1, 2. (a) Vɛɛ waŋnda apum yiyaŋ yɛ te ŋ dimi pɛ maa Mɛlɛka nɔ kɔɔnaa? (b) Yɛɛ naŋ cho yɛ yaasiaa o buŋgɛi hei niŋ?

MI WAŊNDA apum dimi aa, “A nɔ kuee ma wa o kɔɔna chɔm num nɛiyo wo niŋ te. Nyɛ ŋ nɔ makoo kinɛiyo cho chaŋyɛi numnde nya Mɛlɛka tɛɛŋ ni.” Baa tonya pa hei cho ni? Yɛɛ chɔm yɛ?

² O buŋgɛi hei niŋ, ŋ cho chɔ mɛɛ Chɛhowa kɔɔna sɔɔŋ yɛ, vɛlɛ a mɛɛ o kɔɔna wanaa nduaa yɛ. Ŋ cho vɛlɛ yaasiaa nyɛ naŋ nɔ miŋ tosa wo te kɔɔna Chɛhowaa ke naa pɛ nɛi chɔmaa. (Kɔliŋtiaŋ Tasoo 14:​33, 40) O wɔsiŋ kɛmɛ tasoŋ niŋ, mi wanaa Mɛlɛkaa tual nɛi chɔmaa cho o Diom Mɛlɛkaa niŋndo kɔɔli. Nduyɛ mi hei mala nda le yooŋgu kɛndɔɔ dimioo o fondaŋnda bɔɔbɔɔ. Naa bɛɛ nɔ miŋ tol tamasi ndaa kɔɔli le chɛlɔɔ mi Baabuiyo chɔm naa nɛiyo hau. Nduyɛ ŋ nɔ miŋ tol nɛi chɔmaa kɔɔna Mɛlɛkaa ke naa wo. Hei mala naa le yooŋgu kɛndɔɔ dimioo chieeŋndo balɔɔ silɔ. Ŋ nɔla vɛlɛ miŋ kɛsi kunda leKilisiɔŋndo o diandaa, o kɔl nyuloo niŋ, a o diompilɔɔ niŋ.

3. Yɛɛ tosa yɛ ma laalaŋ maa Mɛlɛka kɔɔna sɔɔŋ ndo Chɛhowa cho ni?

³ Te ŋ mɛɛndaŋ pɛ nyɛm Chɛhowa toosiaa woŋ, miŋ che kpendekele maa Mɛlɛka kɔɔnaa o cho ni. “A kɔl kaloo Mɛlɛka Yaawɛɛ o toosiaa chieeŋndo hoo ni. Sina ndɔ pɛŋgoo ndu o soliŋ kpeku  ni, mbo toosiaa halaa.” (Pulɔwaa 3:19) Nyɛɛmbɔ koni naŋ sina nyɛm Chɛhowa toosiaa woŋ ni. Baabuiyo dimi maa, ‘nyɛ pɔmbɔ koni bɛɛ naa ŋ tuei a sɔɔŋ bɛnduŋ o tosa woŋ okɔɔ ni.’ (Choobu 26:14) Kɛ sinapɛŋgu pɔmbɔ naŋ nɔ a halaa okɔɔ wo cho ni maa o cho o kɔɔnaa nyɛkɛndɛi. (Sam 8:3, 4) Looŋ cho hiŋnɔŋndo dɛndɛkɛlɛɛ o miiliɔŋndaŋ niŋ o halaa niŋ. Nduyɛ ipilɛ bɛɛ kundu chaaŋ ndɔ le kanifuule, ŋ cho ŋ kɔɔnaa. Yiyaŋndɔ a mɛɛ nyɛm cheleŋndoŋ cho paaleŋ balɔɔ o halaa niŋ yɛ. Kaamaa hoo cho yɔŋnɔŋndo kanifuule, Chɛhowa kɔɔna nyɔɔŋ muŋ a looŋ le hiŋnɔŋndo lende ni. Te ŋ yiyaŋ pɛ a mɛɛ Chɛhowa soliŋ kɔl kalu ndɔɔ kpeku le halaa toosiaa yɛ, mi hei nyindu naa le ndu saŋgalaa, piɛiyo, a lo lechoo wo chɔmndo o ndulo.​—Sam 136:1, 5-9.

4. Le sabu yɛɛ wanaa pɛɛku a nyɔɔŋ okɔɔ wa tiuba le nyunala sɔvɛla bɔɔbɔɔ mulioo le?

⁴ Wanaa pɛɛku a nyɔɔŋ okɔɔ wa soliŋ nyɛm nda pɛɛku a halaa vɛlɛ a chieeŋ naa okɔɔ woŋ kpeku le yoomula naalaŋ tosaa la kɛndɛ. Kɛ a bumba nyunala sɔvɛla bɔɔbɔɔ mulioo. Le tamaseliiyo, wanaa pɛɛku a looŋ okɔɔ wa nɔla ma dimul naa kpeekpei mɛɛ halaa kanduŋ yɛ le, ɔɔ le sabu waŋchieeya, visiaa, a tɔlɔɔlaŋ la cho o chieeŋndo choo wo le. Nduyɛ wanaa bɔɔbɔɔ nɔla ma tɛɛsiaa le sabu waŋchieeya nɔ yeemɛi ikala kala le waa achal lefafɛɛŋndo le. (Ikilisiaatii 3:11) Saboo opilɛ o waŋnda sɔla mulilaŋ le nyunalaŋ ndaŋ te wo cho ni maa, wanaa pɛɛku a nyɔɔŋ okɔɔ wa a wanaa cheleŋnda dimi maa Mɛlɛka cho le, nduyɛ maa nyɔɔŋ a ba ndɔ ŋ hiŋ ni. Kɛ Mɛlɛka ke naa mulioo o Yau ndɔɔ niŋ, Baabuiyo.

5. O nɛila kuɛɛ choo waŋchieeya tiindaŋ yɛ sawala Chɛhowa toosiaa laŋ?

⁵ Chɛhowa toosiaa sawalaŋ la bɔɔbɔɔ le nyɛm o toosiaa woŋ ni. Sawalaŋ ndaŋ la siŋgaŋ te. Wanaa tosa wali yiŋnde chɛnɛwɛileŋ nda, a luei mɛŋndaŋ nda, wanaa tuwaa, wanaa kua a dɛndɛ choo wa, wanaa yambu waŋnda wa, a wanaa tosa walta cheleŋndaŋ nda tiindaŋ sawalaŋ ndaŋ le walta ndalaŋ tosaa. Le tamaseliiyo, fonda pilɔɔ kpe kɔl wanachioo cho o dialloŋ niŋ ni. Lelaŋ, wana yambu waŋnda wo sina naa kɔllo cho wa. Vɛlɛ wana o wana sina maa te waŋndo huulu pɛ o fondaŋ filioŋndo, o cho delɔɔ, nduyɛ pɛŋ mbo vi. Ŋ nɔ miŋ diikuŋ sawala Mɛlɛka toosiaa laŋ, mɛɛ kpaaya tuisi nyɔɔ lɛŋndo cho naa yɛ. Kanifuule, ŋ yeema miŋ wa achal.

6. Vɛɛ naŋ looku yɛ sina maa Chɛhowa yeema waŋchieeya ma wa a kɔɔnaa le ndu piɛiyo?

⁶ O nɛi kɔndɔfili bɛndoo niŋ kɛsɛ Chɛhowa kɔɔna halaa ni. Nduyɛ i cho tonya maa o yeema mi wanaa nduaa wa a kɔɔnaa le ndu piɛiyo. Nɛi chɔmaa o ke naa o Baabuiyo niŋ a kɔɔna ndɔɔ wo kinɛi naŋ nɔ ni miŋ tol kɔɔli le waa a nyaale.

7. Yɛɛ naŋ pɛɛku yɛ a mɛɛ Baabuiyo poonyiaŋ yɛ?

⁷ Ke teŋgeŋ Mɛlɛkaa kɛsɛ Baabuiyo cho ni. Wanaa sinaa dɛniaa dimi maa yaula Chuuwa a la Kilisiɔŋnda waŋnda dɔu diompilɛ o Baabuiyo niŋ ni. Kɛ Mɛlɛka kɛɛsiaa wanaa nɔ ma poonyiaa yaula laŋndo ni, boondii nda nɔ ma poonyiaa laŋndo, a sɔɔŋ nda nɔ ma poonyiaa woŋ. Le sabu koŋ yaulaŋ kpou o Baabuiyo niŋ la mala naa le yooŋgu Mɛlɛkaa biyɔɔ bila ni. Kanduŋ a yau Chɛnɛsee wo mbo kɔ bii a yau Sɔɔŋ Chɔɔmaŋndoŋ, Baabuiyo chɔm maa “yɛyii wana lanɔɔ” cho wa, i cho chieeŋndo siiŋguu vɛlɛ kpele hɛnɛkiɔɔ wo. Ŋ pɛɛku maa Chiisu Kiliti cho “yɛyii wana lanɔɔ” hoo ni. Nduyɛ Masale ndɔleŋ le cho chɔm maa Chɛhowa nɔ dioo le waa masaa nyɛ o nyɛ fee choo ni.​—Nuawɔ Chɛnɛsee 3:15, NW; Maatiu 6:10; Sɔɔŋ Chɔɔmaŋndoŋ 11:15.

8. O nɛila kuɛɛ choo Isɔluɛiya wa yɛ a kɔɔnaa nyɛkɛndɛi?

⁸ Mi Isɔluɛiya tual Sawa Mɛlɛka ke nda wo kɔɔli, nduyɛ a wa a kɔɔnaa nyɛkɛndɛi. Le tamaseliiyo, “waŋ laanduaa” wa a kɔɔnaa le  wallo tosaa “o tɛndii Mɛlɛka Yaawɛɛ wo dio.” (Ɛsɔdɔɔ 38:8) Isɔluɛiya ndaa nɔ vɛlɛ nɛi chɔmaa le naa nda nɔ ma kila dɔɔŋgɔɔ nduyɛ ma kuɛ a tɛndiiyo wa. A wa a kɔɔnaa le keŋ tosaa. Mi Masaa Deeve ndoo kɔɔna wanaa soliaa lasalaa a Livaiya le wali teŋgeŋndo tosaa o maaŋndo niŋ. (Koloniko Tasoo 23:1-6; 24:1-3) Mi Chɛhowa ndoo dɔu Isɔluɛiya sala te ndaa diikuŋ ndu pɛ. A wa a kɔɔnaa, nduyɛ ndaa nɔ kɔl nyuloo a diompilɔɔ.​—Ditɔnɔmii 11:26, 27; 28:1-14.

9. Vɛɛ kundala leKilisiɔŋndaŋ o wɔsiŋ kɛmɛ tasoŋ niŋ wa yɛ la kɔɔnaa?

⁹ Kundala leKiisiɔŋndaŋ o wɔsiŋ kɛmɛ tasoŋ niŋ bɛɛ wa la kɔɔnaa. Dialii kuumbaŋ choo ve wa. Ndi cho yɛ puaa kundaa wa kundala leKilisiɔŋndaŋ nɛi chɔmaa kioo wo ni. O tase ndɔ, kiilaa wa o kundaa hoo niŋ ni. Okoŋ kɔɔli, ma handu vɛlɛ wanaa ndaa chua chilaŋnda o dialii kuumbaŋ nde hei choo. (Walta Wanaa Chiisuaa 6:1-6; 15:6) Mi Chɛhowa ke dialii kuumbaŋ nde nɛi chɔmaa a wanaa cheleŋaa wa wallo a nda latulu wa le yaulaŋ poonyiaa le kundalaŋ silaa a laŋ nɛi chɔmaa kioo. (Timoti Tasoo 3:1-13; Taitɔɔ 1:5-9) Tɔnɔ yɛɛ kundalaŋ laa sɔla yɛ le nɛi chɔmaa dialii kuumbaŋ choo ve tolɔɔ kɔɔli?

10. Fulamakɔɔli yɛɛ wa yɛ te kundalaŋ o wɔsiŋ kɛmɛ tasoŋ niŋ laa tol pɛ nɛi chɔmaa dialii kuumbaŋ nde kɔɔli? (Tofa fotueiyo o peele naŋ kɔndu leŋ choo.)

¹⁰ Nuawɔ Walta Wanaa Chiisuaa 16: 4, 5. O wɔsiŋ kɛmɛ tasoŋ niŋ, mi puaa apum ndaa kuɛ kundala leKilisiɔŋndaŋ yilɔɔ le wanaa laalaŋnda chɔmndo “sawala wanaa Chiisu vem hɔlte ndɔ wa, a laŋgbaa kalla wanaa laalaŋnda tɛɛŋ Chulusɛlɛm a chɛlaŋ ndaŋ.” Nda wa yɛ dialii kuumbaŋ choo ve ni. Mi kundalaŋ la tual sawalaŋ ndaŋ kɔɔli, nduyɛ mi la “chɔɔlu laalaŋndo sɔla. Nduyɛ, lepaa o lepaa wanaa sɛnɛiya wa delɔɔ o kundala wanaa laalaŋnda choo.” Tamaselii yɛɛ kundala laŋ la pɛɛku yɛ naa hau?

11. Yɛɛ bɛnduaa a buɛiyaa malalaŋnda nɔ yɛ ma tosa te kɔɔna Mɛlɛkaa ke nda pɛ nɛi chɔmaa?

¹¹ Wanaa cho lɛuve chilaŋnda ɔɔ wanaa cho chilaŋ chuaa o lɛŋndeŋ niŋnda, buɛiyaa ibuŋgaa, a bɛnduaa nɔ ma diikuŋ nɛi chɔmaa nda sɔla o kɔɔna Mɛlɛkaa niŋndo. Yau Chɛhowaa dimul naa pɛŋ maa, naa kpou nɔ miŋ diikuŋ wanaa cho chilaŋ chuaa wa. (Ditɔnɔmii 30:16; Hibuluiya 13:7, 17) Wanaa chɔm lo lechoo wo o Chɛhowa lo wa cho wanaa nila kalu le. Nduyɛ a ŋɔɔchiaŋ a nɛi chɔmaa nda ke nda wo le. Ŋ yeema miŋ wa maa Diotɛluɛfɛsi, o ndoo nɔ lebɛɛ le puaapiliaa wa chilaŋ chuaa wa le. (Nuawɔ Chɔŋ Ŋgaa Ndɔɔ 9, 10.) Te ŋ tol pɛ nɛi chɔmaa nda ke naa wo kɔɔli, mɛɛ malaa naŋ cho koŋ le mi kɔl nyuloo a diompilɔɔ wa o kundaa niŋ ni. Lelaŋ, ŋ nɔ miŋ nyunaŋ aa, ‘Baa I cho pa puaapiliaa a ndepiliaa niaa kɔltaŋ dɛɛniaa le lo lechoo wo chɔmndo o Chɛhowa lo? I cho pa chɔ chɔ le nɛi chɔmaa kɔɔna Mɛlɛkaa ke ya wo tolɔɔ kɔɔli?’

12. Vɛɛ nda yulu yɛ bɛnduaa a buɛiyaa malalaŋnda iso?

¹² Dialii Kuumbaŋ Choo Ve laŋga siŋga mɛɛ nda nɔ ma yulu bɛnduaa a buɛiyaa malalaŋnda iso o kunda leKilisiɔŋ kɛ kɛ niŋ yɛ. “Nyunala Wanaa Nua o Yaula Naalaŋ Niŋnda” o Bandu Mɛŋgɛlaa hoo niŋ Bɛŋgufɔnɔɔ 15, 2014, tɛɛsiaa maa o wɔsiŋ kɛmɛ tasoŋ niŋ, mi dialii kuumbaŋ choo ve ndii ke buɛiyaa kelaa choo wa dioo le ma yulu bɛnduaa a buɛiyaa malalaŋnda iso. Kanduŋ a Tapioo 2014, mi buɛiyaa ibuŋgaa sɔla vɛlɛ dioo le kandɔɔ bɛnduaa a buɛiyaa malalaŋnda yulɔɔ iso. Te bɛnduaa dimi pɛ maa puaapilɛnɔɔ suiliŋ le mbo simnuŋ bɛndoo ɔɔ buɛi malalaŋndo, mi buɛi ibuŋgaa kindiŋ le puaapilɛnɔ koŋ sinaa a yuŋgu ndɔɔ. Le tamaseliiyo, mbo kuɛ lepum a puaapilɛnɔ koŋ latulu o wali pollo niŋ. (Timoti Tasoo 3:4, 5) Okoŋ kɔɔli, mi buɛi ibuŋgaa bɔŋa diompilɛ nda bɛnduaa le  ma mɛɛndaŋ bolii Baabui tɛɛsiaa suiliŋnda bɛnduaa ɔɔ buɛiyaa malalaŋnda ve.​—Timoti Tasoo 3:1-10, 12, 13; Pitɛ Tasoo 5:1-3.

13. Vɛɛ naŋ chɔm yɛ maa ŋ cho nɛi chɔmaa bɛnduaa ke naa wo diikɔŋndo?

¹³ Mi bɛnduaa ke naa nɛi chɔmaa o Baabuiyo niŋ kanifuule, a yeema ma manda kunda leKilisiɔŋndo. Ŋ nɔ miŋ toolu nda kanifuule, le tɔnɔ naa silalaŋ ndaŋ la cho ni. (Timoti Tasoo 6:3) O wɔsiŋ kɛmɛ tasoŋ niŋ, waŋnda apum ndaa nɔ “siɛlɛi tosaa nyɔɔ.” A ve nyɛ o nyɛ tosa le, mɛɛ keiyo sondolaŋ lueiyo o sɔɔŋ pilaŋ niŋ. Mi bɛnduaa kindiŋ le nda silaa, kɛ ma kɛɛ le siŋgaŋndo. Mi Pɔɔl ndoo dimul kundaa mɛɛ nda nɔ ma bii wana koŋ yɛ. Mbo dimi aa, “La fula ndu makɔɔ. Nduyɛ, la nɔ kpeku o kpeku a ndu le.” Ndaa nɔ ma bii wana koŋ ichaŋya le, kɛ ndaa nɔ ma chua ndu maa yaamɔɔnɔ nda le. (Tɛsaloniaŋ Diiŋ Ndɔɔ 3:11-15) Bɛnduaa hau bɛɛ nɔ ma kindiŋ le ma mala wana kɛɛ nɛila Mɛlɛkalaŋ tolɔɔ kɔɔli wo. Le tamaseliiyo, mɛɛ wana tosa chaŋyɛi nɔɔ a wana cho wana laalaŋ te wo cho naa yɛ. (Kɔliŋtiaŋ Tasoo 7:39) Te waŋndo kɛɛ pɛ le kaa ndɔɔ siŋgaa, bɛnduaa kɛɛsiaa le suɛi yɔŋgoo o kundaa niŋ le tɛɛsiaa mɛɛ kaa wana koŋ tosa mi waŋnda dimi sɔɔŋ wɔɔŋndo a kunda leKilisiɔŋndo okɔɔ yɛ. Te bɛnduaa yɔŋgu pɛ suɛi waa naa o kundaa niŋ, yɛɛ ŋ cho yɛ tosa? Te a sina pɛ wana koŋ, a cho pa kɛɛ chaŋyɛi tosaa a ndu? O nɛiyo hoo choo, a cho ndu mala le sinaa maa kaa ndɔɔ cho ndu luei o kpundɔɔ niŋ nduyɛ Chɛhowa tul kaa ndɔɔ leyɛ. Kɛlɛŋgaa o nɔla mbo siŋga kaa ndɔɔ. ^[1]—Tofa diomnda chɔɔlaalaŋ.

14. Vɛɛ naŋ mala yɛ le kundaa kɛsioo o diandaa?

¹⁴ Diom Mɛlɛkaa dimul naa kpou le keŋ tosaa, le halikpeŋ miŋ kuuna dɛnɛ wɔɔŋndo o kunda leKilisiɔŋndo niŋ. Ŋ soonuŋndɔ a nyɛ ndoo yɔŋnuŋ o Kɔliŋ niŋndo. Pɔɔl ndoo kaala puaapiliaa a ndepiliaa o Kɔliŋ niŋ. Mbo mala a bɔɔbɔɔ le tonyaa pɛɛkoo. (Kɔliŋtiaŋ Tasoo 1:1, 2) Yiyaŋndɔ a mɛɛ kɔllo ndoo tambu Pɔɔl le saalɔŋndo maa waŋndo wa nda kaa ihini nɔɔlɛiyo tosaa tɛɛŋ, nduyɛ mi puaapiliaa wa wana koŋ chɛlɔɔ o kundaa niŋ yɛ! Mi Pɔɔl dimul bɛnduaa maa a mal wana koŋ “Setana . . . o ba.” Ndaa nɔ ma soli wana koŋ po o kunda leKilisiɔŋndo niŋ. (Kɔliŋtiaŋ Tasoo 5:1, 5-7, 12) Hau, mi bɛnduaa kɛɛsiaa le waŋndo solioo o kunda leKilisiɔŋndo niŋ le mɛɛ o tosa haki wɔɔŋ wɔɔŋndo mbo kɛɛ le siŋgaŋndo yɛ. Te keŋ yɔŋnuŋ pɛ, baa ŋ cho pa wana sɔla koŋ solioo wo biyɔɔ a mɛɛ Baabuiyo dimi yɛ? Te ŋ tosa pɛ lende, mɛɛ ŋ cho malaa le kunda leKilisiɔŋndo kɛsioo o diandaa. Ŋ cho wana koŋ mala le sinaa maa o nɔ mbo mal yɔŋndɔ wɔɔŋndo nduyɛ mbo nyuna Chɛhowa le malɔɔ hakioo.

15. Vɛɛ naŋ manda yɛ kɔl nyuloo o kundaa niŋ?

¹⁵ Bahawɛi cheleŋ wa vɛlɛ o Kɔliŋ niŋ. Waŋnda apum wa puaapiliaa ndaa yɔɔ o masaleŋ. Mi Pɔɔl dimul nda aa, “O bɛnda bɛɛ mi i lonuŋ nda lende” te waŋndo yɔŋnda isɔɔ pɛ. (Kɔliŋtiaŋ Tasoo 6:1-8) Hau, mi waŋnda pum o kundaa niŋ chɛlaŋ le yulaleŋ tosaa a puaapiliaa ndaa. Kɛ lepum, mi kaniei laasiaŋ nduyɛ mi waŋndo opilɔɔ yiyaŋ maa puaapilɛnɔ ndaa tosa kafalaŋ. Le hei, ma yɛɛ puaapiliaa ndaa o masaleŋ. Te hei yɔŋnuŋ pɛ, i tosa mi waŋnda dimi sɔɔŋ wɔɔŋndoŋ a Chɛhowa vɛlɛ a wanaa nduaa okɔɔ. Mi hei hiŋ a bahawɛiyo o kundaa niŋ. Yau Mɛlɛkaa mala naa le sinaa  maa kɔl nyuloo nɔ mbo wa naa puaapiliaa tɛɛŋ, o yɔŋ bɛɛ mi kaniŋ naŋ laasiaŋ.  ^[2] (Tofa diomnda chɔɔlaalaŋ.) Mi Chiisu pɛɛku naa pɛŋ mɛɛ naŋ nɔ miŋ bii bahawɛila kala kalalaŋ a sɛɛŋgiaŋndaŋ yɛ. (Nuawɔ Maatiu 5:23, 24; 18:15-17.) Te ŋ diikuŋ pɛ nɛi chɔmaa ndɔɔ, ŋ cho kɔl nyuloo a diompilɔɔ manda o kundaa niŋ.

16. Le sabu yɛɛ wanaa Mɛlɛkaa cho yɛ diompilɛ?

¹⁶ Yau Chɛhowaa dimul naa aa, “I cho bɔɔ suɛi kɛndɛ bɛndu le wanaa Mɛlɛkaa waa diom pilɛ maa pɔmbuaa a bɛnduaa.” (Sam 133:1) Te Isɔluɛiya ndaa diikuŋ pɛ Chɛhowa, mi ndaa wa a kɔɔnaa o diompilɔɔ niŋ. Mi Mɛlɛka suaa a wanaa nduaa okɔɔ aa, “I cho nya chuuŋgiaa naa pilɛ, mɛɛ wana mandaa lasaa o chuuŋgiaa nuaa saa nduaa o kpakioo niŋ yɛ.” (Makal 2:12) Mi Chɛhowa dimi vɛlɛ maa wanaa nduaa cho tonyaa pɛɛku o Baabuiyo niŋ nduyɛ ma piɛi ndu o diompilɔɔ niŋ. Mbo dimi aa, “I cho sɔɔŋ wɔɔŋ waŋnda dimi woŋ siŋgafila, ma dimi sɔɔŋ cho walaŋndoŋ. Okoŋ, mi nda kpou muliŋ ma saŋgala ya Mɛlɛka Yaawɛɛ, nduyɛ ma saaŋgialla diomndo pilɛ.” (Sɛfanaya 3:9) Ŋ cho bɔɔ a kɔl kɛndɛ le Chɛhowa piɛiyo o diompilɔɔ niŋ!

17. Yɛɛ bɛnduaa nɔ yɛ ma tosa te waŋndo tosa pɛ haki wɔɔŋ wɔɔŋndo o kundaa niŋ?

¹⁷ Te waŋndo tosa pɛ haki wɔɔŋ wɔɔŋndo, bɛnduaa nɔ ma sila ndu chɔ chɔ o nɛi kaalaa niŋ. Bɛnduaa sina maa Chɛhowa yeema nda ma manda kundaa le sɔɔŋ wɔɔŋndoŋ kuunaa nduyɛ mbo wa o diandaa, a o diompilɔɔ niŋ. (Pulɔwaa 15:3) Pɔɔl ndoo kaala bɔɔ puaapiliaa nduaa o Kɔliŋ niŋ. Nduyɛ mi ndoo ke nda sila kɛndɔɔ, a mɛɛ naŋ pɛɛku a hei okɔɔ o yau tase o poonyial nda wo niŋ yɛ. Ŋ sina maa bɛnduaa loŋ wa chɔ chɔ le nɛi chɔmaa Pɔɔllo tolɔɔ kɔɔli kanifuule, mɛɛ paŋgoŋ ŋpum hiou, mbo chandu nda o yau diiŋndɔ o poonyial nda wo niŋ. Te o yɔŋ pɛ mi puaapilɛnɔɔ “tosa yɔŋ wɔɔŋndo,” bɛnduaa nɔ ma chaa ndu sila.​—Kaleesiaŋnda 6:1.

18. (a) Vɛɛ nɛi chɔmaa cho o Diom Mɛlɛkaa niŋndo mala yɛ kundala leKilisiɔŋndaŋ o wɔsiŋ kɛmɛ tasoŋ niŋ? (b) Yɛɛ naŋ cho yɛ yaasiaa o buŋgɛi cho lachi ve niŋ?

¹⁸ I cho kpendekele maa mɛɛ Kilisiɔŋnda o wɔsiŋ kɛmɛ tasoŋ niŋ tol nɛi chɔmaa cho o Yau Mɛlɛkaa niŋndo kɔɔli, kundala ndalaŋ la wa la diandaa, la wa a kɔl nyulu, a o diompilɔɔ niŋ. (Kɔliŋtiaŋ Tasoo 1:10; Ɛfisiaŋnda 4:11-13; Pitɛ Tasoo 3:8) Nduyɛ fulamakɔɔlioo wa ni, mi puaapiliaa a ndepiliaa haa tiuba yooŋgu kɛndɔɔ dimioo “o ŋwaŋnda chiee lo kpou o chieeŋndo niŋ.” (Kolosiaŋnda 1:23) Hau bɛɛ, wanaa Chɛhowaa cho a kɔɔnaa o diompilɔɔ niŋ. Nduyɛ a cho yooŋgu kɛndɔɔ dimioo ba o ba fee o chieeŋndo choo. Buŋgɛi cho lachi ve cho naa chɔɔlu tɛɛsial maa yeemɛi ndɛi kala kalɛi cho le Mɛlɛka Kpou Kpou Wo, Chɛhowa bɛɛleŋ kioo ni, a nɛi chɔmaa cho o Yau ndɔɔ, Baabuiyo niŋndo diikɔŋndo.​—Sam 71:15, 16.