1. Hi nga txani aku Jehovha a nga hi ninga likholo?

HI NGA votshe vathu va ku ni likholo. (2 Vatesalonika 3:2) Kambe Jehovha a ninga likholo votshe ava va mu khozelako. (Varoma 12:3; Vagalatiya 5:22) Ngu ditshuri ha mu bonga Jehovha ngu ku hi ninga likholo!

2, 3. a) Hi vhuneka ngu txani hi txi va ni likholo? b) Ngu sihi siwotiso asi hi no bhula ngu sona?

² Jehovha a ningete ngu mwanana wakwe wo randeka kasiku awu a ku ni likholo kwakwe e divalelwa siwonho sakwe. Atiya ti maha ti koteka ti to hi va vangana va Jehovha ni kuhanya kala kupinduka. (Johane 6:44, 65; Varoma 6:23) Ngu ditshuri Jehovha mbwa mnene ngutu. Hambiku athu hi ku vawonhi futhi hi dhevhako kufa, Jehovha wa ti wona ti to athu hi nga sikota kumaha ta tinene. (Masalmu 103:10) Ene Jehovha a hi vhunile ti to hi mana mahungu a manene, ni kugonda ngu Jesu ni mterulo. Se mbimo yi hi nga khata ku va ni likholo ka Jesu ni ku mu londisela, hi khatile kuemela wutomi wo mbi guma.—Lera 1 Johane 4:9, 10.

 ³ Kambe ngu tihi timwane ati hi nga ti gondako ngu likholo? Ngako hi txi ziva ati Jehovha a hi mahelako ni ti a no ti maha, ina eto ti womba ti to hi ni likholo? He woni ati hi felako ku ti maha.

4. Hi nga tsakela kumaha txani ngako hi di ni likholo?

⁴ Hi nga ti to u txa nga ziva ati Jehovha ni Jesu va nga hi mahela ni ti va no hi mahela se u ni likholo. Hi tsakela kuhanyisa ati vona va nga hi gondisa ti to hi hanyisa tona. Ni ku athu hi tsakela kuvhuna vamwane ti to ve ziva Jehovha ni Jesu. Mpostoli Paulo a ti khene: “Ngako u txi fakaza ngu txisofu ti to Jesu i Mkoma, u txi tumela kambe mbiluni kwako ti to Txizimu txi m’wusile ngu ka va vo fa, u na hanyiswa. Nguko m’thu a kholwa ngu mbilu kasiku e mana wululami, kambe a fakaza ngu txisofu, kasiku e mana kuhanyiswa.”—Varoma 10:9, 10; 2 Vakorinto 4:13.

5. Ngu ku txani likholo i di da lisima? Ningela txikombiso txa ti to ngu ku txani ti di ni lisima ku va ni likholo lo tsana.

⁵ Ti ha kubasani, ti to kasiku hi mana wutomi wo mbi guma ka mafu a maphya a Txizimu kulaveka likholo ni ku tshumela hi litsanisa. Lona li fana ni mndonga. Ti to mndonga wu tsakisa wu tshumela wu kula ti lava hi theletela mati. Kambe hi si mahi eto, wona wu nga wuna se wu fa. Ngu ha ku fanako, ti lava hi tsaniseka ti to likholo lathu li ‘tsani’ ni ku “la kula”.—Titosi 2:2; 2 Vatesalonika 1:3; Luka 22:32; Vahebheru 3:12.

6. Ngu tihi tinzila timbidi ati dibhuku da Vahebheru 11:1 di txhamuselako likholo ngu tona?

⁶ Dibhuku da Vahebheru 11:1, di txhamusela ti to nji txani likholo. (Di lere.) 1) Likholo “njitsaniso txa kumana simaha si hi si rinzelako”. Simaha si hi si rinzelako si pata sithembiso sa Txizimu sa mbimo yi yi tako. Ngu txikombiso, ha tsaniseka ti to wubihi wu na guma ni ti to ku na va ni mafu a maphya. 2) Likholo “njikombiso”, mwendo txitsanisekiso atxi txi kholwisako “txa sile hi si si woniko”. Ha ti ziva ti to nzumani ku ni Jehovha, Jesu, tingelozi ni Mfumo, hambiku hi si mahiko ngu ku va wona ngu maso. (Vahebheru 11:3) Hi nga ti kombisisa ku txani ti to hi ni likholo ka sithembiso sa Txizimu ni ka silo asi hi si si woniko? Hi nga ti kombisa ngu mahanyelo athu, ati hi ti wombako ni ti hi ti mahako.

7. Txikombiso txa Nowa txi hi vhunisa ku txani kupfisisa ti to ti womba txani ku va ni likholo? (Wona mfota wu wu ku makhatoni.)

⁷ Ngu tihi ati hi ti gondako ka likholo la Nowa? Mayelano ni Nowa mpostoli Paulo a ti khene, “a di zivisilwe ngu Nyatxitimwi timhaka tile ti nga si nzi kuwoneka, a vekete lisima txiziviso txiya, a txi aka Ngalava kasi kuponisa ngamu yakwe”. (Vahebheru 11:7) Ngu mhaka ya ku Nowa a nga ti ni likholo ka ti Jehovha a nga m’gela, a akile ngalava ya hombe. Ti nga maha vaakelani vakwe va di mu wotisile ti to a ti yi akela txani. Hi nga tsaniseka ti to Nowa kha malala. Bhiblia yi womba ti to Nowa i “mruruteli wa wululami”. (2 Pedro 2:5) A txharihisile vathu ti to Txizimu txi na tisa ndambi ayi yi no ta lovisa vabihi. Ti nga maha a di va gelisile ati Jehovha a nga mu gelisa tona: “Nina ni makungo a kufuvisa votshe vathu, nguko Mafu ma tate ngu wubihi, ngu mhaka yawe” ni ku “Ani ni na wuyisa ndambi ya mati ha ditikoni, ahawa ku no tala, kasi kufuvisa hahatshi  ka nzuma sotshe sivangwa si, si hanyako. Sotshe si, si ku ho ha mafuni si na fuva”. Se e gwita e va txhamusela ati va nga ti mahako ti to ve huluka. Jehovha a ti rumile Nowa a txi khene: “u na wulela mu ngalavani”.—Genesisi 6:13, 17, 18.

8. Jakobe a wombile txani mayelano ni likholo?

⁸ Mayelano ni likholo, Jakobe nene a wombile to kari. Ti wonekisa kubha ene a bhate dipapilo dakwe msana ka ku va Paulo a di bhalete Vahebheru. Jakobe a bhate tiya: “Ni kombe likholo lako lo mbina mithumo, ani ni na ku komba likholo langu ngu mithumo yangu.” (Jakobe 2:18) Jakobe a txhamusete ti to kasi ku va ni likholo hi fanete hi dhunuka, i singa ti to hi txa nga tumela to kari basi. Phela hambi madhimoni ma tumela ka Txizimu, kambe kha ma nga ni likholo ka txona. Hahanze ko va ni likholo, ona ma ni mtsatsara ngutu ka Txizimu. (Jakobe 2:19, 20) Kasi ngako m’thu a di ni likholo, a na tsakisa Txizimu ngu kumaha mithumo ya yinene, mwendo simaho sa sinene. Eto, ngu ti Abrahamu a nga maha. Jakobe a ti khene: “Ina hi nga yona mithumo yi nga maha ti to tate wathu Abrahamu e va mlulami, ngukuwa a nga ningela mwanana wakwe Isaake ha txiluveloni kani? Se, wa ti wona ti to likholo lakwe li thumisani ni mithumo, ni ti to likholo li ningilwe kuhetiseka ngu mithumo.” Msana keto Jakobe a gwitile e khanyisa ti to likholo lo mbina mithumo hi nga la txilo ngu kuwomba tiya: “Nguko, kufana ni mmidi wu wu ku singa ni moya wu wu balwako ti to wu fite, ngu toneto ni lona likholo li fite, ngako li singa ni mithumo.”—Jakobe 2:21-23, 26.   

9, 10. Ti womba txani ku va ni likholo ka Mwanana?

⁹ Msana ka 30 wa malembe, Johane a bhate Evhangeli yakwe ni mapapilo mararu. Nene Johane a ti ti pfisisa ti to likholo nji txani. Ka makhalo o tala, Johane a thumisile dipswi da Txigriki adi di txi hunduluxelwa i ku “kukombisa likholo”.

¹⁰ Ngu txikombiso, Johane a txhamusete tiya: “Awu a [kombisako likholo, Tradução do Novo Mundo] ka Mwanana, a ni wutomi wo mbi guma. Awu a si engisiko Mwanana, kha na mbi wona wutomi, aniko kuhenya ka Txizimu ku txitimwi kwakwe.” (Johane 3:36) Ti to hi kombisa likholo ka Mwanana hi fanete hi engisa Jesu. Ka mibhalo ya Johane ha ti wona ti to Jesu a ti khene kasiku athu hi mana wutomi wo mbi guma hi fanete kombisa likholo kwakwe ni ka Tate wakwe.—Johane 3:16; 6:29, 40; 11:25, 26; 14:1, 12.

11. Hi nga maha txani ti to hi kombisa kubonga ngu ti Jehovha a nga hi mahela?

¹¹ Kasi ku hi vhuna ti to hi va ni likholo ka mwnana, Jehovha a thumisile moya wo sawuleka ti to hi pfisisa ditshuri mayelano ni nene ni Mwanana wakwe. (Lera Luka 10:21.) Hi nga maha txani ti to hi kombisa kubonga ngu ti Jehovha a nga hi mahela? Hi fanete hi si leki ku mu bonga nguku a nga hi tumelela ti to hi va ni wuxaka nayo ngu mhaka ya Jesu, awu i ku ‘Mvangi ni Muhetisekisi wa likholo lathu’. (Vahebheru  12:2) Hi lava kusimama hi tsanisa likholo lathu ngu ku maha mkombelo mbimo yotshe ni kugonda Bhiblia.—Vaefesu 6:18; 1 Pedro 2:2.

12. I di ti to hi ni likholo, hi na maha txani?

¹² Hi fanete hi kombisa kubonga kwathu ngu simaho asi si si kombisako ti to hi ni likholo ka sithembiso sa Jehovha. Ngu txikombiso, hi ya masoni hi txhumayela ngu Mfumo wa Txizimu ni kuvhuna vathu ti to ve va vagondiswa va Jesu. Hi ya masoni hi maha “wunene ka votshe vathu, na hi di ngadi ni mbimo, ngutungutu ka makholwa kulothu”. (Vagalatiya 6:10) Hi tshumela hi tikarata ngutu ti to hi ‘xivila m’thu wa kale ni hanyelo yakwe’ nguko kha hi lavi kutumelela txilo txi moxa wuxaka wathu ni Jehovha.—Vakolosa 3:5, 8-10.

13. Ku va ni “likholo kha Txizimu” ti ni lisima kuhokela hani? Bhiblia yi li txhamusela ngu nzila yihi likholo ni ku ngu ku txani?

¹³ Bhiblia yi khene: “Se hahanze ka likholo kha ti koteki ku txi tsakisa Txizimu, nguko, awule a tshuketelako hafuhi ka Txizimu, a fanete kukholwa ti to txona txi ho, ni ti to txa ninga txhatxhazelo ka vale va txi lavako.” (Vahebheru 11:6) Bhiblia yi tshumela yi kombisa ti to “likholo ka Txizimu” njimwane txa silo asi Mkristu wa ditshuri a fanelako ku va a di natxo. Likholo njienge txa “makhato” athu. (Vahebheru 6:1) Kambe ti to hi simama hi va ni wungana ni Txizimu, ti lava hi va ni tifanelo timwane ta lisima, i singa likholo dwe.—Lera 2 Pedro 1:5-7; Judha 20, 21.

14, 15. Likholo nda lisima kuhokela hani li txi dinganiswa ni lirando?

¹⁴ Vabhali va Bhiblia va wombawombile ngutu ngu likholo kupinda tifanelo ati timwane. Ina atiya ti womba ti to ngu lona la lisima ngutu kupinda tifanelo totshe ati hi ti lavako?

¹⁵ Paulo a fananisile likholo ni lirando. A ti khene: “hambi idiku no va ni likholo la hombe, ahawa ko za ni si kota kukhunula mimango, kambe ngako ni singa ni lirando, kha ni nga txilo.” (1 Vakorinto 13:2) Jesu a wombile ti to “txirumo txa hombe” txa mlayo ngu randa Txizimu. Lirando li hi vhuna kumana tifanelo timwane ati ti tsakisako Txizimu. Bhiblia yi womba ti to lirando  “la kholwa totshe”. Se lirando li na hi vhuna ti to hi tumela mwendo kukholwa tihi ni tihi ati Txizimu txi ti wombako amu ka Bhiblia.—1 Vakorinto 13:4, 7.

16, 17. Bhiblia yi womba txani ngu likholo ni lirando? Ngu ku txani lirando i di la lisima ngutu kupinda likholo?

¹⁶ Likholo ni lirando ndifanelo ta lisima ngutu, se vabhali va Bhiblia va wombawombile ngu tona totshe ta timbidi. Paulo a kuzetile vanawe ti to ve ‘ambala txikatawu txa txikete txa likholo ni lirando’. (1 Vatesalonika 5:8) Mpostoli Pedro a wombile tiya ngu Jesu: “Ene wu mi m’randako, hambiko mi si nziko ku mu wona, ene wu mi kholwako kwakwe.” (1 Pedro 1:8) Jakobe a wotisile vasawuleki a txi khene: “Ina kasi Txizimu kha txa langa vathu va sisiwana ditikoni muwa, kufela ku ve maha vakoma mu ka likholo, ni vadyi va thomba ya wukoma wu txona Txizimu txi nga wu thembisa ka vale va txi randako, kani?” (Jakobe 2:5) Johane a bhate ti to txirumo txa Txizimu ‘ngukholwa ka ditina da Mwanana wa txona Jesu Kristu’.—1 Johane 3:23.

¹⁷ Paulo a bhate tiya: “Konkuwa, likholo ni txithembo ni lirando nzimaha so tsana ngu wuraru wa sona, aniko txa hombe ka sona ngu lirando.” (1 Vakorinto 13:13) Mbimo yi yi tako, likholo li na mbi ta laveka, nguko, ka mafu a maphya sotshe sithembiso sa Txizimu si na va si di hetisekile. Hi na ta va hi txi tidila ngu wutomi wo tsakisa awu Bhiblia yi hi thembisako wona. Kambe kuranda vathu ni Txizimu ti na ta laveka. Ngu ditshuri, lirando li na simama li kula kala ku pinduka.

18, 19. Ngu yihi wuyelo yi vathu va Txizimu va yi manako ngu ku va ni likholo?

¹⁸ Ka masiku awa athu, vathu va Jehovha va ni likholo ka Mfumo wa Txizimu ve tshumela ve wu seketela. Ni ku vona va dhundana. Eto ti koteka nguku va tumelelako moya wa Txizimu wu kongomisa mahanyelo awe. (Vagalatiya 5:22, 23) Ngu yihi wuyelo? Kupinda konamu ka 8 wa timiliyoni ta vathu ha mafuni kotshe va ni kudikha ni wumwewo mabanzani kwawe. Ti ha kubasani ti to likholo ni lirando ndifanelo ta hombe ngutu.

¹⁹ Wumwewo wonewo wu koteka nguku Txizimu txi hi vhunako. Ngu toneto Txizimu txi fanelwa ngu kubongwa. (Isaya 55:13) Ngu ditshuri ha bonga ngutu nguku txona txi nga maha ti to ti koteka kwathu ‘kuhanyiswa ngu mhaka ya . . . likholo. (Vaefesu 2:8) Jehovha a na ya masoni e vhuna vathu vo tala ti to ve va ni likholo kwakwe. Se ngu magwito mafu otshe mana tala ngu vathu vo hetiseka, vo lulama ni va va nga tsaka ava va no dhumisa Jehovha ngu ha ku singako ni magwito!