1, 2. Mumu liaka chili chilemu kukolweza akwetu?

MARIA, yoze uli ni miaka 18, yamba ngwenyi: “Yisemi jami kanda achingukolweza kama nilimwe tangwa, alioze kakungwamba-mba wika yuma yipi. Nawa malji jo kakungulemeka chinji ku mbunge. Kakwamba ngwo nguchili ni manyonga a wanuke, chichi kalilongesa nichimwe nawa ngwo nguli munene chinji. Kashika, nakulila mashimbu eswe nawa chishi kuzanga kuhanjika no. Nakwivwa ngwe chishi ni ulemu.” ^[1] (Tala maliji akusongo.) Nyi akwetu keshi kutukolweza, chino muchihasa kutunehena yipikalo yinji ku mwono!

² Chikwo nawa, tunyongenu chize mutuhasa kukwasa akwetu muze mutwaakolweza. Koji yamba ngwenyi: “Napwile ni kulimona ngwe chishi ulemu. Ami napinjile ni manyonga wano ha miaka yinji. Alioze limwe tangwa, nayile ni kwambujola ni umwe mukulwana wa mu chikungulwila, aye yangumona ngwo te ngunanenganyana ha tangwa liacho. Aye kangupanjikile ni uhomboloji wesswe muze te ngunamulweza yuma yize napwile nayo ku mbunge. Hachino, aye yangwiwulula yuma yipema yize te nakulinga. Yangwiwulula nawa maliji ja Yesu a kwamba ngwo, umwe ni umwe wakuli yetu kanahiane tulujila anji. Nakwiwuluka chisoneko chacho mashimbu eswe, nihindu chakungukwata ku mbunge. Maliji a mukulwana yono kangukwachile chinji ku mbunge.”—Mateu 10:31.

3. (a) Yika postolo Paulu ambile hakutwala kukukolweza akwetu?

³ Mbimbiliya yakwamba ngwo, yetweswe twakufupiwa kulikolweza umwe ni mukwo mashimbu eswe. Postolo Paulu yasonekena akwa-Kristu A-Hepreu ngwenyi: “Kanyamenu, mandumbu, kuchina hanji muyipwa muli umwe hakachi kenu mbunge ya uhuka yakuhona ufulielo, ha kukatuka kuli Zambi ya mwono. Alioze lishinjilenu umwe ni mukwo tangwa ha tangwa.” Paulu yalumbununa maliji wano ha kwamba ngwenyi: “Niumwe wa kuli yenu kechi kakala ku kwonga cha shili.” (A-Hepreu 3:12, 13) Achinyonga kama kuwaha chize wevwile muze akukolwezele. Hachino, mumu liaka twatamba kukolweza mandumbu jetu? Yika mutuhasa kulilongesa ha chize Yehova, Yesu ni Paulu akolwezele akwo? Nawa mu majila aka waze mutuhasa kulikolwezelamo umwe ni mukwo? Tushimutwinenu yihula yino.

(b) Yika mutushimutwina ha mutwe uno?

4. Aya anafupiwa utakamiso? Mumu liaka atu anji musono keshi kulikolweza umwe ni mukwo?

⁴ Yetweswe twakufupiwa ukolwezo hanji utakamiso. Kashika chili chilemu yisemi kutakamisa ana jo. Umwe longeshi yoze avuluka ngwo, Timoteu yamba ngwenyi, ana “kanafupiwa kwaatakamisa ngwe chizechene mitondo yakufupiwa meya mba yikole kanawa.” Aye yawezela nawa ngwenyi: “Mwana nyi wamutakamisa malivwa ngwe kali ni ulemu hamwe ni chiseke.” Alioze amu tuli “ha matangwa a kusula” atu anji keshi yitanga yipema nawa “keshi zango” kuli umwe ni mukwo. (2 Timoteu 3:1-5) Yisemi amwe keshi kukolweza ana jo mumu yisemi jo kakapwile ni kwaakolweza. Makulwana no kanafupiwa ukolwezo, alioze kanji-kanji chino chishi kulingiwa. Chakutalilaho, atu anji kakulinyenyeta ngwo, keshi kwaachichimieka ha mulimo uze akulinga.

5. Kuchi mutuhasa kukolweza akwetu?

⁵ Mutuhasa kukolweza akwetu ha kwaachichimieka ha yuma yipema yize akulinga. Mutuhasa nawa kukolweza akwetu ha kwaalweza ngwetu, kakwete yitanga yipema nawa ha kwaatakamisa muze ananenganyana hanji kulela mu mbunge. (1 A-Tesalonika 5:14) Yetu tuli ni uhashi unji wakukolweza mandumbu ni mapangi jetu, mumu twakupwa no hamuwika ha mashimbu anji. (Tanga Chilumbununyi 4:9, 10.) Kashika, twatamba kulihula ngwetu: ‘Shina nakusolola kuli akwetu ngwami nakwaazanga ni kwaalemesa?’ Shina nakuchilinga shimbu lieswe muze nguli ni uhashi? Nyonga ha yize Mbimbiliya yakwamba ngwo: “Liji lia ha ola ya kulita, kuwahalio!”—Yishima 15:23.

6. Mumu liaka Satana akuzanga kuzeyesa tuvumbi twa Zambi? Hana chilweza cha chize iye esekele kuchilinga.

 ⁶ Mukanda wa Yishima 24:10, unambe ngwo: “Nyi mulezumuka ha tangwa lia lamba tachi je jikepe.” Satana kananyingika ngwenyi nyi matuzeyesa, iye mahasa kupihisa usepa wetu ni Yehova. Aye kesekele kuzeyesa Yombi ha kumutuhwishila lamba linji. Alioze, nyonga lipi lia Satana kuliakamanunukine. Yombi yanunga ni kushishika kuli Yehova. (Yombi 2:3; 22:3; 27:5) Ni yetu mutuhasa kulimika ni Satana ni kupwa ni ushindakenyo ngwetu, mutumukumba. Nyi mutununga ni kukolweza asoko jetu ni mandumbu ni mapangi jetu amu chikungulwila, mutuhasa kulikwasa umwe ni mukwo hanga tuwahilile ni kununga kukundama kuli Yehova.

7, 8. (a) Kuchi Yehova akukolweza atu? (b) Kuchi yisemi mahasa kwimbulula chilweza cha Yehova? (Tala chizulie ha uputukilo.)

⁷ Yehova kakukolweza atu. Mukwa-kwimba masamu yasoneka ngwenyi: “Yehova katwama hehi ni waze amakuka mbunge, kakulamwina waze ali ni spiritu yakupihilila.” (Samu 34:18) Muze profeta Jeremia azeyele ku mbunge hamwe ni woma, Yehova yalakenya kumukwasa. (Jeremia 1:6-10) Yehova katumine nawa mungelo hanga atakamise profeta Daniele. Mungelo wacho yalweza Daniele ngwenyi, kali ‘mulemu chinji.’  (Daniele 10:8, 11, 18, 19) Shina muhasa kwimbulula Yehova ha kukolweza mandumbu ni mapangi je, kuchingako mapionelu, ni tushinakaji waze keshi nawa ni tachi ja kulinga milimo yeka ni yeka?

⁸ Chipwe ngwe Yehova ni Yesu katwamine miaka yinji hamuwika, alioze muze Yesu apwile hano hashi, Yehova kanyingikine ngwenyi nihindu katamba kukolweza Mwanenyi. Muze aputukile mulimo wenyi wakwambujola ni ha mwaka wenyi wakasula hano hashi, Yesu kevwile Tato unahanjika kukatuka mu malilu. Ha yisuho yaali, Yehova yamba ngwenyi: “Yono mwe Mwanami, ngunamuzange chikolo, muli iye ngunawahilila.” (Mateu 3:17; 17:5) Yesu kamukolwezele chinji kuli Tato muze amwambile ngwenyi, te kakumuzanga ni kumuwahilila. Alioze, kulutwe lia matangwa, ha umwe ufuku muze Yesu te kanda achifwa, aye yalipikala chinji ku mbunge. Yehova kamukolwezele ha kutuma umwe mungelo hanga amutakamise ni kumulembejeka. (Luka 22:43) Yisemi, munuhasa kwimbulula chilweza cha Yehova ha kukolweza ana jenu matangwa eswe. Achichimiekenu muze malinga kanawa mulimo wo hanji chimwe chuma. Nawa muze mamona yihungumiona ku shikola, senu tachi hanga nwaatakamise ni kwaakwasa hanga anyongonone.

9. Yika mutuhasa kulilongesa ha chize Yesu apwile ni kutwama ni apostolo jenyi?

⁹ Yesu neye kahichikile chilweza chipema chize twatamba kwimbulula. Ha umwe ufuku muze te kanda achifwa, yakosa ku molu ja apostolo jenyi ni kwaalweza ulemu wakulikehesa. Nihindu, o kapwile ni kulizata hamwe ni kulihamika hakachi ko, hanga anyingike yoze munene wahiana akwo. Nawa Petulu yalisamba ngwenyi te kechi kuhichika Yesu nilimwe tangwa. (Luka 22:24, 33, 34) Chipwe chocho, Yesu kakalihulikile ha uhenge wo. Alioze, yaachichimieka ha kununga ni kushishika kuli iye. Aye yaalakenya ngwenyi, o te malinga yuma yinene kuhiana yize iye alingile, ni kwaakolweza ngwenyi te Yehova kakwaazanga chinji. (Luka 22:28; Yoano 14:12; 16:27) Mutuhasa kulihula ngwetu, ‘Shina nakwimbulula chilweza cha Yesu ni kuchichimieka akwetu ha yitanga yo yipema, nyi nakulihulikila wika ha uhenge wo?

10, 11. Kuchi Paulu akolwezele mandumbu jenyi, nawa yika iye alingile ni zango lieswe?

¹⁰ Postolo Paulu kanji-kanji te kakuhanjika yuma yipema hakutwala kuli mandumbu jenyi. Iye kapalikishile miaka yinji ni amwe akuli ayo hakulinga wenyi, chocho yaanyingika kanawa. Chipwe ngwe kaanyingikine kanawa, nihindu aye kakasonekene hakutwala ku uhenge wo. Alioze te kakwaachichimieka. Chakutalilaho, Paulu yamba ngwenyi, Timoteu te ‘mwanenyi wa zango ni wamwenemwene muli Mwene’ nawa kapwile ni ujikijilo ngwenyi Timoteu te mafunga kanawa akwo. (1 A-Korindu 4:17; A-Fwilipu 2:19, 20) Paulu kalwezele akwa-Kristu amu Korindu ngwenyi, Titu “iye sepa liami ni mukwa milimo-ni-mukwetu hali yenu.” (2 A-Korindu 8: 23) Kwamba umwenemwene, Timoteu ni Titu kawanyine utakamiso ha kunyingika yuma yize Paulu ambile hali ayo!

¹¹ Paulu ni Mbarnabe kasele mwono wo mu ponde hanga aye ni kukolweza mandumbu jo. Chakutalilaho, ayo eswe ni aali kanyingikine ngwo, atu anji mu mbonge ya Lisetra te kakuzanga kwaashiha. Chipwe chocho, o yazanga kufunako hanga akolweze tumbaji aha ni kwaakwasa hanga anunge ni kushishika kuli Yehova. (Yilinga 14:19-22) Hi kulutwe, muze te ali mu Efwesu, Paulu yapwa nawa mu ponde, mumu lia atu waze apwile ni kumwivwila kole. Chipwe chocho, o yatwamamo matangwa anji hanga akolweze mandumbu jo. Yilinga 20:1, 2, unambe ngwo: ‘Paulu yasanyika tumbaji kuli iye, yaatakamisa ni maliji, yaashika, yakatuka mukuya ku Masendoniya. Muze te hapalika ndusu mu yihunda yize, nikwatakamisa ni maliji anji, yaheta ku Ngresia.’

12. Mumu liaka chili chipema kuya ku kukunguluka?

¹² Yehova kakuzanga yuma yipema hali yetu. Kashika akutulweza hanga tupwe ni kulikungulula mashimbu eswe. Ku kukunguluka chetu, twakulilongesa  hakutwala kuli iye ni kulikolweza umwe ni mukwo. (1 A-Korindu 14:31; tanga A-Hepreu 10:24, 25.) Maria yoze twatongola kuuputukilo wa mutwe uno, yamba ngwenyi: “Yize nakuzanga chinji ku kukunguluka chetu yili zango ni utakamiso uze mandumbu akungwaha. Ha mashimbu amwe chishi kwivwa kanawa muze munguheta ku Zuwo lia Wanangana. Alioze nakwivwa kuwaha muze mapangi akukundama kuli yami ni kungusambilila, ni kungwamba ngwo, ngunapema. Ayo kakwamba ngwo kakunguzanga nawa ngwo kakuwahilila chinji hakumona chize ngunakolo ku ufulielo. Utakamiso wo wakungulingisa hanga ngulivwe kanawa!” Chochene, chili chilemu yetweswe kukolweza akwetu!—A-Roma 1:11, 12.

13. Mumu liaka chipwe mandumbu waze akuwayila Yehova ha miaka yinji no kanafupiwa utakamiso?

¹³ Chipwe mandumbu waze akuwayila Yehova ha miaka yinji no kanafupiwa utakamiso. Tutalenu chilweza cha Yoshua. Muze te hikwasala hakehe hanga A-Izalele azuke Chifuchi cha Chilakenyo, Yehova yasakula Yoshua hanga apwe kasongo ko. Alioze Yehova te hanalweza kulu Mose hanga akolweze Yoshua, chipwe ngwe te iye kakuwayila Yehova ha miaka yinji. Yehova yamba ngwenyi: “Hana shimbi kuli Yoshua umukolese umujikijise, mumu iye makazauka kumeso ja atu ano, iye makaatungisa mu chifuchi chino yena mumona.” (Shimbi Yamuchiali 3:27, 28) Yoshua kafupiwile utakamiso, mumu kulutwe lia matangwa A-Izalele te masa jita jinji, chipwe ngwe te mahona kukumbako yimwe. (Yoshua 7:1-9) Musono, mutuhasa kukolweza makulwana ni tulayi a mambonge, waze akukalakala chinji hanga afunge atu ja Zambi. (Tanga 1 A-Tesalonika 5:12, 13.) Umwe kalayi wa mbonge yamba ngwenyi: “Ha mashimbu amwe mandumbu kakungusonekena mikanda ya usakwililo hakusolola kuwaha chize akwivwa muze twakwaameneka. Twakufunga mikanda yacho ni kuyitanga muze mutwivwa yinyengo. Mandumbu wano kali chishina cha utakamiso.”

14. Yilweza yika yinasolola ngwo chili chipema kuchichimieka akwetu shimbu kanda tuchaaha chiyulo?

¹⁴ Ha limwe shimbu, postolo Paulu yahana chiyulo kuli mandumbu mu Korindu. Muze o akawile chiyulo chacho, Paulu yaachichimieka. (2 A-Korindu 7:8-11) Kwamba pundu, maliji ja Paulu kakolwezele chinji mandumbu jacho ni kwaakwasa hanga anunge ni kulinga yuma yize yalita. Musono, makulwana amu yikungulwila ni yisemi mahasa kukaula chilweza cha Paulu. Andrea, yoze uli ni ana aali yamba ngwenyi: “Ukolwezo wakukwasa ana hanga akole ku ufulielo ni ku manyonga. Mutuhasa kuhana fumbo kuli mutu nyi chitangu mutumukolweza. Chipwe ngwe ana jetu kananyingika yuma yize yalita, alioze ukolwezo wetu we wakwaakwasa kulinga yuma yalita ku mwono wo.”

15. Mutapu uka mutuhasa kutakamishinamo akwetu?

¹⁵ Lweza mandumbu je chize wakwaalemesa ha tachi jize akusa ni ha yitanga yo yipema. (2 Sango ja Mianangana 16:9; Yombi 1:8) Nyi twalinga chocho, mutwimbulula Yehova ni Yesu. Ayo kakulemesa yuma yeswe yize twakwaalingila,  chipwe ngwe tushi kuhasa kulinga yeswe yize twakuzanga. (Tanga Luka 21:1-4; 2 A-Korindu 8:12.) Chakutalilaho, tunanyingika ngwetu, mandumbu jetu waze hapwa tushinakaji kakusa tachi jinji hanga eze ku kukunguluka ni kuya mu munda matangwa eswe. Shina twakwatakamisa ni kwaachichimieka ha tachi jize akusa?

16. Shimbu lika mutuhasa kukolweza akwetu?

¹⁶ Kolweza akwenu muze mwopwa ni uhashi wakuchilinga. Ha shimbu lieswalio mumona ngwe, mukwenu kalinga chuma chipema, watamba kumuchichimieka. Muze Paulu ni Mbarnabe ayile ku Andiakia mu limbo lia Piseteya, akwa-kuyula sunangonga yaamba ngwo: ‘Mandumbu nyi liji limwe lia kukolweza atu nuli nalio, ambenu.’ Paulu yazachisa uhashi wacho hanga akolweze atu eswe. (Yilinga 13:13-16, 42-44) Nyi mutukolweza akwetu, no mahasa kutukolweza.—Luka 6:38.

17. Mutapu uka uze twatamba kuchichimiekenamo akwetu?

¹⁷ Ha kuchichimieka akwetu twatamba kutongola yuma yize akulinga. Muze Yesu achichimiekene akwa-Kristu mu Tayatera, iye katongwele ni kulumbununa yuma yipema yize ayo te akulinga. (Tanga Usolwelo 2:18, 19.) Kuchi mutuhasa kwimbulula Yesu ha chikuma chino? Mutuhasa kuchilinga hakuchichimieka umwe mama yoze unalela ana ukawenyi, chipwe ngwe kanamono yipikalo. Nyi uli chisemi, muhasa kuchichimieka ana je ha tachi jize akusa hanga awayile Yehova. Alumbunwine yuma yipema yize wakumona kuli ayo. Nyi mututongola yuma yize akwetu akulinga muze tunaakolweza, ayo manyingika ngwo yuma twakwamba yili yamwenemwene.

18, 19. Kuchi mutuhasa kulikwasa umwe ni mukwo mba tununge ni kukundama kuli Yehova?

¹⁸ Yehova kalwezele Mose hanga akolweze ni kutakamisa Yoshua. Kwamba pundu, Yehova keshi kuhanjika ni yetu musono hanga atulweze ndumbu yoze mutuhasa kukolweza. Alioze, iye kakuwahilila chinji muze mamona tachi jize twakusa hanga tukolweze akwetu. (Yishima 19:17; A-Hepreu 12:12) Chakutalilaho, muze umwe ndumbu mahanjika pande ja mbunga mu chikungulwila chetu, mutuhasa kumulweza yikuma ya pande yize yatukwata ku mbunge. Hanji yuma yize amba yatukwasa hanga tukumbe umwe kapalia hanji kunyingika kanawa yimwe yisoneko. Umwe pangi yasonekena ndumbu yoze wahanjikile jimwe pande ngwenyi: “Chipwe ngwe twahanjika ha minutu yikehe wika, alioze ena wamona ulelu wa ku mbunge yami, nawa wangutakamisa ni kungukolweza. Ngunazange hanga unyingike ngwo kuhanjika che, chipwe muze uli ha uhanjikilo hanji muze tunahanjika, nakwivwa ngwami maliji jacho kali yiwape ya Yehova.”

¹⁹ Mutuhasa kulikwasa umwe ni mukwo hanga tununge ni kukundama kuli Yehova nyi mutukaula chiyulo cha Paulu chakwamba ngwo: Nungenu ni ‘kulikolweza umwe ni mukwo, likolesenu umwe ni mukwo, chizechene ngwe nwakulinga.’ (1 A-Tesalonika 5:11) Nyi mutununga ni kulikolweza “umwe ni mukwo tangwa ha tangwa,” mutuvwisa Yehova kuwaha!