1. Jótjín tokoán nga tjínná kjoamakjain.

ALIKUI tongatsʼi chjota nga tjínle kjoamakjain (2 Tesalonicenses 3:2). Tonga je Jeobá binyakao nga sʼele kjoamakjain je chjota xi je bexkón (Romanos 12:3; Gálatas 5:22). Nʼio bʼailee kjoanda je Jeobá nga basenkaoná nga sʼená kjoamakjain.

2, 3. 1) Jmé kjoanda xi tjínná xi totʼatsʼe kjoamakjainná. 2) Jméni xi jchaa i̱ kjoaʼmiya jebi.

² Je Jeobá kui xá kitsjoani je ʼNdíle nga ngatsʼi chjota xi sʼe̱le kjoamakjain tʼatsʼe Jesús jchatʼale je jéele. Tsa tjínná kjoamakjain tʼatsʼe Jesús koaan miyole Jeobá koaan kʼoa koaan kuiyoaa ngantsjai nichxin (Juan 6:44, 65; Romanos 6:23). Nʼio tse kjoanda bakóná je Jeobá. Ninga chjotajée maa kʼoa to kjoabiya bakinná, je Jeobá bení nga koa̱n kui kʼoasʼiaan xi ndatjín (Salmo 103:10). Kuinga kitsoyaniná tʼatsʼe Jesús kao tʼatsʼe kjoabʼechjíntjaile. Kʼianga kisʼená kjoamakjain tʼatsʼe Jesús kʼoa chjotale koan, kʼoati kisʼená kjoachoya nga koa̱n kuiyoaa tokʼia saʼndani (tʼexkiai 1 Juan 4:9, 10). *

³ Tonga jmésani xi machjén nga kataʼyaa xi tʼatsʼe kjoamakjain.  Tsa mená nga sʼe̱ná kjoamakjain, a tokui xi machjén nga jchaa jme xi kisʼin Jeobá tʼatsaan kʼoa jme xi sʼin nichxin xi nroaján. Mai. Tjínsa jmeni xi machjén nga sʼiaan. Kataʼyala jméni.

4. Jméni xi sʼiaan kʼiatsa tjínná kjoamakjain.

⁴ Tsa tjínná kjoamakjain tʼatsʼe Jeobá kao Jesús, tsínjin tokui koa̱njngoni tokoán nga jchaa jmeni xi kisʼin kʼoa jmeni xi sʼa kʼoasʼin. Ñaki yajin ni̱ma̱ná kjuinroajinni nga kʼoasʼin kjuinkoaa yaoná jotsoná kʼoa nga kuinyakoaa je chjota nga katabe xi tʼatsʼe. Je pastro Pablo i kitso: “Tsa si̱kixiyandalai kao ndsoʼbai nga Naili Jesús, kʼoa tsa koa̱nkjainle ni̱ma̱li nga Niná kisikjaʼáyajinnile kʼen Cristo, kʼia kuitjontjainíʼni. Nga̱ kao ni̱ma̱ná makjainná xi tʼatsʼe nga kjoetʼa jéená, tonga kao ndsoʼbaa nikixiyandanía xi tʼatsʼe nga kuitjo̱ntjé” (Romanos 10:9, 10; 2 Corintios 4:13).

5. 1) Ánni nga nʼio chjínile nga sʼe̱ná kjoamakjain. 2) Jngo choa̱ tʼejnai jméni xi tjínnele sʼiaan nga koa̱ntaja kjoamakjainná.

⁵ Kʼiatsa mená nga kuiyoaa ngantsjai nichxin ya sonʼnde chjotsele Niná, tjínnele sʼe̱ná kjoamakjain kʼoa tsín kʼoaiʼndee nga kjuinroajen je kjoamakjainná. Je kjoamakjain yaa mangóson jngo naxó. Tjínnele kjitʼa kʼoéjtenngilee nandá nga nda sʼe̱ kʼoa nga koa̱nngʼa. Tsa tsín kʼoasi̱koaa toxíjin. Tikʼoasʼinni, tjínnele tosi tonda si̱tajaa kjoamakjainná ánni nga tsín kjuinroajensíni (Tito 2:2; 2 Tesalonicenses 1:3; Lucas 22:32; Hebreos 3:12).

6. Jñánile xi jao koya síkʼaxki̱ Hebreos 11:1 xi tʼatsʼe kjoamakjain.

⁶ Ya Hebreos 11:1 * (tʼexkiai) jao koya tsoya xi tʼatsʼe kjoamakjain. Xi títjon, kʼoatso nga je kjoamakjain “kui xi nda nʼiotʼatakoán, nga kjoakixi nga tjío je kjoa xi choyalee”. Je xi choyalee kui jmeni xi tso je Niná nga sʼin nichxin xi nroaján. Tobʼelañá, tsín jao tjínná nga tjóxin ngayeje xi chʼaotjín kʼoa nga jngo sonʼnde chjotse kjoaʼaí. Kʼoa xi majaoni, je Biblia kʼoatso nga je kjoamakjain kui xi bakó nga ñaki tjío “kjoa xi tsín matsen”. Je xi tínchja̱ni kui jmeni xi tjío kjoaixi tonga xi tsín ʼyañá kao xkoaan. Tobʼelañá, Jeobá, Jesucristo, ánkje kao Chjotaxále Niná xi tíjna ngʼajmi (Hebreos 11:3). Jósʼin bakoá nga makjain kjoaixiná jmeni xi tso je Niná kʼoa nga kʼoati makjainná tʼatsʼe jmeni xi tsín ʼyañá kao xkoaan. Kao kui bakoñá josʼin mangínkoaa yaoná, jmeni xi bixoán kʼoa jmeni xi nʼia.

7. Jósʼin basenkaoná je choa̱le Noé nga majinná jmeni xi tsoyanile nga sʼená kjoamakjain (chótsenlai sén xi fitsʼiani kjoaʼmiya jebi).

⁷ Je choa̱le Noé basenkaoná nga majinná jmeni xi tsoyanile nga sʼená kjoamakjain. Je pastro Pablo kʼoakitso nga je Noé kitsokjonke Niná, “tsakʼénda chitsoje. Kʼoasʼin jitjontjai ngatsʼi chjotaniʼyale, nga̱ kʼoasʼin tongini tsakʼinyale xi tʼatsʼe kjoa xi kje matsenjinsa” (Hebreos 11:7). Je Noé koankjainle jmeni xi kitsole Niná, kuinga tsakʼéndani je arca. Tsakui nichxin kiskonangile je chjotandaindʼiale ánni nga kui tíbʼéndani. Alikui jao tjínná nga kitsoyale je Noé, nga̱ je Biblia kʼoatso nga “kinchja̱ya xi kjoakixi” (2 Pedro 2:5). Kisikjinrʼoé je chjota nga jngo Jtsínʼio kjoaʼaíkao Niná nga kjoaʼaxin je kjoatsʼen. Tsakui nichxin tikui én kisichjénni Noé jokitsole Niná, kʼianga kitso: “Jekʼoatjín tokoan nga sikjesoan ngatsʼi xi tjíokon, nga̱ je sonʼnde ñaki to kjoatsʼen kijnakitse” kʼoa  “jtsínʼio kjoaʼaikoa i̱ sonʼnde nga sikjesoan ngatsʼi xi kui tjíokonni nganʼio xi tsjoá kjoabijnachon. Kʼoa ngatsʼi xi tjío i̱ sonʼnde kuiyání”. Xijekoan, je Noé kʼoajin kitsole je chjota jmeni xi tjínnele sʼin nga kuitjontjai. Nga̱ je Jeobá i kitsole Noé: “Tjínneli kuitjásʼain ya arca” (Génesis 6:13, 17, 18).

8. Jókitso je Santiago tʼatsʼe kjoamakjain.

⁸ Je Santiago kʼoati kinchja̱ni tʼatsʼe kjoamakjain. Tsakui nichxin kʼia kiski je kartale nga jekiskile Pablo je chjota hebreo. Je Santiago i kitso: “Takonái josʼin nga makjainli, tsa tsín nda tjín xáli kʼoa an koakole josʼin nga makjainna nga̱ nda tjín xána” (Santiago 2:18). Kui xi kitsonile nga tsín tsa tokui machjén nga koa̱nkjainná tʼatsʼe Niná. Tobʼelañá, je ánkjele na̱i makjainle nga tíjna Niná tonga kontra batiole (Santiago 2:19, 20). Je chjota xi tjínle kjoamakjain kui kʼoasʼín jmeni xi sasénle Niná. Je Abrahán kʼoakisʼin. Je Santiago i kitso: “A tsí tsa je xále xi kisikjetʼa jéele Abraham, je nʼaijchákjinná, kʼia nga kitsjoatʼa Isaac, je ʼndíle, ya sonxtabe. A tsí ʼyai nga kʼoasʼin Abraham kisitjosonkao xále josʼin koankjainle. Xi koankjainle ñaki koanjngosonní xi totʼatsʼe xále”. Kʼoa xijekoan, je Santiago kʼoakitso nga tsín jme chjíle kjoamakjain tsa tsín kao xáná bakoñá nga tjínná kjoamakjain. I kitso: “Je xi makjainná tochajinní, tsa tsín nda tjín xáná” (Santiago 2:21-23, 26).

9, 10. Jméni xi tjínnele sʼiaan tsa tjínná kjoamakjain tʼatsʼe Jesús.

⁹ Nga jejaʼato 30 nó nga kiski je kartale Santiago, je Juan kʼiaa kiski je Evangelio xi jaʼaínle yʼa kʼoa ngi jan karta kiski. Kʼoati koanjinle josʼin tsoyanile nga sʼená kjoamakjain. Nkjín kʼa kisichjén je én griego xi sakʼoa i̱sʼin faʼatoya: “Je xi makjainle”.

¹⁰ Tobʼelañá, je Juan i kitso: “Je xi makjainle tʼatsʼe ʼndíle Niná, tjínle kjoabijnachon ngantsjai. Je xi tsín makjainle tʼatsʼe ʼndíle Niná, likui skoe̱ kjoabijnachon, tonga je kjoañʼai xi Niná tsjoále tíjnanele” (Juan 3:36). Nga tjínná kjoamakjain tʼatsʼe ʼNdíle Niná kui xi tsonile nga nitjosonlee (chótsenlai je rekuadro “Jósʼin tsoyanile”). Nga bʼexkiaa jmeni xi kiski je Juan, kui tsoyaná nga me kjitʼa kʼoakitso je Jesús nga tsa mená sʼe̱ná kjoabijnachon xi tsínkʼia fetʼa tjínnele sʼe̱ná kjoamakjain xi tʼatsʼe kao tʼatsʼe Nʼaile (Juan 3:16; 6:29, 40; 11:25, 26; 14:1, 12).

11. Jósʼin bakoá nga ʼyachjiá nga tsakasenkaoná je Jeobá nga tsaʼyaa xi tʼatsʼe.

¹¹ Je Jeobá kui nganʼiotsjele kisichjén nga tsakasenkaoná nga koanjinná xi tʼatsʼe je kao tʼatsʼe ʼNdíle kʼoa nga koankjainná xi tʼatsʼe (tʼexkiai Lucas 10:21). * Jósʼin bakoá nga ʼyachjiá jme xi kisʼin je Jeobá. Kʼiaa nga kʼoailee kjoanda ngantsjai nga títsjoáʼndená nga miyole kjimaa xi totʼatsʼe Jesús, xi tjentítjonná kʼoa xi ñaki síjngo josʼin makjainná (Hebreos 12:2, TNM). Kʼoati machjén nga tosi tonda si̱tajaa kjoamakjainná. Xi koasenkaoná nga si̱tajaa kjoamakjainná kʼiaa nga kʼoétsʼoalee ngantsjai je Jeobá kʼoa  nga ntsjaintsjai chótʼayá je Biblia (Efesios 6:18; 1 Pedro 2:2).

12. Jméni xi sʼiaan tsa tjínná kjoamakjain.

¹² Tsa nʼio tjínná kjoamakjain nga sitjoson jmeni xi tso Jeobá, kao kui koakoñá jmeni xi nʼia. Tobʼelañá, tosi tonda chja̱kaonajmíñá je chjota tʼatsʼe Chjotaxále Niná kʼoa kuinyakoaa nga chjotale Cristo katama. Xi ijngosani, tosi tonda “nda si̱xá tʼatsʼe ngatsʼi” kʼoa ngisaa “tʼatsʼe je xi kʼoati makjainle” (Gálatas 6:10). Kʼoa tosi tonda kʼoénelee yaoná nga tsín tikʼoasʼianñá xi chʼaotjín nga̱ tsín mená nga si̱chaa je kjoamiyo xi tjínná kao Jeobá (Colosenses 3:5, 8-10).

13. 1) Ánni nga nʼio chjínile nga koa̱nkjainná tʼatsʼe Niná. 2) Jméni xi tso Biblia tʼatsʼe kjoamakjain, kʼoa ánni.

¹³ Je Biblia itso: “Tsa tsín makjainná, likui nda sʼekon Niná xi tʼatsaan. Je xi faʼaikonle Niná, machjén nga koa̱nkjainle nga tíjna Niná, kʼoa nga Niná tsjoá chjíle je chjota xi nʼio básjai nga je” (Hebreos 11:6). Je Biblia kʼoati tso nga je kjoamakjain kui xi títjon sʼele jngo chjotale Cristo (Hebreos 6:1). Tonga ali tsa tokuijin kjoamakjain xi machjén, nkjínsa koya xi machjén nga tosi tonda miyoná koa̱n je Jeobá (tʼexkiai 2 Pedro 1:5-7; * Judas 20, 21).

14, 15. Ánni nga ngisa machjénni nga sʼe̱na kjoatsjoacha tikʼoajinni kjoamakjain.

¹⁴ Je choʼndale Niná xi kiski Biblia kui je kjoamakjain xi ngisa síkʼaxki̱ tikʼoajinni xi kjaʼaínile. A kui xi tsonile jebi nga kui kjoamakjain xi ngisa chjíle nga sʼe̱ná. Kataʼyala.

¹⁵ Je pastro Pablo i kitso kʼianga kinchja̱ni tʼatsʼe kjoamakjain kao kjoatsjoacha: “Nda tsa tse makjainna ngayije, saʼnda nga koa̱nna kjoaʼaxian nindo, tsa tsínna kjoatjaocha, nijmejianʼni an” (1 Corintios 13:2). Kʼoa je Jesús kʼoakitso nga je “kjoatéxoma xi ngisa ngʼa” tíjna kuinga tsjoacha koaan je Niná (Mateo 22:35-40). Je kjoatsjoacha basenkaoná nga kʼoamakjoaan josʼin sasénle Niná. Tobʼelañá, je Biblia kʼoatso nga je kjoatsjoacha “makjainle ngayije”. Je kjoatsjoacha basenkaoná  nga makjainná ngayeje jmeni xi tso Niná (1 Corintios 13:4, 7).

16, 17. 1) Jósʼin bakó je Biblia nga nʼio chjíle je kjoamakjain kao kjoatsjoacha. 2) Jméni xi ngisa nʼio chjíle, kʼoa ánni.

¹⁶ Je Biblia kʼoatso nga nʼio chjíle je kjoamakjain kao kjoatsjoacha. Kuinga nʼio nkjín kʼa ñatjen bʼaxki̱ni ya Biblia. Tobʼelañá, je Pablo i kitsole je chjotale Cristo: “Je xi makjainná, je kjoatjaocha katasʼená joni tsa chingaki̱cha̱ xi sondado yʼakjá” (1 Tesalonicenses 5:8). Je Pedro i kitso xi tʼatsʼe Jesús: “Alikui tsaʼyao Jesucristo, tonga tjaochanío. Makjainno xi tʼatsʼe nga je, nda tsa tsín tiʼyao ndʼaibi” (1 Pedro 1:8). Je Santiago i kitsole je chjotale Cristo xi kʼoati ya koai ngʼajmi: “Niná a tsín tsakjaʼájin chjotayo̱ma̱ xi tjín i̱ sonʼndebi, jméni nga nʼio koa̱nkjainsínile tʼatsʼe Niná, nga kʼoaikjoatjaosínile je kjoatéxoma xi Niná kitsjoa tsʼoa nga tsjoále je xi tsjoake nga je” (Santiago 2:5). Kʼoa je Juan i kitso: “Katamakjainná tʼatsʼe jaʼaínle ʼndíle Niná, Jesucristo, kʼoa tjaocha katamaa xíngiaa” (1 Juan 3:23).

¹⁷ Tonga je Pablo i kitso: “Ndʼaibi kʼoasʼin tjíontsjai xi makjainná, xi kjoachoyakaokjoa, kʼoa xi kjoatjaocha, kʼoa je xi jan kjoabi, tonga je xi ngisa títjon, je xi kjoatjaocha” (1 Corintios 13:13). Ánni kʼoakitsoni je Pablo nga kui kjoatsjoacha xi ngisa títjon tíjna. Kuinga ya sonʼnde chjotse jekuitjoson ngayeje jmeni xi tso je Biblia kʼoa tsín tikoa̱nchjénniná kjoamakjain. Tonga xi tsín jchangi kui je kjoatsjoacha, nga tsjoacha koaan je Niná kao xíngiaa. Nga kjoaʼato nichxin sa tsjoacha sa tsjoachajin koaan.

18, 19. Jósʼin tíbichómani nga tjíosʼele kjoamakjain je choʼndale Niná nichxin xi tiyoaa ndʼaibi, kʼoa ʼyáni xi chʼa̱sjengʼaa nga kʼoakjima.

¹⁸ Nichxin xi tiyoaa ndʼaibi, je choʼndale Niná tjíotsjoáʼndee nga je nganʼiotsjele Niná tjíobándiaale josʼin tjíofikao yaole. Makjainle tʼatsʼe Chjotaxále Niná kʼoa tsjoánganʼiole. Kʼoa xi ijngosani, tsjoakee xínkjín (Gálatas 5:22, 23). Nga tjínle kjoamakjain kʼoa nga tsjoake xínkjín je choʼndale Niná, nyʼán tjío kʼoa jtín sʼin tjío kʼoa tsʼato jin miyón mani jngo tjíjtsa Sonʼnde. Jebi kui xi bakóná nga nʼio chjíle je kjoamakjain kao kjoatsjoacha.

¹⁹ Kuinga jtín sʼin tiyoñá nga je Jeobá tíbasenkaoná. Kʼoa kuinga bakinnile nga chʼa̱sjengʼaa (Isaías 55:13). Nʼio bʼailee kjoanda nga koa̱n kuitjo̱ntjé xi totʼatsʼe nga makjainná (Efesios 2:8). Je Jeobá tosi tonda koasenkao je chjota nga sʼe̱le kjoamakjain xi tʼatsʼe. Kʼoa kjoaʼaí nichxin nga je chjota xi koatio jngo tjíjtsa Sonʼnde ñaki tsje koa̱n, kixi koa̱n kʼoa nʼio tsjoa sa̱tío kon. Kʼoa kʼoasjengʼa je Jeobá ngantsjai nichxin.