1, 2. ¿Tleka melak noneki tikinyolchikauaskej oksekimej?

CRISTINA, akin kipiya 18 xiuitl, kijtoua: “Notajuan san kemantika nechyolchikauaj niman miyekpa san nechtejteneuaj. Intlajtol melak nechyolkokoua. Yejuamej nechijliaj ika nejua nitlanemilia ken se konetsintli, ika xkeman ninomachtis niman ika nitomauak. Kuakon miyekpa peua nichoka niman nion xok nikneki imiuan nitlajtos. Niman melak xkuajli ninomachilia” ^[1] (xkita nota kampa ontlami). Melak teyolkoko ijkuak oksekimej xtechyolchikauaj.

² San ika, tlajtoltin tlen teyolchikaua melak tepaleuiya. Rubén kijtoua: “Ipan miyek xiujtin nikmachilia ika xtlaj ika nitepaleuiya. San ika, se tonajli, nejua nitenojnotstiaya iuan se tlayekanketl niman yejua okitak ika xkuajli ninomachiliaya. Onikijli kenon ninomachiliaya niman yejua melak kuajli onechkak. Kuakon onechilknamikti ika kuajli tlen nikchiujtoya. Noijki onechijli tlen Jesús okijto, ika tejuamej melak titlasojtij xijkon ken miyek totomej pitentsitsintin. Miyekpa nikilnamiki yejuin texto niman ajsi ipan noyojlo. Itlajtoluan yejon tlayekanketl melak onechpaleuijkej” (Mateo 10:31).

3. a) ¿Tlenon okijto Pablo, itlatitlankauj Cristo, itech tikinyolchikauaskej oksekimej? b) ¿Tlenon tomachtiskej ipan yejuin tlamachtijli?

³ Biblia kijtoua ika tinochimej noneki matechyolchikauakan niman titeyolchikauaskej nochipa. Pablo, itlatitlankauj Cristo, okimijkuilouili hebreos akin kichiuayaj ken Cristo: “Nokniuan, xmotlapiakan para ma ka nensemej nenkipiaskej xkuajli nemoyojlo yejuan xok  kineltokas niman noxelos itech on Dios yejuan nochipa nemi. Yej cada mojmostla xmoyolchikauakan se iuan okse”. Yejua okijto tleka: “Para ma ka nensemej nemoyoltechikauaskej niman mechkajkayauas on tlajtlakojli” (Hebreos 3:12, 13). San matiknemilikan kenon melak kuajli otomachilijkej ijkuak yakaj otechyolchikauj. Ika yejon, melak noneki noijki matikinyolchikauakan tokniuan. Aman, matikinnankilikan yejuin tlajtoltilistin: ¿Tleka melak noneki makinyolchikauakan oksekimej? ¿Tlenon uelis tomachtiskej itech ineskayo Jehová, Jesús niman Pablo itech ken tikinyolchikauaskej oksekimej? ¿Kenon uelis tikinyolchikauaskej oksekimej?

4. ¿Akinomej noneki makinyolchikauakan niman tleka xnochiua yejon ipan yejuin tonajli?

⁴ Tinochimej noneki matechyolchikauakan. Niman kokonej melak noneki makinyolchikauakan intajuan. Se tlamachtijketl itoka Timothy Evans kijtoua ika kokonej “noneki makinyolchikauakan ijkon ken itlaj tlen yonotokak noneki makatekikan”. Noijki kijtoua: “Kokonej akin kinyolchikauaj kuajli nomachiliaj niman kimatij ika kintlasojtlaj”. San ika, aman ipan itlamiyan tonaltin, miyekej tlaltikpakchanejkej tlanemiliaj san intechkopa niman xtetlasojtlaj (2 Timoteo 3:1-5). Sekimej tajtin xkinyolchikauaj inkoneuan pampa yejuamej xkeman okinyolchikaujkej. Akin iuejueyimej noijki noneki makinyolchikauakan, san ika, miyekpa xkinyolchikauaj itech tlen kichiuaj. Se neskayotl, miyekej najmanaj pampa xkeman kimijliaj tla kuajli kichiuaj intekiyo.

5. ¿Kenon uelis tikinyolchikauaskej oksekimej?

⁵ Tikyolchikauas yakaj kijtosneki tikijlis tlen kuajli itech tlen okichiuj. Noijki uelis tikinyolchikauaskej oksekimej ijkuak tikimijliskej ika kipiyaj kualtsitsintin kualneskayomej. Noso ijkuak tikyolchikauaskej yakaj ijkuak melak najmana (1 Tesalonicenses 5:14). Pampa miyekpa tinemij imiuan tokniuan, uelis tikitaskej kenon tikimijliskej itlaj tlen makinyolchikaua (xpoua Eclesiastés 4:9, 10). * Ika yejon, xmotlajtolti: “Nochipa ijkuak niueli, ¿nikimititia oksekimej ika nikintlasojkaita niman nikintlasojtla?”. Xtlanemili itech tlen kijtoua Biblia: “Se tlajtojli tlen noijtoua ijkuak noneki, ¡melak kuajli!” (Proverbios 15:23).

6. ¿Tleka Satanás kineki maka kuajli matomachilikan? Xkijto ika se neskayotl.

⁶ Proverbios 24:10 kijtoua: “Tla timoyolkokoua itech tonajli ijkuak tikixnamiki ajmantli, mitspolos mokojtilis”. Satanás kimati ika tla yejua kichiua maka kuajli matomachilikan, uelis yemanias ken touikaj iuan Jehová. Yejua okiyejyeko ika Job maka kuajli manomachili ijkuak okichiuj melak matlajyoui. San ika, xkuajli okisato itech tlen okinemili kichiuas. Job xkeman okikauj Jehová (Job 2:3; 22:3; 27:5). Tejuamej noijki uelis tikixnamikiskej Satanás niman kuajli tikmatstoskej ika xtechtlanis. Tla nochipa tikinyolchikauaj tochanejkauan niman tokniuan ipan tlanechikojli, uelis topaleuiskej matinemikan ika pakilistli niman matinemikan nisiuj itech Jehová.

7, 8. a) ¿Kenon teyolchikaua Jehová? b) ¿Kenon uelis tajtin kichiuaskej ken Jehová? (Xkita tlaixkopinajli kampa peua tlen tomachtijtokej).

⁷ Jehová teyolchikaua. Salmista okijkuilo: “Jehová nemi nisiuj itech akin noyolajmanaj; niman kinmakixtia akin noyolkokouaj” (Salmo 34:18). Ijkuak teotlajtoketl Jeremías onomojti niman xkuajli onomachili, Jehová okijli kipaleuis (Jeremías 1:6-10). Jehová okuajtitlan se iluikaktekitketl makiyolchikauaki teotlajtoketl Daniel ijkuak iueuentsin katka. Yejon iluikaktekitketl okijli ika yejua katka se tlakatl akin melak notlasojkaita (Daniel 10:8, 11, 18, 19). Tejuamej noijki uelis ijkon tikinyolchikauaskej tokniuan, ken akin tekitij ken precursores niman akin ikipiyaj miyek xiuitl niman xok ueli miyek kichiuaj ken kinekiskiaj.

 ⁸ Maski Jehová iuan Jesús melak miyek xiujtin san sekan nemiyaj, Jehová kimatiya ika noneki kiyolchikauas iKoneuj ijkuak nemiya ipan tlaltikpaktli. Jesús okikak iTaj ouajtlajto ipan iluikak ijkuak yejua tenojnotstoya niman ijkuak sa achijtsin poliuiya ika mikis. Okpa Jehová okijto: “Yejua in yejua notlajsojkaKonetsin yejuan itech nipaktikaj” (Mateo 3:17; 17:5). Kuajli tikmatstokej ika Jesús melak kuajli onomachili ijkuak okikak ika iTaj okijto kitlasojtlaya niman kiseliaya tlen kichiuaya. Sakin, ipan yeuajli ijkuak sa achijtsin poliuiya ika mikis, yejua melak najmanaya. Kuakon Jehová okiyolchikauj ijkuak okuajtitlan se iluikaktekitketl makiyolchikauaki (Lucas 22:43). Tajtin, uelis nenkichiuaskej ken Jehová ijkuak mojmostla nenkinyolchikauaskej nemokoneuan. Xkimijlikan ika melak kuajli ijkuak itlaj kichiuaj. Niman ijkuak yejuamej kixnamikij tlatlatalistin ipan kaltlamachtijli, xchiuakan nochi tlen nenueliskej ika nenkinyolchikauaskej niman nenkinpaleuiskej matlaxikokan.

9. ¿Tlenon uelis tomachtiskej itech ken Jesús kimitaya itlatitlankauan?

⁹ Jesús noijki okitlali se kuajli neskayotl tlen uelis tikixkopinaskej. Ipan yeuajli ijkuak sa achijtsin poliuiya ika mikis, Jesús okinpajpak imikxiuan itlatitlankauan niman okimijli ika melak noneki yolyemankej yeskej. San ika, yejuamej noueyimatiyaj niman nokualaniayaj itech akinon ueyi yeskia itech yejuamej niman Pedro hasta onoueyimat ijkuak okijto ika xkeman kikauaskia Jesús (Lucas 22:24, 33, 34). San ika, Jesús xsan otlanemili itech intlajtlakoluan. Yejua okimijli ika kuajli tlen yokichiujkaj pampa xkeman okikaujkej. Noijki okimijli ika kichiuaskiaj itlaj tlen melak ueyi xijkon ken yejua okichiuj niman kuajli okimijli ika Jehová kintlasojtlaya (Lucas 22:28; Juan 14:12; 16:27). Aman tejuamej uelis totlajtoltiskej: “¿Tikchiuaj ijkon ken Jesús niman tikimijliaj oksekimej tlen kinyolchikauaj ipampa inkualneskayouan? ¿Noso san titlanemiliaj itech intlajtlakoluan?”.

10, 11. ¿Kenon okiteititi Pablo ika kitaya melak ueyi kijtosneki kinyolchikauas ikniuan?

¹⁰ Pablo, itlatitlankauj Cristo, miyekpa okijto tlen kuajli itech ikniuan. Yejua imiuan kistinemiya ipan miyek xiuitl sekimej ikniuan niman melak kuajli okimixmat. San ika, xokijkuilo itech intlajtlakoluan, yejua melak kuajli otlajto intech. Se neskayotl, Pablo okijto itech Timoteo: “Notlajsojkakoneu itech toTeco niman nochipa kichihua ken quitocaroua para toTeko” niman kuajli kimatstoya ika Timoteo kuajli kinpaleuiskia oksekimej (1 Corintios 4:17; Filipenses 2:19, 20). Noijki Pablo okimijli akin kichiuayaj ken Cristo ipan corinto ika Tito “tekiti nouan nemotsajlan” (2 Corintios 8:23). Kuajli tikmatstokej ika Timoteo niman Tito melak okinyolchikauj ijkuak okimatkej tlen Pablo kinemiliaya intech.

¹¹ Pablo niman Bernabé oyajkej okinyolchikauatoj imikniuan maski ueliskia itlaj kinchiuiliskej. Se neskayotl, yejuamej kimatiyaj ika miyekej tlaltikpakchanejkej ipan ueyikalpan Listra kinekiyaj kinmiktiskej. Maski ijkon, oksejpa ompa oyajkej okinyolchikauatoj niman okinpaleuitoj maka makikauakan Jehová akin yenkuikej yopeujkaj tlaneltokaj (Hechos 14:19-22). Sakin, ipan Éfeso, nemiyaj tlaltikpakchanejkej, akin melak kualaniyaj, kinekiyaj itlaj xkuajli kichiuiliskiaj. San ika, xonoteltijkej niman oyajkej okinyolchikauato imikniuan. Hechos 20:1, 2 kijtoua: “Pablo okinnots nochimej on nomachtijkej. Niman kemaj ijkuak yokintlakanonots niman yokinnajnapaloj, otlajtlanauatij, niman oyaj ne Macedonia. Chika panouaya nochiuiyan, okinyolchikajtiaj on tokniuan ikan itlajtol. Kemaj oajsik ne Grecia”.

12. ¿Kenon techpaleuiya tla tiauej ipan tlanechikoltin?

¹² Jehová kineki ika tejuamej melak kuajli matinemikan. Ipampa yejuin techijlia nochipa matosentlalikan. Ipan totlanechikoluan, tomachtiaj itech toTajtsin niman toyolchikauaj se iuan okse (1 Corintios 14:31; xpoua Hebreos 10:24, 25). Cristina, akin otikteneujkej ijkuak otipeujkej yejuin tlamachtijli, kijtoua: “Tlasojtlalistli niman  yolchikaualistli tlen nikselia itech tlanechikoltin yejon tlen melak nikuelita ijkuak ninosentlalia. Kemantika nikmachilia ika ninajmana ijkuak najsi ipan Kajli kampa Tosentlaliaj. San ika, tokniuan siuamej nechnisiuiyaj, nechnapalouaj niman nechijliaj ika kualtsin ken ninesi. Nechijliaj ika yejuamej nechtlasojtlaj niman ika pakij ijkuak kitaj ueyiya notlaneltokil. Melak kuajli ninomachilia ijkuak nechyolchikauaj”. ¡Melak tepaleui ijkuak tinochimej toyolchikaua! (Romanos 1:11, 12).

13. ¿Tleka noneki makinyolchikauakan akin youejkauj kitekichiuiliaj Jehová?

¹³ Maski akin melak youejkauj ika kitekichiuilia Jehová, noneki matikyolchikauakan. Xnemili itech Josué. Ijkuak israelitas ikalakiskiaj kampa kiseliskiaj tlajli tlen toTajtsin yokimijlika kinmakas, Jehová okitlapejpeni Josué yejua matlayekana. San ika, Jehová okijli Moisés makiyolchikaua Josué maski youejkaujka ika kitekichiuilia Jehová. ToTajtsin okijli: “Xmaktili tekitl Josué niman xyolchikaua, pampa yejua akin kipanauis iyekapan yejuin kalpan niman yejua akin kichiuas makiselikan tlajli tlen tejua tikitas” (Deuteronomio 3:27, 28). Josué nonekiya kipiyas yolchikauaslistli, pampa kalpan Israel miyekpa kimixnamikiskia sekimej kalpamej niman hasta sejpa kitlaniskiaj ijkuak tlaixnamikis (Josué 7:1-9). Aman, tejuamej uelis tikinyolchikauaskej tokniuan tlayekankej niman tlayekankej ipan circuito akin melak chikauak tekitij ipan ikalpan toTajtsin (xpoua 1 Tesalonicenses 5:12, 13). Se tlayekanketl ipan circuito okijto: “Kemantika tokniuan techmakaj se amatlajkuilojli kampa kijtouaj ika melak kitlasojkamatij niman kinyolpaktia ika tikomintlajpalouaj. Yejuin amatlajkuiloltin tikinpiyaj niman tikinpouaj ijkuak xkuajli tomachiliaj. Niman yejon melak techyolchikauaj”.

14. ¿Tlenon neskayomej teititiaj ika tepaleuiya tikijlis yakaj ika kuajli tlen kichiua ijkuak tikmakas tlajtolpaleuilistli?

¹⁴ Se tonajli, Pablo okinmakak tlajtolpaleuilistli tokniuan ipan tlanechikojli Corinto. Ijkuak yejuamej okitlakamatkej yejon tlajtolpaleuilistli, Pablo okimijli ika kuajli tlen okichiujkej (2 Corintios 7:8-11). Kuajli tikmatstokej ika itlajtoluan melak okinyolchikauj maka makikajkauakan kichiuaskej tlen kuajli. Ipan yejuin tonajli, tlayekankej niman tajtin uelis kichiuas ineskayo Pablo. Se tokniuj itoka Andreas, akin kipiya ome ikoneuan, kijtoua: “Tikinyolchikauas mokoneuan kinpaleuiya manoskalti intlaneltokil niman machikauikan itech ken nomachiliaj. Niman kichiua ika tlajtolpaleuilistli kuajli makitsontekontlalikan. Maski kimatstokej tlenon kuajli, nomatiskej kichiuaskej tla miyekpa tikimijlia ika kuajli tlen kichiuaj”.

15. ¿Kenon uelis tikinyolchikauaskej oksekimej?

¹⁵ Xkimijli tokniuan ika melak tiktlasojkaita ika nochikauaj niman ipampa inkualneskayouan (2 Crónicas 16:9; Job 1:8). Tla tikchiuaj yejuin, tikixkopinaskej Jehová niman Jesús. Yejuamej melak kitlasojkaitaj nochi tlen tikchiuaj inpampa, maski tla xueli tikchiuaj miyek ken tejuamej  tikuelitaskiaj (xpoua Lucas 21:1-4; 2 Corintios 8:12). Kanaj sekimej tokniuan akin kipiyaj miyek xiuitl melak nochikauaj yaskej ipan tlanechikoltin niman tlanankiliskej niman nochipa yaskej ontenojnotsaskej. ¿Xmelauak ika noneki matikinyolchikauakan niman matikimijlikan ika kuajli tlen kichiuaj?

16. ¿Kemanon uelis tikinyolchikauaskej oksekimej?

¹⁶ Nochipa matikitakan kenon tikinyolchikauaskej oksekimej. Tla tikitaj ika yakaj kinamiki matikijlikan ika kuajli tlen kichiua, matikijlikan, niman maka matoteltikan. Matitlanemilikan ijkuak Pablo niman Bernabé nemiyaj ipan Antioquía de Pisidia. Tlayekankej ipan sinagoga okimijlikej: “Nokniuan, tla nenkipiaj itlaj tlajtojli para nentechtlakanonotsaskej [nentechyolchikauaskej], uelis nenkijtoskej”. Pablo okitak kenon kinyolchikauas ipan yejon tonajli (Hechos 13:13-16, 42-44). Aman, tla tejuamej tikpiyaj se tlajtojli tlen teyolchikaua, matikijtokan. Tla nochipa titeyolchikauaj, kuajli tikmatstoskej ika noijki techyolchikauaskej (Lucas 6:38).

17. ¿Tlenon melak tepaleui tikchiuaskej ijkuak titeyolchikauaj?

¹⁷ Matikchiuakan ika nochi toyojlo niman matikijtokan tlenon itech. Ijkuak tikijtouaj itlaj tlen teyolchikaua melak tepaleuiya. San ika, itech tlen Jesús okijli tlanechikojli Tiatira techmachtia ika melak kuajli tla tikijtouaj itech tlenon (xpoua Apocalipsis 2:18, 19). Se neskayotl, tajtin uelis kimijliskej inkoneuan itech tlenon itech intlaneltokil melak kintlasojkaitaj. Se nantli akin iselti ueliskia tikijliskej itech tlenon tikmojkaitaj itech ken kinmachtia ikoneuan maski kipiya tlauejli. Ijkon melak titepaleuiskej.

18, 19. ¿Kenon uelis topaleuiskej niman ijkon matinemikan nisiuj itech Jehová?

¹⁸ Jehová xtechijlis akinon noneki matikyolchikauakan, ijkon ken okichiuj ijkuak okijli Moisés makiyolchikaua Josué. San ika, yejua melak kuelita matikimijlikan tlajtoltin tlen melak kinyolchikauas akin tokniuan niman oksekimej (Proverbios 19:17; Hebreos 12:12). Se neskayotl, tokniuj akin otechnojnots itech Biblia ipan tlanechikojli ueliskia tikijliskej ika otechmakak tlajtolpaleuilistli tlen techpolouaya niman otechpaleui matikasikamatikan se tlaxelojli itech Biblia. Se tokniuj siuatl okitlajkuilouili akin otenojnots itech Biblia ipan se tlanechikojli: “Maski san achijtsin otitlajtokej, tejua otikitak tlenon nechyolkokouaya niman otinechyolchikauj. Nikneki xmati ika ijkuak otitlajto ika tlasojtlalistli, ipan plataforma niman ijkuak otitlajtokej, nikita yejon se itetlayokolil Jehová”.

¹⁹ Uelis topaleuiskej matinemikan nisiuj itech Jehová tla tikchiuaj tlen okijto Pablo: “Xmoyoleuakan se iuan okse, niman xmoyolchikauakan ikan tlaneltoktli iuan oksekimej ijki ken nenkichijtokej” (1 Tesalonicenses 5:11). Tla mojmostla toyolchikauaskej se iuan okse, kuajli tikmatstoskej ika tikyolpaktiskej Jehová.