1, 2. Vashandiri vocidoko va Jehovha nguva jimweni vangakaya-kaya ngenyi, zve Bhaibheri rinovapa zano rapi?

MUDONI wo kucikora wakabvunja hambzaji yocidoko yo ku Briteni kudari: “Mundhu wakangwara inga ndiwe, aangatendi kuti Mwari ariyoi.” Imwe hama yo ku Aremanya yakatara kudari: “Vajijisi vangu vanovona zvinonanga Bhaibheri inga ngano. Zve vanokhohwesa vajiji kuti vatende mbhindumupindu.” Hambzaji yo cidoko yo ku Fransa yakati: “Vajijisi vo kucikora cangu vakakahamara ngokuti kuciri no vajiji vanotenda zvinonanga Bhaibheri.”

² Vazinji nyamasi uno avatendi kuti Mwari ngaakatisika. Kudari muri mushandiri wocidoko wa Jehovha kana muciri kujija ngo pamusoro pake, nguva jimweni mungakaya-kaya kuti mungadurujirisa kudini kuti iyena ndi Musiki wedu. Bhaibheri rinotibesera kuti tirangarijisise ngo pamusoro po zvotinozwa kana kuverenga no mabhuisaniro otingaita no vamweni ngo pamusoro pazvo. Soko ra Mwari rinoti: “Hwiru hunozokungwarira.” Kuitisa kudini? Hunozomubesera kuti murambe murangariro jiciripi  ijona no kuvangisa gonda renyu kuna Jehovha.​—Verenganyi Mazwi Akangwara 2:10-12.

3. Ticazojijenyi pa musoro uu?

³ Kuti tive no gonda rakavanga kuna Jehovha, tinodikana kuguma pa kumuziva ushoni. (1 Timoti 2:4) Ngo kudaro, pomunoverenga Bhaibheri no mabhuku edu, zvinosisira maningi kuima morangarira zviri kunangwaro. Ejanyi kuzwisisa zvomuri kuverengaro. (Mateu 13:23) Kudari mukajija ngo njira iyi, munozowana zvikhombijo zvizinji zvokuti Jehovha ndiena Musiki wedu zve kuti Bhaibheri rinobva kwaari. (Vaheberi 11:1) Ngatende tibhuisane kuti tingazviitisa kudini.

4. Kutenda mbhindumupindu kwakaezanisa kudini no kutenda kuti zviro zvakasikwa? Waro, tese tinodikana kuitenyi?

⁴ Mundhu angamubvunja kuti, “ndinotenda ku mbhindumupindu ngokuti masientista ngo zvaanonanga kuti icokwadi. Ungatendesa kudini Mwari kuveni apana wakambomuvona? ” Vazinji vanorangarira ngo njira iyo. Zvokadi kamare, apana na umwe wedu wakambovona Mwari kana wakavona ciri cese cicisikwa. (Johani 1:18) Asi tingati kudini ngo vandhu vanotenda mbhindumupindu? Ivona vanotendavo zviro zvovacikavoni. Akuna sientista kana mundhu ari wese hake wakavona mukhaindi umwe wo ciro cinopona ciciphinduka kuita mukhaindi umweni. Inga muezaniso, akuna wakambovona ciro cinogwezva ciciphinduka kuita ciro cinomwisa. (Jobe 38:1, 4) Ngokudaro, tese tinodikana kupsakisisa zvakaitika kamare, tozvirangarijisisa ushoni zve tosunga kuti zvinokhombijenyi kamare. Vandhu vazinji vakavona zviro zvakasikwa zve ‘vokona kuziva’ kuti Mwari ariyo. Ivona ‘vakakona kumuziva’ kuti iyena ndi Musiki, ana simba guru, zve ana mugariro jakawanda jinokahamarisa.​—VaRoma 1:20.

5. Mathurusi api o kupsakisira angatibesera kujija zvakawanda ngo pamusoro po zvakasikwa?

⁵ Potinosota zvakasikwa no kuzvirangarijisisa, tinokwanisa kuvona kuti zviro zvese zvakaitwa ngo njira inokahamarisa. “Ngo [gonda], tinoziva” kuti ariyo Musiki, pikija kuti  aavoneki. Tinoziva kuti ana mugariro jakanaka no ungwaru hwakakura. (Vaheberi 11:3, 27) Tingajija zvizinji ngo zvaakasika ngo kuverenga ngo pamusoro po zvakapfumbura masientista. Amweni o masoko ondhoo anowanika mu mathurusi o kupsakisira akadari inga vhidhio As Maravilhas da Criação Revelam a Glória de Deus, mabhurushura A Vida​—Teve um Criador? no A Origem da Vida​—Cinco Perguntas Que Merecem Resposta, no bhuku Existe um Criador Que Se Importa com Você? Mu revhista Desperai!, kazinji munoviiswa musoro unobhuya ngo kubvunjiswa kwakaitwa masientista no vamweni kuti ngenyi wari vanotenda kuti Mwari ariyo. No mutevejwana unodanijwa kuti “Teve um Projeto?” unobatanija masoko akawanda ngo pamusoro po zvinyama no zviro zvimweni zvakasikwa, kubatanijavo muezaniso jokuti masientista akaejesa kudini kutevejera mashandiro anoita zviro izvi.

6. Mathurusi o kupsakisira angamubesesa kudini?

⁶ Hama yo ku Estadhos Unidhos ina makore 19 yakananga kudari ngo pamusoro po mabhurushura maviri anangwaya: “Ano mutengo mukuru kondiri. Ndakamaverenga kanokwana gumi na uviri.” Imwe hambzaji yo ku Fransa yakatara kudari: “Musoro jokuti ‘Teve um Projeto’ janondikahamarisa maningi! Jinotatija kuti majienjinyero makuru angatevejera asi zvovanoitaro azvizoezani no marurihwo akaitwa zvakasikwa.” Vabari vo musikane wo makore 15 vo ku Afrika dhu Suri vakati: “Cinotanga kuverenga mwana wedu nguva jese mu Despertai! i musoro jo kubvunjiswa.” Mabhuku aya angamubeseravo kuvona zvitatijo zvokuti Musiki ariyo, zve munozokwanisa kuziva no kuramba jijiso jo kunyepa. Gonda renyu rinozovanga maningi zvokuti munozodenga miti una miji jakacira zve unoramba wakaima pa mukuvo wo mbhepo yakavanga.​—Jeremia 17:5-8.

7. Ngenyi Mwari anoda kuti mushandise simba renyu ro kurangarira?

⁷ Zvakashata kuita mubvunjo wakadari inga, ‘ngenyi ndinotenda zvinonanga Bhaibheri?’ Azvizivi kushata. Jehovha aadi kuti mutende ciro ngokuti vamweni vanocitengavo basi. Anoda kuti mushandise [‘simba renyu ro kurangarira,’ Shanduro yeNyika Itsva] kuti mugume pa kuziva Bhaibheri no kuwana zvitatijo zvokuti iritona rinobvada kwaari kamare. Pamunozviva zvizinji zvorinonanga, kurigonda kwenyu kuzovanga maningi. (Verenganyi VaRoma 12:1, 2; 1 Timoti 2:4.) Njira imwe yo kuguma pa kuziva Bhaibheri ngo yo kuverenga shwiro yomakheta kuti munodakarira kuiziva maningi.

8, 9. (a) Ishwiro japi jovanodakarira kujija vamweni? (b) Vamweni vakabesereka kudini povairangarijisisa zvovaiverenga?

⁸ Vamweni vanodakarira kujija zviporofita zvo Bhaibheri. Kana vamweni vangada kuezanisa zvinonanga Bhaibheri no zvinonanga vasumuri vo zvakaitika, masientista, kana zvinonanga vajiji vo zvomathere. Vonanyi, inga muezaniso, Genesi 3:15. Jehovha wakapa ciporofita ici cinosisira maningi pakundopera kwa Adhamu na Evha kupandukira Jehovha no matongero ake. Ici iciporofita cokutanga co zviporofita zvizinji zvo Bhaibheri zvinotibesera kuzwisisa kuti Umambo hwa Mwari hunozotatijisa kudini kuti matongero a Mwari ngo aushoni no mapejero ohunozoita matambujiko ese. Mangajijisa kudini Genesi 3:15? Mungaita nda-nda-nda yo mavhesi anobhuya ngo pamusoro po makwanirisikiro aizoita uporofita uhu. Tevere, mungawana  kuti mavhesi ao akatahwa rini no kumaronga ushoni. Munozoziva ngo kukasika kuti vatari vo Bhaibheri avo vakararama mu nguva yakasiana-siyana asi umwe na umwe wakatara zviro zvinojekesa maningi uporofita uhwo. Izvi zvingamubesera kuziva kuti mujimu mucena wa Jehovha waivatungamirira.​—2 Pedru 1:21.

⁹ Hama imweni yo ku Aremanya yakarangarira ngo pamusoro po kuti bhuku rimwe na rimwe ro Bhaibheri rina masoko mangana ngo pamusoro po Umambo. Iyona yakati: “Izvo zvakaitika, pikija kuti Bhaibheri rakatahwa ngo vandhu anokwana 40. Zve vazinji vavo vakararama mu mukuvo wakasia-siana zve avacaizivana umwe no umweni.” Hambzaji imweni yo ku Austraria yaiverenga musoro umweni mu Murindiri zve yakaziva kuti Phasika yaizwiranisa kudini na Genesi 3:15 na Mesia. ^[1] (Vonanyi masoko o kupejisira.) Hambzajiyo yakatara kudari: ‘Ndakafunungura majiso ndovona kuti zvokadi Jehovha wakanaka maningi. Kuziva kuti kuno ari wese wakarangarira kuita nasiriro iyi kuitira vaIziraeri perepo yokwanirisika kubvira kuna Jesu, zvakandishamaisa maningi. Zvokadi ndakamboima ndorangarijisisa mashamaisire o ciphorofita co cirariro co Phasika!’ Ngenyi hambzaji iyi yakava no mazwiro ao? Ngo kuti yakarangarijisisa ngo pamusoro po zvoyakaverenga, yozvizwisisa. Izvi zvakaibesera kuti ivangise gonda rayo zve zvakaikhwedeja phedo na Jehovha.​—Mateu 13:23.

10. Kugondeka ko vatari vo Bhaibheri kunovangisa kudini kugonda kwatinoriita?

¹⁰ Rangariranyi basi ngo pamusoro po kugondeka ko vatari wo Bhaibheri. Ivona vainanga zvokadi zve avacaithyepi kuzviita. Vatari pa mukuvo wondhowo, kazinji vaitara zviro zvaushoni basi ngo pamusoro po jinja ravo no vatungamiriri vavo. Asi vaporofita va Jehovha avacaitarepi ngo pamusoro po zviro zvaushoni basi asi vaitaravo ngo pamusoro po zviro zvakashata zvakaitwa ngo vandhu vo Iziraeri no majimambo avo. (2 Kronike 16:9, 10; 24:18-22) Ivona vakatarazve zvovaiposa no zvaiposa vashandiri va Mwari vamweni. (2 Samueli 12:1-14; Marco 14:50) Hama imweni yocidoko yo ku Briteni yakati: “Kugondeka kwakadari, akuwaniki maningi. Izvi zvinoengejera kuthemba kwedu kuti Bhaibheri rinobvadi ka Jehovha kamare.”

11. Ndhungamiriro jotinowana mu Bhaibheri jingatikhohwesa kudini kuti irona rinobva ka Mwari?

¹¹ Vandhu povanotendera kuti Bhaibheri ritungamirire mararamiro avo, vanovona muviyo waushoni wovanowana. Izvo zvinovakhohwesa kuti Bhaibheri rinobva ka Mwari. (Verenganyi Nduyo 19:8-12.) Hambzaji imweni yocidoko yo ku Jhapau yakatara kudari: “Vo paukama hwangu povaishandisa jijiso jo Bhaibheri, tainga no mudakaro wokadi-kadi. Tainga no runyararo, rubatano no rudo.” Bhaibheri rakabesera vakawanda kuziva kuti zviro zvimweni zvovaitenda azvicaengepi izvona. (Nduyo 115:3-8) Irona rinotungamirira vandhu kuti vathembe Jehovha, Mwari wo masimba ese, zve rino zvipikihwa zvakanaka zvo kumbeji. Ngo divi rimweni, vamweni vanonangaya kuti akuna Mwari, vanototora zvisikwa vozviita cimwari. Vamweni vanonanga kuti vandhu vanokwanisa kuviisa kumbeji kwakanaka, asi tikasota zvovari kuita mbhera wari, tinovona kuti avaripi kukwanisa kupeja zvineso zviri munyika.​—Nduyo 146:3, 4.

12, 13. Tingabhuisa kudini no vamweni ngo pamusoro po zvakasikwa kana po Bhaibheri?

¹² Pomunobhuya no vamweni ngo pamusoro po zvakasikwa kana po Bhaibheri,  tanganyi kuziva ngo zvapi zvovanotenda kamare. Ceujanyi kuti vamweni vanotendaya mbhindumupindu vanotendavo kuti Mwari ariyo. Ivona vanonanga kuti iyena wakashandisa mbhindumupindu kuti asike zviro zvese zvinopona. Vamweni vanotenda kuti mbhindumupindu ngo yokadi ngokuti ngo inojijiswa mu zvikora. Zve vamweni vakasiya kutenda Mwari ngokuti vakacamwiswa ngo ciara. Ngokudaro, tanganyi ngo kubvunjisa mundhu zvaanotenda zve ngenyi anozvitenda. Perepo purukiranyi ushoni zvaanonangaro. Mukapurutana, iyena kangaije anozopurutanavo.​—Tito 3:2.

¹³ Kudari mundhu akati muri rethe ngo kuti munotenda kuti kuno Musiki, maizomudavira kudini? No nderemejo yese mukumbirenyi kuti asanangure matangiro akaita upenyu. Maizonanga kuti kudari upenyu hwakabva pa mbhindumupindu, ciro cakatanga kurarama caizodiwa kuti cikwanise kubudisa zviro zvimweni zvakaezana naco. Zvokadi, umwe mujijisi wo kimika wakananga kuti, kusiyapo zvimweni, paizodiwa (1) ciro cakaezana no ganda kuti cijivirire ciroco, (2) caidikana kukwanisa kuwana simba no kurishandisa, (3) caidikana kuva no zvinovonerera magariro no makurire aco, zve (4) caidikana kukwanisa kubudisa zviro zvimweni zvakafanana no zvocinokwanisaro. Iyena wakaengejera kudari: “Mundhu anoneseka ngo kutama kuzwisisika ko upenyu wo zviro zvitotori.”

14. Murangariro wapi wakareruka wamungashandisa pomunobhuisana ngo zvakasikwa?

¹⁴ Pomunobhuisana ngo zvakasikwa, mungashandisa murangariro wakareruka wakashandiswa ndi Pauro. Wakatara kudari: “Nyumba iriyese inovakwa ngo mundhu. Kaveta, muvaki wo bzese ndi Mwari.” (Vaheberi 3:4) I zvokadi kuti nyumba inonasirihwa no kuvakwa ngo mundhu. Waro azvina musoro here kuti zviro zvinopona, izvo zvinonesa maningi kuzwisisa kupinda nyumba, zvive zvakanasirihwa no kuitwa ngo ari wese? Maizoshandisazve mabhuku edu. Imwe hambzaji yakabhuya no mujaha aacaitendepi kuti Mwari ariyo. Hambzaji iyi yakamupa mabhurushura maviri anangwaya pa kutanga, zve pa mabviki maviri akatevera, mujahewo wakati: “Wari ndotenda kuti Mwari ariyo.” Iyena wakatanga kujija Bhaibheri zve wakazova umwe wo hama jedu.

15, 16. Tinodikana kuitenyi ticito tasanangurira mundhu kuti Bhaibheri rinobva ka Mwari? Zve nguva jese tinodikana kuceujenyi?

¹⁵ Kudari mundhu ari kukana-kana ngo pamusoro po Bhaibheri, maizobhuisana kudini naye? Inga zvaperaya kunangwa, tanganyi kumubvunjisa zvaanotenda. Zivanyi zvaanodakarira. (Mazwi Akangwara 18:13) Kudari anoda zvo siensia, muitirenyi muezaniso wo mu Bhaibheri kuitira kumutatija kuti zvorinonanga ngo shwiro jo zvosiensia nguva jese ndizvona kamare. Kudari anodakarira zviitiko zvo kare, maizonanga ciitiko ciri mu bhuku riri rese ro zviitiko zvo kare zve momutatija kuti Bhaibheri rainga rakacinanga kare kamare cicito caitika. Vandhu vamweni vangamupurukira kudari mukavatatija ciro co mu Bhaibheri cinokwanisa kucinja upenyu hwavo, cakadari inga mazano anowanika mu Hurukuro yo pa Dundhu.

 ¹⁶ Ceujanyi kuti atidi kuvereketesana no vandhu. Tinoda kuti vadakarire kubhuya na itusu no kujija ngo pamusoro po Bhaibheri. Ngokudaro, itanyi mubvunjo no nderemejo, zve purukiranyi ushoni. Pomunobvunja mundhu zvomunotenda, zviitenyi no nderemejo, maningi-ningi kudari mundhuwo i dhodha komuri. Kudari mukareremeja vamweni, ivona vanozomureremejavo. Zve ivona vanozokahamara ngokuti muri kuvajijisa zvakajika ngo pamusoro po zvomunotenda pikija kuti muciri mudoko. Zvokadi kamare, kudari mundhu akada kuvereketesana na imwimwi kana kumupseruja, amudikani kumudavira.​—Mazwi Akangwara 26:4.

17, 18. (a) Icinyi cingamubesera kuti muvangise kugonda kwenyu Bhaibheri? (b) Mubvunjo wapi woticazojija pa musoro unotevera?

¹⁷ Tingaziva hedu jijiso jo Bhaibheri jo kutanga, asi tinoda zvinopinda izvo kuti tive no gonda rakavanga. Tinodikana kupsakisira no kufumbhura zvokadi jakajika jiri mu Bhaibheri, inga tiri kupsaka upfumi hwakafishika. (Mazwi Akangwara 2:3-6) Njira imwe yaushoni yo kuvangisa gonda renyu ngo yokuverenga Bhaibheri rese. Kangaije maizoeja kuriverenga ngo gore rimwe. Izvo zvakabesera umwe muvonereri wo ndharaundha kukhwedera phedo na Jehovha paaenga mujaha. Iyena wakati: “Ciro cimwe cakandibesera kuziva kuti Bhaibheri i Soko ra Mwari cakava co kuverenga rese kukapa mbhera kukapa. Ndhorondho jo Bhaibheri jondakajija ndiciri mwana jakazova no cinangwa kondiri.” Shandisanyizve mathurusi o kupsakisira anowanika mu ndimi yenyu kuti amubesere kuzwisisa zvomunoverenga. Kangaije muna Watchtower Library mu DVD, BHIBHIRIOTEKA RO MU INTERNETI ro Torre de Vigia, Índice das Publicações da Torre de Vigia, kana Guia de Pesquisa para as Testemunhas de Jeová.

¹⁸ Vabari, imwimwi munokwanisa kujijisa vana venyu ngo pamusoro pa Jehovha kupinda ariwese. Waro mungavabesesa kuti vave no gonda rakavanga kwaari? Musoro unotevera unozobhuya ngo njira jimweni jomungazviita ndijona.