1. ?Yumi harem olsem wanem long bilif blong yumi?

I NO olgeta man evriwan we oli gat bilif. (2 Tesalonaeka 3:2) Jehova i givim bilif long olgeta we oli wosipim hem. (Rom 12:3; Galesia 5:22, NW) !Yumi glad tumas se Jehova i givim bilif long yumi!

2, 3. (1) ?Wanem ol blesing we yumi kasem taem yumi gat bilif? (2) ?Long stadi ya, bambae yumi tokbaot wanem?

² Jehova i givim Pikinini blong hem, nao hem i save fogivim sin blong ol man we oli bilif long Pikinini ya. Nao oli save kam fren blong Jehova mo kasem laef we i no save finis. (Jon 6:44, 65; Rom 6:23) !Tru ya, Jehova i kaen tumas! Nating se yumi sinman we i stret nomo blong yumi ded, be Jehova i luk se yumi save mekem sam gudfala samting. (Ol Sam 103:10) Hem i givhan long yumi blong yumi kasemsave long gud nius blong Jisas mo sakrefaes blong hem. Taem yumi stat blong bilif long Jisas mo folem hem, yumi putum tingting blong yumi i stap strong long laef we i no save finis.​—Ridim 1 Jon 4:9, 10.

³ ?Wanem narafala samting we yumi save lanem long saed blong bilif? Maet yumi save long ol samting we God i mekem  finis blong givhan long yumi, mo ol samting we bambae hem i mekem long fiuja. ?Be hemia i min se yumi gat bilif? Bambae yumi luk sam narafala samting we yumi mas mekem.

4. ?Bilif i pusum yumi blong mekem wanem?

⁴ Taem yumi gat bilif long Jehova mo Jisas, hemia i no min se yumi save nomo long samting we tufala i mekem finis, mo samting we bambae tufala i mekem yet. Antap long ol save ya, yumi wantem tumas blong folem ol tijing blong tufala long laef blong yumi. Mo yumi wantem givhan long ol narafala, blong olgeta tu oli save ol samting ya. Aposol Pol i talem se: “Sipos yu talemaot we Jisas i . . . Masta blong yu, mo yu bilif long hat blong yu we God i mekem hem i laef bakegen, God bambae i sevem yu. Taem yumi bilif long hem long hat blong yumi, God i mekem yumi kam stret man long fes blong hem, mo taem yumi talemaot tok ya, God i sevem yumi.”​—Rom 10:9, 10; 2 Korin 4:13.

5. ?From wanem bilif i impoten? ?Be yumi mas mekem wanem? Yu talem wan pijatok.

⁵ I klia se, sipos yumi wantem kasem laef we i no save finis long niufala wol, yumi mas gat bilif, mo yumi mas mekem bilif ya i stap strong oltaem. Bilif i olsem kakae we yumi planem long garen. Sipos yumi wantem se kakae ya i gru gud, ?yumi mas mekem wanem? Yumi mas putum wota long hem, sipos no, bambae hem i ded. Long sem fasin, yumi mas meksua se bilif blong yumi i “stret gud” mo i “stap kam strong moa.”​—Taetas 2:2; 2 Tesalonaeka 1:3; Luk 22:32; Hibrus 3:12.

6. ?Hibrus 11:1 i talem wanem tufala samting blong eksplenem bilif?

⁶ Hibrus 11:1 ^[1] i eksplenem se bilif i olsem wanem. (Ridim—Yu luk ol not long pej 25.) (1) Man we i gat bilif “hem i sua se olgeta samting we hem i stap putum tingting blong hem i strong long olgeta, bambae oli mas kamtru.” Sam long ol samting ya, hemia ol promes blong God long fiuja. Taswe yumi sua se ol rabis fasin bambae oli finis mo niufala wol bambae i kamtru. (2) Man we i gat bilif i save se “i gat pruf i stap” blong soemaot se “ol samting ya oli tru, nating we hem i no save luk olgeta.” Yumi save se Jehova God, Jisas Kraes, ol enjel, mo Kingdom, oli stap long heven, nating se yumi no luk olgeta. (Hibrus 11:3) ?Yumi soemaot olsem wanem se yumi bilif long ol promes blong God mo ol samting we yumi no save luk? Yumi soemaot long fasin blong laef blong yumi, ol toktok blong yumi, mo long ol samting we yumi mekem.

7. ?Noa i soemaot bilif olsem wanem? ?Eksampol blong hem i givhan long yumi olsem wanem? (Yu luk pija long stat blong stadi.)

⁷ ?Eksampol blong Noa i tijim yumi long wanem samting? Aposol Pol i talem se: “God i talemaot ol samting ya long hem fastaem, we i no gat man i luk yet. Taswe hem i obei long God, nao i wokem wan bigfala sip blong sevem olgeta famle blong hem.” (Hibrus 11:7) Noa i bilif long samting we Jehova i talem, taswe hem i wokem bigfala mama blong sip ya. Ating ol man raonabaot oli askem long hem from wanem hem i wokem sip ya. Yumi save se Noa i no fraet blong toktok, from we Baebol i talem se, hem i “wan prija we i stap talemaot stret fasin.” (2 Pita 2:5) Hem i givim woning se God bambae i mekem bigfala  wota i ron blong spolem ol rabis man. Ating hem i talem sem tok we Jehova i talem long hem, se: “Bambae mi spolem wol ya wetem olgeta man ya evriwan, from we olbaot long evri ples, ol man ya oli stap faet.” Mo: “Bambae mi mi mekem bigfala wota i kam long wol ya blong draonem olgeta samting ya we i laef . . . Olgeta samting long wol ya bambae oli ded evriwan.” Mo tu, Noa i talem long ol man wanem we oli mas mekem blong stap laef. Ating hem i talem sem tok we Jehova i talem long hem, se: “Yufala evriwan i mas go insaed long sip ya.”​—Jenesis 6:13, 17, 18.

8. ?Jemes i talem wanem long saed blong bilif?

⁸ Leta blong Jemes tu i tokbaot bilif. Ating hem i raetem leta ya smoltaem afta we aposol Pol i raetem buk blong Hibrus. Jemes i talem se: “Yu traem soemaot long mi olsem wanem nao yu yu bilif long God, we yu no mekem ol gudfala wok. Mo mi bambae mi soemaot long yu we mi mi bilif long God, long ol gudfala wok we mi stap mekem.” (Jemes 2:18) Jemes i soemaot se i no naf blong bilif nomo. Ol rabis enjel tu oli bilif se God i stap, be oli no mekem samting we Jehova i wantem. Oli mekem evri samting blong agensem hem. (Jemes 2:19, 20) Be man we i gat bilif, hem i mekem ol gudfala wok we God i glad long olgeta. Hemia nao samting we Ebraham i mekem. Jemes i talem se: “God i mekem hem i stret man long fes blong hem from we hem i tekem pikinini blong hem Aesak, i putum hem long olta blong givim i go long God. Yu luk. Ebraham i bilif long God mo i mekem ol samting we God i talem long hem, mo from samting ya, bilif blong hem i kam stret gud olgeta.” Nao Jemes i makem gud se man we i bilif be i no mekem gudfala wok, bilif blong hem i blong nating nomo. Hem i talem se: “Bodi we i no gat win blong hem, hem i ded. Mo long sem fasin, man we i bilif be i no mekem gudfala wok, bilif blong hem tu i ded.”​—Jemes 2:21-23, 26.

9, 10. ?Sipos yumi rili bilif long Jisas, bambae yumi mekem wanem?

⁹ Bitim 30 yia afta long taem ya, Jon i raetem wan buk blong Baebol wetem 3 leta. Olsem ol narafala man blong raetem Baebol, Jon i kasemsave se bilif i olsem wanem. Plante taem, hem i yusum wan Grik tok we i soemaot aksen, mo long sam Baebol oli tanem tok ya se “mekem bilif i wok.”

¹⁰ Wan vas we i yusum Grik tok ya, i talem se: “Man we i bilif long Pikinini ya blong God, hem i gat laef ya we i no save finis. Be man we i no save obei long Pikinini ya, hem bambae i no save luk laef ya samtaem.” (Jon 3:36) Man we i rili bilif long Jisas, i obei long hem. Plante taem Jon i yusum Grik tok ya we i min se “mekem bilif i wok” long ol buk blong hem.​—Jon 3:16; 6:29, 40; 11:25, 26; 14:1, 12.

11. ?Yumi soemaot olsem wanem se yumi glad long trutok we Jehova i givim?

¹¹ Jehova i yusum tabu spirit blong givhan long yumi, nao yumi kasemsave long trutok long saed blong hem mo Pikinini blong hem, mo yumi bilif long tufala. (Ridim Luk 10:21.) ?Yumi soemaot olsem wanem se yumi glad long samting ya we Jehova i mekem long yumi? Oltaem yumi talem tangkiu long hem, from we hem i  yusum Jisas we “i stamba blong bilif blong yumi,” blong mekem rod blong yumi save fren gud wetem hem. (Hibrus 12:2) Mo tu, yumi prea oltaem mo stadi long Tok blong God, blong mekem bilif blong yumi i kam strong moa.​—Efesas 6:18; 1 Pita 2:2.

12. ?Sipos yumi gat bilif, bambae yumi mekem wanem?

¹² Yumi mas gohed nomo blong mekem ol wok we i soemaot strong bilif long ol promes blong Jehova. Taswe yumi gohed blong talemaot Kingdom blong God long ol man, mo blong givhan long olgeta blong oli kam man blong Jisas. Mo tu, yumi gohed blong “mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi.” (Galesia 6:10) Mo yumi wok had blong ‘sakemaot olfala laef ya wetem ol fasin blong hem,’ from we yumi wantem fren gud wetem Jehova.​—Kolosi 3:5, 8-10.

13. ?Bilif i impoten olsem wanem? ?From wanem Baebol i talem se bilif i wan long ol fas samting we Kristin i mas lanem?

¹³ Baebol i talem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6) Baebol i talem tu se “bilif” i wan samting we ol tru Kristin oli mas “lanem fastaem.” (Hibrus 6:1) Be i gat sam narafala impoten fasin tu we yumi nidim, blong yumi save fren gud wetem Jehova mo gohed long rod ya.​—Ridim 2 Pita 1:5-7; Jud 20, 21.

14, 15. ?From wanem yumi nidim lav be i no bilif nomo?

¹⁴ Ol man we oli raetem Baebol oli tokbaot bilif moa i bitim ol narafala fasin. ?Hemia i min se bilif i moa impoten?

¹⁵ Pol i skelem bilif wetem lav, i se: “Sipos mi bilif strong long God we i naf blong mi save seftem ol bigbigfala hil, be mi no lavem man, bambae mi olsem nating nomo.” (1 Korin 13:2) Jisas i talem se ‘loa we i hae moa,’ hemia se yumi lavem God. (Matiu 22:35-40) Sipos yumi gat lav, i isi moa blong yumi gat ol narafala fasin we oli mekem God i glad. Baebol i talem se man we i gat lav, “hem i stap bilif strong long God.” Yes, lav i givhan long yumi blong yumi bilif  long evri samting we God i talem long Baebol.​—1 Korin 13:4, 7.

16, 17. ?Baebol i talem wanem long bilif mo lav? ?Weswan long tufala fasin ya i nambawan, mo from wanem?

¹⁶ Bilif mo lav tufala tugeta i impoten, mo plante taem ol man blong raetem Baebol oli tokbaot tufala wantaem. Pol i talem long ol Kristin blong “holem fasin blong bilif mo blong lavem narafala man.” (1 Tesalonaeka 5:8) Pita i talem se: “Nating we yufala i no luk Jisas Kraes samtaem, be yufala i lavem hem. Yufala i no luk hem naoia, be yufala i stap bilif long hem.” (1 Pita 1:8) Jemes i talem se: “God i jusumaot olgeta we ol man oli luk se oli puaman, blong mekem olgeta oli kam rijman long fasin blong bilif. Mo hem i givim raet long olgeta blong bambae oli go insaed long niufala wol ya we hem i king long hem, olsem we hem i promes finis long ol man we oli lavem hem.” (Jemes 2:5) Jon i tokbaot samting we God i wantem se: “Yumi mas bilif long Pikinini blong hem Jisas Kraes, mo yumi mas lavlavem yumi olsem we Kraes i talem long yumi finis.”​—1 Jon 3:23.

¹⁷ Be Pol i raetem se: “Naoia i gat trifala fasin ya i stap. Man i stap bilif long God, mo man i stap putum tingting blong hem i stap strong long hem, mo man i stap lavem hem mo i stap lavem ol man. Be nambawan long trifala fasin ya, hemia we oltaem, man i stap lavem God mo i stap lavem ol man.” (1 Korin 13:13) I tru se bilif i impoten, be long fiuja, bambae yumi no moa nidim blong bilif long ol promes blong God long niufala wol, from we ol promes ya oli kamtru finis. Be bambae yumi nidim lav olwe, from we yumi mas gohed blong lavem God mo ol man blong hem gogo i no save finis.

18, 19. ?Wanem i kamaot tede from we ol man blong God oli gat bilif? ?Mo yumi presem hu from?

¹⁸ Ol man blong Jehova tede oli bilif long Kingdom blong God mo oli sapotem. Olgeta oli lavlavem olgeta from we oli letem spirit blong God i lidim laef blong olgeta. (Galesia 5:22, 23) ?Wanem i kamaot from? I gat bitim 8 milian brata mo sista long fulwol, we oli joen gud mo oli gat pis long ol kongregesen blong olgeta. I klia se bilif mo lav i gat paoa.

¹⁹ God nomo i mekem se ol man blong hem oli save joen gud. Yumi presem hem from. (Aesea 55:13) Yumi glad tumas we hem i mekem rod blong ‘sevem yumi, from we yumi bilif.’ (Efesas 2:8) Jehova bambae i givhan long plante moa man yet, blong oli bilif long hem. !Nao long fiuja, wol ya bambae i fulap long ol man we oli stret gud, oli glad, mo oli presem Jehova gogo i no save finis!