1. Kuchi twatamba kwivwa hakutwala ku ufulielo wetu?

HI KO ngwo atu eswe kakwete ufulielo. (2 A-Tesalonika 3:⁠2) Alioze Yehova kakuhana ufulielo kuli atu waze akumuwayila. (A-Roma 12:3; A-Ngalashia 5:22) Twakwivwa kuwaha chinji hakunyingika ngwetu, Yehova kakutwaha ufulielo!

2, 3. (a) Kuchi twakuyuka muze twakupwa ni ufulielo? (b) Yihula yika mutulilongesa ha mutwe uno?

² Yehova hanahane Mwanenyi kashika waze eswe mafuliela muli Yesu mahasa kwaakonekena shili yo. Chino chakukwasa atu kupwa masepa ja Yehova ni kupwa ni kutalatala cha mwono wa mutolo. (Yoano 6:​44, 65; A-Roma 6:23) Chino chinasolola ngwo, Yehova kakutuzanga chinji! Chipwe ngwe tuli akwa-shili nawa twakufwa, nihindu Yehova katumwene ngwo mutuhasa kulinga yuma yipema. (Samu 103:10) Aye katukwashile kunyingika umwenemwene hakutwala kuli Yesu ni chitapo chenyi. Muze twaputukile kufuliela muli Yesu ni kukaula chilweza chenyi, chocho yitupwa ni kutalatala cha mwono wa mutolo!​​—⁠Tanga 1 Yoano 4:​9, 10.

³ Alioze yika nawa mutuhasa kulilongesa hakutwala ku ufulielo? Nyi twanyingika yize Zambi akulinga hali yetu ni yize  makalinga kulutwe lia matangwa, shina chino chinalumbunuka ngwo tuli ni ufulielo? Tutalenu nawa yize twatamba kulinga ku mwono wetu.

4. Muze tuli ni ufulielo, kuchi wakututwa ku mwono wetu?

⁴ Nyi twafuliela muli Yehova ni Yesu, tuchi kulihulikila wika ha yize o akulinga hali yetu ni ha yize makatulingila kulutwe lia matangwa. Alioze twakusa nawa tachi hanga tukaule yuma yeswe yize o akutulongesa. Nawa twakuzanga chinji kukwasa akwetu hanga no aanyingike. Postolo Paulu kambile ngwenyi: “Nyi mutayiza ni kanwa lie ngwe, Yesu iye mwe Mwene; mba mu mbunge ye mufuliela ngwe, Zambi wamuhindwishile hakachi ka afu, kumakulamwina. Mumu mutu mafuliela mu mbunge akatambule ululi; mba ni kanwa matayiza akatambule ulamwino.”​​—⁠A-Roma 10:​9, 10; 2 A-Korindu 4:⁠13.

5. Mumu liaka ufulielo ukwete ulemu, nawa yika twatamba kulinga hanga tukolesa ufulielo wetu? Hana chilweza.

⁵ Chochene, nyi tunazange kuwahilila ni mwono wa mutolo mu chifuchi chaha cha Zambi, twatamba kupwa ni ufulielo nawa twatamba kununga ni kukolesa ufulielo wacho. Ufulielo wapwa ngwe mutondo. Nyi twatumba umwe mutonda twatamba kununga kuuhinjila meya mba ukole kanawa ni kujikiza. Alioze nyi kutwanungine kuuhinjila meya mutondo wacho muuwuma. Chizechene nawa, twatamba kupwa ni shindakenyo ngwetu, ufulielo wetu uli “ungunu” nawa unanungu ni ‘kutatuka.’​​—⁠Titu 2:2; 2 A-Tesalonika 1:3; Luka 22:32; A-Hepreu 3:⁠12.

6. Mu majila aka aali waze A-Hepreu 11:​1, analumbunwinamo ufulielo?

⁶ Mu A-Hepreu 11:​1, Mbimbiliya yinalumbununa chize ufulielo wapwa. (Tanga.) (1) Ufulielo uli “kulisela chinyingi cha yuma yize anayitalatala.” Yuma yize ‘tunatalatala’ yili yilakenyo ya Zambi ya kulutwe lia matangwa. Chakutalilaho, tuli ni shindakenyo ngwetu upi kumuukahwa, nawa ngwetu kumukukapwa hashi haha. (2) Ufulielo uli “kukunuka” hanji kujikijila “ha yuma yize kuyishi kumoneka.” Tunanyingika ngwetu, Yehova Zambi, Yesu Cristu, angelo kwaali chipwe ngwe kutushi kwaamona. Nawa ngwetu, Wanangana wa mu malilu kuuli chipwe ngwe tushi kuumona. (A-Hepreu 11:⁠3) Mba kuchi mutuhasa kusolola ngwetu, pundu lume twakufuliela ha yilakenyo ya Zambi ni ha yuma yize kuyishi kumoneka? Twakuchilinga ha chize twakutwama ku mwono wetu ni chize twakuhanjika ni yize twakulinga.

7. Kuchi chilweza cha Noa chatukwasa kunyingika yize ufulielo unalumbunuka? (Tala chizulie ha uputukilo.)

⁷ Yika twalilongesa kuli Noa hakutwala ku ufulielo? Postolo Paulu kambile ngwenyi, Noa “muze hamutoweza kuli Zambi hakutwala ku yuma yize kanda yichimoneka, se wevwile woma wa Zambi, walulikile ulungu akalamwine akwa zuwo lienyi.” (A-Hepreu 11:⁠7) Noa katungile ulungu wacho unene, mumu te kakufuliela ha yize Yehova amulwezele. Kota enyembo jenyi te kakumuhula ngwo, mumu liaka unatungu ulungu upwahaha? Mutuhasa kupwa ni shindakenyo ngwetu, Noa kakaholele. Mbimbiliya yinambe ngwo Noa kapwile “mukwa kwambujola  ululi.” (2 Petulu 2:⁠5) Iye katowezele atu ngwenyi, Zambi maneha sanga lia meya hanga ahwise upi weswe. Kota Noa kaalwezele pundu yuma yeswe yize Yehova amulwezele ngwenyi: “Kumeso jami songo lia musunya weswe hilieza, mumu hashi hazala to ni upupilo kuli ayo,” nawa “yami mwene munguneha sanga lia meya hashi, lia kunongesa musunya weswe kushi lia malilu uze ukwete mwiku wa mwono; e eswe ali hashi kumafwa.” Ha chino, Noa kapwile ni chiteli chakulumbunwina atu yize o atamba kulinga hanga alilamwine. Yehova yamulweza ngwenyi: “Kumukanjila mu ulungu.”​​—⁠Uputukilo 6:​13, 17, 18.

8. Yika Tiangu ambile hakutwala ku ufulielo?

⁸ Tiangu neye kasonekene hakutwala ku ufulielo. Kota aye kasonekene hakutwala ku ufulielo ha amwe mashimbu muze postolo Paulu te hasonekena kulu A-Hepreu. Tiangu yasoneka ngwenyi: “Ngulweze ufulielo we kuushi yitanga, ni yami ku yitanga yami mungukulweza ufulielo wami.” (Tiangu 2:18) Tiangu kalumbunwine ngwenyi, nyi twapwa ni ufulielo, twatamba kulinga yuma yinji hi wika ko kufuliela. Mumu ni andemoniu kakutayiza ngwo Zambi kwaali, alioze keshi kumufuliela. Nawa o kakulimika nenyi. (Tiangu 2:​19, 20) Chikwo nawa, muze umwe mutu mapwa ni ufulielo, iye mevwisa Zambi kuwaha ha kulinga mulimo upema hanji kusolola yitanga yipema. Yino ye alingile Apalahama. Tiangu yasoneka ngwenyi: “Te kasambishile kulwetu Apalahama ku yitanga muze alambwile mwanenyi Izake ha chilumbilo, nyi? Unamono chize ufulielo wenyi walingile hamwe ni yitanga yenyi, ni ku yitanga apwishile ufulielo wenyi ungunu.” Tiangu yashindakenya ngwenyi, ufulielo uze kuushi yitanga uli wangwaza ha kwamba ngwenyi: “Chizechene ngwe mujimba kuushi spiritu kuunafu, chocho nawa ufulielo kuushi yitanga kuunafu.”​​—⁠Tiangu 2:​21-23, 26.

9, 10. Yika chinalumbunuka kufuliela muli mwe Mwana?

⁹ Muze te hikwapalika miaka 30, Yoano yasoneka Evangelu yenyi hamwe ni mikanda yikwo yitatu. Chizechene ngwe akwa-kusoneka Mbimbiliya akwo, Yoano neye kanyingikine kanawa ulumbunwiso wa ufulielo. Ha mashimbu anji akusoneka chenyi, Yoano yazachisa liji lia Ngregu lize kanji-kanji akulumbununa mu uchokwe ngwo “ufulielo.”

¹⁰ Chakutalilaho, Yoano kambile ngwenyi: “Yoze mafuliela mwe Mwana, mwono wa mutolo ali nawo. Yoze keshi kwononoka kuli mwe Mwana, kechi kamona mwono, alioze utenu wa Zambi kuwatwama hali iye.” (Yoano 3:36) Mba tufuliele muli mwe Mwana twatamba kumwononokena. Kwamba umwenemwene, ha yisoneko ya Yoano, twakuwanaho kanji-kanji ngwo Yesu te kakwamba ngwenyi, nyi tunazange kupwa ni mwono wa mutolo, twatamba kufuliela muli iye ni muli Tato.​​—⁠Yoano 3:​16; 6:​29, 40; 11:​25, 26; 14:​1, 12.

11. Kuchi mutuhasa kusolola ngwetu, twakusakwilila Yehova hakunyingika umwenemwene?

¹¹ Yehova kakuzachisa spiritu yenyi yisandu hanga atukwase kunyingika umwenemwene  hali iye ni hali Mwanenyi, nawa kakutukwasa hanga tupwe ni ufulielo muli ayo. (Tanga Luka 10:21.) Kuchi mutuhasa kusolola ngwetu, twakusakwilila Yehova ha yuma yeswe yize akutwaha? Kanda twecha kumusakwilila nilimwe tangwa, mumu hanatutayiza kupwa masepa jenyi kupalikila muli Yesu, yoze uli “Kaputu kanda Mukwa kumanununa ufulielo.” (A-Hepreu 12:⁠2) Nawa twatamba kununga kukolesa ufulielo wetu ha kulemba mashimbu eswe kuli Yehova ni kulilongesa Liji lienyi.​​—⁠A-Efwesu 6:18; 1 Petulu 2:⁠2.

12. Yika mutulinga, nyi twapwa ni ufulielo?

¹² Twatamba kununga ni kusolola ku yitanga yetu ngwetu, tunafuliela ha yilakenyo ya Yehova. Chakutalilaho, twatamba kununga ni kwambujola kuli atu hakutwala ku Wanangana wa Zambi ni kwapwisa tumbaji twa Yesu. Twatamba nawa kulinga yuma “yipema kuli atu eswe, alioze kuhiana chikolo kuli akwa zuwo lia ufulielo.” (A-Ngalashia 6:10) Nawa twatamba kukalakala chinji hanga tuzule “mutu mukulu hamwe ni yilinga yenyi” mumu kutwazangile kulinga chuma nichimwe chize muchipihisa usepa wetu ni Yehova.​​—⁠A-Kolosu 3:​5, 8-10.

13. Ulemu uka “ufulielo kuli Zambi” ukwete? Kuchi Mbimbiliya yakulumbununa ufulielo, nawa mumu liaka?

¹³ Mbimbiliya yinambe ngwo: “Mutu keshi kuhasa kupemena kuli Zambi shina ni ufulielo; mumu yoze meza kuli Zambi ndo mafuliela ngwenyi, Zambi hwali, iye mukwa kwonona waze akumufupa.” (A-Hepreu 11:⁠6) Mbimbiliya nawa yinasolola ngwo “ufulielo kuli Zambi” uli chuma chitangnu chize akwa-Kristu atamba kupwa nacho. Uli chihanda cha “fundamentu” yetu. (A-Hepreu 6:⁠1) Alioze kuchizako ufulielo, tunafupiwa nawa yitanga yikwo yilemu mba tununge kupwa ni usepa upema ni Yehova.​​—⁠Tanga 2 Petulu 1:​5-7; Yundase 20, 21.

14, 15. Kutesa ni zango, ulemu uka ufullielo ukwete?

¹⁴ Akwa-kusoneka Mbimbiliya katongwele chinji ufulielo kuhiana mihuko yikwo. Shina chino chinalumunuka ngwo, ufulielo we muhuko ulemu chinji uze twatamba wika kupwa nawo?

¹⁵ Paulu katesele ufulielo ni zango. Aye yasoneka ngwenyi: “Chipwe mungupwa ni ufulielo weswe, wa kuhasa kututulula milundu, alioze nyi chishi zango, nguli wamokomoko.”  (1 A-Korindu 13:⁠2) Yesu kambile ngwenyi, “liji linene lia Shimbi” lili kuzanga Zambi ni mbunge yeswe. (Mateu 22:​35-40) Zango liakutukwasa kupwa ni yitanga yikwo yinji yize yakuvwisa zambi kuwaha. Chakutalilaho, Mbimbiliya yinambe ngwo, zango “kuliakufuliela yuma yeswe.” Kashika, zango mulikatukwasa kufuliela, hanji kutayiza yuma yeswe yize Zambi anatulweze mu Mbimbiliya.​​—⁠ 1 A-Korindu 13:​4, 7.

16, 17. Yika Mbimbiliya yinambe hakutwala ku ufulielo ni zango? Ha mihuko yino yaali, muhuko uka unene kuhiana, nawa mumu liaka?

¹⁶ Zango ni ufulielo yili yitanga yize yikwete ulemu unji nawa akwa-kusoneka Mbimbiliya kanji-kanji kayitongwele hamuwika. Paulu kakolwezele mandumbu jenyi hanga akazale “chipwiko cha utale cha ufulielo ni zango.” (1 A-Tesalonika 5:⁠8) Petulu kasonekene hakutwala kuli Yesu ngwenyi: “Chipwe kunwamumwene, hindu nunamuzange. Chipwe haliapwila kunushi kumumona, hindu nunamufuliela.” (1 Petulu 1:⁠8) Tiangu kahulile mandumbu jenyi akuwayisa ngwenyi: ‘Zambi te katongwele yiswale a hashi, apwe pichi mu ufulielo, ni maswana ja wanangana, uze alakenyene kuli waze akumuzanga nyi?’ (Tiangu 2:⁠5) Yoano kasonekene ngwenyi, shimbi ya Zambi yili “tukafuliele ku jina lia Mwanenyi Yesu Kristu, tukalizange umwe ni mukwo.”​​—⁠1 Yoano 3:⁠23.

¹⁷ Alioze Paulu kasonekene nawa ngwenyi: “Haliapwila yinasala ufulielo, kutalatala, ni zango, yino yitatu. Alioze zango liahiana yeswe.” (1 A-Korindu 13:13) Mu paraisu, kutuchikafupiwa nawa kufuliela ha yilakenyo ya Zambi, mumu yilakenyo yeswe muyikamanunuka pundu. Mutukapwa ni mwono ungunu uze Mbimbiliya yakwamba. Alioze mashimbu eswe mutukafupiwa kupwa ni zango hali Zambi ni hali atu. Kwamba umwenemwene, zango lietu hali ayo mulikanunga ni kukola ndo ku miaka yeswe.

18, 19. Yika tuvumbi twa Zambi akuzuka musono, mumu lia kupwa ni ufulielo, nawa iya yoze watela uhaliso wetu?

¹⁸ Tuvumbi twa Yehova ha mashimbu jetu kakufuliela ku Wanangana wa Zambi ni kuukwasa. Nawa kakulizanga umwe ni mukwo. Chino chakulingiwa mumu o kakwecha hanga spiritu ya Zambi yasongwela ku mwono wo weswe. (A-Ngalashia 5:​22, 23) Mba yika akuzukako? Tununu nake a mandumbu ni mapangi hashi eswe kali ni sambukila ni kulinunga mu yikungulwila yo. Chochene, ufulielo ni zango yili yitanga yilemu chinji.

¹⁹ Yetu tuli ni kulinunga chacho mumu lia ukwaso wa Zambi yetu. Aye kanafupiwa uhaliso wetu. (Izaia 55:13) Tunawahilila chinji ha kunyingika ngwetu, chino chakulingiwa hali yetu mumu ‘hanatulamwina, ha kufuliela.’ (A-Efwesu 2:⁠8) Yehova manunga ni kukwasa atu anji hanga amufuliele. Ha chino, hashi heswe muhakapwa atu angunu, akwa-ululi, asambukila waze makahalisa Yehova ni ku miaka ya mutolo!