1, 2. Hadia mbörö wa moguna sibai tafarou dödö niha bö’ö?

IMANE Cristina si-18 fakhe ndröfinia, ”Lö irai lafarou dödögu ira satuagu, fatimba khöra fefu nifaluagu. Sindruhu-ndruhu afökhö dödögu ba wehedera. Lawa’ö wa iraono nasa ndra’o, lö irai ufaha’ö ndra’o, ba esolodo göi lawa’ö. Andrö, asese ulau me’e ba abölö omasido na lö fahuhuo ndra’o khöra. Urasoi wa niha si lö ngaroro ndra’o.” ^[1] (Faigi gonönöta.) Tola abua wa’auri na lö lafarou dödöda niha bö’ö!

² Baero da’ö, angeraigö hawa’ebua wanoloda niha bö’ö ba ginötö tafarou dödöra. Imane Rubén, ”Urasoi hulö niha si lö ngaroro ndra’o ba zi hauga fakhe. Hiza’i samuza ma’ökhö, ba ginötö fao ndra’o manuriaigö khö samösa satua sokubaloi, i’ila wa so gabula dödögu. Ihaogö wamondro-ndrongo me ututunö nösi dödögu khönia. Aefa da’ö, ifasugi ba dödögu ngawalö zi sökhi si no ufalua. Ifasugi ba dödögu wehede Yesu—wa abölö tohude ita moroi ba ziliwi nali soya. Asese itörö tödögu ayati da’ö, ba lö aetu  tofakha ia ba dödögu. Ebua sibai lua-luania khögu wehede zatua sokubaloi andrö.”—Matai’o 10:31.

3. (a) Hadia niwa’ö sinenge sotöi Faulo sanandrösa ba wamarou dödö niha bö’ö? (b) Hadia nidunö-dunöda ba wamaha’ö andre?

³ Itutunö Sura Ni’amoni’ö wa moguna lö aetu tafarou dödö niha bö’ö. Isura Faulo ba niha Keriso ba Heberai’o imane, ”Mifaigi, ya’ami ira talifusö, böi yatesöndra ba khömi, ha niha ia, si so tödö si lö sökhi, tödö ba wa lö mamati, ba wangerogö Lowalangi sauri; faoma mifarou dödö nawömi, ero ma’ökhö.” Hadia mbörö? Itutunö Faulo, ”Fa böi tesöndra ba khömi, haniha ia, ni’abe’e’ö tödö, ba walimosa horö andrö.” (Heberai’o 3:12, 13) Angeraigö hawa’asökhi worasoimö na so niha samarou tödömö. Andrö, hadia dani khöda ba wamarou dödö ndra talifusöda? Hadia wamaha’ö si tola tahalö moroi ba lala nifalua Yehowa, Yesu hegöi Faulo ba wamarou dödö niha bö’ö? Ba hadia ngawalö lala si tola tafalua ba wamarou dödö niha bö’ö? Datatutunö wanofu-nofu andre.

4. Ha’ökhö manö moguna wamarou dödö? Hadia mbörö wa ato niha iada’a lö lafarou dödö niha bö’ö?

⁴ Fefu ita moguna lafarou. Ba sabölö tohudenia, moguna da’a khö ndra satua ba wamarou dödö ndraonora. Samösa guru sotöi Timothy Evans itutunö wa iraono, ”moguna khöra wamarou dödö hulö simane zinanö moguna khönia nidanö. Na tafarou dödö ndraono, tola irasoi wa moguna ia khöda ba ta’angenanöi ia”. Hiza’i, börö me ba ”götö safuria” auri ita, ato niha iada’a ha tana khöra ni’aluira ba ambö ’la’omasi’ö nawöra’. (II Timoteo 3:1-5) So ösa zatua si lö mamarou dödö ndraonora börö me lö lafarou göi dödöra ira satuara. Moguna göi lafarou dödö ndraono si no ebua-bua, hiza’i ha fataria alua da’a. Duma-dumania, ato zanguma’ö wa lö irai lasuno zi no lafalua ba wohalöwöra.

5. Hewisa wa tola tafarou dödö niha bö’ö?

⁵ Tola tafarou dödö niha bö’ö na tasuno halöwö si sökhi si no lafalua. Tola göi tafarou dödö niha bö’ö na tafatunö khöra mbua-bua si sökhi ni’okhögöra hegöi tarara dödöra ba ginötö lataögö wa’abu dödö mazui fa’afatö dödö. (I Tesalonika 5:14) Börö me asese fao ita khö ndra talifusöda, oya ginötö khöda ba wanguma’ö fehede famarou dödö. (Baso Zangombakha 4:9, 10.) Andrö, sofu khöu samösa, ’Hadia utehegö la’ila niha bö’ö wa u’ame’egö tödö ba u’omasi’ö ira? Hegöi hadia ufalua da’ö ero so ginötö?’ Angeraigö niwa’ö Zura Ni’amoni’ö, ”Ba taroma li ba ginötö, ba ha lö asökhi!”—Gamaedola 15:23.

6. Hadia mbörö wa omasi Zatana na afatö dödö nono mbanua Lowalangi? Be’e sambua duma-duma hewisa wamaluania da’ö.

⁶ Imane Gamaedola 24:10, ”Na hulö zi lö döla-döla ndra’ugö, na baŵa wamakao, ba si lö boto wa’abölöu.” I’ila Satana wa na ifatö’ö dödöda, tola awuwu  wahuwusada khö Yehowa. Duma-dumania, ibe’e wanandraigö sabölö-bölö khö Yobi ena’ö ide-ide dödönia. Hiza’i, lö möna Zatana börö me lö faröi Yobi khö Yehowa. (Yobi 2:3; 22:3; 27:5) Tola göi talawa Zatana ba taforoma’ö wa lö möna ia. Na lö taböhöli wamarou dödö nösi nomoda hegöi ira talifusöda ba mbanua niha Keriso, tola tatolo ira ena’ö owua-wua dödöra ba lö laböhöli wahuwusa khö Yehowa.

7, 8. (a) Hewisa wamarou Yehowa dödö niha? (b) Hewisa zatua ba wolo’ö duma-duma nifalua Yehowa? (Faigi gambara ba wamobörö wamaha’ö.)

⁷ Ifarou dödö niha Yehowa. Isura sanura zinunö, ”Ahatö Yehowa ba zi no arasa tödö ba itolo zi no atata era-era.” (Zinunö 34:19) Ba ginötö ata’u Yeremia ba ide-ide dödönia, ifabu’u Yehowa wa hasambalö itolo ia. (Yeremia 1:6-10) Ifatenge mala’ikania Yehowa ba wanga’aro’ö Danieli si no alawa ndröfi. Ikaoni Danieli mala’ika andrö ”omasiö”. (Danieli 10:8, 11, 18, 19) Hadia tola öfalua lala simane da’ö ba wamarou dödö ndra talifusöda, simane ndra perintis hegöi niha si no alawa ndröfi si tebai mamalua abölö oya simane nifalua niha bö’ö?

⁸ Hewa’ae no ara fao-fao Yehowa khö Yesu, hiza’i ba ginötö so Yesu ba gulidanö, i’ila Yehowa wa moguna nasa ifarou dödö Nononia. Ifondro-ndrongo Yesu me muhede Namania moroi ba zorugo ba ginötö ibörögö halöwö fanuriaigönia hegöi me lö aratö ia ba gulidanö. Ba zi dombua ginötö andrö imane Yehowa, ”Onogu da’ö, ono omasiö, wa’omasigu.” (Matai’o 3:17; 17:5) Tatu, tefarou sibai dödö Yesu me irongo wa i’omasi’ö ia Amania ba omuso dödönia khönia. Ba mbongi fatua lö mate Yesu, abu sibai dödönia. Ifarou dödönia Yehowa, ifatenge mala’ikania ba wanga’aro’ö hegöi ba wondrara dödönia. (Luka 22:43) Satua, tola mi’o’ö duma-duma Yehowa na lö aetu-aetu mifarou dödö ndraonomi. Suno ira na so zi sökhi nifaluara. Aefa da’ö ba ginötö lataögö wanandraigö ba zekola, falua fefu zi tola öfalua ba wanga’aro’ö ya’ira hegöi ba wanolo ya’ira ena’ö anau gölöra.

9. Hadia wamaha’ö si tola tahalö moroi ba lala nifalua Yesu khö ndra nifaha’önia?

⁹ Ibe’e göi duma-duma si sökhi Yesu si tola ta’o’ö. Ba mbongi fatua lö mate Yesu, isasai gahe ndra nifaha’önia ba itutunö khöra wa moguna sibai mbua-bua fangide-ngide’ö. Hiza’i, so khöra wa’asiliawa ba fabu’a-bu’a ira sanandrösa haniha zabölö ebua ba gotaluara, hegöi isuno-suno sibai ia Fetero wa lö irai iröi Yesu. (Luka 22:24, 33, 34) Hewa’ae simanö, lö i’osambua wangera-ngerania Yesu ba zala nifaluara. Hiza’i, isuno ira börö me lö faröi ira khönia. Ifabu’u khöra wa lafalua halöwö sabölö ebua moroi ba nifaluania, ba ifaduhu’ö khöra wa i’omasi’ö ira Yehowa. (Luka 22:28; Yohane 14:12; 16:27) Tola tasofu khöda  samösa, ’Hadia u’o’ö duma-duma Yesu hegöi usuno niha bö’ö ba mbua-buara si sökhi moroi na ha u’era-era manö zala nifaluara?’

10, 11. Hewisa Waulo ba wamarou dödö ndra talifusönia, ba hadia zedöna ifalua?

¹⁰ Asese goi idunö-dunö Faulo zi sökhi sanandrösa khö ndra talifusönia. Fao ira khönia ba we’amöi ba mbanua bö’ö ba zi hauga fakhe, ba aboto ba dödönia hewisa mbua-buara, hiza’i lö isura zala nifaluara. Sindruhunia, isuno ira. Duma-dumania, ikaoni Dimoteo Faulo ”onogu andrö, ba khö Zo’aya, somasi ndra’o, si lö faröi” ba faduhu dödönia wa tola i’ame’egö tödö Dimoteo soguna ba niha bö’ö. (I Korindro 4:17; Filifi 2:19, 20) Iwa’ö Faulo khö ndra niha Keriso ba Gorindro wa Dito andrö ”awögu ia, ba khömi andrö, ba sanolo ya’o ba halöwö andrö”. (II Korindro 8:23) Tatu tefarou dödö Dimoteo hegöi Tito ba ginötö la’ila wa i’ame’egö tödö ira Faulo!

¹¹ Faulo hegöi awönia Baranaba, latehegö nosora ba wamarou dödö ndra talifusöra. Duma-dumania, la’ila wa ato niha sedöna wamunu ya’ira ba mbanua Lisitera. Hewa’ae simanö, lafuli möi ira ba da’ö ba wamarou tödö zawena mufaha’ö hegöi ba wanolo ya’ira ena’ö lö faröi ira khö Yehowa. (Halöwö Zinenge 14:19-22) Aefa da’ö, itaögö Waulo de’ala ba Efeso börö me mofönu sibai niha sato khöra. Hiza’i, ara toröi ia ba da’ö ba wamarou dödö ndra talifusönia. Imane Halöwö Zinenge 20:1, 2, ’Ba ifakaoni’ö khönia ndra nifahaö Faulo, ba ifarou dödöra ba me no i’angonasi ira, ba mofanö ia, ba we’amöi ba Makedonia. Ba itörö danö tanö ba da’ö, ba oya niwa’önia khöra wamarou dödö, ba irugi danö Yunani.’

12. Hadia mbörö wa moguna khöda we’amöi ba gangowuloa?

¹² Omasi Yehowa zabölö sökhi khöda. Da’ö mbörö wa ifarou ita ena’ö böi taböhöli wa’owulo. Ba gangowuloa, tola tafaha’ö ita sanandrösa khönia ba tola tafarou dödö niha bö’ö. (I Korindro 14:31; baso Heberai’o 10:24, 25.) Cristina, nitutunö ba wamobörö wamaha’ö imane, ”Sabölö omasido ba gangowuloa ya’ia da’ö fa’omasi hegöi famarou dödö nitemagu. Itaria urasoi wa’abu dödö me urugi Balai Mbanua Lowalangi. Hiza’i, i’ondrasido samösa dalifusöda ira alawe, italagui ndra’o, ba iwa’ö wa baga-baga ndra’odo. Lawa’ö khögu wa la’omasi’ö ndra’o ba omuso sibai dödöra wamaigi fa’atedou wamatigu. Famarou dödö moroi khöra möi fondrara dödögu!” Moguna sibai tafarou dödö niha bö’ö!—Roma 1:11, 12.

13. Hadia mbörö wa moguna lafarou dödö niha si no ara mamosumange Yehowa?

¹³ Moguna göi wamarou dödö ba niha si no ara mamosumange Yehowa. Duma-dumania Yosua. Ba ginötö möi ndraono Gizara’eli ba Danö Gamabu’ula, Yosua nifili Yehowa si tobali sondrönia’ö. Hiza’i, iwa’ö Yehowa khö Moze ena’ö ifarou dödö Yosua hewa’ae no ara ifosumange Yehowa. Imane Yehowa, ”Ba khö Yosua, ba öbe’e li, farou dödönia ba abe’e’ö; ya’ia sa zolohe miyefo ya’ira andre, ba ya’ia zamaosa khöra tanö andrö, ni’ila höröu.” (V Moze 3:27, 28) Moguna wamarou dödö khö Yosua börö me ba gafuriata oya wasuwöta nifaluara ba si  lö’ö-lö’önia kala ira sakali. (Yosua 7:1-9) Iada’a, tola tafarou dödö ndra satua sokubaloi hegöi satua samasui, samorege wohalöwö ba wo’ame’egö tödö ono mbanua Lowalangi. (Baso I Tesalonika 5:12, 13.) Imane samösa satua samasui, ”Itaria labe’e khögu zura fangandrö saohagölö ira talifusö, lawa’ö wa owua-wua dödöra ba ginötö mafalukhaisi ira. Ma’irö’ö zura andrö, ba mafuli mabaso ba ginötö so gabula dödöma. Sindruhu-ndruhu da’ö zi tola manga’aro’ö ya’aga.”

14. Hadia duma-duma zangoroma’ö wa sökhi na tasuno niha bö’ö ba ginötö tabe’e khöra mene-mene?

¹⁴ Ba zi sambua inötö, ibe’e mene-mene Faulo ba niha Korindro. Ba ginötö lafalua mene-mene andrö, isuno ira Faulo. (II Korindro 7:8-11) Tatu manö, fehedenia andrö möi famarou dödö ena’ö lö aetu lafalua zatulö. Iada’a, satua sokubaloi hegöi ira satua ba nomo, tola la’o’ö duma-duma Waulo andre. Andreas, sangokhögö darua ndraono side-ide imane, ”Famarou dödö tola möi fanolo ba ndraono ena’ö tedou ira ba wamati hegöi ba wangera-ngera. Tola ötanögö mene-mene khöra na öfarou dödöra. Hewa’ae la’ila iraonoda hadia zi sökhi, hiza’i na lö aetu tafarou ira ba wamalua da’ö, tola tobali lala wa’aurira da’ö.”

15. Hadia sambua lala si tola tafalua ba wamarou dödö niha bö’ö?

¹⁵ Fatunö khö ndra talifusömö ba wamati wa ö’ame’egö tödö famorege nifaluara hegöi bua-buara si sökhi. (II Nga’ötö 16:9; Yobi 1:8) Na tafalua da’a, ta’o’ö Yehowa hegöi Yesu. La’ame’egö tödö fefu ngawalö nifaluada khöra, hewa’ae lö oya zi tola tafalua simane somasi dödöda. (Baso Luka 21:1-4; II Korindro 8:12.) Duma-dumania, ta’ila wa oya nifalua niha sagalawa ndröfi ba wamorege we’amöi ba gangowuloa ba lö laböhöli göi we’amöi manuriaigö. Hadia tafarou dödöra ba tasuno ira ba nifaluara andrö?

16. Hewisa wa tola tafarou dödö niha bö’ö?

¹⁶ Asese’ö farou niha bö’ö. Ero ö’ila so zi sökhi nifalua zi samösa niha, suno ia. Ba ginötö so Waulo hegöi Baranaba ba Gadriokhia Wisidia, lamane khöra ira satua gosali, ”Na so hadia ia khömi, ya’ami, ira talifusö, niwa’ö ba zato, famarou dödö, ba miwa’ö.” I’oguna’ö  ginötö da’ö Faulo ba wamarou dödö niha. (Halöwö Zinenge 13:13-16, 42-44) Ba ginötö tafarou dödö niha bö’ö, omasi göi lafarou ita niha bö’ö.—Luka 6:38.

17. Hadia lala sabölö sökhi ba wanuno niha bö’ö?

¹⁷ Zara-zara wanutunö. Ba ginötö isuno niha Keriso ba Diatira Yesu, izara-zara ba wanutunö hadia zi sökhi si no lafalua. (Baso Fama’ele’ö 2:18, 19.) Hewisa tola ta’o’ö ia? Te tola tasuno samösa nina si lö donga ba lala wangebua’önia iraononia hewa’ae abua khönia da’ö. Mazui na samösa satua ndra’ugö, tola ösuno famorege nifalua ndraonomö ba wamosumange Yehowa. Tutunö khöra ngawalö zi sökhi ni’ilamö si no lafalua. Na tazara-zara ba wanutunö ba ginötö tafarou dödö niha bö’ö, tola la’ila hadia geluaha niwa’öda.

18, 19. Hewisa wanoloda niha bö’ö ena’ö lö aetu ahatö ira khö Yehowa?

¹⁸ Iwa’ö Yehowa khö Moze ba wamarou hegöi ba wanga’aro’ö Yosua. Tatu manö, lö fahuhuo Yehowa khöda iada’a hegöi lö itatugöi haniha nifarouda tödö. Hiza’i, omuso dödönia ba ginötö i’ila wamorege nifaluada ba wamarou dödö niha bö’ö. (Gamaedola 19:17; Heberai’o 12:12) Duma-dumania, ba ginötö so samösa dalifusöda sama’ema huhuo sebua ba mbanua niha Keriso si so ya’ita, tola tawa’ö khönia wa sökhi sibai wama’emania huhuo andrö. Tola manö, hadia niwa’önia möi fanoloda ba wanaögö abula dödö mazui ba wame’e fa’aboto ba dödö sanandrösa ba ayati si lö ta’ila. Isura sambua zura talifusöda ira alawe khö dalifusöda sama’ema huhuo, ”Hewa’ae lö arara fahuhuo ita, ö’ila wa so gabula dödögu, örara dödögu ba öfazawado. Omasido ena’ö ö’ila wa ba ginötö fahuhuo ndra’ugö, he ba mimbar mazui na fahuhuo’ö ba niha, urasoi wa hulö mbuala da’ö moroi khö Yehowa.”

¹⁹ Tola tatolo niha bö’ö ena’ö ahatö ira khö Yehowa na ta’o’ö mene-mene Waulo, ”Faoma mifarou dödö nawömi, ba faoma mitolo nawömi, simane folaumi sa’ae göi.” (I Tesalonika 5:11) Na ’faoma tafarou dödö nawöda, ero ma’ökhö’, tola ta’omusoi’ö dödö Yehowa!