1, 2. Ka uagu súdini lubéi wíchugun gurasu houn amu?

ARIÑAGATU aban nibureintu 18 irumu tau gíritu Cristina: “Díseguati híchugun nagübürigu gurasu nun; lubaragiñe lira, aba hachuragunina sun oura. Gáriti nun naganbuni le hariñagubei. Ariñagatiña ibidiougua lan nau, mafurendeiradi nan ani dibune nan. Aba burí nayahun; himei numuti mayanuhan nan hama. Sanditina mebegi nan ni kata” ^[1] (ariha huméi abürüdǘni lidan lagumuha arütíkulu). Arufudati hénpulu le gayara lan hénrengu lan ibagari dan le ua hamá íchugutiña gurasu woun.

² Luagu amu oubaü, gayarati wíderaguniña amu saragu ánhawa íchiga gurasu houn. Ariñagati aban íbiri gíriti Rubén: “Napurichihaña meha luma aban wéiyaali lidan afiñeni, le íchugubei fe mabuidun lan nasandiragun nungua weyu ligía. Aba nabahüdaguni lun ka lan nasandirubei ani aba laganbunina. Aba layanuhan nun luagu sun katei buiti le nadügübei. Haritaguagüda lumuti giñe nun ariñaga lan Hesusu luagu gebegitima wamá sügǘ hau bandi dunuru. Súnwandan nasaminarun luagun bérusu ligía, ani dagati tidoun nanigi. Íderagua lumutina lererun wéiyaali lidan afiñeni ligía saragu” (Matéu 10:31).

3. a) Ka lariñagubei apostolu Pábulu luagu lichugún gurasu houn amu? b) Kaba burí álügüdahani wóunaba lidan arütíkulu le?

 ³ Ariñagatu Bíbülia mosu lan wíchugun gurasu wóuniwagua súnwandan (ariha huméi rekuáduru “ Ka mini lubéi?”). Abürühati apostolu Pábulu houn kristiánugu ebüréu: “Niduheñu, góunigi humá luéi tedererun hanigi lun hadisedun luéi Bungiu le wínwanbei lau mafiñerun humá luagu. Lubaragiñe lira, ru humá gurasu húniwagua sagü weyu”. Afuranguagüdati Pábulu mosu lan wíchugun gurasu wóuniwagua lun madügün lan “figóu” lun tedererun wanigi (Ebüréu 3:12, 13). Ánhawa asaminara luagun lubuidun wasandiragun woungua dan le wibihin gurasu, warihibei súdini lan giñe wíchugun dǘgüdaguaü houn amu. Lidan arütíkulu le wóunabubei álügüdahani burí le: Ka burí resun uágubei lunti lan wíchugun gurasu houn amu? Ida luba wafalaruni lani Heowá, Hesusu luma Pábulu hénpulu lun wíchugun gurasu houn ha geyegubaña wau? Ani ida luba wíchugun gurasu houn ha híbiri?

4. a) Kátaña emegeirubaña hibihin gurasu? b) Ka uagu míchugun habéi hiibe-agei gürigia gurasu houn amu?

⁴ Sun wagía mégeitiwa wibihin gurasu. Gama lumoun, irahüñütima mégeibaña lun híchugun hagübürigu gurasu houn. Ariñagati aban máisturu “megei hamá irahüñü lichugún gurasu houn kei lemegeiruni inadüri duna”. Ani ariñagati giñe: “Irahüñü ha ibihubaña gurasu sanditiña hínsiñewa hamá ani gebegi hamá”. Gama lumoun kei le wawinwanduña lubéi lidan “lagumuhóun dan”, gíbetiña gürigia hawouguounrügüñein hasaminara ani masandiruntiña ínsiñeni hawagu amu (2 Timotéu 3:1-5). Ligía míchugun habéi hiibe-agei gürigia gurasu houn amu. Gíbetiña agübürigu míchuguntiña gurasu houn hasaanigu ladüga míchugun hamá meha hagübürigu gurasu houn. Ani íbini megei hamá giñe gürigia wéinamuhaña lichugún gurasu houn, añahein hádangiñe michugúnti gurasu houn lidan sun habagari. Ligía hariñagunbei saragu hádangiñe luagu úati lan ariñaguti houn lidan hawadigimari buidu lan hadüga.

5. Ka gayarabei wadügüni lun wíchugun gurasu houn amu?

⁵ Gayarati wadügün saragu katei lun wíchugun gurasu houn amu gürigia. Dan le hadügün somu katei buidu, gayarati wariñaguni houn buidu lan hadüga ani gunda wamá lau warihini lubuidun hagaburi. Gayarati giñe wíchugun gurasu houn dan le hiru hamá o maguraasun hamá (1 Tesalónikana 5:14). Kei le sügǘ wabéi bandi dan hama wíbirigu, gachansintiwa lun wíchugun gurasu houn lau wererun (aliiha huméi Apurichihati 4:9, 10). Ligía lunti lubéi wálügüdagun woungua: “Ariñaga numuti san houn ha híbiri ka lan uagu hínsiñe habéi nun ani gebegi hagía nun? Ariñaga numuti san houn sagü gayara lan?”. Haritagua waméi le tariñagubei Bíbülia: “Ma lubuidun dan le ladarirúniwa óunabagülei le richabei; dan létima liabin lidan dan” (Ariñawagúni 15:23).

6. Ka uagu busén lubéi Mafia ladügün lun heferidiruni lubúeingu Bungiu haguraasun? Ru humá aban hénpulu luagu ida liña lan meha ladügüni lidan binadu dan.

⁶ Busenti Mafia lun heferidiruni sun ha eseriwidubaña lun Bungiu haguraasun ladüga subudi lumuti ítara luba lan ledebilidagüdüni wamadagua luma Heowá. Ariñagati Ariñawagúni 24:10 anhein lan weferidira waguraasun dan le gaturobulin wamá, ‘lalouguaduba lan were’. Álugati meha Mafia ladügün lun leferidiruni Hobu luguraasun lau lasufuriragüdüni saragu. Gama lumoun, mibihin lumuti ladüga aba lan lakipuragun Hobu lungua úaragu lun  Heowá (Hobu 2:3; 22:3; 27:5). Wagía, gayarati giñe wáfaagun kóntüra Satanási lun mígirun wamá lun ladügün lun weferidiruni waguraasun. Ánhawa asigira íchiga gurasu houn waduheñu luma houn wíbirigu lidan damuriguaü, gúndaatimabadiwa sun wagía ani wakipurubei lubuidun wamadagua luma Heowá.

7, 8. a) Ida liña líchugun Heowá gurasu houn amu gürigia? b) Ida liña gayara lan hasigiruni agübürigu lani Heowá hénpulu? (Ariha huméi dibuhu le lídanbei lagumeseha arütíkulu).

⁷ Hínsiñeti lun Heowá líchugun gurasu. Ariñagati aban abürühati Bíbülia: “Yarafati Aburemei lun lesefuruniña ha gáribei hasandirunu hanigi, ha féridi hamaalibei hemenigin” (Sálumu 34:18). Dan le lasandirunbei profeta Heremíasi anufudei ani aba leferidiruni luguraasun, füramaseti Heowá lun líderagubei lan (Heremíasi 1:6-10). Ruti giñe Heowá erei lun profeta Danieli lau lóunahan aban ánheli ariñaga lun ‘hínsiñeti lan lun Heowá’ (Danieli 10:8, 11, 18, 19). Gayarati san wasigiruni lani Heowá hénpulu lau wíchugun gurasu houn wíbirigu, íbini houn prekursorugu luma houn íbirigu wéiyougaaña ha siñahalibei hadügün saragu kei meha furumiñe?

⁸ Rédeiti Heowá luma Hesusu úara sielu luagu saragu irumu. Íbini ítara, subudi lumuti meha Heowá lasigiruba lan Liráü emegeira gurasu lidan lawinwandun ya ubouagu. Ligía layanuhanbei Heowá bián wéiyaasu siélugiñe ani aba lariñagun: “Anihán niráü le hínsiñebei nun, le aubei óunwenbu lan nugundan” (Matéu 3:17; 17:5). Ariñaga lumuti Heowá dimurei burí le dan le lagumeserunbalin Hesusu luadigimari lánina apurichihani luma lidan lagumuhóun irumu le laubei ubouagu. Chóuruti gunda lan Hesusu lau laganbuni Lúguchi ariñaga hínsiñe lan lun ani gunda lan lau. Ruti giñe Heowá gurasu lun Hesusu aban guñoun lubaragiñe lounwen. Kei le weiri lubéi meha lidiheri Hesusu, aba lóunahan Heowá aban ánheli lun líchugun erei lun (Lúkasi 22:43). Gayarati háyeihani agübürigu lani Heowá hénpulu lau hariñagun dimurei le ruti gurasu houn hasaanigu dan le hadügün somu katei buidu. Ani dan le hagagibudagun hasaanigu luma óuchawaguni leskuelarugu, adüga hamuti agübürigu sun hayaraati lun híchugun dǘgüdaguaü houn luma lau híderaguniña awanda.

9. Ka wafurendeirubei lídangiñe ligaburi lóuseruniña Hesusu apostolugu?

⁹ Ígirati giñe Hesusu aban hénpulu buiti woun le gayarati wafalaruni. Aban guñoun lubaragiñe lounwen, aba lachibuni hagudi apostolugu ani aba lariñagun houn súdiniti lan lun ǘnabugu hamá. Gama lumoun, kei le íñugu hamá, aba hasigenehan hámagua luagu ka lan hádangiñe súdinitimabei. Ani ariñagati giñe Féduru maweiyasunbei lan ígirei Hesusu lábugua (Lúkasi 22:24, 33, 34). Íbini ítara, metenirunti Hesusu lun hachara apostolugu. Ariñagarügüti houn buidu lan hadüga lau úaragua hamá lun. Füramaseti giñe houn luagu hadügüba lan katei wéinamutimati sügǘ lau le ladügübei ani chouru lumuti houn luagu hínsiñe hamá lun Heowá (Lúkasi 22:28; Huan 14:12;  16:27). Álügüdagua wamá woungua: “Sigí numuti san lani Hesusu hénpulu lun nariñagun houn amu buidu lan hadügüni somu katei, odi lúnrügüñein hachara netenira?”.

10, 11. Ka burí meha katei ladügübei Pábulu lun líchugun gurasu houn íbirigu?

¹⁰ Héchuti meha apostolu Pábulu ayanuha buidu hawagu íbirigu. Sügühali meha saragu irumu aweiyasuha hama fiú hádangiñe ani gachansinti meha lun lasubudiruniña buidu. Íbini ítara, mabürühanti luagu somu charati le larihibei hawagu. Lubaragiñe lira, ayanuharügüti buidu hawagu lánigu paaná. Ariñagati luagu Timotéu: “Niráü hínsiñeti nun, le gúnfulibei luma Bungiu”. Ani ariñagati giñe afiñeti lan luagu lóunigirubaña lan Timotéu íbirigu (1 Korintuna 4:17; Filipuna 2:19, 20). Ariñagati meha Pábulu houn kristiánugu ha lídanbaña uburugu Korintu luagu aban lan paaná buiti Titu, ani luagu nadagimein lan luagu hafulesein (2 Korintuna 8:23). Chóuruti luagu ragǘ lan Timotéu luma Titu gurasu dan le hasubudiruni le lasaminarubei Pábulu hawagu.

¹¹ Ru lumuti Pábulu luma Berünawé habagari lidan peliguru lun híchugun dǘgüdaguaü houn íbirigu. Kei hénpulu, subudi hamuti meha gíbetiña lan gürigia ha uburugugiñetiña Lístüra busentiña háfaruniña. Íbini ítara, giributiña ñeinhin lun híchugun gurasu houn iseri disipulugu luma lun híderaguniña lun úaraguameme hamá lun Heowá (Adügaü 14:19-22). Lárigiñe, ábaya lagagibudagun Pábulu luma peliguru Éfesu ladüga aban sétanu hani gürigia gáñitiña, gama lumoun rédeiti ñein sun dan le lemegeirubei lun líchugun gurasu houn íbirigu. Ariñagati Adügaü 20:1, 2: “Aba lóunahan Pábulu hawagu afiñetiña lun hayabin lun, gayara láamuga líchugun gurasu houn; ábati lóuburuniña, aba layouragun houn, aba lidin Masedónioun. Luagu luéiyasun, chülügueina liña hámagiñe afiñetiña lidan burí fulasu le ídangiñebei lásügüra, ru ligía saragu dǘgüdaguaü houn lau lererun. Ítara liña lachülürün uburugun Güresia”.

12. Ka uagu buidu lubéi lun woudin adamuridagua?

¹² Busenti Heowá lun buidu lan lidin woun. Ligía lariñagunbei woun lun mígirun wamani wadamuridagun. Lidan adamuridaguni furendeitiwa luagu Bungiu ani rútiwa gurasu wóuniwagua (1 Korintuna 14:31; aliiha huméi Ebüréu 10:24, 25). Ariha waméi le tariñagubei Cristina, nibureintu to uáguboun wayanuha lidan párafu 1: “Ínsiñeni luma gurasu le nibihubei lidan adamuridaguni ligía hínsiñetimabei nun. Anihein dan nachülürün lau lanarime íruni tidoun Luban Adamuridaguni. Ábati hayarafadun íbirigu nun, aba hóuburunina ani aba hariñagun nun magadiñe nan. Ariñagatiña giñe nun hínsiñe nan houn ani gunda hamá lau harihini nawanserun. Adügati hererun lun nasandiragun nungua buidu”. Súdiniti lun súngubei lan wagía íchiga gurasu wóuniwagua! (Rómana 1:11, 12).

13. Ka uagu megei habéi íbirigu ha lǘhañabaña eseriwida lun Heowá gurasu?

¹³ Íbirigu ha barühaña saragu irumu eseriwida lun Heowá mégeitiña giñe heresibirun gurasu. Samina wamá luagun Hosué. Anúadira lumuti Heowá lun ladundehaniña ísüraelina lidoun Fulasu Füramasewati. Íbini barühali lan meha Hosué saragu irumu eseriwida lun Heowá, ariñagati Heowá lun Moisesi: “Arufudahabá lun Hosué, ruba gurasu luma anigi lun, lugundun ligíaba adundehaña Ísüraelina lun habihini ani deregeléime fulasu le barihubei houn” (2 Lúrudu 3:27, 28). Mégeiti meha Hosué gurasu ladüga hageindaguba meha ísüraelina saragu wuribu ani  heferidiruba meha íbini aban lídangiñe (Hosué 7:1-9). Uguñe weyu, mégeitiña giñe wéiyaaña lidan afiñeni hama óunigirutiña sirkuitu lun wíchugun gurasu houn. Ka uagu? Ladüga áfaaguatiña saragu lun hóunigiruniña lumutuniña Bungiu (aliiha huméi 1 Tesalónikana 5:12, 13). Ariñagati aban óunigiruti sirkuitu: “Anihein dan aba lan wibihin aban gárada lánina eteingiruni hámagiñe íbirigu ñein lubéi hariñaga woun hínsiñe lan wani bisida houn saragu. Anuhein gárada burí tuguya areidañu wama, ani aba burí waliihanu dan le hiru lan wasandiragun woungua. Rutu gurasu woun”.

14. Ka hénpulu arufudubalin buidu lan wariñagun houn gürigia buidu lan hadüga dan le wíchugun adundehani houn?

¹⁴ Luagu aban weyu, mosu meha lererehan apostolu Pábulu houn kristiánugu korintuna. Dan le gaganbadi habéi lun ladundehan, ariñagati Pábulu houn buidu lan hadüga (2 Korintuna 7:8-11). Chóuruti ínchaha lániña lererun Pábulu lun hasigirun adügei katei buidu. Uguñe weyu, dandu wéiyaaña lidan afiñeni kei agübürigu gayarati háyeihani lani Pábulu hénpulu. Afuranguagüda lumuti aban úguchili gíriti Andreas ka lan uagu buidu lubéi lun wíchugun gurasu. Ariñagati: “Dan le bíchugun gurasu houn bisaanigu, íderagua bumutiña lun hawanserun dandu lidan habagari kei lidan heseriwidun lun Bungiu, ani adügati giñe lúntima lerederun adundehani ligía lidan hachügü. Íbini subudi hamani le buídubei, héchuduba adügei ánhawa ariñaga houn buidu lan hadüga”.

15. Írida humá aban igaburi le ídanbei gayara lan híchugun gurasu houn íbirigu.

¹⁵ Wariñaguni houn íbirigu weiri lan lebegi áfaaguni le hadügübei luma lubuidun hagaburi woun (2 Krónikasi 16:9; Hobu 1:8). Anhein wadüga, wasigirubei lani Heowá luma Hesusu hénpulu. Sun le wadügübei hawagu gebegiti houn, íbini siñá lan wadügün saragu kei hamuga wabusenrun (aliiha huméi Lúkasi 21:1-4 luma 2 Korintuna 8:12). Kéiburi hamuga wíbirigu ha wéiyougaañabaña, áfaaguatiña lun houdin adamuridagua luma lun háfuridun apurichiha. Rútiwa san gurasu houn ani ariñaga wagía houn buidu lan hadüga?

16. Ídaba san gayara lan wíchugun gurasu houn amu?

¹⁶ Meferidira waméi chansi lun wíchugun gurasu houn amu. Ánhawa ariha ladügün aban gürigia somu katei buidu, ariñaga wamá lun buidu lan ladüga. Dan le meha lídinbei Pábulu luma Berünawé uburugu  Antiokía, le lídanbei Pisidia, aba hariñagun ha alidihabalin hadamurin huríu houn: “Anhein anihein lubéi dimurei lun hariñaguni houn gürigia ha, ariñaga huméi guentó” (Adügaü 13:13-16, 42-44). Ánhawa íchiga gurasu houn amu, busenbaña giñe híchugun gurasu woun (Lúkasi 6:38).

17. Ka igaburi buídutimabei lun wíchugun gurasu houn amu?

¹⁷ Furangu humá. Dan le líchugunbei Hesusu gurasu houn kristiánugu uburugu Tiatira, ariñaga lumuti houn ka lan katei hadügübei buidu (aliiha huméi Arufudúni 2:18, 19). Ida luba san wáyeihani lani Hesusu hénpulu? Gayarati wariñagun tun aban úguchuru to agüriahabaliña tisaanigu tábugua luagu buidu lan tadüga luagu áfaaguni le tadügübei. O anhein agübürigu wabéi, gayarati wariñagun houn wasaanigu buidu lan hadüga lau hasigirun eseriwida lun Heowá. Ani mabulieida waméi giñe wariñaguni sun katei buiti le hadügübei houn. Anhein wariñaga houn gürigia ka lan katei buiti warihibei hadügün, harihibei wadügüñein lan lau sun taruman wanigi.

18, 19. Ida luba wíderaguniña ha híbiri akipurei hamadagua luma Heowá?

¹⁸ Ariñagati meha Heowá lun Moisesi lun líchugun gurasu luma erei lun Hosué. Furanguti mayanuhanbei lan Heowá woun uguñe weyu lun wíchugun gurasu lun somu gürigia. Gama lumoun, gúndaati dan le larihini wáfaagun lun wadügüni (Ariñawagúni 19:17; Ebüréu 12:12). Kéiburi dan le líchugun aban íbiri somu yanu lidan damuriguaü, gayarati wariñaguni lun ka lan uagu hínsiñe lubéi liyanun woun. Háfuga íderagua lániwa le lariñagubei lun wasubudiruni ida luba lan waransehan somu turóbuli. O háfuga íderagua lániwa lun gunfuranda wamá somu bérusu. Ariha waméi le tadügübei aban íbiri. Lárigiñe taganbuni liyanun aban íbiri, aba tíchugun seremei lun ani lárigiñe aba tóunahan aba tiraüraü gárada lun. Tidan gárada tuguya aba teteingiruni luagu larihini tigarigu tanigi ani luagu líchugun gurasu tun, íbini murusunrügüñein lan layanuhan. Rutu giñe seremei lun luagu líchuguni liyanun lau saragu ínsiñeni. Aba tariñagun ítara liña lan le lariñagubei íbiri ligía keisi aban idewesei lúmagiñe Heowá.

¹⁹ Sun wagía gayarati wíderagun amu akipurei hamadagua luma Heowá. Ida luba wadügüni? Lau gaganbadi wamá lun adundehani le líchugubei Pábulu: “Rúmeme humá [...] gurasu luma erei húniwagua ítara kei hadügüni guentó” (1 Tesalónikana 5:11). Ánhawa asigira íchiga gurasu wóuniwagua sagü weyu, wagundaaragüdübei Heowá.