1, 2. (a) San son sama e taki fu Gadu olikanisâsi? (b) San wi o luku aini a artikel ya?

KANDE son sama e taki: „I ná abi wan olikanisâsi fanowdu fu taigi i san i mu du. A dini i mu dini Gadu da a kaba.” Ma a so a de? San wi e si te u luku a toli ya moo fini?

² Aini a artikel ya, wi o si taki Yehofa lobi te ala sani e waka bun. Wi o si tu taki, a foluku fi en de aini wan olikanisâsi. Wi o si san u mu du te a olikanisâsi fu Yehofa e tii wi (1 Korentesama 14:33, 40). Den fosi Kelesten be e du san Beibel taki, neen meke den be poi paati a bun nyunsu a omen peesi. Useefi e du san Beibel taki tu. Boiti dati, wi e du san a olikanisâsi fu Gadu taigi u fu du. Neen meke u poi paati a bun nyunsu na a hii goontapu. A sani ya e yeepi den baala anga sisa aini a kemeente fu libi wan kiin libi. Ai yeepi den fu libi na a wan tu.

3. Saide yu e biibi taki Yehofa a wan Gadu di á lobi te sani e go buuyabuuya?

³ Te u luku den sani di Yehofa meke, wi e si taki a lobi te ala sani seeka taa. „A fasi fa Yehofa sete goontapu e soi taki a  koni. A fu di a koni meke a sete hemel gingin, fu a á sekeseke” (Odo 3:19). A omen sani di Yehofa meke, u nai kaba fusutan. Beibel taki „a wantu sani fi en namo u yee” (Yopu 26:14). Ma fu a pikinso di u sabi fu den sani di de a hemel anga goontapu, wi e si kiin taki den sani ya sete bun (Psalm 8:3, 4). A omen miliyun sitali de a tapu, ma tokuso den nai waka buuyabuuya. A di Yehofa sete den sitali anga den palaneiti bun, meke den poi du den sani ya. Te wi e pakisei fa a „sete hemel” anga fa a meke goontapu, da wi e wani gafa en. Wi e wani dini en fu teego tu.​—Psalm 136:1, 5-9.

4. Saide koniman á poi piki den somen pelensipali akisi di de?

⁴ Koniman wooko anga den sani di den kon sabi fu den sitali anga a goontapu, fu meke sani di e tyai wini gi u. Ma tokuso den á poi piki den moo pelensipali akisi di sama e poti. Den á poi taigi u pilisisi fa hemel anga goontapu du de. Den á sabi pilisisi fa libisama, meti anga bon du de a goontapu. Somen sama á sabi saide libisama e angii fu libi fu teego (Peleikiman 3:11). Son sama taki Gadu á de, neen meke den á sabi den sani ya. Den e leli sama taki ala sani kon fu denseefi. Ma Gadu e piki den akisi ya gi u anga en buku Beibel.

5. Saide u sa taki libisama abi den weiti di Gadu poti gi den sani di a meke fanowdu?

⁵ Goontapu anga hemel abi wantu weiti di e meke ala sani waka bun. A Yehofa poti den weiti ya. Den weiti ya nai kengi. A omen sama e wooko anga den weiti ya. Sama enke dataa di e koti sama, sama di e poti faya a osu, sama di e fee opalani anga omen taa sama. Gaanse sama ati de na a wan peesi, neen meke den dataa di e koti sama, sabi pe den sama ati de. Ala sama sabi taki efu wan sama dyombo komoto a wan hei peesi, a o kai. Boiti dati a sa dede. A sani ya a wan fu den weiti di Gadu poti gi a goontapu. Den e kai en Zwaartekracht. Wi e aliki a weiti ya, fu di u wani tan a libi.

6. Fa u du sabi taki Yehofa wani en foluku dini en makandii?

⁶ Wi e foondoo te wi e luku fa Yehofa sete den sani fu hemel anga goontapu. Sani nai waka buuyabuuya. A sani ya e soi taki Yehofa á wani u dini en buuyabuuya. A soi wi anga a Beibel fa a wani u dini en. Wan kodo fasi fa u sa piisii, a te wi e du den sani di Yehofa e leli u anga a Beibel anga en olikanisâsi.

7. San wi e leli fu a fasi fa Beibel sikiifi?

⁷ A Beibel a wan apaiti kado di Gadu gi u. Son koniman taki a wantu buku fu den Dyu anga den Kelesten den poti na a wan, neen den kai en Beibel. Ma a Gadu meke sama sikiifi den Beibel buku na a ten di a wani den sikiifi den. A Gadu meke den sabi san den mu sikiifi tu. Neen meke ala den buku fu Beibel e yeepi u fu fusutan, den sani di Gadu wani u sabi moo bun. Fanafu Genesesi te anga Openbaring, Beibel e taki fu wan „pikin” di be o meke a goontapu toon wan paladeisi. U leli taki a „pikin” ya, a Yesesi Kelestesi. A Kownukondee fi en o soi kiin taki a Yehofa abi a leti fu tii ala sani.​—Leisi Genesesi 3:15; Mateyesi 6:10; Openbaring 11:15.

8. Saide u sa taki den Islayelisama á be e du sani buuyabuuya?

⁸ Den Islayelisama be e wooko anga den Weiti fu Gadu, neen meke den  á be e du sani buuyabuuya. I be abi „uman di be e wooko na a doomofu fu a komakandaa-tenti” (Ekisodesi 38:8). Son leisi den Islayelisama be mu booko den tenti anga a tabernakel fu foloisi go a wan taa peesi. Yehofa be soi den san den mu du fu sani á be waka buuyabuuya. Bakaten Kownu David be taigi den pilisite anga den Leifisama sowtu wooko den be mu du aini a tempel (1 Koloniki 23:1-6; 24:1-3). Te den Islayelisama be e aliki Yehofa, a be e belesi den. Den be e libi na a wan. Boiti dati, sani á be e go buuyabuuya.​—Deitolonomi 11:26, 27; 28:1-14.

9. Fa sani be sete aini den kemeente na a ten fu den fosi Kelesten?

⁹ Sani be e waka bun tu aini den kemeente fu den fosi Kelesten. A wantu baala be e tii ala den kemeente. Biginbigin, a den apostel namo be e du a wooko ya. Bakaten wantu owluman be de aini a kulu ya tu (Toli 6:1-6; 15:6). Yehofa be e meke son wan fu den baala ya, anga wantu taa baala di be e wooko anga den, sikiifi biifi fu soi den kemeente san den be mu du moo bun (1 Timotiyesi 3:1-13; Titesi 1:5-9). Sowtu wini den kemeente fende di den aliki den baala di be e tii a wooko na a ten de?

10. Sowtu wini den fosi Kelesten kemeente be e fende, te den be e du san den baala di be e tii a wooko taki? (Luku a fowtow na a bigin.)

¹⁰ Leisi Toli 16:4, 5. Aini a ten fu den fosi Kelesten, son baala be e go a den kemeente fu taigi den „san den apostel anga den owluman fu Yelusalem be fende, di den taki fiti”. A den apostel anga den owluman di be de a Yelusalem, be e tii a wooko a ten de. Den kemeente be e du san den baala ya taki. „A sani ya be e taanga a biibi fu den kemeente tuutuu. Dei fu dei den kemeente be e moo bigi”. Fa u sa waka a den baka aini a ten ya?

11. San owluman anga dinali mu du, te a olikanisâsi soi den fa den mu du wan sani?

¹¹ Den baala di e teke fesi a den beikantoo, den baala di e teke fesi aini wan kondee, kelen-owluman anga den owluman fu den kemeente, mu wooko anga san a olikanisâsi taki. Beibel taki ala u mu aliki den baala di e teke fesi (Deitolonomi 30:16; Hebrewsama 13:7, 17). Den sama di e dini Yehofa anga den hii ati abi sakafasi. Den nai kuutu te a olikanisâsi e poti den a pasi. Wi á wani de enke Diyotileifesi di á be e lesipeki den baala di be e teke fesi. (Leisi 3 Yohanisi 9, 10.) Te wi e wooko anga den sani di den baala e taigi u, da a sani de, e yeepi a kemeente fu libi na a wan. Neen meke u mu akisi useefi taki: ’Mi e gi mi baala anga sisa taanga-sikin fu aliki Yehofa? Mi e daaidaai fu wooko anga den sani di a olikanisâsi fu Gadu taigi u?’

12. Fa wan baala e toon owluman efuso dinali?

¹² Taade ya, den baala di e tii a wooko a hii goontapu, kengi a fasi fa den be e poti baala enke dinali efuso owluman aini a kemeente. A artikel di den e kai „Aksi fu leisiman” fu A Waktitoren fu 15 november 2014 be soi taki aini a ten fu den fosi Kelesten, den baala di be e tii a wooko a ten de, be gi den owluman di be e go luku den kemeente a faantiwowtu fu poti sama enke dinali efuso owluman. Fanafu september 2014, neen den kelen-owluman bigin du a sani ya. Te den owluman fu a kemeente soi a kelen-owluman sama den wani poti enke dinali efuso owluman, da a kelen-owluman o meke moiti fu sabi a  baala anga en osufamii. Kande a o wooko makandaa anga a baala aini a peleikiwooko (1 Timotiyesi 3:4, 5). Baka dati, a kelen-owluman anga den owluman fu a kemeente e kon makandaa, fu luku san Beibel e taki fu wan baala di sa toon owluman efuso dinali.​—1 Timotiyesi 3:1-10, 12, 13; 1 Peitilisi 5:1-3.

13. Fa u sa soi taki wi e aliki te den owluman e poti wi a pasi?

¹³ Den owluman e tii wi anga a Beibel fu di den wani sani go bun anga a kemeente. U mu wooko makandaa anga den, bika useefi o fende wini fu den sani di den e taigi u (1 Timotiyesi 6:3). Aini a ten fu den fosi Kelesten, wantu sama be e „tyai denseefi a wan fa ná fiti fasi”. Pe fu den be wooko, den be e mumui anga toli di á be de fanowdu. Den owluman meke moiti fu poti den a pasi, ma den á be wani kengi. Pawlesi taigi a kemeente fa den be mu libi anga den sama de. A taki: „U mu luku bun anga en. Wi á mu paa anga en moo.” Den á be mu paa anga den moo, ma na a taa se, den á be mu si a sama enke den feyanti (2 Tesalonikasama 3:11-15). Aini a ten ya, den owluman e meke moiti fu poti den baala anga sisa a pasi tu te den e pasa den weiti fu Gadu. Te wan baala efuso wan sisa wani toow anga wan sama di nai dini Yehofa, da den baala e taki anga en (1 Korentesama 7:39). Efu a sama á wani kengi, da den owluman sa holi wan lezing di e soi fa a sani di a sama poti neen ede fu du, sa meke sama taki sani fu a kemeente di á fiti. Efu den owluman holi sowan lezing aini i kemeente, san yu o du? Efi i sabi a sama, yu o paa anga en? Te i nai paa anga en, da yu o yeepi en fu a fusutan taki a sani di a wani du, o tyai ogii gi en. Yu o yeepi en fu fusutan tu taki Yehofa á lobi a sani di a wani du. Kande a sani de sa yeepi en fu kengi. ^[1]​—Luku a pisi: Ete wan pelensipali sani.

14. Fa u sa yeepi den baala anga sisa fu libi wan kiin libi?

¹⁴ Gadu Wowtu e soi u san u mu du fu ogii á pasa aini a kemeente. Luku san be pasa a Korente. Pawlesi be lobi den baala anga sisa fu a kemeente ya. A omen baala anga sisa fu a kemeente ya, a be yeepi fu sabi a waaleiti (1 Korentesama 1:1, 2). Pakisei fa a be e fii di a kon fusutan taki wan fu den be e libi wan hululibi, ma den baala á be puu en aini a kemeente. Pawlesi taigi den owluman taki den mu „fika den sowtu man ya gi Saatan”. Den be mu puu en aini a kemeente (1 Korentesama 5:1, 5, 7, 12). Aini a ten ya, efu wan sama du wan gaan sondu, neen a á wani kengi a fasi fa ai libi, den owluman sa puu en aini a kemeente. Te den du a sani ya, wi o libi anga a sama enke fa Beibel e soi u? Efu u du a sani ya, wi o yeepi den baala anga sisa aini kemeente fu libi wan kiin  libi. Wi o yeepi a sama tu fu si taki a mu begi Yehofa fu a gi en paadon, da a fika a fasi fa a be e libi.

15. San o yeepi u fu libi na a wan aini a kemeente?

¹⁵ Ete wan polobelema be de a Korente. Son sama be e tyai den baala go a kuutu. Pawlesi akisi den taki: „Saide wi á wani fika a taki, winsi wi o toon lasiman?” (1 Korentesama 6:1-8). Aini a ten ya, son sama aini a kemeente di du bisnis anga den baala anga sisa, lasi den moni. Taawan taki den baala efuso sisa bidiigi den. Neen meke den tyai den go a kuutu. Ma te a sani ya pasa, da sama o fende a okasi fu taki sani fu Yehofa anga en foluku di á fiti. A sani ya, sa tyai polobelema kon aini a kemeente. Beibel e soi taki, pe fu wi anga u baala anga sisa poli, a moo betee u lasi moni. ^[2] (Luku a pisi: Ete wan pelensipali sani.) Yesesi soi u fa u mu losi polobelema. (Leisi Mateyesi 5:23, 24; 18:15-17.) Efu u du san a taigi u, den baala anga sisa aini a kemeente, o libi na a wan.

16. Saide a foluku fu Gadu man dini en makandaa?

¹⁶ Yehofa taigi wi aini en Wowtu taki: „Luku fa a bun anga fa a switi te baala e libi na a wan!” (Psalm 133:1) Te den Islayelisama be e aliki Yehofa, a foluku be e libi na a wan. Gadu be taki fi en foluku taki: „Mi o meke den libi na a wan, enke wan ipi sikapu aini wan pen” (Mika 2:12). Yehofa be taki a fesi tu taki, Beibel be o yeepi a foluku fi en fu sabi fa den mu dini en. A be taki: „A ten de, mi o leli den foluku a soifili tongo, da ala den o kai a nen fu Yehofa. Den o dini en makandaa” (Sefanya 3:9). Ai bigi gi u taki wi e dini Yehofa makandii.

17. San den owluman mu du te wan baala efuso sisa meke wan gaan fowtu?

¹⁷ Te wan sama meke wan gaan fowtu, den owluman á mu daaidaai fu yeepi en. Den sabi taki Yehofa wani den yeepi a kemeente fu a tan kiin. Den mu yeepi a kemeente, fu libi na a wan tu (Odo 15:3). Pawlesi be lobi den baala anga sisa fi en anga en hii ati, neen meke a be e poti den a pasi te a be de fanowdu, enke fa wi e leisi aini a fosi biifi di a sikiifi gi den. U sabi taki den owluman fu a ten de, á be daaidaai fu wooko anga san Pawlesi be taki, bika di a sikiifi du fu tu biifi gi den, a gafa den. Efu wan Kelesten „meke wan fowtu sondee a sabi”, den owluman mu taki anga en a wan switifasi.​—Galasiyasama 6:1.

18. (a) Fa a Wowtu fu Gadu yeepi den fosi Kelesten? (b) San wi o luku aini a taa artikel?

¹⁸ A sani ya e soi taki te den fosi Kelesten be e wooko anga den sani di de aini a Wowtu fu Gadu, a kemeente be e tan kiin. Den be e libi na a wan tu (1 Korentesama 1:10; Efeisesama 4:11-13; 1 Peitilisi 3:8). Neen meke den baala anga sisa ya be man „peleiki gi ala sama a goontapu” (Kolosesama 1:23). Aini a ten ya, a foluku fu Yehofa e libi na a wan tu. Den e paati a bun nyunsu na a hii goontapu. Wi o si aini a taa artikel taki, a moo pelensipali sani di den wani, a fu dini A Moo Hei Masaa Yehofa. Den wani du san en Wowtu Beibel taki.​—Psalm 71:15, 16.