1. Kua lata ke logona hifo fēfē a tautolu hagaao ke he tua ha tautolu?

KO E tua ko e mena ne nakai moua oti he tau tagata. (2 Tesalonia 3:2) Ka e foaki e Iehova e tua ki a lautolu oti kua tapuaki ki a Ia. (Roma 12:3; Kalatia 5:22) Kua fiafia mooli a tautolu he foaki e Iehova ki a tautolu e tua!

2, 3. (a) Aoga fēfē a tautolu ka moua e tua? (e) Ko e heigoa e tau hūhū ka fakatutala a tautolu ki ai mogonei?

² Foaki mai e Iehova haana a Tama fakahele ke maeke e tau tagata oti kua tua ki a Iesu ke fakamagalo e tau agahala ha lautolu. Ati maeke ai he tau tagata ke eke mo tau kapitiga ha Iehova mo e ke momoui tukulagi. (Ioane 6:44, 65; Roma 6:23) Kua totonu mooli a Iehova ki a tautolu! Pete ko e tau tagata agahala a tautolu ti lata ke mamate, kitia e Iehova kua maeke a tautolu ke taute e tau mena mitaki. (Salamo 103:10) Lagomatai e ia a tautolu ke fakaako e tala mitaki hagaao ki a Iesu mo e haana a poa. Ka kamata a tautolu ke moua e tua ki a Iesu mo e ke muitua ki a ia, maeke a tautolu ke onoono atu ke he moui tukulagi!​—Totou 1 Ioane 4:9, 10.

³ Ka ko e heigoa foki e tau mena ka fakaako e tautolu hagaao  ke he tua? Ka iloa noa ni e tautolu e mena ne taute he Atua ma tautolu mo e ka taute anoiha, kakano kia e mena ia kua moua e tautolu e tua? Kitekite la ke he falu mena kua lata ke taute e tautolu.

4. Ka moua e tautolu e tua, lauia fēfē a tautolu?

⁴ Ka moua e tautolu e tua ki a Iehova mo Iesu, nakai iloa noa e tautolu e tau mena kua taute mo e to taute e laua ma tautolu. Moua foki e tautolu e manako malolō ke moui he puhala ne fakaako e laua ki a tautolu. Ti makai a tautolu ke lagomatai e falu ke iloa a laua. Pehē e aposetolo ko Paulo: “Ha ko e mena kaeke ke talahau e koe ke he hāu a gutu e Iki ko Iesu, mo e talia ke he hāu a loto kua fakatu mai he Atua a ia mai ia lautolu kua mamate, to fakamoui ai a koe; Ha ko e loto ke talia ai, ke hoko mai ai e tututonu; ka ko e gutu ke talahau ai, ke hoko mai ai e fakamouiaga.”​—Roma 10:9, 10; 2 Korinito 4:13.

5. Ko e ha kua aoga lahi e tua, ti ko e heigoa e mena ka taute e tautolu ke moua e tua malolō? Talahau e fakataiaga.

⁵ Maaliali ai, ke moua e moui tukulagi ke he lalolagi foou he Atua, kua lata a tautolu ke moua e tua mo e lata a tautolu ke tumau e malolō he tua. Tuga e akau e tua. Kua lata a tautolu ke fakamalū tumau e akau ke maeke ai ke tumau e tupu mitaki. Ka nakai fakamalū tumau e tautolu to fifigo ai ti mate. Pihia foki, lata a tautolu ke mailoga kua tumau e tua ha tautolu ke “malolo” mo e tumau ke “tupu.”​—Tito 2:2; 2 Tesalonia 1:3; Luka 22:32; Heperu 3:12.

6. Ko e heigoa e tau puhala ua ne fakamaama he Heperu 11:1 hagaao ke he tua?

⁶ Ia Heperu 11:1, fakamaama he Tohi Tapu e kakano he tua. (Totou.) (1) Ko e tua “ko e falanaki haia ke he tau mena kua amaamanaki ki ai.” Ko e tau mena kua amaamanaki ki ai a tautolu ne putoia e tau maveheaga he Atua ma e vahā anoiha. Ma e fakatai, kua mailoga e tautolu to fakaotioti e mahani kelea mo e to ha ha i ai e lalolagi foou. (2) Ko e tua “ko e fakamoli he tau mena nakai kitia atu.” Iloa e tautolu na ha ha i ai a Iehova ko e Atua, Iesu Keriso, tau agelu, mo e Kautu he lagi, pete ni he nakai kitia ai e tautolu. (Heperu 11:3) Maeke fēfē a tautolu ke fakakite kua moua mooli e tautolu e tua ke he tau maveheaga he Atua mo e tau mena ne nakai kitia e tautolu? Taute e tautolu e mena ia he puhala ne momoui a tautolu mo e mena ne talahau mo e taute e tautolu.

7. Lagomatai fēfē he fakafifitakiaga ha Noa a tautolu ke maama e kakano ke moua e tua? (Kikite fakatino he kamataaga.)

⁷ Ko e heigoa ne fakaako e tautolu mai ia Noa hagaao ke he tua? Pehē e aposetolo ko Paulo ne “taute ai e Noa e vaka mo e matakutaku, kia momoui ai hana faoa, ha kua fakailoa he Atua kia ia e tau mena nakaila kitia ke he vaha ia.” (Heperu 11:7) Ha kua moua e Noa e tua ke he mena ne tala age e Iehova ki a ia, ne tā e ia e vaka makimaki. Liga tala age e tau katofia haana ki a ia ko e ha ne tā e ia e vaka. Maeke a tautolu ke iloa ne nakai fakanono a Noa. Pehē e Tohi Tapu ko Noa “ko e ogo he tututonu.” (2 Peteru 2:5) Ne hataki e ia e tau tagata ko e fakahoko fai he Atua e fakapukeaga ke moumou e tau tagata mahani kelea. Liga tala age fakatonu e ia ki a lautolu e tau mena ne tala age e Iehova ki a ia: “Kua hoko mai ki mua haku e fakahikuaga he tau tagata oti; ha kua puke ni e lalolagi ke he favale ha ko lautolu,” mo e “ko e fakahoko ne fai e au e fakapuke ki luga  he kelekele, to fakaoti ai e tau mena oti kana ha i ai e fafagu he moui i lalo ni he lagi; to fakahiku e moui he tau mena oti ha he lalolagi.” Ti liga fakamaama e Noa ke he tau tagata e mena kua lata ia lautolu ke taute ke hao. Na poaki e Iehova: ‘Hu a koe ke he vaka.’​—Kenese 6:13, 17, 18.

8. Ko e heigoa ne talahau e Iakopo hagaao ke he tua?

⁸ Tohi foki a Iakopo hagaao ke he tua. Liga taute e ia e mena nei nakai leva he mole e tohi e aposetolo ko Paulo ke he tau Heperu. Tohi e Iakopo: “Kia fakakite mai kia au hau a tua ka e nakai ha i ai e tau gahua, ti fakakite atu foki e au haku a tua ke he haku a tau gahua.” (Iakopo 2:18) Fakamaama e Iakopo ko e moua e tua, kua lata ia tautolu ke lahi atu e mena ke taute he talitonu hokoia ni. Talitonu e tau temoni na fai Atua ka e nakai moua e lautolu e tua ki a Iehova. Ne totoko malolō e lautolu a Ia. (Iakopo 2:19, 20) He taha faahi ka tua e tagata, to fakafiafia e ia e Atua he taute e tau gahua mitaki. Ko e mena ia ne taute e Aperahamo. Tohi e Iakopo: “Nakai kia talahaua tututonu e matua ha tautolu ko Aperahamo ha ko e tau gahua he tuku atu e ia hana tama ko Isaako ki luga he fatapoa? Nakai kia kitia e koe, ne gahua fakalataha hana tua mo e hana tau gahua, ko e tau gahua foki kua fakakatoatoa ai e tua?” Ti fakamaama e Iakopo ko e tua ne nakai fai gahua kua teao he pehē: “Tuga e tino kua mate ia ka noa mo e agaga, ti pihia foki e tua kua mate ia kaeke kua noa mo e tau gahua.”​—Iakopo 2:21-23, 26.

9, 10. Ko e heigoa e kakano ke fakagahuahua e tua ke he Tama?

⁹ Molea 30 e tau kua mole, ne tohia e Ioane e Evagelia haana mo e tolu e tohi. Tuga e falu tagata tohia Tohi Tapu ne maama e Ioane e kakano he tua. Loga e magaaho he tau tohi ha Ioane ne fakaaoga e ia e kupu gahuahua faka-Heleni ne fa fakaliliu “fakagahuahua e tua” he faka-Peritania.

¹⁰ Ma e fakatai, fakamaama e Ioane: “Ko e tagata ne tua ke he Tama, ha ha ia ia e moui tukulagi; ka ko e tagata nakai tua ke he Tama, nakai kitia e ia e moui, ka ko e ita he Atua ha ne toka mau ni ki luga hana.” (Ioane 3:36) Ke fakagahuahua e tua ke he Tama, lata a tautolu ke omaoma ki a Iesu. Mai he tau tohiaga ha Ioane, kitia e tautolu fa pehē a Iesu ke moua e moui tukulagi, kua lata a tautolu ke fakagahuahua e tua ki a ia mo e haana a Matua.​—Ioane 3:16; 6:29, 40; 11:25, 26; 14:1, 12.

11. Maeke fēfē a tautolu ke fakakite kua fakaaue a tautolu ki a Iehova he iloa e kupu mooli?

¹¹ Fakaaoga e Iehova e agaaga tapu haana ke lagomatai a tautolu ke maama e kupu mooli hagaao ki a Ia mo e haana Tama ti lagomatai a tautolu ke moua e tua ki a laua. (Totou Luka 10:21.) Maeke fēfē a tautolu ke fakakite kua fakaaue a tautolu ki a Iehova mo e tau mena oti kana kua taute e ia? Kia nakai oti e fakaaue ha tautolu ki a Ia he fakaatā a tautolu ke moua e fakafetuiaga mo Ia puhala ia Iesu “ko e kamataaga mo e katoatoaaga he tua” ha tautolu. (Heperu 12:2) Ti lata a tautolu ke tumau e fakamalolō he tua ha tautolu he liogi tumau ki a Iehova mo e fakaako haana Kupu.​—Efeso 6:18; 1 Peteru 2:2.

12. Ka moua e tautolu e tua, ko e heigoa ha tautolu ka taute?

 ¹² Kua lata a tautolu ke tumau he fakakite ke he tau gahua ha tautolu kua malolō e tua ha tautolu ke he tau maveheaga ha Iehova. Ma e fakatai, tumau e fakamatala ha tautolu ke he tau tagata hagaao ke he Kautu he Atua mo e lagomatai a lautolu ke eke mo tau tutaki ha Iesu. Tumau foki ke “mahani mitaki a tautolu . . . ke he tau tagata oti kana, ka e au atu ke he faoa ne tua.” (Kalatia 6:10) Ti eketaha a tautolu ke “tuku kehe e [tautolu] e tagata tuai katoa mo e hana tau mahani” ha kua nakai manako a tautolu ke he ha mena ke moumou e fakafetuiaga ha tautolu mo Iehova.​—Kolose 3:5, 8-10.

13. Aoga fēfē e “tua ke he Atua”? Fakamaama fēfē ai he Tohi Tapu, ti ko e ha?

¹³ Pehē e Tohi Tapu: “Ka nakai tua, ti nakai maeke ke fakafiafia kia ia; ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.” (Heperu 11:6) Fakakite foki he Tohi Tapu ko e “tua ke he Atua” ko e taha he tau mena fakamua kua lata ke moua he tau Kerisiano mooli. Ko e vala he ha tautolu a “fakaveaga.” (Heperu 6:1) Lafi ke he tua, lata a tautolu mo e falu he tau mahani aoga foki ke maeke ke moua e fakafetuiaga mo Iehova mo e tumau ki ai.​—Totou 2 Peteru 1:5-7; Iuta 20, 21.

14, 15. Fakatatai mo e fakaalofa, aoga fēfē e tua?

¹⁴ Lahi atu e hagaao he tau tagata tohia Tohi Tapu ke he tua ke he ha mahani foki. Kakano kia e mena nei ko e tua ko e mahani ne mua e aoga kua lata ke moua e tautolu?

¹⁵ Fakatatai e Paulo e tua ke he fakaalofa. Tohi e ia: “Kaeke foki ha ha ia au e tua katoatoa ke uta kehe ai e tau mouga, ka e nakai fai fakaalofa au, ko e mena noa ni au.” (1 Korinito 13:2) Pehē a Iesu “ko e poaki . . . he fakatufono kua lahi” ke fakaalofa ke he Atua. (Mataio 22:35-40) Lagomatai he fakaalofa a tautolu ke moua e tau mahani loga foki kua fakafiafia e Atua. Ma e fakatai, pehē e Tohi Tapu ko e fakaalofa kua “talia e tau mena oti.” To lagomatai he fakaalofa a tautolu ke talia, po ke tua, ke he tau mena oti ne talahau he Atua ki a tautolu he Tohi Tapu.​—1 Korinito 13:4, 7.

16, 17. Ko e heigoa ne talahau he Tohi Tapu hagaao ke he tua mo e fakaalofa? Ko e heigoa he tau mahani nei ne mua atu, ti ko e ha?

 ¹⁶ Ko e tua mo e fakaalofa ko e tau mahani ne mua e aoga, ti fa mahani e tau tagata tohia Tohi Tapu ke fakaaoga ua ai. Fakamalolō e Paulo e tau matakainaga haana “kia tapulu ai . . . ke he ufikahokaho, ko e tua mo e fakaalofa haia.” (1 Tesalonia 5:8) Tohia e Peteru hagaao ki a Iesu: “Ko ia kua nakai kitia e mutolu, ka e fakaalofa atu kia ia, kua nakai kitia a ia ainei, ka e tua ni ki ai.” (1 Peteru 1:8) Hūhū a Iakopo ke he tau matakainaga fakauku haana: “Kua nakai kia fifili he Atua a lautolu kua nonofogati ke he lalolagi nai, ko e tau maukoloa ke he tua, ko lautolu ke eke ma lautolu e kautu kua talahaua mai e ia kia lautolu kua fakaalofa kia ia?” (Iakopo 2:5) Tohia e Ioane ko e poaki he Atua “kia tua a tautolu ke he higoa he Tama hana ko Iesu Keriso; kia feofanaki foki a tautolu.”​—1 Ioane 3:23.

¹⁷ Tohia foki e Paulo: “Ka ko e hanai, kua tumau e tua, mo e amaamanaki mo e fakaalofa, ko e tolu e mena ia; ka ko e mena ne mua ke he tau mena ia, ko e fakaalofa haia.” (1 Korinito 13:13) He vahā i mua, to nakai liu a tautolu ke moua e tua ke he tau maveheaga he Atua hagaao ke he lalolagi foou haana ha ko e mena to fakamooli e tau mena oti. To nonofo fiafia a tautolu tuga e mena ne tutala ki ai e Tohi Tapu. Ka e to lata tumau a tautolu ke moua e fakaalofa ke he Atua mo e ke he tau tagata. To tupu tumau ni e fakaalofa ha tautolu ki a lautolu.

18, 19. Ko e heigoa e fua ha kua moua he tau tagata he Atua e tua mogonei, ti ko hai kua latatonu ke fakaheke ha ko e mena nei?

¹⁸ Ko e tau tagata ha Iehova he vahā ha tautolu ne moua e tua ke he Kautu he Atua mo e lalago ki ai. Ti fefakaalofaaki a lautolu. Ha kua fakaatā e lautolu e agaaga he Atua ke takitaki e tau puhala momoui ha lautolu. (Kalatia 5:22, 23) Ti ko e heigoa e fua? Molea valu e miliona he tau matakainaga he lalolagi katoa kua mafola mo e kaufakalataha he tau fakapotopotoaga ha lautolu. Maaliali ai, ko e tua mo e fakaalofa ko e tau mahani malolō lahi.

¹⁹ Ko e kaufakalatahaaga nei kua maeke ni ha ko e lagomatai he ha tautolu a Atua. Latatonu a Ia ke moua e fakahekeaga. (Isaia 55:13) Fakaaue mooli a tautolu kua taute e ia e tau mena nei ke maeke a tautolu ke “fakamomoui . . . ke he tua.” (Efeso 2:8) To fakatumau a Iehova ke lagomatai e tau tagata tokologa foki ke moua e tua ki a ia. Fakahiku ai, to puke e lalolagi katoa ke he tau tagata mitaki katoatoa, tututonu, mo e fiafia ka fakaheke tukulagi a Iehova!