1, 2. Ekalelini yaderetu walibiha attu eena?

KRISTINA wa vyaka 18 ologa: “Amambali aga anoddilibihaga, mbwenye mudhidhi mwina anoddivanya. Mazu awa anosuva. Anologa wi kaddina zelu, kaddinziwa elobwene, vina ddili txankuma. Ddinkala olilavi, mudhidhi mwina kaddinloga na awene. Ddinivyona ninga kaddili elobwene.” ^[1] (Koona yowenjedha.) Akala kaninlibihana muttu na mukwaye, okalawowa onorutxa!

² Mbwenye, nubuwelege wila akala ninowakamihedha attu eena, awene anolibiheya. Renato ologa dhahi: “Mwari mwa vyaka dhinjene, ddiwana na etanaalelo y’ovyona ninga kaddili elobwene. Labo dhahi ddilaleyaga na munddimuwa wa mulogo, wahona wila dhilobodha kadhedda deretu. Iyene wahiddivuruwana n’ofwasa ddilogaga ejile yobuwelimi. Mmaleliye oddubutxedha oderetu wakosa miyo. Oddubutxedha vina mazu a Yezu anloga​—muttu-muttu wa iyo, ddattima opitta balame dhinjene.  Ddigobuwela nlebo nttile, murima waga onottugareya. Ottiya ejuwene mazu a munddimuwa oddule addikamihedha-wene.”​—Mateu 10:31.

3. (a) Paulo ologile eni mowiwanana na olibihana? (b) Mwari mwa mutoma obu ninasekeserhe eni?

³ Bibilia ononikokomeza wi nilibihanege muttu na mukwaye mudhidhi wotene. Murumiwi Paulo wahalebela Akristu a Hebreu: “Amudhaga, mwedde txenjewa; vari venyu vanadhe okala muthu wovuta, wotowa nroromelo, ofiyedha olapelana na Mulugu oliwovi; libihaganina siku-siku.” Paulo ologa sabwaya: “Wi vari venyu vanakale muthu wawuma murima muviriganani, okwekwethiwe na yothega.” (Ahebreu 3:12, 13) Weyo woonilemo dhavi mumaleliwe olibihiwa na muttu mwina. Ekalelini yaderetu walibiha abali ehu? Ninsunzavo eni na yotagiha ya Yehova, Yezu vina Paulo, mwa walibiha attu eena? Marheya meena bavi analabihedhe iyo wi nalibihe attu eena? Ndoweni nitanaalele mavuzo aba.

4. Bani onfunetxa olibihiwa? Attu enjene anrutxeliwa eni walibiha akwawa?

⁴ Iyo notene ninofuna olibihiwa. Noona jamakamaka amambali walibiha anawa. Namasunziha dhahi ontxemerhiwa Timóteo ologa wila aima “anofuna olibihiwa ninga munkoseliwa mwiri na manje.” Iyene ologa: “Ogamulibihaga mwana, iyene onowona wila onovahiwa ttima.” Mbwenye sabwa yawi ninkala “masaka omariha”, attu enjene anojiwa murima vina kanziwa ‘watamaalela’ akwawa. (2 Timóteo 3:1-5) Amambali eena kanwodha walibiha anawa sabwani awene kaalibihiwa agali aima na amambali awa. Attu anddimuwene vina anofuna olibihiwa, mbwenye masiku meena kinpadduwa. Motagiha attu enjene anologaga wi kantamaaleliwa na mabasa ankosani.

5. Ninalibihe dhavi attu eena?

⁵ Ninowalibiha attu eena akala ninowatamaalela na dhilobo dhapama dhinkosani. Nigaloga na awene wila akaana omuttu waderetu, wapangarhaza agafanyiwa makattamiho vina walibiha, ejo enowavaha guru. (1 Tesalónika 5:14) Sabwa yawi ninkala mudhidhi mwinji na abali abo, ninokaana gari yologa makani a walibihana. (Kengesa Kohelét 4:9, 10.) Kavivuze: ‘Ddinolagiha wila ddinowakwela vina ddinowavaha ttima abali eena? Ddinokosa ejoya mudhidhi wotene?’ Kobuwela enloga Bibilia: “Onziwa wakula pama murima waye onothaba​—oziva gani wa nzu ninvahana na mudhidhiyá!”​—Gano 15:23.

6. Satana ontamela dhavi wawobaniha attu a nlogo na Mulugu? Katagiha marhe ankosiye ejiya.

⁶ Gano 24:10 enloga: “Ogondeya guru vanfwanyiwewe segedho, murima wawo kulibile.” Satana onoziwa wila aganobaniha  onele owodha oveyiha mandano ehu na Yehova. Iyene wahitamela omobaniha Job, na omutotela segedho dhinddimuwa. Masiki dhawene yubuwelo yotabala ya Satana kittiddile mpirha. Job wahilibihavi omuroromela waye Yehova. (Job 2:3; 22:3; 27:5) Iyo viina niwane na Satana vina nimulagihe wila kanawodhe onipemberha. Akala ninowalibihavi anamudhi ehu, abali na arogora a mmulogoni, ninele wakamihedha okala ohagalala vina wimetxa pwi mandano awa na Yehova.

7, 8. (a) Yehova walibihile dhavi attu? (b) Amambali anawodhe dhavi ofara yotagiha ya Yehova? (Koona foto eli omaromo.)

⁷ Yehova onowalibiha attu. Munasalmo oleba: “Nabuya [Yehova] onoawaddamela ansuveya murima, onowalibiha anojeya.” (Masalmo 34:19) Nsaka nobanile Jeremiya bagova, Yehova wahilibela omukamihedha. (Jeremiya 1:6-10) Yehova wahimuruma mungelo wila amulibihe namavuhula Daniyel. Mungelo oddu wahimwittana Daniyel wi “ddwa ttima.” (Daniyel 10:8, 11, 18, 19) Na mukalelo wakakene, weyo onowodha walibiha abali na arogora, apionero na anddimuwa a mulogo ali akalaba ahinwodha okosa esile dhakosani wale?

⁸ Masiki vakalilani vamodha Yehova na Yezu wirimu, mudhidhi wali Yezu velaboni ya vati, Yehova wanziwa wila wanfanyeela omukamihedha Mwanaye. Yezu wahiwa lizu na Babe bagaloga wirimu mudhidhi oromiliye mabasa a olaleya, vina omamalelo wa yaka yaye velaboni ya vati. Dila dhowakwana bili Yehova ologa: “Oddu ddi mwanaga wa vamurimani vaga; mwa iyene pulí oziveliwa waga.” (Mateu 3:17; 17:5) Txibarene, Yezu wahilibiheya vaddiddi omwiwa Babe bagaloga wila wanimukwela vina wanziveliwana. Omattiyu waye womariha Yezu wahidhugudheya vaddiddi. Venevo, Yehova omurumela mungelo wi amulibihe vina ampangarhaze. (Luka 22:43) Amambali, munolagiha wi munomutagiha Yehova akala munowalibiha aninyu mudhidhi wotene. Aima agakosa elobo yaderetu, mwatamaalele. Mwakamihedhe agafwanyiwa makattamiho oskola.

9. Dhilobo dhakoseli Yezu anamafara aye dhinnisunziha eni?

⁹ Yezu onittiyedha yotagiha yaderetu y’ofara. Omattiyu, Yezu ahinatti okwa, wahisuwa manyalo a anamafara aye, nanda wahawaddela wila jaderetu okala woviyeviha. Mone, novittukulela wawa, awene ela wakulana avivuzaga wila mwa awene munddimuwayavo bani, neji Pedru wahilibela wila txipo kagamuttiyile Yezu. (Luka 22:24, 33, 34) Masiki dhawene, Yezu kang’ana dhovirigana dhawa. Ottiya ejuwene, Yezu wahakokomeza wila eddevi na iyene. Wahalibiha wila awene  agahikosa dhilobo dhinji opitta esile dhikosile Yezu, vina wahiloga wila Yehova wanakwela. (Luka 22:28; Joau 14:12; 16:27) Nivivuze dhahi: ‘Koddi miyo ddinomutagiha Yezu vina ddinowatamalela attu eena sabwa ya mabasa apama ankosani, ottiya wang’ana dhovirigana dhawa?’

10, 11. Paulo walibihile dhavi abalaye, nanda wafuna akosevi eni?

¹⁰ Murumiwi Paulo wanloga dhapama dhakosa abalaye. Iyene ohedda vaddiddi na abalaye, wanaziwa deretu, masiki dhawene kalebile dhovirigana dhawa. Yakosiliye jowatamaalela bahi. Motagiha, Paulo ologa dhahi na Timóteo “iyene ddi mwanaga wokweleya, ddawiwananeyana na Mulugu.” Paulo wankuluvela wila Timóteo agahiwodha wasogorhela akwaye. (1 Korinto 4:17; Filipi 2:19, 20) Paulo vina omuloga Tito, wi iyene mbali worumeeleya vina wovilevela mabasa. (2 Korinto 8:22, 23) Txibarene, Timóteo na Tito ahilibiheya moonelani wila Paulo wanawonana oderetu!

¹¹ Paulo na mukwaye wa mabasa Barnabé ahika vangovini dhigumi dhawa wi alibihe abalawa. Motagiha, awene àhiziwa wila o sidadi ya Listra attu enjene annatamela wi ape. Masiki dhawene, ahiyelelawo wi alibihe anamafara eena aswa, vina akokomeze omuroromela Yehova. (Merelo 14:19-22) Musogorhomwa, o Éfeso awene ali vangovini sabwa ya muttitti wasilidhiwe na awene, masiki dhawene akala wenewale malabo mang’onovi wi alibihe abalawa. Merelo 20:1, 2 enloga: “Paulo oawithaniha akristu a mu Éfeso, oakokomezela odidelavi muroromelani, nomala oapaganya othukula dila endhowa elabo y’o Masedónia. Aviragamo, wanalibiha akristuyámo na mazu menjene, ofiya o Grésia.”

12. Ekaleli eni yamakamaka odhowa omatugumanoni?

¹² Yehova onfuna oderetu wehu. Noona ji sabwaya enfuniye wila nidhowege omatugumanoni. Wenewo, ninosunza sabwa yaye, vina ninolibihana. (1 Korinto 14:31; kengesa Ahebreu 10:24, 25.) Kristina ologiwe omaromo wa mutoma obu ologa: “Enddiziveletxa vopitta omatugumanoni, tti nikamihedho na nipangarhazo ninakela miyo wenewale. Mudhidhi mwina ddinokalaga wonyonyiwene ddigafiya o Numbani ya Omwene. Ddimpangarhazeya arogora eena agaddifiyedha addilejela nanda additamaalela. Ddinoziveliwa agaddaddela wila anoddikwela vina anofuna oddoona ddunuwaga omuyani. Nikamihedho nawa ninoddilibiha vina oddikurumutxa!” Nona, olibihana muttu na mukwaye elobo yaderetu-wene!​—Roma 1:11, 12.

13. Enkalelani yaderetu walibiha abale amalile vyaka dhinji amulabaga Yehova?

¹³ Masiki abale amalile vyaka dhinjene amulabaga Yehova anofuna olibihiwa. Mmodhaya ddi Josuwé. Ana Izrayel adhowaga Elabo Yolibeliwa, Yehova wahiloga na Josuwé wila asogorhele. Yehova wahimuruma Mizé wila amulibihe Josuwé masiki vavirilani vyaka dhinji  amulabaga Yehova. Yehova ologa: “Omuthiyedhe Josuwé magano anziwewe, omwaralihe, omulibihe murima, vowi ddi iyene onakale musogorheli wa nlogo nthi; ddi iyene onavahe nlogo elabo ejo enoniwe.” (Olibiha 3:27, 28) Josuwé wanfuna olibihiwa sabwani nlogo nigahidha oraba koddo, obe agahipemberhiwa na koddo dhiina. (Josuwé 7:1-9) Masaka abano iyo podi walibiha anddimuwa a mulogo vina anameeddelela milogo anlaba na guru wi eddihe nlogo na Mulugu. (Kengesa 1 Tesalónika 5:12, 13.) Nameddelela milogo mmodha ologa dhahi: “Dila dhina abali anovahedhaga karta atamaalelaga sabwa ya waweddelela. Ninokoya makarta aba, nanda ninowengesaga mudhidhi ongumanana iyo magudulano. Txibarene abali aba anonilibiha vaddiddi.”

14. Txini enakamihedhe azombwe na anddimuwa okosagavi dhapama?

¹⁴ Mudhidhi dhahi murumiwi Paulo wahavaha malago akristu o Korinto. Muttiddihedhani mabasa malago abo Paulo wahatamaalela. (2 Korinto 7:8-11) Mohaganyedha malago abo ahakamyedha odhowa vasogorho akosaga oderetu. Masaka abano, anddimuwa a mulogo na amambali anofara yotagiha yakakene. Andre babi wa ana eli ologa: “Olibiha onowakamihedha aima ovaddiha omuyani wawa. Aima anovuruwana akala weyo onowalibiha, vina onowavaha malago. Masiki vanziwani yaderetu, nigalibiha panttabwani ofuna okosa eli yaderetuya.”

15. Mukalelo mmodha wa walibihana eena buvi?

¹⁵ Nalibihe abali wila ninowariha na mabasa vina mweddelo wawa wapama. (2 Mapadduwo 16:9; Job 1:8) Nigakosa ejuwene, ninomutagiha Yehova na Yezu. Awene anotamaalela dhetene dhinakosihu, masiki nihiwodhaga okosa venjene. (Kengesa Luka 21:1-4; 2 Korinto 8:12.) Motagiha, ninowawona abali ehu ali akalaba avilibihedhaga odhowa omalaleyelo vina omatugumanoni mudhidhi wotene. Koddi ninowalibihaga vina ninologa na oderetu guru dhinkosani?

16. Ninakamihedhe eena mudhidhi gani?

 ¹⁶ Egawodheya nalibihege eena dila dhinjene. Kudduwale otamaalela dhapama dhetene dhinkosa attu. Paulo na akwaye valani o Antiokiya y’o Pisídia, anddimuwa a sinagoga awaddela dhahi: “Nyuwo abalihu, mugakana yolibihana nlogo, kalogani.” Paulo wahilabihedha gari ejo wi alibihe nlogo. (Merelo 13:13-16, 42-44) Akala iyo ninowalibiha attu eena, awene vina anele onilibiha.​—Luka 6:38.

17. Ntamalelo na pama ninkosiwa dhavi?

¹⁷ Kupottowe. Yezu vatamaaleliye Akristu o Tiatira, kapottotxile makaniya, vina wahiloga dhaderetu dhetene dhakosilani. (Kengesa Ovuhulela 2:18, 19.) Niwodhe dhavi omutagiha? Txino iyo podi omutamaalela mai onalela anaye yeka, nilogaga guru dhinkosiye masiki egaali yorutxa. Akala oli mambali, katamaalele anawo sabwa ya odhowavi bagamulabela Yehova. Kaloga dhilobo dhapama dhinkosani. Ogahipottotxe makaniya onele woona wila awene anononelamo makani anloga weyo.

18, 19. Ninalibihane dhavi muttu na mukwaye wi ninfiyedhe Yehova?

¹⁸ Yehova wahimwaddela Mizé wi amulibihe vina amuwaralihe Josuwé. Masaka abano Yehova kanloga na muttu ddi muttu wi amulibihe. Mbwenye iyene onoziveliwa-na guru dhinkosihu wi nalibihe attu eena. (Gano 19:17; Ahebreu 12:12) Motagiha, akala mbali onokosa diskursu mmulogoni mwehu, nimwaddele ejile epurilehumo, nimutamalele. Dhinloga abali akosaga diskursu dhinonikamihedha owanana makattamiho obe ononelamo ejile entapulela maleboya. Murogora dhahi wahimulebela mbali wakosile diskursu: “Ddiziwa wila miyo na weyo nilogile mudhidhi mung’onovi, masiki dhawene wahiddona wila ddahidhugudheya vaddiddi, nanda oddilibiha. Ddinotamaalela mulogelo wawo waderetu, otribuna obe ologaga na miyo, wali ninga nvaho wa Yehova vamentoni vaga.”

¹⁹ Nigafara malago a murumiwi Paulo, ninele owodha olibihana muttu na mukwaye onfiyedha Yehova, Paulo ologa: “Nona libihanina murima, mukamyedhagane ninga mulemelelinyu wira.” (1 Tesalónika 5:11) Akala iyo ‘ninolibihana siku-siku,’ ninele omuhagalaliha Yehova!