1, 2. Σο μπορεί τι σκεφτίνενα μπάζιμα ο τερνέ υπηρέτες ι Ιεχωβάσκε, ντα καγιά συμβουλή ντέλα η Γραφή;

Η ΣΥΜΜΑΘΗΤΡΙΑ εκχέ πφενιάκι κι Βρετανία βακερντάς λάκε: «Ισινάν μπουτ έξυπνη για τι πακιάς κο Ντεβέλ». Εκ πφραλ κι Γερμανία γραφιντάς: «Μο καθηγητές βακερένα ότι η ιστορία σο ισί κι Αγία Γραφή για τη δημιουργία ισί εκ μασάλι. Ντα ισί σίγουροι ότι σαρέ λένγκε μαθητές πακιάνα κι εξέλιξη». Εκ πφεν κι Γαλλία βακερντάς: «Μο καθηγητές κο σχολείος σαστίνενα όταν σικλιόνα ότι υπαρχίντιβενα μαθητές σο πακιάνα κι Γραφή».

² Μπουτ τζενέ αντιβές να πακιάνα ότι ο Ντεβέλ κερντάς-αμέν. Άμα ισινάν εκ τερνό υπηρέτης ι Ιεχωβάσκο ή σικλιόσα Λέσκε ακανά, μπάζιμα μπορεί τι σκεφτίνεσα σαρ τι σικαβές κο γιαβερά ότι Βοβ κερντάς-αμέν. Η Γραφή βοηθίνελα-αμέν τι σκεφτίνας προσεκτικά ντα λογικά οντουλά σο ασουνάσα ή διαβάνασα. Ο Λάφι ι Ντεβλέσκο βακερέλα: «Αν σικλιόσα τι σκεφτίνες λατσσές, ανταβά κα αρακχαβέλ-τουτ». Σαρ; Κα βοηθίνεν-τουτ τι νασές ντουρ κατά ψεύτικα λάφια ντα τι κερές πιο ζουρανί τι πίστη κο Ιεχωβά.​—Διαβάνεν Παροιμίες 2:​10-12.

3. Σο κα ντικχάς ανταλέ μαθημάστε;

 ³ Για τι τθεράς ζουρανί πίστη κο Ιεχωβά, πρέπει τι γνωρίνας-λες λατσσές. (1 Τιμόθεο 2:4) Οτθάρ, κάνα διαβάνεσα ι Γραφή ντα αμαρέ έντυπα, ισί μπουτ σημαντικός τι σταματίνες χάνικα ντα τι σκεφτίνες ο λάφια σο διαβαντάν. Προσπάθινε τι αγαβές οντουλά σο διαβάνεσα. (Ματθαίος 13:​23) Άμα κα διαβάνες αντικάς, κα αρακχές μπουτ αποδείξεις σο σικαβένα ότι ο Ιεχωβά κερντάς-αμέν ντα ότι η Γραφή ισί λέσταρ. (Εβραίους 11:1) Για τι ντικχάς σαρ μπορίνασα τι κεράς-λες ανταβά.

4. Σαρ μοιάζελα η εξέλιξη με τη δημιουργία; Ντα σο πρέπει σαρέ τι κεράς;

⁴ Μπορεί κάποιος τι βακερντάς τούκε: «Πακιάβα κι εξέλιξη επειδή ο επιστήμονες βακερένα ότι ισί μπαγιά. Σαρ αβέλα-πες τι πακιάς κο Ντεβέλ αφού καέκ να ντικχλάς-λες ποτές;» Μπουτ τζενέ σκεφτίνενα αντικάς. Ντα η αλήθεια ισί ότι καέκ αμένταρ να ντικχλάς ποτές ι Ντεβλές ούτε ντικχλάμ ποτές τι δημιουργίντιβελ κάτι. (Ιωάννης 1:​18) Αλλά σο κα βακεράς ι τζενένγκε σο πακιάνα κι εξέλιξη; Βον-ντα πακιάνα σε κάτι σο να ντικχλέ ποτές. Καέκ επιστήμονας ή καέκ γιαβέρ τζενό να ντικχλάς ποτές εκ πράγμας σο ισί κι ζωή τι αβέλ κάτι γιαβέρ. Για παράδειγμας, καέκ να ντικχλάς εκχέ σαπές ή εκχέ σαπουρνιά τι αβέλ εκ γιαβέρ ζώος. (Ιώβ 38:​1, 4) Άρα, σαρέ πρέπει τι ντικχάς ο αποδείξεις, τι σκεφτίνας-λεν με προσοχή ντα τι νικαβάς λογικά συμπεράσματα. Μπουτ τζενέ ντικχλέ ο πράγματα σο ισί κι φύση ντα “αγαντέ” ότι ο Ντεβέλ υπαρχίντιβελα. “Ντικχλέ καθαρά” ότι Βοβ κερντάς σαρέ ο πράγματα, ότι ισί ζουρανό ντα ότι τθερέλα μπουτ λατσσέ ιδιότητες.​—Ρωμαίους 1:20.

5. Καλά εργαλεία μπορίνενα τι βοηθίνεν-αμέν τι σικλιάς πιο μπουτ πράγματα για τη δημιουργία;

⁵ Όταν ντικχάσα ο πράγματα σο ισί κι φύση ντα σκεφτίνασα-λεν λατσσές, αγαβάσα ότι σαρέ ο πράγματα ισί μπουτ σουκάρ κερντέ. «Επειδή τθεράσα πίστη, αγαβάσα» ότι κάποιος κερντάς σαρέ ο πράγματα, παρόλο σο ναστί ντικχάσα-λες, ντα ότι τθερέλα μπουτ λατσσέ ιδιότητες ντα μπαρί σοφία. (Εβραίους 11:3, 27) Μπορίνασα τι σικλιάς ατζέ πιο μπουτ πράγματα οντουλένγκε σο  κερντάς όταν διαβάνασα σο αρακχλέ ο επιστήμονες. Μπορίνασα τι ρόντας ασακέ πληροφορίες κο εργαλεία σο ντέλα-αμέν η οργάνωση, σαρ ισί ο βίντεος Τα Θαύματα της Δημιουργίας Αποκαλύπτουν τη Δόξα του Θεού, ο βιβλιάρια Δημιουργήθηκε η Ζωή; ντα Η Προέλευση της Ζωής​—Πέντε Ερωτήματα που Αξίζει να Τεθούν, ντα ο βιβλίος Υπάρχει Δημιουργός που Ενδιαφέρεται για Εσάς; Κο περιοδικός Ξύπνα!, αρακχάσα συνεντεύξεις κατά επιστήμονες ντα κατά γιαβερά τζενέ σο εξηγίνενα σόσκε ακανά πακιάνα κο Ντεβέλ. Επίσης, κο θέμας «Προϊόν Σχεδιασμού;», σο ισί κο Ξύπνα!, ντικχάσα ο σουκάρ τρόπος σο ισί κερντέ ο ζώα ντα γιαβερά πράγματα σο ισί κι φύση ντα σικαβέλα σαρ ο επιστήμονες προσπαθιντέ τι αγαβέν-λεν για τι κερέν βον-ντα πράγματα σο κα μοιάζεν οντουλέντε σο ισί κι φύση.

6. Σαρ μπορίνενα ο εργαλεία σο τθεράσα τι βοηθίνεν-τουτ;

⁶ Εκ πφραλ κο Ηνωμένες Πολιτείες, σο ισί 19 μπρεσένγκο, βακερντάς ι ντουέ βιβλιαριόνγκε σο ντικχλάμ πιο πριν: «Ισί μπουτ σημαντικά μάνγκε. Διαβαντόμ-λεν περίπου δέκα φαρ». Εκ πφεν κι Γαλλία βακερντάς: «Ο θέματα “Προϊόν Σχεδιασμού;” κερένα μάνγκε μπαρί εντύπωση! Σικαβένα ότι ο πιο λατσσέ μηχανικοί μπορίνενα τι κερέν σχέδια σο μοιάζενα κο πράγματα σο ισί κι φύση, αλλά ποτές να κα μπορίνεν τι κερέν-λεν ακριβώς ίδια». Κι Νότια Αφρική, ο ντατ ντα η ντάι εκχέ τσσαγιάκε σο ισί 15 μπρεσένγκι βακερντέ: «Ο πρώτος πράγμας σο διαβάνελα αμαρί τσσάι κο Ξύπνα! ισί η “Συνέντευξη”». Ανταλά έντυπα μπορίνενα τι βοηθίνεν τουτ-ντα τι ντικχές ότι ο Ντεβέλ κερντάς-αμέν, ντα τι αγαβές ντα τι νασές ντουρ κατά ψεύτικα λάφια σο σικλιαρένα ο τζενέ. Τι πίστη κα αβέλ αζόμ ζουρανί σο κα αβές σαρ εκ δέντρος σο τθερέλα μπαρέ ρίζες ντα ατσσόλα σταθερός ατζέ-ντα όταν πφούντελα μπουτ ζουρανί μπαρμπάλ.​—Ιερεμίας 17:​5-8.

7. Σόσκε ο Ντεβέλ μανγκέλα τι χρησιμοποιήνες “σαρί τι γκοντί”;

⁷ Ισί λάθος τι κερές ερωτήσεις σαρ ισί ακαγιά: «Σόσκε πακιάβα οντουλά σο βακερέλα η Γραφή;» Σίγουρα όχι! Ο Ιεχωβά να μανγκέλα τι πακιάς κάτι απλά επειδή πακιάνα-λες ο γιαβερά. Μανγκέλα τι χρησιμοποιήνες “σαρί τι γκοντί” για τι σικλιός πιο λατσσές ι Γραφή ντα τι αρακχές αποδείξεις ότι ισί λέσταρ. Καζόμ πιο μπουτ κα τζανές σο βακερέλα, αζόμ πιο ζουρανί πίστη κα τθερές. (Διαβάνεν Ρωμαίους 12:​1, 2· 1 Τιμόθεο 2:4) Εκ τρόπος για τι σικλιός πιο λατσσές ι Γραφή ισί τι διαβάνες ο θέματα σο ενδιαφερίνενα-τουτ.

8, 9. (α) Καλά θέματα μπεϊντίνενα κάποιοι τι διαβάνεν; (β) Σαρ βοηθισάλε μερικοί κάνα σκεφτισάλε οντουλά σο διαβαντέ;

⁸ Μερικοί μπεϊντίνενα τι διαβάνεν ο προφητείες σο ισί κι Γραφή. Ή μπορεί τι μπεϊντίνενα τι συγκρίνεν ο εδάφια ι Γραφιάκε οντουλέντζαρ σο βακερένα ο ιστορικοί, ο επιστήμονες ντα ο αρχαιολόγοι. Για παράδειγμας, σκεφτίνεν ο εδάφιος Γένεση 3:​15. Ο Ιεχωβά βακερντάς ανταγιά μπουτ σημαντική προφητεία κάνα ο Αδάμ ντα η Εύα γκιλέ κόντρα κο Ιεχωβά ντα κο δικαίωμας σο τθερέλα τι κυβερνίνελ. Ανταγιά ισί η πρώτη μπουτέ προφητειένταρ κι Γραφή σο βοηθίνενα-αμέν τι αγαβάς σαρ η Βασιλεία ι Ντεβλέσκι κα σικαβέλ ότι ο τρόπος σο κυβερνίνελα ο Ντεβέλ ισί ο πιο λατσσό ντα σαρ κα νασκιαρέλ σαρέ ο προβλήματα. Σαρ μπορίνεσα τι κερές σκέψεις για το εδάφιος Γένεση 3:​15; Μπορίνεσα τι γραφίνες ο εδάφια κατά Γραφή σο σικαβένα με πιο μπουτ λεπτομέρειες σαρ ανταγιά προφητεία κα νικιόλ μπαγιά. Σοράν, μπορίνεσα τι αρακχές  κάνα γραφίντιλε οντουλά εδάφια ντα τι τσσουβές-λεν σε εκ σειράς. Μπουτ σουγκό κα αγαβές ότι ο τζενέ σο γραφιντέ ι Γραφή να τζουβντιλέ κο ίδια μπρεσά, αλλά ο κάθε εκ λένταρ γραφιντάς κάτι σο κερέλας ανταγιά προφητεία πιο ξεκάθαρη. Ανταβά κα βοηθίνελ-τουτ τι αγαβές ότι ο άγιος πνεύμας ι Ιεχωβάσκο κατευθίνελας-λεν.​—2 Πέτρου 1:21.

⁹ Εκ πφραλ κι Γερμανία σκεφτιντάς σαρ ο κάθε βιβλίος σο ισί κι Γραφή τθερέλα λεπτομέρειες για τη Βασιλεία. Βοβ γραφιντάς: «Ανταβά αβέλα-πες παρόλο σο γραφιντέ ι Γραφή περίπου 40 μουρσά. Ντα μπουτ λένταρ τζουβντιλέ διαφορετικέ μπρεσέντε ντα να τζανένας ο εκ ι γιαβερές». Εκ πφεν κι Αυστραλία διαβάνελας εκ μάθημας κι Σκοπιά ντα σικλιλί σο σχέση τθερέλα ο Πάσχας ι εδαφιόσαρ Γένεση 3:​15 ντα με τον Χριστό. ^[1] (Ντικχ ι σημείωση.) Βόι γραφιντάς: «Οντουβά μάθημας πουταρντάς μο γιακχά ντα ντικχλόμ καζόμ λατσσό ισί ο Ιεχωβά. Κερντάς μάνγκε μπαρί εντύπωση ότι ο Ντεβέλ βακερντάς κο Ισραηλίτες τι κερέν ο Πάσχας για τι σικαβέλ σο κα αβέλας-πες κο Ιησούς. Έπρεπε πραγματικά τι σταματίναβ ντα τι σκεφτίναβ καζόμ σημαντικός ισινέ οντουβά προφητικός χαμπέ σο χαλέ κο Πάσχας!» Σόσκε οντιά πφεν νιωσάλι αντικάς; Σκεφτιντάς λατσσές οντουβά σο διαβαντάς ντα αγαντάς-λες. Ανταβά βοηθιντάς-λα τι κερέλ πι πίστη πιο ζουρανί ντα αντάς-λα πιο πασέ κο Ιεχωβά.​—Ματθαίος 13:23.

10. Σαρ αβέλα αμαρί πίστη πιο ζουρανί όταν ντικχάσα καζόμ τίμιοι ισινέ ο μουρσά σο γραφιντέ ι Γραφή;

¹⁰ Σκεφτίνεν επίσης καζόμ τίμιοι ισινέ ο μουρσά σο γραφιντέ ι Γραφή. Βον να νταρένας τι βακερέν ι αλήθεια. Οντουλέ μπρεσέντε ο τζενέ γραφίνενας σάντε λατσσέ πράγματα πουμαρέ τθεμέσκε ντα οντουλένγκε σο κυβερνίνενας-λεν. Αλλά ο προφήτες ι Ιεχωβάσκε να γραφιντέ σάντε ο λατσσέ πράγματα σο κερέλας ο λαός Ισραήλ ντα λένγκε βασιλιάδες, αλλά γραφιντέ λένγκε λάθη-ντα. (2 Χρονικών 16:9, 10· 24:​18-22) Γραφιντέ μέχρι ο λάθη σο κερντέ βον ντα γιαβερά υπηρέτες ι Ιεχωβάσκε. (2 Σαμουήλ 12:​1-14· Μάρκος 14:​50) «Δύσκολα αρακχέσα ασακέ τίμιε τζενέν», βακερντάς εκ τερνό πφραλ κι Βρετανία. «Ανταβά κερέλα-αμέν σίγουρους ότι η Γραφή ισί μπαγιά κατά Ιεχωβά».

11. Σαρ οντουλά σο σικλιαρέλα η Γραφή κερέλα-αμέν σίγουρους ότι η Γραφή ισί κατά Ντεβέλ;

¹¹ Όταν ο τζενέ μουκχένα ι Γραφή τι οδηγίνελ λένγκι ζωή, ντικχένα ο λατσσιπέ σο ανέλα. Ανταβά κερέλα-λεν σίγουρους ότι η Γραφή ισί κατά Ντεβέλ. (Διαβάνεν Ψαλμός 19:​7-11) Εκ τερνί πφεν κι Ιαπωνία γραφιντάς: «Όταν μι φαμιλί κερντάς οντουλά σο σικλιαρέλα η Γραφή, αβιλάμ μπαγιά ευτυχισμέ. Αρχισάλαμ τι τθεράς ειρήνη, ενότητα ντα αγάπη». Η Γραφή βοηθιντάς μπουτέ τζενέν τι αγαβέν ότι μερικά πράγματα σο πακιάνας να ισινέ μπαγιά. (Ψαλμός 115:​3-8) Βοηθίνελα ι τζενέν τι στηρίντιβεν κο Ιεχωβά, κο ζουρανό Ντεβέλ, ντα σικαβέλα ι υπόσχεση ι Ντεβλέσκι για εκ πιο λατσσί ζωή κο μέλλον. Οκιά μπάνταρ, όμως, μερικά τζενέ σο βακερένα ότι να υπαρχίντιβελα Ντεβέλ κερένα ι φύση πουμαρό ντεβέλ. Γιαβερά πάλι βακερένα ότι ο τζενέ κα ανέν εκ πιο λατσσό μέλλον, αλλά όταν ντικχάσα σο κερντέ μέχρι ακανά, αγαβάσα ότι να μπορίνενα τι λύνεν ο προβλήματα σο τθερέλα ο ντουνιάς.​—Ψαλμός 146:​3, 4.

12, 13. Σαρ μπορίνασα τι κεράς λάφι για τη δημιουργία ή για τη Γραφή ι γιαβερέντζαρ;

¹² Όταν κερέσα λάφι για τη δημιουργία ή για τη Γραφή ι γιαβερέντζαρ, αράκχ  πρώτα σο πακιάνα πραγματικά. Ντε-τουτ γκοντί ότι μερικά τζενέ σο πακιάνα κι εξέλιξη πακιάνα κο Ντεβέλ-ντα. Βακερένα ότι ο Ντεβέλ κερντάς ι εξέλιξη για τι κερέλ σαρέ ο πράγματα σο ισί κι ζωή. Γιαβερά τζενέ πακιάνα ότι η εξέλιξη ισί μπαγιά επειδή σικλιαρένα-λα κο σχολείος. Ντα μερικοί τσσιναντέ τι πακιάν κο Ντεβέλ επειδή ντικχένα ο μπέτι πράγματα σο κερέλα η θρησκεία. Άρα, πρώτα πουτς ι τζενές σο πακιάλα ντα σόσκε πακιάλα-λες. Σοράν ασούν με προσοχή οντουλά σο βακερέλα. Άμα κα κερές-λες ανταβά, μπορεί βοβ-ντα τι μανγκέλ τι ασουνέλ-τουτ.​—Τίτο 3:2.

¹³ Άμα κάποιος κα βακερέλ τούκε ότι ισί ντινιλιπέ τι πακιάς ότι ο Ντεβέλ κερντάς-αμέν, σαρ κα απαντίνεας; Βάκερ λέσκε με σεβασμός τι εξηγίνελ τούκε σαρ πακιάλα ότι αρχισάλι η ζωή. Κα μπορίνεας τι βακερές ότι, άμα η εξέλιξη ισί μπαγιά, ο πρώτος πράγμας σο αβιλό κι ζωή έπρεπε τι τθερέλ ι δύναμη τι κερέλ αντιγραφή πο νεαυτός μπουτ φαρ. Εκ καθηγητής χημείας βακερντάς ότι, για τι αβέλ-πες ανταβά, κα χρειαζίντιβελας (1) τι τθερέλ κάτι σαρ τσίπα για τι αρακχαβέλ-πες, (2) τι μπορίνελ τι λελ ντα τι χρησιμοποιήνελ ενέργεια, (3) τι μπορίνελ τι τζανέλ σαρ κα μοιάζελας ντα σαρ κα μπαριόλας ντα (4) τι τθερέλ ι δύναμη τι κερέλ αντιγραφή ανταλά πληροφορίες. Συνεχιντάς ντα βακερντάς: «Ο τζενέ ατσσόνα πουταρντέ μόσαρ κάνα ντικχένα καζόμ δύσκολος ισί τι αγαβάς ατζέ-ντα ο πιο απλός πράγμας σο ισί τζουβντό».

14. Καβά απλός παράδειγμας μπορίνεσα τι βακερές όταν κερέσα λάφι για τη δημιουργία;

¹⁴ Όταν κερέσα λάφι για τη δημιουργία, μπορίνεσα τι δοκιμάνες ο απλός παράδειγμας σο χρησιμοποιηντάς ο Παύλος. Ο ίδιος γραφιντάς: «Σαρ τζανάσα, ο κχερά κερντιόνα τζενένταρ, αλλά οντουβά σο κερντάς σαρέ ο πράγματα ισί ο Ντεβέλ». (Εβραίους 3:4) Αφού εκ κχερ σχεδιάντιβελα ντα κερντιόλα τζενένταρ, σίγουρα εκ τζουβντό πράγμας-ντα, σο ισί πιο δύσκολος εκχέ κχερέσταρ, πρέπει τι σχεδιάντιβελ ντα τι κερντιόλ από κάποιον. Κα μπορίνεας τι χρησιμοποιήνες επίσης αμαρέ έντυπα. Εκ πφεν κερντάς λάφι εκχέ τερνέσαρ σο να πακιάλας ότι υπαρχίντιβελα Ντεβέλ. Βόι ντινάς-λες ο ντούι βιβλιάρια σο κερντάμας λένγκε λάφι πιο πριν, ντα αφού νακχλί εκ εβδομάδα περίπου, βοβ βακερντάς: «Ακανά πακιάβα κο Ντεβέλ». Οντουβά τερνό αρχισάλο μελέτη κατά Γραφή ντα πιο σοράν αβιλό αμαρό πφραλ.

15, 16. Σο πρέπει τι κεράς πριν τι εξηγίνας εκχέ τζενέσκε ότι η Γραφή ισί κατά Ντεβέλ; Ντα σο πρέπει πάντα τι ντας-αμέν γκοντί;

¹⁵ Άμα εκ τζενό τθερέλα αμφιβολίες ότι η Γραφή ισί κατά Ντεβέλ, σαρ μπορίνεσα τι κερές λέσαρ λάφι λογικά; Σαρ βακερντάμας πιο πριν, πρώτα πουτς-λες σο πακιάλα. Επίσης, αράκχ σο μπεϊντίνελα. (Παροιμίες 18: 13) Άμα μπεϊντίνελα τι σικλιόλ για την επιστήμη, βάκερ λέσκε παραδείγματα κατά Γραφή σο σικαβένα ότι σο-ντα βακερέλα η Γραφή για την επιστήμη ισί πάντα σωστός. Άμα μπεϊντίνελα ι ιστορία, μπορίνεσα τι βακερές κάτι σο τθερένα-λεν ο βιβλία της ιστορίας ντα τι σικαβές λέσκε ότι ανταβά βακερντάας-λες η Γραφή μπουτ μπρεσά πριν τι αβέλ-πες. Γιαβερά τζενέ μπορεί τι ασουνέν-τουτ άμα κα σικαβές λένγκε κάτι αντράλ κατά  Γραφή σο κα κερέλ πιο λατσσί λένγκι ζωή, σαρ για παράδειγμας εκ συμβουλή σο ισί κι Επί του Όρους Ομιλία.

¹⁶ Ντε-τουτ γκοντί ότι να μανγκάσα τι χας-αμέν ι τζενέντζαρ. Μανγκάσα τι μπεϊντίνεν ο συζητήσεις σο κερένα αμέντζαρ ντα τι σικλιόν κατά Γραφή. Οτθάρ, τι κερές ερωτήσεις με σεβασμός ντα σοράν τι ασουνές με προσοχή. Όταν βακερέσα κο γιαβερά σο πακιάσα, τι αβές ευγενικός σαριλέντζαρ, αλλά πιο μπουτ ι τζενέντζαρ σο ισί πιο μπαρέ τούταρ. Άμα σεβάνεσα ι γιαβερέν, ο γιαβερά-ντα κα σεβάνεν-τουτ. Ντα κα κερέλ λένγκε εντύπωση ότι σκεφτιντάν με προσοχή οντουλά σο πακιάσα παρόλο σο ισινάν τερνό. Όμως, άμα κάποιος απλά μανγκέλα τι χαλ-πες τούσαρ ή τι πρασάλ-τουτ, νανέ ανάγκη τι απαντίνες λέσκε.​—Παροιμίες 26:4.

17, 18. (α) Σο κα βοηθίνελ-τουτ τι κερές πιο ζουρανί τι πίστη κι Γραφή; (β) Καγιά ερώτηση κα ντικχάς κο γιαβέρ μάθημας;

¹⁷ Μπορεί τι τζανάσα ο βασικά πράγματα σο σικλιαρέλα η Γραφή, αλλά πρέπει τι σικλιάς πιο μπουτ πράγματα για τι τθεράς ζουρανί πίστη. Πρέπει τι ρόντας για τι αρακχάς ο πιο βαθιές αλήθειες σο τθερέλα η Γραφή, σαρ τι ρόνταας για γκεραντέ θησαυρούς. (Παροιμίες 2:​3-6) Εκ μπουτ λατσσό τρόπος για τι κερές τι πίστη πιο ζουρανί ισί τι διαβάνες σαρί ι Γραφή. Προσπάθινε τι διαβάνες-λα αντρέ σε εκ μπρες. Ανταβά βοηθιντάς εκχέ επισκοπός τι πλησιάνελ ι Ιεχωβάς κάνα ισινέ τερνό. Βοβ βακερντάς: «Εκ πράγμας σο βοηθιντάς-μαν τι αγαβάβ ότι η Γραφή ισί ο Λάφι ι Ντεβλέσκο ισί ότι διαβαντόμ-λα σαρί. Αζομάν αγαντόμ λατσσές ο Βιβλικές ιστορίες σο σικλιλόμ κάνα ισινόμας χουρντό». Επίσης μπορίνεσα τι χρησιμοποιήνες ο εργαλεία σο τθερέσα τι τσσιμπάτε, για τι ρόντες πράγματα σο κα βοηθίνεν-τουτ τι αγαβές οντουλά σο διαβάνεσα. Ανταλά εργαλεία μπορεί τι αβέν η Σκοπιά ΒΙΒΛΙΟΘΗΚΗ ΚΟ ΙΝΤΕΡΝΕΤ, η Βιβλιοθήκη της Σκοπιάς σε DVD ντα ο Ευρετήριο Εκδόσεων Σκοπιάς ή ο Οδηγός Έρευνας για τους Μάρτυρες του Ιεχωβά.

¹⁸ Νταντάλεν ντα νταγιάλεν, τουμέν μπορίνενα τι σικλιαρέν τουμαρέ τσσαβέν ι Ιεχωβάσκε πιο λατσσές σαριλένταρ. Σαρ κα βοηθίνεν-λεν τι τθερέν ζουρανί πίστη λέστε; Κο γιαβέρ μάθημας κα ντικχάς σαρ μπορίνενα τι κερέν-λες ανταβά.