1, 2. Boasa ringkot patoguhon na asing?

SI CRISTINA, na marumur 18 taon, mandok, ”Ndang hea natuatuangku mandok hata na patoguhon rohangku, alai hata na pahansithon roha do. Didok nasida dakdanak dope ahu, ndang olo marsiajar, jala mokmok. Gabe jotjot ahu tangis jala ndang olo ahu mangkatai tu nasida. Ndang mararga be huhilala diringku.” ^[1] (Ida catatan.) Maol do molo ndang adong na patoguhon hita!

² Tapingkirhon ma pangkorhonna molo tapatogu na asing. Si Ruben mandok, ”Saleleng martaontaon, marsitutu do ahu asa unang sai marmetmet ni roha. Alai sada tingki, marbarita ma ahu dohot sahalak sintua na mamboto hasusaan na huadopi. Ditangihon do tingki hupaboa sude na di rohangku. Didok ibana do angka na denggan na huulahon. Dipaingot ibana do ahu taringot hata ni Jesus, na mandok ummarga do hita sian angka pidong. Gabe jotjot ma huingot ayat i jala on mambahen las rohangku. Hata sian sintua i patoguhon rohangku.”—Mat. 10:31.

3. (a) Aha do na didok apostel Paulus taringot patoguhon na asing? (b) Aha do na laho taulas di artikel on?

 ³ Bibel paboahon, porlu do hita tongtong masipatoguan. Apostel Paulus manurat tu halak Kristen di Heber, ”Matahon hamu ma, ale angka dongan, so tung tardapot di manang ise pe sian hamu roha na jahat, na so porsea, na manundali Debata na mangolu i; alai masiapoan ma hamu ganup ari.” Dipatorang si Paulus, ”Unang tung gabe pir roha ni manang ise sian hamu, hinorhon ni dosa na paotootohon!” (Heb. 3:12, 13) Rimangi ma songon dia pangkilalaanmu tingki sasahalak patoguhon hamu. Alani i, boasa ingkon tapatogu angka donganta? Aha do na taparsiajari sian Jahowa, Jesus, dohot si Paulus taringot patoguhon na asing? Songon dia do caranta laho patoguhon na asing? Taulas ma sungkunsungkun on.

4. Ise do na porlu dipatogu? Boasa godang halak saonari ndang olo patoguhon na asing?

⁴ Hita sude porlu dipatogu. Tarlumobi, natuatua ingkon patoguhon ianakhonna. Sahalak guru na margoar si Timothy Evans patorangkon, dakdanak ”porlu dipatogu songon suansuanan na mangkaporluhon aek”. Didok muse, ”Molo tapatogu ianakhon, marlas ni roha ma nasida.” Alai, ala mangolu hita di ”tingki parpudi”, godang do halak mangkaringkothon diri jala ndang ”marroha holong”. (2 Tim. 3:1-5) Adong do natuatua na so olo patoguhon ianakhonna ala nasida ndang hea dipatogu natuatua ni nasida. Halak na magodang pe porlu do dipatogu, alai ndang somal on diulahon. Umpamana, godang do na mandok ndang hea nasida dipuji di inganan parkarejoanna.

5. Songon dia do hita patoguhon na asing?

⁵ Hita boi patoguhon na asing marhite mamuji nasida. Hita pe boi mangulahon i marhite paboahon angka parange na denggan na adong di sasahalak, jala mangapuli nasida tingki marmetmet ni roha. (1 Tes. 5:14) Ala jotjot hita rap dohot dongan sahaporseaon, godang do na boi tadok laho patoguhon nasida. (Jaha Parjamita 4:9, 10.) Sungkun ma dirimu: ’Diboto na asing do molo ahu mangkaholongi nasida? Jotjot do huulahon on?’ Pingkirhon ma na dipaboa Bibel, ”Hata sisandok pe di tingki halehetanna, mansai denggan do.”—Poda 15:23.

6. Boasa lomo roha ni Sibolis mambahen hita marmetmet ni roha? Paboa ma tudosan songon dia ibana mangulahon on.

⁶ Poda 24:10 mandok, ”Molo godoron roham di ari hagogotan, lam moru ma gogom.” Diboto Sibolis, molo marmetmet ni roha hita, sega ma paralealeonta tu Jahowa. Dibahen Sibolis do marmetmet ni roha si Job marhite  parohon angka hasusaan. Alai, ndang marhasil sangkap ni Sibolis. Marsihohot do si Job tu Jahowa. (Job 2:3; 22:3; 27:5) Hita pe boi do mangalo Sibolis asa unang marhasil sangkapna. Molo tapatogu keluarganta dohot dongan sahaporseaon di huria, na taurupi do nasida tongtong marlas ni roha jala solhot tu Jahowa.

7, 8. (a) Songon dia do Jahowa patoguhon angka jolma? (b) Songon dia do natuatua maniru Jahowa? (Ida gombar di mula ni parsiajaran.)

⁷ Jahowa patoguhon angka jolma. Panurat psalmen mandok, ”Donok do Jahowa di angka na bojok marroha, jala ditumpahi do angka na pogos tondi.” (Ps. 34:19) Tingki mabiar si Jeremia jala marmetmet ni roha, marjanji do Jahowa laho mangurupi ibana. (Jer. 1:6-10) Disuru Jahowa do sada surusuruan laho patoguhon si Daniel. Surusuruan i mandok si Daniel, ”baoa hasudungan”. (Dan. 10:8, 11, 18, 19) Boi do hamu patoguhon angka dongan sahaporseaon, dohot ma i angka perintis jala angka na matua na so boi be mangulahon godang ulaon?

⁸ Nang pe nunga leleng Jahowa rap dohot Jesus, alai diboto Jahowa do porlu Jesus dipatogu tingki di tano on. Ditangihon Jesus do AmaNa mangkatai sian surgo dung tardidi ibana, nang di tingki parpudi ibana di tano on. Dua hali ma didok Jahowa, ”On do Anakku, Haholongan i; halomoan ni rohangku do Ibana!” (Mat. 3:17; 17:5) Tontu, gabe togu ma roha ni Jesus tingki diboto na dihaholongi Jahowa ibana. Dung i, di borngin andorang so mate, susa do dihilala Jesus. Dipatogu Jahowa do ibana marhite manuru surusuruan paposhon rohana. (Luk. 22:43) Angka natuatua, tiru ma Jahowa marhite tongtong patoguhon ianakhonmuna. Puji ma nasida tingki diulahon nasida na denggan. Tingki adong elaela di singkola, urupi ma nasida asa togu jala martahan.

9. Aha do na taparsiajari sian cara ni Jesus maradophon angka apostel?

⁹ Dilehon Jesus do sitiruon na boi tatiru. Di borngin andorang so mate, diburi Jesus ma pat ni angka apostel jala dipaboa tu nasida ringkot ni serep marroha. Alai, ginjang rohanasida jala marsoal taringot ise na umsangap, jala didok si Petrus ndang olo ibana manadingkon Jesus. (Luk. 22:24, 33, 34) Ndang hasalaan ni nasida na diida Jesus. Dipuji Jesus do nasida ala tongtong marsihohot tu ibana. Marjanji do Jesus na umbalga dope ulaon ni nasida sian na diulahon Jesus, jala didok Jesus do na dihaholongi Jahowa nasida. (Luk. 22:28; Joh. 14:12; 16:27) Tasungkun ma dirinta, ’Olo do ahu maniru Jesus, mamuji halak na asing jala ndang holan mangida hasalaan ni nasida?’

10, 11. Songon dia do si Paulus patoguhon dongan sahaporseaonna, jala aha do na laho ulahononna?

 ¹⁰ Jotjot do si Paulus mangkatahon na denggan taringot dongan sahaporseaonna. Leleng do ibana sapardalanan dohot pigapiga sian nasida. Tangkas do ditanda ibana nasida, alai ndang disurat ibana taringot hasalaan ni nasida. Dipuji do nasida. Umpamana, didok si Paulus do taringot si Timoteus, ”Anakkonku, haholongan jala haposan ni rohangku.” Pos rohana, na olo si Timoteus mamparrohahon dongan na asing. (1 Kor. 4:17; Plp. 2:19, 20) Didok si Paulus do tu halak Kristen di Korint taringot si Titus, ”Donganku do ibana jala angkuphu mangkongkop hamu.” (2 Kor. 8:23) Tontu, togu ma roha ni si Timoteus dohot si Titus mamboto pangkilalaan ni si Paulus tu nasida!

¹¹ Si Paulus dohot si Barnabas rade mangalehon ngoluna laho patoguhon dongan sahaporseaonna. Umpamana, diboto nasida do godang halak di Listra laho mamunu nasida. Alai, laho do nasida tusi patoguhon angka halak na baru, asa boi nasida tongtong marsihohot tu Jahowa. (Ul. 14:19-22) Di Epesus, godang do halak na marsogo ni roha tu si Paulus. Alai, tongtong do ibana tading disi laho patoguhon dongan sahaporseaonna. Ulaon ni Apostel 20:1, 2 mandok, ”Dijou si Paulus ma angka sisean i tu jolona, laho martinading hata tu nasida, dung i borhat ma ibana tu Makedonia. Didalani ma angka luat i, buas jamitana mangapoi nasida; laos tolhas ma tu tano Junani.”

12. Boasa denggan molo ro tu parpunguan?

¹² Dihalomohon Jahowa do na dumenggan tu hita. Alani i ma, dipaboa Ibana tu hita asa tongtong marpungu. Di parpunguan, taparsiajari do taringot Ibana jala boi hita masipatoguan dohot dongan. (1 Kor. 14:31; jaha Heber 10:24, 25.) Si Cristina, na dipaboa di mula ni artikel on, mandok, ”Na mambahen lomo rohangku marpungu, i ma holong dohot hata na patoguhon na hudapot disi. Sipata, ndang tabo huhilala tingki sahat di Bale Harajaon. Alai, ro ma donganta borua, dihaol ma ahu jala didok na uli do ahu. Dipaboa nasida na holong rohanasida tu ahu jala las rohanasida ala maju ahu di partondion. Hata ni nasida mambahen denggan pangkilalaanku!” Mansai ringkot do patoguhon na asing!—Rom 1:11, 12.

13. Boasa angka halak naung leleng manomba Jahowa porlu dipatogu?

¹³ Angka halak naung leleng manomba Jahowa pe porlu do dipatogu. Taingot ma si Josua. Tingki laho bongot halak Israel tu Tano Kanaan, dipillit Jahowa do si Josua manguluhon nasida. Nang pe si Josua nunga leleng manomba Jahowa, disuru Jahowa do si Musa patoguhon si Josua. Jahowa mandok, ”Dung i dokkon ma si Josua, asa pir tondina i jala marsihohot, ai taripar do anggo ibana manguluhon bangso on, jala ibana marbagihon tano naung niidam bahen partalian  nasida.” (5 Mus. 3:27, 28) Porlu do si Josua dipatogu. Alana, godang do parporangan na laho diadopi bangso Israel jala hea do talu nasida. (Jos. 7:1-9) Hita pe boi do patoguhon angka sintua dohot pengawas wilayah, na marsitutu manjaga naposo ni Debata. (Jaha 1 Tessalonik 5:12, 13.) Sahalak pengawas wilayah mandok, ”Sipata, adong donganta na mangalehon surat na marisi hata hamauliateon ala las rohanasida di haroronami. Disimpan hami do surat i jala dijaha hami do i tingki marmetmet ni roha. On ma na patoguhon rohanami.”

14. Sitiruon aha do na patuduhon denggan ni mamuji na asing tingki mangalehon poda tu nasida?

¹⁴ Sada tingki, dilehon si Paulus ma poda tu halak Korint. Tingki diulahon nasida i, dipuji si Paulus do nasida. (2 Kor. 7:8-11) Tontu, hata ni si Paulus mambahen nasida tongtong mangulahon na denggan. Angka sintua dohot angka natuatua boi maniru si Paulus. Si Andreas, na dua ianakhonna, mandok, ”Hata na patoguhon mangurupi ianakhon asa lam denggan jala maju di partondion. Sai diingot ianakhonmu do hata sisongon i. Nang pe diboto ianakhonta na denggan, alai boi do gabe hasomalan di nasida mangulahon i molo tongtong tapatogu.”

15. Songon dia do hita boi patoguhon na asing?

¹⁵ Paboa ma tu dongan sahaporseaonta na las do rohanta mangida parange ni nasida na denggan. (2 Kron. 16:9; Job 1:8) Molo taulahon on, na maniru Jahowa dohot Jesus do hita. Nang pe ndang boi be hita mangulahon godang ulaon, mararga do ulaonta di nasida. (Jaha Lukas 21:1-4; 2 Korint 8:12.) Umpamana, taboto do nunga maol di angka donganta na matua ro tu parpunguan dohot marbarita na uli. Olo do hita patoguhon jala mamuji nasida?

16. Tingki sadihari do hita patoguhon na asing?

¹⁶ Tongtong ma tapatogu halak na asing. Tingki diida hamu sasahalak mangulahon na denggan, puji ma ibana. Tingki si Paulus dohot si Barnabas di huta Antiokia na di Pisidia, angka sintua ni sinagoga mandok tu nasida,  ”Ale angka dongan, molo adong di hamu hata sipaingot tu natorop on, dok hamu ma!” Dipatogu si Paulus do angka na asing di tingki i. (Ul. 13:13-16, 42-44) Molo tapatogu na asing, lomo ma rohanasida patoguhon hita.—Luk. 6:38.

17. Songon dia do caranta mamuji na asing?

¹⁷ Puji ma dongan na asing. Tingki dipuji Jesus halak Kristen di Tiatira, tangkas do dipaboa ibana angka na denggan na diulahon nasida. (Jaha Pangungkapon 2:18, 19.) Songon dia do hita maniru ibana? Ra, olo do hita mamuji ina naung mabalu na marsitutu pagodanggodangkon ianakhonna nang pe maol dihilala. Molo hamu sahalak natuatua, puji ma ianakhonmuna ala marsitutu nasida manomba Jahowa. Paboa ma angka na denggan na diulahon nasida. Molo tangkas do tapaboa hata na patoguhon tu na asing, diboto nasida ma lapatan ni hatanta.

18, 19. Songon dia do hita masiurupan asa jonok tu Jahowa?

¹⁸ Disuru Jahowa do si Musa patoguhon si Josua. Saonari, ndang langsung be Jahowa mangkatai tu hita asa tapatogu na asing. Alai, las do rohaNa molo marsitutu hita patoguhon na asing. (Poda 19:17; Heb. 12:12) Umpamana, tingki donganta baoa marjamita di huria, tapaboa ma na lomo rohanta manangihon jamitana. Ra, jamitana mangurupi hita martahan mangadopi sitaonon manang mangantusi angka ayat sian Bibel. Donganta borua mambahen surat tu donganta na marjamita. Didok ibana, ”Nang pe holan satongkin hita mangkatai, diboto Brur do na lungun pangkilalaanku jala dipatogu Brur do ahu. Tingki hubege lambok Brur mangkatai, tingki marjamita manang tingki mangkatai dohot ahu, ninna rohangku silehonlehon sian Jahowa do i.”

¹⁹ Boi do hita tongtong masiurupan asa jonok tu Jahowa molo taihuthon poda ni si Paulus na mandok, ”Sai masipaingotan ma hamu jala masipauliulian, songon naung binahenmuna.” (1 Tes. 5:11) Molo tongtong hita masipatoguan ganup ari, las ma roha ni Jahowa!