1, 2. Xeeni varyaaya vootthuneya waalipiha akina?

CRISTINA, yoowo orina iyaakha 18, onihimya so: “Nkitonko olipihiwa ni anamuyari aka, masi awo yaamakela okipwapwela. Moolumo aya yaanikiwereiha murima. Yaahimya wira kaari mwaana, nkaakhala-khala kiixuttaka etthu ni nkaareere oneneva. Tivonto, okathi munceene kaamakela wunla ni nkaalavulana. Nto koona wira nkaarina efaita”. ^[1] (Nwehe enoota.) Tthiri ti vooxankiha akhala wira khuuvo onnilipiha!

² Masi nkahaya muupuwele moota moolumo ahu oolipiha anaakhaliherya aya akina. Rubén onihimya wira: “Mwa iyaakha sinceene koona wira nkaarina efaita. Masi nihiku nimosa, kaahirowa olaleerya ni mutokweene yoowo oonale wira nkaakhanle saana nihiku nne. Owo aahikiwiriyana saana okathi kaamutthokiherya aka mixankiho saka. Nuumala okiwiriyana, aahikuupuxerya itthu sooloka saapanke aka. Nave aahikuupuxerya moolumo a Yesu anooniherya wira: khula mmosa a hiyo ookhalana efaita ovikana iphera sinceene. Ikwaha sinceene, kinnuupuwela yoolepa ele ni nlelo ennivara murima aka. Tthiri moolumo ale yaalavuliwe  ni mutokweene ole aakikhaliherya vanceene”.​—Matheyo 10:31.

3. (a) Murummwa Paulo aahimmye exeeni sa waalipiha akina? (b) Mwaha ola, ninrowa othokorerya exeeni?

³ Biibiliya onihimya wira nihaana olipihana khula okathi. Murummwa Paulo aahaalepela maKristau aHeeberi wira: “Axinn’aka: mwipasope wira ahikhale, nnákhala mmosá awinyu, orina murima wotakhala ni wohamini, mpakha omwalana ni Muluku mukumi. Ohiya vo, mulipihaneke murima mukina ni mukhw’awe, nihiku ti nihiku”. Paulo aahitthokiherya nthowa naya oriki: “Wira ahikhalé mwa nyuwo onìhiya otothiwaka n’itampi, onùmiha murim’awe”. (aHéberi 3:12, 13) Nkahaya muupuwele moota munihakalala anyu vaavo munilipihiwa anyu. Nto, niireke nookhalana mathowa anniiriha waalipiha annihu? Ntakiheryo na Yehova, Yesu ni Paulo ninniixuttiha exeeni voohimya sa waalipiha akina? Mwa inamuna xeeni ninrowa ahu waalipiha akina? Nrowe nithokorerye makoho ala.

4. Tani ohiniphavela olipihiwa? Exeeni eniwiiriha atthu anceene olelo-va ohaalipihaka akina?

⁴ Otheene ahu ninniphavela olipihiwa. Nto, ti vootthuneya anamuyari waalipiha anaaya. Prusoore oniitthaniwa Timothy Evans onitthokiherya wira anamwane “anniphavela olipihiwa ntoko siisaale mwiri onitthuneya awe okhuwariwa”. Nave onincererya wira: “Omulipiha mwaana, onnimwiiriha woona wira ookhalana efaita ni onnithokoreriwa”. Masi, okhala wira ninkhala “okathi wokiserya”, atthu anceene toowiitthuna ni ‘khaniphentana’ mukina ni mukhwaawe. (2 Timótheyo 3:1-5) Anamuyari akina khanaalipiha anaaya okhala wira khatonko olipihiwa ni anamuyari aya. Nave-tho, atthu aalupale anniphavela olipihiwa masi eyo kheniiraneya ikwaha sinceene. Mwa ntakiheryo, atthu anceene anninlaseya mwaha woowi khatonko ottottopeliwa mwaha wa muteko onivara aya.

5. Ninrowa waalipiha sai atthu akina?

⁵ Nnoowerya waalipiha akina, naattottopelaka okathi anipaka aya etthu yooloka. Nave-tho, nihaana waattottopelaka mwaha wa mikhalelo saya sooloka, ni waalipiha okathi anriipiwa aya murima aahiiso okhulumuwa. (1 aTesalonika 5:14) Okathi ninkhala ahu ni anna ni arokora, ninnikhalana eparakha yoohimya etthu enaalipiha. (Mmusome Musuweli 4:9, 10.) Nto, mwiikoheke so: ‘Kiireke atthu akina annoona wira kinnaavaha efaita ni waaphenta? Kiireke kinnipaka eyo khula okathi?’ Nkahaya muupuwele ele Biibiliya onihimya awe oriki: “Nulumo nowatta okathi worera ti vareranxe”.​—Miruku 15:23.

6. Xeeni Satana oniphavela awe waakhulumula atthu a Muluku? Nvahe ntakiheryo nnooniherya moota onipaka awe eyo.

⁶ Miruku 24:10, onihimya wira: “Mojeyá movelavelani, ikuru sanyu ti sivukunwe”. Satana onnisuwela wira akhala wira onoonikhulumula,  owo pooti otteettheiha wataana wahu ni Yehova. Satana aaheererya omukhulumula Yobi omukumiheryaka maxakha manceene. Masi palano awe khaakhumenle saana. Yobi aahivikaniha ororomeleya wa Yehova. (Yobi 2:3; 22:3; 27:5) Nave-tho, nnoowerya owanana Satana ni omuxintta. Akhala wira nnoovikaniha waalipiha amusi ahu, anna ni arokora a mmulokoni, otheene ahu nnoohakalala ni ovikaniha omwaattamela Yehova.

7, 8. (a) Yehova onaalipiha sai atthu? (b) Anamuyari anrowa otthara sai ntakiheryo na Yehova? (Nwehe elatarato yoopacerya.)

⁷ Yehova. Onnaalipiha atthu. Nasaalimo mmosa olempe wira: “Apwiya ankhala vakhiviru n’ale òtemwa: anniwòpola alipa-òwojeya”. (Esalimo 34:19) Okathi profeta Yeremiya oova awe ni aakhulumunwe awe, Yehova aahimuleiherya omukhaliherya. (Yeremiya 1:6-10) Yehova aahiruma nlaikha wira namulipihe profeta oowuuluvala Daniyeli. Nlaikha nno naahimuhimeerya Daniyeli wira ‘aniphentiwa’. (Daniyeli 10:8, 11, 18, 19) Niireke munnaalipiha anna ni arokora mmutakihaka Yehova, waahela muhina mapioneero ni atthu oowuuluvala ahiniwerya opaka itthu sinceene ntoko saapaka aya khalai?

⁸ Nnaamwi Yehova ni Yesu, yaakhanle hoothe mwa iyaakha sinceene, Yehova aanisuwela wira vaanitthuneya omulipiha Mwanawe okathi aaryaawe valaponi. Yesu aahimwiiwa Tiithi awe olavulaka wiirimu okathi apacenrye awe muteko awe woolaleerya ni eyaakha yookiserya okhala valaponi. Yehova aahilavula masu ala ikwaha piili oriki: “Ola mwan’aka onimphentexaka: miyo kosiveliwa ni yowo”. (Matheyo 3:17; 17:5) Mwekeekhai Yesu aahilipa vanceene omwiiwa Tiithi awe ohimyaka wira aanimphenta ni aanihakalala ni yena. Muhoolo mwaya, Yesu ohinatthi wiiviwa ohiyu ole, owo aahixanka vanceene. Yehova aahiruma nlaikha wira namulipihe ni omukhaliherya. (Luka 22:43) Nyuwo anamuyari, munoowerya omutakiha Yehova mwaalipihaka aniinyu khula okathi. Mwaattottopeleke vaavo anipaka aya etthu yooloka. Nave, vaavo aneehereriwa aya oxikola, mmananihe waalipiha ni waakhaliherya ovilela.

9. Nniixutta exeeni moota Yesu aathokorerya awe arummwa awe?

⁹ Yesu. Oovaha ntakiheryo nooloka wira nitthareke. Ohiyu ole Yesu aarowa awe wiiviwa, aahirapiha inawu sa arummwa awe, aaleelaka otthuneya waya wiiyeviha. Masi awiixutti ale yaanixinnuwiha ni yaanivaanyihana aphavelaka osuwela tani aari muulupalexa, nave Pedru aahilapha oriki khaakhala-khala omuhiyaka Yesu. (Luka 22:24, 33, 34) Masi Yesu khaawehexexa soovonya saya. Owo aahaattottopela mwaha woovikaniha ororomeleya wa yena. Nave aahilavula wira awiixutti awe yaarowa ovara miteko suulupalexa ovikana iye  aavanre awe, aalipiheryaka wira Yehova aanaaphenta. (Luka 22:28; Yohani 14:12; 16:27) Niikoheke so: ‘Kinnitthara ntakiheryo na Yesu kaattottopelaka akina mwaha wa mikhalelo saya sooloka, kihiwehexexaka soovonya saya?’

10, 11. Paulo aalipihale sai annawe, ni aalakenle opaka exeeni hata atthu yaaphavela omwiiva?

¹⁰ Murummwa Paulo. Ikwaha sinceene aanaattottopela annawe mwaha wa miteko saya sooloka. Okhala wira aahiviriha iyaakha sinceene eettaka ni annawe muteko wa omisionaario, anaasuwela saana, masi khaalempe soovonya saya. Ohiya-vo, owo aanaattottopela. Mwa ntakiheryo, Paulo aahimmye wira Timootheyo aari ‘mwanawe amphentawe ni òroromeleya mw’Apwiya’ ni aanikupali wira Timootheyo aamwaakhapelela saana atthu akina. (1 aKorinto 4:17; aFilipi 2:19, 20) Paulo aahaahimeerya maKristau oKorinto wira Tito aari ‘mukhw’awe àvarenle muteko’ wira aakhaliherye. (2 aKorinto 8:23) Tthiri, Timootheyo ni Tito yaahilipa nuumala osuwela moota Paulo aawoonela awe!

¹¹ Paulo ni Baarnaba yaahileva ikumi saya wira yaalipihe annaya. Mwa ntakiheryo, awo yaahisuwela wira atthu anceene a epooma ya oListra yaaphavela owiiva. Hata vari siiso, awo yaahitthikela wira yaalipihe awiixutti asya ni waakhaliherya ovikaniha ororomeleya wa Yehova. (Miteko 14:19-22) Muhoolo mwaya, vaavo yaaryaaya wEefeso, Paulo aahixanka mwaha wa muttitthi wootakhala wa atthu waaphavela omutuphela, masi aahiviriha okathi wira aalipihe annawe. Miteko 20:1, 2 onihimya wira: “Paulo ahathukumanya aKristu, ahahimerya molumo òwalipiha murima, khwalaxerya. Numalá, ahivenya, arowaka oMasedonia. Ahettetta elapo eyo yothene, àlipihaka murima aKristu ni miruku sinjene. Numalá, ahiphiya oGresia”.

12. Xeeni varyaaya vootthuneya orowa omuthukumanoni?

¹² Yehova oniphavela mureerelo ahu. Tivonto, onnileela awe wira nihicompeleke mithukumano. Mithukumano sahu ninniixutta voohimya sa Yehova ni olipihana mukina ni mukhwaawe. (1 aKorinto 14:31; mmusome aHéberi 10:24, 25.) Cristina, oromoliwe wanipacerya wa mwaha ola, onihimya so: “Etthu enikisivela omithukumanoni ophentiwa ni olipihiwa ni anna. Ikwaha sikina kinrowa kikhulumunwe ene Empa ya Omwene. Masi arokora annikikhupaarela, ahimyaka wira koophwaneliwa. Nave annikileela wira annikiphenta ni annisiveliwa woona moota oninnuwa aka momunepani. Moolumo oolipiha a arokora annikiiriha woona wira kookhalana efaita yinceene!” Tthiri ti vootthuneya waalipiha akina!​—aRoma 1:11, 12.

13. Xeeni anna yaale apacenrye khalai omurumeela Yehova anireerela aya olipihiwa?

¹³ Hata anna yaale apacenrye khalai omurumeela Yehova anniphavela olipihiwa. Nkahaya mmuupuwele Yoxuwa. Vaavo aIsarayeli yaahanle aya vakhaani okela Elapo Yooleiheriwa, Yehova aahimuthanla Yoxuwa wira aahooleleke. Masi, Yehova aahimuleela Moise wira omulipihe nnaamwi Yoxuwa aamurumeela Yehova mwa iyaakha sinceene. Yehova aahimmye wira: “Munvahe soruma sanyu Yoxuwa, mmulipihe  murima wira akhalane nthiti: tthiri ti yowo onrowa olapuwa [muro] Yordani, àholelaka atthu ala; ti yowo-tho onrowa wakilathiha mulaponi munònanyu”. (Otumererya 3:27, 28) Yoxuwa aahaana olipihiwa maana muhoolo mwaya nloko nne naarowa owana ikhotto sinceene, masi naamuxinttiwa ekwaha emosa. (Yoxuwa 7:1-9) Olelo-va, nnoowerya waalipiha axitokweene a mmulokoni ni a esirkwiitu, yaawo aniimananiha waakhapelela atthu a Muluku. (Mmusome 1 aTesalonika 5:12, 13.) Mutokweene mmosa a esirkwiitu ohimmye wira: “Okathi onixukurya ahu muloko, ikwaha sikina anna anninlepela iwarakha ahimyaka wira annixukhurela vanceene. Nto okathi onikhulumuwa ahu, ninnisoma iwarakha iyo. Tthiri sinninlipiha vanceene”.

14. Matakiheryo xeeni ooloka anooniherya wira nihaana waattottopela akina okathi onaavaha ahu miruku?

¹⁴ Okathi omosa, murummwa Paulo aahaavaha miruku maKristau a oKorinto. Vaavo yeettela aya miruku iye, Paulo aanaattottopela. (2 aKorinto 7:8-11) Mwekeekhai, moolumo awe yahaakhaliherya anna ale ovikaniha opaka itthu sooloka. Olelo-va, axitokweene ni anamuyari annitthara ntakiheryo na Paulo. Andreas, yoowo orina anamwane anli, onihimya wira: “Waalipiha anamwane onnaakhaliherya wunnuwa momunepani ni muupuwelo aya. Waalipiha iwo onimwaakhaliherya ovarihela muteko miruku sinaavaha aya. Nnaamwi aniihu asuwelaka itthu sooloka, waattottopela onnaakhaliherya opaka itthu sooloka khula okathi”.

15. Ninrowa waalipiha sai akina?

¹⁵ Mwaaleeleke anna ni arokora wira munnixukhurela wiimananiha waya ni mikhalelo saya sooloka. (2 Wahala 16:9; Yobi 1:8) Okathi onipaka ahu eyo, nimmutakiha Yehova ni Yesu. Awo annixukhurela miteko sahu sooloka, nnaamwi nihiweryaka opaka ntoko simphavela ahu. (Mmusome Luka 21:1-4; 2 aKorinto 8:12.) Mwa ntakiheryo, ninnisuwela wira khivanikhweya annihu oowuuluvala orowa omuthukumanoni ni olaleerya ntoko yiiraaya khalai. Niireke ninnaalipiha ni waattottopela mwaha wa wiimananiha waya?

16. Okathi xeeni ninrowa ahu waalipiha akina?

¹⁶ Mwaalipiheke akina khula okathi onireerela aya. Khula okathi muninweha  anyu mutthu opakaka etthu yooloka, muhaana omuttottopela. Okathi Paulo ni Baarnaba yaaryaaya wAntiyokiya ni oPisidia, akhulupale a esinagoga yaahimenrye wira: Anna “mwariná molumo òwatumererya atthu, himyakani”. Nto Paulo aahittottela muraarelo okathi ole wira aalipihe atthu. (Miteko 13:13-16, 42-44) Vaavo vanaalipiha ahu akina, nave awo anrowa onlipihaka.​—Luka 6:38.

17. Enamuna xeeni yootepa oloka ya waattottopela akina?

¹⁷ Mulavuleke mooluluwanya. Okathi Yesu aattottopenle awe maKristau a oTiyatira, owo aahilavula mooluluwanya ni aahitthokiherya itthu sooloka saapanke aya. (Mmusome Wisupulula 2:18, 19.) Ninrowa omutakiha sai? Woonasa wene, hiyo pooti omuttottopela mai ohitheliwe moota onaahuwa awe anaawe, nnaamwi okhalanaka mixankiho. Aahiiso akhala wira mwa namuyari, muhaana waattottopela aniinyu mwaha wa wiimananiha waya omurumeela Yehova. Nave mwaattottopeleke vaavo anipaka aya itthu sooloka. Akhala wira moolumo anyu tooluluwanya okathi munaalipiha anyu atthu akina, eyo enimwaakhaliherya wiiwexexa saana ele enihimya anyu.

18, 19. Ninrowa okhaliheryana sai mukina ni mukhwaawe ovikaniha omwaattamela Yehova?

¹⁸ Yehova aahimuleela Moise wira omulipihe Yoxuwa. Tthiri olelo-va, Yehova khonrwa mwaneene onileela wira namulipihe mutthu mukina. Masi owo onnihakalala oweha wiimananiha wahu wira naalipihe atthu akina. (Miruku 19:17; aHéberi 12:12) Mwa ntakiheryo, vaavo munna onilavula awe mwaha mmulokoni mwahu, nihaana omuleela wira mwaha awe khaareere oreera. Woonasa wene, ele elavunle awe yoonikhaliherya woona moota wooxintta muxankiho aahiiso wiiwexexa yoolepa. Murokora mmosa aahimulepela munna aalavunle mwaha oriki: “Nnaamwi nilavunle ene minutu vakhaani, mooweha etthu enkixankiha, mookikhaliherya vanceene ni okilipiha. Kiniphavela wooleelani wira vaavo munilavula anyu mwaha mooreerela murima opalkuni aahiiso mwaavaanelaka ni mutthu, kinnoona wira kookhalana efaita ohoolo wa Yehova”.

¹⁹ Nnoowerya okhaliheryana mukina ni mukhwaawe, ni ovikaniha omwaattamela Yehova, akhala wira ninnitthara miruku sa Paulo sini: “Mulipihaneke murima, mukhaliheryaneke ntoko sinìranyu vano”. (1 aTesalonika 5:11) Akhala wira ‘nnolipihana murima mukina ni mukhw’awe, nihiku ti nihiku’ ninrowa omuhakalaliha Yehova vanceene!