1, 2. (a) Attu enjene aloga dhavi sabwa ya osasanyedhiwa wa nikuru na Mulugu? (b) Mwari mwa mutoma obu ninasekeserhe eni?

ATTU eena anloga wila: “Kili yofuneya weeddihiwa na nlelo. Enfuneya ku wandana wawo na Mulugu.” Enokala-wene? Ebaribariya jivi?

² Mwari mwa mutoma obu, ninele woona wi Yehova ohittandda dhilobo dhetene na mukalelo waderetu vina ohasasanyedha attu a nlogo naye. Ninele ologa sabwa ekalelani yaderetu ofara malago a Yehova andha na nikuru naye. (1 Korinto 14:33, 40) Vyaka zana dhoroma, nlogo na Yehova nanfwara malago ali Mmaleboni, vina ahidhowa olaleya miselu dhapama mmimburoni mottiyana-ttiyana. Dhahene ninga awene, ninoweeddihiwa na magano a Bibilia. Nigarumeela mowakwana, ninopurelamo malago a masasanyedho a Mulugu. Yopurelamo yina ku olaleya miselu dhapama orugunuwa elabo yotene. Eji vina enokamihedha mulogo okala wotxena, wowiwanana vina wa murenddele.

3. Onrumelela eni wila Yehova Mulugu wa malabelo apama?

³ Nigang’ana dhilobo dhetene dhittanddile Yehova, ninowoona wila txibarene iyene Mulugu wa malabelo apama. “Nabuya [Yehova] na zelu dhaye, n’onona waye opaddutxa elabo y’odhulu na elabo yavati.” (Gano 3:19) Dhikalawo dhilobo dhinjene dhittanddile Yehova dhihinziwa iyo. Txibarene, “dhiwalehu veneva, evolo bahi ya dhikosileye.” (Job 26:14) Masiki nisunzilevi dhilobo dhing’onovi, ninoziwa wila Yehova, Mulugu wa malabelo apama. (Masalmo 8:3, 4) Matxikwi na matxikwi a neneri dhinedda wirimu, sosasanyedheya. Ninotikina vaddiddi oziwa wi elabo jinwerewera Nzuwa. Masasanyedho aba otikiniha ahiwodheya sabwani Yehova ohittanddika dila munvira neneri, vamodha na dhilabodha. Wubuwela muttanddelo “ottanddiliye na oderetu erimu” vina elabo ya vati, enonttukulela omwebedha, omuttittimiha vina omulaba iyene bahi.​—Kengesa Masalmo 136:1, 5-9.

4. Asientista enjene ankoddela eni owodha wakula mavuzo manddimuwa?

⁴ Dhilobo dhisunzile Asientista mwilaboni mudhidhi mwina dhinonikamihedhaga. Mbwenye awene kawodhile wakula mavuzo manddimuwa ankosa attu enjene. Motagiha, anamasunza dh’odhulu kanwodha onaddela mowakwana maromelo a elabo, obe ekaleli ttu, dhinama na miri velaboni ya vati. Enjene kanwodha otapulela sabwaya akaaneli attu efunelo ya okalawo na mukalakala. (Kohelét 3:11) Elobo enakosiha attu ohiwodha wakula mavuzo aba, jawila anubuwela wi Mulugu kawo, vina dhilobo dhipadduwile woka. Mbwenye Mulugu ononivaha dhowakula Munivuruni mwaye, Bibilia.

5. Attu ankuluvela dhavi malamulo a mwilaboni?

⁵ Yehova ohita malamulo menjene aneeddiha elabo. Malamuloya abo kansadduwa. Anamasasanya enerjia, tubu (mpembe) dha manje, enjinyero, anameddiha aviau, adotoro a operasau, anogayela malamuloya abo wi attidde mabasawa. Motagiha, murima wa muttu onkala niburo nimodhanene, noona dotoro onkosa operasau kanrabuliheya agafunaga omulaba kadda muredda. Kadda muttu onoziwa wila agawela vego volapa alupela vati, onowundeya obe okwa. Iyo ninovirihamo malamulo abo sabwani ninofuna okalawovi.

6. Ninziwa dhavi wila Yehova onfuna wi attu amwebedhe mowiwanana?

⁶ Yehova ohittandda elabo na masasanyedho aderetu. Noona, iyene onfuna wila attu amwebedhege na mukalelo wapama. Ndde, Yehova onivaha Bibilia wi anisunzihe mebedhelo animuhagalaliha. Nigafara malago annivahiye mBibiliani, vina a nikuru naye, panakaanihu egumi yaderetu vina yohagalaliha.

7. Mulebelo olebiwe Bibilia onnisunziha eni?

⁷ Bibilia mvaho wa Mulugu. Aziwitxi enjene anologa wila Bibilia otaganyihiwa wa manivuru a Ayuda na Akristu. Eji kahiyo ebaribari, sabwani Mulugu ddasakulile anamalebaya, vina ejile yafuna olebiwa. Noona manivuru otene ali mBibiliani anonikamihedha  ononelamo miselu dha Mulugu. Oromana nivuru na Wita mpaka Ovuhulela, Bibilia onolagiha wila agahidha “mudhuli” agakosile elabo ya vati okala paraizu. Nihisunza wila “mudhuli” oddo ddi Yezu Kristu, na Omwene waye witile Yehova wi alamulele elabo yotene.​—Kengesa Wita 3:15; Mateu 6:10; Ovuhulela 11:15.

8. Ana Izrayel àsasanyedheyi dhavi?

⁸ Ana Izrayel aahifara Malamulo avahiwani na Mulugu, wi aweeddihe mowakwana. Motagiha wahikala “ayana alaba vamavolowelo va musagala mogumana na Nabuya.” (Obudduwa 38:8) Aizrayel ahivahiwa masasanyedho a omwaliha mparha na musasa mowiwanana. Musogorhomwa, Mwene David wahikosa masasanyedho na Alevita vamodha na anamakutta alaba mumparhani. (1 Mapadduwo 23:1-6; 24:1-3) Mwewelelani malamulo aba Yehova wanareliha. Masasanyedho abo ahakosiha okala owiwanana vina na murenddele.—Olibiha 11:26, 27; 28:1-14.

9. Vyaka zana dhoroma milogo dhasasanyiwe dhavi?

⁹ Milogo dha vyaka zana dhoroma dhali dhosasanyedhiwa. Wahikala nikuru nolamulela, navaha malago milogo dhotene. Nikuru ntto enjiya ali arumiwi. Musogorhomwa ahisakuliwa anddimuwa a mulogo eena wi akose epaddi ya nikuru nolamulela. (Merelo 6:1-6; 15:6) Yehova wahasakula attu ang’onovi akosa epaddi ya nikuru nolamulela na ena alaba na awene wi alebe makarta a malago wi avahedhe milogo. (1 Timóteo 3:1-13; Tito 1:5-9) Milogodha dhakamihedheya dhavi vafarani kakamwe malago a nikuru nolamulela?

10. Milogo dha yaka zana dhoroma, mwarumeelani osogorheliwa na nikuru nolamulela txini yapadduwa? (Koona foto eli omaromo.)

¹⁰ Kengesa Merelo 16:4, 5. Vyaka zana dhoroma, abali eena aneddelela milogo wi awaddele abaliya “malago apama vina orumeeleya avahiwani na arumiwi vina na anddimuwa a milogo ali o Jeruzalemi,” abuwene akosa epaddi ya nikuru nolamulela. Milogo dhanrumeela ovirihamo malago abo vina “dhanliba omuyani, nanda muttengo wa abali wanunuwa siku-siku.” Osunza dhotagiha esi dhinnilibiha dhavi mmulogoni mwehu masaka abano?

11. Anddimuwa a mulogo na akamihedhi awa, txini enfanyeelani okosa agavahiwa malago a nikuruni na Mulugu?

¹¹ Abali ankosa epaddi ya Comissão da Filial, (Gatta ya Katti), anameeddelela milogo vamodha na anddimuwa a milogo anovirihamo malago a Mulugu andha na nikuru naye. Ndde, Nivuru na Yehova, ninologa wila nawiwelelege abale annisogorhela. (Olibiha 30:16; Ahebreu 13:7, 17) Abale animwiwelela Yehova, txipo kanimusadduwela vina kanimusumela sabwa ya malago anakelani. Kaninfuna okala ninga Diótrefe, wakoodda wawiwelela abali asogorhela mulogo. (Kengesa 3 Joau 9, 10.) Txibarene iyo nigavirihamo malago abo, ninokamihedha mulogo okala wohagalala, wowiwanana vina wa murenddele. Ovano, nivivuze: ‘Ddinowakokomeza abali na arogora wila akalevi omuroromela Yehova? Ddinovirihamo  mowakwana malago a Mulugu anda na nikuru naye?’

12. Anddimuwa a mulogo na akamihedhi anttomiwa dhavi?

¹² Ovanenevi, Nikuru Nolamulela nitxinja mukalelo onttomiwa anddimuwa a mulogo na adhari okamihedha. Epaddi enloga “Perguntas dos Leitores” va A Sentinela 15 wa Novembro, 2014 ohitapulela wila vyaka zana dhoroma nikuru nolamulela, nahattoma anameeddelela milogo wi attome anddimuwa a mulogo vina adhari okamihedha. Setembro wa 2014 anameddelela milogo enjene ahiroma wattoma abali. Anddimuwa a Mulogo agampaganyedha mbali wi akale mudhari wokamihedha obe munddimuwa wa mulogo, anameeddelela milogo voroma anotamela omuziwa mbaliya vamodha na amudhaye. Motagiha, nameddelela milogo txino onosakula olaba na mbaliya mmabasani a olaleya. (1 Timóteo 3:4, 5) Musogorhomwa anddimuwa a mulogo vamodha na nameddelela milogo, anogumana. Awene anopepesa mofwaseya Malebo dhipaddi dhinloga meddelo a munddimuwa wa mulogo obe mudhari wokamihedha.​—1 Timóteo 3:1-10, 12, 13; 1 Pedru 5:1-3.

13. Ninalagihe dhavi wila ninowiwelela malago a anddimuwa a mulogo?

¹³ Anddimuwa a mulogo anovaha malago andela mBibiliani na efunelo ya onilibiha vina wimetxa mulogo. Ninofanyeela wawiwelela sabwani nigavirihamo malagoya abo ninopurelamo deretu. (1 Timóteo 6:3) Vyaka zana dhoroma attu eena “kewelela.” Ampottowa na wubuwela dhilobo dhahapatta. Anddimuwa a mulogo anavaha malago, mbwenye awene ela okoodda ovirihamo malagoya. Paulo wahiloga mukalelo wafanyeela weddihiwa attu ankoodda wiwelela malago abo. Iyene ologa: “Agakalawo ohinvirihamo magano alebilihu mukartani-mpu, mmusúgule.” Awene anfanyeela ottiya okosa mandano na attuya abo, mbwenye kafanyeela wawoona ninga amwiddani awa. (2 Tesalónika 3:11-15) Anddimuwa a mulogo vina anowakamihedha abale anlupa malamulo a Mulugu, ninga motagiha abale aneeddelelana na muttu ohili mukristu. (1 Korinto 7:39) Akala muttuya kanfuna-wene osaddula mweddelo waye, anddimuwa txino anomukamihedha omutapulela wila mweddelo waye onele wakosiha attu enjene ologaga bure mulogo. Koddi anddimuwa a mulogo agakosaga diskursu ninga ejuwene mmulogoni mwawo onivyona dhavi? Ogamuziwa muttu onkosa dhawene onele okosana mandano? Ndde, ogattiya wandanana, onele omukamihedha muttuya ononelamo wila mweddelo waye bwabure, vina onomunyakuwela Yehova, iyene agamala  onosaddula mweddeloya. ^[1]​—Koona yowenjedha.

14. Ninakamihedhe dhavi mulogo wila okale wotxena?

¹⁴ Nzu na Mulugu ninologa wila muttu ddi muttu akose epaddaye wila anattiye obure wimela mmulogoni. Kobuwela yapadduwile o Korinto. Paulo wanakwela abali otene a wenewale. Wahakamihedha enjiya olibihedha ebaribari. (1 Korinto 1:1, 2) Paulo wahinyonyeya vaddiddi voniliye wi mmulogoni mwahikala muttu wakosetxa mararuwo, nanda abali amuttiya okalavi mwenemo! Paulo wahawaddela anddimuwa a mulogo wi ‘amperhekele Satana muttuyá oddo.’ Awene anfanyeela omuttamagiha mmulogoni mulobwana oddo, kuloga wila amusugule. (1 Korinto 5:1, 5, 6, 12) Masaka abano vina anddimuwa a mulogo anomutxosa muttu onkosa yottega vina ohintxinuwa. Kito ninele omoona muttu ottamagihiwe mmulogoni na mukalelo onloga malebo? Akala ninokosa ejuwene ninottiya mulogo okala wotxenene. Eji vina enomukamihedha muttuya ononelamo wila onofanyeela otxinuwa, vina okumbirha nikamihedho na Yehova.

15. Ninadhena dhavi murenddele mmulogoni?

¹⁵ O Korinto wahikala makani meena. Wahifanyeya Akristu asumela abali awa a mmulogoni. Paulo baavuza: “Kigakalile ovilela muwiyeliwani?” (1 Korinto 6:1-8) Ovanene vina abali ahikosa marhondda na abali eena boona wila kadhipadduwile dhalaganilani. Noona enaya ahasumela abali awa a mmulogoni. Elobo ninga ejene egapadduwa, attu eena a elabo anomuloga Yehova na nlogo naye mubureni. Eji enotota magudulano mmulogoni, noona kinkala mbali omusumela mbali mukwaye. Nivuru na Mulugu ninokokomeza okaana murenddele na abali ehu, masiki eji etapulelaga oyelela korowa yehu. ^[2] (Koona yowenjedha.) Txibarene Yezu onisunziha marhe ogomihana makani ninga abene. (Kengesa Mateu 5:23, 24; 18:15-17.) Nigavirihamo malago aba mulogo onowiwanana vina onokaana murenddele.

16. Nlogo na Mulugu niniwanana dhavi?

¹⁶ Nivuru na Yehova ninonaddela: “Mone! Oziva onjavo anamudhi anedda mumodhani!” (Masalmo 133:1) Ana Izrayel agewelela malago a Yehova, anniwanana vina ankaana murenddele. Mulugu wahiloga na nlogo naye: “Ddinere oukukuselani vamodhavi ninga eniriwana mabila muthangani.” (Mikeya 2:12) Yehova wahiloga wila attu a nlogo naye  agahisunza ebaribari nanda amulabele mumodhani. Iyene ologa: “Osogorhowa ddinere osaddula malogo a amalabo, ddinokupa milomo dhawa wi awodhege ologa na miyo bahi; etene addithithimihege.” (Sofoniya 3:9) Txibarene ninohagalala sabwa ya omwebedha Yehova mumodhani!

17. Anddimuwa a mulogo animukosana dhavi muttu agakosa yoddawa enddimuwa?

¹⁷ Muttu agakosa yoddawa enddimuwa, anddimuwa a mulogo anonvaha malago na okwela. Awene anoziwa wi Yehova ohattoma wi abarele mulogo wi munavolowe mweddelo wabure, nanda wi akoddelihe. (Gano 15:3) Nigengesa karta yoroma ya akadda Korinto, ninowona wila Paulo wanakwela abali aye a Korinto, vina wanasaddeya egafuneya. Ninoziwa wi anddimuwa a mulogo ahifara malago a Paulo momaguva sabwani myeri dha musogorhomwa iyene wahatamaalela valebeliye karta yanawili. Amudhaga “mugamfwanya muthu aviriganaga, nyuwo muneddihiwa na muya, tamelani omogola na murima wofewa,” eji entapulela wi anddimuwa a mulogo anofanyeela omulaga na dila dhapama.​—Galásia 6:1.

18. (a) Ofara malago a Mazu a Mulugu okamihedhi dhavi milogo dha vyaka zana dhoroma? (b) Txini enatxokotxelihu mutoma ondawo?

¹⁸ Joziweya wi Akristu a vyaka zana dhoroma, mwafarani malago a Nivuru na Mulugu awene aniwanana, vina ankaana murenddele. (1 Korinto 1:10; Éfeso 4:11-13; 1 Pedru 3:8) Ninga yopurelamoya, abali abo vamodha na arogoraya ahikaana gari ya olaleya miselu dhapama ‘orugunuwa elabo yotene.’ (Kolosi 1:23) Nsaka nttino vina sabwa ya nlogo na Yehova okala nowiwanana, awene anolaleya miselu dhapama orugunuwa elabo yotene. Mutoma ondawo ninele olagiha wila akala efunelo yawo ja omuttittimiha Yehova Muttanddi, onofanyeela wiwelela malago aye ali mu Nivuruni mwaye, Bibilia.​—Masalmo 71:15, 16.