moneki nikneltokas tein kijtoua Biblia?”. Jiova amo kineki xikneltoka teisa sayoj porin oksekin kineltokaj. Kineki xiktekitilti motanemilil porin nejon mitspaleuis xikixmati tein kijtoua Biblia uan xikajsi tein kinextia ke yejuatsin itanemililuan tein ompa ijkuiliujtok. ¿Keyej kineki xikchiua nejon? Porin komo okachi tikixmati tein kijtoua Biblia, okachi itech titakuaujtamatis (xikixtajtolti 1 Tesalonicenses 5:21 uan 1 Timoteo 2:4). Se taman tein mitspaleuis xikixmati tein kijtoua Biblia yejua komo timomachtia seki taman tein tikuelitaskia okachi tikmatis.

8, 9. 1) ¿Toni kiuelitaj momachtiskej seki taltikpakneminij? 2) ¿Keniuj kinpaleuiani sekin keman itech tanemiliaj tein kiixtajtoltiaj?

⁸ Seki taltikpakneminij kiuelitaj momachtiskej tein Biblia kijtojka ke mochiuaskia. Oksekin kiuelitaj kiitaskej tein kijtoua Biblia ika tein kijtouaj akin momachtiaj tein ne uejkauj mochiuak, tamatinij oso tatemouanij. Kemej neskayot, xiknemili tein kijtoua Génesis 3:15. Tepitsin satepan keman Adán uan Eva kiixnamikkej Jiova uan itaixyekanalis, yejuatsin kijtoj nejin tein motelneki tein mochiuaskia satepan. Nejin yejua yekinika tajkuilol tein techpaleuia maj tikajsikamatikan keniuj iTekiuajyo Dios kinextis ke yejuatsin kinamiki maj taixyekana uan kitamis tajyouilis. ¿Keniuj uelis timomachtis tein kijtoua Génesis 3:15? Yekinika, xikijkuilo tajkuilolmej tein okachi  kimelauaj keniuj mochiuak uan mochiuas tein kijtoua nejin tajkuilol. Ojpatika, xiktemo kemanian moijkuilojkej nejon tajkuilolmej uan xiktekpana ijkon kemej moijkuilojtiyajkej. Niman tikitas ke akin kijkuilojkej nejon tajkuilolmej nenkej itech tataman xiujmej, sayoj ke sejse tapaleuij maj yolik momelaujtiyani tein kijtoua Génesis 3:15. Nejin mitspaleuis xiknexti ke Jiova kinixyekanak ika iyektikatsin espíritu akin kijkuilojkej Biblia (2 Ped. 1:21).

⁹ Se tokniuj takat akin nemi Alemania kiitak ke sejse amatajkuilol tein kipia Biblia kijtoua seki taman tein mouika ika iTekiuajyo Dios maski kijkuilojkej kemej 40 takamej. Uan no, miakej nenkej itech tataman xiujmej uan amo keman moixmatkej. Se tokniuj siuat kayot Australia momachtijtoya se tamachtilis itech amaix Tanejmachtijkej. Keman momachtijtoya, kiitak keniuj Pascua mouika ika tein kijtoua Génesis 3:15 uan Mesías. ^[1] Yejua kijkuiloj: “Nejon tamachtilis nechpaleuij maj senkis nikita ke Jiova semi ueyi. Semi nikmoujkaitak maj kinemiliani kiniluis israelitas maj kichiuanij Pascua uan maj nejin mochiuani itech Jesús. Monekik nimotsakuilis uan niknemilis tein kualtsin tein kijtosneki Pascua tein kiixnextij toni mochiuaskia satepan”. ¿Keyej ijkon momachilij? Porin itech tanemilij tein kiixtajtoltijtoya uan ijkon uelik kiajsikamatik. Nejin kipaleuij maj mochikaua itakuaujtamatilis uan maj okachi motoki iuan Jiova (Mat. 13:23).

10. ¿Toni no mitspaleuis okachi xitakuaujtamati itech tein kijtoua Biblia?

¹⁰ ¿Toni no mitspaleuis okachi xitakuaujtamati itech tein kijtoua Biblia? Komo tiknemilia ke akin kijkuilojkej katkaj yolchikaujkej uan nochipa kijtojkej tein melauak. Itech nejon tonalmej, miakej tajkuilouanij sayoj kijtouayaj teisa tein kuali ika ininxolal uan inintaixyekankauan. Sayoj ke itanauatijkauan Jiova amo sayoj kijtouayaj tein kuali tein kichiuayaj israelitas uan inintaixyekankauan, ta no tein amo kuali tein kichiuayaj (2 Crón. 16:9, 10; 24:18-22). Uan no, kijtouayaj ininnepololuan yejuan uan okseki itekitikauan Dios (2 Sam. 12:1-14; Mar. 14:50). Se tokniuj telpoch kayot Gran Bretaña kijtoj: “Amo semi moita maj moijto tein yekmelauj panok. Nejon kichiua maj okachi nitakuaujtamati ke Biblia kemaj ualeua imako Jiova”.

11. ¿Toni uelis kichiuas maj senkis tikneltokakan ke Biblia ualeua imako Dios?

¹¹ Keman tikauaj maj Biblia techixyekana, tikitaj ke semi techpaleuia. Uan nejon kichiua maj senkis tikneltokakan ke Biblia ualeua imako Dios (xikixtajtolti Salmo 19:7-11). Se tokniuj ichpoch kayot Japón kijkuiloj: “Kemej nochankauan kitakamatij tein tamachtia Biblia kichiuak maj yekmelauj niyolpakini. Tikpiaj yolseuilis, kuali timouikaj uan timotasojtaj”. Biblia kinpaleuiani miakej maj kiitakan ke seki taman tein kineltokayaj amo melaujkej (Sal. 115:3-8). Uan no, kinpaleuiani maj takuaujtamatikan itech Dios akin kipia nochi uelilis. Sayoj ke, sekin akin amo kineltokaj Dios kiitaj ke nochi tein onkak kemej yeskia se dios. Oksekin kijtouaj ke taltikpakneminij uelis kichiuaskej maj tikpiakan se okachi kuali nemilis. Sayoj ke keman tikitaj toni kichiuanij hasta axkan, tikitaj ke amo ueli kiyektaliaj kuejmolmej tein onkak. Sayoj Biblia ueli techmatiltia ke onkas se okachi kuali nemilis satepan (Sal. 146:3, 4).

12, 13. ¿Keniuj uelis ika titajtos tachijchiualis oso Biblia iniuan okseki taltikpakneminij?

¹² Keman ika titajtos tachijchiualis oso tein kijtoua Biblia iuan okse taltikpaknenkej, yekinika xiktemo tikmatis toni kineltoka. Sekin  kineltokaj ke nemilis iselti peuak uan no kineltokaj ke nemi Dios. Yejuan kijtouaj ke Dios kichiuak maj iselti ixnesini nochi tein onkak. Oksekin kineltokaj ke nemilis iselti peuak porin yejua tein motamachtia itech kaltamachtiloyan. Uan oksekin amo kineltokajok ke nemi Dios porin itech inintaneltokalis amo mochiua tein kichiayaj. Yejua ika keman iuan titajtos aksa, yekinika xiktajtani toni kineltoka uan keyej kineltoka. Komo kuali tikaki tein mitsiluia, xa okachi kinekis mitskakis (Tito 3:2).

¹³ Komo aksa mitskejkeloua porin tikneltoka Dios, ¿keniuj uelis tiknankilis? Xiknextili poujkaitalis uan xiktajtani maj mitsmelauili keniuj kinemilia ke peuak nemilis. Uelis tikiluis ke, komo nemilis yekmelauj iselti peuak, yekinika taman nemilis monekiskia maj uelini momiakiliani. Se takat akin tamachtia química kijtoj ke nejon taman nemilis monekiskia kipias seki taman kemej se teisa tein kipiki, maj ueli kipia chikaualis uan maj kitekitilti, maj ueli kieujtiuj seki taman tein kinextia keniuj tamati uan keniuj moskaltia (ADN), uan maj ueli kipanolti okseko. Nejin tamachtijkej no kijtoj ke semi kimoujkaitak keman hasta seki taman tein moita ke tel tsikitsitsin, semi ouij se kiajsikamati keniuj chijchiujtokej.

14. ¿Toni tein amo ouij uelis tikijtos keman ika titajtos tachijchiualis?

¹⁴ Keman ika titajtos tachijchiualis iuan aksa, uelis tikuis se taman tein amo ouij tein kijtoj tatitanil Pablo. Yejua kijkuiloj: “Ipa yetok se aksa nikan taltikpak ten kichijchiuak cada kali. Pero Totajtsin Dios Yejuatsin kichijchiuak nochi ten ongak” (Heb. 3:4). Senkis tikmatij ke se kali amo iselti mochijchiua. Aksa moneki kiitas keniuj yeski uan kichijchiuas. Nochi tein yoltok okachi ouij kemej chijchiujtok ke se kali. Yejua ika aksa monekik kiitas keniuj yeskia uan kichijchiuas. Keman ika titajtos tachijchiualis, no uelis tiktekitiltis amaixmej tein tikpiaj. Se tokniuj siuat iuan tajtoj se telpoch akin amo kineltokaya ke nemi Dios uan kimakak ome folleto tein ika titajtojkej itech párrafo 5. Se semana satepan, telpoch kijtoj: “Axkan kemaj nikneltoka ke nemi Dios”. Nejin telpoch peuak momachtia Biblia uan satepan moauij.

15, 16. 1) ¿Toni moneki tikchiuas achto ke tikmelauilis aksa ke Biblia ualeua imako Dios? 2) ¿Toni moneki nochipa tikelnamikis?

¹⁵ Komo aksa amo senkis kineltoka ke Biblia ualeua imako Dios, ¿keniuj uelis tikpaleuis maj tanemili? Kemej tikijtojkej achto, yekinika uelis tiktajtanis toni kineltoka uan tiktemos tikmatis toni kiyolnotsa kimatis (Prov. 18:13). Komo kiyolnotsa tein kiajsinij tamatinij, uelis tikiluis neskayomej tein kinextiaj ke Biblia amo keman mopoloua keman ika tajtoua tein kiajsinij tamatinij. Komo kiuelita kimatis tein mochiuak ne uejkauj, uelis tikiluis se taman tein ixnesi itech amatajkuilolmej tein ika tajtouaj tein mochiuak ne uejkauj uan tein Biblia miak xiujmej achto kijtojka ke mochiuaskia. Xa oksekin mitskakiskej komo tikinnextilia teisa tein moajsi itech Biblia tein uelis kinpaleuis maj okachi kuali nemikan. Kemej neskayot, uelis tikinnextilis seki tayolmajxitilis tein kitemakak Jesús keman tamachtij itech se tepet.

 ¹⁶ Keman iuan titajtos se taltikpaknenkej, nochipa xikelnamiki ke amo tiknekij timotajtolteuiskej. Tiknekij maj yolpaki keman tajtos touan uan maj kiyolpakti momachtis tein kijtoua Biblia. Yejua ika, ika poujkaitalis xikchiuili netajtanilmej uan satepan kuali xikaki. Xikmelauili tein tikneltoka ika poujkaitalis. Nejin motelneki, okachiok komo akin tiknojnotstok kipia okachi xiujmej ke tejua. Nejon kichiuas maj yejua amo kiouijmaka mitspoujkaitas. Uan no, kimoujkaitas ke kuali tiknemilia itech tein tikneltoka maski titelpochok. Sayoj ke, komo aksa sayoj kineki mouan motajtolteuis oso mitskejkelos, amo moneki tiknankilis (Prov. 26:4).

17, 18. 1) ¿Toni mitspaleuis okachi xitakuaujtamati itech tein kijtoua Biblia? 2) ¿Toni tikitaskej itech okse tamachtilis?

¹⁷ Maski tikixmattokya tamachtilismej tein tayekantokej itech Biblia, moneki tikchiuas okse taman tein mitspaleuis xikchikaua motakuaujtamatilis. Moneki tiktemos tikajsikamatis tamachtilismej tein okachi ouijkej tein moajsij itech Biblia, kemej yeskia tiktemojtoskia teisa tein kitelpia ipatiuj tein uejkatan toktok (Prov. 2:3-6). Se taman tein okachi kuali kemej uelis tikchikauas motakuaujtamatilis yejua komo tikixtajtoltia nochi Biblia. Uelis timochikauas tiktamiixtajtoltis itech se xiuit. Yejua nejin kipaleuij se tokniuj takalpanojkej maj kichikauani ikuali uikalis iuan Jiova keman katka telpoch. Yejua kijtoua: “Se taman tein nechpaleuij maj nikneltoka ke Biblia iTajtol Dios yejua keman nikixtajtoltij nochi. Ijkuak nikajsikamatik tanojnotsmej tein moajsij itech Biblia tein nikmatik keman nikonetsinok katka”. ¿Toni no uelis tikchiuas? Uelis tiktekitiltis nepaleuilmej tein tikpias tein mitspaleuis okachi kuali xikajsikamati tein tikixtajtoltia. Kemej neskayot, xa uelis tikuis itech computadora Watchtower Library tein moajsi ika DVD, BIBLIOTECA ITECH TEPOS Watchtower, Índice de las publicaciones Watch Tower oso Nepaleuil tein ika momachtiaj itaixpantijkauan Jiova.

¹⁸ Tetatmej, namejuan akin okachi uelis nankinmachtiskej nanmokoneuan keniuj tamati Jiova. Yejua ika itech okse tamachtilis tikitaskej seki taman kemej tetatmej uelis kinpaleuiskej ininkoneuan maj mochikaua inintakuaujtamatilis.