1, 2. Faandi mbei u musu ta da wotowan taanga?

WAN sisa de kai Cristina, di abi 18 jaa taki taa: „Mi mama ku mi tata bi ta möön kosi mi, möön leki fa de bi ta da mi taanga. Nöö dee soni de bi ta taki bi ta hati mi seei. De bi ta piki mi taa mi ta du kuma piki mii, nöiti mi o sa’ u du soni möönsö, söseei de bi ta piki mi taa mi fatu poi. Fëën mbei hii juu mi bi ta këë, nöö ma bi ta kë fan ku de. Mi ta fii kuma ma a’ du.” ^[1] (Luku di pisi a kaba u di woto.) Di libi sa taanga da u seei te wotowan an ta da u taanga!

² Ma pakisei unfa u sa heepi woto sëmbë te u ta da de taanga. Rubén bi taki taa: „Sömëni jaa mi bi ta si kuma ma abi na wan du. Ma wan daka, hën mi bi ta peleiki makandi ku wan gaanwomi, hën a ko si taa wan soni bi ta toobi mi. A haika mi bunu seei di mi bi ta konda dëën unfa mi ta fii. Hën a piki mi dee bunu soni dee mi ta du. Söseei a mëni mi baka andi Jesosi bi taki, di a bi taki taa hiniwan fuu bunu möön dee piki fou. Hii juu mi ta pakisei di tëkisi dë, nöö te kuma tide a ta heepi mi jeti. Dee soni di di gaanwomi piki mi tooka mi libi gaanfa seei.”​—Mateosi 10:31.

3. (a) Andi apösutu Paulosu bi taki u di da di u musu ta da wotowan taanga? (b) Andi woo luku a di woto aki?

³ Di Bëibel ta taki taa hiniwan juu u musu ta da useei taanga.  Apösutu Paulosu bi sikifi wan biifi da dee Hebelejën Keesitu sëmbë taa: „Un musu mëni unu seei, dee sëmbë fuu dë, be na wan fuunu seei musu abi di lö hogihati di dee sëmbë dë bi abi. An musu dë taa wan kë biibi te un bia baka kumutu disa di libilibi Gadu. Wan jei fa di Buku taki „tide” nö? Wë nöö un musu ta da unu seei taanga hibiwan daka u nöömö.” Paulosu bi taki faandi mbei u musu ta da useei taanga. A bi taki taa: ’Nöö soni an o ganjan i tja go a hogi së tee ja o a’ bisi ku Masa Gadu möön seei’ (Hebelejën 3:12, 13). Pakisei unfa i bi fii di wan sëmbë bi da i taanga. Wë andi o mbei taa i da dee baaa ku dee sisa fii taanga? Andi u sa lei a di fasi fa Jehovah, Jesosi, ku Paulosu bi da wotowan taanga? Nöö na un fasi u sa da wotowan taanga? Boo luku dee hakisi aki.

4. Ambë ku ambë abi taanga fanöudu? Faandi mbei gaansë u sëmbë a di ten aki an ta da wotowan taanga?

⁴ Hii u tuu abi taanga fanöudu. Nöö dee mama ku dee tata seei musu ta da dee mii u de taanga tu. Wan womi de kai Timothy Evans, di ta lei mii soni a siköö, bi taki taa: „Leti kumafa wan folo ta abi wata fanöudu, sö nöö wan mii ta abi taanga fanöudu.” A bi taki söseei taa: „Te i ta da wan mii taanga, nöö a ta fii bunu.” Ma u di u ta libi a „dee lasiti daka u di goonliba aki”, mbei sömëni sëmbë ta pakisei deseei nöö, söseei ’de an abi fii a de hati da na wan kodo sëmbë’ (2 Timoteo 3:1-5). So u dee mama ku dee tata an ta da dee mii u de taanga, u di de mama ku de tata seei an bi ta da de taanga tu. Gaan sëmbë seei abi taanga fanöudu. Ma na hii juu sëmbë ta da de taanga. So u de ta taki taa nöiti sëmbë ta gafa de u dee soni de ta du a wooko.

5. Na un ten u sa da wotowan taanga?

⁵ U sa da wotowan taanga te u ta gafa de u wan bunu soni di de du. U sa da wotowan taanga tu, u di woo piki de taa de abi bunu fasi, söseei u di woo ta da de kötöhati te de ta tjali, nasö te de ta fii booko saka (1 Tesalonika 5:14). U di u lo’ u dë makandi ku dee baaa ku dee sisa fuu, mbei u abi di okasi u taki soni di ta da de taanga. (Lesi Peleikima 4:9, 10.) Fëën mbei hakisi iseei dee soni aki: ’Mi ta piki wotowan faandi mbei mi lobi de u? Nöö mi ta piki de ën a hiniwan okasi ö?’ Pakisei di soni di di Bëibel ta taki. A ta taki taa: „Wan soni di de taki a wan soifi ten, bunu seei!”​—Nöngö 15:23.

6. Faandi mbei Saatan kë u dee sëmbë u Gadu fii booko saka? Konda unfa a bi pooba u du di soni aki.

⁶ Nöngö 24:10 ta taki taa: „I ta fii booko saka te fuka ta miti i ö? Ee sö a dë, hën da ja o abi kaakiti tjika.” Saatan sabi taa ee a mbei u fii booko saka, nöö u ku Jehovah an o dë gaan mati möön. A bi pooba u mbei Jöpu fii booko saka, u di a bi mbei gaan fuka miti ën. Ma di soni di Saatan bi abi a pakisei an bi pasa kumafa a bi mëni. Jöpu bi hoi hënseei a Jehovah (Jöpu 2:3; 22:3; 27:5). Useei sa feti ku Saatan, sö taa an wini u. Ee u ta da dee famii fuu ku dee baaa ku dee sisa fuu a di kemeente taanga, nöö woo sa heepi useei fuu sa ta dë waiwai, söseei fuu sa dë Jehovah mati u nöömö.

7, 8. (a) Unfa Jehovah bi ta da sëmbë taanga? (b) Unfa dee mama ku dee tata sa djeesi Jehovah? (Luku di peentje a bigi u di woto.)

⁷ Jehovah ta da sëmbë taanga. Di psalöm sikifima bi sikifi taa: „Jehovah dë zuntu u dee sëmbë dee lasi hati. A ta tjubi dee sëmbë dee ta fii booko saka” (Psalöm 34:18). Di di tjabukama de kai Jelemia bi ta fëëë, söseei di a bi lasi hati, hën Jehovah piki ën taa a o heepi ën (Jelemia 1:6-10). Jehovah bi manda wan ëngëli faa go da di gaandi tjabukama fëën de kai Daniëli taanga, nöö di ëngëli bi piki ën taa: „I da wan womi di Gadu lobi gaanfa seei” (Daniëli 10:8, 11, 18, 19). I sa ta da dee baaa ku dee sisa fii taanga a di wan seei fasi tu ö? Dee pionili ku dee baaa ku dee sisa dee ko gaandi kaa, dee an sa du sö hia möön, seei i sa da taanga.

 ⁸ Hii fa Jehovah ku Jesosi bi dë makandi sömëni jaa longi, tökuseei Jehovah bi sabi taa a bi musu ta da di Womi Mii fëën taanga jeti di a bi dë a goonliba aki. Jesosi bi jei hën Tata töngö a liba ala di a bi bigi ta du di peleikiwooko, söseei a di lasiti jaa di a bi dë a goonliba aki. Tu pasi Jehovah bi taki taa: „Ja si di sëmbë aki ö? Hën wë da di lobi womi mii u mi. Libi fëën ta kai ku mi” (Mateosi 3:17; 17:5). A musu u dë so taa Jesosi bi feni taanga di a jei hën Tata taki taa a lobi ën, söseei taa a ta wai ku ën. Jesosi bi ta booko hën hedi gaanfa seei a di ndeti ufö a dëdë. Jehovah bi manda wan ëngëli u ko dëën taanga ku kötöhati (Lukasi 22:43). Un dee mama ku dee tata un sa djeesi Jehovah, u di woon ta da dee mii fuunu taanga hii juu. Un musu ta gafa de te de du wan soni bunu. Nöö te tesi ta miti de a siköö, nöö un musu du hii soni di un sa du u da de taanga, söseei u heepi de u de sa hoi dou.

9. Andi u sa lei a di fasi fa Jesosi bi ta libi ku dee apösutu fëën?

⁹ U sa djeesi Jesosi tu a dee bunu soni dee a bi ta du. A di ndeti ufö Jesosi dëdë, hën a wasi dee apösutu fëën futu, hën a piki de faandi mbei a dë fanöudu u abi sakafasi. Ma de bi abi gaanfasi, nöö de bi ta buja ee ambë da di möön hei wan, söseei Petuisi bi djula taa nöiti a bi o go disa Jesosi (Lukasi 22:24, 33, 34). Jesosi an bi ta buta pakisei a dee föutu di de bi ta mbei. Ma a bi ta gafa de u di de bi ta hoi deseei nëën. A bi paamusi de taa de bi o du gaan soni möön dee soni di hënseei bi du, söseei a bi piki de taa Jehovah lobi de (Lukasi 22:28; Johanisi 14:12; 16:27). U sa hakisi useei taa: ’Mi ta djeesi Jesosi ö?’ ’Mi ta gafa wotowan u dee bunu fasi di de abi, ka u mi ta buta pakisei a dee föutu u de u?’

10, 11. Unfa Paulosu bi ta da dee baaa ku dee sisa fëën taanga, nöö andi a bi dë kabakaba u du?

¹⁰ Apösutu Paulosu bi lo’ u taki bunu soni u dee baaa ku dee sisa fëën. Sömëni jaa longi hën ku so u de bi nango a kamian makandi, nöö a bi ko sabi de bunu seei. An bi taki soni u dee föutu di de bi mbei, ma a bi ta gafa de. Paulosu bi taki u Timoteo taa: „Hën da wan lobi womi mii u mi di Masa Gadu da mi, nöö mi sabi taa a o du leti kumafa Gadu taki.” Söseei a bi dë seiki taa Timoteo bi o da dee wotowan dee soni di de abi fanöudu (1 Kolenti 4:17; Filipi 2:19, 20). Paulosu bi piki dee Keesitu sëmbë u Kolenti taa hën ku Titusi bi ta „waka ta du di wooko u Gadu makandi”. Söseei a bi piki de taa: „Fa mi bi ta biinga ku unu naandë, nöö hën wë bi ta heepi mi e” (2 Kolenti 8:23). U sa dë seiki taa Timoteo ku Titusi bi feni taanga di de ko sabi unfa Paulosu bi ta pakisei u de!

¹¹ Paulosu ku ën mati Banabasi bi da dee baaa ku dee sisa u de taanga, hii fa dee sëmbë u di köndë bi sa kii de. Hii de tuu bi sabi taa sömëni u dee sëmbë a di köndë Lisita bi kë kii de, tökuseei de bi toona go baka u da dee njunjun bakama u Jesosi taanga, söseei de bi heepi de u hoi deseei a Jehovah (Tjabukama 14:19-22). Bakaten di Paulosu go a di köndë Efeise, hën wanlö gaan hia sëmbë bi kë du hogi ku ën, tökuseei a bi fika dë wan hii pisiten u da dee baaa ku dee sisa taanga. Tjabukama 20:1, 2 ta taki taa: „Paulosu manda kai dee biibima u Masa Jesosi u di köndë fu de musu ko nëën. Hën a fan ku de te a kaba da de hati a di biibi. Hën a da de adjoisi faa pasa go a Masadonia köndë awaa. Nöö di a nango, hën a ta waka a dee köndëköndë u Masadonia ta fan ku dee sëmbë dee ta biibi a dee köndë dë ta da de hati fu de hoi di biibi dou. Hën a nango tefa a go dou a Giiki köndë.”

12. Faandi mbei u musu nango a dee komakandi?

¹² Jehovah kë da u di möön bunu soni. Fëën mbei a ta piki u taa u musu nango a dee komakandi hii juu. A dee komakandi fuu u ta lei soni u Jehovah, söseei u ta da useei taanga. (1 Kolenti 14:31; lesi Hebelejën 10:24, 25.) Cristina di u bi taki soni fëën a bigi u di woto aki, bi taki taa: „Di soni di mi lobi a dee komakandi, hën  da di lobi ku di taanga di mi ta feni a dee komakandi. So juu mi ta dë tjalitjali te mi dou a di Könuköndë zali. Ma nöö dee sisa ta waka ko a mi, nöö de ta baasa mi, nöö de piki mi taa mi hanse tide seei. De ta piki mi taa de lobi mi, nöö de ta wai seei fa mi nango a fesi a di biibi. Di taanga di de ta da mi ta mbei mi fii bunu seei!” Fëën mbei a dë wan fanöudu soni seei fuu ta da wotowan taanga!​—Loomë 1:11, 12.

13. Faandi mbei dee baaa ku dee sisa dee ta dini Jehovah sömëni jaa kaa abi taanga fanöudu tu?

¹³ Dee baaa ku dee sisa dee ta dini Jehovah sömëni jaa kaa, seei abi taanga fanöudu. Pakisei Josua. Di dee Isaëli sëmbë bi o go a di Paamusi Köndë, hën Jehovah bi tei Josua u tii de. Tökuseei Jehovah bi piki Mosesi taa a musu da Josua taanga, hii fa Josua bi ta dini ën sömëni jaa longi kaa. Jehovah bi taki taa: „Buta Josua kuma fesima. Dëën degihati ku taanga, biga hën o tja dee sëmbë go a aba lio. Hën o mbei de wini di köndë di joo si” (Detolonomi 3:27, 28). Josua bi abi taanga fanöudu, u di bakaten dee sëmbë bi o feti sömëni feti, söseei de bi o lasi di lasiti feti (Josua 7:1-9). A di ten aki u sa da dee gaanwomi ku dee keling-gaanwomi taanga, u di de ta wooko taanga u luku dee sëmbë u Gadu. (Lesi 1 Tesalonika 5:12, 13.) Wan keling-gaanwomi bi taki taa: „So juu dee baaa ku dee sisa ta sikifi wan biifi u da u tangi, u di u bi go luku de. U tjubi dee biifi aki, nöö u ta lesi de te u fii booko saka. Dee biifi aki ta da u taanga seei.”

14. Andi wan baaa bi taki di ta lei taa a dë wan bunu soni u ta gafa wotowan te u ta da de lai?

¹⁴ Wan daka apösutu Paulosu bi musu da dee sëmbë u Kolenti lai. Di dee sëmbë u Kolenti du di soni di a bi piki de, hën a bi gafa de (2 Kolenti 7:8-11). U sa dë seiki taa dee soni dee a piki de bi da de taanga u du bunu soni go dou. A di ten aki dee gaanwomi ku dee mama ku dee tata sa djeesi Paulosu. Wan baaa de kai Andreas di abi tu mii taki taa: „Te u ta da dee mii taanga, nöö a ta heepi de u go a fesi a di biibi, söseei a ta mbei de fii bunu tu. De o ta du dee soni di i taki da de, te i ta da de taanga. Hii fa dee mii fuu sabi andi da bunu soni, tökuseei te u ta da de taanga hii juu, nöö de ta ko abi di guwenti u ta du bunu soni.”

15. Andi da wan fasi fa u sa da wotowan taanga?

¹⁵ Piki dee baaa ku dee sisa fii unfa i ta tei dee möiti di de ta mbei u bigi, söseei unfa i lobi dee bunu fasi u de tjika (2 Kloniki 16:9; Jöpu 1:8). Te u ta du di soni aki, nöö u ta djeesi Jehovah ku Jesosi. De ta tei hii dee soni dee u ta du da de u bigi, aluwasi wa sa du hia soni kumafa u bi o kë. (Lesi Lukasi 21:1-4; 2 Kolenti 8:12.) U sabi taa a ta taanga da dee baaa ku dee sisa fuu dee ko gaandi kaa, u ko hii juu a dee komakandi, söseei u nango hii juu a di peleikiwooko. U ta da de taanga u, söseei u ta gafa de u hii dee soni di de ta du ö?

16. Na un ten u sa da wotowan taanga?

¹⁶ U musu ta da wotowan taanga a hiniwan okasi di u feni. Te i si taa wan sëmbë du wan soni bunu, nöö i musu gafa di sëmbë. Di Paulosu  ku Banabasi bi dë a Antiokia di dë a di pisiwata de kai Pisidia, hën dee hedima u di keikiwosu u dee Dju piki de taa: „Dee sëmbë, fa un ko mökisi ku u aki, ee un a’ wan soni u taki di sa da u hati, nöö un tuwë ko boo jei” (Tjabukama 13:13-16, 42-44). Te u ta da wotowan taanga, nöö wotowan o da u taanga tu.​—Lukasi 6:38.

17. Andi da di möön bunu fasi u gafa wotowan?

¹⁷ Piki ën di soni di a du bunu. Di Jesosi bi gafa dee Keesitu sëmbë a Tiatila, nöö a bi konda da de andi de bi du bunu. (Lesi Akoalimbo 2:18, 19.) Unfa u sa djeesi Jesosi? Kandë u sa gafa wan mama u di fasi fa a ta kiija dee mii fëën hën wanwan, hii fa a ta taanga dëën. Nasö ee ju da wan mama nasö wan tata, nöö i sa gafa dee mii fii u di möiti di de ta mbei u dini Jehovah. Konda da de un bunu soni i ta si a de. Te u piki wotowan di soni di de du bunu, nöö de o sabi taa di soni di u taki kumutu a u hati tuutuu.

18, 19. Unfa u sa heepi useei fuu sa dë mati ku Jehovah u nöömö?

¹⁸ Jehovah bi piki Mosesi taa a musu da Josua taanga, söseei taa a musu dëën degihati. Wë Jehovah an o ko fan ku u langalanga a di ten aki, fuu go da wan sëmbë taanga. Ma a ta wai te a ta si dee möiti dee u ta mbei fuu da wotowan taanga (Nöngö 19:17; Hebelejën 12:12). Wë te wan baaa hoi wan taki a di kemeente fuu, nöö u sa piki ën andi u bi lobi a di taki fëën. Kandë di soni di a taki bi heepi u fuu sa libi ku wan bookohedi di u abi, nasö a heepi u fuu fusutan wan Bëibel tëkisi möön bunu. Wan sisa bi sikifi wan biifi da wan baaa di bi hoi wan taki. A bi sikifi taa: „Hii fa wantu miniti nöö mi ku i bi fan, tökuseei i bi si un fuka bi dë a mi hati, nöö i da mi kötöhati, söseei i mbei mi ko ta fii bunu baka. Mi kë fii sabi taa di i bi dë a di podium liba ta fan, ku di i bi fan ku mi di i kaba hoi di taki, hën mi bi fii taa Jehovah da mi wan kado.”

¹⁹ Woo sa heepi useei fuu dë mati ku Jehovah u nöömö, ee u du di soni di Paulosu bi taki. A bi taki taa: „Be un ta da unu seei degihati ta heepi unu na unu fuun nango fesi nöömö, leti kumafa un ta du dë kaa” (1 Tesalonika 5:11). Ee u ta ’da useei taanga hibiwan daka u nöömö’, nöö woo mbei Jehovah wai ku u gaanfa seei!