1, 2. Kakɔna kakoka ɛlɔngɔlɔngɔ wakambɛ Jehowa ndjambola lo tena dimɔtshi, ndo dako diakɔna diasha Bible?

WAKATƐ kadiyɛso kɛmɔtshi ka la Grande-Bretagne oma le osekande la la kalasa ɔnɛ: “Mɛnamaka dia wɛ ekɔ la yimba efula dia monga la mbetawɔ le Nzambi.” Ɔnangɛso ɔmɔtshi la l’Allemagne akafunde ate: “Embetsha ami mbɔsaka ɔkɔndɔ wa lo Bible wendana l’etongelo oko shimu. Ndo vɔ mbɔsaka ambeki wetawɔ wetshelo w’ohilwelo oko anto wambetawɔ dui dia mɛtɛ.” Kadiyɛso kekina k’osekaseka ka la France akate ate: “Embetsha wa lo kalasa yaso mambaka yema dia mbeya ɔnɛ ekɔ ambeki amɔtshi watetemala monga la mbetawɔ lo Bible.”

² Ɛlɔ kɛnɛ, anto efula hawetawɔ ɔnɛ Nzambi mbakatotonge. Naka wɛ ekɔ ɔlɔngɔlɔngɔ wakambɛ Jehowa kana weka akambo wendana la nde, lo tena dimɔtshi wɛ mbeyaka ndjambola woho wakokayɛ nshikikɛ dia nde mbele Otungi aso. Bible tokimanyiyaka dia nkana yimba dimɛna lo dikambo dia kɛnɛ kokaso, kadiaso ndo kakanaso la tɔ yimba. Ɔtɛkɛta wa Nzambi mbutaka ɔnɛ: “Dikoka di’ekanelo ka yimba diayokolamaka.” Lo woho akɔna? Diɔ diayokokimanyiya dia minya tokanyi ta kashi ndo nkeketsha mbetawɔ kayɛ le Jehowa.​—Adia Tokedi 2:10-12.

3. Kakɔna kayangaso nsɛdingola lo sawo nɛ?

 ³ Dia monga la mbetawɔ ka wolo le Jehowa, sho pombaka nsala la wolo dia mbeeya dimɛna. (1 Timɔte 2:4) Ɔnkɔnɛ, etena kadiayɛ Bible ndo ekanda aso, ekɔ ohomba efula memala yema ndo nkana yimba lo kɛnɛ kotami lɔkɔ. Sala la wolo dia nshihodia kɛnɛ kadiayɛ. (Mateo 13:23) Naka wɛ mbeka lo yoho shɔ, wɛ ayoshola tolembetelo efula tɛnya dia Jehowa ekɔ Otungi aso ndo ɔnɛ Bible ndja oma le nde. (Hɛbɛru 11:1) Tayanga nsɛdingola woho wakokaso nsala dui sɔ.

4. Lo yoho yakɔna yele mbetawɔ wetshelo w’ohilwelo fɔnaka la mbetawɔ ɔnɛ diangɔ diakatongama? Ko, ahombaso nsala sho tshɛ?

⁴ Onto ɔmɔtshi mbeyaka kotɛ ɔnɛ: “Dimi mbetawɔka wetshelo w’ohilwelo nɛ dia ambeyi wa siansɛ mbetshaka ɔnɛ vɔ wekɔ mɛtɛ. Ngande wakokayɛ monga la mbetawɔ le Nzambi etena kele ndooko onto lambowɛnaka?” Anto efula wekɔ la kanyi shɔ. Lo mɛtɛ, ndooko onto la l’atei aso lambɛnaka Nzambi kana lakɛnyi woho wakandatongaka ɛngɔ kɛmɔtshi. (Joani 1:18) Ko kayotota lo dikambo di’anto wetawɔ wetshelo w’ohilwelo? Ndo vɔ la wɔ wekɔ la mbetawɔ le ɛngɔ kɛmɔtshi kahawakoke mɛna. Ndooko ombeyi wa siansɛ kana onto okina lakɛnyi ɛngɔ kɛmɔtshi kele la lɔsɛnɔ kambohilɔ ɛngɔ kekina. Ɛnyɛlɔ, ndooko onto lambɛnaka elambalamba kɛmɔtshi kambohilɔ nyama kalɔnya. (Jɔbɔ 38:1, 4) Diakɔ diele, sho tshɛ pombaka nsɛdingola awui asɔ, nkana yimba la yambalo tshɛ lo dikambo diawɔ ndo nshikikɛ kɛnɛ kɛnyawɔ mɛtɛ. Anto efula mendaka diangɔ diakatongama ndo ‘mɛnaka’ ɔnɛ Nzambi ekɔ. Vɔ ‘wekɔ lo mɛna dimɛna’ ɔnɛ nde ekɔ Otungi, nde ekɔ la nkudu k’efula, ndo ɔnɛ nde ekɔ la waonga efula wa diambo.​—Rɔmɔ 1:20.

5. Dihomɔ diakɔna di’eyangelo diakoka tokimanyiya dia mbeka akambo efula wendana l’etongelo?

⁵ Etena kendaso etongelo ndo kakanaso yimba efula dikambo diatɔ, sho koka nshihodia dia ɛngɔ tshɛ kakatongama lo yoho ya diambo. “Oma lo mbetawɔ, sho mɛnaka” dia Otungi ɔmɔtshi ekɔ, oyadi kaanga nde hɛnama. Sho shihodiaka ɔnɛ  nde ekɔ la lonto la dimɛna efula ndo la lomba l’efula. (Hɛbɛru 11:3, 27) Sho koka mbeka awui efula wendana la diangɔ diakandatonge lo mbadiaka awui wakashola ambeyi wa siansɛ. Amɔtshi l’atei awɔ kokaka tanema lo dihomɔ di’eyangelo, ɛnyɛlɔ vidɛo yele l’ɔtɛ a dui ɔnɛ: Les merveilles de la création révèlent la gloire de Dieu, biukubuku La vie a-t-elle été créée? ndo Cinq questions à se poser sur l’origine de la vie, ndo dibuku Y a-t-il un Créateur qui se soucie de vous ? Mbala efula lo Réveillez-vous !, sho tanaka ɛkɔnya w’ambeyi wa siansɛ ndo anto akina walembetshiya lande na kayawɔ la mbetawɔ le Nzambi ɛlɔ kɛnɛ. Ndo asawo wele l’ɔtɛ a dui ɔnɛ: “Hasard ou conception ?” kotshaka elembetshielo ekina wendana la nyama ndo diangɔ dikina diakatongama, mbidja ndo bɛnyɛlɔ diɛnya woho wahemba ambeyi wa siansɛ dia mbokoya woho wele diangɔ sɔ.

6. Ngande wakoka dihomɔ di’eyangelo kokimanyiya?

⁶ Ɔnangɛso ɔmɔtshi lodjashi l’États-Unis lele l’ɛnɔnyi 19 akate lo dikambo dia tobukubuku tohende tɔsɔ ate: “Tobukubuku tɔnɛ tekɔ ohomba efula le mi. Lakeke tobukubuku takɔ mbala oko dikumi la mɔtshi.” Kadiyɛso kɛmɔtshi ka la France akafunde ate: “Asawo wele l’ɔtɛ a dui ɔnɛ: ‘Hasard ou conception ?’ mambiyakami! Vɔ mɛnyaka dia waa ɛjɛniɛrɛ wa tomanamana koka mbokoya, koko hawokoke pondjo nsala diangɔ diɛdimi tshɛ lo tshɛ la diangɔ dia diambo diakatongama.” Ambutshi w’ɔna ɔmɔtshi la womoto lele l’ɛnɔnyi 15 wa l’Afrique du Sud wakate ɔnɛ: “Mbala tshɛ dui dia ntondo diadia ɔnaso la womoto lo Réveillez-vous ! ele sawo diele la ‘ɛkɔnya.’”Ekanda ɛsɔ koka kokimanyiya ndo wɛ dia mɛna tolembetelo tɛnya ɔnɛ Otungi ɔmɔtshi ekɔ ndo wɛ ayonga l’akoka wa mbeya ndo ntona wetshelo wa kashi. Mbetawɔ kayɛ kayonga wolo efula woho wele wɛ ayonga oko otamba wele la edio wohikami etale ndo watshikala nge kaanga la ntondo ka mpɛpɛ ya wolo.​—Jɛrɛmiya 17:5-8.

7. Lande na kalanga Nzambi dia wɛ nkamba la dikoka diayɛ di’ekanelo ka yimba?

⁷ Onde ekɔ kɔlɔ mboka ambola wele oko: ‘Lande na kahombami mbetawɔ kɛnɛ kata Bible?’ Atonga. Jehowa halange wɛ mbetawɔ dui dimɔtshi tsho paka l’ɔtɛ wadietawɔ anto akina. Nde nangaka wɛ nkamba la “akoka a[yɛ] w’ekanelo ka yimba” dia mbeya Bible ndo mbishola tolembetelo tɛnya dia tɔ mɛtɛ ndja oma le nde. Lo yɛdikɔ yatayaleke mbeya kɛnɛ katatɔ, mbayoyoleka monga la mbetawɔ ka wolo lɔkɔ. (Adia Rɔmɔ 12:1, 2; 1 Timɔte 2:4.) Yoho mɔtshi ya mbeya Bible ele mbeka awui amɔtshi shikaa wakombolayɛ ndeka mbeya.

8, 9. a) Awui akɔna walanga anto amɔtshi mbeka? b) Ngande wakakondja anto amɔtshi wahɔ etena kakawakane yimba la kɛnɛ kakawadia?

⁸ Anto amɔtshi nangaka mbeka prɔfɛsiya ya lo Bible. Kana vɔ mbeyaka nkombola mbɛdika ɛkɔndɔ wa lo Bible la kɛnɛ kata ambeyi w’ɛkɔndɔ, ambeyi wa siansɛ, kana anyangi w’emindo. Tɔshi ɛnyɛlɔ ka Etatelo 3:15. Jehowa akasha prɔfɛsiya k’ohomba kɛsɔ yema tshitshɛ l’ɔkɔngɔ wa Adama la Eva mbɔtɔmbɔkwɛ ndo yoho yande ya nɔmbɔla. Tɔ mbele prɔfɛsiya ka ntondo l’atei wa prɔfɛsiya efula ya lo Bible yatokimanyiya dia nshihodia woho wayɛnya Diolelo dia Nzambi ɔnɛ yoho yaki Nzambi ya nɔmbɔla mboleki dimɛna ndo woho wayodiokomiya asui tshɛ. Ngande wakokayɛ mbeka Etatelo 3:15? Wɛ koka nsala listɛ la avɛsa wa lo Bible washa elembetshielo efula wendana la woho wakahombe prɔfɛsiya kɛsɔ kotshama. Laadiko dia laasɔ, wɛ koka nyanga  dia mbeya etena kakafundama avɛsa asɔ ndo mbalɔnga l’ɔnɔngɔ. Aha la ntshimbatshimba, wɛ ayoshihodia ɔnɛ afundji wa Bible asɔ wakasɛnaka lo tena diotshikitanyi, koko onto l’onto akafunde dui dimɔtshi diakimanyiya dia prɔfɛsiya ndeka mbokɛma hwe hwe. Dui sɔ koka kokimanyiya dia nshikikɛ ɔnɛ nyuma k’ekila kaki Jehowa kakawalɔmbɔla.​—2 Petero 1:21.

⁹ Ɔnangɛso ɔmɔtshi la l’Allemagne akakanyiyaka woho wele dibuku tshɛ dia lo Bible diekɔ la awui efula wendana la Diolelo. Nde akate ate: “Ngasɔ mbediɔ kaanga mbele apami oko 40 mbakafunde Bible. Ndo efula ka l’atei awɔ wakasɛnɛ lo tena diotshikitanyi ndo vɔ kombeyanaka lam’asawɔ.” Kadiyɛso kɛmɔtshi ka l’Australie akekaka sawo dimɔtshi dia lo Tshoto y’Etangelo ko nde akeye woho wɔtɔnɛ dambo di’Elekanelo la Etatelo 3:15 la Mɛsiya. ^[1] (Enda nɔtɛ ka la koma.) Nde akafunde ate: “Wekelo ɔsɔ wakandjihola washo dia mbeya woho wele Jehowa onto la diambo. Dia onto monga la kanyi ya kɛnɛ kakandakongɛ dikambo di’ase Isariyɛlɛ dia tɔ ndjokotshama le Yeso, akamambiya mɛtɛ. Dimi memalaka lo yoho ya mɛtɛ mɛtɛ dia nkanyiya woho wele prɔfɛsiya kendana la dambo di’Elekanelo sɔ diambo!” Lande na kakoke kadiyɛso kɛsɔ ngasɔ? Nde akakane yimba efula la kɛnɛ kakandadia ndo akakishihodia. Dui sɔ diakookimanyiya dia nkeketsha mbetawɔ kande ndo diakaleke mbosukanya la Jehowa.​—Mateo 13:23.

10. Ngande wakeketsha losembwe l’afundji wa Bible mbetawɔ kaso lo Bible?

¹⁰ Kanyiya nto lo kɛnɛ kendana la losembwe laki la apami wakafunde Bible. Mbala tshɛ, vɔ wakataka mɛtɛ ndo komboka wɔma wa nsala dui sɔ. Mbala efula lo nshi shɔ, afundji wakafundaka paka awui w’amɛna wendana la wodja ndo ɛnɔmbɔdi awɔ. Koko amvutshi wa Jehowa wakafunde aha tsho awui w’amɛna, koko ndo awui wa kɔlɔ wakasale ase Isariyɛlɛ ndo nkumi ya dikanga yawɔ. (2 Ɛkɔndɔ 16:9, 10; 24:18-22) Vɔ wakashile kaanga munga yawɔ hita ndo y’ekambi ekina waki Nzambi. (2 Samuɛlɛ 12:1-14; Makɔ 14:50) Ɔlɔngɔlɔngɔ ɔmɔtshi wa la Grande-Bretagne akate ate: “Losembwe la ngasɔ haloleke tanema. Dui sɔ fudiaka wɛkamu aso w’ɔnɛ Bible ndja mɛtɛ oma le Jehowa.”

11. Ngande wakoka ɛlɔmbwɛlɔ katanaso lo Bible toshikikɛ ɔnɛ Bible ndja oma le Nzambi?

¹¹ Etena ketawɔ anto dia Bible nɔmbɔla yoho yawɔ ya lɔsɛnɔ, vɔ mɛnaka etombelo w’amɛna wonga la dui sɔ. Dui sɔ mbashikikɛka ɔnɛ Bible ndja oma le Nzambi. (Adia Osambo 19:7-11.) Kadiyɛso kɛmɔtshi k’osekaseka ka la Japon akafunde ate: “Lam’ele nkumbo kami kakakambaka la wetshelo wa lo Bible, taki mɛtɛ l’ɔngɛnɔngɛnɔ. Taki la wɔladi, kaamɛ ndo takokanaka ngandji.” Bible kambokimanyiya anto efula dia mbeya ɔnɛ awui amɔtshi wakawetawɔka komonga mɛtɛ. (Osambo 115:3-8) Tɔ kimanyiyaka anto dia ndjaɛkɛ le Jehowa, ɔnɛ lele Nzambi Kanga-Wolo-Tshɛ ndo tɔ ndakaka nshi yayaye yoleki amɛna. Lo wedi okina, anto amɔtshi wata ɔnɛ Nzambi bu konyaka etongelo oko nzambi kɛmɔtshi. Akina mbutaka dia anto koka mbela nshi yayaye yoleki amɛna, koko etena kendaso kɛnɛ kambowosala l’edja k’ɛnɔnyi, vɔ bu l’akoka wa nkandola ekakatanu wa l’andja ɔnɛ.​—Osambo 146:3, 4.

12, 13. Ngande wakokaso nsawola l’anto akina lo kɛnɛ kendana la etongelo kana Bible?

¹² Etena kasawolayɛ l’anto akina awui wendana la etongelo kana la Bible, ntondotondo yanga dia mbeya kɛnɛ  ketawɔwɔ mɛtɛ. Ohɔ dia anto amɔtshi wetawɔ wetshelo w’ohilwelo mbetawɔka nto dia Nzambi ekɔ. Vɔ mbutaka ɔnɛ nde akakambe la ohilwelo dia ntonga diangɔ tshɛ diele la lɔsɛnɔ. Akina mbetawɔka dia ohilwelo la dia monga dui dia mɛtɛ nɛ dia vɔ dietshaka la kalasa. Ndo akina nto waya bu la mbetawɔ le Nzambi nɛ dia vɔ wambɔkɔmɔ l’ɔtɛ w’awui wɛnawɔ l’ɛtɛmwɛlɔ. Diakɔ diele ntondotondo, mbola onto kɛnɛ ketawɔnde ndo lande na kakietawɔnde. Oma laasɔ hokamɛ la yambalo tshɛ kɛnɛ katande. Naka wɛ nsala ngasɔ, ondo nde ayoleka monga suke dia kohokamɛ.​—Tito 3:2.

¹³ Naka onto ɔmɔtshi ambokotɛ ate wɛ ekɔ enginya dia mbetawɔ ɔnɛ Otungi ɔmɔtshi ekɔ, ngande wakokayɛ mbokadimola? La dilɛmiɛlɔ tshɛ, mbola onto akɔ dia kolembetshiya woho wafɔnyande wakatatɛ lɔsɛnɔ. Wɛ koka mbotɛ ɔnɛ naka lɔsɛnɔ lakahilɔ, kete ɛngɔ ka ntondo kakonge la lɔsɛnɔ kakahombe monga l’akoka wa nsala ɛngɔ kekina kafɔna la tɔ. Diakɔ diele, ombetsha ɔmɔtshi wa Chimie akate ɔnɛ laadiko dia diangɔ dikina, otonga ohomba wa diangɔ nɛ, 1) ɛngɔ kɛmɔtshi kele oko lokoho dia kikokɛka, 2) dikoka dia kondjaka wolo ndo nkamba la wɔ, 3) awui wasɛdingola ɛnamelo ndo wolelo atɔ, ndo 4) dikoka dia nsangola awui akɔ. Nde akakotsha ate: “Woho wele lɔsɛnɔ kaanga l’ɛngɔ koleki tshitshɛ hamanema mfundo ekɔ dui dia diambo efula.”

14. Ekanelo ka wɔdu kakɔna kakoka nkamba la yɛ etena kakɛtshanyayɛ l’onto awui wendana l’etongelo?

¹⁴ Etena kakɛtshanyayɛ l’anto awui wendana l’etongelo, wɛ koka nkamba la ekanelo ka yimba ka wɔdu kakakambe la ɔpɔstɔlɔ Pɔɔlɔ. Nde akafunde ate: “Luudu tshɛ tokamaka oma le onto ɔmɔtshi, koko Otungi wa diangɔ tshɛ ele Nzambi.” (Hɛbɛru 3:4) Luudu la mɛtɛ mɛtɛ kongɛmaka ndo mbikamaka oma le onto ɔmɔtshi. Aha la taamu, diangɔ diasɛna diele wolo nshihodia ndeka luudu, diakahombe kongɛma ndo tongama oma le onto ɔmɔtshi. Wɛ koka nto nkamba la ekanda aso. Kadiyɛso kɛmɔtshi akasawola la ɔlɔngɔlɔngɔ ɔmɔtshi waki kombetawɔka ɔnɛ Nzambi ekɔ. Kadiyɛso akawosha tobukubuku tohende takatashidi la diko ndo suke la lomingu l’ɔkɔngɔ wa laasɔ, ɔlɔngɔlɔngɔ ɔsɔ akate ate: “Kakianɛ dimi lambetawɔ ɔnɛ Nzambi ekɔ.” Ɔlɔngɔlɔngɔ ɔsɔ akatatɛ mbeka Bible ndo l’ɔkɔngɔ diko, nde akayala ɔnangɛso.

15, 16. Ahombaso nsala la ntondo ka nembetshiya onto ɔnɛ Bible ndja oma le Nzambi? Ndo kakɔna kahatahombe mbohɛ mbala tshɛ?

¹⁵ Naka onto ɔmɔtshi ekɔ lo mbidja taamu lo dikambo dia Bible, ngande wakokayɛ nkana la nde yimba? Oko wakataditshi la diko, ntondotondo mbolande kɛnɛ ketawɔnde. Ndo nto, yanga dia mbeya awui akɔna wayashande lɔkɔ. (Tokedi 18:13) Naka nde nangaka awui wa siansɛ, kete shande bɛnyɛlɔ di’oma lo Bible dia mɛnya ɔnɛ kɛnɛ katatɔ lo dikambo di’awui wa siansɛ mongaka mbala tshɛ mɛtɛ. Naka nde nangaka ɛkɔndɔ, wɛ koka nshila dui dimɔtshi diɔkɔndwami lo ɛkɔndɔ wa l’abuku ndo mbɛnya woho wakatatshi Bible lo dikambo diakɔ ɛnɔnyi efula la ntondo ka diɔ salema. Anto akina koka kohokamɛ naka wɛ mbaɛnya dui dimɔtshi dia lo Bible diakoka ndowanya  nsɛnɔ yawɔ, ɛnyɛlɔ alako watanema lo Dako dia lo dikona.

¹⁶ Tatohɛke dia sho hatolange mbidjana l’anto taamu. Sho nangaka dia vɔ ngɛnangɛna nsawola la so ndo mbeka akambo wendana la Bible. Diakɔ diele, okande ambola la dilɛmiɛlɔ tshɛ ndo oma laasɔ hokamɛnde la yambalo tshɛ. Etena kalembetshiyayɛ onto ɔmɔtshi kɛnɛ ketawɔyɛ, onga la loshilambo djekoleko naka wɛ ekɔ lo nsawola la onto lokole. Naka wɛ nɛmiya anto akina, ondo vɔ wayokɔlɛmiya ndo wɛ. Ndo vɔ wayambiyama efula lo menda woho weyɛ la tokanyi t’amɛna tendana la kɛnɛ ketawɔyɛ kaanga mbekeyɛ dikɛnda. Koko, naka onto ɔmɔtshi ekɔ tsho l’oyango wa mbidjana layɛ taamu kana kɔsɔka, hatonga ohomba wɛ mbokadimola.​—Tokedi 26:4.

17, 18. a) Kakɔna kakoka kokimanyiya dia nkeketsha mbetawɔ kayɛ lo Bible? b) Dimbola diakɔna diayotɔsɛdingola lo sawo diayela?

¹⁷ Sho koka mbeya wetshelo woleki ohomba wa lo Bible, koko nɔmbamaka awui efula laadiko dia laasɔ dia monga la mbetawɔ ka wolo le Nzambi. Sho pombaka nsala eyangelo dia mbishola akambo wa mɛtɛ wa lotshimola wele lɔkɔ wate kana tekɔ lo tayange diangɔ di’oshinga wolo dioshɛmi. (Tokedi 2:3-6) Yoho mɔtshi yoleki dimɛna ya nkeketsha mbetawɔ kayɛ ele mbadia Bible k’otondo. Ondo wɛ koka nsala la wolo dia kiadia l’edja ka ɔnɔnyi ɔtɔi. Dui sɔ diakakimanyiya omendji w’otshimbedi ɔmɔtshi dia ndjasukanya la Jehowa etena kakinde ɔlɔngɔlɔngɔ. Nde akate ate: “Dui dimɔtshi diakakimanyiya dia nshihodia ɔnɛ Bible kekɔ Ɔtɛkɛta wa Nzambi ele kiadia oma l’etatelo polo l’ekomelo. Ɛkɔndɔ wa lo Bible wakameke ntatɛ etena kakimi dikɛnda efula wakayonga la kitshimudi le mi.” Ndo nto, nkamba la dihomɔ di’eyangelo diele la yɛ l’ɔtɛkɛta ayɛ dia kokimanyiya dia nshihodia kɛnɛ kadiayɛ. Wɛ kokaka monga la Watchtower Library lo DVD, BIBLIƆTƐKƐ WA L’ƐTƐRNƐTƐ, Index des publications des Témoins de Jéhovah, kana Dibuku di’eyangelo di’Ɛmɛnyi wa Jehowa.

¹⁸ Oleki anto akina tshɛ, ambutshi le, nyu mbakoka mbetsha ananyu akambo wendana la Jehowa. Ko ngande wakokayɛ mbakimanyiya dia monga la mbetawɔ ka wolo le nde? Lo sawo diayela tayɔsɛdingola toho tɔmɔtshi takokayɛ nsala dui sɔ.