1, 2. Mukonda diahi kima kiambote kusuinisa akuetu?

CRISTINA, uala ni 18 dia mivu, uambe: “O jitata jami kene mu ngi ximana, maji a ngi bazela kiavulu. O izuelu iâ, i ngi bhekela ndolo iavulu. Ene a zuela kuila, ki ngala ni kilunji, ki nga-nda kuijiia kubhanga o ima, ni kuila, nga komo kinene. Mukonda dia kiki, ithangana ioso ngi dila. Ki ngi kala dingi ni vondadi ia kuzuela nau. Ngi divua kala ki ngala ni valolo.” ^[1] (Tala ku disukilu dia milongi.) Se akuetu a kamba ku tu ximana, tu divua kiaiibha!

² Maji xinganeka kiebhi ki tu tena kukuatekesa akuetu, kioso ki tua ximana. Rubén ua zuela: “Ku mivu iavulu, ngexile mu divua kala ki ngala ni valolo. Maji sai kizuua, ngai mu boka ni kafunga ka mono kuila, ki ngi kexile kiambote. Kioso ki nga mu jimbulula o maka, muéne ua ng’ivu ni henda ioso. Mu kusuluka, muéne ua ngi tangela o ima iambote i nga kexile mu bhanga. Muéne ua ngi lembalesa ué o izuelu ia Jezú, kioso kiambe kuila, etu tua beta-o-kota, o tu tudièdie ndenge. Ngi lembalala  o izuelu íii, ithangana ioso. Katé lelu, hanji i ngi kuatekesa. O izuelu ia kafunga, ia ngi kuatekesa kiavulu.”​—Matesu 10:31.

3. (a) Ihi ia zuela poxolo Phaulu ia lungu ni kusuinisa akuetu? (b) Ihi i tua-nda di longa mu milongi íii?

³ O Bibidia i tu tendelesa ku disuinisa mudietu ithangana ioso. Poxolo Phaulu ua sonekena o Jikidistá akua Hebeleu, uixi: “Enu phange jami, alukenu, sumba mudienu mu kala muthu ni muxima uaiibha ua kuxibhaka, u mu bhangesa [kúxia] Nzambi ia muenhu, n’a baluke. Di suinisienu-phe mudienu izuua ioso.” Phaulu ua jimbulula se mukonda diahi ene a tokalele kubhanga kiki, kioso kiambe: “Phala kana muthu a mu bhomba kuala o ituxi n’a kole muxima.” (Jihebeleu 3:12, 13) Xinganeka kiebhi ki ua divu, kioso kia ku suinisa. Mu kiki, mukonda diahi tua tokala kusuinisa o jiphange jetu? Ihi i tu longa o phangu ia Jihova, ia Jezú, ni ia Phaulu ia lungu ni kusuinisa akuetu? Kiebhi ki tu tena ku di suinisa mu dietu? Tua-nda tambuijila o ibhuidisu íii.

4. Nanhi ua bhingi ku mu ximana? Mukonda diahi athu avulu lelu, kene mu ximana akuâ?

⁴ Etu enioso tua bhingi ku tu suinisa. Benge benge o jitata, a tokala kusuinisa o tuana tuâ. Sai mesene, a mu ixana Timothy Evans, ua jimbulula kuila, o ana a “difu ni ithulu ia bhingi ku i tekela. Mu kiki, ene a bhingi kua suinisa.” Muéne uambe dingi: “Se a ximana o mona, muéne u divua kuma uala ni valolo.” Maji kuma tua tungu mu “izuua isukidila-ku,” athu avulu akuâ luímbi, ka moneka “henda” ia muthu. (2 Timote 3:1-5) Sai jitata, ka ximana o tuana tuâ, mukonda mu undenge uâ, o jitata jâ ka kexile kua ximana. O adiakimi a bhingi ué kua ximana, maji kene mua ximana kiavulu. Mu kifika, ene a zuela kuila, kene mu a ximana ku ikalakalu ia bhanga ku salu.

5. Kiebhi ki tu tena kusuinisa akuetu?

⁵ Tu tena kusuinisa akuetu, mu kua ximana mukonda dia kima kiambote kia bhange. Tu tena ue kusuinisa akuetu mu kua tangela kuila, ala ni idifua iambote, mba kua konda o malamba, kioso kia luuala. (1 Tesalonika 5:14) Kuma tuene mu kala ni jiphange jetu mu ithangana ioso, tuala ue ni kithangana kiavulu kia kua suinisa, mu kua tangela ima iambote. (Tanga Ndongixi 4:9, 10.) Mu kiki, dibhuidise: ‘O kuila, ngene mu londekesa kuila, ngi bhana valolo ku akuetu, ni kuila, nga a zolo? O kuila ngi sota kubhanga kiki mu ithangana ioso?’ Xinganeka mu izuelu iii ia Bibidia, iambe: ‘O kizuelu kiene mu touala bhu thembu iê!’​—Jisabhu 15:23.

6. Mukonda diahi Satanaji ua mesena kuluualesa o mundu ua Nzambi? Bhana phangu ilondekesa kiebhi kia fikisa kubhanga kiki.

⁶ O divulu dia Jisabhu 24:10, di zuela: “Bhu kizuua kia phaxi, se u beleketa, kuabhu, ni nguzu ié itola.” Satanaji uejiia kuila, se u tu bhangesa kuluuala, muene u tena kuzozesa o ukamba uetu ni Jihova. Muene ua fikisa kuluualesa Jobe, mu ku mu  bhangesa kutala hadi iavulu. Maji né muéne ni jindunge jiji ja iibha, Satanaji ka mu kuata. Jobe ua kolokota mu ufiiele uê kua Jihova. (Jobe 2:3; 22:3; 27:5) Etu ue tu tena kubhânga ni Satanaji, ni kubhanga ioso phala ku mu fidisa ku tu tolola. Se tu suluka ni kusuinisa o muiji uetu, ni jiphange jetu mu kilunga, tu tena ku di kuatekesa kuzediua ku muenhu, ni kukolokota mu ukamba uetu ni Jihova.

7, 8. (a) Kiebhi Jihova kiene mu suinisa o athu? (b) Kiebhi o jitata kia tena kukaiela o phangu ia Jihova? (Tala o foto ia dianga.)

⁷ Jihova u suinisa o athu. O mukua jisalamu ua soneka: “Jihova ua zukama kua iá a toloka mixima, u bhulula oso a talamana mu nzumbi.” (Jisálamu 34:18) Kioso o polofeta Jelemiia kia kexile ni uôma, anga u luuala, Jihova ua kanena ku mu kuatekesa. (Jelemiia 1:6-10) Jihova ua tumikisa anju phala kusuinisa polofeta Daniiele. O anju uambe kuila, Daniiele uexile ‘muthu ua kazola.’ (Daniiele 10:8, 11, 18, 19) O kuila eie u tena ue kusuinisa o jiphange, o aboki a thembu ioso, ni adiakimi kála dingi ni kutena kua kubhanga o ima ia kexile mu bhanga m’uluku?

⁸ Sumbala Jihova ni Jezú a tungile kia kumoxi mivu iavulu, né kiki, kioso Jezú kieza mu ixi, Jihova uejiidile kuila, ua bhingile hanji kusuinisa Mon’ê. Kioso kia mateka o kikalakalu kia kuboka, Jezú uevu Tat’ê kuzuela tundé ku diulu. Jihova ua zuela mu veji jiiadi, uixi: ‘Muenhú Mon’ami ua kazola, nga mu uabhela kiambote.’ (Matesu 3:17; 17:5) Sé phata, Jezú ua divu kiambote, kioso kievu Tat’ê kuzuela kuila ua mu zolele, ni kuila, ua sangulukile ni ima ia kexile mu bhanga. Ande dia kufua kuê, Jezú ua kexile ni hele iavulu. Jihova ua tumikisa anju, phala ku mu suinisa ni ku mu konda o malamba. (Luka 22:43) Enu mu jitata, mu tena kukaiela o phangu ia Jihova, mu kusuinisa o tuana tuenu, ithangana ioso. Se a bhanga kima kiambote, a ximanie-nu. Se a dibhana ni tendasá bhu xikola, bhange-nu ioso phala kua suinisa ni kua kuatekesa kukolokota.

9. Ihi i tu longa o phangu ia Jezú ia kudibhana ni maxibulu mê?

⁹ Jezú ua tu xila ue phangu iambote. Ande dia kufua, Jezú ua sukula o inama ia maxibulu mê, iú ua jimbuluila o valolo ia kulondekesa o kulenduka. Maji ene akexile ni ukumbu, anga a di kuata, mukonda akexile ni phata se nanhi uexile o dikota mudiâ. Phelete ua zuela kuila, muene keji xisa Jezú. (Luka 22:24, 33, 34) Maji Jezú ka thandanganhele ni ukexilu uâ ua xitu. Mu veji dia kiki, muene ua a ximana mukonda dia kukolokota mu ufiiele uâ kua muene. Muene ua a kanena kuila, eji bhanga ima ia dikota, o ia bhangele muene, ndenge. Muene ua a tangela ue kuila, Jihova ua a zolo kiavulu. (Luka 22:28; Nzuá 14:12; 16:27) Mu kiki, tua tokala ku dibhuidisa: ‘O kuila ngene mu kaiela o phangu ia Jezú, mu  kuximana o idifua iambote ia akuetu, mu veji dia kuthandanganha ni ima iaiibha ia bhanga?’

10, 11. Kiebhi Phaulu kia suinisa o jiphange jê, ni ihi ia mesenene kubhanga?

¹⁰ Ithangana ioso, poxolo Phaulu ua kexile mu ximana o jiphange jê. Ku mivu iavulu, muene uende ni jiphange javulu. Mu kiki, muene ua ejiidile kiambote. Maji muene ka soneka o ima iaiibha ia bhangele. Mu veji dia kiki, muene ua a ximana. Mu kifika, Phaulu ua zuela kuila, Timote uexile ‘mon’ê ua kazola, ua fiiele mua Ngana.’ Muene uejidile kuila, Timote ueji langa o ibhindamu ia akuâ. (1 Kolindo 4:17; Filipe 2:19, 20) Phaulu ua tangela o Jikidistá akua Kolindo: Tito, “mukalakadi ni mukuetu mu ku mi kuatekesa enu.” (2 Kolindo 8:23) Sé phata, kioso kievu o ima ia zuelele Phaulu, Timote ni Tito, a suina dingi!

¹¹ Phaulu, ni Barnabé, o mukalakadi ni mukuâ, a tele o mienhu iâ mu iluezu, phala kubhulula o jiphange jâ. Mu kifika, ene ejiidile kuila, athu avulu mu mbanza ia Listra, a mesenene kua jibha. Maji né kiki, ene a vutuka mu mbanza iii, phala kusuinisa o maxibulu a ubhe ni kua kuatekesa kukolokota mu ukamba uâ ni Jihova. (Ikalakalu 14:19-22) Mu kubhita thembu mu mbanza ia Efezu, o muenhu ua Phaulu ua kexile mu iluezu, mukonda dia mundu ua kexile ni njinda iavulu. Maji né kiki, muene ua bhiti dingi kithangana mu mbanza ienióio, phala kusuinisa o jiphange jê. O divulu dia Ikalakalu 20:1, 2, di zuela: “Phaulu u tuma kuixana o jixibulu, u a suinisa, hé u di lekela-nâ, anga u katuka kuia ku Masedonia. O kia zubha kubhita ku madiembu koko, ni ku a longesa maka mavulu, ua bhixila mu Ngelexa.”

12. Mukonda diahi kima kiambote kuia mu iônge?

¹² Jihova ua mesena o mbote ietu. Mukonda dia kiki, muene u tu tendelesa kudiongeka mu ithangana ioso. Mu iônge, tu di longa o kidi kia lungu ni muene, ni ku disuinisa mudietu. (1 Kolindo 14:31; tanga Jihebeleu 10:24, 25.) Cristina, u tua mu tange ku dimatekenu dia milongi iii, ua zuela: “Nga uabhela kiavulu kuia mu iônge, mukonda mu iônge, o jiphange a ngi londekesa o henda, a ngi suinisa. Sai ithangana, ki ngi bhixila bhu Kididi Kia Ubhezelu, ngi divua kiaiibha. Maji mu kubhita kithangana, ku moneka phange ia muhatu, u ngi bhabha, anga u zuela kuila, nga fuama. O jiphange a ngi tangela kuila, a ngi zolo, ni kuila, a sanguluka ni nguzu ioso i nga mu bhanga, phala kukala ni ukamba uambote ni Nzambi. Kioso kia ngi ximana, ngi divua kiambote!” Kima kiambote ku disuinisa mudietu!​—Loma 1:11, 12.

13. Mukonda diahi o jiphange jene mu sidivila kiá Jihova ku mivu iavulu, a bhingi ue kua suinisa?

¹³ Né muéne ió a sidivila kiá Jihova tundé ukulu, a bhingi ue kua suinisa. Xinganeka mu phangu ia Josuué. Kioso kia kexile polondo phala kubokona mu Ixi ia a Kanene, Jihova ua solo Josuué phala kuendesa akua Izalaiele. Sumbala Josuué ua kexile kiá mu sidivila Jihova ku mivu iavulu, maji né kiki, Jihova ua tumina Mozé ku mu suinisa. Jihova uambe: “Longesa-phe kiambote Josuué, mu suinise, mu kolokotese; mukonda muene ua-nda kutuamenena o mundu iú, ni ku u lunduisa oxi i ua-nda ku  kengelel’ii.” (Matendelelu 3:27, 28) Josuué ua bhingile ku mu suinisa, mukonda ku pholo, o kifuxi kia Izalaiele kieji luua ita ni jinguma javulu. Nange sai bhabha, eji kua tololola ku jinguma. (Josuué 7:1-9) Lelu, tu tena kusuinisa o tufunga mu kilunga, ni tufunga tua ilunga, a kalakala kiavulu, phala kulanga o mundu ua Nzambi. (Tanga 1 Tesalonika 5:12, 13.) Sai kafunga ka ilunga, uambe: “Sai jiphange, a tu sonekena phala ku tu sakidila ni ku tu tangela kuila, a uabhela kiavulu o kikalakalu ki tua bhange kioso ki tua kundu. Tuene mu bhaka o mikanda iii, phala ku i tanga mu ithangana i tu luuala. Iene i tu suinisa kiavulu.”

14. Phangu jebhi ji londekesa kuila, kima kiambote kuximana akuetu kioso ki tu a bhana itendelesu?

¹⁴ Sai kithangana, poxolo Phaulu ua bhana itendelesu ku jiphange mu mbanza ia Kolindo. Kioso kia kaiela o itendelesu ia a bhanene, Phaulu ua a ximana. (2 Kolindo 7:8-11) Sé phata, o izuelu ia Phaulu, ia a kuatekesa kubhanga o kima kia tokala. Lelu, o tufunga ni jitata, a tena kukaiela o phangu ia Phaulu. Andreas, uala ni an’a aiadi, uambe: “Kioso ki tu ximana o an’a, tua kuatekesa kukala ni ukamba uambote ni Nzambi. Tua kuatekesa ue kubelesela o itendelesu. Mu kifika, o an’etu ejiia kiá o ima iambote ni iaiibha. Maji kioso ki tua ximana mu ima iambote ia bhanga, ene a kala dingi ni vondadi ia kubhanga o ima iambote.”

15. Kiebhi ki tu tena kusuinisa akuetu?

¹⁵ Tangela o jiphange jê kuila, u bhana valolo ku nguzu iene mu bhanga, ni idifua iambote iene mu londekesa. (2 Malunda 16:9; Jobe 1:8) Se tu bhanga kiki, tua-nda kaiela o phangu ia Jihova ni ia Jezú. Ene a bhana valolo ku ima ioso i tu bhanga, né muéne se ki tu tena kubhanga o ima ioso i tua mesena kubhanga. (Tanga Luka 21:1-4; 2 Kolindo 8:12.) Mu kifika, tuejiia kuila, o adiakimi mu kilunga, a bhanga nguzu iavulu phala kuia mu iônge ni mu sidivisu ia kuboka. O kuila tu a suinisa ni kua ximana mu nguzu ioso ia bhanga?

16. Kithangana kiebhi ki tua tokala kusuinisa akuetu?

¹⁶ Sota kusuinisa akuenu mu ithangana ioso. Kioso ki u mona muthu ua bhange kima kiambote, mu ximane. Kioso Phaulu kiexile kumoxi ni Barnabé mu mbanza  ia Andiioka, mu Pizidia, o makota ma dilombe a ambela, exi: “Enu mu akuetu, athu se muambe ku a tela maka ma kulônga, kindala zuelenu.” Phaulu ua katula mbote mu ujitu ua mu bhana, mu ku suinisa o mundu. (Ikalakalu 13:13-16, 42-44) Se tu suinisa akuetu, o athu amukuá a-nda tu suinisa ue.​—Luka 6:38.

17. Kiebhi ki tua tokala kusuinisa akuetu?

¹⁷ Tumbula o kima kiambote ki u mona. Kioso Jezú kia ximana o Jikidistá akua Tiiatila, muene ua tumbula o ima iambote ia kexile mu bhanga. (Tanga Dijingunuinu 2:18, 19.) Kiebhi ki tu tena kukaiela o phangu iê? Nange tu tena kuximana mama ia mu bhanga nguzu iavulu, phala kusasa o tuana tuê ubheka, né muéne ni ibhidi ioso ia dibhana na-iu. Se u tata, u tena kuximana o tuana tuê, mu nguzu ia bhanga phala kusidivila Jihova. A tangele o ima iambote ia mu bhanga. Se tu tumbula o ima iambote ia mu bhanga akuetu, ene a-nda kuijiia kuila, tua mua ximana ni muxima uoso.

18, 19. Kiebhi ki tu tena ku dikuatekesa kuzukama dingi kua Jihova?

¹⁸ Jihova ua tumina Mozé kusuinisa Josuué. Mu kidi, Jihova ka-nda zuela n’etu lelu, phala ku tu tumina kusuinisa muthu. Maji kioso kia mona o nguzu i tu bhanga phala kusuinisa akuetu, muene u sanguluka. (Jisabhu 19:17; Jihebeleu 12:12) Mu kifika, se phange u bhanga diskursu mu kilunga kietu, tu tena ku mu tangela o ima i tua uabhela dingi mu diskursu diê. Nange o ima ia zuela ia tu kuatekesa kudibhana ni maka, mba kutendela kiambote kibatulu kia Bibidia. Sai phange ia muhatu, ua sonekena phange ia bhangele diskursu. Mu mukanda, muene uambe: “Sumbala tua zuela ngó bhofele, eie ua mono kuila, nga kexile mu bhita ni maka a dikota, eie ua ngi suinisa. Ejiia kuila, o henda i ua londekesa kioso ki ua zuela n’eme, ni kioso ki ua kexile mu bhanga o diskursu, ia ngi bhangesa ku divua kala, Jihova muene ua ngi bhana o ujitu ió.”

¹⁹ Se tu kaiela o kitendelesu kia Phaulu, tua-nda dikuatekesa kuzukama dingi kua Jihova. Muene uambe: “Di longese jingienu mudienu, ni kudikuatekesa, mu di sokejeke kumoxi, kala ki muene kubhanga jinga kiá katé kindala.” (1 Tesalonika 5:11) Se tu kolokota mu ku ‘disuinisa mudietu izuua ioso,’ tua-nda sangulukisa o muxima ua Jihova!