Pathian Lehkhabu Mila Inrêlbâwlna
“LALPA chuan finnain leilung a din a, hriatnain vânte a tinghet a.”—THUFINGTE 3:19.
HLA: 6, 24
1, 2. (a) Pathianin inawpna pâwl a neih chungchâng mi ṭhenkhatin eng nge an sawi? (b) He thuziakah hian eng nge kan sawiho vang?
MI ṬHENKHAT chuan: “Kaihruaitu tûr che pâwl i mamawh lo. I mamawh ber chu Pathian nêna inlaichînna a ni,” tiin an sawi a. Chu chu a dik em? Thu dik chuan eng nge a târ lan?
2 He thuziakah hian, Jehova’n thil fel taka a tih dân leh a mite a huaihawt dân kan hmu ang. Jehova inawpna pâwlin kaihhruaina min pêk huna kan tih ngaite kan sawiho bawk ang. (1 Korinth 14:33, 40) Kum zabi pakhatnaah khân, Jehova mite chuan Bible kaihhruainate chu zuiin, hmun tam takah chanchin ṭha an hril a. Anmahni angin, tûn laiah Bible kan inkaihhruaitîr a. Pathian inawpna pâwl aṭanga kan dawn kaihhruainate chu kan zâwm a. Chuvângin, khawvêl pumah chanchin ṭha kan hril thei a ni. Kohhran thianghlimna te, remna te, leh inpumkhatna te chu kan vawng bawk.
JEHOVA CHU FEL TAKA RUAHMANTU PATHIAN A NI
3. Jehova chu fel taka ruahmantu a nih tih engin nge rintîr che?
3 Jehova thil siamte kan en hian, fel taka ruahmantu Pathian a ni tih chiang takin kan hmu a. Ani chuan: “Finnain leilung a din a, hriatnain vânte a tinghet,” a ni. (Thufingte 3:19) Jehova thil siamte chungchâng kan hriat loh tam tak a awm a. Dik tak chuan, “a chanchin kan hriat hi a va beitham êm!” (Joba 26:14) Mahse, lei leh vân chungchânga kan thil hriat tlêmtê aṭang pawhin chûng chu fel taka ruamhman an ni tih a chiang hle. (Sâm 8:3, 4) Arsi maktatuai tam tak chu vân boruakah awmze nei takin an inher kual a. Nî leh a hêltu arsite chungchâng hi ngaihtuah bawk teh. Hetianga awmze nei tak leh fel taka a inher theih chhan hi Jehova’n planet-te leh arsite inher dân tûr a ruahman vâng a ni. “Finnaa vân” leh leilung siamtu a nih dân kan ngaihtuah hian, fak kan duhin, biak kan duh a, a chunga rinawm kan duh a ni.—Sâm 136:1, 5-9.
4. Engvângin nge scientist-te chuan zawhna pawimawh tak takte chu an chhân theih lo?
4 Scientist-te chuan lei leh vân chanchin an zirna aṭanga an hmuh chhuah thil tam tak chu kan nun tihchangkân nân an hmang a. Mahse, zawhna pawimawh tak takte chu an chhâng thei lo a ni. Entîr nân, arsi lama mi thiamte chuan lei leh vân awm ṭan dân te, mihring te, ramsa te, leh thingkûngte lei chunga an awm chhan chu chiang takin min hrilh thei lo va. Mi tam zâwkte chuan mihringte’n chatuana nun duhna nasa tak an neih chhan chu an hrilhfiah thei lo bawk. (Thuhriltu 3:11.) Mite’n hêng zawhnate chhânna an hriat loh chhan pakhat chu scientist-te leh mi dangte’n Pathian a awm lo tia sawiin chhanchhâwnna an chawilâr vâng a ni. Mahse, Pathianin a Lehkhabu Bible-ah a chhânnate chu min pe a ni.
5. Eng kawngin nge mihringte chuan leilung dânte an rinchhan?
5 Jehova chuan leilung dân tam tak a siam a. Chûng dânte chu a inthlâk danglam lo. Electric lama mi thiam te, tui dâwt leh tui zêm ilo siamtu te, engineer te, pilot te, mi zai thiam doctor te leh mi dangte chuan an hnathawhnaah hêng dânte hi an rinchhan a. Entîr nân, mihring lung hi taksa pênga hmun inangah a awm tlângpui a, chuvângin, mi zai thiam doctor chuan damlote lung awmna tûr chu a hria a ni. Mi chu hmun sâng tak aṭanga a zuan thlâk chuan, a thi thei tih mi tinin an hria a. Nun reng kan duh avângin lei hîpna ang chi leilung dânte chu kan zâwm a ni.
PATHIAN THIL RELBAWL CHU
6. Jehova chuan mite chu ruahmanna fel tak neia amah be tûrin a duh tih engtin nge kan hriat?
6 Jehova chuan lei leh vân chu fel takin a rêlbâwl a. Chuta ṭang chuan, a mite’n fel taka inrêlbâwla amah an biak chu a duh tih a chiang hle. Dik takin, Jehova chuan amah kan biak dân tûr min zirtîr nân Bible min pe a. Bible-a min pêk a kaihhruainate kan zawm a, a inawpna pâwl kan zui chauhvin, nun hlimawm leh nun lungâwithlâk kan nei thei ang.
7. Bible ziak a nih dân aṭangin eng nge kan hriat theih?
7 Bible hi Pathian thil pêk danglam tak a ni tak zet a. Mi thiam ṭhenkhatte chuan Bible hi mite’n Juda leh Kristian lehkhabu ṭhenkhat an lâwr khâwm mai niin an sawi a. Mahse, Pathian chuan lehkhabu ziaktu tûr te, an ziak hun tûr te, an thu ziak tûr te chu a ruahman a ni. Chuvângin, Bible-a lehkhabu zawng zawng chuan Pathian thuchah hre thiam tûrin min ṭanpui a. Genesis aṭanga Thu Puan thlengin Bible chuan leilung hi paradis-a chantîr leh theitu tûr ‘thlah’ chungchâng a târ lang a ni. Chu ‘thlah’ chu Isua Krista a ni tih kan hre tawh a, a Lalram chuan Jehova’n mi tinte chungah rorêl tûrin dikna a nei tih a finfiah ang.—Genesis 3:15; Matthaia 6:10; Thu Puan 11:15 chhiar rawh.
8. Eng kawngin nge Israel mite chu fel taka an inruahman?
8 Israel mite chuan Pathian pêk Dân chu zuiin fel takin an inrêlbâwl a. Entîr nân, “inbiakna puan in kawngka bula hmeichhe rawngbâwl ṭhînte” an awm a. (Exodus 38:8) An riah hmun leh biak bûk sawn dân tûr chungchângah kaihhruaina fel fai tak an nei bawk. A hnuah, Lal Davida chuan biak ina tih tûr engemaw bîk thawk tûrin puithiamte leh Levia mite chu a ruat a. (1 Chronicles 23:1-6; 24:1-3) Israel mite’n Jehova thu an âwih hian malsâwm an ni. Fel takin an inruahman a, remna leh inpumkhatna an nei a ni.—Deuteronomy 11:26, 27; 28:1-14.
9. Kum zabi khatnaa kohhrante chu eng anga ruahman nge an nih?
9 Kum zabi khatnaa kohhrante pawh fel takin an inrêlbâwl a. Chutah chuan kohhrana kaihhruaina petu mipa pâwl khat, Governing body a awm a ni. Atîrah chuan, chu pâwl chu tirhkohte nêna din a ni a. A hnuah upa dangte pawh telh an ni. (Tirhkohte 6:1-6; 15:6) Jehova chuan kohhran tâna fuihna leh kaihhruaina lehkhate ziak tûrin governing body member leh anmahni thawhpuitu mi dangte chu a kaihruai a. (1 Timothea 3:1-13; Tita 1:5-9) Engtin nge kohhrante chuan governing body kaihhruaina zawm chu an hlâwkpui?
10. Kum zabi khatnaa kohhrante’n governing body kaihhruaina an zui khân eng thil nge thleng? (A thupui chunga milem en rawh.)
10 Tirhkohte 16:4, 5 chhiar rawh. Kum zabi khatnaah khân, unaupa ṭhenkhat chuan, “Jerusalem khuaa tirhkoh leh upa awmte thu rêl”—governing body thu rêl—chu hrilh tûrin kohhrante chu an tlawh a. Kohhrante chuan chûng kaihhruainate an zawm avângin, “rinnaah chuan an nghet ta a, ni tin an pung ta deuh deuh,” a ni. An entawn tûr siam aṭangin eng nge kan zir theih a, chu chuan tûn laia kan kohhranah eng angin nge min ṭanpui ang?
KAIHHRUAINA I ZUI EM?
11. Kohhran upate leh kohhranho rawngbâwltute chuan Pathian inawpna pâwl aṭanga kaihhruaina an dawn hunah eng nge an tih ang?
11 Branch Committee-te, a nih loh leh Ram Chhûnga Committee-te, bial kantute leh kohhran upate chuan Pathian inawpna pâwl aṭanga an dawn kaihhruaina chu an zawm a ngai a. Dik takin, Jehova Lehkhabu chuan hotute thuâwih tûrin min hrilh a ni. (Deuteronomy 30:16; Hebrai 13:7, 17) Jehova chunga mi rinawmte chu an hel lo va, kaihhruaina an dawn chungchângah an sawisêl hek lo. Kaihruaitu unaupate zahna lantîr lotu Diotrepha ang nih chu kan duh lo va. (3 Johana 9, 10 chhiar rawh.) Kaihhruaina kan dawnte kan zui hian, kohhrana remna leh inpumkhatna awm reng tûrin kan ṭanpui a ni. Chuvângin, heti hian kan inzâwt thei a ni: ‘Ka unaute chu Jehova chunga rinawm tûrin ka fuih em? Pathian inawpna pâwl aṭanga ka dawn kaihhruaina chu ka zui vat em?’ tiin.
12. Upate leh kohhranho rawngbâwltute chu engtin nge an ruat?
12 Tûn hnai mai khân, Governing Body chuan kohhran tina kohhran upate leh kohhranho rawngbâwltute ruat dân chu a thlâk danglam a. Vênnaninsâng (English) November 15, 2014 chhuak a “Chhiartute Zawhna” chuan governing body-in bial kantute chu upate leh kohhranho rawngbâwltute ruat tûrin thuneihna a pêk thu a târ lang a ni. Chuvângin, kum 2014 September aṭang khân, bial kantute chuan chu an mawhphurhna chu an thawk ṭan a. Kohhran upate’n unaupa pakhat chu upa emaw, kohhranho rawngbâwltu emaw ni tûra an sawi chuan bial kantu chuan amah leh a chhûngte chu hriat a tum a. Entîr nân, thlawhhma rawngbâwlnaah unaupa chu a thawhpui thei a ni. (1 Timothea 3:4, 5) Tichuan, bial kantu leh kohhran upate chu an inhmu khâwm a. Kohhran upa, a nih loh leh kohhranho rawngbâwltuin a neih ngai miziate târ lanna Bible chângte chu ngun takin an en a ni.—1 Timothea 3:1-10, 12, 13; 1 Petera 5:1-3.
13. Engtin nge upate kaihhruaina kan zui tih kan lantîr theih?
13 Upate chuan kohhran vênghim a, enkawl an duh avângin Bible aṭangin kaihhruaina min pe a. He kaihhruaina hi kan tâna ṭha tûr a nih avângin anmahni kan thawhpui tûr a ni. (1 Timothea 6:3) Kum zabi khatnaah khân, mi ṭhenkhat chu ‘dân lo angin’ an awm a. Anni chuan hna rêng an thawk lo va, an tei mai mai, a nih loh leh mi dang thilah an inrawlh ṭhîn. Upate’n siam ṭhat tum mah se, insiam ṭhat an duh lo va. Paula chuan chutiang mi cheibâwl dân tûr chu kohhranho hnênah a hrilh a ni: “Chu mi chu in pâwl hauh loh nân chhinchhiah rawh u,” tiin. An kawm tawh loh a ngai a, hmêlma anga cheibâwl tûr erawh a ni lo. (2 Thessalonika 3:11-15) Entîr nân, tûn laiah pawh ring lotu ngaihzâwng nei a, Pathian tehnate ngaihsak lotu chu upate chuan ṭanpui an tum bawk a. (1 Korinth 7:39) A thiltih chu bânsan a tum loh chuan, chutiang nungchangin kohhran sawi chhiatna a thlen theih dân hrilhfiahna thusawi neih chu upate chuan an rêl thlu thei a ni. Upate’n in kohhranah chutiang thusawina an neih chuan engtin nge i chhân lêt ang? Ani chu i hriat chuan, kawm loh i tum ang em? Chutiang chuan a thiltih chu a tâna thil pawi a ni tih leh Jehova a tilâwm lo tih hre tûrin i ṭanpui thei a, tichuan a rilru put hmang a thlâk danglam thei a ni. [1]—Endnote en rawh.
KOHHRAN CHU THIANGHLIM TAK, INREM TAK, LEH INPUMKHATIN AWMTIR RAWH
14. Engtin nge kohhran vawn thianghlimna chu kan ṭanpui theih?
14 Pathian Thu chuan kan kohhranah thil sual titu an awm loh nâna kan zaa tih ngaite min hrilh a. Korinth khuaa thil thleng hi han ngaihtuah teh. Paula chuan chuta awm unaute chu a hmangaih êm êm a. An zînga tam tak chu thutak hre tûrin a ṭanpui a ni. (1 Korinth 1:1, 2) Chuvângin, an zînga tuemaw chu nungchang bawlhhlawh taka nungin kohhrana awm unaute’n an phal tih a hriat huna Paula rilru tûr chu han mitthla teh! Paula chuan ‘mi chutiang chu Setana pe,’ tûrin upate a hrilh a. Chu mi chu kohhran aṭangin an hnawtchhuak tûr a ni. (1 Korinth 5:1, 5-7, 12) Tûn laiah pawh, upate chuan tuemaw chu sual pawi tak a tih a, a inchhîr loh chuan hnawtchhuak tûrin thu tlûkna an siam thei a. Chutiang hunah chuan, hnawhchhuah tâwktu chu Bible-in min kaihhruai angin kan cheibâwl ang em? Chutianga kan tih chuan, kohhran vawn thianghlimna chu kan ṭanpui a ni ang. Mi chu a inchhîr a, Jehova ngaihdamna a dîl a ngai tih hre tûrin kan ṭanpui a ni bawk ang.
15. Engtin nge kohhranah remna kan awmtîr theih?
15 Korinth khuaah chuan buaina dang a awm a. Mi ṭhenkhat chuan an unaute court-ah an khing a. Paula’n anni chu: “Engati nge dik lo taka tihna chu in tuar zâwk loh?” tiin a zâwt a ni. (1 Korinth 6:1-8) Tûn laiah, kohhran mi ṭhenkhat chuan an unaute nên sumdâwnnaah intiamna an nei a; mahse, a hnuah pawisa an chân emaw, an unaute’n an bum emaw niin an ngai a. An unaute chu court-ah an khing a ni. Chûng thil thleng chuan, mite chu Jehova leh a mite chungchâng ṭha lo takin a sawitîr thei a. Chu bâkah, kohhranah buaina a awmtîr thei bawk. Pathian Lehkhabu chuan pawisa kan chân a nih pawhin kan unaute nên kan inrem tlat tûr a ni tih hre tûrin min ṭanpui a. [2] (Endnote en rawh.) Dik takin, Isua chuan buaina nasa tak leh inrem lohnate chinfel dân min zirtîr a. (Matthaia 5:23, 24; 18:15-17 chhiar rawh.) A kaihhruainate kan zawm chuan, kohhranah remna leh inpumkhatna kan awmtîr a ni.
16. Engvângin nge Pathian mite chu inlungrual tak an nih?
16 Jehova Lehkhabu chuan: “Ngai teh, unaute inngeih dial diala awm khâwm hi a va ṭhain, a va nuam êm!” tiin min hrilh a. (Sâm 133:1) Israel mite’n Jehova thu an zawm khân, an inlungrualin an inpumkhat a. Pathian chuan a mite chungchângah: “Huanga an lawi dum dum angin ka hruai khâwm ang,” tiin a sawi lâwk a. (Mika 2:12, C.L. Re-edited.) A mite chuan Bible thutak an zir ang a, inlungrual takin a rawng an bâwl ang tih a sawi lâwk bawk. Ani chuan: “Mipuite chu hmui thianghlim ka puttîr leh ang, LALPA hming chu an zaa an lama thu khat vuaa a rawng an bâwl tlân theih nân,” tiin a sawi. (Zephania 3:9) Inlungrual taka Jehova kan be thei chu kan va lâwm tak êm!
Upate chuan ‘thil sual titu’ tuemaw chu an ṭanpui (Paragraph 17-na en rawh)
17. Kohhrana tuemawin sual pawi tak a tih hunah upate chuan eng nge an tih ang?
17 Tuemawin sual pawi tak a tih chuan, upate chuan hmangaihna nei takin an zilh vat tûr a ni a. Jehova’n kohhran chu thil ṭha lo thununna engpawh laka vênghim tûr leh, kohhran thianghlimna leh inlungrualna vawng tûrin a duh tih an hria a ni. (Thufingte 15:3) Paula’n Korinth khuaa a unaute chu a hmangaih hlein, an mamawh hunahte zilhna a pe tih a lehkha thawn pakhatna kan chhiar aṭangin kan hria a ni. A hnu thla rei lo têah an hnêna a lehkha thawn pahnihnaah anni chu a fak avângin upate chuan Paula kaihhruaina chu an zui nghâl tih kan hria a. Unaupa pakhat chu “sual engpawh a tih lai phâwkin awm sela,” upate chuan ngilnei takin an siam ṭha tûr a ni.—Galatia 6:1.
18. (a) Engtin nge Pathian Thua kaihhruaina chuan kum zabi khatnaa kohhrante chu a ṭanpui? (b) A dawta thuziakah eng nge kan sawiho vang?
18 Kum zabi khatnaa Kristiante chuan Pathian Lehkhabua kaihhruaina an zui khân an kohhran chu a thianghlimin, remna leh inpumkhatna a awm tih a chiang hle a. (1 Korinth 1:10; Ephesi 4:11-13; 1 Petera 3:8) Chuvângin, chûng unaute chuan chanchin ṭha chu “vân hnuaia thil siam zawng zawngte” hnênah an hril thei a ni. (Kolossa 1:23) Tûn laiah pawh, Jehova mite chu an lungrualin an inpumkhat a, lei chung zawng zawngah chanchin ṭha an hril a ni. A dawta thuziak chuan Engkimtithei Lal Jehova chawimawi leh a Lehkhabu Bible-a kaihhruainate zawm chu an thil duh ber a ni tih a finfiah lehzual ang.—Sâm 71:15, 16. (ws16.11-E)
