Kau Tupulaga, Kotou Fakamalohiʼi Takotou Tui
“Ko te tui . . . ko he fakamooni o te u mea e mole sio ki ai.”—HEPELO 11:1.
KATIKO: 41, 69
1, 2. ʼAki te alu ʼo te temi, kotea te fehuʼi ʼe feala ke fai e he tupulaga? Pea kotea te tokoni ʼe tou maʼu ʼi te Tohi-Tapu?
NEʼE ui fenei e te kiʼi taʼahine ki te kiʼi tuagaʼane ʼi he fale ako ʼi Pilitania: “ ʼE ke ʼatamai. Koia ʼe mole feala ia ke ke tui ʼe ʼi ai he ʼAtua.” Neʼe tohi fenei e te tehina ʼi Siamani: “Ki te manatu ʼa ʼaku faiako, ko te fakamatala ʼae ʼi te Tohi-Tapu ʼo ʼuhiga mo te fakatupu ʼa te ʼAtua ia meʼa fuli, ʼe ko he fagana. Koia ʼe natou ui ai, ʼe tui te kau ako ki te evolisio.” ʼE ui fenei e te kiʼi tuagaʼane ʼi Falani: “ ʼE punamaʼuli te kau faiako ʼo toku fale ako, ʼi tanatou logo ʼae ʼe kei ʼi ai pe te kau ako ʼe natou tui ki te Tohi-Tapu.”
2Tokolahi te hahaʼi ʼe mole natou tui neʼe fakatupu tatou e te ʼAtua. Kapau ko koe ko he tupulaga, peʼe kei ke ako te Tohi-Tapu, ʼe lagi ke feʼekeʼaki pe ʼe ke lava fakamoʼoni feafeaʼi, ko te ʼAtua ʼae neʼe ina Fakatupu ia meʼa fuli. ʼE tokoni mai te Tohi-Tapu ke tou fakakaukauʼi ia te ʼu meʼa ʼae ʼe tou logo ki ai, peʼe ko te ʼu meʼa ʼae ʼe tou lau. ʼE ui fenei ʼi te Tohi-Tapu: “E leoleo anai ia koe e te fakakaukau.” ʼO feafeaʼi? ʼE tokoni atu anai ke ke tekeʼi te ʼu manatu hala pea mo fakamalohiʼi tau tui ʼae kia Sehova.—Lau ia Taaga Lea 2:10-12.
1 Timoteo 2:4) Koia ka kotou lau ia te Tohi-Tapu peʼe ko ʼatatou tohi, ʼe maʼuhiga ke kotou fakakaukauʼi te ʼu manatu ʼae ʼe kotou lolotoga lau. Kotou faigaʼi ke kotou mahino ki ai. (Mateo 13:23) Kapau ʼe kotou fai feia, ʼe lahi te ʼu fakamoʼoni ʼe kotou maʼu anai, ko Sehova ko totatou Tupuʼaga, pea ko te Tohi-Tapu ʼe haʼu mai ia te ia. (Hepeleo 11:1) Tou vakaʼi pe ʼe feafeaʼi hatatou fai te faʼahi ʼaia.
3Kapau ʼe tou loto ke malohi tatatou tui ʼae kia Sehova, ʼe tonu ke tou iloʼi lelei ia ia. (KOTOU FAKAMALOHI TAKOTOU TUI
4. Kotea te kehekehe ʼo te tui ki te evolisio pea mo te tui ki te ʼAtua? Kotea ʼae ʼe tonu kia tatou fuli ke tou kumi?
4 ʼE feala pe ke ui fenei atu e he tahi: “ ʼE au tui ki te evolisio koteʼuhi ʼe ui e te kau popoto ʼe ko te moʼoni ʼaia. ʼE mole feala ke tou tui ki te ʼAtua koteʼuhi ʼe mole tou sisio ki ai.” Ko te manatu ʼaia ʼa te tokolahi. ʼE moʼoni, neʼe mole he tahi kua sio ki te ʼAtua, pe neʼe sio ki tana fakatupu ia he meʼa. (Soane 1:18) Kaʼe ʼe feafeaʼi la kia natou ʼae ʼe tui ki te evolisio? Mo natou la, ʼe natou tui ki he meʼa ʼe mole feala ke natou sisio ki ai. Neʼe mole he tagata poto, peʼe ko he tahi age, neʼe kua sio ki he meʼa maʼuli ʼe fetogi pea ʼaki te temi, kua liliu leva ko he tahi age meʼa. Ohage la, neʼe heʼeki ʼi ai he tahi kua sio ki he gata kua liliu ko he kuli. (Sopo 38:1, 4) Koia ʼe tonu ai ke tou kumi he ʼu fakamoʼoni pea mo fakakaukau fakalelei ki ai. Tokolahi ʼe natou fakatui ʼe ʼi ai te ʼAtua, ʼaki te ʼu meʼa ʼae ʼe natou sisio ki ai ʼi te natula. ʼE natou “sisio mata” ʼe ko ia te Tupuʼaga, pea ʼe natou iloʼi ai ko te ʼAtua ʼe mafimafi pea ʼe lahi ʼona kalitate fakatalakitupua.—Loma 1:20.
5Ka tou sisio ki te natula mo tou fakatokagaʼi fakalelei, pea ʼe tou iloʼi ai neʼe taulekaleka ʼaupito tona faʼu. “Ko te tui ae e tou iloi ai” ʼe ʼi ai te Tupuʼaga, tatau aipe pe ʼe fakapulipuli. ʼE tou mahino ai ki ʼona kalitate taulekaleka mo te maʼoluga ʼo tona poto. (Hepeleo 11:3, 27) Kaʼe ʼe feala ke lahi age tatatou iloʼi te ʼu meʼa ʼae neʼe ina fakatupu, ʼaki tatatou lau ia te ʼu fakamatala ʼae neʼe maʼu e te hahaʼi sivi ʼo te natula. ʼE feala ke tou maʼu ia te ʼu fakamatala ʼaia ʼi te ʼu ʼata viteo Les merveilles de la création révèlent la gloire de Dieu, pea mo te ʼu kaupepa La vie a-t-elle été créée ? pea mo Cinq questions à se poser sur l’origine de la vie, pea mo te tohi Y a-t-il un Créateur qui se soucie de vous ? ʼE tou maʼu ʼi te ʼu Réveillez-vous ! te ʼu fakafehufehuʼi ʼo ni hahaʼi popoto pea mo niʼihi, ʼe natou fakamahino ai pe ʼe kotea te tupuʼaga ʼo tanatou tui ki te ʼAtua ʼi te temi nei. ʼE toe maʼu ai mo te ʼu alatike “Hasard ou conception ?” ʼe fakamahino ai te agaaga ʼo te ʼu manu pea mo te ʼu meʼa ʼo te natula, ʼe faigaʼi e te hahaʼi popoto ke natou faʼifaʼitakiʼi moʼo faʼu ʼaki he ʼu meʼa gaue.
6Neʼe ui fenei e he tehina ʼe taʼu 19, ʼi Amelika, ʼo ʼuhiga mo te ʼu kaupepa ʼaia ʼe lua: “Neʼe ʼaoga moʼoni kia au. Neʼe tuʼa 12 taku akoʼi te ʼu kaupepa ʼaia.” Neʼe tohi fenei e te kiʼi tuagaʼane ʼi Falani: “Ko te ʼu alatike ‘Hasard ou conception ?ʼ neʼe malave ʼosi kia au. Neʼe au mahino ai ʼe feala pe hatatou faigaʼi ke tou faʼifaʼitakiʼi te ʼu meʼa ʼo te natula, kaʼe ʼe mole feala ke tou faʼu he meʼa ʼe tatau mo te natula.” Neʼe ui fenei e te ʼu matuʼā ʼa te kiʼi finemui taʼu 15, ʼi Afelika Saute: “Ko te meʼa pe ʼe ʼuluaki lau e tamā kiʼi taʼahine ʼi te Réveillez-vous ! ko te alatike ʼae ʼe tuʼu ai te ‘Interview’ (Fakafehuʼi).” Ko te ʼu tohi ʼaia ʼe feala ke tokoni kia koutou ke kotou maʼu ai he ʼu fakamoʼoni ʼe ʼi ai te ʼAtua neʼe ina fakatupu ia meʼa fuli. Pea ʼe feala ke kotou iloʼi ai te ʼu akonaki hala pea mo kotou liaki. ʼE malohi anai takotou tui, ohage ko he fuʼu ʼakau kua tauaka loloto, ʼe mole feala ki he matagi lalahi ke ina tokahi.—Selemia 17:5-8.
KOTOU TUI KI TE TOHI-TAPU
7. He koʼe ʼe loto te ʼAtua ke tou fakaʼaogaʼi ʼotatou fealagia fakakaukau?
7 ʼE kovi koa te fai ʼo te fehuʼi ʼaeni: “He koʼe koa ʼe au tui ki te Tohi-Tapu?” Kailoa ia. ʼE mole loto e Sehova ke tou tui ki he meʼa ʼuhi pe heʼe tui ki ai niʼihi. ʼE loto e Sehova ke tou fakaʼaogaʼi ʼotatou fealagia fakakaukau ke feala hatatou mahino ki te Tohi-Tapu. Pea ke tou maʼu ai he ʼu fakamoʼoni ʼe haʼu ia te Tohi-Tapu mai te ʼAtua. Ka lahi anai tatatou mahino ki te Tohi-Tapu pea ʼe tuputupu anai tatatou tui ki ai. (Lau ia Loma 12:1, 2; 1 Timoteo 2:4.) ʼE tonu ke tou akoʼi fakalelei te Tohi-Tapu ke tou mahino lelei ki ai.
8, 9. (1) Kotea te ’u manatu ʼe fia akoʼi e niʼihi? (2) Kotea te fua lelei ʼo tanatou metitasio ki te ʼu meʼa ʼae ʼe natou lau?
8 Ko ʼihi ʼe natou fia ako te ʼu lea fakapolofeta. Peʼe natou fakatatau te ʼu fakamatala Fakatohi-tapu pea mo te ʼu fakamatala ʼa natou ʼae ʼe faihisitolia, peʼe ʼa te hahaʼi popoto, peʼe ʼa te ʼu hahaʼi faifekumi. Ohage la ko te lea fakapolofeta ʼae ʼe tuʼu ia Senesi 3:15. Neʼe foaki ai e Sehova ia te fakakikite maʼuhiga, ʼi te ʼosi pe ʼo te talagataʼa ʼa Atama mo Eva kia te ia pea mo fakafisi ki tana faʼahiga takitaki. Ko te ʼuluaki lea fakapolofeta ʼaia ʼi te Tohi-Tapu, ʼe tokoni mai ke tou iloʼi pe ʼe kotea ʼae ka fai anai e te Puleʼaga ʼo te ʼAtua. ʼE ina fakamoʼoni anai ko te takitaki ʼa te ʼAtua ʼe lelei tokotahi, pea ʼe ina fakagata anai te ʼu mamahi. ʼE feafeaʼi anai takotou mahino kia Senesi 3:15? ʼE feala hakotou fai he lisi ʼo he ʼu vaega Fakatohi-tapu ʼe ina fakamahino ai te fakahoko ʼo te lea fakapolofeta ʼaia. Kotou vakavakaʼi pe neʼe tohi ʼi te temi fea te ʼu vaega ʼaia, pea mo kotou fakaalu tahi ʼo mulimuli ki te temi ʼae neʼe tohi ai. ʼE kotou mahino ai ko natou ʼaia ʼae neʼe natou tohi te Tohi-Tapu, neʼe natou maʼuʼuli ʼi he ʼu temi kehekehe. Kaʼe logo la te faʼahi ʼaia, neʼe natou tohi he ʼu aluʼaga neʼe feala kia tatou ke tou mahino lelei age ki te lea fakapolofeta ʼaia. Ko te ʼu fakamoʼoni ʼaia, ko Sehova totonu ʼae neʼe ina takitaki ia natou ke natou tohi te Tohi-Tapu.—2 Petelo 1:21.
9 Neʼe tokagaʼi e te tehina ʼi Siamani, ʼe maʼu ʼi te ʼu tohi takitahi ʼo te Tohi-Tapu, he ʼu manatu ʼo ʼuhiga mo te Puleʼaga. ʼE ina ui fenei: “Tatau aipe pe neʼe ko te toko 40 tagata ʼae neʼe natou tohi te Tohi-Tapu, kaʼe tokolahi ia natou neʼe natou maʼuʼuli ʼi he ʼu temi kehekehe, pea neʼe mole natou feʼiloʼiʼaki.” Ko he tuagaʼane ʼi ʼOsitalalia, ʼi tana akoʼi te alatike ʼo Te Tule Leʼo, neʼe mahino ai ki te pikipikiga ʼo te Pasikate mo te vaega ʼo Senesi 3:15 pea mo te Mesia. [1] (Vakaʼi te nota ʼi te fakaʼosi ʼo te alatike.) Neʼe ina tohi fenei: “ ʼAki taku ako, neʼe au mahino ai ki te manavaʼofa ʼo Sehova. Neʼe au punamaʼuli ʼi taku iloʼi ʼae ko te fakatuʼutuʼu ʼaia ʼo ʼuhiga mo te kau Iselaele neʼe fakahoko ʼaki ia Sesu. Neʼe au fakakaukauʼi ai leva te maʼuhiga ʼo te taumafa ʼo te Pasikate.” He koʼe neʼe manatu feia te tuagaʼane? Neʼe loloto tana metitasio ki te faʼahi ʼaia pea neʼe mahino ai. Ko te faʼahi ʼaia neʼe ina fakamalohiʼi ai tana tui pea neʼe fakaovi ai kia Sehova.—Mateo 13:23.
10. Kotea ʼae ina toe fakamalohiʼi tatatou tui ʼo ʼuhiga mo te Tohi-Tapu?
10 Kotou fakakaukauʼi age muʼa te agafakahagatonu ʼa natou ʼae neʼe natou tohi ia te Tohi-Tapu. Neʼe mole natou tuʼania ʼi te fakaha tuʼumaʼu ia te moʼoni. ʼI te ʼu temi ʼaia, ko natou ʼae ʼe natou tohi te hisitolia ʼo he puleʼaga, ʼe natou fakamatala pe te ʼu aluʼaga lelei ʼae neʼe hoko ʼo ʼuhiga mo tonatou puleʼaga pea mo ʼonatou takitaki. Kaʼe ko te ʼu polofeta ʼa Sehova, neʼe mole natou tohi pe te ʼu aluʼaga lelei ʼae neʼe fai e te kau Iselaele pea mo ʼonatou hau, kaʼe neʼe natou toe fakamatala mo te ʼu aga kovi ʼae neʼe natou fai. (2 Koloniko 16:9, 10; 24:18-22) Neʼe natou toe fakamatala mo te ʼu lakahala neʼe natou fai ʼe natou totonu, ʼo feia mo ʼihi atu ʼu kaugana ʼa te ʼAtua. (2 Samuele 12:1-14; Maleko 14:50) Neʼe ui fenei e te tehina tupulaga ʼi Pilitania: “ ʼE tahitahiga te maʼu he ʼu hahaʼi ʼe agafakahagatonu feia. Koia ʼe au falala ai ko te Tohi-Tapu ʼe haʼu moʼoni mai ia Sehova.”
11. He koʼe ʼe tou tui papau ko te Tohi-Tapu ʼe haʼu moʼoni mai te ʼAtua?
11 Ka mulimuli te hahaʼi ki te ʼu tokoni ʼa te Tohi-Tapu, ʼe fua lelei ki ʼonatou maʼuli. ʼE natou tui ai ko te Tohi-Tapu ʼe haʼu mai te ʼAtua. (Lau ia Pesalemo 19:8-12.) Neʼe tohi fenei e te tuagaʼane ʼi Saponia: “Ka maʼuliʼi e toku famili ia te ʼu moʼoni Fakatohi-tapu, ʼe matou logoʼi te fiafia moʼoni, mo te tokalelei, mo te logo tahi pea mo te ʼofa.” ʼAki te Tohi-Tapu, ʼe mahino ai e te hahaʼi, ko te ʼu akonaki ʼae neʼe natou tui ki ai ʼi muʼa atu, ʼe mole moʼoni. (Pesalemo 115:3-8) ʼE tokoni te Tohi-Tapu ki te hahaʼi ke natou falala ki te ʼAtua mafimafi, pea mo ʼana fakapapau taulekaleka ʼo ʼuhiga mo te ka haʼu. Pea tahi, ko ʼihi ia natou ʼae ʼe natou ui ʼe mole he ʼAtua, ʼe natou tauhi ki te natula. Ko ʼihi ʼe natou ui, ʼe feala pe ki te tagata ke ina foaki mai he ka haʼu ʼe lelei. Kaʼe ka tou tokagaʼi te ʼu gaue ʼae ʼe natou fai, ʼe tou mahino ai ʼe mole natou lava fakatokatoka te ʼu fihifihia ʼo te malamanei.—Pesalemo 146:3, 4.
KOTOU FAKAMAHINO KI NIʼIHI
12, 13. ʼE feafeaʼi hatatou palalau ki he tahi o ʼuhiga mo te fakatupu pea mo te Tohi-Tapu?
12 Ka kotou faipalalau mo he tahi ʼo ʼuhiga Tito 3:2.
mo te Tohi-Tapu peʼe ko te ʼu meʼa ʼae neʼe fakatupu, ʼe lelei ke kotou faigaʼi muʼa ke kotou iloʼi pe ʼe kotea ʼae ʼe tui ki ai. Kotou manatuʼi, ko he tahi ʼe tui ki te evolisio, ʼe toe tui pe ʼe ʼi ai te ʼAtua. ʼE natou ui neʼe fakaʼaogaʼi e te ʼAtua ia te evolisio moʼo fakatupu ia te ʼu meʼa maʼuli fuli. Ko ʼihi ʼe natou tui, ko te evolisio ʼe moʼoni koteʼuhi ʼe akoʼi ʼi te ʼu fale ako. Pea ko ʼihi ʼe mole kei natou tui ki te ʼAtua ʼuhi ko te ʼu agakovi ʼae ʼe fai ʼi te ʼu lotu. Koia, kotou ʼuluaki fehuʼi muʼa kia ia pe ʼe kotea ʼae ʼe tui ki ai pea he koʼe ʼe manatu feia. Kotou fakalogo lelei ki ʼana palalau. Kapau ʼe kotou fai feia, pea ʼe fia fakalogo anai kia ʼakotou fakamahino.—ʼAki he agafakaʼapaʼapa, kotou fehuʼi age ki te hahaʼi pe kotea ʼae ʼe natou tui ki ai, pea mo kotou fakalogo lelei ki ʼanatou palalau
13 Kapau ʼe ui fenei atu e he tahi: “Ko he tahi ʼe tui ʼe ʼi ai he Tupuʼaga, ʼe ko he tahi ʼe mole fakapotopoto.” Kotea anai takotou tali ki ai? Kotou kole age ki ai, ʼaki he agafakaʼapaʼapa, ke ina fakamahino atu pe neʼe haʼu feafeaʼi ia te maʼuli. ʼE feala leva ke kotou ui age, kapau ʼe moʼoni te evolisio, pea ko te ʼuluaki meʼa maʼuli neʼe maʼua ke ina fakatupu he tahi ’u meʼa maʼuli ʼe tatau mo ia. Kaʼe neʼe ui fenei e te tagata poto: Kapau ʼe moʼoni te evolisio, pea neʼe ʼi ai te ’u faʼahi neʼe maʼua ke maʼu e te ʼuluaki meʼa maʼuli. Ohage la, (1) neʼe tonu ke ʼi ai tona kili moʼona puipui, (2) ke ina maʼu he malohi moʼo taupau tona maʼuli, (3) ke ina lava puleʼi tona agaaga pea mo tona tuputupu, pea (4) ke maʼu e te ʼu meʼa maʼuli ʼae neʼe tupu mai ia ia te fealagia ʼae ke natou mulimuli ki tona agaaga faʼu. Pea neʼe ina ui fenei: “Neʼe mole feala ke hoko ia te aluʼaga ʼaia.”
14. Kotea te manatu ʼe feala ke tou fakaʼaogaʼi moka tou palalau ʼo ʼuhiga mo te fakatupu?
14 Ka kotou palalau ʼo ʼuhiga mo te fakatupu, ʼe feala ke kotou fakaʼaogaʼi te manatu ʼa te apositolo ko Paulo. Neʼe ina tohi fenei: “Koteuhi nee fau te u fale fuli e he tahi, kae ko ae nee ina fau te u mea fuli ko te Atua.” (Hepeleo 3:4) ʼE moʼoni, ko he ʼapi neʼe faʼu e he tahi. Kaʼe ʼe faigataʼa age te faʼu ʼo he meʼa maʼuli, ʼi te faʼu ʼae ʼo he ʼapi. Koia neʼe maʼua ai ke ʼi ai he tahi ke ina fakatupu te ʼu meʼa maʼuli fuli. ʼE toe feala pe ke kotou fakaʼaogaʼi ʼatatou tohi. Neʼe ʼi ai te kiʼi tuagaʼane neʼe faipalalau mo te tama neʼe mole tui ʼe ʼi ai he ʼAtua. Neʼe ina fakatoʼo age ki ai ʼatatou kaupepa ʼe lua. Hili ki ai vahaʼa katoa, neʼe ui fenei e te tama: “ ʼI te temi ʼaeni, kua au tui leva ki te ʼAtua.” Neʼe kamata ako leva te tama te Tohi-Tapu pea neʼe liliu leva ki ʼamuli ko totatou tehina.
15, 16. Kotea ʼe tonu ke tou fai ʼi muʼa ʼo hatatou fakamahino ko te Tohi-Tapu ʼe haʼu mai te ʼAtua? Kotea ʼe tonu ke tou manatuʼi tuʼumaʼu?
15 Kapau ʼe lotolotolua he tahi ʼo ʼuhiga mo te Tohi-Tapu, kotea la te ʼu fakamahino ʼe feala ke kotou fai age ki ai? Ohage pe ko tatatou ui ʼi muʼa atu, ʼe tonu muʼa ke tou fehuʼi age ki ai pe koʼe ʼe manatu feia. Pea, tou faigaʼi ke tou iloʼi pe kotea te manatu ʼe ina leleiʼia. (Taaga Lea 18:13) Kapau ʼe ina leleiʼia te sienesia, ʼe feala ke kotou fakaha age he ʼu vaega ʼi te Tohi-Tapu ʼe palalau ai ki he ʼu aluʼaga ʼe fakamoʼoni ki ai te sienesia. Kapau ʼe ina leleiʼia te hisitolia, ʼe feala ke kotou fakaha age ki ai he ʼu aluʼaga ʼe fakamatala ʼi te ʼu tohi hisitolia, pea mo fakamahino age ki ai neʼe kua tala fakatomuʼa ʼi te Tohi-Tapu te ʼu aluʼaga ʼaia, ʼi muʼa ʼo tona hoko. Ko ʼihi hahaʼi ʼe natou fakalogo atu anai mo kapau ʼe kotou fakaha age he ʼu tokoni ʼi te Tohi-Tapu ʼe ʼaoga ki tonatou maʼuli. ʼE feala ai ke kotou fakaha age te ʼu tokoni ʼa Sesu ʼe tou maʼu ʼi te Akonaki ʼi Te Moʼuga.
16 Kotou manatuʼi, ʼe mole tonu ke tou fihi mo te hahaʼi. ʼE tou fia faipalalau mo natou ʼi te fiafia pea mo fakamahino kia natou te Tohi-Tapu. Koia kotou agafakaʼapaʼapa moka kotou fai he ʼu fehuʼi. Kotou fakalogo lelei ki ʼanatou palalau. Pea ka kotou palalau o ʼuhiga mo takotou tui ki he tahi, kotou agafakapoipoi, tafitō la mo kapau ko he tahi kua fotufotuʼa. Kapau ʼe kotou fakaʼapaʼapa ki te hahaʼi, ʼe natou fakaʼapaʼapaʼi anai koutou. ʼE malave anai kia natou takotou tui, logo la ʼe kei kotou tupulaga. ʼE moʼoni, kapau ʼe haʼu he tahi ʼo fakafihiʼi koutou peʼe ina vaʼi koutou, ʼe mole ʼaoga ke kotou tali age ki ai.—Taaga Lea 26:4.
KOTOU KUMI TE ʼU MOʼONI FAKATOHI-TAPU
17, 18. (1) Kotea ʼae ka tokoni atu ke kotou fakamalohiʼi takotou tui ki te Tohi-Tapu? (2) Kotea te fehuʼi ʼae ka tou vakaʼi anai ʼi te alatike ka hoa mai?
17 ʼE lagi kua kotou mahino ki te ʼu akonaki tafitō ʼo te Tohi-Tapu. Kaʼe ʼe toe ʼaoga ke fakamalohiʼi takotou tui. ʼE tonu ke kotou fai he ʼu fekumi loloto ʼi te Tohi-Tapu, ohage ko hakotou kumi ia he ʼu koloa ʼe fufu. (Taaga Lea 2:3-6) Kapau ʼe tou fia fakamalohiʼi tatatou tui, ʼe tonu ke tou lau fuli ia te Tohi-Tapu. ʼE feala pe hakotou ʼahiʼahi lau lolotoga te taʼu katoa. Ko te aluʼaga ʼaia neʼe tokoni ki te taupau ʼo te siliko ke fakaovi ai ki te ʼAtua ʼi tana kei tupulaga. ʼE ina ui fenei: “Ko te faʼahi ʼae neʼe tokoni mai ke au mahino ko te Tohi-Tapu ʼe ko te Folafola ʼa Te ʼAtua, neʼe ko taku lau katoa te Tohi-Tapu. Ko te ʼu hisitolia ʼo te Tohi-Tapu ʼae neʼe au lau ʼi taku kei tupulaga neʼe malave ʼosi kia au.” ʼE toe feala pe ke kotou fakaʼaogaʼi te ʼu meʼa gaue ʼae ʼe maʼu ʼi takotou lea, ke feala ai hakotou mahino ki te meʼa ʼae ʼe kotou lau. Ohage la ko te CD-ROM Watchtower Library, peʼe ko te TANAKIʼAGA TOHI ʼI TE NETI Watchtower, Kumiʼaga Tohi peʼe ko te Index des publications des Témoins de Jéhovah.
18 ʼU matuʼa, ko tokotou maʼua te akoʼi ʼakotou fanau ke natou iloʼi ia Sehova. ʼE feafeaʼi hakotou tokoni kia natou ke natou maʼu he tui ʼe malohi kia Sehova? ʼE tou vakaʼi anai ʼi te alatike ʼae ka hoa mai.
^ [1] (palakalafe 9) Ko Te Tule Leʼo, ʼaho 15 ʼo Tesepeli 2013.