၁, ၂. တၢ်ဟ့ၣ်ဂံၢ်ဟ့ၣ်ဘါပှၤဂၤန့ၣ် ဘၣ်မနုၤအဃိ မ့ၢ်တၢ်လၢ အရ့ဒိၣ်လဲၣ်.

ခရံၣ်စတံနၤ လၢအအိၣ် ၁၈ နံၣ်တဂၤ စံးဝဲဒ်အံၤ– “ယမိဒီးယပါန့ၣ် တပတြၢၤယၤကြီကြီဘၣ်, အဝဲသ့ၣ်တဲဆါယၤထီဘိလီၤ. ဒီးတၢ်ကတိၤလၢအဝဲသ့ၣ်တဲဝဲန့ၣ် ဘၣ်ဒိယသးဒိၣ်မး, အဝဲသ့ၣ်တဲဝဲလၢ ယတကျၢတခီဘၣ် ဒီးယဘီၣ်အုၣ်လီၤ. လၢတၢ်န့ၣ်အဃိ ယဘၣ်ဟီၣ်ထီဘိဒီး ယတအဲၣ်ဒိးတဲတၢ်ဒီးအဝဲသ့ၣ်ဘၣ်. ယတူၢ်ဘၣ်လၢ ယမ့ၢ်ပှၤလၢ အလုၢ်အပှ့ၤတအိၣ်ဘၣ် ဒီးယတူၢ်ဘၣ်လၢ ပှၤတအဲၣ်ယၤနီတဂၤဘၣ်.” ^[၁] (ကွၢ်တၢ်ဂ့ၢ်လၢ တၢ်မၤလိအကတၢၢ်တက့ၢ်.) လၢပတၢ်အိၣ်မူအပူၤ ပမ့ၢ်တဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါလၢ ပှၤဂၤအအိၣ်ဘၣ်န့ၣ် ပတသူၣ်ဖှံသးညီဘၣ်.

^၂ ဆိကမိၣ်ကွၢ်လၢ ပမ့ၢ်ဟ့ၣ်ဂံၢ်ဟ့ၣ်ဘါပှၤအဂၤန့ၣ် အဘျုးကအိၣ်လၢ အဝဲသ့ၣ်အဂီၢ် ထဲလဲၣ်န့ၣ်တက့ၢ်. ရူဘဲၤစံးဝဲ– “ယတူၢ်ဘၣ်လၢ ယမ့ၢ်ပှၤလၢ အတကျၢတခီဒီး အလုၢ်အပှ့ၤတအိၣ်ဘၣ် ဖးယံာ်ညါ. ဘၣ်ဆၣ် ဘၣ်တဘျီ ဖဲယလဲၤစံၣ်တဲၤတဲလီၤတၢ်ဒီး တၢ်အိၣ်ဖှိၣ်သးပှၢ်တဂၤအခါ အဝဲပလီၢ်ဘၣ်အသးလၢ ယသးတမုာ်ဘၣ်လီၤ. ဖဲယတဲဘၣ်အီၤ ယတၢ်တူၢ်ဘၣ်အခါ အဝဲဒိကနၣ်ဝဲလၢ တၢ်သူၣ်အိၣ်သးအိၣ်အပူၤလီၤ. အဝဲဒုးသ့ၣ်နီၣ်ထီၣ်က့ၤယၤ တၢ်မၤဂ့ၤလၢ ယမၤတဖၣ်လီၤ. တကးဒံးဘၣ် အဝဲတဲနီၣ်ထီၣ်ယၤ ယ့ၣ်ၡူးအတၢ်ကတိၤလၢ—ပလုၢ်ပပှ့ၤအိၣ်ဒိၣ်န့ၢ်ဒံး ထိၣ်ဖှံးဖိအါဘ့ၣ်န့ၣ်လီၤ. ယက့ၤဆိကမိၣ်က့ၤ လံာ်စီဆှံတဆၢအံၤ ခဲအံၤခဲအံၤဒီး ဖဲယဖးအီၤတဘျီလၢ်လၢ်န့ၣ် ယဒိးန့ၢ်ဘၣ်တၢ်သူၣ်မံသးမုာ်ဒိၣ်မးလီၤ. တၢ်အိၣ်ဖှိၣ်သးပှၢ်အတၢ်ကတိၤအံၤ ဟ့ၣ်ဂံၢ်ဟ့ၣ်ဘါယၤဒိၣ်မးလီၤ.”—မးသဲ ၁၀:၃၁.

၃. (က) ဘၣ်ဃးဒီး တၢ်ဟ့ၣ်ဂံၢ်ဟ့ၣ်ဘါ ပှၤဂၤန့ၣ် တၢ်မၢဖိပီလူးတဲဝဲဒ်လဲၣ်. (ခ) လၢတၢ်မၤလိအံၤအပူၤ ပကတဲသကိးတၢ်ဂ့ၢ်မနုၤလဲၣ်?

 ^၃ လံာ်စီဆှံတဲဝဲလၢ ပဘၣ်ဟ့ၣ်သဆၣ်ထီၣ်လိာ်ပသး ကဒဲကဒဲထီဘိလီၤ. တၢ်မၢဖိပီလူး ကွဲးန့ၢ်ဝဲ ပှၤဧ့ၤဘြံၤဖိတဖၣ်အလံာ်လၢ– “ဒီပုၢ်ဝဲၢ်သ့ၣ်ဧၢ, ပလီၢ်သုသးတက့ၢ်. ဒ်သိးသးဒ့ဒီအအၢအသီသုတအိၣ်လၢ သုဝဲတဂၤဂၤအပူၤ, လၢသုကဟးထီၣ်ကွံာ်လၢ ယွၤလၢအမူဝဲအပူၤတဂ့ၤ. မ့မ့ၢ်သဆၣ်ထီၣ်လိာ်သုခံကိးမုၢ်နံၤ” တက့ၢ်. ဒီးဘၣ်မနုၤအဃိ ဘၣ်မၤဝဲဒ်န့ၣ်လဲၣ်န့ၣ် စီၤပီလူးတဲနၢ်ပၢၢ်စ့ၢ်ကီးအဝဲသ့ၣ်လီၤ. အဝဲတဲဝဲလၢ– “ဒ်သိးသုသးသုတကိၤလၢ တၢ်ဒဲးဘး အတၢ်လီတၢ်ဝ့ၤအဃိနီတဂၤတဂ့ၤ” အဂီၢ်လီၤ. (ဧ့ၤဘြံၤ ၃:၁၂, ၁၃) ဆိကမိၣ်ကွၢ် ဖဲပှၤဟ့ၣ်ဂံၢ်ဟ့ၣ်ဘါနၤအခါ နန့ၢ်ဂံၢ်န့ၢ်ဘါထဲလဲၣ်န့ၣ်တက့ၢ်. ဘၣ်မနုၤအဃိ ပဘၣ်ဟ့ၣ်သဆၣ်ထီၣ် ပဒီပုၢ်ဝဲၢ်တဖၣ်လဲၣ်. ဒ်ယဟိဝၤယွၤ, ယ့ၣ်ၡူးဒီး စီၤပီလူး ဟ့ၣ်ဂံၢ်ဟ့ၣ်ဘါပှၤဂၤအသိး ပကွၢ်လိမၤဒိးအဝဲသ့ၣ်ကသ့ဒ်လဲၣ်. ဒီးပဟ့ၣ်ဂံၢ်ဟ့ၣ်ဘါ ပှၤဂၤသ့လၢကျဲဒ်လဲၣ်. ပကကွၢ်သကိးတၢ်သံကွၢ် သၢဖျၢၣ်အံၤလီၤ.

၄. မတၤတဖၣ်လိၣ်ဘၣ် တၢ်ဟ့ၣ်ဂံၢ်ဟ့ၣ်ဘါလဲၣ်. ဘၣ်မနုၤအဃိ ပှၤအါဂၤ တဟ့ၣ်ဂံၢ်ဟ့ၣ်ဘါလိာ်အသးလဲၣ်.

^၄ ပဝဲကိးဂၤဒဲး ပလိၣ်ဘၣ်တၢ်ဟ့ၣ်ဂံၢ်ဟ့ၣ်ဘါလီၤ. လီၤဆီဒၣ်တၢ် မိၢ်ပၢ်သ့ၣ်တဖၣ်န့ၣ် ကြၢးဟ့ၣ်ဂံၢ်ဟ့ၣ်ဘါဝဲ အဖိတဖၣ်လီၤ. သရၣ် တံၤမသ့း အံဘဲ တဲဝဲလၢဖိသၣ်တဖၣ် “လိၣ်ဘၣ်ဝဲတၢ်ဟ့ၣ်ဂံၢ်ဟ့ၣ်ဘါ ဒ်သ့ၣ်ထူၣ်လိၣ်ဘၣ်ဝဲထံအသိးန့ၣ်လီၤ.” ဒီးအဝဲတဲစ့ၢ်ကီးဝဲလၢ– “နမ့ၢ်ဟ့ၣ်ဂံၢ်ဟ့ၣ်ဘါ ဖိသၣ်သ့ၣ်တဖၣ်န့ၣ် အဝဲသ့ၣ်ကတူၢ်ဘၣ်ဝဲလၢ နအဲၣ်အီၤဒီး ပာ်လုၢ်ပာ်ပှ့ၤအီၤလီၤ.” ဘၣ်ဆၣ်မ့ၢ်လၢ ပအိၣ်မူဘၣ်လၢ “မုၢ်နံၤအခံကတၢၢ်” အဃိပှၤအါဂၤ အဲၣ်လီၤထဲဒၣ်အသးဒီး ပှၤတအဲၣ်ဘၣ်အဘူးအတံၢ်” အါအါလၢၤဘၣ်. (၂ တံၤမသ့း ၃:၁-၅) မိၢ်ပၢ်တနီၤနီၤန့ၣ် မ့ၢ်လၢအဝဲသ့ၣ် အမိၢ်အပၢ် တပတြၢၤအဝဲသ့ၣ် နီတဘျီဘၣ်အဃိ အဝဲသ့ၣ်စ့ၢ်ကီး တပတြၢၤအဖိတဖၣ်ဘၣ်. ပှၤသးပှၢ်သ့ၣ်တဖၣ်စ့ၢ်ကီး လိၣ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါလီၤ. ဘၣ်ဆၣ် အဝဲသ့ၣ် တဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါကြီကြီဘၣ်. အဒိ ပှၤအါဂၤကဒူးကဒ့ၣ်ဝဲလၢ အဝဲသ့ၣ်အတၢ်မၤလီၢ်န့ၣ် ပှၤတပတြၢၤအဝဲသ့ၣ်နီတဘျီဘၣ်.

၅. ပဟ့ၣ်ဂံၢ်ဟ့ၣ်ဘါ ပှၤဂၤသ့လၢကျဲဒ်လဲၣ်.

^၅ ပဟ့ၣ်ဂံၢ်ဟ့ၣ်ဘါပှၤဂၤသ့ခီဖျိ ပပတြၢၤအဝဲသ့ၣ် ဘၣ်ဃးဒီးတၢ်လၢ အဝဲသ့ၣ်မၤဝဲတဖၣ်လီၤ. တကးဒံးဘၣ် ပဟ့ၣ်ဂံၢ်ဟ့ၣ်ဘါပှၤဂၤသ့ခီဖျိ ပပတြၢၤအဝဲသ့ၣ် အတၢ်ဂ့ၤတၢ်ဝါဒီး ဖဲအသးဆံး ဒီးအသူၣ်အုးသးအုးအခါ ပမၤမုာ်ထီၣ်အဝဲသ့ၣ်အသးလီၤ. (၁ သ့းစၤလနံ ၅:၁၄) မ့ၢ်လၢပအိၣ်ဘူးဒီး ပဒီပုၢ်ဝဲၢ်သ့ၣ်တဖၣ်ထီဘိအဃိ တၢ်ခွဲးတၢ်ယာ်လၢ ပကဟ့ၣ်ဂံၢ်ဟ့ၣ်ဘါအဝဲသ့ၣ်အဂီၢ် အိၣ်ဝဲအါမးလီၤ. (ဖး စံၣ်တဲၤတဲလီၤတၢ် ၄:၉, ၁၀ တက့ၢ်.) လၢတၢ်န့ၣ်အဃိ သံကွၢ်လီၤနသးလၢ– ‘မ့ၢ်ယပာ်ဖျါထီၣ်လၢ ဘၣ်မနုၤအဃိ ယပာ်လုၢ်ပာ်ပှ့ၤဒီး အဲၣ်ပှၤဂၤလဲၣ်န့ၣ်ဧါ. ဒီးဖဲတၢ်ခွဲးတၢ်ယာ်အိၣ်အခါ မ့ၢ်ယဂုာ်ကျဲးစၢးပာ်ဖျါထီၣ်ဧါ.’ သ့ၣ်နီၣ်ထီၣ်လၢ လံာ်စီဆှံတဲဝဲ– “တၢ်ကတိၤတထံၣ်လၢ ပှၤကတိၤဝဲဖဲ အဆၢအကတီၢ်ဒၣ်ဝဲန့ၣ် ဂ့ၤဆံးဒိၣ်လဲၣ်.”—ကတိၤဒိ ၁၅:၂၃.

၆. ဘၣ်မနုၤအဃိ မုၣ်ကီၢ်လံၢ်အဲၣ်ဒိးမၤလီၤစၢ် ယွၤအခ့အပှၤတဖၣ်အသးလဲၣ်, ဒီးအဝဲမၤဝဲလၢကျဲဒ်လဲၣ်န့ၣ် ဟ့ၣ်တၢ်အဒိတက့ၢ်.

^၆ ကတိၤဒိ ၂၄:၁၀ စံးဝဲလၢ– “နသးမ့ၢ်လီၤဘှါ လၢတၢ်နးတၢ်ဖှီၣ်အမုၢ်တနံၤန့ၣ်ဒီး နဂံၢ်နဘါမ့ၢ်အဆံးလီၤ.” မုၣ်ကီၤလံၢ်သ့ၣ်ညါဝဲလၢ အဝဲမ့ၢ်မၤလီၤစၢ်ပသးအဂံၢ်ဘါန့ၣ် ပတၢ်ရ့လိာ်သးဒီးယဟိဝၤယွၤကဘၣ်ဒိဝဲလီၤ. အဝဲဂုာ်ကျဲးစၢးမၤလီၤစၢ် စီၤယိၤဘးအသး ခီဖျိမၤဆူးမၤဆါအီၤ နးနးကလဲာ်လီၤ. ဘၣ်ဆၣ်မုၣ်ကီၤလံၢ် အတၢ်ကူၣ်အၢန့ၣ် တကဲထီၣ်လိၣ်ထီၣ်ဘၣ်. စီၤယိၤဘးဆဲးသးတီဒီးယွၤလီၤ. (ယိၤဘး၂:၃; ၂၂:၃; ၂၇:၅) ပဝဲစ့ၢ်ကီး ပက့ၤဒုးနၢၤ မုၣ်ကီၤလံၢ်သ့ဝဲလီၤ. ပမ့ၢ်ဆဲးဟ့ၣ်ဂံၢ်ဟ့ၣ်ဘါ ပဟံၣ်ဖိဃီဖိ ဒီးပဒီပုၢ်ဝဲၢ်လၢတၢ်အိၣ်ဖှိၣ်ပူၤန့ၣ် မ့ၢ်ဒၣ်ပမၤစၢၤလိာ်ပသး ဒ်သိးပကအိၣ်ဒီး တၢ်သူၣ်ခုသးခု ဒီးတကးဒံးဘၣ် ပကအိၣ်ဒီး တၢ်ရ့လိာ်သးဒီးယဟိဝၤယွၤ ဘူးဘူးတံၢ်တံၢ်န့ၣ်လီၤ.

၇, ၈. (က) ယဟိဝၤယွၤ ဟ့ၣ်ဂံၢ်ဟ့ၣ်ဘါ ပှၤဂၤဒ်လဲၣ်. (ခ) မိၢ်ပၢ်သ့ၣ်တဖၣ် ကွၢ်လိမၤဒိးယဟိဝၤယွၤကသ့ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)

^၇ ယဟိဝၤယွၤ ဟ့ၣ်ဂံၢ်ဟ့ၣ်ဘါ ပှၤဟီၣ်ခိၣ်ဖိလီၤ. ပှၤကွဲးထါစံးထီၣ်ပတြၢၤတဂၤတဲဝဲ “ယွၤအိၣ်ဘူးဒီးပှၤလၢ အသူၣ်ကၢ်အသးလီၤဒီး မၤပူၤဖျဲးပှၤလၢ အတၢ်မုၢ်လၢ်လီၤမၢ်ကွံာ် ခဲလၢာ်သ့ၣ်တဖၣ်န့ၣ်လီၤ.” (စံးထီၣ်ပတြၢၤ ၃၄:၁၈, ခ့ခါစှီၤကျိာ်) ဖဲဝံယံးရမံယၤ ပျံၤတၢ်ဒီး အသးလီၤစၢ်အခါ ယဟိဝၤယွၤအၢၣ်လီၤအီၤလၢ ကမၤစၢၤအီၤလီၤ. (ယံးရမံယၤ ၁:၆-၁၀) ယဟိဝၤယွၤ ဆှၢလီၤဝဲမူခိၣ်ကလူး ဒ်သိးကဟ့ၣ်ဆူၣ်ထီၣ် ဝံဒၤနံးယ့လးအဂံၢ်ဘါလီၤ. ဒီးမူခိၣ်ကလူးကိးဝဲ ဝံဒၤနံးယ့လးလၢ “ပှၤလၢအဘၣ်တၢ်အဲၣ်အီၤတဂၤ” လီၤ. (ဒၤနံးယ့လး ၁၀:၈, ၁၁, ၁၈, ၁၉) မ့ၢ်နဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ် တဖၣ်, ပှၤလဲၤလၢညါဒီး ပှၤသးပှၢ်လၢ အမၤတကဲအါအါလၢၤဘၣ် တဖၣ်ကသ့ဧါ.

^၈ ယ့ၣ်ၡူးအိၣ်တ့ၢ် ဒီးအပၢ်ယဟိဝၤယွၤ အနံၣ်ဖးယံာ်လံဘၣ်ဆၣ် ဖဲအအိၣ်လၢဟီၣ်ခိၣ်အခါ ယဟိဝၤယွၤသ့ၣ်ညါဝဲလၢ အလိၣ်ဘၣ်တၢ်ဟ့ၣ်ဂံၢ်ဟ့ၣ်ဘါန့ၣ်လီၤ. ဖဲယ့ၣ်ၡူး စးထီၣ်ဝဲ အတၢ်စံၣ်တဲၤတဲလီၤတၢ်မၤ ဒီးဖဲအတၢ်အိၣ်မူလၢ ဟီၣ်ခိၣ်အလီၢ်ခံကတၢၢ် တနံၣ်အတီၢ်ပူၤန့ၣ် အဝဲနၢ်ဟူဝဲ အပၢ်အကလုၢ်သီၣ်ထီၣ်လၢ မူခိၣ်န့ၣ်လီၤ. ယဟိဝၤယွၤတဲတၢ်ခံဘျီလၢ– “အဝဲတဂၤအံၤ မ့ၢ်ယဖိခွါလၢယအဲၣ်, ဒီးဘၣ်ယသးလၢအီၤလီၤ.” (မးသဲ ၃:၁၇; ၁၇:၅) ပသ့ၣ်ညါဘၣ်လၢ ဖဲယ့ၣ်ၡူးနၢ်ဟူဘၣ် အပၢ်တဲအီၤလၢ အအဲၣ်အီၤဒီး ဘၣ်သူၣ်ဘၣ်သးအီၤအခါ ယ့ၣ်ၡူးအဂံၢ်အဘါကထီၣ်ဝဲလီၤ. လၢခံ ဖဲယ့ၣ်ၡူးအတၢ်အိၣ်မူလၢဟီၣ်ခိၣ် အလီၢ်ခံကတၢၢ်တနၤန့ၣ်, အဝဲအသူၣ်ကိၢ်သးဂီၤတၢ်ဒိၣ်မးလီၤ. ဖဲန့ၣ်အခါ ယဟိဝၤယွၤ ဟ့ၣ်ဂံၢ်ဟ့ၣ်ဘါအီၤခီဖျိ ဆှၢလီၤဝဲမူခိၣ်ကလူးဒီး မၤမုာ်ထီၣ်က့ၤအသးလီၤ. (လူၤကၣ် ၂၂:၄၃) မိၢ်ပၢ်သ့ၣ်တဖၣ် ကွၢ်လိမၤဒိးယဟိဝၤယွၤသ့ခီဖျိ ဟ့ၣ်ဂံၢ်ဟ့ၣ်ဘါအဖိတဖၣ်ထီဘိန့ၣ်လီၤ. ဖဲအဝဲသ့ၣ်မၤတၢ်ဂ့ၤတမံၤမံၤအခါ ပတြၢၤအီၤတက့ၢ်. ဒီးဖဲအဝဲသ့ၣ်ထံၣ်ဘၣ် တၢ်မၤကွၢ်လၢကၠိအခါ ဂုာ်ကျဲးစၢးဟ့ၣ်ဂံၢ်ဟ့ၣ်ဘါအီၤ ဒီးမၤစၢၤအီၤ ဒ်သိးကမၤနၢၤ တၢ်မၤကွၢ်တဖၣ်အဂီၢ်တက့ၢ်.

၉. ပဟံးန့ၢ်တၢ်မၤလိလၢ ယ့ၣ်ၡူးအတၢ်ပာ်သူၣ်ပာ်သးလၢ အပျဲၢ်အဘီၣ်တဖၣ်အဖီခိၣ်သ့ဒ်လဲၣ်

^၉ ယ့ၣ်ၡူးစ့ၢ်ကီး ပာ်လီၤဝဲ တၢ်ဒိဂ့ၤတဲာ်ဘၣ်လၢ ပဂီၢ်လီၤ. ဖဲတချုးအဝဲသံဒံးဘၣ်အနၤန့ၣ် အဝဲသ့ဝဲအတၢ်မၢဖိတဖၣ်အခီၣ် ဒီးတဲနၢ်ပၢၢ်အဝဲသ့ၣ်လၢ တၢ်ဆီၣ်လီၤသးန့ၣ် မ့ၢ်တၢ်လၢအရ့ဒိၣ်ထဲလဲၣ်န့ၣ်လီၤ. အဝဲသ့ၣ်အိၣ်ဒီးတၢ်ပာ်ထီၣ်ထီသးဒီး တဲအါလိာ်အသးလၢ မတၤတဂၤ ကကဲအဒိၣ်ကတၢၢ်လဲၣ်. ဒီးစီၤပ့းတရူးစ့ၢ်ကီး တဲဝဲလၢ အဝဲတပာ်တ့ၢ်ယ့ၣ်ၡူးနီတဘျီဘၣ်. (လူၤကၣ် ၂၂:၂၄, ၃၃, ၃၄) ဘၣ်ဆၣ် ယ့ၣ်ၡူးတကွၢ်အဝဲသ့ၣ် အတၢ်လီၤတူာ်လီၤကာ်ဘၣ်. လၢတၢ်န့ၣ်အလီၢ် အဝဲပတြၢၤဝဲ အတၢ်မၢဖိတဖၣ်လၢ တီဒီးအီၤအဃိလီၤ. ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ အဝဲသ့ၣ်ကမၤတၢ်ဒိၣ်န့ၢ်အီၤဒီး တဲဘၣ်အဝဲသ့ၣ်လၢ ယဟိဝၤယွၤအဲၣ်အဝဲသ့ၣ်လီၤ. (လူၤကၣ် ၂၂:၂၈; ယိၤဟၣ် ၁၄:၁၂; ၁၆:၂၇) သံကွၢ်လီၤနသးလၢ ‘မ့ၢ်ယကွၢ်လိမၤဒိး ယ့ၣ်ၡူးဒီး ပတြၢၤပှၤဂၤ အတၢ်ဂ့ၤတၢ်ဝါဒီး ကွၢ်ကပာ်ကွံာ်အဝဲသ့ၣ် အတၢ်လီၤတူာ်လီၤကာ်န့ၣ်ဧါ.’

၁၀, ၁၁. စီၤပီလူးဟ့ၣ်ဂံၢ်ဟ့ၣ်ဘါ အဒီပုၢ်ဝဲၢ်တဖၣ်ဒ်လဲၣ်, ဒီးအဝဲသးအိၣ် မၤဝဲတၢ်မနုၤလဲၣ်.

^၁၀ တၢ်မၢဖိပီလူး စံးပတြၢၤဝဲဒီပုၢ်ဝဲၢ်တဖၣ်လီၤ. အဝဲမၤသကိးဘၣ်တၢ်ဒီး ဒီပုၢ်ဝဲၢ်တနီၤအါနံၣ်အါလါအဃိ သ့ၣ်ညါဘၣ်ဝဲ အဝဲသ့ၣ်အဂ့ၢ်ဂ့ၤဂ့ၤလီၤ. ဘၣ်ဆၣ် အဝဲတကွဲးဖျါထီၣ်ဝဲ ဒီပုၢ်ဝဲၢ်တဖၣ် အတၢ်လီၤတူာ်လီၤကာ်ဘၣ်. လၢတၢ်န့ၣ်အလီၢ် စီၤပီလူးပတြၢၤ အဝဲသ့ၣ်လီၤ. အဒိ စီၤပီလူးတဲဝဲလၢ စီၤတံၤမသ့းမ့ၢ် “ယဖိသးဘိအကလုၢ်တီလၢ ကစၢ်အပူၤတဂၤ” ဒီးအဝဲနာ်ဝဲလၢ စီၤတံၤမသ့း ကသးအိၣ်မၤစၢၤ ပှၤဂၤလီၤ. (၁ ကရံၣ်သူး ၄:၁၇; ဖံလံးပံၤ ၂:၁၉, ၂၀) စီၤပီလူးတဲဘၣ် ပှၤခရံာ်ဖိတဖၣ်လၢ ကရံၣ်သူးလၢ စီၤတံတူးန့ၣ် “မ့ၢ်ယဂိၤမီၣ်လၢ အမၤဃုာ်တၢ်ဒီးယၤ လၢတၢ်ဘၣ်ဃးဒီးသုလီၤ.” (၂ ကရံၣ်သူး ၈: ၂၃) ပနာ်သ့သပှၢ်ကတၢၢ်လၢ ဖဲစီၤတံၤမသ့း ဒီးစီၤတံတူးနၢ်ဟူဘၣ်ဝဲ စီၤပီလူးပတြၢၤအဝဲသ့ၣ်အခါ အဂံၢ်အဘါကဆူၣ်ထီၣ်ဝဲလီၤ.

^၁၁ စီၤပီလူးဒီးအသကိး စီၤဘၢ်နါဘၤ ဟ့ၣ်လီၤအသးလၢာ်လၢာ်ဆ့ဆ့ ဒ်သိးကဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်တဖၣ်လီၤ. အဒိ အဝဲသ့ၣ်ခံဂၤလၢာ် သ့ၣ်ညါဝဲလၢ ပှၤအါဂၤလၢအအိၣ်လၢ ဝ့ၢ်လူစတြၤန့ၣ် အဲၣ်ဒိးမၤသံအဝဲသ့ၣ်လီၤ. ဘၣ်ဆၣ်အဝဲသ့ၣ် က့ၤကဒါဝဲဒ်သိး ကဟ့ၣ်ဂံၢ်ဟ့ၣ်ဘါ ပှၤအသီတဖၣ်ဒီး မၤစၢၤအဝဲသ့ၣ် ဒ်သိးကတီဒီးယဟိဝၤယွၤ တုၤအကတၢၢ်န့ၣ်လီၤ. (မၤတၢ် ၁၄:၁၉-၂၂) လၢခံ လၢဝ့ၢ်အ့းဖ့းစူးအပူၤန့ၣ် ပှၤကမျၢၢ်တဖၣ် သးပှံၢ်ထီၣ်စီၤပီလူးအဃိ တၢ်ဘၣ်ယိၣ်အိၣ်လၢ အဂီၢ်လီၤ. ဘၣ်ဆၣ်အဝဲအိၣ်ဝဲတုၤ အဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်တဖၣ်ဝံၤဝဲတစုလီၤ. မၤတၢ် ၂၀:၁, ၂ စံးဝဲလၢ– “ဒီးတၢ်တၢထီၣ်တၢလီၤ အိၣ်ဘှီၣ်ကလာ်အလီၢ်ခံဒီး, စီၤပီလူးကိးက့ၤ အပျဲၢ်အဘီၣ်ဒီးကတိၤဒိၣ်အီၤ, ဒီးသဆၣ်ထီၣ်အခံဝံၤဒီး, ဟးထီၣ်ကွံာ်ဒ်သိး အကလဲၤဆူမၤက့းဒနံလီၤ. ဒီးလဲၤခီဂာ်ထံဧိၤကီၢ်ဧိၤ, ဒီးသဆၣ်ထီၣ်ပှၤအခံလၢ တၢ်ကတိၤအါဝံၤဒီး, ဟဲဝဲဆူကီၢ် ဟ့းလ့ၣ်လီၤ.”

၁၂. တၢ်လဲၤထီၣ်တၢ်အိၣ်ဖှိၣ်ရိဖှိၣ်န့ၣ် ဘၣ်မနုၤအဃိ ကဲဘျုးကဲဖှိၣ်လၢပဂီၢ်လဲၣ်.

^၁၂ ယဟိဝၤယွၤအဲၣ်ဒိးလၢ ပကဒိးန့ၢ်ဘၣ်တၢ်လၢ အဂ့ၤကတၢၢ်န့ၣ်လီၤ. လၢတၢ်န့ၣ်အဃိ အဝဲအဲၣ်ဒိးလၢ ပကထံၣ်လိာ်ပသးကိးနွံဒဲးလီၤ. လၢတၢ်အိၣ်ဖှိၣ်ရိဖှိၣ်န့ၣ် ပမၤလိဘၣ်အဂ့ၢ် ဒီးပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤလီၤ. (၁ ကရံၣ်သူး ၁၄:၃၁; ဖး ဧ့ၤဘြံၤ ၁၀:၂၄, ၂၅ တက့ၢ်.) ခရံၣ်စတံနၤ လၢဘၣ်တၢ်ပာ်ဖျါ အဂ့ၢ်လၢ ထးတဂၤတဲဝဲ– “တၢ်လၢယဘၣ်သူၣ်ဘၣ်သးအဒိၣ်ကတၢၢ် လၢတၢ်အိၣ်ဖှိၣ်ရိဖှိၣ်န့ၣ် မ့ၢ်ဝဲတၢ်အဲၣ် ဒီးတၢ်ဟ့ၣ်ဂံၢ်ဟ့ၣ်ဘါလၢ ယဒိးန့ၢ်ဘၣ်န့ၣ်လီၤ. တဘျီတခီၣ် ဖဲယဟဲတုၤလၢ ဘီမုၢ်ဘျီၣ်ဒိၣ်အခါ ယတူၢ်ဘၣ်လၢယသးအုးလီၤ. ဘၣ်ဆၣ်ဒီပုၢ်ဝဲၢ်မုၣ်တဖၣ် ဟဲဆူယအိၣ်ဒီး ဖိးဟုယၤဒီး တဲဝဲလၢယလီၤအဲၣ်လီၤ. အဝဲသ့ၣ်တဲယၤလၢ အအဲၣ်ယၤဒီး ထံၣ်ဘၣ်လၢ ယလဲၤထီၣ်လဲၤထီလၢ နီၢ်သးတခီအဃိ အသးခုဒိၣ်မးလီၤ. အဝဲသ့ၣ်အတၢ်ဟ့ၣ်ဂံၢ်ဟ့ၣ်ဘါန့ၣ် မၤမုာ်ထီၣ်ယသးဒိၣ်မး.” တၢ်ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ.—ရိမ့ၤ ၁:၁၁, ၁၂.

၁၃. ပှၤလၢအမၤယွၤအတၢ်မၤလၢ အနံၣ်ဖးယံာ်လံတဖၣ်ဒၣ်လဲာ် ဘၣ်မနုၤအဃိ လိၣ်ဘၣ်တၢ်ဟ့ၣ်ဂံၢ်ဟ့ၣ်ဘါလဲၣ်.

^၁၃ ပှၤလၢ အမၤယဟိဝၤယွၤအတၢ်မၤ အနံၣ်ယံာ်အလါအါတဖၣ်ဒၣ်လဲာ် အဝဲသ့ၣ်လိၣ်ဘၣ် တၢ်ဟ့ၣ်ဂံၢ်ဟ့ၣ်ဘါလီၤ. ဆိကမိၣ်ကွၢ် စီၤယိၤၡူအဂ့ၢ်တက့ၢ်. ဖဲပှၤအံၣ်စရ့လးဖိတဖၣ်ကလဲၤနုာ်လီၤဆူ ကီၢ်တၢ်စံးပာ်အခါန့ၣ် ယဟိဝၤယွၤ ဃုထၢဝဲစီၤယိၤၡူလၢ ကတီခိၣ်ရိၤမဲအဝဲသ့ၣ်လီၤ. စီၤယိၤၡူမ့ၢ်ပှၤလၢ မၤယွၤအတၢ်မၤ အနံၣ်ယံာ်တ့ၢ်လံဘၣ်ဆၣ် ယဟိဝၤယွၤမၢစီၤမိၤၡ့ ဟ့ၣ်ဂံၢ်ဟ့ၣ်ဘါအီၤလီၤ. ယဟိဝၤယွၤတဲဝဲ– “မၤလိာ်စီၤယိၤၡူ, ဒီးဒုးဆူၣ်ထီၣ်အဂံၢ်အဘါ, ဒီးဒုးတံးထီၣ်အတဟီၣ်တက့ၢ်. အဂ့ၢ်ဒ်အံၤ, အဝဲဒၣ်န့ၣ်ကခီဂာ်တၢ်လၢ ပှၤဂီၢ်မုၢ်အံၤအမဲာ်ညါ, ဒီးကဒုးမၤန့ၢ်အီၤလၢ ထံဧိၤကီၢ်ဧိၤလၢ သုကထံၣ်ဘၣ်လီၤ.” (၅ မိၤၡ့ ၃:၂၇, ၂၈) စီၤယိၤၡူလိၣ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါ မ့ၢ်လၢတယံာ်ဘၣ်ဒီး အဝဲကဘၣ်ဒုးတၢ်အါမး တကးဒံးဘၣ် တမ့ၢ်လၢအဝဲသ့ၣ် ကမၤနၢၤတၢ်ကိးဘျီဒဲးဘၣ်အဃိလီၤ. (ယိၤၡူ ၇:၁-၉) မုၢ်မဆါတနံၤအံၤ ပဝဲသ့ၣ်တဖၣ်စ့ၢ်ကီး ပကြၢးဟ့ၣ်ဂံၢ်ဟ့ၣ်ဘါ တၢ်အိၣ်ဖှိၣ်သးပှၢ်ဒီး ကဝီၤအပှၤကွၢ်တၢ်တဖၣ်လီၤ. မ့ၢ်လၢအဝဲသ့ၣ်န့ၣ် ဂုာ်ကျဲးစၢးမၤတၢ်ဆူၣ်ဆူၣ်လၢ ကကွၢ်ထွဲယွၤအခ့အပှၤတဖၣ်အဃိလီၤ. (ဖး ၁ သ့းစၤလနံ ၅:၁၂, ၁၃ တက့ၢ်.) ကဝီၤအပှၤကွၢ်တၢ်တဂၤတဲဝဲ– “တဘျီတခီၣ် ဒီပုၢ်ဝဲၢ်သ့ၣ်တဖၣ် ကွဲးစံးဘျုးစံးဖှိၣ်ပှၤ ဒီးတဲဝဲလၢ ဖဲပဟဲဟးအိၣ်သကိးအဝဲသ့ၣ်အခါန့ၣ် အဝဲသ့ၣ်န့ၢ်ဂံၢ်န့ၢ်ဘါဒိၣ်မးလီၤ. ပပာ်ဃာ်လံာ်ပရၢ သ့ၣ်တဖၣ်အံၤ ဒီးဖဲပသးလီၤစၢ်အခါ ပဖးက့ၤလံာ်တဖၣ်အံၤလီၤ. လံာ်သ့ၣ်တဖၣ်အံၤမ့ၢ်ဝဲ တၢ်ဟ့ၣ်ဂံၢ်ဟ့ၣ်ဘါလၢ ပဂီၢ်လီၤ.”

၁၄. ဖဲပဟ့ၣ်ကူၣ်ပှၤဂၤအခါ ပမ့ၢ်ပတြၢၤအဝဲသ့ၣ်န့ၣ် ကဲဘျုးဒ်လဲၣ် ဟ့ၣ်အဒိတက့ၢ်.

^၁၄ ဘၣ်တဘျီ တၢ်မၢဖိပီလူး ဟ့ၣ်ကူၣ်ဝဲ ပှၤကရံၣ်သူးဖိတဖၣ်လီၤ. ဒီးဖဲအဝဲသ့ၣ်မၤထွဲဝဲ တၢ်ဟ့ၣ်ကူၣ်အခါ စီၤပီလူးပတြၢၤအဝဲသ့ၣ်လီၤ. (၂ ကရံၣ်သူး ၇:၈-၁၁) ပနာ်လၢ အဝဲအတၢ်ကတိၤတဖၣ်န့ၣ် ကဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်တဖၣ်လၢ ကဆဲးမၤတၢ်လၢအဘၣ်အဂီၢ်လီၤ. မုၢ်မဆါတနံၤအံၤ မိၢ်ပၢ်ဒီးတၢ်အိၣ်ဖှိၣ်သးပှၢ်တဖၣ် ကွၢ်လိမၤဒိး စီၤပီလူးအဒိအတဲာ်သ့ဝဲလီၤ. အဲတြံၤယၤ လၢအိၣ်ဒီးအဖိခံဂၤ တဲဝဲ– “တၢ်ဟ့ၣ်ဂံၢ်ဟ့ၣ်ဘါန့ၣ် မၤစၢၤဖိသၣ်တဖၣ်လၢ ကဒိၣ်ထီၣ်ထီထီၣ်လၢ နီၢ်သးတကးဒံးဘၣ် ကအိၣ်ဒီးတၢ်သူၣ်ခုသးခုအဂီၢ်လီၤ. နမ့ၢ်ဟ့ၣ်ဂံၢ်ဟ့ၣ်ဘါအဝဲသ့ၣ်န့ၣ် ဖဲနသိၣ်အီၤအခါ အဝဲသ့ၣ်ကဒိကနၣ်နၤလီၤ. တၢ်အဘၣ်မ့ၢ်မနုၤလဲၣ်န့ၣ် ပဖိသ့ၣ်တဖၣ်သ့ၣ်ညါဝဲ ဘၣ်ဆၣ် ပမ့ၢ်ဟ့ၣ်ဂံၢ်ဟ့ၣ်ဘါ အဝဲသ့ၣ်ထီဘိန့ၣ် လၢအတၢ်အိၣ်မူအပူၤ ကအဲၣ်ဒိးမၤဝဲ တၢ်လၢအဘၣ်လီၤ.”

၁၅. ကျဲတဘိလၢ ပဟ့ၣ်ဂံၢ်ဟ့ၣ်ဘါပှၤဂၤသ့န့ၣ် မ့ၢ်မနုၤလဲၣ်.

^၁၅ နပာ်လုၢ်ပာ်ပှ့ၤ နဒီပုၢ်ဝဲၢ်တဖၣ် အတၢ်ထဲးဂံၢ်ထဲးဘါဒီး အတၢ်ဂ့ၤတၢ်ဝါတဖၣ်ထဲလဲၣ်န့ၣ် တဲဘၣ်အဝဲသ့ၣ်တက့ၢ်. (၂ ကွဲးနီၣ်တၢ် ၁၆:၉; ယိၤဘး ၁:၈) ပမ့ၢ်မၤဒ်န့ၣ်န့ၣ် မ့ၢ်ဒၣ်ပကွၢ်လိမၤဒိး ယဟိဝၤယွၤဒီးယ့ၣ်ၡူးလီၤ. ပမၤစၢၤအါမ့ၢ်ဂ့ၤ, စှၤမ့ၢ်ဂ့ၤ ယဟိဝၤယွၤဒီး ယ့ၣ်ၡူး ပာ်လုၢ်ပာ်ပှ့ၤဝဲတၢ်လၢ ပမၤန့ၢ်အီၤခဲလၢာ် လီၤ. (ဖး လူၤကၣ် ၂၁:၁-၄; ၂ ကရံၣ်သူး ၈:၁၂ တက့ၢ်.) အဒိ ပသ့ၣ်ညါလၢ ပဒီပုၢ်ဝဲၢ်လၢ အသးပှၢ်တဖၣ်န့ၣ် ကဟဲတုၤလၢ တၢ်အိၣ်ဖှိၣ်ရိဖှိၣ်ဒီး ကလဲၤစံၣ်တဲၤတဲလီၤတၢ်ထီဘိအဂီၢ် အဝဲသ့ၣ်ကဘၣ်ထဲးဂံၢ်ထဲးဘါဝဲ သပှၢ်ကတၢၢ်လီၤ. မ့ၢ်ပဟ့ၣ်ဂံၢ်ဟ့ၣ်ဘါဒီး ပတြၢၤအဝဲသ့ၣ်စ့ၢ်ကီးဧါ.

၁၆. ပဟ့ၣ်ဂံၢ်ဟ့ၣ်ဘါ ပှၤဂၤသ့အခါဖဲလဲၣ်.

^၁၆ မ့ၢ်သ့န့ၣ် ဂုာ်ကျဲးစၢးဟ့ၣ်ဂံၢ်ဟ့ၣ်ဘါ အဝဲသ့ၣ်ထီဘိတက့ၢ်. ဖဲနထံၣ်ပှၤတဂၤ မၤတၢ်တမံၤမံၤ ဂ့ၤဂ့ၤဘၣ်ဘၣ်အခါ ပတြၢၤအဝဲသ့ၣ်တက့ၢ်. ဖဲစီၤပီလူးဒီး စီၤဘၢ်နါဘၤအိၣ်လၢ ဝ့ၢ်အၣ်တံၤအီာ် လၢအဘၣ်ဃးဒီး ကီၢ်ပံၤစံၤဒံအခါ ပှၤဘူၣ်ဘျီၣ်အခိၣ်တဖၣ် စံးဘၣ်အဝဲသ့ၣ်လၢ– “ပှၤပုၢ်သ့ၣ်ဝဲၢ်သ့ၣ်ဧၢ, တၢ်ကတိၤသဆၣ်ထီၣ် ပှၤဂီၢ်မုၢ်အခံမ့ၢ်အိၣ်ဒီးသုဒီး, ကတိၤတၢ်တက့ၢ်.” စီၤပီလူးသူဝဲ တၢ်ခွဲးတၢ်ယာ်အံၤလၢ ကဟ့ၣ်ဂံၢ်ဟ့ၣ်ဘါပှၤဂၤလီၤ. (မၤတၢ် ၁၃:၁၃-၁၆, ၄၂-၄၄) ဖဲပဟ့ၣ်ဂံၢ်ဟ့ၣ်ဘါပှၤဂၤအခါ ပှၤဂၤစ့ၢ်ကီး ကအဲၣ်ဒိးဟ့ၣ်ဂံၢ်ဟ့ၣ်ဘါက့ၤပှၤလီၤ.—လူၤကၣ် ၆:၃၈.

၁၇. ကျဲအဂ့ၤကတၢၢ်တဘိလၢ ပကဟ့ၣ်ဂံၢ်ဟ့ၣ်ဘါပှၤဂၤန့ၣ် မ့ၢ်မနုၤလဲၣ်.

^၁၇ ပတြၢၤအီၤတၢ်လၢ အဝဲမၤဝဲတမံၤမံၤတက့ၢ်. ဖဲယ့ၣ်ၡူးပတြၢၤခရံာ်ဖိလၢ ဝ့ၢ်သူၤအတံရၤတဖၣ်အခါ, အဝဲတဲဖျါထီၣ်ဝဲလီၤတံၢ်လီၤဆဲးဒီး တဲပၠးဝဲတၢ်လၢအဝဲသ့ၣ်မၤတဖၣ်လီၤ. (ဖး လီၣ်ဖျါ ၂:၁၈, ၁၉ တက့ၢ်.) ပကွၢ်လိမၤဒိးအီၤသ့လၢကျဲဒ်လဲၣ်. ဘၣ်သ့ၣ်သ့ၣ် ပကပတြၢၤမုၣ်ကမဲတဂၤ မ့ၢ်လၢအဝဲဘၣ်လုၢ်ဒိၣ်ထီၣ်အဖိ လၢတၢ်ကီတၢ်ခဲအပူၤန့ၣ်လီၤ. နမ့မ့ၢ်ဘၣ်ဖုးမိၢ်ပၢ်န့ၣ် နပတြၢၤနဖိသ့ၣ်တဖၣ်လၢ အဝဲသ့ၣ်အတၢ်ထဲးဂံၢ်ထဲးဘါလၢ ကမၤယဟိဝၤယွၤအတၢ်မၤအဃိ သ့ဝဲလီၤ. ဖဲနပတြၢၤအီၤအခါ ယၢၤထီၣ်တၢ်လၢအဝဲသ့ၣ်မၤဝဲ ဂ့ၤဂ့ၤဘၣ်ဘၣ်တမံၤမံၤတက့ၢ်. ဖဲပဟ့ၣ်ဂံၢ်ဟ့ၣ်ဘါအဝဲသ့ၣ်အခါ ပမ့ၢ်တဲဖျါထီၣ်တၢ်ဂ့ၢ် လီၤတံၢ်လီၤဆဲးဒ်န့ၣ်န့ၣ် အဝဲသ့ၣ်ကသ့ၣ်ညါဝဲလၢ တၢ်လၢပတဲအီၤတဖၣ်န့ၣ် မ့ၢ်တၢ်လၢ အဟဲထီၣ်လၢ ပသးပူၤနီၢ်နီၢ်လီၤ.

၁၈, ၁၉. ဒ်သိးပဝဲခဲလၢာ် သုတယံၤထီၣ်ဒီး ယဟိဝၤယွၤတဂ့ၤအဂီၢ် ပမၤစၢၤလိာ်ပသးကသ့ဒ်လဲၣ်.

^၁၈ ယဟိဝၤယွၤ မၢစီၤမိၤၡ့ ဟ့ၣ်ဂံၢ်ဟ့ၣ်ဘါစီၤယိၤၡူလီၤ. ဘၣ်ဆၣ်မုၢ်မဆါတနံၤအံၤ ယဟိဝၤယွၤ တတဲပှၤလၢ ပကဘၣ်လဲၤဟ့ၣ်ဂံၢ်ဟ့ၣ်ဘါ မတၤမတၤလဲၣ်န့ၣ်ဘၣ်. ဘၣ်ဆၣ် ဖဲအဝဲထံၣ်ဘၣ်ဝဲလၢ ပဂုာ်ကျဲးစၢးဟ့ၣ်ဂံၢ်ဟ့ၣ်ဘါပှၤဂၤအခါ အသးမုာ်ဒိၣ်မးလီၤ. (ကတိၤဒိ ၁၉:၁၇; ဧ့ၤဘြံၤ ၁၂:၁၂) အဒိ လၢတၢ်အိၣ်ဖှိၣ်ပူၤန့ၣ် ဖဲဒီပုၢ်ဝဲၢ်တဂၤ ဟ့ၣ်တၢ်စံၣ်တဲၤတဲလီၤအခါ ပတဲဘၣ်အီၤလၢ ပကနၣ်အတၢ်စံၣ်တဲၤတဲလီၤ မုာ်ဒိၣ်မးသ့ဝဲန့ၣ်လီၤ. ဘၣ်သ့ၣ်သ့ၣ် နကတဲဘၣ်အီၤလၢ တၢ်လၢအဝဲ တဲဝဲန့ၣ်မၤစၢၤနၤ ဒ်သိးနလဲၤခီဖျိ တၢ်ကီတၢ်ခဲကန့ၢ်အဂီၢ် မ့တမ့ၢ် မၤစၢၤနၤလၢ နကနၢ်ပၢၢ်ထီၣ် လံာ်စီဆှံတဆၢအံၤ အခီပညီလီၤ. ဒီပုၢ်ဝဲၢ်မုၣ်တဂၤ ကွဲးဝဲလံာ်လၢ ဒီပုၢ်ဝဲၢ်လၢ အဟ့ၣ်တၢ်စံၣ်တဲၤတဲလီၤတၢ်တဂၤ အအိၣ်ဒ်အံၤလီၤ. “ပတဲသကိးဘၣ်တၢ် ထဲတစိၢ်ဖိသနာ်က့ နသ့ၣ်ညါယတၢ်တူၢ်ဘၣ်ဒီး နဟ့ၣ်ဂံၢ်ဟ့ၣ်ဘါဒီး မၤဆူၣ်ထီၣ်ယသးလီၤ. ယအဲၣ်ဒိးလၢနသ့ၣ်ညါလၢ ဖဲနကတိၤတၢ်ဒီးယၤအခါမ့ၢ်ဂ့ၤ ဖဲနဟ့ၣ်တၢ်စံၣ်တဲၤတဲလီၤအခါမ့ၢ်ဂ့ၤ နတၢ်ကတိၤန့ၣ်ပှဲၤဝဲဒီး တၢ်အဲၣ်တၢ်ကွံလီၤ. ယတူၢ်ဘၣ်လၢ မ့ၢ်ဝဲတၢ်ဟ့ၣ်လၢအဟဲလၢ ယဟိဝၤယွၤအအိၣ်တခါလီၤ.”

^၁၉ ပမ့ၢ်မၤပိာ်ထွဲ စီၤပီလူးအတၢ်ဟ့ၣ်ကူၣ်န့ၣ် ကမၤစၢၤပဝဲခဲလၢာ် ဒ်သိးပကဘူးဒီး ယဟိဝၤယွၤအဂီၢ်လီၤ. အဝဲတဲဝဲလၢ– “ဟ့ၣ်ဆူၣ်ထီၣ်လိာ် သုဂံၢ်သုဘါတဂၤဒီးတဂၤ ဒီးမၤစၢၤလိာ်သုသး ဒ်သုမၤတ့ၢ်လံခဲကနံၣ်အံၤ အသိးန့ၣ်တက့ၢ်.” (၁ သ့းစၤလနံ ၅:၁၁, ခ့ခါစှီၤကျိာ်) ပမ့ၢ် ‘သဆၣ်ထီၣ်လိာ်ပခံ ကိးမုၢ်နံၤ’ န့ၣ်မ့ၢ်ပမၤသးခု ယဟိဝၤယွၤအသးလီၤ.