1, 2. ¿Imamantataj shujtajcunata animana canchij?

SHUJTAJCUNA mana animachijpica llaquillami sintirinchij. Por ejemplo Cristinaca 18 huatacunatami charin. Paica: “Ñuca yaya mamaca huaquinllapimi ñucata animancuna. Ashtahuancarin imatapish mana alli rurai tucunguichu, gordami cangui nishpami sinchita rimancuna. Chashna rimajpica achca llaquillami sintirini. Paicunahuanca ña mana parlasha ninichu, huacashpallami purini. Mana imapaj valishca shinami sintirini” nircami ^[1] (página 11-pi notata ricui).

² Shujtajcunata animachijpica cushillami sintiringacuna. Achca huatacunatami Rubenca imapajpish mana valishca shina sintirirca. Paica: “Shuj punllaca shuj ancianohuan huillacujpimi paica ñuca llaquilla cashcata ricurca. Ñuca ima shina sintirishcata huillajpica, paica tucuitami uyarca. Qˈuipaca canca allitami ruracungui nircami. Ashtahuanpish Jesusca cancunaca achca pajarocunatapish yalli valijmi canguichij nishcatami yuyachirca. Chai versota cutin cutin yuyarishpaca cushillami sintirini. Chai huauqui nishcacunaca achcatami cushichirca” nircami (Mateo 10:31).

3. a) ¿Apóstol Pabloca animota cunamantaca imatataj nirca? b)  ¿Cai yachaipica ima tapuicunamantataj yachashun?

 ³ Bibliaca caishuj chaishuj cushichinataca amataj saquinguichijchu ninmi (“Alli entendishunchij” nishca cuadrota ricui). Apóstol Pabloca: ‘Riquichij huauquicuna, cancunapurapica millai shungu tucushpa, mana crishpa, causaj Diosmanta anchurijcunaca amataj tiyachun. Chaipaj randica ima millaita rurana yuyaicuna cancunata umashpa, mana uyasha nijta ama rurachunca cunan causacushparaj punllanta caishuj chaishuj cushichinacuichij’ nircami (Hebreos 3:12, 13). Shujtajcuna canta animajpica, ¿manachu cushilla sintirircangui? Chaimantami caishuj chaishuj cushichinacuna canchij. Cai yachaipica cai tapuicunatami yachashun: ¿Imamantataj shujtajcunata animana canchij? ¿Jehovamanta, Jesusmanta, apóstol Pablomantaca imatataj yachai tucunchij? ¿Ima shinataj shujtajcunata animai tucunchij?

4. a) ¿Picunataj animota cuchun minishtincuna? b)  ¿Imamantataj huaquincunaca mana animota cuncuna?

⁴ Tucuicunami animota cuchun minishtinchij. Ashtahuancarin yaya mamacunami huahuacunaman animota cuna can. Shuj profesorca: “Ima shinami shuj plantaca yacuta minishtin, chashnallatajmi huahuacunapish animota cuchun minishtincuna. Paicunaman animota cujpica cushillami sintiringacuna” ninmi. Pero ‘tucuri’ punllacunapi causacushcamantami gentecunaca paicunallapi yuyashpa cˈuyaita mana ricuchincuna (2 Timoteo 3:1-5). Huaquin yaya mamacunaca paicuna uchilla cajpi mana animachishcamantami paicunapish paicunapaj huahuacunamanca mana animota cuncuna. Cutin achca gentecunaca trabajopi allitami ruranguichij mana nijpimi llaquilla sintirincuna.

5. ¿Ima shinataj shujtajcunata animai tucunchij?

⁵ Shujtajcunataca allitami rurashcangui, canca cˈuyaj, allimi cangui nishpami animai tucunchij. Llaquilla cajcunatapish sinchiyachi tucunchijmi (1 Tesalonicenses 5:14). Huauquicunahuan panicunahuan tandalla Diosta servicushcamantapish paicunata animai tucunchijmi (Eclesiastés 4:9, 10-ta leyipai). Bibliaca minishticuj horaspi sumaj shimicunahuan cushichinaca allimi can ninmi (Proverbios 15:23). Chaimanta huauquicunata panicunata cˈuyashcataca ninami canchij.

6. a) ¿Imamantataj Satanasca ñucanchij llaquilla sintirichun munan? b) ¿Jobta Diosmanta caruyachingapajca Satanasca imatataj rurarca?

⁶ Proverbios 24:10-pica llaquilla cajpica imapish ashtahuan ashtahuan sinchimi ricuringa ninmi. Satanasca llaquilla sintirichunmi munan. Chashnami Diosmanta caruyachisha nin. Satanasca achca llaquicunata cachashpami Job llaquilla sintirichun munarca. Chashna jahuapish Jobca Diosmanta manataj caruyarcachu (Job 2:3; 22:3; 27:5). Ñucanchijpish familiata, huauquicunata panicunata animashpami tucuicuna cushilla sintirichun, Diosmantapish ama caruyachun ayudashun.

7, 8. a) ¿Ima shinataj Jehová Diosca shujtajcunata sinchiyachishca? b)  ¿Yaya mamacunaca ima shinataj Jehovapaj ejemplota cati tucun? (Página 7-pi tiyaj dibujota ricui).

⁷ Jehová Diosca shujtajcunatami cushichin. Bibliapica: “Mandaj Diosca shungupi llaquilla cajcunapaj cˈuchullapimi. Espiritupi llaquilla cajcunata quishpichinmi” ninmi (Salmo 34:18). Profeta Jeremías manchashpa, llaquilla sintirijpimi Jehová Diosca paipi shunguta churachun ayudarca (Jeremías 1:6-10). Chashnallatajmi Diosca shuj angelta cachashpa Danielta sinchiyachirca. Chai angelca Danieltaca ‘canca  yallitaj cˈuyashcami cangui’ nircami (Daniel 10:8, 11, 18, 19). Ñucanchijpish chashnallatajmi huauquicunata panicunata, precursorcunata, yuyajcunata animai tucunchij.

⁸ Jehová Diosca Jesushuanmi jahua pachapi achca huatacunata causarca. Jesús cai allpaman shamujpica Diosca paipaj churita animashpami catirca. Jesusca Diosmanta huillai callarijpi, huañuna horas chayajpipish Jehová Diosca: “Caimi ñuca cˈuyashca Churi. Paipimi cushicuni” nircami (Mateo 3:17; 17:5). Caita uyashpami Jesusca cushilla sintirishca canga. Jesús huañuna tutapi llaquilla cajpica Jehová Diosca shuj angelta cachashpami sinchiyachirca (Lucas 22:43). Yaya mamacunapish Jehovapaj ejemplota catishpami cancunapaj huahuacunata animashpa, allitami rurashcanguichij nishpa cushichi tucunguichij. Huahuacuna escuelapi llaquicunata ahuantachunmi ayudana canguichij.

9. ¿Jesusmantaca imatataj yachanchij?

⁹ Jesusca shuj alli ejemplotami saquirca. Manaraj huañushpaca Jesusca paipaj catijcunapaj chaquicunatami maillarca. Chashnami paicuna humildecuna cachun yachachirca. Chashna yachachijpipish paicunapuraca ñucami ashtahuan yalli cani nishpami rimanacurcacuna. Pedropish Jesustaca manataj saquishachu nircami (Lucas 22:24, 33, 34). Jesusca paicunapaj pandarishcacunata ricunapaj randica paita mana saquishcamantami cushichij shimicunata nirca. Shinallataj ñuca rurashcacunata yallitapishmi cancunaca ruranguichij nircami. Diospish cancunata cˈuyanmi nircami (Lucas 22:28; Juan 14:12; 16:27). Ñucanchijpish Jesús shinami shujtajcunapica allicunata ricuna canchij.

10, 11. ¿Shujtajcunata animangapajca Pabloca imatataj rurarca?

¹⁰ Apóstol Pabloca paipaj huauquicuna panicunamantaca allicunatami rimaj carca. Huaquincunaca achca huatacunatami paihuan purij carca. Paicunata alli rijsishpapish paicunapaj pandarishcacunamantaca mana quillcarcachu. Por ejemplo Timoteomanta parlashpaca, “paica Mandaj Jesuspajta alli pajtachij, ñuca cˈuyashca churimi” shujtajcunamantapish sustarijmi can nircami (1 Corintios 4:17; Filipenses 2:19, 20). Chashnallataj Corintopi causaj huauquicunata panicunataca: “Titoca ñucahuan purij cashcamanta, cancunapaj allicunata rurajmi” can nircami (2 Corintios 8:23). Pablo paicunamanta allicunata rimashcamantaca Timoteopish Titopish cushillami sintirishca cangacuna.

¹¹ Pablopish Bernabepish huañunata mana manchashpami paicunapaj huauquicunata panicunata cushichinaman rijcuna carca. Por ejemplo Listra llajtapi paitapish Bernabetapish huañuchisha nijpipish mushuj crijcunata sinchiyachingapajmi chai llajtaman tigrarcacuna (Hechos 14:19-22). Cutin Éfeso llajtapi Pablota llaquichisha nijpipish paica huauquicunata panicunata animangapajmi saquirirca. Hechos 20:1, 2-pica: ‘Pabloca crijcunata cayashpami alli catichun sinchiyachirca. Qˈuipaca ugllarishpa, shujtaj punllacama nishpaca, Macedoniamanmi rirca. Chai llajtapi causaj crijcunata alli catinguichij nishpami Greciaman chayarca’ ninmi.

12. ¿Imamantataj tandanacuicunamanca rina canchij?

¹² Jehová Diosca cushilla causachunmi munan. Chaimantami tandanacuicunaman rinataca ama saquinguichij nin. Tandanacuicunapica Diosmantami yachanchij, caishujmanta chaishujmanta cˈuyanacushcatami ricuchinchij (1 Corintios 14:31; Hebreos 10:24, 25-ta leyipai). Ñaupaman parlashca pani Cristinaca: “Tandanacuicunapica turi ñañacunaca  cˈuyaitami ricuchin, animotapishmi cun. Huaquinpica tandanacuimanca llaquillami chayani. Chaipica ñañacunaca ugllarishpami Jehová Diosta servishpa caticushcamantaca cushicunchijmi, alhajami cangui, cantaca cˈuyanchijmi nincunami. Paicuna chashna nijpica cushillami sintirini” ninmi. Cai ejemploca caishujmanta chaishujmanta cushichinacuna cashcatami ricuchin (Romanos 1:11, 12).

13. ¿Achca huatacunata Diosta servijcunapish imamantataj animota minishtincuna?

¹³ Achca huatacunata Diosta servijcunapish animotami minishtincuna. Josuepaj ejemplota ricushun. Israelitacunaman cusha nishca allpaman pushachunca Jehová Diosca Josuetami agllarca. Josueca achca huatacunatami Diosta servicurca. Chashna cajpipish Diosca Moisestaca: “Josueta yachachishpa animachishpa sinchiyachi. Paimi cai gentecunata pushashpa Jordanta chˈimbanga. Paimi cunan can ricugrin llajtataca paicunaman cunga nircami” (Deuteronomio 3:27, 28). Israelitacunaca achca cutin shujtaj llajtacunahuan macanacuna cashcamanta, huaquinpica paicunata mishana cashcamantami Josueca achca animota minishtirca (Josué 7:1-9). Cunan punllacunapipish superintendente huauquicunapish ancianocunapish ñucanchijta cuidangapajmi sinchita trabajancuna. Chaimantami animota cuchun minishtincuna (1 Tesalonicenses 5:12, 13-ta leyipai). Shuj superintendente de circuitoca: “Huauquicuna panicunaca pagui visitashcamanta nishpami cartacunata cun. Llaquilla cashpaca chai cartacunata leyishpami animarinchij” ninmi.

14. a) ¿Pablomantaca imatataj yachanchij? b) ¿Ishqui huahuacunata charij shuj yayaca imatataj nirca?

¹⁴ Shuj cuntinca apóstol Pabloca Corinto llajtamanta crijcunatami cunarca. Paicuna cazujpica Pabloca allitami ruracunguichij nircami (2 Corintios 7:8-11). Pablo chashna animachijpimi chai crijcunaca Diosta ashtahuan servinata munashca cangacuna. Cunan punllacunapipish ancianocuna, yaya mamacunapish Pablopaj ejemplotami cati tucuncuna. Ishqui huahuacunata charij shuj yayaca cashnami nirca: “Huahuacunata animachijpica Diospajman ashtahuanmi cˈuchuyangacuna, alli runacunami tucungacuna, yachachishcatapish mana cungaringacunachu. Huahuacunaca ima alli cashcata, ima mana alli cashcata yachashpapish paicunata animachijpica allicunata rurashpami catingacuna” nircami.

15. ¿Imamantataj huauquicunata panicunata animana canchij?

¹⁵ Diosta servingapaj sinchita esforzaricushcamanta, allita ruracushcamantapish shujtajcunata animanami canchij (2 Crónicas 16:9; Job 1:8). Chashna rurashpaca Jehovapaj, Jesuspaj ejemplotami catinchij. Paicunata servingapaj mana achcata rurai tucushpapish, ñucanchij imata ruracushcata ricushpaca Jehovapish, Jesuspish achcatami  cushicuncuna (Lucas 21:1-4; 2 Corintios 8:12-ta leyipai). Por ejemplo, yuyaj huauquicuna panicunaca tandanacuiman ringapaj, huillanaman cutin cutin llujshingapajpish sinchitami esforzarincuna. ¿Paicuna Diosta servicushcamantaca felicitanchijchu?

16. ¿Ima horataj shujtajcunata animana canchij?

¹⁶ Shujtajcunata siempremi animana canchij. Pi imata alli rurajpica felicitanami canchij. Pablopish Bernabepish Antioquiapi cajpica, sinagogapi pushajcunaca: ‘Huauquicuna, imallatapish caipi cajcunaman cushichingapaj rimashun nishpaca, rimapaichijlla’ nircacunami. Chaimantami Pabloca chaipi cajcunata animarca (Hechos 13:13-16, 42-44). Ñucanchijpish shujtajcunata animajpica paicunapish ñucanchijta animasha ningacunami (Lucas 6:38).

17. ¿Imacunamantataj shujtajcunata animana canchij?

¹⁷ Shujtajcuna imata alli rurashcamantaca animanami canchij. Tiatira llajtapi causaj crijcunataca Jesusca: ‘Ñucaca can imallata rurashcatapish, cˈuyaj cashcatapish, allita ruraj cashcatapish yachanimi’ nishpami animarca (Apocalipsis 2:18, 19-ta leyipai). ¿Ñucanchijpish ima shinataj Jesuspaj ejemplota cati tucunchij? Shuj mamaca sinchita esforzarishpa pailla paipaj huahuacunata huiñachicushcamantami animai tucunchij. Yaya mamacunaca huahuacuna Diosta servingapaj esforzaricushcamantaca paicunata cushichinami can. Shujtajcuna imata alli rurashcamanta animajpica paicunaca shungumanta animachicushcatami ricungacuna.

18, 19. ¿Shujtajcuna Diospajman cˈuchuyachunca ima shinataj ayudai tucunchij?

¹⁸ Jehová Diosca Josueta sinchiyachichunmi Moisesta cacharca. Cunan punllacunapica Diosca Moisespaj punllacunapi laya pita animana cashcataca mana ninchu. Pero shujtajcunata animajpica Diosca achcatami cushicun (Proverbios 19:17; Hebreos 12:12). Por ejemplo, congregacionpi shuj huauqui sumaj conferenciata cujpica felicitanami canchij. Huauquipaj conferenciaca ñucanchij problemacunata ima shina chˈimbapuranatachari ricuchirca. Mana cashpaca shuj versotachari alli entendichirca. Caipi yuyashun. Shuj panica shuj jatun tandanacuipica shuj huauquipaj conferenciatami uyarca. Conferencia tucurishca qˈuipaca chai huauquita felicitanamanmi rirca. Qˈuipaca chai panica shuj cartata cachashpami: “Ashallata parlanacushca cajpipish ñuca llaquilla cajta ricushpami animarcangui. Conferenciapipish canhuan parlanacucujpipish sumaj shimicunahuanmi cushichircangui” nircami.

¹⁹ Shujtajcuna Diospajman ashtahuan cˈuchuyachunca Pablopaj consejotami cazuna canchij. Pabloca: “Cunan ruracushca shinallataj caishuj chaishujta animachichij caishuj chaishujta sinchiyachichij” nircami (1 Tesalonicenses 5:11). PunlIanta caishujmanta chaishujmanta animachinacushpaca Jehová Diostami cushichishun.