1. Nemene la ewekë ka traqa ngöne la kola lepi Ierusalema?

AME lo macatre 607 qëmeke i Keriso, hnei Nebukaneza joxu II me trongene isi angeic hna lepe la traone Ierusalema. Öni Tusi Hmitrötr, hnene la joxu hna humuth la itre thupëtresij hnei taua. “Tha hnime kö la thupëtesiji me jajiny, me qat, me ka qia.” Ame hë e thupen, “hnei angate hna deuthe tije la ēnē i Akötesie, me thë tije la hag’ e Ierusalema, me deuthe tije la nöjei uma i joxu hnei eë, me angazone asë la ite inege hna ajan.”—2 Aqane lapa ite joxu 36:17, 19.

2. Nemene la ithuemacanyi hnei Iehova hna hamëne koi angetre Iudra, nge nemene la ka traqa koi angatr?

² Tha sesëkötre kö angetre Iudra la kola lepi Ierusalema. Nyimutre hë la itre macatre ne upe Iehova la itre perofeta i Nyidrë troa thuemacane la itre atr ka hape, e tro pala hi angatre a tha idrei, tro ha traqa koi angatr hnei angetre Babulona troa lepe apatrenyi angatr. Tro ha humuth la angetre Iudra ka ala nyimu hnei taua, nge ame göi itre ka mele pe, troa xomi angatr troa po e Babulona. (Ieremia 15:2) Nemene la pengöne la itre ka po e Babulona? Hetre ewekë kö ka traqa kowe la itre keresiano ka tune la hna traqa koi angetre Iudra ekö e Babulona? Maine eje hi. Nga eu?

3. Nemene la pengöne la itre ka po e Babulona?

³ Öni Iehova kowe la angetre Iudra ka hape, e xomi angatre jë hë troa po e Babulona, loi e tro angatr a kapa me atreine melën la mele e cili. Öni Nyidrë: “Nyi uma jë nyipunie, nge lapan’ it’ ej ; nge nyi zi nyipunie, nge xeni wene ju it’ ej. Nge thelejë la tingetinge ne la lapa lo hnenge hna iupi xomi nyipunie kow, nge thithijë koi Iehova thatraqan’ ej, ke ngöne la tingetinge ne eje tro nyipunie a hane tingeting.” (Ieremia 29:5, 7) Ame la angetre Iudra ka xötrethenge la itre hna amekötine hnei Iehova tre, lolo hi la aqane mele i angatr e cili. Hnene la angetre Babulona hna nue la angetre Iudra troa ketre kuca kö la huliwa ne thele manie i angatr, me trongëne asë la nöj. Ame ngöne la ijine cili, Babulona hi la götrane gaa tru hnë thele mani. Kola mama ngöne la itre itus ka hekö ka hape, ame lo angetre Iudra ka po e Babulona, ala nyimu thei angatr la itre ka inine itö, me salem, me inine huliwan. Ame itre xa angetre Iudra, itre ka trenamo angatr. Matre tha jole catre kö koi angatr troa po e Babulona; tha tune kö lo angetre Isaraela hna thahluëne e Aigupito koi nyimu macatre.—E jë la Esodo 2:23-25.

4. Drei la itre xa ka xeni pun hnene la hna tha idrei ne la angetre Iudra, nge pine nemene matre tha ijiji angatre kö troa eatrën asë la Wathebo?

⁴ Ame itre xa angetre Iudra, itre ka nyihlue nyipici angatr koi Iehova. Maine eje hi laka, pëkö ngazo hnei angatre hna kuca, ngo hnei angatre fe hna xeni pun la hna tha idrei hnene la nöj. Eje hi laka, pëkö ka pë thei angetre Iudra, ngo tro angatre lai a huliwa i Akötresie tune kaa? Ase hë lepe apatrenyi la ēnē memine la ita ne huuj, matre thatreine kö tro la itretre huuj a kuca la hnëqa i angatr. Ngo ame pe, hnene la angetre Iudra ka lapaun hna isin troa xötrethenge la wathebo i Akötresie. Hnei Daniela, Saderaka, Mesaka, me Abedenego hna xel ma xen “la a i joxu,” itre xen hna wathebone hnei Iehova. Ketre, öni Tusi Hmitrötr, hnei Daniela hna thithi lapa koi Akötresie. (Daniela 1:8; 6:10) Ngo hnene laka, angatre a mele fene la musi angetre ethen, haawe, tha ijije kö troa trongëne asë la hna amekötine hnene la Wathebo i Mose.

5. Nemene la mejiune hna hamëne hnei Iehova kowe la nöje i Nyidrë? Pine nemene matre nyine hain la hna axeciën hnei Iehova?

⁵ Hapeu, tro pala kö la angetre Iudra a huliwa i Akötresie thenge la aqane amekötine Nyidrë? Ame ngöne la ijine cili, thatreine kö troa traqa kowe la mekune cili ke, ame angetre Babulona, tha majemine kö angatr nue hmaca lo itre atr hna xome troa po. Ngo ase hë Iehova axeciën ka hape, tro ha thapa la nöje i Nyidrë qa Babulona, nge celë hi ewekë ka traqa. Ka eatr pala hi la itre hna axeciën hnei Akötresie!—Isaia 55:11.

6, 7. Pine nemene matre loi e tro sa amekötine la aqane trotrohnine së?

⁶ Hapeu, hna othe kö la itre keresiano ngöne la musi Babulona tune la angetre Iudra ekö? Nyimu macatre hë enehila ne qaja hnene la Ita Ne Thup ka hape, hna oth la itre keresiano ngöne la musi Babulona lo 1918, nge hna thepe angatr qa cili lo 1919. Ngo, ame  ngöne la tane mekune celë me ka troa xulu, tro sa wange la kepine matre loi e tro sa amekötine la aqane trotrohnine së la mekune cili.

⁷ Pane mekune ju: Ame la Babulona Atraqatr tre, kola qaja la itre hmi ka thoi asë e cailo fen. Nge, tha hnene kö la itre hlue i Akötresie hna ce huliwa memine la itre hmi ka thoi lo 1918. Nyipici laka, ame ngöne la ijine cili, hna akötrëne la itre keresiano hna iën, ngo ame la ka akötrë angatr tre, itre mus, ngo tha hmi ka thoi kö. Ketre, itre macatre qëmekene la Pane Isi Ka Tru, nanyi hë la itre hlue i Akötresie qa ngöne la hmi ka thoi. Matre, thatreine kö troa qaja ka hape, hna nyiqaane oth la itre hlue i Iehova ngöne la musi Babulona lo 1918.

8. Nemene la ewekë ka traqa la kola meci hnene la ange aposetolo? (Wange ju la pane iatr.)

⁸ Ame lo Penetekos macatre 33, hetrenyi la itre thauzan lao keresiano hna iën hnei uati hmitrötr ngöne la ijine cili. Angatr la “xöte hna iëne . . . me xötete huje joxu, me nöje ka hmitöt, me xöte hna itön.” (E jë la 1 Peteru 2:9, 10.) Ame lo ijine ange aposetolo a mel, angatr la ka thupëne hnyawa la itre ekalesia. Ngo, ame hë la angatr a mec, nyiqaane mama pi hi e hnine la ekalesia la itre atr ka hamë ini ka thoi. Nge, kola thele troa ananyine la itre keresiano qa ngöne la nyipici. Ka tru kowe la itre atr cili la hna inin hnei Aristote me Platon, matre kola qaja trongëne la itre mekuna i nyidro, nge wangacone pë hë la itre nyipici qa hnine la Wesi Ula i Akötresie. (Ite Huliwa 20:30; 2 Thesalonika 2:6-8) Ame thei angatr, hetrenyi la itre hna metrötrën, me itre qatre thup. Matre mama pi hi e cili la ketre lapa kö ka mus, ngo hnei Iesu pe lo hna qaja kowe la itretre drei nyidrë ka hape, “Ite tejine asë nyipunie.”—Mataio 23:8.

9. Amamane jë la aqane ce huliwa la itre keresiano ka thoi memine la musi Roma. Nemene hë la pune lai?

⁹ Ame lo macatre 313, hnei Constantin joxu i angetre Roma hna kapa la hmi cili, kösë ketre pengöne hmi keresiano matre ketre hmi ne la nöj. Thupene lai, hna ce huliwa la hmi memine la musi Roma. Kola mama lai ngöne la ketre icasikeu ka tru hna kuca hnei Constantin memine la itre hene ne hmi (Concile de Nicée). Thupene la icasikeu cili, hnei Constantin hna helë Arius, ketre atre huuj qa ngöne la nöje ke, xele kö angeic ma kapa la mekune ka hape, Iesu hi la Akötresie. Ame hë e thupen, joxu pena pi hi Théodose, nge ame e cili, hmi katolik la hmi hna kapa hnei angetre Roma. Önine la itre historiens, ame lo angetre ethen, ene la angetre Roma tre, itre “Keresiano” pena ha angatr ngöne la ijine Théodose joxu. Ngo, ame ngöne la ijine cili, hnene la itre keresiano ka thoi hna kapa la itre ini i angetre ethen, matre itre ka sine hë angatr la Babulona Atraqatr. Ngo ame pe, hetrenyi pala hi la itre keresiano hna iën. Hnei Iesu hna aceitunë angatr me qitr. Angatr a isin troa kuca la huliwa i Akötresie, ngo xalaithe hi la itre ka drei angatr. (E jë la Mataio 13:24, 25, 37-39.) Hna othi angatr hnyawa ha e cili hnene la musi Babulona!

10. Pine nemene matre itre atre hë a öhnyi gelene la hmi?

 ¹⁰ Pine laka, ala nyimu pala kö la ka atreine e Tusi Hmitrötr ngöne la qene Heleni me qene Latin, haawe, ijije hi tro angatr a ce wang la itre ini hna hamën hnei Tusi Hmitrötr memine la itre hna hamën hnene la hmi. Matre, ame hë la itre atr a öhne laka, ka thoi la itre ini hna hamën hnei hmi, angatr pë hë a thipetrije pi. Ngo, ka hetre ethanyin e troa ce thawa lai memine la itre xa atr ke, tro lai humuthi angatr pine lai.

11. Nemene la hna kuca hnei hmi?

¹¹ Kola tro la itre macatre, nge xalaithe hë la itre ka qene Heleni maine qene Latin. Nge, hnene la itre hene ne hmi hna wathebone troa ujëne la Wesi Ula i Akötresie ngöne la qene hlapa hna ithanatane hnene la itre atr. Ngacama hetre itre xan e angatr ka thatreine  e hnyawa me cinyianyin, ngo ame pe angatr hmekuje hi me itre ka inamacan la ka ijij troa e la Tusi Hmitrötr. Ketre, ame la atr ka tha kapa kö la hna inin hnene la hmi tre, hna tranyi angeic. Ame göi itre nyipi keresiano, angatre hë a isa icasikeu ngöne la itre neköi gurup ka co, nge ame itre xan tha ijije kö troa hane sin. Haawe, tune lo angetre Iudra ka po ekö e Babulona, thatreine hë la itre keresiano hna iën, lo “xötete huje joxu” troa kuca ha la itre huliwa i Akötresie thenge la aqane amekötine i Nyidrë. Kola mama e cili laka, Babulona Atraqatr la ka musi hune la itre atr!

12, 13. Nemene la lue kepine ka upe la itre nyipi keresiano troa hetre mejiun? Qejepengöne jë.

¹² Tro kö la itre keresiano a kuca la itre huliwa i Akötresie thenge la aqane amekötine Nyidrë? Eje hi! Hetrenyi la lue kepine matre ijije hi troa traqa kow. Ame la hnapane tre, hna xötrei kuca la masin ne feja tusi lo macatre 1450. Ame ekö, hna fejane lapane la Tusi Hmitrötr hnei wanakoim matre tha ka hmaloi kö la huliwa celë. Traqa koi 10 lao treu matre umuthe pi la ca Tusi Hmitrötr hnene la atre ka maca! Ketre, hna cinyihane lai ngöne la itre kupeine öni ekö. Matre tha tru kö la itre Tusi Hmitrötr ekö, nge tru pena la thupen. Ngo, jëne la masin ne feja itusi me pepa, traqa koi 1 300 lao götrane pepa hna fejane e nöjei drai!

¹³ Ame la hnaaluene kepin tre, ene la kola ujëne la Tusi Hmitrötr. Ame ngöne lo macatre 1500, hnene la itre atre ka tha xou hna ujëne la Wesi Ula i Akötresie ngöne la itre qene hlapa hna ithanatane hnene la itre atr. Atre hnyawa hi angatr ka hape, e troa atre la hnei angatr hna kuca, tro ha humuthi angatr. Nge ame itre hene ne hmi, angatr a xouen wanga hane jë e la Tusi Hmitrötr hnene la itre atr ngöne la sipu qene hlapa i angatr, me isa thel ka hape: ‘Hna cinyihan eka hnine la Tusi Hmitrötr la ini göi Hnë Ifolosa (Purgatoire)? Nge, eka hnine la Tusi Hmitrötr la kola hape, tro la atr a nyithupene la peenë matre troa hmi thatraqane la itre ka mec? Eka e hnine la Tusi Hmitrötr la kola qeje Pape me Cardinal?’ Nyimu ini ka thoi hna hamën, nge hna nyitrepene hnene la itre ini i Aristote me Platon, lue atr ka mel ekö qëmekene troa traqa hnei Iesu Keriso. Matre, tha madrine kö la itre hene ne hmi la kola hnying tune lai koi angatr hnene la itre atr. Hnei angatr hna isin, matre tha tro hmaca kö a e la Tusi Hmitrötr hnene la itre atr, nge tha tro hmaca kö a amexeje la itre hnying ka tune lai. Hetre itre atr, trahmanyi me föe hna humuth ke, hnei angatr hna thipetrij la itre ini cili. Ngo, hetrenyi la itre atr ka ala xalaithe hi ka xele ma hane mel fen la musi Babulona Atraqatr. Öhne hë angatre la nyipici qa hnine la Wesi Ula i Akötresie, ame hnei angatr hna thele troa atre la itre xa ithuemacanyi qa ngön! Haawe, tha hmitre pe kö matre lö pi hë la itre nyipi keresiano qa ngöne la hmi ka thoi.

14. (a) Nemene la hna kuca hnene la itre atr ka ajane troa inine la Tusi Hmitrötr? (b) Nemene la aqane thele Russell la nyipici?

¹⁴ Ala nyimu la itre atr ka ajane troa e me  inin la Tusi Hmitrötr, me ce thawa la hnei angatr hna inin. Tha ajane kö angatre tro la itre hene ne hmi a amekötine koi angatr la nyine tro angatr a lapaune kow. Matre, angatr a feke pi kowe la itre xa nöj, matre tha tro kö a ajolë angatr troa inin la Tusi Hmitrötr. Ame la ketre nöje hna feke kow tre, Etazini. Ame lo macatre 1870, hnei Charles Russell me itre xan ju kö hna nyiqaane ini ajuine la Tusi Hmitrötr. Hnei Charles Russell hna pane thel la hmi ka hamëne la itre ini ka nyipici. Angeice pë hë a xome jë la itre ini hna hamën hnene la itre hmi asë, itre ka lapaune ju hë koi Akötresie maine itre ka lapaune koi itre xa haze, me ce wange itre ej memine la hna qaja hnene la Tusi Hmitrötr. Angeice hë a trotrohnine e cili ka hape, pëkö ala casi thene la itre hmi cili ka xötrethenge hnyawa la hna qaja hnene la Wesi Ula i Akötresie. Ame hnei angeic hna ithanata jë memine la itre hene ne hmi ka ala nyimu. Angeic a thele matre tro angatr a kapa la itre ini hnei angeic me itre sine huliwa i angeic hna öhn e hnine la Tusi Hmitrötr. Nge, aja i angeic tro fe angatr a hane ce thawa itre ej ngöne la uma ne hmi angatr, ngo, xele kö la itre hene ne hmi. Haawe, trotrohnine hë Russell me gurupe i angeic, lo itre hna hën ka hape, Itretre Ini Tusi Hmitrötr ka hape, tha tro kö angatr a ce huliwa i Akötresie memine la itre atrene la hmi ka thoi.—E jë la 2 Korinito 6:14.

15. (a) Eu la kola oth la itre nyipi keresiano ngöne la musi Babulona? (b) Nemene la itre hnying hna troa sa ngöne la tane mekun ka troa xulu?

¹⁵ Hne së hna wang ngöne la tane mekune celë ka hape, hna oth la itre nyipi keresiano ngöne la musi Babulona thupene ju hi la hna mec hnei ange aposetolo. Ngo, tro pala kö sa thel troa atre la itre mekune ka sa la itre hnying celë: Nemene la ka amamane koi së ka hape, lö hë la itre keresiano hna iën qa Babulona Atraqatr ngöne lo itre macatre qëmekene lo 1914? Nyipici kö laka, patre kö la ixatua i Iehova thene la itre hlue i Nyidrë ke, tha hnei angatre kö hna cainöj ngöne lo itre macatre ne Pane Isi Ka Tru? Hetre trejin kö ngöne la ijine cili ka nuetriji Iehova matre troa lö hnine la isi? Maine nyipici laka, hna oth la itre keresiano ngöne la musi ne la hmi ka thoi thupene la hna mec la ange aposetolo, eu la angatr a lö qaa lai? Itre hnyinge lai ka tru, nge hna troa sa ngöne la tane mekun ka troa xulu.