1, 2. Nama kebuah meransang orang bukai nya beguna?

CRISTINA, ke beumur 18 taun madahka: “Apai indai aku enda kala meransang aku. Seduai iya selalu mantah aku, lalu jaku seduai iya balat ngemediska ati aku. Seduai iya ngumbai aku gemu, enda nemu berunding sereta enda ulih diajar. Nya alai aku suah nyabak sereta enggai bejaku enggau seduai iya. Aku ngasaika diri enda beguna.” ^[1] (Peda nota penutup.) Pengidup tentu balat tusah enti orang enda meri jaku peransang!

² Tang, uji perundingka baka ni kitai ulih nulung orang bukai enti kitai meransang sida. Ku Rubén madahka: “Betaun-taun aku ngelaban asai ati ke ngumbai diri enda beguna. Bisi sekali, aku nginjil enggau seiku tuai gempuru. Iya nemu aku tusah ati. Lebuh aku madahka asai ati diri, iya mendingka aku enggau penyiru. Udah nya iya ngingatka aku pasal utai manah ke udah dikereja aku. Iya mega ngingatka aku pasal jaku Jesus—iya nya tiap iku kitai berega agi ari burung pipit. Aku suah ingatka ayat Bup Kudus nya, lalu ayat nya agi negu ati aku. Jaku tuai gempuru nya amat meransang aku.”—Mat. 10:31.

3. (a) Nama dipadah rasul Paul pasal meransang orang bukai? (b) Nama deka dikerandauka kitai ba artikel tu?

³ Bup Kudus madahka kitai patut meransang pangan diri enggau tetap. Rasul Paul nulis ngagai orang Kristian Hebrew: ‘Bejimat kita, menyadi,  enggai ke kita ngembuan ati ti jai, ati ti enda arap, lalu ninggalka Petara ti idup. Tang peransang pangan diri tiap hari.’ Paul madahka kebuah iya: “Ngambika nadai siku kita ditipu dosa lalu nyadi kieh.” (Heb. 3:12, 13) Pikirka pengaga ati nuan enti orang meransang nuan. Nya alai, nama kebuah kitai patut meransang bala menyadi Kristian? Nama ulih dipelajarka kitai ari chara Jehovah, Jesus enggau Paul meransang orang bukai? Lalu nama sekeda chara kitai ulih meransang orang bukai? Aram kitai berandauka tiga iti tanya nya.

4. Sapa patut diperansang? Nama kebuah orang kemaya hari tu enda meransang orang bukai?

⁴ Semua kitai begunaka jaku peransang. Lalu apai indai patut meransang bala anak sida. Seiku cikgu ke benama Timothy Evans madahka, bala anak “begunaka jaku peransang baka utai tumbuh ke begunaka ai.” Ku iya agi: “Enti diperansang, anak deka berasai beguna sereta dikesayauka.” Tang ketegal kitai diau ba “hari ti penudi,” mayuh orang berundingka diri empu sereta enda entu “rinduka, NW” pangan diri. (2 Tim. 3:1-5) Sekeda apai indai enda meransang bala anak sida laban sida empu enda kala diperansang apai indai sida. Orang ke besai tuai mega begunaka jaku peransang, tang kesuah agi sida enda diperansang. Ngambika chunto, mayuh orang besebana madahka diri enda kala dipuji ke pengawa ti dikereja sida.

5. Baka ni kitai ulih meransang orang bukai?

⁵ Kitai ulih meransang orang bukai enggau muji pengawa manah ti dikereja sida. Kitai mega ulih meransang orang bukai enggau madahka sida ngembuan kualiti ti manah sereta enggau ngelantangka ati sida lebuh sida tusah ati sereta lemi semengat. (1 Tes. 5:14) Ketegal kitai suah begulai enggau bala menyadi Kristian, kitai bisi mayuh peluang nyebut utai ke ulih meransang. (Bacha Pengajar 4:9, 10.) Nya alai, tanya diri empu: “Kati aku ngawakka orang bukai nemu kebuah aku ibuhka sereta sayauka sida? Lalu kati aku ngereja tu maya aku bisi peluang?’ Pikirka utai ti dipadah Bup Kudus: “Naka meh pengaga tetemuka leka jaku ba maya ti ngena.”—J-lam 15:23.

6. Nama kebuah Sitan deka ngelemika nembiak Petara? Beri siti chunto pasal iya ngereja nya.

⁶ Ku Jaku Dalam 24:10 madahka: “Enti nuan lemi lebuh nuan dituntung penusah, reti nya nuan endang sigi amat lemi.” Sitan nemu enti iya ulih ngelemika kitai, iya ulih ngelemika kaul kitai enggau Jehovah. Iya nguji ngelemika Jop enggau ngasuh iya balat merinsa. Tang pelan jai Sitan nya enda mujur. Jop mengkang taluk ngagai Jehovah. (Jop 2:3; 22:3; 27:5) Kitai mega ulih ngelaban Sitan sereta nentuka pelan iya enda mujur. Enti kitai terus meransang diri sebilik sereta bala menyadi Kristian kitai ba gempuru, kitai ulih nulung pangan diri lantang ati sereta mengkang semak ngagai Jehovah.

7, 8. (a) Baka ni Jehovah meransang orang? (b) Baka ni apai indai ulih nunda teladan Jehovah? (Peda gambar ba pun artikel.)

⁷ Jehovah meransang orang. Pemasmur nulis: ‘Jehovah diau semak orang ke tusah ati lalu ngidupka sida ke nadai agi pengadang.’ (Mas. 34:18) Lebuh nabi Jeremiah takut sereta lemi semengat, Jehovah besemaya deka nulung iya. (Jer. 1:6-10) Jehovah ngirumka seiku melikat kena ngeringka nabi Daniel ke udah tuai. Melikat nya madahka, Jehovah “rinduka” Daniel. (Dan. 10:8, 11, 18, 19) Kati nuan ulih meransang bala menyadi Kristian enggau chara ti sama,  nyengkaum bala pengerintis sereta orang ke udah tuai ti enda ulih ngereja mayuh pengawa ke Jehovah baka ke kala dikereja sida suba?

⁸ Taja pan Jehovah enggau Jesus udah lama begulai, Jehovah nemu Jesus agi begunaka peransang ari Iya lebuh Jesus ba dunya. Jesus ninga Apai iya bejaku ari serega lebuh iya berengkah bejalaika pengawa nginjil sereta maya taun ke penudi iya ba dunya. Bisi dua kali, Jehovah madahka: ‘Tu Anak ke dikesayauka Aku. Aku rinduka iya.’ (Mat. 3:17; 17:5) Jesus tentu berasai balat diperansang lebuh iya ninga Apai iya madahka Diri sayauka iya sereta temegah ke iya. Udah nya, ba malam sebedau Jesus mati, iya balat irau ati. Jehovah meransang iya enggau ngirumka seiku melikat kena ngering sereta ngelantangka ati iya. (Luk. 22:43) Apai indai, kita ulih nunda teladan Jehovah enti enggau tetap meransang bala anak kita. Puji sida enti sida ngereja pengawa ti manah. Lalu lebuh sida napi penguji ba sekula, enggau naka ulih ngering sereta nulung sida tan.

9. Nama ulih dipelajarka kitai ari chara Jesus begulai enggau bala rasul iya?

⁹ Jesus mega netapka teladan ti manah ke kitai. Ba malam sebedau iya mati, iya masu kaki bala rasul iya sereta madahka ngagai sida kebuah baruh ati nya beguna. Tang sida sumbung lalu bekelikuh pasal sapa ke pemadu besai, lalu Peter bejaku begah madahka diri enda ninggalka Jesus. (Luk. 22:24, 33, 34) Taja pia, Jesus enda beratika penyalah sida. Tang, iya muji sida ketegal mengkang taluk ngagai iya. Iya besemaya, sida deka ngereja pengawa ti besai agi ari ke dikereja iya, lalu iya madah ngagai sida, Jehovah rinduka sida. (Luk. 22:28; Jhn. 14:12; 16:27) Kitai ulih nanya diri empu, ‘Kati aku nunda teladan Jesus sereta muji orang bukai ketegal sida ngembuan kualiti ti manah, ari ke beratika penyalah sida?’

10, 11. Baka ni Paul meransang bala menyadi Kristian lelaki iya, lalu nama utai ke sanggup dikereja iya?

¹⁰ Rasul Paul suah nyebut utai ti manah pasal bala menyadi Kristian lelaki. Iya udah betaun-taun bejalai jauh enggau sekeda sida sereta udah ngelala sida enggau manah, tang iya nadai nulis penyalah sida. Iya muji sida. Ngambika chunto, Paul madahka Timoti nya ‘anak ke tetap ati sereta dikerinduka [iya] dalam Tuan,’ lalu iya pechaya Timoti deka ngintu utai ti diguna orang bukai. (1 Kor. 4:17; Plp. 2:19, 20) Paul madah ngagai orang Kristian ba Korint, Titus nya tawing iya bekereja betulungka sida. (2 Kor. 8:23) Timoti enggau Titus tentu berasai diperansang lebuh nemu utai ti dirunding Paul pasal seduai iya!

¹¹ Paul enggau Barnabas berambunka nyawa diri ngambika ulih meransang bala menyadi Kristian. Ngambika chunto, seduai iya nemu mayuh orang ba menua Listra deka munuh seduai iya. Tang seduai iya agi kin meransang bala murid ke baru sereta nulung sida mengkang tetap ati ngagai Jehovah. (SKR. 14:19-22) Ba Epesus, Paul berambunka nyawa diri napi orang mayuh ke pedis ati, tang iya lama diri diau dia ngambika meransang bala menyadi Kristian iya. Ku Kereja Rasul 20:1, 2 madahka: “Paul lalu mesanka sida murid, lalu lebuh iya udah meri sida jaku peransang, lalu meri selamat tinggal, iya lalu mupuk ngagai menua Masedonia. Lebuh iya udah bejalai nengah menua nya lalu udah meransang sida ke arap ngena mayuh macham ajar, iya datai di menua Gerika.”

12. Nama kebuah datai begempuru nya manah ke kitai?

¹² Jehovah dekaka utai ti pemadu manah  ke kitai. Nya kebuah Iya ngasuh kitai begemburu enggau tetap. Maya begempuru, kitai belajar pasal Iya sereta meransang pangan diri. (1 Kor. 14:31; bacha Hebrew 10:24, 25.) Cristina, ke disebut ba pun artikel tu madahka, “Utai ti pemadu dikerindu aku pasal begempuru, iya nya pengerindu enggau jaku peransang ke diterima aku din. Kekadang aku berasai lemi semengat lebuh datai ba Palan Gempuru. Tang udah nya bala menyadi Kristian indu datai semak, merap aku, lalu madahka aku bajik. Sida madahka diri sayauka aku sereta gaga ati meda pemansang aku ba rohani. Jaku peransang sida ngelantangka ati aku!” Endang beguna tiap iku kitai meransang orang bukai!—Rom. 1:11, 12.

13. Nama kebuah orang ke udah lama nyembah Jehovah pan patut diperansang?

¹³ Indah orang ke udah lama nyembah Jehovah pan begunaka jaku peransang. Peratika Josua. Lebuh orang Israel deka tama ngagai Menua ti Udah Disemaya, Jehovah milih Josua nguluka sida. Tang, Jehovah ngasuh Moses meransang Josua taja pan Josua udah betaun-taun nyembah Jehovah. Ku Jehovah madahka: “Beri atur ngagai Josua, lalu keringka ati iya, laban iya deka nguluka orang mayuh meraka lalu ngalahka menua ti dipeda nuan.” (U-dat. 3:27, 28) Josua begunaka jaku peransang laban sida deka suah beperang sereta deka alah abis kurang sekali. (Jos. 7:1-9) Kemaya hari tu, kitai ulih meransang bala tuai gempuru sereta tuai ti ngabas ke udah bebendar ngintu nembiak Petara. (Bacha 1 Tesalonika 5:12, 13.) Seiku tuai ti ngabas madahka: “Kekadang bala menyadi Kristian meri kami duai surat terima kasih ke madahka diri gaga ati laban kami duai bisi datai ngelawa. Kami duai nyimpan sereta macha surat nya lebuh kami duai berasai lemi. Surat nya amat meransang kami duai.”

14. Nama chunto ke nunjukka muji orang bukai nya manah lebuh kitai meri jaku lalau ngagai sida?

¹⁴ Bisi sekali, rasul Paul patut meri jaku lalau ngagai orang Kristian ba Korint. Lebuh sida nitihka jaku lalau nya, Paul muji sida. (2 Kor. 7:8-11) Jaku iya tentu udah meransang sida terus ngereja utai ti ngena. Kemaya hari tu, bala tuai gempuru sereta apai indai ulih neladan Paul. Andreas ke bisi dua iku anak madahka: “Jaku peransang nulung bala anak semak enggau Petara sereta nyadi orang ke tegap ba pengarap. Enggau meri jaku peransang, apai indai meransang bala anak sida ngereja utai ti ngena sereta nitihka jaku lalau. Taja pan bala anak kitai nemu utai ti betul, tang jaku peransang ke seruran diberi kitai deka nulung sida ngereja utai ti ngena ba pengidup.”

15. Nama siti chara ke ulih dikena kitai meransang orang bukai?

¹⁵ Padah ngagai bala menyadi Kristian, nuan rinduka pengawa sida sereta kualiti manah ti dikembuan sida. (2 Ban. 16:9; Jop 1:8) Enti ngereja tu, kitai neladan  Jehovah enggau Jesus. Seduai iya rinduka semua pengawa ti dikereja kitai ke seduai iya, taja pan kitai enda ulih ngereja mayuh baka ke dikedekaka kitai. (Bacha Luke 21:1-4; 2 Korint 8:12.) Ngambika chunto, kitai nemu sida ke udah tuai bebendar datai begempuru sereta nurun nginjil enggau tetap. Kati kitai meransang sereta muji sida ke semua pengawa ti dikereja sida?

16. Ni maya kitai ulih meransang orang bukai?

¹⁶ Enti ulih, suah agi meransang orang bukai. Tiap kali nuan meda orang ngereja siti-siti pengawa enggau manah, anang enda muji iya. Lebuh Paul enggau Barnabas ba Antiok di menua Pisidia, bala pemesai ba balai gempuru mesanka seduai iya: “Menyadi, enti seduai bisi jaku peransang ke orang mayuh, kami minta seduai bejaku.” Paul ngena peluang nya meransang orang ke dia. (SKR. 13:13-16, 42-44) Enti kitai meransang orang bukai, orang mega deka meransang kitai.—Luk. 6:38.

17. Nama chara ti pemadu manah dikena muji orang bukai?

¹⁷ Nyemetak. Lebuh Jesus muji orang Kristian di Tiatira, iya nyebut enggau nyemetak sereta madahka pengawa ke udah dikereja sida enggau manah. (Bacha Pemandang 2:18, 19.) Baka ni kitai ulih neladan iya? Kitai engka ulih muji indai tunggal ke udah ngemesaika anak enggau manah taja pan nya enda senang ba iya. Tauka enti nuan nya apai tauka indai, nuan ulih muji bala anak nuan laban sida udah bebendar nyembah Jehovah. Padah ngagai sida utai manah ke udah diperatika nuan. Enti kitai nyemetak lebuh meransang orang bukai, sida deka nemu kitai enda pepura meransang sida.

18, 19. Baka ni kitai nulung pangan diri ngambika mengkang semak ngagai Jehovah?

¹⁸ Jehovah ngasuh Moses meransang sereta ngeringka Josua. Endang amat, kemaya hari tu Jehovah enda ngengerang bejaku enggau kitai sereta madah ngagai kitai bagi orang ke patut diperansang. Tang Iya lantang ati lebuh meda kitai bebendar meransang orang bukai. (J-lam. 19:17; Heb. 12:12) Ngambika chunto, enti bisi menyadi Kristian lelaki meri cheramah ba gempuru kitai, kitai ulih madah ngagai iya utai ti ngerinduka ati pasal cheramah iya. Utai ti disebut iya engka nulung kitai mutarka siti-siti penanggul tauka nulung kitai meretika siti-siti ayat ba Bup Kudus. Ku seiku menyadi Kristian indu nulis surat ngagai seiku menyadi Kristian lelaki ke udah meri cheramah: “Taja pan tua semina bejaku beberapa minit aja, tang nuan meda penusah ba ati aku, lalu nuan ngelantangka sereta meransang aku. Aku deka nuan nemu, lebuh nuan bejaku enggau chara ti penyiru, sekalika ba pentas tauka betungga mua, aku ngasaika jaku nuan nya pemeri ari Jehovah.”

¹⁹ Kitai ulih nulung pangan diri mengkang semak ngagai Jehovah enti kitai nitihka jaku lalau Paul: “Peransang sereta tulung sukung pangan diri, baka ke dikereja kita diatu.” (1 Tes. 5:11) Enti kitai terus ‘meransang pangan diri tiap hari,’ kitai ngelantangka ati Jehovah!