1. Σαρ πρέπει τι αισθάνας για την πίστη σο τθεράσα;

ΠΙΣΤΗ ισί κάτι σο να τθερένα-λες σαρέ ο τζενέ. (2 Θεσσαλονικείς 3:2) Ο Ιεχωβά, όμως, ντέλα πίστη σαρέ οντουλέντε σο ντένα-λες λατρεία. (Ρωμαίους 12:3· Γαλάτες 5:​22) Καζόμ μπουτ εκτιμίνασα ι Ιεχωβάς σο ντέλα-αμέν πίστη!

2, 3. (α) Σο λατσσιπέ κερέλα αμένγκε η πίστη; (β) Καλά ερωτήσεις κα ντικχάς ακανά;

² Ο Ιεχωβά ντινάς πι αγαπημέ Τσσαβές για τι μπορίνεν τι συγχωρίντιβεν ο αμαρτίες σαρέ οντουλένγκε σο τθερένα πίστη κο Ιησούς. Ανταβά ντέλα ι ευκαιρία κο τζενέ τι αβέν αμαλά ι Ιεχωβάσαρ ντα τι τζουβντιόν για πάντα. (Ιωάννης 6:​44, 65· Ρωμαίους 6:​23) Καζόμ λατσσό ισί ο Ιεχωβά αμέντζαρ! Παρόλο σο ισινάμ αμαρτωλοί ντα αξίνασα ο μεριπέ, ο Ιεχωβά ντικχλάς αντρ’ αμέντε ότι μπορίνασα τι κεράς λατσσέ πράγματα. (Ψαλμός 103:​10) Βοηθιντάς-αμέν τι σικλιάς ο λατσσέ αμπέρια ι Ιησούσκε ντα λέσκε θυσιάκε. Οτθάρ, όταν αρχισάλαμ τι πακιάς κο Ιησούς ντα τι ακολουθίνας-λες, αρχισάλαμ τι τθεράς ι ελπίδα-ντα ότι κα τζουβντιάς για πάντα!​—Διαβάνεν 1 Ιωάννη 4:9, 10.

 ³ Αλλά σο γιαβέρ μπορίνασα τι σικλιάς για την πίστη; Μήπως άμα τζανάσα σο κερντάς αμένγκε ο Ντεβέλ ντα σο κα κερέλ κο μέλλον, μανγκέλα τι βακερέλ ότι τθεράσα πίστη; Για τι ντικχάς σο γιαβέρ μπορίνασα τι κεράς.

4. Σαρ επηρεάνελα-αμέν η πίστη σο τθεράσα;

⁴ Όταν τθεράσα πίστη κο Ιεχωβά ντα κο Ιησούς, τζανάσα σο κερντέ ντα σο κα κερέν αμένγκε, αλλά εκτός ανταλέσταρ μανγκάσα μπουτ τι τζουβντιάς αντικάς σαρ σικλιαρντέ-αμέν. Ντα μανγκάσα αντράλ αμαρέ γκίσταρ τι βοηθίνας γιαβερέν-ντα τι γνωρίνεν ι Ιεχωβάς ντα ι Ιησούς. Ο απόστολος Παύλος βακερντάς: «Άμα βακερέσα τι μόσαρ κο τζενέ ότι ο Ιησούς ισί ο Κύριος ντα πακιάσα αντρέ τι γκίστε ότι ο Ντεβέλ ιστικιαρντάς-λες κατά μουλέ, κα τζουβντιός. Επειδή πι γκίσαρ τθερέλα πίστη κάποιος για δικαιοσύνη, αλλά πι μόσαρ βακερέλα κο τζενέ ι Ντεβλέσκε για τι σώντιβεν».​—Ρωμαίους 10:9, 10· 2 Κορινθίους 4:13.

5. Σόσκε ισί η πίστη αζόμ σημαντική, ντα σο πρέπει τι κεράς για τι τθεράς ζουρανί πίστη; Βακερέν εκ παράδειγμας.

⁵ Σίγουρα για τι τζουβντιάς για πάντα κο νεβό ντουνιάς κι Ντεβλέσκο, πρέπει τι τθεράς πίστη ντα τι ατσσικιαράς-λα ζουρανί. Η πίστη ισί σαρ εκ λουλούδι. Πρέπει τι ποτίνας συνέχεια εκ λουλούδι για τι αβέλ ζουρανό ντα τι συνεχίνελ τι μπαριόλ. Αλλά άμα να ποτίνασα-λες μπερεκέτι, κα μαρανγκιάνελ ντα κα μερέλ. Αντικάς αμέν-ντα, πρέπει τι αβάς σίγουροι ότι αμαρί πίστη ατσσόλα «ζουρανί» ντα συνεχίνελα τι «μπαριόλ».​—Τίτο 2:2· 2 Θεσσαλονικείς 1:3· Λουκάς 22:​32· Εβραίους 3:12.

6. Καλά ντούι τρόπους χρησιμοποιήνελα ο εδάφιος Εβραίους 11:1 για τι σικαβέλ σο ισί πίστη;

⁶ Κο Εβραίους 11:1, η Γραφή σικαβέλα σο ισί πίστη. (Διαβάνεν) (1) Πίστη ισί «η σιγουριά σο τθεράσα ι πραγματένγκε σο μπεκλεντίνασα τι αβέν». Αντρέ κο πράγματα σο μπεκλεντίνασα τι αβέν ισί ο υποσχέσεις ι Ντεβλέσκε για το μέλλον. Για παράδειγμας, ισινάμ σίγουροι ότι ο γκεραλιπέ κα σταματίνελ ντα κα αβέλ εκ νεβό ντουνιάς. (2) Πίστη ισί «η απόδειξη σο τθεράσα», ή γιαβέρτουλους η απόδειξη σο κερέλα-αμέν τι αβάς σίγουροι, «ότι υπαρχίντιβελα εκ πράγμας παρόλο σο να ντικχάσα-λες». Τζανάσα ότι ο Ιεχωβά Ντεβέλ, ο Ιησούς Χριστός, ο άγγελοι ντα η Βασιλεία κο ουρανός υπαρχίντιβενα, παρόλο σο ναστί ντικχάσα-λεν. (Εβραίους 11:3) Σαρ μπορίνασα τι σικαβάς ότι τθεράσα αληθινή πίστη κο υποσχέσεις κι Ντεβλέσκε ντα κο πράγματα σο ναστί ντικχάσα; Κεράσα-λες ανταβά με το τρόπος σο τζουβντιάσα ντα οντουλέντζαρ σο βακεράσα ντα κεράσα.

7. Σαρ βοηθίνελα-αμέν ο παράδειγμας του Νώε τι αγαβάς σο μανγκένα τι βακερέν ο λάφια “τι τθεράς πίστη”; (Ντικχ ι φωτογραφία σο ισί κι αρχή.)

⁷ Σο σικλιάσα κατά παράδειγμας του Νώε για την πίστη; Ο απόστολος Παύλος βακερντάς ότι ο Νώε, «αφού πρώτα ο Ντεβέλ προειδοποιηντάς-λες πραγματένγκε σο να ντικχέλας-λεν ατζέ, σικαντάς νταρ Ντεβλέσκι ντα κερντάς εκ κιβωτός για τι σώντιβελ λέσκι φαμιλί». (Εβραίους 11:7) Επειδή ο Νώε τθερέλας πίστη οντουλέντε σο βακερντάς λέσκε ο Ιεχωβά, κερντάς οντιά μπουτ μπαρί κιβωτός. Ο τζενέ σο μπεσένας οτθέ πασέ μπορεί τι πουτσλέ-λες σόσκε κερέλας ι κιβωτός. Μπορίνασα τι αβάς σίγουροι ότι ο Νώε να πφαντάς πο μούι. Η Γραφή σικαβέλα ότι ο Νώε «βακερέλας για το δίκαια πράγματα ι Ντεβλέσκε». (2 Πέτρου 2:5) Προειδοποιηντάς ι τζενέν ότι ο Ντεβέλ κα ανέλας εκ κατακλυσμός για τι καταστραφίνελ ι πφιρνέν. Μάλλον βακερντάς λένγκε ακριβώς  οντουβά σο βακερντάς λέσκε ο Ιεχωβά: «Αποφασιντόμ τι τσσουβάβ τέλος σαρέ οντουλέντε σο τζουβντιόνα, επειδή η πφουβ πφερντιλί βία ιτιρί λένταρ» ντα «κα ανάβ κατακλυσμός πανίσαρ οπράλ κι πφουβ για τι καταστραφίναβ σαρέ οντουλέν σο τθερένα ι ανάσα ι ζωγιάκι τελάλ κατά ουρανός. Σαρέ οντουλά σο ισί κι πφουβ κα χασάρντιβεν». Σοράν, ο Νώε σίγουρα εξηγιντάς κο τζενέ σο έπρεπε τι κερέν για τι τζουβντιόν. Ο Ιεχωβά ντινάας ι εντολή: «Πρέπει τι τσσουβές-τουτ αντρέ κι κιβωτός».​—Γένεση 6:​13, 17, 18.

8. Σο βακερντάς ο Ιάκωβος για την πίστη;

⁸ Ο Ιάκωβος-ντα γραφιντάς για την πίστη. Μάλλον κερντάς-λες ανταβά χάνικ καιρός αφού γραφιντάας ο απόστολος Παύλος κο Εβραίους. Ο Ιάκωβος γραφιντάς: «Σίκαβ μάνγκε τι πίστη χωρίς τι κερές λατσσέ πράγματα, ντα με κα σικαβάβ τούκε μι πίστη αντράλ οντουλένταρ σο κεράβα». (Ιακώβου 2:​18) Βοβ εξηγιντάς ότι, για τι τθεράς πίστη, να ερεσέλα σάντε τι πακιάς. Ο δαίμονες πακιάνα ότι ο Ντεβέλ υπαρχίντιβελα, αλλά να τθερένα πίστη κο Ιεχωβά. Αντίθετα, τζάνα λέσαρ μπαρί κόντρα. (Ιακώβου 2:​19, 20) Οκιά μπάνταρ όμως, οντουβά σο τθερέλα πίστη κα κερέλ λατσσιπέ, ή γιαβέρτουλους λατσσέ πράγματα, ντα αντικάς κα ευχαριστίνελ ι Ντεβλές. Ανταβά κερντάς ο Αβραάμ. Ο Ιάκωβος γραφιντάς: «Να βακέρντιλο δίκαιος ο Αβραάμ, αμαρό ντατ, οντουλέντζαρ σο κερντάς αφού ντινάς για θυσία πι τσσαβές, τον Ισαάκ, οπράλ κο θυσιαστήριος; Ντικχέσα ότι τθερέλας πίστη οντουλέντζαρ σο κερέλας ντα, οντουλέντζαρ σο κερέλας, λέσκι πίστη αβιλί τέλεια». Ο Ιάκωβος σοράν σικαντάς ότι η πίστη ισί άχρηστη άμα να κερέλα λατσσέ πράγματα, όταν βακερντάς: «Σαρ ο σώμας χωρίς πνεύμας ισί μουλό, αντικάς η πίστη-ντα χωρίς τι κερέλ λατσσέ πράγματα ισί μουλί».​—Ιακώβου 2:​21-23, 26.

9, 10. Σο μανγκέλα τι βακερέλ “τι πακιάς κο Τσσαβό”;

⁹ Αφού νακχλέ περίπου 30 μπρεσά, ο Ιωάννης γραφιντάς πο Ευαγγέλιος ντα τριν επιστολές. Σαρ γιαβερά-ντα τζενέ σο γραφιντέ αντρέ κι Γραφή, ο Ιωάννης-ντα αγαβέλας σο ισί πίστη. Ο Ιωάννης χρησιμοποιηντάς μπουτ φαρ ο μπαλαμανό ρήμας σο μεταφράντιβελα κο ρομανές «πακιάβα» ή «τθεράβα πίστη».

¹⁰ Για παράδειγμας, ο Ιωάννης εξηγιντάς: «Οντουβά σο πακιάλα κο Τσσαβό τζουβντιόλα για πάντα· οντουβά σο να ντέλα καν ι Τσσαβές να κα ντικχέλ ζωή, αλλά η χολί ι Ντεβλέσκι ατσσόλα οπρά-λέστε». (Ιωάννης 3:​36) Για τι πακιάς κο Τσσαβό, πρέπει τι ντας καν ι Ιησούς. Κο Ευαγγέλιος σο γραφιντάς ο Ιωάννης, ντικχάσα μπουτ φαρ ι Ιησούς τι βακερέλ ότι, για τι τζουβντιάς για πάντα, πρέπει τι τθεράς πίστη λέστε ντα λέσκε Νταντέστε.​—Ιωάννης 3:​16· 6:​29, 40· 11:​25, 26· 14:1, 12.

11. Σαρ μπορίνασα τι σικαβάς εκτίμηση ι Ιεχωβάσκε σο τζανάσα ι αλήθεια;

¹¹ Ο Ιεχωβά χρησιμοποιηντάς πο άγιος πνεύμας για τι βοηθίνελ-αμέν τι αγαβάς ι αλήθεια λέσκε ντα λέσκε Τσσαβέσκε ντα για τι τθεράς πίστη λέντε. (Διαβάνεν Λουκάς 10:​21) Σαρ μπορίνασα τι σικαβάς ότι εκτιμίνασα ι Ιεχωβάς σαρέ οντουλέ πραγματένγκε σο κερντάς; Ποτές δεν πρέπει τι τσσιναβάς τι ευχαριστίνας-λες σο μουκχλάς-αμέν τι τθεράς εκ λατσσί σχέση λέσαρ μέσω του Ιησού, σο ισί “οντουβά σο  οδηγίνελα αμαρί πίστη ντα κερέλα-λα τέλεια”. (Εβραίους 12:2) Ντα πρέπει πάντα τι προσευχίντιβας κο Ιεχωβά ντα τι διαβάνας λέσκο Λάφι για τι συνεχίνας τι μπαριαράς αμαρί πίστη.​—Εφεσίους 6:​18· 1 Πέτρου 2:2.

12. Άμα τθεράσα πίστη, σο κα κεράς;

¹² Πρέπει τι συνεχίνας τι σικαβάς οντουλέντζαρ σο κεράσα ότι πακιάσα κο υποσχέσεις κι Ιεχωβάσκε. Για παράδειγμας, συνεχίνασα τι κεράς λάφι κο τζενέ για τη Βασιλεία ι Ντεβλέσκι ντα βοηθίνασα-λεν τι αβέν μαθητές ι Ιησούσκε. Επίσης συνεχίνασα «τι προσπαθίνας τι κεράς ο λατσσό σαριλένγκε, αλλά πιο μπουτ οντουλένγκε σο τθερένα ι ίδια πίστη αμέντζαρ». (Γαλάτες 6:​10) Ντα κεράσα μπαρέ προσπάθειες για τι «νικαβάς οπρ’ αμένταρ ι πουρανί προσωπικότητα ντα οντουλά σο κερέλα», επειδή να μανγκάσα τι τθεράς κάτι σο κα καταστραφίνελ αμαρί φιλία ι Ιεχωβάσαρ.​—Κολοσσαείς 3:5, 8-10.

13. Καζόμ σημαντική ισί η «πίστη κο Ντεβέλ»; Σο βακερέλα η Γραφή λάκε, ντα σόσκε;

¹³ Η Γραφή βακερέλα: «Χωρίς πίστη να αβέλα-πες κάποιος τι ευχαριστίνελ-λες, επειδή οντουβά σο πλησιάνελα ι Ντεβλές πρέπει τι πακιάλ ότι βοβ υπαρχίντιβελα ντα ότι κα ανέλ ευλογίες οντουλέντε σο ρόντενα σαρέ πουμαρέ γκίσαρ τι αρακχέν-λες». (Εβραίους 11:6) Η Γραφή επίσης σικαβέλα ότι η «πίστη κο Ντεβέλ» ισί εκ κατά πρώτα πράγματα σο πρέπει τι τθερέν ο αληθινοί Χριστιανοί. Ισί μπουτ σημαντική αμένγκε, σαρ εκ κομμάτι κατά “θεμέλια” σο τθερέλα εκ κχερ. (Εβραίους 6:1) Αλλά να τθεράσα ανάγκη σάντε ι πίστη. Χρειαζίντιβασα γιαβερά-ντα ιδιότητες για τι αβάς ντα τι ατσσάς αμαλά ι Ιεχωβάσαρ.​—Διαβάνεν 2 Πέτρου 1:​5-7· Ιούδα 20, 21.

14, 15. Καζόμ σημαντική ισί η πίστη όταν συγκρίνασα-λα με την αγάπη;

¹⁴ Ο τζενέ σο γραφιντέ ι Γραφή γραφιντέ πιο μπουτ για την πίστη σαρέ κατά γιαβερά ιδιότητες. Μήπως ανταβά μανγκέλα τι βακερέλ ότι η πίστη ισί η πιο σημαντική ιδιότητα σο πρέπει τι τθεράς;

¹⁵ Ο Παύλος συγκριντάς ι πίστη με την αγάπη ντα γραφιντάς: «Άμα τθεράβα αζόμ μπαρί πίστη για τι κουνιαβάβ βεσά, αλλά να τθεράβα αγάπη, να ισινόμ τίποτα». (1 Κορινθίους 13:2) Ο Ιησούς βακερντάς ότι «η πιο μπαρί εντολή κο Νόμος» ισί τι μανγκέλ κάποιος ι Ντεβλές. (Ματθαίος 22:​35-40) Η αγάπη βοηθίνελα-αμέν τι τθεράς  μπουτ γιαβερά-ντα ιδιότητες σο ευχαριστίνενα ι Ντεβλές. Για παράδειγμας, η Γραφή βακερέλα ότι η αγάπη «πακιάλα σαρέ ο πράγματα». Άρα η αγάπη κα βοηθίνελ-αμέν τι πακιάς, ή γιαβέρτουλους τι τθεράς πίστη, σαρέ κο πράγματα σο βακερέλα ο Ντεβέλ αντρέ κι Γραφή.​—1 Κορινθίους 13:4, 7.

16, 17. Σο βακερέλα η Γραφή για την πίστη ντα για την αγάπη; Καγιά ιδιότητα ανταλένταρ ισί η πιο σημαντική, ντα σόσκε;

¹⁶ Η πίστη ντα η αγάπη ισί μπουτ σημαντικές ιδιότητες ντα μπουτ φορές αρακχάσα μαζί ανταλά ντούι ιδιότητες αντρέ κι Γραφή. Ο Παύλος βακερντάς πι πφραλένγκε τι «ιρίν ο θώρακας της πίστης ντα της αγάπης». (1 Θεσσαλονικείς 5:8) Ο Πέτρος γραφιντάς για τον Ιησού: «Παρόλο σο να ντικχλέν-λες ποτές, μανγκένα-λες. Παρόλο σο να ντικχένα-λες ακανά, τθερένα πίστη λέστε». (1 Πέτρου 1:8) Ο Ιάκωβος πουτσλάς πι πφραλέν σο ισινέ χρισμέ: «Να τραμπιντάς ο Ντεβέλ οντουλέν σο ισί τσορορέ κι ντουνιάσκε γιακχά τι αβέν χουλανέ κι πίστη ντα τι λεν ι Βασιλεία σο ντινάς πο λάφι ο Ιεχωβά οντουλένγκε σο μανγκένα-λες;» (Ιακώβου 2:5) Ο Ιωάννης γραφιντάς ότι η εντολή ι Ντεβλέσκι ισί τι «τθεράς πίστη κο ναβ λέσκε Τσσαβέσκο, ι Ιησού Χριστόσκο, ντα τι μανγκάς ο εκ ι γιαβερές».​—1 Ιωάννη 3:23.

¹⁷ Αλλά ο Παύλος-ντα γραφιντάς: «Ακανά ατσσόνα ακαλά τριν: η πίστη, η ελπίδα, η αγάπη· αλλά η πιο μπαρί ανταλένταρ ισί η αγάπη». (1 Κορινθίους 13:​13) Κο μέλλον, να κα τθεράς ανάγκη τι πακιάς κο υποσχέσεις κι Ντεβλέσκε ι νεβέ ντουνιάσκε επειδή αζομάν κα νικιόν μπαγιά. Κα τζουβντιάς οντιά μπουτ σουκάρ ζωή σο βακερέλα η Γραφή. Αλλά πάντα κα τθεράς ανάγκη τι μανγκάς ι Ντεβλές ντα ι τζενέν. Βα, αμαρί αγάπη λένγκε κα συνεχίνελ τι μπαριόλ για πάντα.

18, 19. Καβά αποτέλεσμας ανέλα η πίστη σο τθερένα ο υπηρέτες ι Ντεβλέσκε αντιβές, ντα κον αξίνελα ι δόξα ανταλέσκε;

¹⁸ Ο υπηρέτες ι Ιεχωβάσκε αμαρέ ντιβεσέντε τθερένα πίστη κι Βασιλεία κι Ντεβλέσκι ντα υποστηρίνενα-λα. Ντα μανγκένα ο εκ ι γιαβερές. Ανταβά αβέλα-πες επειδή μουκχένα ο άγιος πνεύμας ι Ντεβλέσκο τι σικαβέλ λένγκε σαρ τι τζουβντιόν. (Γαλάτες 5:​22, 23) Καβά ισί ο αποτέλεσμας; Πιο μπουτ από οχτώ εκατομμύρια πφραλά ντα πφενιά σαρό κο ντουνιάς ισί αγαπημέ ντα ενωμέ πουμαρέ εκκλησιέντε. Ισί ξεκάθαρος ότι η πίστη ντα η αγάπη ισί μπουτ ζουρανέ ιδιότητες.

¹⁹ Μπορίνασα τι αβάς ενωμέ σάντε με τη βοήθεια αμαρέ Ντεβλέσκι. Αξίνελα τι ντας-λες δόξα ανταλέσκε. (Ησαΐας 55:​13) Εκτιμίνασα μπαγιά σο ντινάς-αμέν ι ευκαιρία τι “σώντιβας μέσω πίστης”. (Εφεσίους 2:8) Ο Ιεχωβά κα συνεχίνελ τι βοηθίνελ ατζέ πιο μπουτ τζενέν τι τθερέν πίστη λέστε. Κο τέλος, σαρί η πφουβ κα πφερντιόλ τζενέντζαρ σο κα αβέν τέλειοι, δίκαιοι ντα ευτυχισμέ ντα κα δοξάνεν ι Ιεχωβάς για πάντα!