1. Ngaˬ hui ve yonˍ hkʼaˇ htaꞈ hkʼaˬ hkʼe dawˇ cawˇ ve le?

 Yonˍ hkʼaˇ teˇ gʼaˇ le le cawˬ ve maˇ heˆ. (2 Hteˇsaˍlawˇniˆ 3:2) Yaꞈ hkʼaˇ, Yaˬhoˉvaˬ yawˇ htaꞈ oˉ kʼoˍ pui ve chaw teˇ gʼaˇ le le htaꞈ yonˍ hkʼaˇ piˇ ve yoˬ. (Roˉmaꞈ 12:3; Gaˍlaˍtiˆ 5:22) Yaˬhoˉvaˬ yonˍ hkʼaˇ peꞈ laˇ ve ngaˬ hui ha lehˬ jaˇ!

2, 3. (a) Yonˍ hkʼaˇ ngaˬ hui awˬ pon aˬ htoꞈ ma awˬ bon cawˬ ve le? (b) Aˬ htoꞈ ma na hkawˇ htaꞈ gʼa henˇ tuˬ le?

² Yaˬhoˉvaˬ yawˇ haꞈ jaˇ ve yaˇ paˍ ngaˬ hui teˇ gʼaˇ le le awˬ pon peꞈ laˇ ve yoˬ. Yeˍsuˆ htaꞈ yonˍ ve chaw teˇ gʼaˇ le le venˇ baˆ hpehˇ laˇ ve htaꞈ gʼa ve yoˬ. Chi lehˬ, ngaˬ hui Yaˬhoˉvaˬ awˬ chawˇ kʼawꞈ te gʼa leh co co taiˍ taiˍ a shaꞈ gʼa hpehꞈ ve yoˬ. (Yoˇhanˬ 6:44, 65; Roˉmaꞈ 6:23) Yaˬhoˉvaˬ ngaˬ hui htaꞈ nyi ma daꞈ laˇ jaˇ! Ngaˬ hui venˇ baˆ yaˇ hpehꞈ leh suh kuiˬ ve htawˇ, ngaˬ hui daꞈ ve htaꞈ te gʼa ve Yaˬhoˉvaˬ mawˬ ve yoˬ. (Chiˇ mvuh ve 103:10) Yeˍsuˆ leh yawˇ ve tanˇ tuˬ daꞈ ve awˬ lawn sha tanˇ ngaˬ hui henˇ ve, Gʼuiˬ sha ngaˬ hui htaꞈ ga laˇ ve yoˬ. Ngaˬ hui Yeˍsuˆ htaꞈ tanˬ yonˍ leh gʼaꞈ te htaˇ, co co taiˍ taiˍ a shaꞈ gʼa tuˬ hpehꞈ kʼai gʼa ve yoˬ!—1 Yoˇhanˬ 4:9, 10 gʼaw ve.

 ³ Yonˍ hkʼaˇ htaꞈ caˉ daꞈ ve aˬ htoꞈ ma gʼa henˇ sheˍ ve le? Gʼuiˬ sha ngaˬ hui awˬ pon aˬ ma te laˇ jaw ve leh awˬ gʼuˇ suhˍ hpawˇ aˬ ma te laˇ tuˬ chi hkʼe ceh shiˍ ve kʼo, yonˍ hkʼaˇ cawˬ˗aw laˇ? Ngaˬ hui aˬ ma gʼa kʼawꞈ te sheˍ ve teˇ geh henˇ sheˍ.

4. Yonˍ hkʼaˇ ngaˬ hui htaꞈ heuˆ la kuiˬ hkʼaˬ hkʼe cawˬ ve le?

⁴ Yaˬhoˉvaˬ leh Yeˍsuˆ htaꞈ yonˍ tuˬ, yawˇ huiˉ maˬ ngaˬ hui awˬ pon aˬ ma te laˇ jaw ve leh awˬ gʼuˇ suhˍ hpawˇ aˬ ma te laˇ tuˬ chi hkʼe ceh shiˍ ve maˇ lawꞈ. Yawˇ huiˉ maˬ maˍ laˇ ve awˬ hkʼaˇ suh ngaˬ hui ve a shaꞈ teꞈ kuiˬ lo hkʼa dehꞈ dehꞈ gʼaꞈ te gaˇ ve yoˬ. Leh shu yawˇ huiˉ maˬ htaꞈ shiˍ daꞈ tuˬ, ngaˬ hui ga piˇ gaˇ ve yoˬ. Tcuh yaˇ Pawˇluꞈ kʼoˆ ve, “Yeˍsuˆ lehˬ Jawˇ mawˇ hpehꞈ ve yoˬ tehꞈ nawˬ ve mawꞈ kʼaw hkanˍ yuˬ le, Gʼuiˬ sha lehˬ yawˇ htaꞈ suh kuiˬ lo kʼawꞈ teꞈ tu la piˇ ve htaꞈ nawˬ ve nyi ma awˬ hkʼaw lo yonˍ ve kʼo, nawˬ htaiˍ hkʼawꞈ ve htaꞈ gʼa tuˬ yoˬ. Awˬ lawn kʼo, chaw yaˇ lehˬ nyi ma hkʼaw yonˍ ve pa taw hteˇ ve cawˇ ve chaw hpehꞈ la leh, mawꞈ kʼaw hkanˍ yuˬ ve pa taw htaiˍ hkʼawꞈ ve htaꞈ gʼa ve yoˬ.”—Roˉmaꞈ 10:9, 10; 2 Kawˇrenˍhtuˆ 4:13.

5. Aˬ htoꞈ ma te yonˍ ve a yeˇ uiˍ jaˇ ve le? Yonˍ hkʼaˇ uiˍ la mvuh la tuˬ, ngaˬ hui aˬ htoꞈ ma gʼa te ve le? Tawˇ pa haˉ kʼoˆ maˍ laˇ sheˍ.

⁵ Awˬ tehˬ yoˬ, Gʼuiˬ sha ve miˬ guiˬ awˬ suhˉ hkʼaw co co taiˍ taiˍ a shaꞈ gʼa tuˬ, ngaˬ hui gʼa yonˍ leh yonˍ ve oˇ ve htaꞈ gʼa haꞈ shaˉ ve yoˬ. Yonˍ ve lehˬ suhˆ cehˬ htaꞈ shuˍ ve yoˬ. Suhˆ cehˬ uiˍ la tuˬ, iˉ kaˆ gʼa pfuhˍ piˇ ve yoˬ. Iˉ kaˆ maˇ pfuhˍ piˇ ve kʼo, goˇ leh suh˗e tuˬ yoˬ. Chi hkʼa shuˍ, ngaˬ hui ve yonˍ hkʼaˇ “uiˍ la mvuh la” tuˬ gʼa chaˬ nyi ve yoˬ.—Tiˇtuˆ 2:2; 2 Hteˇsaˍlawˇniˆ 1:3; Luˉkaꞈ 22:32; Heˍbrehˇ 3:12.

6. Heˍbrehˇ 11:1 hkʼaw yonˍ hkʼaˇ leh, awˬ hkʼaˇ nyiˇ lawn hkʼaˬ hkʼe kʼoˆ maˍ laˇ ve le?

⁶ Yonˍ hkʼaˇ Liꞈ hpu hkʼaw hkʼaˬ hkʼe kʼoˆ maˍ laˇ ve Heˍbrehˇ 11:1 hkʼaw bvuhꞈ taˍ ve yoˬ. (Gʼaw ve.) (1) Yonˍ ve lehˬ, ‘dawˇ law taˍ ve teˇ hpaˍ htaꞈ awˬ tehˬ awˬ na gʼa tuˬ ve htaꞈ, hkʼa dehꞈ dehꞈ shiˍ taˍ ve yoˬ.’ Ngaˬ hui ve ‘dawˇ law kuiˬ’ hkʼaw awˬ gʼuˇ suhˍ hpawˇ Gʼuiˬ sha ka tiꞈ te taˍ laˇ ve htaꞈ kaꞈ caˉ daꞈ taˍ ve yoˬ. Tawˇ pa haˉ te kʼo, haiˬ ve awˬ ceuˬ peuˬ kʼai leh miˬ guiˬ awˬ suhˉ cawˬ la tuˬ, ngaˬ hui awˬ tehˬ yonˍ gʼa ve yoˬ. (2) Yonˍ ve lehˬ, ‘maˇ mawˬ sheˍ ve awˬ ceuˬ teˇ hpaˍ awˬ tehˬ awˬ na cawˬ taˍ ve htaꞈ, hkʼa dehꞈ dehꞈ shiˍ taˍ ve yoˬ.’ Ngaˬ hui maˇ mawˬ ve htawˇ, Yaˬhoˉvaˬ Gʼuiˬ sha, Yeˍsuˆ Hkriꞈ, mvuhˇ naw ma tcuh yaˇ, leh mvuhˇ nawˬ ma hkʼoˆ lo Gʼuiˬ sha ve mvuhˇ miˬ, chi teˇ hpaˍ awˬ tehˬ cawˬ ve ngaˬ hui shiˍ ve yoˬ. (Heˍbrehˇ 11:3) Gʼuiˬ sha ve ka tiꞈ leh maˇ mawˬ hpehꞈ ve awˬ ceuˬ htaꞈ ngaˬ hui awˬ tehˬ yonˍ ve tehꞈ, hkʼaˬ hkʼe hpeuꞈ maw piˇ gʼa ve le? Ngaˬ hui ve a shaꞈ teꞈ hkʼaˇ leh ngaˬ hui kʼoˆ ve leh te ve awˬ hkʼaˇ yehˇ ve kʼo, hpeuꞈ maw piˇ gʼa ve yoˬ.

7. Ngaˬ hui yonˍ ve hkʼaˬ hkʼe ve htaꞈ kʼoˆ gaˇ ve na gʼa tuˬ, Noˉaꞈ ve awˬ lawn ngaˬ hui htaꞈ hkʼaˬ hkʼe ga laˇ ve le? (Awˬ lawn tanˬ htaˇ ve awˬ han htaꞈ nyi sheˍ.)

⁷ Yonˍ ve awˬ lawn Noˉaꞈ hkʼaˬ hkʼe maˍ laˇ ve le? Tcuh yaˇ Pawˇluꞈ kʼoˆ ve, “Noˉaꞈ lehˬ yonˍ ve htaꞈ pa taw, maˇ hpehꞈ la sheˍ ve awˬ ceuˬ teˇ hpaˍ awˬ lawn Gʼuiˬ sha yawˇ htaꞈ hto piˇ maˍ piˇ ve teˇ yanˇ yawˆ yan ve awˬ hkʼaw lo na yuˬ leh, yawˇ ve yehˬ yaˇ kʼa yaˇ teˇ hpaˍ gʼa ponˬ tuˬ, yawˇ haw loꞈ kʼoˍ te ve yoˬ.” (Heˍbrehˇ 11:7) Yaˬhoˉvaˬ kʼoˆ piˇ ve htaꞈ Noˉaꞈ yonˍ ve pa taw, haw loꞈ kʼoˍ lonˉ te ve yoˬ. Awˬ chawˇ awˬ paˆ yawˇ htaꞈ na piˇ ve aˬ htoꞈ ma te haw loꞈ kʼoˍ te ve le? Noˉaꞈ taꞈ iˉ maˇ chehˇ taˍ ngaˬ hui hkʼa dehꞈ shiˍ ve yoˬ. Liꞈ  hpu hkʼaw kʼoˆ taˍ ve “hteˇ ve cawˇ ve awˬ lawn htaꞈ bon maˍ ve Noˉaꞈ.” (2 Peˍtruˆ 2:5) Gʼuiˬ sha iˉ kaˆ htonˍ leh haiˬ ve awˬ ceuˬ hkʼa peu˗eˬ htaꞈ te luˬ tuˬ, Noˉaꞈ yawˇ hui htaꞈ shaˍ tiꞈ piˇ ve yoˬ. Yaˬhoˉvaˬ Noˉaꞈ htaꞈ kʼoˆ piˇ ve, “chaw yaˇ chi ve teˇ hpaˍ haiˬ jaˇ ve pa taw, miˬ guiˬ chi ve chaꞈ chiˆ jaˇ peuˬ. Chi htaꞈ pa taw, chaw yaˇ hkʼa peu˗eˬ ve htaꞈ te luˬ te sheˆ piˇ tuˬ ngaˬ dawˇ cheˆ taˍ peuˬ,” leh “miˬ guiˬ hkʼoˆ a shaꞈ hkʼa teꞈ chehˇ ve awˬ ceuˬ hkʼa peu˗eˬ ve htaꞈ te luˬ te sheˆ piˇ tuˬ, miˬ guiˬ chi ve awˬ hkʼoˆ lo ngaˬ iˉ kaˆ uiˍ taˆ la piˇ tuˬ yoˬ. Miˬ guiˬ hkʼoˆ cawˬ ve awˬ ceuˬ hkʼa peu˗eˬ suh˗e tuˬ yoˬ.” Chi hkʼa peu˗eˬ, Noˉaꞈ shu htaꞈ kʼoˆ piˇ ve yoˬ. Leh yawˇ hui gʼa ponˬ gaˇ kʼo hkʼaˬ hkʼe gʼa te tuˬ, Noˉaꞈ kʼoˆ maˍ laˇ taˍ ve yoˬ. Yaˬhoˉvaˬ kʼoˆ ve, “haw loꞈ kʼoˍ oˇ ve awˬ hkʼaw lo gʼa loꞈ˗e tuˬ yoˬ.”—Awˬ hkuiˉ puiˍ 6:13, 17, 18.

8. Yonˍ hkʼaˇ htaꞈ Yaˍkoˆ hkʼaˬ hkʼe kʼoˆ taˍ ve le?

⁸ Pawˇluꞈ Heˍbrehˇ chaw htaꞈ bvuhꞈ piˇ ve maˇ maw maw hkʼawꞈ nawˉ, Yaˍkoˆ yonˍ hkʼaˇ htaꞈ kaꞈ bvuhꞈ taˍ ve yoˬ. Yawˇ kʼoˆ ve, “kanˉ maˇ te leh, nawˬ yonˍ ve maˍ laˇ˗oˆ. Ngaˬ lehˬ, kanˉ te ve awˬ hkʼaw lo, ngaˬ yonˍ ve nawˬ htaꞈ maˍ laˇ tuˬ yoˬ.” (Yaˍkoˆ 2:18) Yaˍkoˆ kʼoˆ maˍ laˇ taˍ ve, yonˍ ve cawˬ tuˬ oˇ ve teˇ ceuˬ awˬ tehˬ cawˬ ve tehꞈ yonˍ ve ceh tiˉ maˇ lawꞈ. Neˇ teˇ hpaˍ kaꞈ Gʼuiˬ sha cawˬ ve tehꞈ yonˍ ve htawˇ, yawˇ hui Yaˬhoˉvaˬ hkʼaw yonˍ ve maˇ cawˬ. Awˬ tehˬ kʼo, yawˇ htaꞈ tawˍ taˍ ve yoˬ. (Yaˍkoˆ 2:19, 20) Yaꞈ hkʼaˇ, chaw teˇ gʼaˇ yonˍ hkʼaˇ cawˬ htaˇ, Yaˬhoˉvaˬ ha lehˬ ve te piˇ tuˬ, yawˇ daꞈ ve htaꞈ te ve yoˬ. Aˍbraˍhanˍ kaꞈ chi hkʼe te ve yoˬ. Yaˍkoˆ kʼoˆ ve, “ngaˬ hui ve awˬ pa Aˍbraˍhanˍ lehˬ, yawˇ ve yaˇ paˍ Iˉcaˆ htaꞈ tanˇ kuiˬ hkʼoˆ tanˇ ve teˇ yanˇ, kanˉ te ve pa taw yawˇ hteˇ ve cawˇ ve chaw hpehꞈ la ve maˇ heˆ laˇ. Yawˇ te ve kanˉ geh hkʼa geh yonˍ ve kaꞈ cawˬ leh, kanˉ htaꞈ pa taw yawˇ yonˍ ve biˇ la ve yoˬ.” Yonˍ ve lehˬ maˇ te ve kʼo tcuhˉ kuiˬ maˇ cawˬ, Yaˍkoˆ kʼawꞈ kʼoˆ maˍ laˇ ve yoˬ. “Awˬ to awˬ hkʼaw lo co ha maˇ cawˬ kʼo suh ve yoˬ. Chi hkʼa shuˍ shuˍ, yonˍ ve teˇ ceuˬ htawˇ kanˉ maˇ te ve kʼo, suh taˍ ve yoˬ.”—Yaˍkoˆ 2:21-23, 26.

9, 10. Yaˇ hpu htaꞈ yonˍ ve hkʼaˬ hkʼe kʼoˆ gaˇ ve le?

⁹ 30 hkʼawꞈ hpaˆ peuˬ hkʼawꞈ nawˉ, Yoˇhanˬ ha lehˬ ve bon hkawˇ leh liꞈ 3 kʼuˉ htaꞈ kʼawꞈ bvuhꞈ taˍ sheˍ ve yoˬ. Awˬ nu ve Liꞈ hpu bvuhꞈ paˍ hkʼa shuˍ, yonˍ hkʼaˇ hkʼaˬ hkʼe ve le tehꞈ Yoˇhanˬ na gʼa ve yoˬ. Yoˇhanˬ bvuhꞈ htaˇ laiˉ pawˆ kʼo, yawˇ Heˍlaˍshaˆ hkawˇ yehˇ ve kʼoˆ gaˇ ve lehˬ “yonˍ hkʼaˇ hpeuꞈ maw piˇ” ve yoˬ.

¹⁰ Tawˇ pa haˉ te kʼo, Yoˇhanˬ kʼoˆ maˍ laˇ ve, “Yaˇ hpu htaꞈ yonˍ ve chaw lehˬ, co tiꞈ ha tiꞈ cawˬ ve yoˬ. Yaˇ hpu htaꞈ maˇ haꞈ yuˬ ve chaw lehˬ, co tiꞈ ha tiꞈ htaꞈ maˇ gʼa mawˬ. Yawˇ awˬ hkʼoˆ htaꞈ Gʼuiˬ sha nyi ma zuhˆ ve teˇ ceuˬ cawˬ taˍ ve yoˬ.” (Yoˇhanˬ 3:36) Yaˇ hpu htaꞈ yonˍ tuˬ, ngaˬ hui Yeˍsuˆ htaꞈ gʼa na yuˬ ve yoˬ. Yoˇhanˬ bvuhꞈ taˍ ve liꞈ hkʼaw, co co taiˍ taiˍ a shaꞈ gʼa tuˬ, yawˇ leh yawˇ ve awˬ pa htaꞈ ngaˬ hui gʼa yonˍ ve yoˬ tehꞈ laiˉ pawˆ Yeˍsuˆ kʼoˆ ve yoˬ.—Yoˇhanˬ 3:16; 6:29, 40; 11:25, 26; 14:1, 12.

11. Ngaˬ hui awˬ tehˬ awˬ na gʼa shiˍ ve pa taw, Yaˬhoˉvaˬ htaꞈ ha lehˬ jaˇ ve tehꞈ hpeuꞈ maw piˇ tuˬ, hkʼaˬ hkʼe te gʼa ve le?

¹¹ Yaˬhoˉvaˬ leh yawˇ ve Yaˇ hpu ve awˬ tehˬ awˬ na htaꞈ ngaˬ hui na gʼa tuˬ, yawˇ daꞈ kehˬ ve awˬ ha hpu yehˇ ve yoˬ. (Luˉkaꞈ 10:21 gʼaw ve.) Yaˬhoˉvaˬ te ve hkʼa peu˗eˬ ngaˬ hui ha lehˬ jaˇ ve tehꞈ hpeuꞈ maw piˇ tuˬ, hkʼaˬ hkʼe te gʼa ve le? Ngaˬ hui yawˇ awˬ paˇ lo meuˆ daꞈ gʼa tuˬ, “ngaˬ hui ve yonˍ ve teˇ ceuˬ htaꞈ awˬ hkuiˉ puiˍ tanˬ te leh biˇ la piˇ shehˍ hpaˇ hpehꞈ ve” Yeˍsuˆ htaꞈ yehˇ ve, ngaˬ hui hkʼaˬ htaˆ kaꞈ awˬ bon uiˍ jaˇ kʼoˆ piˇ cawˇ ve yoˬ. (Heˍbrehˇ 12:2) Leh ngaˬ hui ve yonˍ hkʼaˇ uiˍ la mvuh la tuˬ, hkʼaˬ htaˆ kaꞈ  Yaˬhoˉvaˬ geh bon gʼa lawˬ leh Liꞈ hpu gʼa henˇ ve yoˬ.—Eˇfeˇsuꞈ 6:18; 1 Peˍtruˆ 2:2.

12. Ngaˬ hui yonˍ hkʼaˇ cawˬ ve kʼo, aˬ htoꞈ ma te tuˬ le?

¹² Yaˬhoˉvaˬ ve ka tiꞈ htaꞈ ngaˬ hui hkʼa dehꞈ dehꞈ yonˍ ve, hkʼaˬ htaˆ kaꞈ hpeuꞈ maw piˇ cawˇ ve yoˬ. Tawˇ pa haˉ te kʼo, Gʼuiˬ sha ve mvuhˇ miˬ teˇ gʼaˇ le le htaꞈ hto piˇ leh yawˇ hui Yeˍsuˆ ve awˬ laꞈ gʼawˇ hpehꞈ la tuˬ, hkʼaˬ htaˆ kaꞈ ga piˇ cawˇ ve yoˬ. ‘Chaw hkʼa peu˗eˬ awˬ pon daꞈ ve htaꞈ te˗a veuˬ. Yehˬ kʼa tehꞈ kʼoˆ ve yonˍ ve chaw teˇ hpaˍ awˬ pon leuˉ leh daꞈ ve htaꞈ te˗a veuˬ’ ngaˬ hui hkʼaˬ htaˆ kaꞈ te cawˇ ve yoˬ. (Gaˍlaˍtiˆ 6:10) Leh ngaˬ hui Yaˬhoˉvaˬ ve awˬ chawˇ hpehꞈ ve maˇ luˬ tcuh gaˇ ve pa taw, ngaˬ hui coˇ caˇ leh “chaw awˬ piˍ ve awˬ liˇ awˬ hkʼaˇ teˇ hpaˍ htaꞈ kaꞈ kʼehˆ baˬ” cawˇ ve yoˬ.—Kawˇlawˇsehˇ 3:5, 8-10.

13. “Gʼuiˬ sha htaꞈ yonˍ ve” lehˬ a yeˇ hkʼaˬ hkʼe taw uiˍ ve le? Chi ve Liꞈ hpu hkʼaˬ hkʼe kʼoˆ maˍ laˇ taˍ ve le, leh aˬ htoꞈ ma pa taw le?

¹³ Liꞈ hpu hkʼaw kʼoˆ ve, “yonˍ ve teˇ ceuˬ maˇ cawˬ ve kʼo, Gʼuiˬ sha nyi hkʼaˇ suh tuˬ te maˇ gʼa. Awˬ lawn kʼo, Gʼuiˬ sha geh jiˆ kʼai ve chaw lehˬ, Gʼuiˬ sha cawˬ ve htaꞈ maˇ kʼoˆ, yawˇ htaꞈ ca ve chaw hui htaꞈ awˬ bon piˇ ve htaꞈ maˇ kʼoˆ, yawˇ gʼa yonˍ ve yoˬ.” (Heˍbrehˇ 11:6) “Gʼuiˬ sha htaꞈ yonˍ ve” lehˬ awˬ tehˬ ve Hkriꞈ yaˇ awˉ lawˉ peuˇ gʼa cawˬ ve teˇ ceuˬ hpehꞈ ve, Liꞈ hpu hkʼaw kaꞈ kʼoˆ maˍ laˇ taˍ ve yoˬ. Chi lehˬ ngaˬ hui “awˬ hkuiˉ puiˍ” teh taˍ ve yoˬ. (Heˍbrehˇ 6:1) Hkʼaˬ htaˆ kaꞈ Yaˬhoˉvaˬ ve awˬ chawˇ hpehꞈ gʼa tuˬ, awˬ nu ve a yeˇ uiˍ ve te hkʼaˇ dawˇ hkʼaˇ kaꞈ ngaˬ hui gʼa cawˬ ve yoˬ.—2 Peˍtruˆ 1:5-7 gʼaw ve; Yuˇdaꞈ 20, 21.

14, 15. Haꞈ pehnˇ ve htaꞈ tehˆ htaˇ, yonˍ ve a yeˇ hkʼaˬ hkʼe taw uiˍ ve le?

¹⁴ Liꞈ hpu bvuhꞈ paˍ awˬ nu ve teˇ hkʼaˇ dawˇ hkʼaˇ aꞈ kehˉ yonˍ ve htaꞈ kʼoˆ maˇ ve yoˬ. Chi kʼoˆ gaˇ ve, yonˍ ve a yeˇ uiˍ jaˇ ve te hkʼaˇ dawˇ hkʼaˇ hpehꞈ˗aw laˇ?

¹⁵ Pawˇluꞈ yonˍ ve leh haꞈ pehnˇ ve htaꞈ tehˆ daꞈ ve yoˬ. Yawˇ kʼoˆ ve, ‘hkʼaw teˇ hpaˍ htaꞈ jiˆ kʼai gʼa tuˬ yonˍ ve nyi ma hkʼa biˇ cawˬ ve htawˇ haꞈ pehnˇ ve maˇ cawˬ kʼo, ngaˬ teꞈ chiˉ awˬ bon maˇ cawˬ.’ (1 Kawˇrenˍhtuˆ 13:2) Yeˍsuˆ kʼoˆ ve, Gʼuiˬ sha htaꞈ haꞈ ve lehˬ ‘awˬ liˇ tawˇ hkawˇ aꞈ kehˉ uiˍ’ ve yoˬ. (Maꞈhtehˍ 22:35-40) Gʼuiˬ sha dawˇ cawˇ ve awˬ nu ve te hkʼaˇ dawˇ hkʼaˇ ngaˬ hui gʼa tuˬ, haꞈ pehnˇ ve teˇ ceuˬ gʼa cawˬ ve yoˬ. Tawˇ pa haˉ te kʼo, Liꞈ hpu hkʼaw kʼoˆ ve, haꞈ pehnˇ ve lehˬ “hkʼa peu˗eˬ htaꞈ yonˍ puiˉ” ve yoˬ. Chi htaꞈ pa  taw, Liꞈ hpu hkʼaw Gʼuiˬ sha teˇ ceuˬ le le kʼoˆ laˇ taˍ ve htaꞈ ngaˬ hui yonˍ tuˬ, haꞈ pehnˇ ve gʼa cawˬ ve yoˬ.—1 Kawˇrenˍhtuˆ 13:4, 7.

16, 17. Yonˍ ve leh haꞈ pehnˇ ve, Liꞈ hpu hkʼaw hkʼaˬ hkʼe kʼoˆ taˍ ve le? Hkʼaˬ ve teˇ ceuˬ uiˍ jaˇ ve le, leh aꞈ htoꞈ ma pa taw le?

¹⁶ Yonˍ ve leh haꞈ pehnˇ ve, chi a yeˇ uiˍ jaˇ leh Liꞈ hpu bvuhꞈ paˍ hkʼaˬ htaˆ kaꞈ chi nyiˇ maˬ teˇ geh yehˇ ve yoˬ. Pawˇluꞈ awˬ viˉ awˬ nyi htaꞈ beˆ maˍ piˇ ve, “yonˍ ve leh haꞈ pehnˇ ve teˇ ceuˬ nyi ma pui htaꞈ htanˬ tuˬ hkʼe veuꞈ deh” ve yoˬ. (1 Hteˇsaˍlawˇniˆ 5:8) Yeˍsuˆ htaꞈ caˉ daꞈ ve Peˍtruˆ kʼoˆ ve, “yawˇ htaꞈ nawˬ hui maˇ mawˬ jaw htawˇ, nawˬ hui yawˇ htaꞈ haꞈ chehˇ ve yoˬ. Chi beuꞈ yawˇ htaꞈ maˇ mawˬ htawˇ, nawˬ hui yawˇ htaꞈ yonˍ” ve yoˬ. (1 Peˍtruˆ 1:8) Yaˍkoˆ leuˆ yuˬ taˍ ve awˬ viˉ awˬ nyi htaꞈ kʼoˆ piˇ ve, “yonˍ ve teˇ ceuˬ awˬ hkʼaw lo paw sha la tuˬ, haˍ ve gʼawˇ ve miˬ guiˬ yaˇ hui htaꞈ Gʼuiˬ sha leuˆ yuˬ ve maˇ heˆ laˇ. Gʼuiˬ sha htaꞈ haꞈ ve chaw hui htaꞈ yawˇ ve mvuhˇ miˬ piˇ tuˬ yoˬ tehꞈ kʼoˆ taˍ ve hkʼe yawˇ hui lehˬ mvuhˇ miˬ awˬ shiˉ caˬ shehˍ hpaˇ hpehꞈ ve yoˬ.” (Yaˍkoˆ 2:5) Yoˇhanˬ bvuhꞈ ve awˬ liˇ tawˇ hkawˇ kʼoˆ gaˇ ve lehˬ “yawˇ ve Yaˇ hpu Yeˍsuˆ Hkriꞈ ve awˬ meh htaꞈ ngaˬ hui gʼa yonˍ leh, Yaˇ hpu tawˇ piˇ laˇ ve hkʼe, teˇ gʼaˇ leh teˇ gʼaˇ gʼa haꞈ daꞈ ve yoˬ”—1 Yoˇhanˬ 3:23.

¹⁷ Yaꞈ hkʼaˇ Pawˇluꞈ kaꞈ bvuhꞈ ve, “chi beuꞈ lehˬ, yonˍ ve, dawˇ law ve leh haꞈ pehnˇ ve, chi shehˆ ceuˬ cawˬ taˍ ve yoˬ. Yaꞈ hkʼaˇ, chi shehˆ ceuˬ awˬ hkʼaw lo uiˍ jaˇ ve lehˬ haꞈ pehnˇ ve teˇ ceuˬ yoˬ.” (1 Kawˇrenˍhtuˆ 13:13) Awˬ gʼuˇ suhˍ hpawˇ, Gʼuiˬ sha ka tiꞈ te taˍ laˇ ve miˬ guiˬ awˬ suhˉ htaꞈ ngaˬ hui maˇ gʼa kʼawꞈ yonˍ˗o. Awˬ lawn kʼo, awˬ ceuˬ chi ve hpehꞈ laˬ jaw peuˬ. Liꞈ hpu hkʼaw bvuhꞈ taˍ ve hkʼe leˇ ngaˬ hui ve a shaꞈ daꞈ tuˬ yoˬ. Yaꞈ hkʼaˇ, ngaˬ hui hkʼaˬ htaˆ kaꞈ Gʼuiˬ sha leh chaw teˇ gʼaˇ le le htaꞈ kaꞈ gʼa haꞈ ve yoˬ. Awˬ tehˬ kʼo, haꞈ pehnˇ ve chi uiˍ mvuh la tuˬ ngaˬ hui hkʼaˬ htaˆ kaꞈ gʼa te ve yoˬ.

18, 19. Awˬ lawn kʼo, Gʼuiˬ sha ve chaw yonˍ ve pa taw chi teˇ hkui hkʼaˬ hkʼe hpehꞈ la ve le? Chiˇ mvuh ve htaꞈ a shu gʼa keunˍ ve le?

¹⁸ Chi beuꞈ teˇ co˗e, Yaˬhoˉvaˬ ve chaw yawˇ ve mvuhˇ miˬ htaꞈ yonˍ leh awˬ hkʼaˇ suh gʼaꞈ te ve yoˬ. Leh yawˇ hui haꞈ daꞈ ve yoˬ. Awˬ lawn kʼo, Yaˬhoˉvaˬ ve awˬ ha hpu yawˇ hui ve a shaꞈ teꞈ hkʼaˇ hkʼaw beˆ maˍ tcuh ve yoˬ. (Gaˍlaˍtiˆ 5:22, 23) Awˬ leh meuˇ hkʼaˬ hkʼe hpehꞈ la ve le? Miˬ guiˬ chi hkʼoˆ awˬ viˉ awˬ nyi 8 lanˬ gʼaˇ hpaˆ cawˬ leh, yawˇ hui Hkriꞈ yaˇ awˬ moˍ hkʼaw gawˬ lehˍ teˇ moˍ teˇ cuˇ tiˉ cawˬ ve yoˬ. Awˬ tehˬ yoˬ, yonˍ ve leh haꞈ pehnˇ ve chi awˬ gʼaˇ uiˍ jaˇ ve yoˬ.

¹⁹ Ngaˬ hui teˇ moˍ teˇ cuˇ tiˉ te gʼa ve chi Gʼuiˬ sha ga laˇ ve pa taw yoˬ. Chi htaꞈ pa taw, yawˇ chiˇ mvuh ve gʼa keunˍ ve yoˬ. (Iˉsaˍyaˆ 55:13) Awˬ lawn kʼo, ngaˬ hui yonˍ ve awˬ hkʼaw lo gʼa ponˬ tuˬ, Gʼuiˬ sha ga laˇ ve pa taw ha lehˬ jaˇ. (Eˇfeˇsuꞈ 2:8) Laiˉ gʼaˇ Yaˬhoˉvaˬ htaꞈ yonˍ tuˬ, yawˇ ga piˇ tuˬ yoˬ. Leh awˬ leh meuˇ ve teˇ yanˇ hteˇ ve cawˇ ve, biˇ ve, leh ha lehˬ ve chaw tiˉ miˬ guiˬ chi hkʼoˆ lo cawˬ leh, Yaˬhoˉvaˬ htaꞈ hkʼaˬ htaˆ kaꞈ chiˇ mvuh tuˬ yoˬ!