1. ¿Bin-utʼil ya skʼan ya kaʼiy jbatik te bitʼil ay schʼuunel koʼtantike?

MABA spisiluk te ants winiketik ay schʼuunel yoʼtanik (2 Tesalonicenses 3:2). Jaʼukmeto te Jehová ya yakʼbey schʼuunel yoʼtan te machʼatik ya x-ichʼot ta mukʼ yuʼune (Romanos 12:3; Gálatas 5:22). Ya skʼan tseʼeluk koʼtantik te bitʼil ya yakʼbotik schʼuunel koʼtantik te Jehovae.

2, 3. 1) ¿Bintik bendision ya jtatik ta skaj te ay schʼuunel koʼtantike? 2) ¿Bintik jojkʼoyel ya kakʼbeytik sujtib?

² Te Jehová la yakʼ te sNichʼan te kʼux ta yoʼtan swenta spisil te machʼa ya yakʼ schʼuunel yoʼtan ta stojol te Jesús ya sta perdon yuʼun te smule. Teme ya kakʼtik schʼuunel koʼtantik ta stojol Jesús, ya xjuʼ ya kamigointik te Jehová sok ya xjuʼ xkuxinotik ta sbajtʼelkʼinal (Juan 6:44, 65; Romanos 6:23). Te Jehová yakʼoj ta ilel slekil yoʼtan ta jtojoltik. Manchukme jmulawilotik sok snujpʼ te ya xlajotike, la yil te ya xjuʼ kuʼuntik spasel te bintik leke (Salmo 103:10). Jaʼ yuʼun la yakʼ jnoptik skʼoplal te Jesús sok te bitʼil la yakʼ sba ta lajele. Kʼalal la kakʼtik schʼuunel koʼtantik ta stojol te Jesús sok ochotik ta jnopojel yuʼune, jajch jmaliytik te ya xkuxinotik ta sbajtʼelkʼinale (kʼopona te 1 Juan 4:9, 10).

³ Jaʼukmeto, ¿binxan ya xjuʼ ya jnoptik ta swenta te chʼuunel  oʼtanile? Teme ya jkʼantik ayuk schʼuunel koʼtantike, ¿jaʼnaxbal ya skʼan ya jnaʼtik te bin spasoj Dios ta jtojoltik sok te bin ya spas ta pajel chaʼbeje? Aytoxan bin ya skʼan ya jpastik. Kiltik bin-a.

4. ¿Bin-a te koʼtantik ya jpastik teme ay schʼuunel koʼtantike?

⁴ Teme ay schʼuunel koʼtantik ta stojol te Jehová sok te Jesuse, ma tikʼuknax ya kaʼiytik snopel te bin spasojik sok te bin yato spasik ta jtojoltik. Jaʼnix jich koʼtantik ya xkuxinotik jich bitʼil ya snojptesotik sok koʼtantik ya jkoltaytik yantik ants winiketik ta snaʼbeyel sba te Jehovae. Te jpuk-kʼop Pablo jich la yal: «Teme jamal yac awal ta awe te ha Cajwaltic te Jesús soc teme ya schʼuhun awoʼtan te Dios la schaʼcuxajtes tal ta yohlil machʼatic chamenic, ya me xcolat yuʼun, como ta awoʼtan yac achʼuhun, hich toj ya xcʼohat, soc yac awal ta jamal ta awe, hich ya xcolat» (Romanos 10:9, 10; 2 Corintios 4:13).

5. 1) ¿Bin yuʼun tulan skʼoplal te schʼuunel koʼtantike? 2) Chola sok junuk ejemplo bin ya skʼan ya jpastik swenta tulanuk te schʼuunel koʼtantike.

⁵ Teme ya jkʼantik te ya xkuxinotik ta sbajtʼelkʼinal ta achʼ balumilal yuʼun te Diose, ya skʼan ayuk schʼuunel koʼtantik sok te tulanuk spisiluk-ora. Te chʼuunel oʼtanil pajal sok jpejt nichim. Swenta lek ta ilel sok ya xchʼi te nichim, spisil-ora ya skʼan akʼbeyel jaʼ. Teme maʼuke ya xtakij sok ya xlaj. Jaʼnix jich, ya skʼan ya kiltik teme lek ay te schʼuunel koʼtantik sok teme yakto ta chʼiele (Tito 2:2; 2 Tesalonicenses 1:3; Lucas 22:32; Hebreos 3:12).

6. ¿Bintik chaʼchajp skʼoplal ya yal ta swenta te chuʼunel oʼtanil te Hebreos 11:1?

⁶ Te Biblia ya yal chaʼchajp skʼoplal te bin ya skʼan ya yal te chʼuunel oʼtanil ta sjun Hebreos 11:1 (kʼopona). Ta sbabial ya yal te bitʼil te chʼuunel oʼtanil jaʼ te «ya jnaʼtic te ya me xcʼoht ta pasel te bin yacotic ta smahliyel». Te bintik ya jmaliytike jaʼ tey smakoj skʼoplal-a te bintik jamal yaloj Dios te ya spas ta pajel chaʼbeje. Jich bitʼil, jnaʼojtik ta lek te ya xtupʼ te bintik chopol sok te ya xtal te achʼ balumilal. Ta schebal, te Biblia ya yal te chʼuunel oʼtanil jaʼ te «jnaʼojtic te smelelil te bin ma chicanuc ta ilele». Te bintik cheʼoxeb smelelil smakoj skʼoplal te ma chikanik ta ilele jaʼ te Jehová, Jesucristo, chʼul-abatetik sok te Ajwalinel te ay ta chʼulchane (Hebreos 11:3). ¿Bin-utʼil ya kakʼtik ta ilel te ay schʼuunel koʼtantik ta smelelil ta swenta te bintik jamal yaloj Dios ya spas sok te bintik ma xjuʼ ya kiltike? Ya kakʼtik ta ilel ta swenta te bin yilel te jkuxlejaltik, ta swenta te bin ya kaltik sok te bin ya jpastike.

7. ¿Bin-utʼil ya skoltayotik te ejemplo yuʼun te Noé swenta ya xkʼot ta koʼtantik te bin ya skʼan ya yal te ay schʼuunel koʼtantike? (Ilawil te lokʼomba ta sjajchibal te articulo).

⁷ Te ejemplo yuʼun te Noé ya skoltayotik swenta ya xkʼot ta koʼtantik te bin ya skʼan ya yal te ay schʼuunel koʼtantike. Te jpuk-kʼop Pablo la yal te bitʼil te Noé «halbot yuʼun Dios scʼoblal bintic ma to chicanuc ta ilel». Jich bitʼil te Noé la skʼan lek ya x-ilot yuʼun te Dios «la spas te barco te banti col soc te machʼatic ay yuʼune» (Hebreos 11:7). Te Noé la yakʼ schʼuunel yoʼtan ta swenta te bin jamal yaloj Jehová ya spase, jaʼ yuʼun la spas jun mukʼul arka. Ayniwan jojkʼoybot yuʼun te spatxujk bin yuʼun te yak ta spasele. Jnaʼojtik ta lek te maba la smuk ta yoʼtan te Noé, melel te Biblia ya yal «te la yalbe scʼoblal te bin toj ta pasel» (2 Pedro 2:5). La yaltiklanbey te ants winiketik te bitʼil te Dios ya yakʼ talel jun pulemal yuʼun ya slajin te bin chopole. Jichniwan la yalbey te ants winiketik te bitʼil albot yuʼun te Jehová: «La jnopix te ya jlajin spisil bintic cuxajtic, yuʼun ha ta scuentahic te nojel ta utsʼinwanej te qʼuinale». Jaʼnix jich te Jehová la yalbey te Noé: «Ya cacʼ tal puhlel ta bahlumilal, ya xlaj spisil te bintic cuxajtic ta yeʼtal chʼulchan. Spisil ya xlaj bintic ay ta bahlumilal».  Ta patil te Noé ta smelelil la yalbey te ants winiketik te bintik ya skʼan ya spasik swenta maba ya xlajik-a. Jich albil-a yuʼun te Jehová: «Ya me xʼochat ta barco» (Génesis 6:13, 17, 18).

8. ¿Bin la yal te Santiago ta swenta te chʼuunel oʼtanile?

⁸ Te jnopojel Santiago jaʼnix jich ay bin la stsʼibay ta swenta te chʼuunel oʼtanile. Laniwan stsʼibay ta patil te kʼalal te Pablo la stsʼibay te karta ta stojol te hebreoetike. Te Santiago jich la yal: «Aʼbon quil te schʼuhunel awoʼtan te mayuc yaʼtelul, te hoʼone, ya caʼbat awil ta scuenta caʼtel te schʼuhunel coʼtane» (Santiago 2:18). Te Santiago la yal te ma tikʼuknax te ya kaltik te ya jchʼuuntik Dios teme ya jkʼantik ayuk schʼuunel koʼtantike. Te chopol espirituetik ya schʼuunik-euk te ay Dios, jaʼukmeto maʼyuk schʼuunel yoʼtanik ta stojol. Te bin ya spas stukelik jaʼ te ya skontrainik ta jkʼaxele (Santiago 2:19, 20). Ta melel te machʼa ay schʼuunel yoʼtan ta stojol Dios ya spas lekil aʼteliletik swenta lek ya x-ilot yuʼun. Jaʼ jich la spas te Abraham. Te Santiago jich la stsʼibay: «¿Ma bal ta scuentahuc yaʼtel te jtatic Abraham te halbot te toj cʼoht yuʼun, te cʼalal la yacʼ ta milbil mahtanil te snichʼan, ha te Isaac, ta scajtajib ta chiqʼuel mahtanil? ¿Ma bal yacuc awil te schʼuhunel yoʼtan la snuhpʼin sba soc te yaʼtel, soc te tsʼacal cʼoht te schʼuhunel yoʼtan ta scuenta te bin la spase?». Ta patil la yakʼ ta naʼel te Santiago te jkʼaxel maʼyuk skʼoplal te chʼuunel oʼtanil teme maʼyuk yaʼtelule. Jich la yal: «Hich te bin utʼil chamen baqʼuet teme mayuc schʼuhlel, ha nix hich chamen te schʼuhunel-oʼtanil teme mayuc yaʼtelule» (Santiago 2:21-23, 26).

9, 10. ¿Bin ya skʼan ya jpastik teme ya jkʼantik te ya kakʼtik ta ilel te schʼuunel koʼtantik ta stojol te Nichʼanile?

⁹ Te Juan la stsʼibay jpajk libro te yichʼojbey sbiil sok oxeb kartaetik kʼalal kʼaxemix 30 jaʼbil-a te la stsʼibay te Santiago ta swenta te chʼuunel oʼtanile. Jich bitʼil yantik jtsʼibojometik yuʼun te Biblia, te Juan kʼoem ta yoʼtan bin-a te chʼuunel oʼtanile. Bayal buelta la stuuntes jpʼalkʼop ta griego te ya yichʼ kʼasesel jich bitʼil «yakʼel ta ilel chʼuunel oʼtanil».

¹⁰ Jich bitʼil te Juan la yal: «Te machʼa ya schʼuhun [o ya yakʼ ta ilel schʼuunel yoʼtan ta stojol] te Nichʼanil ay scuxlejal sbahtel qʼuinal; yan te machʼa ma scʼan ya schʼuhun te Nichʼanil, ma ba ya yil te cuxlejal stuquel, ha ayix ta stojol te yilinba Dios» (Juan 3:36). Teme ya jkʼan ya kakʼtik ta ilel schʼuunel koʼtantik ta stojol te Nichʼanile, ya skʼan ya jchʼuunbeytik te mantaliletik yuʼune (ilawil te recuadro «¿Bin ya skʼan ya yal?»). Te kʼalal ya jkʼopontik spisil te bin la stsʼibay te Juane, ya jtatik ta ilel te bayal buelta la yakʼ ta nopel te Jesús teme ya jkʼantik te kuxlejalil ta sbajtʼelkʼinal yame skʼan ya kakʼtik ta ilel schʼuunel koʼtantik ta stojol sok te sTate (Juan 3:16; 6:29, 40; 11:25, 26; 14:1, 12).

11. ¿Bin-utʼil ya kakʼtik ta ilel te ya kalbeytik wokol te Jehová yuʼun te la snojptesotik te smelelile?

¹¹ Te Jehová la stuuntes te schʼul espiritu swenta la skoltayotik yuʼun ya xkʼot ta koʼtantik te smelelil ta stojol sok te sNichʼane, sok te ayuk schʼuunel koʼtantik ta stojolike (kʼopona te sjun Lucas 10:21). ¿Bin-utʼil ya kakʼtik ta ilel te ya kalbeytik wokol te Jehová ta swenta te bin spasoje? Jaʼ te kʼalal ya kalbeytik wokol spisil-ora yuʼun te ya yakʼ kamigointik ta swenta te Jesús te jaʼ te «machʼa la shach soc te ya shuʼtes te schʼuhunel coʼtantic» (Hebreos 12:2). Jaʼnix jich ya skʼan te ya kakʼbeytikxan yip te schʼuunel koʼtantike. ¿Bin-utʼil? Ta swenta skʼoponel Dios sok skʼoponel  Biblia spisil-ora (Efesios 6:18; 1 Pedro 2:2).

12. ¿Bin ya jpastik teme ay schʼuunel koʼtantike?

¹² Teme tulan te schʼuunel koʼtantik ta swenta te bintik jamal yaloj Jehová te ya spase, yame kakʼtik ta ilel spisil-ora ta kaʼteltik. Jich bitʼil, maba ya jkom jbatik ta yalbeyel skʼoplal te Ajwalinel yuʼun Dios te ants winiketik sok ya jkoltaytik ta stʼunel te Jesuse. Jaʼnix jich ya jpastik «te bin lec ta pasel ta stojol spisil yantic, soc cʼax hich a ta stojol te machʼatic pajal ay schʼuhunel coʼtantic soque» (Gálatas 6:10). Sok ya jpastik tulan ta scholel lokʼel te pokol jtaleltik sok yaʼtelul, melel ma jkʼantik te ay bin ya yutsʼin te bitʼil kamigoinej jbatik sok te Jehovae (Colosenses 3:5, 8-10).

13. 1) ¿Bin yuʼun tulan skʼoplal te ayuk schʼuunel koʼtantik ta stojol te Diose? 2) ¿Bin ya yal te Biblia ta swenta te chʼuunel oʼtanil sok bin yuʼun?

¹³ Te Biblia ya yal teme maʼyuk schʼuunel koʼtantike, ma xjuʼ te lek yoʼtan Dios yuʼun «como te machʼa ya xnohpoj ta stojol Dios ya scʼan ya schʼuhun te ay Dios soc te ya yaʼbe smahtan te machʼatic ya xlehot yuʼune» (Hebreos 11:6). Jaʼnix jich te Biblia ya yal ta swenta te chʼuunel oʼtanil ta stojol Dios ochem skʼoplal ta «yichʼo-ip» kuʼuntike. ¿Bin yuʼun? Melel te chʼuunel oʼtanil ta stojol Dios jaʼ jun sbabial talelil te ya skʼan ayuk yuʼun te smelelil jchʼuunjele (Hebreos 6:1). Jaʼukmeto ma jaʼuknax te chʼuunel oʼtanil te ya xtuun kuʼuntike, ay yantik taleliletik te tulanik skʼoplal te ya skoltayotik yuʼun ma xchʼay te bitʼil lek kamigoinej jbatik sok te Diose (kʼopona te 2 Pedro 1:5-7; Judas 20, 21).

14, 15. ¿Bin yuʼun te jaʼ tulanxan skʼoplal te ayuk skʼuxul koʼtantik te bitʼil schʼuunel koʼtantike?

¹⁴ Te jtsʼibojometik yuʼun te Biblia jaʼ ya yalbeyikxan skʼoplal te chʼuunel oʼtanil te bitʼil yantik taleliletik. ¿Yabal skʼan ya yal-abi te jaʼ tulanxan skʼoplal te chʼuunel oʼtanil ta skuxlejal te j-abat yuʼun Dios te bitʼil yantik taleliletike? Akʼa kiltik.

¹⁵ Te Pablo la spajaltaybey skʼoplal te chʼuunel oʼtanil sok te kʼuxul oʼtanile. Jich la yal: «Teme ay bayel schʼuhunel coʼtan te ha ya sjelbe yawil witsiltic ta scuenta, pero teme mayuc scʼuxul coʼtan, tojol ayon» (1 Corintios 13:2). Jaʼnix jich te Jesús la yal ta swenta te kʼuxul oʼtanil ya kaʼiytik ta stojol te Diose, jaʼ te «mandaril te mero mucʼ scʼoblal» (Mateo 22:35-40). Te kʼuxul oʼtanil ya skoltayotik ta stael yantik taleliletik te ya smulan te Diose. Jich bitʼil te Biblia ya yal ta swenta te kʼuxul oʼtanil te spisil ya schʼuun. Jich yuʼun te kʼuxul oʼtanil ya skoltayotik ta schʼuunel o ta yakʼel ta ilel schʼuunel koʼtantik ta swenta spisil te bintik ya yalbotik te Dios ta Biblia (1 Corintios 13:4, 7).

16, 17. 1) ¿Bin-utʼil ya yakʼ ta ilel te Biblia te kʼax tulan skʼoplal te chʼuunel oʼtanil sok te kʼuxul oʼtanile? 2) ¿Bin talelil tulanxan skʼoplal, sok bin yuʼun?

 ¹⁶ Te Biblia ya yakʼ ta ilel te kʼax tulan skʼoplal te chʼuunel oʼtanil sok te kʼuxul oʼtanil. Jich yuʼun bayal buelta te jtsʼibojometik yuʼun te Biblia ta jun-nax ya yalbeyik skʼoplal. Jich bitʼil, te Pablo jich la stijbey yoʼtan ta spasel te jchʼuunjeletike: «Acʼa jlaptic te smahquil jtahntic, ha te schʼuhunel coʼtantic soc te scʼuxul coʼtantic» (1 Tesalonicenses 5:8). Te Pedro jich la yal ta swenta te Jesús: «Aunque ma ba awilojic, cʼux yac awaʼiy ta awoʼtanic; aunque ma ba yac awilic ta ora ini, yac achʼuhunic» (1 Pedro 1:8). Te Santiago jich la yalbey te yermanotak tsabilik te ya xbajtʼik ta chʼulchan: «¿Ma bal haʼuc tsahbil yuʼun Dios te pobrehetic ta bahlumilal te haʼ cʼuhlejetic ta scuenta schʼuhunel yoʼtanic soc ya xʼaʼbot yichʼic te cuentahinel yuʼun Dios te yaloj te ya yichʼic te machʼa cʼux ta yoʼtanic te Diose?» (Santiago 2:5). Te Juan la yal te jich ya spasotik ta mantal te Diose: «Ha te ya jchʼuhumbetic te sbihil te Snichʼan, ha te Jesucristo, soc te talel cʼaxel cʼux ya caʼiy jbahtic, hich te bin utʼil la spasotic hilel ta mandar» (1 Juan 3:23).

¹⁷ Jaʼukmeto te Pablo jaʼnix jich la yal ta swenta jkʼajkʼaleltik te ya x-ayin «te schʼuhunel-oʼtanil, te smucʼul-oʼtanil soc te scʼuxul-oʼtanil; pero ta yoxebal ha mucʼ scʼoblal te cʼuxul-oʼtanile» (1 Corintios 13:13). ¿Bin yuʼun la yal te Pablo te jaʼ tulanxan skʼoplal te kʼuxul oʼtanil ta yoxebal taleliletike? Jaʼ ta swenta te pajel chaʼbej ma xtuunix kuʼuntik te schʼuunel koʼtantik ta swenta te bintik jamal yaloj Dios te ya spas ta achʼ balumilale. Tey-abi yakotikix ta smulanel-a te tʼujbil kuxlejalil te ya yalbey skʼoplal te Bibliae. Jaʼukmeto spisilnanix-ora ya skʼan te kʼuxuk ta koʼtantik te Dios sok te ants winiketike. Spisil-ora ya xchʼi bael te skʼuxul koʼtantik ta stojolike.

18, 19. ¿Bin lokʼem-a ta skaj te ay schʼuunel yoʼtanik te j-abatetik yuʼun Dios ta kʼajkʼal ini, sok machʼa ya skʼan ya kakʼbeytik yutsil skʼoplal ta swenta-abi?

¹⁸ Te j-abatetik yuʼun Dios ta jkʼajkʼaleltik ya yakʼik ta tojobtesel skuxlejalik ta swenta te chʼul espiritu. Jaʼ yuʼun ya yakʼ schʼuunel yoʼtanik ta swenta te Ajwalinele sok ya x-aʼtejik ta stojol. Jaʼnix jich talel kʼaxel kʼux ya yaʼiy sbaik (Gálatas 5:22, 23). Te bin lokʼem-ae, jaʼ te kʼaxem ta waxakeb miyon te kermanotaktik yakik ta smulanel lamalkʼinal sok te bitʼil jun-nax ayik ta kongregasionetike. Chikan ta ilel te bayal yip te chʼuunel oʼtanil sok te kʼuxul oʼtanile.

¹⁹ Te bitʼil jun-nax ayotike, jaʼ ta swentanax te koltayel yuʼun Jehová. Jaʼ yuʼun ya skʼan ichʼel ta mukʼ (Isaías 55:13). Ya kalbeytik bayal wokol Jehová te bitʼil yakʼoj te ya jtatik jkoleltik ta swenta te schʼuunel koʼtantike (Efesios 2:8). Te Jehová yato skoltaylanxan bayal ants winiketik swenta ayuk schʼuunel yoʼtanik ta stojol. Ya sta yorail te ya xnoj te Balumilal ta tojil ants winiketik, te maʼyuk bin ma stojiluk ya spasik sok te tseʼelnax yoʼtanik ya yalbeyik yutsil skʼoplal te Jehová ta sbajtʼelkʼinal.