1. ¿Nita tödeke yebätä ja rabadre ruin ño nie?

NI JÖKRÄ ñaka tä tödeke (2 Tesalonicenses 3:2, NGT). Akwa Jehová tä ni jökrä niara mikaka täte ye mike tödeke (Romanos 12:3; Gálatas 5:22). Jehová tä ni mike tödeke yebätä nikwe debe biandre ie.

2, 3. a) ¿Nita tödeke ye köböire dre kwin tä nemen nikwe? b) ¿Kukwe meden meden ngwantarita abokän nibike mike gare?

² Jehovakwe Monso tare krubäte kwe ye juani ne kwe ni jökrä tä tödeke ie yebiti ngite juandre ta. Nita tödeke Jesús ie angwane, ni raba nemen ja ketamuko Jehovakwe aune nüne kärekäre (Juan 6:44, 65; Romanos 6:23). Jehová töi kwin krubäte ni kräke. Ni abokän ngite yebätä nita jerekäbe gataka akwa ni raba kukwe kwin nuainne jutuabare ie nibätä (Salmo 103:10). Ye medenbätä kukwe kwin mikani gare kwe nie Jesubätä aune Jesús ja nire biani ni ütiäre yebätä arato. Nikwe tödekabare Jesús ie aune nikwe ja mikani nänkä niara jiebiti ye ngwane, ni jatani tödeke nüna kärekäre yei (ñäkädre 1 Juan 4:9, 10 yebätä). *

 ³ Akwa ¿tödeka yebätä ni raba dre mada mike gare jai? Ni tö tödekai angwane, ¿Ngöbökwe jondron nuainbare ni kräke aune dre nuaindi kwe ja känenkäre ni kräke ye aibe nikwe mikadre gare jai? Ñakare, nikwe kukwe mada mikadre gare jai. Ye abokän kukwe meden ani mike gare jai.

4. ¿Nita tödeke angwane ni törbai dre nuaindi?

⁴ Nita tödeke Jehovai aune Jesús ie angwane, niaratre dre nuainbare ni kräke aune dre nuaindi kwe ja känenkäre ni kräke ye ñan aibe nikwe mikadre gare jai. Ñakare aune niaratre tä dirire nie ye ererebätä nikwe ja töi mikadre nüne ja brukwä tätebiti aune nikwe nitre mada dimikadre niaratre mike gare jai. Apóstol Pablo niebare: “Mäkwe niedi ja kadabiti Jesús abrä Ji dokwäte, angwane Ngöbökwe ganinkröta krö mrükrä ngätäite, ye mikadi era ja brukwäte mäkwe, angwane mä rabai kwäre. Ñobätä ñakare angwane ja brukwäte ni tä tödeke ni mikadre kwin gäre, angwane ja kadabiti ni tä niere Jesús abrä Ji dokwäte, ne abrä ja mikakrä kwäre” (Romanos 10:9, 10; 2 Corintios 4:13).

5. a) ¿Tödekadre ye ñobätä ütiäte krubäte? b) Nikwe dre nuaindre tödekakäre bäri ye mun raba bämike keteiti.

⁵ Ni tö nünain kärekäre kä mrä Ngöbökwe yete angwane, nikwe tödekadre aune nikwe ja di ngwandre tödeke bäri. Tödeka ye abokän kri mu ye kwrere. Kri mu tädre kwin aune ririadre jankunu yekäre, käre nikwe ñö metadrekäbiti. Nikwe ñaka nuaindi angwane, bä ngrötaikä aune gatai. Ye erere arato, tödeka nikwe ye tädre kwin aune ririadre jankunu ye nikwe mikadre gare metre jai (Tito 2:2; 2 Tesalonicenses 1:3; Lucas 22:32; Hebreos 3:12).

6. ¿Hebreos 11:1 yekänti kukwe meden ketebu mikata gare tödeka yebätä?

⁶ Hebreos 11:1 yekänti Biblia tä kukwe ketebu mike gare tödeka yebätä (ñäkädrebätä). Tä niere kena, tödeka ye abokän “jändrän ngibiata nikwe abko erere rükadi ni kisete abko nita mike era jae”. Nita jondron ngübare ngäbiti ye ngätäite Ngöböta kukwe käbämike nie ja känenkäre ye tä arato. Ñodre, kukwe käme ye jökrä ñaka rabaira aune kä bä nuäre rabai ye gare metre nie. Aune ketebukäre, Biblia tä niere tödeka ye abokän “jändrän tuen ñakare nie, akwa jändrän ye abko tärä era metre tä nebe ruen nie”. Jondron ruäre ñaka tuin nie akwa tärä metre gare nie ye abokän Jehová, Jesukristo, angeletre aune Gobran tä kä kwinbiti (Hebreos 11:3). ¿Kukwe käbämikata Ngöbökwe nie aune jondron ñaka tuin nie yei nita tödeke metre ye nita bämike ño? Nita nüne ño aune nita dre niere bätä nita dre nuainne yebiti nita bämike.

7. ¿Noé kukwe kwin bämikani ye raba ni dimike ño tödeka ye dre gärätä mike nüke gare jai? (Üai bämikani kena mikadre ñärärä).

⁷ Noé kukwe kwin bämikani ye raba ni dimike tödeka ye dre gärätä mike nüke gare jai. Apóstol Pablo niebare “jondron tua jämi nitrekwe, nebätä Ngöbökwe blitabare” Noebe. Ngöbökwe Noé kadre ngäbiti yei tö namani yebätä niarakwe “ru sribebare, [...] aune [...] mräkä namani kwäre” (Hebreos 11:7, NGT). Jehová kukwe niebare Noé ie yei nämene tödeke ye medenbätä arka kri krubäte sribebare kwe. Ñobätä Noé nämene arka sribere ye nitre nünanka niara bäre ye nämene ngwentari ie raba ruin nie. Noé ñaka namani kwekebe ye gare metre nie, ñobätä ñan aune Biblia tä niere niara nämene “nüne metre abko kwrere nämane dirire” (2 Pedro 2:5). Ngöbökwe ñü kri mikai näkäin tibien nitre käme gatekäre ye niarakwe mikani gare nitre ie. Jehovakwe kukwe niebare ie ne erere niebare kwe nitre ie raba ruin nie: “Ni kä nebtä, köböite ni jökrä ja rüere kwärikwäri, aisete ti bike ni jökrä gainkä btä jändrän jire jökrä kä temenbtä nebe gwaire”. Jehovakwe  niebare Noé ie arato: “Tikwe ñö mikadi neen kri jate kä jökräbti temen. Ye kwrere ti bike jändrän kä nebtä gainkä jire jökrä ñöte”. Ye bitikäre, nitre yekwe dre nuaindre rabatekäre nire ye Noé mikani gare ietre raba ruin nie. Jehová niebare ie: “Näin [...] rute” (Génesis 6:13, 17, 18, Jändrän Jökrä Namani Bare Ño Kena).

8. ¿Santiago dre niebare tödeka yebätä?

⁸ Santiago ni ja tötikaka Jesube käkwe kukwe tikani tödeka yebätä arato. Pablo tärä tikani nitre kristiano hebreo ie ye bitikäre niara kukwe ye tikani raba ruin nie. Santiago niebare: “Mä tä tödeke Ngöböbiti mike tuadre tie mäkwe, akwa ñakare sribi jakwebiti; angwane ti tä tödeke Ngöböbiti, tibike mike tuadre mä ie, sribi jakwebiti” (Santiago 2:18, NGT). Nikwe tödekadre yekäre nikwe kukwe mada nuaindre mikani gare kwe, ye abokän nikwe Ngöbö mikadre era jai. Ngöbö tärä ye era chokalitre kräke, akwa ñaka tä tödeke ie. Ñakare aune, tätre ja mike niara rüere (Santiago 2:19, 20). Erametre, nitre tä tödeke ye tö jondron kwin nuain kä mikakäre juto Ngöböbätä. Ye erere, Abrahán nuainbare. Santiago tikabare: “Ni mräkä kira Abraham nikani ngobo Isaac ngwena müre ketadre Ngöbö mikakäre ütiäte jae, ye ngwane tödekani kwe Ngöböbti, käkwe jändrän kuin nuenbare kore. Yebtä abko, ñakare ngite mda Ngöbökwe niebare btä. Ne aisete Abraham nämane tödeke era metre Ngöböbti abko bä mikani [...] kwe: [...]. Niarakwe jändrän nuenbare kore, yebtä abko jatani tödeke täte metre Ngöböbti”. Ye bitikäre, Santiago mikani gare nita tödeke akwa ni ñaka jondron nuainne bämikakäre angwane ye ñaka ütiäte. Niebare kwe: “Ni üai ñakare nibtä angwane, nita nebe ngwäkäre, ye kwrere arato [...] nita jändrän kuinkuin nuene ñakare ni mda mdakrä, ye ngwane nita tödeke ñakare metre” (Santiago 2:21-23, 26).

9, 10. ¿Ni tö tödekai Jesús ie angwane nikwe dre nuaindre?

⁹ Santiago kukwe tikabare tödeka yebätä ye käi nikani bäsi 30 ta ye bitikäre, Juan käkwe Evangelio tikabare aune tärä ketamä tikabare kwe. Nitre mada Biblia tikaka ye erere, tödeka ye dre gärätä ye nämene gare Juan ie. Bä kabre niarakwe kukwe griegore yebiti kukwe tikani abokän kwita raba krörö ngäbere “tödekadre”.

¹⁰ Ñodre Juan niebare: “Nire tä tödeke ngobobiti, yebrä abokän ja nirekrä käre tä kwe, akwa nire ñakare tä niara mike era jai, yebrä ñan tärä ja nire tuaka jire chi, angwane Ngöbökwe tö diandi krubäte” (Juan 3:36, NGT). Jesús kukwe biani ye nikwe mikadre täte tödekakäre ie (recuadro “¿Dre gärätä?” mikadre ñärärä). Juan kukwe tikani ye tä mike nüke gare nie, ni tö nünain kärekäre angwane, ni rabadre tödeke Jesús aune Rün ie ye driebare käre Jesukwe (Juan 3:16; 6:29, 40; 11:25, 26; 14:1, 12).

11. ¿Jehovakwe kukwe metre driebare nie yebätä nita debe bien ie ye nita bämike ño?

¹¹ Jehovakwe üai deme kwe yebiti ni dimikani ne kwe kukwe metre niarabätä aune Ngobo yebätä ye rükadre gare nie aune ni dimikani kwe ne kwe nikwe tödekadre niaratre ie (ñäkädre Lucas 10:21 yebätä). ¿Ngöbökwe jondron nuainbare ni kräke yebätä nita debe bien ie ye nita bämike ño? Jesús ye abokän “Ni Ji Ngwanka Bäri Kri aune ni mikaka tödeke Metre” ye köböire nita ja kete Jehovabe yebätä nikwe käre  debe biandre ie (Hebreos 12:2, TNM). Ne madakäre,  nikwe jankunu tödekadre bäri. ¿Nikwe nuaindre ño? Nikwe oradre aune käre ñäkädre Bibliabätä (Efesios 6:18; 1 Pedro 2:2).

12. ¿Nita tödeke angwane nikwe dre nuaindi?

¹² Jehovata kukwe käbämike yei nita tödeke bäri angwane, nikwe dre nuaindi yebiti nikwe bämikai käre. Ñodre, nikwe blitai jankunu Gobran Ngöbökwe yebätä nitre ben aune nikwe dimikai näin Jesús jiebiti. Ne madakäre, nikwe jankunu “jondron kwin nuaind[i] ni jökrä kräke, akwa metrere nitre tä tödeke nibe ye kräke” (Gálatas 6:10, TNM). “Mun nämane nüne ño käne angwane, mun nämane dre dre nuene, ye abko munkwe kitanina jökrä temen” nieta ye nikwe ja di ngwain jankunu mike täte ñobätä ñan aune ni tö ja ketai käre Jehovabe (Colosenses 3:5, 8-10).

13. a) ¿Ñobätä ütiäte krubäte nikwe tödekadre Ngöböi? b) ¿Biblia tä dre mike gare tödeka yebätä aune ñobätä?

¹³ Biblia tä niere nire ñaka tödeke ye Ngöbö ñaka raba kain ngäbiti, “ñobtä ñan angwane ni ngämi krötö Ngöbö ken, känenkri abko Ngöbö tärä, ye abko nikwe mikadre era, abti nikwe krötadre Ngöbö ken, amne nita niara känene abko ütiä biandi kwe nie” (Hebreos 11:6). Biblia tä niere arato nita tödeke Ngöböi ye abokän “üra mikata ju täni ye kwrere”. ¿Ñobätä? Ñobätä ñan aune ni kristiano metre ye jökrä rabadre tödeke kena Ngöböi (Hebreos 6:1). Akwa tödeka ye ngätäite, ni töi mada mada ütiäte tä abokän käkwe ni dimikai ja kete kwin Ngöböbe ye nita ribere jai (ñäkädre 2 Pedro 1:5-7 yebätä; Judas 20, 21).

14, 15. ¿Ja tare ye ñobätä bäri ütiäte krubäte tödeka ye kräke?

¹⁴ Ni töi mada mada kwin yebiti ta bäri nitre Biblia tikaka ye tä blite tödeka yebätä. ¿Ni kristiano yekwe tödeka tädre ye bäri ütiäte ye ai gärätä? Ani mike gare jai.

¹⁵ Tödeka ye abokän ñaka ja erebe ja tare yebe bämikani Pablokwe. Niarakwe niebare: “Tita tödeke kwatibe Ngöböbti, köböire ti rabadre ngitio kri juen nebe kä mdabti, akwa tita ni mda mda tarere ñakare ne ngwane, ti ütiäte ñakare jire” (1 Corintios 13:2). Aune Jesús niebare Ngöbö taredre ye abokän “Kukwe Biani Ngöbökwe [...] bäri ütiäte” (Mateo 22:35-40). Ja tare ye tä ni dimike ni töi mada mada kwin Ngöbö kräke ye ererebätä ja ngwen. Ñodre, ja tare ye tä kukwe jökrä mike era jai nieta Bibliakwe. Aisete ja tare ye tä ni dimike Ngöböta kukwe jökrä niere nie Bibliabätä ye mike era jai aune tödeke ie (1 Corintios 13:4, 7).

16, 17. a) ¿Tödeka aune ja tare ütiäte krubäte ye Biblia tä mike gare ño? b) ¿Tödeka aune ja tare ye meden bäri ütiäte aune ñobätä ye bäri ütiäte?

 ¹⁶ Tödeka aune ja tare ye ütiäte krubäte mikata gare Bibliakwe. Ye medenbätä, bä kabre nitre Biblia tikaka ye tä blite ja tare aune tödeka yebätä. Ñodre, Pablo nitre kristiano ja ketaka ben ye nübaibare “tödeke kwatibe [...] amne, [...] ja tarere kwärikwäri” (1 Tesalonicenses 5:8). Pedro kukwe ne niebare Jesubätä: “Munkwe ñan tuabare ja okwä jenbti, akwa munta tarere. Erere arato, mtare munta tuen ñakare, akwa munta mike era jae, käta tödeke bti” (1 Pedro 1:8). Santiago niebare ja mräkätre aune ja ngwaitre dianinkä nänkäre kä kwinbiti yei: “Nitre bobre bobre ni jökrä okwäbti, ni ye abko Ngöbökwe dianinkä jakrä tödekakäre [...]. Erere arato, kä kuin känti Ngöböta gobrane, ye abko biandi kwe nitre bobre bobre käta Ngöbö tarere yeye, niarakwe jändrän kwe köböi mikani ietre ye kwrere” (Santiago 2:5). Aune Juan niebare, Ngöböta ribere nie “nikwe tödekadre niara Odei Jesukristobti amne, [...] nikwe ja taredre kwärikwäri” (1 Juan 3:23).

¹⁷ Akwa Pablo niebare arato ni näire “tödekakrä, tö ngwankrä, aune ja tarekrä tärä kärekäre; jondron ne krämä tärä, akwa ja tarekrä yebrä bäri” ütiäte (1 Corintios 13:13, NGT). ¿Ñobätä Pablo niebare ja tare ye bäri ütiäte ni töi ketamä kwin ye kräke? Ñobätä ñan aune ja känenkäre Ngöböta kä mrä käbämike nie ye kräke ni ñaka rabaira tödeka ye ribere jai. Ni rabaira nüne kwin Biblia tä niere ye erere. Akwa käre nikwe Ngöbö aune nitre mada taredre ye nikwe ribedi jai. Käre nikwe niaratre taredi bäri.

18, 19. ¿Ni Ngöbö mikaka täte tä tödeke kä nengwane ye köböire dre namanina bare aune nikwe nire käikitadrekä kukwe yebätä?

¹⁸ Ni Ngöbö mikaka täte kä nengwane ye tä ja tuenmetre jie ngwandre üai deme yei. Ye medenbätä nita tödeke Gobran Ngöbökwe yei aune nita ja mike kiri. Ne madakäre, nita ja tarere kwärikwäri (Gálatas 5:22, 23). Ye köböire, kä jökräbiti nita millón ni kwä biti bäri nüne jäme jabe aune keteitibe konkrekasion keta kabre yete. Erametre tödeka aune ja tare ye ütiäte krubäte.

¹⁹ Jehovata ni dimike ye aibe köböire nita keteitibe. Yebätä nikwe niara aibe käikitadrekä (Isaías 55:13). Jehová tä kä bien nie ne kwe ni rabadre “kwäre [...] tödek[a] köböite” yebätä nita debe bien krubäte ie (Efesios 2:8, NGT). Jehovakwe jankunu nitre mada dimikai ne kwe niaratre rabadre tödeke ie. Aune köbö rükai yete, Kä jökräbiti tibien nitre töi metre, kukwe kwin nuainkä aune nüne kä jutobiti yekwe Jehová käikitaikä kärekäre.