1. Tinojizwa kudini ngo kuva no rutendo?

ASIPI vandhu vese vano rutendo. (2 VaTesalònika 3:2) Asi Jehovha anopa rutendo kuno vese vanomunamata. (VaRoma 12:3; VaGalàsia 5:22) Tinobonga maningi Jehovha ngo kutipa rutendo!

2, 3. (a) Tinobesereka kudini ngo kuva no rutendo? (b) Mubvunjo japi jatinoda kuvona?

² Jehovha wakapa mwana wake anodiwa kuitira kuti ariwese anokhombija rutendo kuna Jesu aregerehwe zvishaishi. Izvi zvakafunungura mukana kuti vandhu vave shamwari ja Jehovha zve vararame no kucingaperi. (Johani 6:44, 65; VaRoma 6:23) Kunaka mwoyo kwakadini kwakakhombija Jehovha! Pikija hazvo tiri vashaishi zve tinofanera kufa Jehovha wakavona kuti tinokwanisa kuita zvakanaka. (Nduyo 103:10) Wakatibesera kuziva masoko akanaka ngo pamusoro pa Jesu no muripo wake. Patakatanga kuva no rutendo muna Jesu no kuva vateveri vake, takava no vetero yo upenyu hucikaperi!—Verenganyi 1 Johani 4:9, 10.

³ Ngo zvapi zvimweni zvatingajija ngo pamusoro po rutendo?  Tikaziva basi zvaakatiitira Mwari no zvaacazoita kumbejiyo, zvinoreva kuti tino rutendo here? Ngativone zvatinodikanazve kuita.

4. Tikava no rutendo, tinozokwevejehwa kuitenyi?

⁴ Tikava no rutendo kuna Jehovha no kuna Jesu, atidozivi basi ngo pamusoro po zvavakatiitira no zvavanozotiitira. Tinozovavo no cido cakavanga co kurarama maererano no zvavanotijijisa. Zve tinozodisisa kubesera vamweni kuti vavazive. Mupostori Pauro wakananga kudari: ‘Ngo kuti kudari wecizivisa pambhene ‘soko iri ngo muromo wako’ kuti Jesu ndi Tenji zve ucitenda mu mwoyo mako kuti Mwari wakamumusa kubva ku vakafa, ucaponeswa. Ngo kuti mundhu anotenda ngo mwoyo kuti awane urungami, asi anozivisa pambhene ngo muromo kuti awane ruponeso.’—VaRoma 10:9, 10; Shanduro yeNyika Itsva, 2 VaKorinto 4:13.

5. Ngenyi rutendo hunosisira maningi, zve tinodikana kuitenyi kuti tirambe tino rutendo hwakavanga? Ipanyi muezaniso.

⁵ Zviri pambhene kuti tiwane upenyu hucikaperi mu nyika imbza ya Mwari, tinodikana kuva no rutendo zve unodikana kuramba hwakavanga. Rutendo hwakadari inga muti. Tinoramba teciudirijira kuti urambe wakathemba zve wecikura. Asi kudari tikatama kuudirijira ushoni, unozofota, wofa. Mukufanana, tinodikana kuva no gwinyiso ro kuti rutendo hwedu huri kuramba ‘hwakavanga’ kana uno uhomi zve ‘hwecienderera mberi.’—Tito 2:2; 2 VaTesalònika 1:3; Luka 22:32; Vaheberi 3:12.

6. Pana Vaheberi 11:1, panosanangurisa kudini rutendo ngo njira mbhiri?

⁶ Pana Vaheberi 11:1, Bhaibheri rinosanangura kuti rutendo icinyi. (Verenyanyi.) (1) Rutendo “ndihwona hwokadi hwokuti tino bziro bzo tinovetera.” Zviro “bzo tinovetera” zvinobatanija zvigondiso zva Mwari ngo pamusoro po kumbeji. Inga muezaniso, tinothemba kuti ushati hunozopera zve kunozova no nyika imbza. (2) Rutendo “ndihwona maitiro o kuvonesa,” kana kukhohwa ngo “bziro bzicikavoneki.” Tinoziva kuti Jehovha Mwari, Jesu Kristu, ngirozi no Umambo mugore, zviriyodi kamare, pikija ticikazvivoni. (Vaheberi 11:3) Tingakhombijisa kudini kuti tinotenda zvigondiso zva Mwari pomwe no zviro zviticikavoni? Tinozvikhombija ngo mararamire, mavereketere no maitire edu.

7. Muezaniso wa Nowa unotibesera kudini kuzwisisa kuti rutendo icinyi? (Vonanyi pikica yo kutanga.)

⁷ Tinojijenyi ndi Nowa ngo pamusoro po rutendo? Mupostori Pauro wakananga kuti Nowa, “wakatenda rungwajo hwa Mwari, ngo ndava yo bziro bzainga bzicito bzavoneka, wakaveza piketi [kana kuvaka arka] yakamuponesa no muzi wake.” (Vaheberi 11:7) Zvecivona kuti Nowa wainga no rutendo no zvaainga akabvunjwa ndi Jehovha, iyena wakavaka arka iyo yakakura. Kangaije zvigarisano zvake zvaimubvunjisa kuti waiivakirenyi. Tingava no gwinyiso kuti Nowa wakavadavira. Bhaibheri rinonanga kuti Nowa ‘mucumaeri wo urungami.’ (2 Pedru 2:5, Shanduro yeNyika Itsva) Iyena wakangwaja vandhu kuti Mwari waida kuviisa ndambi kuti aparaje vakashata. Kangaije wakananga kamare magama akashandisa Jehovha, eciti: “Kupera ko vandhu vese kwaguma pa nyasi pangu, ngokuti vozaja nyika ngo uxaixi hwavo” zve “ngokuti ndinozoviisa usore, kumwa yakawanda panyezuru po nyika, ndinozondondomeja, no kupeja pasi pese bzisikwa  bzese, bzino mwiha wo kupona. Bzese bzinopona pasi bzinozofa.” Kangaije Nowa wakavabvunjazve vandhu zvavaidikana kuita kuti vapokonyoke. Jehovha wakamubvunja kudari: “Unofanera kunghwina mu ngarava [kana arka].”—Genesi 6:13, 17, 18.

8. Jakobo wakanangenyi ngo pamusoro po rutendo?

⁸ Jakobo wakataravo ngo pamusoro po rutendo. Zvinovoneka inga kuti wakazvitara, mupostori Pauro paakandopera kutara bhuku ro Vaheberi. Jakobo wakatara kudari: “Nditatijei rutendo hwako hucina bziito; inini ngo bziito bzangu, ndinozokutatija rutendo hwangu.” (Jakobo 2:18) Jakobo wakasanangura kuti tive no rutendo, tinodikana kuita zvinopinda kudavira basi. Madhimoni anodavira kuti Mwari ariyo, asi iwona aana rutendo kuna Jehovha. Kusiyapo izvo, iwona anomuzonda ngo simba rese. (Jakobo 2:19, 20, BMAA) Ngo divi rimweni, mundhu ano rutendo, anodakajisa Mwari ngo kuita mabasa kana zviito zvakanaka. Ngo zvaakaita Abhirahama. Jakobo wakatara kudari: “Abhirahama, baba wedu, aazivi kunaswa ngo ndava yo rutendo, pakupira mwana wake Isaki, pa dandiro? Ngo maitiro ondhowo, rutendo hunobesera bziito; rutendo hwakatevererana no bziito. Hunozova hwakaperera ngo ndava yo bziito. Nga ibzo akatevejwa Matahwa anoti: “Abrahama wakatenda Mwari. Bziito bzake bzoverengwa inga ururami.” Wodanijwa ‘xamwari ya Mwari.’” Jakobo wakagogomejera kuti rutendo hucina mabasa ahushandi, eciti: “Mbzakadi kuti muviri ucina [“mujimu,” Shanduro yeNyika Itsva] unofa, rutendovo hucina bziito hunofavo”.—Jakobo 2:21-23, 26.

9, 10. Zvinoda kurevenyi kuvonesa rutendo kuna Mwana?

⁹ Papera makore anodarika kuita 30, Johani wakatara Vhangeri rake pamwepo no karata ndhatu. Mukufanana no vatari vamweni vo Bhaibheri, iyena waizwisisa kuti rutendo icinyi. Pa bvaza zinji mu zvaakatara, Johani wakashandisa gama ro ciGiriki rokuti nguva jimweni rinosandujwa kuti ‘kuvonesa rutendo’ mu ndumi yo Cingezi.

¹⁰ Inga muezaniso, Johani wakasanangura kudari: “Ndiani anotenda Mwana ano uhomi hucingaperi; kaveta ndiani acikapurukiri Mwana aazowani uhomi: uxungu hwa Mwari unozomuwira.” (Johani 3:36) Kuti tivonese kuti tinotenda Mwana tinodikana kuzwira Jesu. Zvokadi, kubvira pa zvakatara Johani, tinokwanisa kuvona kuti Jesu wakananga kazinji kuti kuti tiwane upenyu hucikaperi tinodikana kuvonesa rutendo kwaari no kuna Baba wake.—Johani 3:16; 6:29, 40; 11:25, 26; 14:1, 12.

11. Tingakhombijisa kudini kuti tiri kubonga Jehovha ngo kuziva cokwadi?

¹¹ Jehovha anotibesera ecishandisa mujimu wake mucena kuti atibesere kuzwisisa cokwadi ngo pamusoro po Mwana wake no kumutenda. (Verenganyi Luka 10:21.) Tingakhombijisa kudini kuti tinobonga Jehovha ngo zvese zvaakatiitira? Atidikani kutama kumubonga ngo kutitenderavo kuva no ushamwari naye kubvira kuna Jesu Kristu, ‘Muimiriri Mukuru zve Mukwanirisi wo rutendo hwedu.’ (Vaheberi 12:2, Shanduro yeNyika Itsva) Zve tinodikana kuramba ticivangisa rutendo hwedu ngo kuita mukumbiro nguva  jese kuna Jehovha no kujija Soko rake.—VaEfeso 6:18; 1 Pedru 2:2.

12. Kudari tino rutendo, tinoitenyi?

¹² Tinodikana kuramba tecikhombija ngo zviito zvedu kuti tinothemba zvigondiso zva Jehovha. Inga muezaniso, tinoramba tecicumaera vandhu ngo pamusoro po Umambo hwa Mwari no kuvabesera kuva vajiji va Jesu. Tinoramba ‘teciitira zvauxoni vandhu vese. Bzikuru-kuru ku vatendidoni.’ (VaGalàsia 6:10) Zve tinovangisira kuti ‘tibvise undhu hwo kare pamwepo no maitiro ahwo’ ngo kuti atidi kuti ciri cese cigure ushamwari hwedu na Jehovha.—VaKolosi 3:5, 8-10.

13. “Kutenda Mwari” kunosisira zvakadini? Bhaibheri rinokusanangurisa kudini, zve ngenyi?

¹³ Bhaibheri rinoti: “Pacina rutendo, apana anodakarisa Mwari. Ndiani anokhwedera kuna Mwari, anodikana kutenda kuti ariyo, no kuti ndiyena anopa mupocero vandhu vanomupsanga.” (Vaheberi 11:6) Bhaibheri rinokhombijazve kuti “kutenda Mwari” ndi cimwe co zviro zvo kutanga zvinodikana kuva no muKristu. Ndi divi ro “maambo” edu. (Vaheberi 6:1) Asi kusiyapo rutendo basi, tinodikana kuva no mugariro jimweni jinosisira maningi kuitira kuti tive no ushamwari na Jehovha unoramba uripo.—Verenganyi 2 Pedru 1:5-7; Juda 20, 21.

14, 15. Rutendo hunosisira zvakadini, kuezana no rudo?

¹⁴ Vatari vo Bhaibheri vakanangira rutendo, kazinji kupinda mugariro umweni uri wese. Zvinoreva kuti rutendo ndiwona mugariro unosisira maningi watinodikana kuva nawo here?

¹⁵ Pauro wakaezanisa rutendo no rudo. Iyena wakatara kudari: “Pikija ndive no kutenda kukuru kokukwanisa kutakura matundhu, ndikatama rudo, andiripi ciro.” (1 VaKorinto 13:2) Jesu wakananga kuti “mupango mukuru wo Mutemo” i kuda Mwari. (Mateu 22:35-40) Rudo hunotibesera kuva no mugariro muzinji jimweni jinodakajisa Mwari. Inga muezaniso, Bhaibheri rinonanga kuti rudo “hunotenda bzese.” Ngo kudaro, rudo hunozotibesera kutenda kana kugonda zvinotibvunja Mwari ecishandisa Bhaibheri.—1 VaKorinto 13:4, 7.

16, 17. Bhaibheri tinoti kudini ngo pamusoro po rutendo no rudo? Pa mugariro muviri iji, ngo wapi mukuru, zve ngenyi?

 ¹⁶ Rutendo no rudo ndi mugariro jinosisira maningi, zve vatari vo Bhaibheri kazinji vanojinangira jiri pamwepo. Pauro wakavangisa hama jake kuti jisimire “civikiro co rutendo no rudo.” (1 VaTesalònika 5:8) Pedru wakatara kudari ngo pamusoro pa Jesu: “Imwimwi amuzivi kumuvona, kaveta munomudisa; amuzivi kumuringisa kaveta munomutenda.” (1 Pedru 1:8) Jakobe wakabvunjisa hama jake jo kuzojwa kudari: “Mwari aazivi kusana varombo vo pasi pano, kuti vaite vakhupuki mu rutendo no ndhaka jo Umambo hwakagondeswa ndiyena, kwa vaya vanomudisa, here?” (Jakobo 2:5) Johani wakatara kuti mupango wa Mwari ngo wo kuti “titende zina ro Mwana wake Jesu Kristu, no kudisana ngocedu.”—1 Johani 3:23.

¹⁷ Asi Pauro wakataravo kudari: “Bzino, bziripo bziro bzitatu ibzi: Kutenda, ruvetero no rudo. Kaveta ku bzese rudo ngo hukuru.” (1 VaKorinto 13:13) Kumbejiyo, atizodikanizve kuva no rutendo kuno zvipikihwa zva Mwari ngo pamusoro po nyika imbza ngo kuti tinonga taamondhomo. Tinozonga tecirarama upenyu unodakajisa unonangwa mu Bhaibheri. Asi nguva jese tinodikana kuva no rudo na Mwari pomwe no vandhu vake. Zvokadi, rudo hwedu kwavari, hunozoramba wecikura mbhera narini.

18, 19. Ngo ndava yo rutendo uno vandhu va Mwari nyamasi uno, ngo wapi uri kuva muviyo, zve ndiyani anofanera kukujwa ngo ndava yazvo?

¹⁸ Vandhu va Jehovha mu nguva jedu jino vano rutendo no Umambo hwa Mwari zve vanoubesera. Vanodisana umwe kuno umweni. Izvi zvinokwanisika ngo kuti vanotendera kuti mujimu wa Mwari utungamirire mararamire avo. (VaGalàsia 5:22, 23) Ngo wapi uri kuva muviyo? Zviuru zvinodarika zvisere zvo hama no hambzaji, kutenderera pasi pese, zvino runyararo no rubatano mu ungano jo ciKristu. Zvakajeka kuti rutendo no rudo, i mugariro jino simba maningi ro kukwevejera.

¹⁹ Rubatano wondhowo uri kukwanisika basi ngo ndava yo besero ra Mwari wedu. Iyena anofanera kukujwa ndizvona. (Isaia 55:13) Zvokadi tinobonga Mwari ngo kuitisa kwake kuti ‘tiponeswe’ kubvira pa ‘rutendo.’ (VaEfeso 2:8) Jehovha acazoramba ecibesera vazinji kuti vave no rutendo kwaari. Pakugumisira, nyika yese icazozara ngo vandhu vakakwana, vakarungama, zve vakadakara vanozokuja Jehovha kwenda no kwenda!