1, 2. Wetin mek i impɔtant fɔ ɛnkɔrej ɔda pipul dɛn?

WAN sista we nem Kristina, we ol 18 ia tɔk se: “I nɔ izi so nɔmɔ fɔ lɛ mi mama ɛn papa ɛnkɔrej mi, pas fɔ fɛn bɔku fɔlt pan mi. Ɛn di wɔd dɛn we dɛn kin tɛl mi kin mek a fil bad. Dɛn kin se a nɔ machɔ, a nɔ go ɛva lan, ɛn a bɔmp. Bɔku tɛm, a kin kray ɛn disayd nɔ fɔ tɔk to dɛn. A de fil se a nɔ impɔtant.” ^[1] (Luk di ɛndnot ɔnda di las paregraf.) Layf kin rili tranga we ɔda pipul dɛn nɔ de ɛnkɔrej wi!

² Bɔt mek wi tink bɔt aw wi go rili ɛp ɔda pipul dɛn we wi ɛnkɔrej dɛn. Wan brɔda we nem Rubɛn tɔk se: “Fɔ lɔng tɛm naw, a dɔn de tray nɔ fɔ de fil se a nɔ impɔtant. Bɔt wan tɛm, a bin de prich wit wan ɛlda we notis se a nɔ gladi. I bin rili lisin we a de tɛl am aw a de fil. Dɔn i mɛmba mi bɔt di gud tin dɛn we a de du. I mɛmba mi bak bɔt wetin Jizɔs bin tɔk we i se wi valyu pas dɛn smɔl smɔl bɔd dɛn we dɛn kɔl sparo. A kin de mɛmba da Skripchɔ de, ɛn i kin stil tɔch mi at. Di wɔd dɛn we di ɛlda bin tɔk bin mek a fil fayn.”—Matyu 10:​31.

3. (a) Wetin apɔsul Pɔl bin tɛl Kristian dɛn fɔ du? (b) Wetin wi go tɔk bɔt na dis atikul?

³ Di Baybul tɔk se wi nid fɔ de ɛnkɔrej wi wisɛf ɔltɛm. Apɔsul  Pɔl bin rayt to di Ibru Kristian dɛn se: “Mi brɔda dɛn, una tek tɛm so dat no wan pan una nɔ go ɛva gɛt wikɛd at we nɔ gɛt fet ɛn tɔn in bak pan Gɔd we gɛt layf we go de sote go; bɔt una kɔntinyu fɔ de ɛnkɔrej unasɛf ɛni de.” Pɔl bin ɛksplen wetin mek i tɔk so, we i se “so dat di pawa we sin gɛt fɔ ful pɔsin nɔ go mek ɛniwan pan una tranga-yes.” (Di Ibru Pipul Dɛn 3:​12, 13, NW) Tink bɔt aw yu bin fil fayn we sɔmbɔdi ɛnkɔrej yu. Us rizin dɛn wi gɛt fɔ ɛnkɔrej wi brɔda dɛn? Wetin wi kin lan frɔm di we aw Jiova, Jizɔs, ɛn Pɔl bin ɛnkɔrej ɔda pipul dɛn? Ɛn us we dɛn wi kin ɛnkɔrej wisɛf? Lɛ wi tɔk bɔt dɛn kwɛstyɔn dɛn ya.

4. Udat dɛn nid pɔsin fɔ ɛnkɔrej dɛn? Wetin mek bɔku pipul dɛn tide nɔ de ɛnkɔrej ɔda pipul dɛn?

⁴ Wi ɔl nid sɔmbɔdi fɔ ɛnkɔrej wi. Ɛn mama ɛn papa dɛn rili nid fɔ ɛnkɔrej dɛn pikin dɛn. Wan ticha we nem Timoti Ɛvans ɛksplen se pikin dɛn “nid pɔsin fɔ ɛnkɔrej dɛn lɛk we plant nid wata.” I tɔk bak se: “We wi ɛnkɔrej pikin, di pikin de no se i impɔtant to wi ɛn wi valyu am.” Bɔt bikɔs wi de “insay di las dez,” bɔku pipul dɛn de tink bɔt dɛnsɛf nɔmɔ ɛn dɛn nɔ “lɛk dɛn kɔmpin mɔtalman.” (Sɛkɛn Lɛta To Timoti 3:​1-5, NW) Sɔm mama ɛn papa dɛn nɔ de ɛnkɔrej dɛn pikin dɛn bikɔs dɛn yon mama ɛn papa nɔ bin ɛva ɛnkɔrej dɛn. Di wan dɛn sɛf we dɔn big nid pɔsin fɔ ɛnkɔrej dɛn, bɔt dis nɔ kin apin so nɔmɔ. Fɔ ɛgzampul, bɔku pipul dɛn de kɔmplen se dɛn nɔ de ɛva tɛl dɛn tɛnki fɔ di wok we dɛn de du.

5. Aw wi kin ɛnkɔrej ɔda pipul dɛn?

⁵ Wi kin ɛnkɔrej ɔda pipul dɛn we wi tɛl dɛn tɛnki fɔ sɔntin we dɛn du fayn. Wi kin ɛnkɔrej ɔda pipul dɛn bak we wi tɛl dɛn se dɛn gɛt gud kwaliti dɛn ɛn we wi kɔrej dɛn we dɛn at pwɛl. (Fɔs Lɛta Fɔ Tɛsalonayka 5:​14) Bikɔs plɛnti tɛm wi kin de wit wi brɔda ɛn sista dɛn, wi gɛt bɔku chans fɔ se sɔntin we go ɛnkɔrej dɛn. (Rid Ɛkliziastis 4:​9, 10.) So aks yusɛf: ‘A de mek ɔda pipul dɛn no wetin mek a lɛk dɛn ɛn valyu dɛn? Ɛn a kin du dis ɛnitɛm we a gɛt chans?’ Tink bɔt wetin di Baybul se: “Wɔd we dɛn tɔk di rayt tɛm kin rili fayn!”—Prɔvabs 15:​23, NW.

6. Wetin mek Setan want lɛ Gɔd in pipul dɛn at pwɛl? Gi wan ɛgzampul fɔ sho aw Setan bin tray fɔ du dat.

⁶ Prɔvabs 24:​10 (NW) se: “If yu at pwɛl di tɛm we yu gɛt prɔblɛm, yu nɔ go gɛt bɛtɛ trɛnk.” Setan no se if i mek wi at pwɛl, i kin mek wi padi biznɛs wit Jiova nɔ tayt igen. Setan bin tray fɔ mek Job in at pwɛl we i mek Job sɔfa bad bad wan. Bɔt Setan in wikɛd plan nɔ bin wok. Job nɔ bin kɔmɔt biɛn Jiova. (Job 2:​3; 22:​3; 27:​5) Wisɛf kin fɛt Setan ɛn mek shɔ se in plan nɔ wok. If wi kɔntinyu fɔ ɛnkɔrej wi famili ɛn wi brɔda ɛn sista dɛn na di kɔngrigeshɔn, wi go ɛp wisɛf ɛn ɔda pipul dɛn fɔ gɛt gladi at ɛn de nia Jiova.

7, 8. (a) Aw Jiova dɔn ɛnkɔrej pipul dɛn? (b) Aw mama ɛn papa dɛn go falamakata Jiova in ɛgzampul? (Luk di pikchɔ nia dis atikul in taytul.)

⁷ Jiova de ɛnkɔrej pipul dɛn. Wan pan di man dɛn we bin rayt di sam buk bin tɔk se: Jiova “de nia ɔl udat fil se i dɔn dɔn fɔ am ɛn de ɛp udat fil se bɛtɛ nɔ de fɔ am igen.” (Sam 34:​18) We prɔfɛt Jɛrimaya bin de fred ɛn in at bin pwɛl, Jiova bin prɔmis fɔ ɛp am. (Jɛrimaya 1:​6-10) Jiova bin sɛn enjɛl fɔ kɔrej Daniɛl we bin dɔn ol. Da enjɛl de bin kɔl am “man we [Gɔd] lɛk pasmak.” (Daniɛl 10:​8, 11, 18, 19) Yu go  ɛnkɔrej yu brɔda ɛn sista dɛn dis sem we, lɛk di wan dɛn we de payɔnia ɛn di wan dɛn we dɔn ol we nɔ ebul fɔ du mɔ igen lɛk trade?

⁸ Pan ɔl we i dɔn rili te we Jiova ɛn Jizɔs dɔn de togɛda, we Jizɔs bin de na di wɔl, Jiova no se i stil nid fɔ ɛnkɔrej in Pikin. Jizɔs bin yɛri we in Papa tɔk frɔm ɛvin di tɛm we i bigin in prichin wok ɛn insay di las ia we i bin de na di wɔl. Tu tɛm, Jiova bin tɔk se: “Dis na mi Pikin we a lɛk, a gladi fɔ am.” (Matyu 3:​17; 17:​5) We Jizɔs yɛri in Papa se i lɛk am ɛn gladi fɔ am, dat go dɔn rili ɛnkɔrej am. Leta, di nɛt bifo Jizɔs fɔ day, i bin de wɔri tumɔs. Jiova bin ɛnkɔrej am we i sɛn wan enjɛl fɔ kɔrej am. (Lyuk 22:​43) Mama ɛn papa dɛn, una go falamakata Jiova we una de ɛnkɔrej una pikin dɛn ɔltɛm. Tɛl dɛn tɛnki we dɛn du sɔntin fayn. Ɛn we dɛn gɛt prɔblɛm na skul, una du ɔl wetin una ebul fɔ ɛp dɛn fɔ bia ɛn tinap tranga wan.

9. Wetin wi kin lan frɔm di we aw Jizɔs bin trit in apɔsul dɛn?

⁹ Jizɔs insɛf sɛt fayn ɛgzampul fɔ wi fɔ falamakata. Di nɛt bifo Jizɔs fɔ day, i was in apɔsul dɛn fut ɛn tɛl dɛn wetin mek i impɔtant fɔ lɛ dɛn put dɛnsɛf dɔŋ. Bɔt dɛn bin prawd ɛn dɛn agyu bɔt uswan pan dɛn na di edman, ɛn Pita bost se i nɔ go ɛva lɛf Jizɔs. (Lyuk 22:​24, 33, 34) Bɔt Jizɔs nɔ bin pe atɛnshɔn pan di mistek we dɛn bin de mek. Bifo dat, i prez dɛn fɔ we dɛn nɔ kɔmɔt biɛn am. I prɔmis dɛn se dɛn go du mɔ pas wetin i bin du, ɛn i mek lɛ dɛn no se Jiova lɛk dɛn. (Lyuk 22:​28; Jɔn 14:​12; 16:​27) Wi kin aks wisɛf dis kwɛstyɔn, ‘A de falamakata Jizɔs in ɛgzampul bay we a de tɛl ɔda pipul dɛn tɛnki fɔ di fayn kwaliti dɛn we dɛn gɛt ɛn nɔ pe atɛnshɔn pan dɛn mistek dɛn?’

10, 11. Aw Pɔl bin ɛnkɔrej in brɔda dɛn? Wetin i bin rɛdi fɔ du?

¹⁰ Apɔsul Pɔl bin de tɔk gud bɔt in brɔda dɛn. I dɔn spɛn bɔku tɛm de travul wit sɔm pan dɛn ɛn i dɔn kam fɔ rili no dɛn, bɔt i nɔ rayt bɔt dɛn mistek. Bifo dat, i prez dɛn. Fɔ ɛgzampul, Pɔl bin se Timoti na “mi pikin . . . a lɛk am bad; i de du wetin di Masta tɛl am fɔ du.” Ɛn Pɔl bin gɛt kɔnfidɛns se Timoti go kia fɔ ɔda pipul dɛn. (Fɔs Lɛta Fɔ Kɔrint 4:​17; Lɛta Fɔ Filipay 2:​19, 20) Pɔl bin tɛl di Kristian dɛn na Kɔrint se “na mi ɛn Taytɔs de wok, i de wok wit mi fɔ ɛp una.” (Sɛkɛn Lɛta Fɔ Kɔrint 8:​23) Wetin Pɔl se bɔt Timoti ɛn Taytɔs go dɔn ɛnkɔrej dɛn we dɛn kam fɔ no wetin Pɔl tɔk bɔt dɛn!

¹¹ Pɔl ɛn Banabas bin put dɛn layf pan denja fɔ ɛnkɔrej dɛn brɔda dɛn. Fɔ ɛgzampul, dɛn bin no se bɔku pipul dɛn na di siti na Listra bin want fɔ kil dɛn. Bɔt stil, dɛn go de bak fɔ ɛnkɔrej di nyu disaypul dɛn ɛn ɛp dɛn fɔ kɔntinyu fɔ du wetin Jiova want. (Di Apɔsul Dɛn Wok [Akt] 14:​19-22) Leta, na Ɛfisɔs, Pɔl in layf bin de pan denja bikɔs bɔku pipul dɛn we nɔ bin lɛk am ɛn we bin vɛks bad bad wan bin de de, bɔt i bin tek lɔng tɛm na Ɛfisɔs fɔ ɛnkɔrej in brɔda dɛn. Di Apɔsul Dɛn Wok [Akt] 20:​1, 2 tɔk se: “Pɔl kɔl di Kristiɛn dɛn wan ples fɔ kɔrej dɛn ɛn tɛl dɛn se in de go. I lɛf dɛn go Masidonia. I go ɔlsay na Masidonia de tɔk plɛnti fɔ kɔrej di Kristiɛn dɛn, dɔn i go Gris.”

12. Wetin mek i fayn fɔ lɛ wi de go mitin?

¹² Jiova want wetin bɛst fɔ wi. Na dat mek i tɛl wi fɔ de kam togɛda ɔltɛm. Na wi mitin dɛn, wi kin lan bɔt am ɛn ɛnkɔrej wisɛf. (Fɔs Lɛta Fɔ Kɔrint 14:​31; rid Di Ibru Pipul Dɛn 10:​24, 25.) Kristina we wi  bin tɔk bɔt we wi stat di atikul tɔk se: “Wetin a lɛk mɔ bɔt di mitin na dat; dɛn de sho lɔv to mi ɛn ɛnkɔrej mi. Sɔntɛnde mi at kin pwɛl we a rich na Kiŋdɔm Ɔl. Bɔt sista dɛn kin kam mit mi, ɔg mi, ɛn tɛl mi se a luk gud. Dɛn tɛl mi se dɛn lɛk mi ɛn dɛn gladi we a de go bifo pan Gɔd biznɛs. A fil fayn we dɛn ɛnkɔrej mi!” I rili impɔtant fɔ lɛ wi ɔl de ɛnkɔrej ɔda pipul dɛn!—Lɛta Fɔ Rom 1:​11, 12.

13. Wetin mek ivin di wan dɛn we dɔn sav Jiova fɔ lɔng tɛm nid pɔsin fɔ ɛnkɔrej dɛn?

¹³ Ivin di wan dɛn we dɔn sav Jiova fɔ lɔng tɛm nid pɔsin fɔ ɛnkɔrej dɛn. Tink bɔt Jɔshwa. We di Izrɛlayt dɛn bin want fɔ go na di land we Gɔd bin dɔn prɔmis dɛn, Jiova bin pik Jɔshwa fɔ de bifo dɛn. Bɔt Jiova bin tɛl Mozis fɔ ɛnkɔrej Jɔshwa pan ɔl we i bin dɔn sav Jiova fɔ lɔng tɛm. Jiova bin tɛl am se: “Jɔshwa go gɛt fɔ lid dɛn go krɔs Riva Jɔdan kapchɔ di land dɛn we in go si . . . tɛl Jɔshwa di tin dɛn we go mek i gɛt maynd fɔ ebul kɛr di pipul dɛn go.” (Ditarɔnɔmi 3:​27, 28) Jɔshwa bin nid pɔsin fɔ ɛnkɔrej am, bikɔs leta dɛn gɛt fɔ fɛt bɔku wɔ dɛn, ɛn ivin lɔs wan. (Jɔshwa 7:​1-9) Tide, wi kin ɛnkɔrej di ɛlda dɛn ɛn sakit ovasia dɛn, we de wok tranga wan fɔ kia fɔ Gɔd in pipul dɛn. (Rid Fɔs Lɛta Fɔ Tɛsalonayka 5:​12, 13.) Wan sakit ovasia bin se: “Sɔntɛnde, di brɔda dɛn kin rayt lɛta ɛn gi wi fɔ tɛl wi tɛnki ɛn mek wi no se dɛn gladi we wi kam to dɛn. Wi kin kip dɛn lɛta dɛn ya ɛn rid am we wi at pwɛl. Dɛn kin rili ɛnkɔrej wi.”

14. Us ɛgzampul sho se i fayn fɔ tɛl ɔda pipul dɛn tɛnki we wi de gi dɛn advays?

¹⁴ Wan tɛm, apɔsul Pɔl bin gi advays to di Kristian dɛn na Kɔrint. We dɛn fala di advays, Pɔl tɛl dɛn tɛnki. (Sɛkɛn Lɛta Fɔ Kɔrint 7:​8-11) Fɔ tru, di wɔd dɛn we i bin tɔk bin ɛnkɔrej dɛn fɔ kɔntinyu fɔ du wetin rayt. Tide, mama ɛn papa dɛn ɛn di ɛlda dɛn kin falamakata Pɔl in ɛgzampul. Wan brɔda we nem Andris, we gɛt tu pikin dɛn tɔk se: “We yu ɛnkɔrej pikin dɛn i de ɛp dɛn fɔ go bifo pan Gɔd biznɛs. Dɛn go tek yu advays we yu ɛnkɔrej dɛn. Pan ɔl we wi pikin dɛn no wetin rayt, di ɛnkɔrej we wi de ɛnkɔrej dɛn ɔltɛm, dɔn mek dɛn lɛk fɔ du wetin rayt.”

15. Wetin na wan we we wi kin ɛnkɔrej ɔda pipul dɛn?

¹⁵ Tɛl yu brɔda ɛn sista dɛn aw yu rili lɛk dɛn fɔ dɛn gud kwaliti dɛn ɛn di tray we dɛn de tray. (Sɛkɛn Kronikul 16:​9; Job 1:​8) We wi du dis, wi de falamakata Jiova ɛn Jizɔs. Dɛn kin gladi fɔ ɛnitin we wi du fɔ dɛn, ilɛksɛf wi nɔ ebul fɔ du mɔ lɛk a wi go want fɔ du. (Rid Lyuk 21:​1-4; Sɛkɛn Lɛta Fɔ Kɔrint 8:​12.) Fɔ ɛgzampul, wi no se i nɔ kin izi fɔ di wan dɛn we dɔn ol fɔ kam mitin ɛn go prich  ɔltɛm. Wi de ɛnkɔrej dɛn ɛn tɛl dɛn tɛnki fɔ ɔl wetin dɛn de du?

16. Ustɛm wi fɔ ɛnkɔrej ɔda pipul dɛn?

¹⁶ Ɛnkɔrej ɔda pipul dɛn ɛnitɛm we wi gɛt chans. Ɛnitɛm we yu notis pɔsin du sɔntin fayn, tɛl am tɛnki. We Pɔl ɛn Banabas bin de na Antiɔk insay Pisidia, di wan dɛn we bin de bifo na di Ju mitin os bin tɛl dɛn se: “Wi brɔda dɛn, wi want mek una tɔk to di pipul dɛn if una gɛt ɛni wɔd fɔ kɔrej dɛn.” Pɔl bin yuz da chans de fɔ ɛnkɔrej di pipul dɛn. (Di Apɔsul Dɛn Wok [Akt] 13:​13-16, 42-44) We wi ɛnkɔrej ɔda pipul dɛn, pipul dɛn go mɔs ɛnkɔrej wi bak.—Lyuk 6:​38.

17. Wetin na di bɛst we fɔ tɛl ɔda pipul dɛn tɛnki?

¹⁷ Tɛl dɛn di patikyula rizin we mek yu de tɛl dɛn tɛnki. We Jizɔs bin de prez di Kristian dɛn na Tayatira, i bin ɛksplen to dɛn di patikyula tin we dɛn dɔn du fayn we mek i de prez dɛn. (Rid Rɛvɛleshɔn 2:​18, 19.) Aw wi go falamakata am? Sɔm mama dɛn de we na dɛn wangren de mɛn dɛn pikin dɛn bikɔs dɛn man nɔ de wit dɛn igen. Wi kin tɛl dɛn tɛnki fɔ di we aw dɛn de mɛn dɛn pikin dɛn pan ɔl we i nɔ izi fɔ dɛn. Ɔ if yu na mama ɔ papa, yu kin tɛl yu pikin dɛn tɛnki fɔ di tray we dɛn de tray fɔ sav Jiova. Ɛksplen to dɛn di gud tin dɛn we yu dɔn notis. If wi tɛl ɔda pipul dɛn di patikyula rizin we mek wi de ɛnkɔrej dɛn, dat go mek dɛn no se wi rili min wetin wi de se.

18, 19. Aw wi go ɛp wisɛf fɔ de nia Jiova?

¹⁸ Jiova bin tɛl Mozis fɔ ɛnkɔrej Jɔshwa fɔ tinap tranga wan. Na tru se Jiova nɔ go tɔk to wi tide ɛn tɛl wi fɔ ɛnkɔrej wan patikyula pɔsin. Bɔt i kin gladi we i si se wi de tray fɔ ɛnkɔrej ɔda pipul dɛn. (Prɔvabs 19:​17; Di Ibru Pipul Dɛn 12:​12) Fɔ ɛgzampul, we wan brɔda gi pɔblic tɔk na di kɔngrigeshɔn, wi kin tɛl am wetin wi ɛnjɔy pan in tɔk we i gi. Sɔntɛm, wetin i se ɛp wi fɔ bia wit wan prɔblɛm ɔ ɛp wi fɔ ɔndastand wan patikyula skripchɔ. Wan sista bin rayt to wan brɔda we bin gi tɔk. Insay di lɛta i rayt se: “Pan ɔl we wi tɔk fɔ smɔl tɛm, yu bin si aw mi at bin pwɛl, ɛn yu bin ɛnkɔrej mi ɛn mek a gladi. A want mek yu no se we yu tɔk fayn ɔp di platfɔm ɛn we yu kam dɔŋ, a si am se na gift frɔm Jiova.”

¹⁹ Wi go ebul fɔ ɛp wisɛf fɔ de nia Jiova if wi fala Pɔl in advays we se: “Una fɔ stil de kɔrej ɛn ɛp una kɔmpin Kristiɛn dɛn, lɛkɛ aw una de du naw.” (Fɔs Lɛta Fɔ Tɛsalonayka 5:​11) If wi ‘de kɔrej wisɛf ɔltɛm,’ wi go mek Jiova rili gladi!