1. Hi fanele ku ti zwisa kuyini hi kukholwa ka hina?

A HI vontlhe vanhu va nga ni kukholwa. (2 Va Le Tesalonika 3:2) Kanilezi Jehova i nyika kukholwa ka vakhozeli vakwe vontlhe. (Va Le Roma 12:3; 1 Va Le Korinte 12:8, 9) A ho ku mu bonga Jehova hi lezi a hi nyikako kukholwa!

2, 3. a) Hi vunekisa kuyini loku hi hi ni kukholwa? b) Ziwutiso muni hi to wulawula hi zona?

² Jehova i nyikele N’wana wakwe wo ranzeka kasi vontlhe lava va nga ni kukholwa va tsetselelwa zionho zabye. Lezo zi vulula ndlela yaku a vanhu va maha vanghana va Jehova va tlhela va hanya kala kupinzuka. (Johani 6:44, 65; Va Le Roma 6:23) Jehova mu nene futsi! Hambu lezi hi nga vaonhi va ringanelwako hi kufa, Jehova i wonile ku hi nga zi kota ku maha za zi nene. (Tisimu 103:10) I hi vunile ku gonza mahungu yo saseka xungetano hi Jesu ni muphahlo wakwe. Laha hi nga sangula ku kholwa ka Jesu ni ku mu lanzela, hi lo sangula ku rinzela a wutomi ga pinzukelwa! — Gonza 1 Johani 4:9, 10.

³ Kanilezi zini zinwani hi faneleko ku zi tiva xungetano hi kukholwa? Xana a ku gonza lezi Jehova a mahileko ni lezi a to maha xikhatini xi tako zi wula lezaku hi na ni kukholwa ke? A hi woneni zilo zinwani hi faneleko ku maha.

4. A kuva ni kukholwa zi hi khumbisa kuyini?

⁴ Loku hi kholwa ka Jehova na Jesu, a hi tivi lezi va hi maheleko ni lezi va lavako ku hi mahela ntsena. Hi tlhela hi xuva nguvu ku hanyisa lezi va hi gonzisako ku hanyisa zona. Hi xuva nguvu ku vuna vanwani kambe lezaku vonawu va va tiva. Mupostoli Paule i te ngalo: “Loku u vumela hi nomu wa wena lezaku Jesu i Hosi, u kholwa mbilwini ya wena lezaku Nungungulu i mu vuxile hi ka vafileko, wena u ta hanyiswa. Hakuva munhu wa hlayelwa kululama hi kota ya kukholwa ka mbilu, a hanyiswa hi kuvumela hi nomu.” — Va Le Roma 10:9, 10; 2 Va Le Korinte 4:13.

5. Hikuyini a kukholwa ku nga ka lisima nguvu, niku zini hi faneleko ku maha kasi hiva ni kukholwa ko tiya? Nyika xikombiso.

⁵ Zi te dlunya lezaku kasi hi hanya kala kupinzuka misaveni yiswa ya Nungungulu, hi fanele kuva ni kukholwa niku ku fanele ku tshama ku tiyile. A kukholwa ku fana ni sinya. Kasi yi hanya khwatsi yi tlhela yi simama ku kula, hi fanele ku yi cheletela mati. Kanilezi loku hi nga yi cheli mati yo enela, yi ta wuna yifa. A kukholwa konawu ku tshamisile zezo — ku lava ku khatalelwa kasi ku tshama ku hi “ku nene” ku tlhela ku simama ku “kula.” — Titusi 2:2; 2 Va Le Tesalonika 1:3; Luka 22:32; Maheberu 3:12.

6. Maheberu 11:1 i tlhamusela kukholwa hi tindlela muni ta timbiri?

⁶ Ka Maheberu 11:1, a Biblia gi tlhamusela lezaku a kukholwa xini. (Gonza.) 1) A kukholwa “kutiyiseka ka hombe xungetano hi zilo lezi zi rinzelwako.” (Tradução do Novo Mundo) A zilo lezi hi zi rinzelako zi patsa zitsumbiso za Nungungulu za xikhati xa ha tako. Hi xikombiso, ha tiyiseka lezaku a wubihi gi ta mbhela niku ku tava ni misava yiswa. 2) A kukholwa “xikholwiso xa zilo zi nga woniwiko.” Ha zi tiva lezaku Jehova Nungungulu, na Jesu Kristu, ni tingelosi va kona, niku a Mufumo wa le tilweni wonawu wu kona, hambu lezi hi kalako hi nga va woni. (Maheberu 11:3) Hi nga kombisa kuyini lezaku hakunene ha kholwa a zitsumbiso za Nungungulu ni zilo hi nga zi woniko? Hi nga zi kombisa hi mahanyela ya hina ni lezi hi zi wulako ni ku maha.

7. A xikombiso xa Noa xi hi vunisa kuyini ku zwisisa lezi a kuva ni kukholwa zi wulako zona? (Wona mufota kusanguleni ka nzima.)

⁷ Hi gonza yini ka Noa xungetano hi kukholwa? Mupostoli Paule i wulile lezaku Noa, “na a byelilwe hi Nungungulu hi zilo zi nga kala zi nga se woniwa, i lo ingisa, a aka a taru kasi ku hanyisa a nghamu yakwe.” (Maheberu 11:7) Kota lezi a nga kholwa lezi Jehova a nga mu byela, Noa i lo aka taru lego ga hombe. Kuzilava a vaakelane vakwe va mu wutisile ku hikuyini a akako taru lego. Ha zi tiva kambe lezaku Noa a nga va miyelelangi. A Biblia gi wula lezaku Noa i wa hi “mukaneli wa kululama.” (2 Pedro 2:5) I wa lava ku a vanhu va tiva lezaku Nungungulu i ta neha ntalo kasi ku lovisa vakubiha. Kuzilava i va byelile zalezi Jehova a nga mu byelile, aku: “Nzi ta lovisa a nyama yontlhe, hakuva a misava yi tele hi tihanyi ta vanhu,” niku “nzi ta neha a ntalo wa mati misaveni; kasi wu ta lovisa a nyama yontlhe yi nga ni muhefemulo wu hanyako,  yi nga la’hasi ka tilo; zontlhelele zi nga laha misaveni zi tafa.” Kuzilava hi kulanzela, Noa i tlhamusele vanhu lezi va nga fanele ku maha kasi va pona. Jehova i wa mu byelile lezi: “U ta enghena lomu tarwini.” — Genesisi 6:13, 17, 18.

8. Zini lezi Jakobe a nga wula xungetano hi kukholwa?

⁸ Jakobe yenawu i tsalile zokari xungetano hi kukholwa. Kuzilava i mahile lezo xikhatanyana nzhako ka ku Paule a tsalele maHeberu. Jakobe i te: “Nzi kombe a kukholwa ka wena na ku hi hava mitiro, mina nzi ta ku komba a kukholwa ka mina hi mitiro ya mina.” (Jakobe 2:18) Jakobe i tlhamusele lezaku a kukholwa a hi ku tiva zilo u tlhela u nga kanakani basi. A madimoni a ma ali lezaku Nungungulu i kona, kanilezi a ma kholwi ka Jehova. Malwa ni kungo gakwe. (Jakobe 2:19, 20) Kanilezi a munhu a nga ni kukholwa i tsakisa Nungungulu hi ku maha za zi nene. Hi zalezo a nga maha Abrahama. Jakobe i te: “A kokwani wa hina Abrahama, a nga hlayelwangi kululama hi mitiro ke, laha a nga nyikela Isaka a n’wana wakwe hehla ka alati? Wa zi wona lezaku a kukholwa ku lo tira zinwe ni mitiro yakwe; a kukholwa ku lo mbheleliswa hi mitiro.” Hi kulanzela, Jakobe i lo khanyisa lezaku a kukholwa ku nga hava mitiro a ku vuni nchumu, aku: “Kota lezi wu fileko a miri lowu wu nga hava moya, hizalezo ni kukholwa loku ku nga hava mitiro ku file.” — Jakobe 2:21-23, 26.

9, 10. A ku kholwa ka N’wana zi wula yini?

⁹ Anzhako ka 30 wa malembe ni ku hunza, Johani i lo tsala Ivangeli yakwe ni mapapilo manharu. A ku fana ni vatsali vanwani va Biblia, yenawu i wa zi zwisisa ku a kukholwa zi wula yini. Ka mitsalo yakwe, Johani i tirisile nguvu a gezu ga xiGreki legi hi xiTshwa gi talako ku hunzuluselwa ku “kukholwa.”

¹⁰ Hi xikombiso, Johani i tlhamusele lezi: “Loyi a kholwako ka N’wana i na ni wutomi ga pinzukelwa; kanilezi loyi a nga ingisiko N’wana a nga ta wona wutomi, hakuva a khulo ga Nungungulu gi tshamile hehla kakwe.” (Johani 3:36) Kasi ku kholwa ka N’wana, hi fanele ku mu ingisa. Hi lisine, a mitsalo ya Johani yi hi komba ku Jesu i wa tolovela ku wula lezaku kasi hi kuma wutomi ga pinzukelwa, hi fanele ku kholwa ka yena ni Papai wakwe. — Johani 3:16; 6:29, 40; 11:25, 26; 14:1, 12.

11. Hi nga kombisa kuyini lezaku ha mu bonga Jehova hi lezi hi tivako lisine?

¹¹ Jehova i tirisile moya wa ku basa kasi ku hi vuna ku zwisisa a lisine xungetano hi yena ni N’wana wakwe ni ku hi vuna ku kholwa kabye. (Gonza Luka 10:21.) Hi nga kombisa kuyini lezaku ha mu bonga Jehova hi zontlhe lezi a hi maheleko? Hi nga tshuki hi nyima ku mu bonga hi lezi a hi vumeleleko kuva ni wunghana naye hi ku tirisa Jesu, loyi a nga “muvangi ni mumbhelelisi wa kukholwa ka hina.” (Maheberu 12:2) Hi fanele ku simama hi tiyisa kukholwa ka hina kambe hi ku khongela ka Jehova  xontlhe xikhati ni ku gonza Mhaka yakwe. — Va Le Efesusi 6:18; 1 Pedro 2:2.

12. Zini hi to maha loku hi hi ni kukholwa?

¹² Hi fanele ku simama hi kombisa hi mitiro ya hina lezaku hi na ni kukholwa ko tiya ka zitsumbiso za Jehova. Hi xikombiso, hi simama hi xumayela vanhu xungetano hi Mufumo wa Nungungulu ni ku va vuna ku maha vapizani va Jesu. Hi tlhela hi simama ku ‘tira lezi zi nene ka vanhu vontlhe, nguvunguvu ka va le ngangweni wa hina wa kukholwa.’ (Va Le Galatia 6:10) Hi ti karatela ku ‘runzuwula a munhu wa kale ni zimaho zakwe’ kambe hakuva a hi lavi ku tsika nchumu wu onha a wunghana ga hina na Jehova. — Va Le Kolosi 3:5, 8-10.

13. a) A “kukholwa ka Nungungulu” zi na ni lisima muni? b) A Biblia gi ku tlhamuselisa kuyini a kukholwa loko, niku hikuyini?

¹³ A Biblia gi ngalo: “Ahandle ka kukholwa a zi koteki ku mu tsakisa; hakuva loyi a tshinelako ka Nungungulu i yimelwe hi ku kholwa lezaku ku kona Nungungulu, ni lezaku yena wa chachazela lava va mu lavako.” (Maheberu 11:6) A Biblia gi tlhela gi komba lezaku a “kukholwa ka Nungungulu” xinwe xa zilo zo sangula lezi a maKristu ya lisine ma faneleko kuva nazo. Ku maha xipanze xa “xiseketelo” xa hina. (Maheberu 6:1) Kanilezi ahandle ka kukholwa, ku na ni matshamela manwani ya lisima hi faneleko kuva nawo kasi hiva ni wunghana na Jehova hi tlhela hi nga luzi wunghana lego. — Gonza 2 Pedro 1:5-7; Juda 20, 21.

14, 15. Hikuyini a kuva ni liranzo zi nga za lisima nguvu ku hunza kuva ni kukholwa basi?

¹⁴ A vatsali va Biblia va wulawulile nguvu hi kukholwa a ku hunza ni gihi ginwani tshamela. Xana lezo zi wula ku a kukholwa hi gona tshamela ga lisima ka wontlhe hi faneleko kuva nawo ke?

¹⁵ Paule i ringanisile kukholwa ni liranzo. I tsalile lezi: “Hambu nzi hi ni kukholwa kontlhe lezaku nzi kunula ni zitsunga, loku nzi nga hi na liranzo a nzi nchumu.” (1 Va Le Korinte 13:2) Jesu i wulile lezaku “a nayo wa hombe milayweni yontlhe” ku ranza Nungungulu. (Mateu 22:35-40) A liranzo li hi vuna kuva ni matshamela manwani yo tala ma tsakisako Nungungulu. Hi  xikombiso, a Biblia gi ngalo a liranzo “li kholwa zilo zontlhe.” Hikwalaho, a liranzo li hi vuna ku kholwa zontlhe lezi Nungungulu a hi byelako lomu ka Biblia. — 1 Va Le Korinte 13:4, 7.

16, 17. a) A Biblia gi wula yini hi kukholwa ni liranzo? b) Ka matshamela lawa ya mambiri, hi gihi gi nga ga hombe niku hikuyini?

¹⁶ A kukholwa ni liranzo matshamela ya lisima hi wumbiri ga wona, niku a vatsali va Biblia va wa tolovela ku ma kumbuka zinwe. Paule i kucile vamakabye vakwe lezaku va “ambala a xikatawu xa xiketse xa kukholwa ni liranzo.” (1 Va Le Tesalonika 5:8) Pedro i tsalile lezi xungetano hi Jesu: “Loyi mu mu ranzako hambu lezi mu nga mu wonangiko; loyi mu kholwako ha yena hambu lezi mu nga mu woniko makunu.” (1 Pedro 1:8) Jakobe i lo wutisa vamakabye vakwe aku: “Xana Nungungulu a nga hlawulangi lava va vumalako hi za tiko, lezaku vava lava va fumileko kukholweni, ni kuva zigatshomba ya mufumo lowu a wu tsumbisileko vona lava va mu ranzako ke?” (Jakobe 2:5) Johani i tsalile lezaku a kuleleta ka Nungungulu hi lezaku “hi kholwa vitweni ga N’wana wakwe Jesu Kristu, hi ranzana.” — 1 Johani 3:23.

¹⁷ Kanilezi Paule i tlhelile a tsala lezi: “Makunu zi te tsoma lezi zinharu, a kukholwa, ni kutsumba, ni liranzo; kanilezi a xa hombe nguvu ka zona hi liranzo.” (1 Va Le Korinte 13:13) Xikhatini xi tako ku nga ta ha laveka lezaku hi kholwa a zitsumbiso za Nungungulu xungetano hi misava yiswa hakuva zi ta ngha zi tatisekile. Hi ta ngha hi hanya wutomi go saseka legi a Biblia gi wulawulako hi gona. Kanilezi a ku ranza Nungungulu ni vanhu-kulori zi ta simama zi laveka. Hi lisine hi taya hi engetela ku va ranza siku ni siku kala kupinzuka.

18, 19. Mihanzu muni yi nga kona hi kota ya kukholwa ka vanhu va Nungungulu nyamutlha, niku a wudzunzo ga kona giya ka mani?

¹⁸ A vanhu va Jehova inyamutlha va kholwa ka Mufumo wa Nungungulu va tlhela va wu yimela. Va ranzana kambe. Va maha lezo hi kota ya lezi va tsikako a moya wa Nungungulu wu va rangela wutomini gabye. (Va Le Galatia 5:22, 23) Hi gihi wuyelo ga kona? A vamakabye vo hunza 8.000.000 lava va nga kona misaveni yontlhe va hanya hi kurula ni kuzwanana mabandleni yabye. Zi te dlunya lezaku a kukholwa ni liranzo matshamela ma nga ni ntamu wa hombe.

¹⁹ A kuzwanana loku hi nga nako hi ku kuma hi ku vuniwa hi Nungungulu. A wudzunzo gontlhe giya ka yena. (Isaya 55:13) Hi bonga nguvu hi lezi a nga hi vulela ndlela ya ku hi ‘hanyiswa hi kukholwa.’ (Va Le Efesusi 2:8) Jehova i ta simama ku vuna vanhu vo tala lezaku va kholwa ka yena. Hi magumo, a misava yontlhe yi ta tala hi vanhu vo mbhelela, vo lulama, ni vo tsaka lava va to dumisa Jehova kala kupinzuka!