1, 2. Saide u mu e gi taawan taanga-sikin?

CRISTINA di abi 18 yali taki: „Noiti mma anga nda gi mi taanga-sikin. Ala yuu den e kuutu mi. Den sani di den e taigi mi, e hati mi. Den taigi mi taki mi e du enke pikinengee. Den taki mi don, mi fatu. Den sani ya e hati mi te, da mi e kee. Mi nai wani taki anga den. Mi e fii enke mi ná abi fa.” ^[1] (Luku a pisi: Ete wan pelensipali sani.) A sani ya e soi taki, a á switi te taawan nai gi i taanga-sikin!

² Ma te wi e gi taawan taanga-sikin, den e fii bun. Rubén taki: „A omen yali kaba mi e fii enke mi ná abi fa. Ma wan leisi di mi anga wan owluman be de aini a peleikiwooko, neen a si taki a á be e go bun anga mi. A aliki mi anga pasensi di mi be e taigi en fa mi be e fii. Neen a taigi mi san a den bun sani di mi e du. A soi mi tu taki, Yesesi be taki u pelensipali moo omen pikin foo. Mi nai feegete a tekisi ya. Ala yuu te mi membee en, mi e fii bun. Den sani di a owluman taigi mi, doo mi ati tuutuu.”​—Mateyesi 10:31.

3. (a) Fa Pawlesi soi taki a pelensipali fu gi taawan taanga-sikin? (b) San wi o luku aini a artikel ya?

³ Beibel taki u mu e gi useefi taanga-sikin ala yuu. Apostel  Pawlesi be taigi den Hebrew Kelesten taki: „Mi baala, luku bun fu nawan fu wi á gwe fika a libilibi Gadu. A sani de o meke wi abi wan takuu ati di nai biibi moo. Meke wi e gi makandaa taanga-sikin ala dei.” Pawlesi soi saide u mu du a sani de. A taki: „Da sondu ná o fende u koli fu di a meke wi ati kon taanga” (Hebrewsama 3:12, 13). Pakisei fa yu e fii te wan sama gi i taanga-sikin. Wi o taki fu den akisi ya aini a artikel ya: Saide u mu e gi taawan taanga-sikin? Fa u sa waka a Yehofa, Yesesi anga Pawlesi baka te wi e gi taawan taanga-sikin? Fa u sa gi taawan taanga-sikin?

4. Sama abi taanga-sikin fanowdu? Saide somen sama aini a ten ya nai gi taawan taanga-sikin?

⁴ Ala wi abi taanga-sikin fanowdu. A de taanga fanowdu taki mma anga dda e gi den pikin taanga-sikin. Wan muneli di den e kai Timothy Evans taki, pikinengee „abi taanga-sikin fanowdu enke fa boomiki abi wataa fanowdu”. A taki: „Te yu e gi wan pikin taanga-sikin ai fii taki a pelensipali. Ai si tu taki sama lobi en.” Ma fu di wi e libi „aini den kiiboi dei” meke omen sama nai booko den ede anga taawan. Boiti dati, ’den á lobi taawan’ anga den hii ati (2 Timotiyesi 3:1-5). Son mma anga dda nai gafa den pikin fu di den gaansama fu den á be e gafa den. Gaansama seefi abi taanga-sikin fanowdu, ma sama nai gi den taanga-sikin. A omen sama e kuutu taki sama nai gafa den a wookope gi den bun sani di den e du.

5. Fa u sa gi taawan taanga-sikin?

⁵ Wan fasi fa u sa gi taawan taanga-sikin, a te wi e gafa den te den du wan bun sani. Efu wi e taigi taawan taki den abi bun manii, da a sani de e gi den taanga-sikin tu. U sa gi den taanga-sikin te wan tyali sani miti den anga te den booko-saka (1 Tesalonikasama 5:14). A omen leisi wi e de makandaa anga u baala anga sisa, neen meke wi abi omen okasi fu taigi den sani di e gi den taanga-sikin. (Leisi Peleikiman 4:9, 10.) Neen meke i mu akisi iseefi taki: ’Mi e meke taawan sabi saide mi lobi den efuso saide mi e piisii fu de makandaa anga den? Mi e du a sani ya ala yuu? Pakisei san Beibel taki: „Ná pikin switi a switi te wan sama taki wan sani na a yuu di a de fanowdu!”​—Odo 15:23.

6. Saide Saatan e meke moiti fu meke a foluku fu Gadu lasi-ati? Anga sama Saatan be du a sani ya?

⁶ Odo 24:10 taki: „Efu yu e fii booko-saka te nowtu miti i, yu o swaki.” Saatan sabi taki te wi e fii booko-saka, a moo makiliki gi en fu meke wi anga Yehofa poli. A du omen sani anga Yopu fu di a be wani a lasi-ati. Ma a á fende wini. Yopu á gwe fika Yehofa (Yopu 2:3; 22:3; 27:5). Useefi sa wini Saatan tu. Efu wi e gi wi osufamii anga den baala anga sisa aini a kemeente taanga-sikin, wi o yeepi den fu dini Yehofa anga piisii.

7, 8. (a) Fa Yehofa gi sama taanga-sikin aini den ten di pasa? (b) Fa mma anga dda sa waka a Yehofa baka? (Luku a fowtow na a bigin.)

⁷ Yehofa e gi sama taanga-sikin. A psalm sikiifiman taki: „Yehofa de koosube fu den sama di booko-saka. Ai yeepi den sama di lasi-ati” (Psalm 34:18). Di Yelemiya be e feele, di a be lasi-ati, Yehofa be paamisi en taki a o yeepi en (Yelemiya 1:6-10). Yehofa be sende wan engel go na a gaandi polofeiti Daniyeli fu gi en  taanga-sikin. A engel gafa Daniyeli taki en na „wan man di Gadu lobi” (Daniyeli 10:8, 11, 18, 19). Pakisei den baala anga sisa, den pionili anga den gaandiwan di á poi du a peleikiwooko moo enke fosi. I sa gi den taanga-sikin tu.

⁸ Yehofa anga Yesesi be de omen yali a hemel, tokuso di Yesesi kon a goontapu, Yehofa be sabi taki a de fanowdu fu gi en Manpikin taanga-sikin ete. Yehofa be taki anga en di a bigin du a peleikiwooko. A lasiti yali di a be de a goontapu, a taki anga en tu. Wan leisi Yehofa taki: „Disi a mi manpikin, mi lobi en, ai meke mi piisii” (Mateyesi 3:17; 17:5). Yesesi be musu fende taanga-sikin di en Dda taki a lobi en. A be fende taanga-sikin tu di en Dda taigi en taki ai meke a piisii. A neti fosi Yesesi dede, a be e booko en ede tuutuu. Neen meke Yehofa sende wan engel kon fu gi en taanga-sikin (Lukasi 22:43). Mma anga dda, u sa waka a Yehofa baka tu, te wi e gi u pikin taanga-sikin. Gafa den te den du wan bun sani. Te sani e miti den a sikoo, du san i poi fu gi den taanga-sikin fu den holidoo.

9. San wi e leli fu a fasi fa Yesesi be e libi anga den apostel?

⁹ U sa waka a Yesesi baka tu. A neti fosi a dede, a wasi den apostel fi en futu, neen a soi den saide den mu abi sakafasi. Ma toku den be abi heimembee. Ala yuu, den be e sitee sowtu wan fu den a be a moo gaanwan. Peitilisi gafa taki noiti a á be o gwe fika Yesesi (Lukasi 22:24, 33, 34). Ma Yesesi á be e poti pakisei a den fowtu di den be e meke. A gafa den fu di den holibaka gi en. A paamisi den taki den be o du gaan sani moo den sani di a be du. A soi den tu taki Yehofa lobi den (Lukasi 22:28; Yohanisi 14:12; 16:27). U mu akisi useefi taki: ’Mi e gafa taawan enke Yesesi, efu a den fowtu di den e meke mi e poti pakisei?’

10, 11. Fa Pawlesi gi den baala anga sisa taanga-sikin? San a be de kabakaba fu du?

¹⁰ A omen leisi apostel Pawlesi be e gafa den baala anga sisa fi en. En anga den be go a omen peesi, neen meke a be sabi den bun. Ma di a sikiifi den buku fi en, a á kai den swakifasi fu den. A gafa a gafa den. A be taki a lobi Timotiyesi enke en pikin. A be sabi taki Timotiyesi be o poi gi taawan taanga-sikin (1 Korentesama 4:17; Filipisama 2:19, 20). Pawlesi be taigi a kemeente fu Korente taki Titesi a wan baala di e ’wooko makandaa anga en fu yeepi a kemeente’ (2 Korentesama 8:23). Timotiyesi anga Titesi be musu fii bun di den yee fa Pawlesi gafa den!

¹¹ Pawlesi anga en mati Barnabas, be e meke moiti fu gi den baala anga sisa taanga-sikin, winsi a sani ya be sa tyai dede gi den. Den be sabi taki a omen sama be wani kii den a Listra. Ma toku den go na a foto ya baka, fu gi den nyun disipel taanga-sikin anga fu yeepi den fu den á gwe fika Yehofa (Toli 14:19-22). Bakaten, di Pawlesi be de a Efeise, wan kulu sama be wani du ogii anga en, ma toku a tan ape wan pisiten fu gi den baala anga sisa taanga-sikin. Toli 20:1, 2 taki: „Pawlesi sende kai den disipel, neen a gi den taanga-sikin, a gi den siibun, neen a go a Masedoniya. A waka a omen peesi anda e gi den sama taanga-sikin. Baka dati a go a Giikikondee.”

12. Saide u mu e go a komakandaa?

¹² Yehofa wani sani go bun anga u, neen  meke a taki u mu e kon a makandaa ala yuu. Te u de a komakandaa, wi e leli fu Yehofa. Wi e gi useefi taanga-sikin tu (1 Korentesama 14:31; leisi Hebrewsama 10:24, 25.) Cristina di u be taki fi en na a bigin taki: „A sani di mi lobi fu den komakandaa, na a taanga-sikin di mi e fende. Mi e si taki den baala anga sisa lobi mi. Son leisi anga booko-ede mi e go a komakandaa. Ma te mi doo, den sisa e kon taki anga mi, den e baasa mi. Den e gafa mi tu taki mi wei moin. Den e taigi mi taki den lobi mi, ai bigi gi den fu si fa mi e go a fesi. A taanga-sikin di den e gi mi, e meke mi fii bun!” A sani ya e soi taki a de taanga fanowdu fu gi taawan taanga-sikin!​—Romesama 1:11, 12.

13. Saide den sama di e dini Yehofa wan pisiten kaba abi taanga-sikin fanowdu tu?

¹³ Den sama di e dini Yehofa wan pisiten kaba, abi taanga-sikin fanowdu tu. Pakisei Yowsuwa. Di den Islayelisama be de fu go aini a Paamisi Kondee, a Yowsuwa Yehofa be poti fu tii den. Ma winsi fa Yowsuwa be dini Yehofa omen yali, toku Yehofa be taigi Mosesi taki a mu gi en taanga-sikin. A taki: „Poti Yowsuwa enke fesiman. Gi en deki-ati fu a á feele, bika neen o tyai a foluku go a taa se fu a liba. Neen o meke den teke a kondee di yu o si” (Deitolonomi 3:27, 28). Yowsuwa be abi taanga-sikin fanowdu, bika a foluku be o feti omen feti. Den be o lasi wan feti tu (Yowsuwa 7:1-9). Aini a ten ya, u sa gi owluman anga kelen-owluman taanga-sikin tu, bika den e wooko taanga gi a foluku fu Gadu. (Leisi 1 Tesalonikasama 5:12, 13.) Wan kelen-owluman taki: „Son yuu baala anga sisa e sikiifi biifi gi u, fu soi u taki ai bigi gi den taki u be go luku den. Wi e kibii den biifi ya, da te wi e fii booko-saka, da wi e leisi den. Den e gi u taanga-sikin tuutuu.”

14. Sowtu toli e soi taki a bun fu gafa taawan te u wani yeepi den fu du wan sani moo bun?

¹⁴ Wan leisi, apostel Pawlesi be abi fu poti den baala anga sisa fu Korente a pasi. Di Pawlesi si taki den wooko anga a sani di a soi den, a gafa den (2 Korentesama 7:8-11). Den sani di Pawlesi taigi den baala anga sisa, gi den taanga-sikin fu den á weli fu du bun. Owluman sa waka a Pawlesi baka. Andreas di abi tu pikin taki: „Te yu e gi i pikin taanga-sikin, da dati e yeepi den fu go a fesi. Te yu e gafa den, den e moo du san i leli den. Winsi fa pikinengee sabi san bun, tokuso te wi e gi den taanga-sikin ala yuu, da dati e yeepi den fu du bun sani.”

15. San a wan fasi fa u sa gi taawan taanga-sikin?

¹⁵ Taigi den baala anga sisa fi i taki ai bigi gi i taki den e meke moiti. Taigi  den sowtu manii fu den i lobi (2 Koloniki 16:9; Yopu 1:8). Te wi e du a sani ya, a Yehofa anga Yesesi baka wi e waka. Ala den sani di wi e du e bigi gi den, winsi wi á poi du ala san u wani du. (Leisi Lukasi 21:1-4; 2 Korentesama 8:12.) U sabi fa a taanga gi den gaandi baala anga sisa fu go a peleikiwooko efuso komakandaa ala yuu. Wi e gafa den fu a moiti di den e meke?

16. On ten u sa gi taawan taanga-sikin?

¹⁶ Gi taawan taanga-sikin ala yuu. Solanga i si wan sama du wan bun sani, gafa en. Di Pawlesi anga Barnabas be go a Antiyokiya, wan peesi a Pisidiya, den fesiman fu a keliki osu fu den Dyu taigi den taki: „Baala, efu u wani taki wan sani fu gi a foluku taanga-sikin, u sa taki.” Pawlesi teke a okasi de fu gi den sama taanga-sikin (Toli 13:13-16, 42-44). Te wi e gi sama taanga-sikin, da son leisi taawan e gi u taanga-sikin tu.​—Lukasi 6:38.

17. San na a moo bun fasi fa u sa gafa taawan?

¹⁷ Taigi a sama kiin saide yu e gafa en. Di Yesesi gafa den Kelesten a Tiyatira, a taigi den saide a gafa den. A soi den san den be du bun. (Leisi Openbaring 2:18, 19.) Fa u sa waka neen baka? Kande u sa gafa wan mma fu a fasi fa a kiya den pikin fi en, winsi fa a á be makiliki gi en wawan. Efu yu a wan mma efuso dda, i sa gafa i pikin fu a fasi fa den e meke moiti fu dini Yehofa. Taigi den sowtu bun den e du. Efu yu e taki kiin te yu e gi taawan taanga-sikin, den o si taki a sani di i taigi den komoto a yu ati.

18, 19. Fa u sa yeepi useefi fu wi á gwe fika Yehofa?

¹⁸ Yehofa be taigi Mosesi taki a mu gi Yowsuwa taanga-sikin. Ma aini a ten ya, Yehofa ná o taigi u anga mofu taki u mu gi wan sama taanga-sikin. Ma ai bigi gi en te a si a moiti di wi e meke fu gi taawan taanga-sikin (Odo 19:17; Hebrewsama 12:12). Te wan baala holi wan lezing a u kemeente, u sa taigi en sowtu pisi fu a lezing u be lobi. Kande den sani di a taki yeepi i anga wan polobelema. Kande a yeepi i fusutan wan Beibeltekisi moo bun tu. Wan sisa be sikiifi wan biifi gi wan baala di be holi wan lezing. A taki: „Winsi fa a wantu miniti namo mi anga i taki, tokuso a gei enke i si san de a mi ati, neen i gi mi taanga-sikin. I taki a wan switifasi di i be e holi a lezing. Boiti dati, i taki switi anga mi tu. Mi be fii enke a wan kado Yehofa gi mi.”

¹⁹ Efu u wani yeepi taawan fu den á gwe fika Yehofa, u mu du san Pawlesi be taki. A taki: „U mu e gi makandaa taanga-sikin, u mu e yeepi makandaa tu, enke fa u gwenti” (1 Tesalonikasama 5:11). Efu wi e „gi makandaa taanga-sikin ala dei”, wi o meke Yehofa piisii!