1, 2. 1) ¿Wiˈix näägë jäˈäy jyënäˈändë parë nˈawdäjtëmë Dios? 2) ¿Ti nˈixäˈänëm mä tyäˈädë artikulo?

TA NÄÄGË jäˈäy diˈib jënandëp: “Parë Dios nˈawdäjtëm kyaj tyim tsekyëty ndukˈijtëm tuˈugë relijyonk diˈib xynyëˈëmoˈoy xytyuˈumoˈoyëm. Diˈib jeˈeyë tsojkëp, yëˈë ets oy nˈijtëm mëdë Dios”. Per ¿waˈandaa tyëyˈäjtënëty?

² Mä tyäˈädë artikulo nˈixäˈänëm ko Jyobaa kyaj oywiˈix tijaty ttuny ets ko tukniwits tuknimäˈkxë dyaˈityë kyäjpn (ixë rekuäädrë “¿Ti yˈandijpy?”). Nan nnijawëyäˈänëm ti mbäät nduˈunëm ko Jyobaa kyäjpn xyˈanmäˈäyëm wiˈix tijaty yajtunäˈäny (1 Korintʉ 14:33, 40). Ja Jesusë yˈëxpëjkpëty diˈib jukyˈäjttë mä primer siiglë, yëˈë naytyuktuˈumooyëdë ja Diosë jyaaybyajtën. Ko duˈun ttuundë, ta ojts tˈëwäˈkx tkäjpxwäˈkxtë ja Diosë Kyutujkën mä kanäägë it lugäär. Tyam, nan yëˈë xytyuˈumoˈoyëmë Biiblyë ets yëˈë nmëmëdoˈowëm wiˈix xyˈanmäˈäyëmë Diosë kyäjpn. Pääty mbäät ngäjpxwäˈkxëm ja Diosë Kyutujkën abëtsemy nyaxwinyëdë, ets nan xypyudëjkëm parë Diosë kyäjpn yˈitët wäˈäts, tuˈugyë ets agujk jotkujk.

3. ¿Tiko mjënäˈänët ko Jyobaa yëˈë tuˈugë Dios diˈib tsyejpy ets tijaty yˈitët tukniwits tuknimäˈkxë?

³ Ko nwinmäˈäyëm wiˈix tijatyë Jyobaa të dyajkojy, ta yajxon nˈijxëm ko yëˈë tuˈugë Dios diˈib tsyejpy ets tijaty yˈitët tukniwits tuknimäˈkxë. Mä Biiblyë jyënaˈany: “Mëët ja wijyajtën ets ja nijaˈawën ojts tyajkojy yë [Dios] yë tsajp ets naaxwiinyëtë” (Proverbios 3:19, TY). Per jantsy waanë jeˈeyë nnijäˈäwëm wiˈix tijatyë Dios të dyajkojy. Biiblyë jyënaˈany ko jantsy “jeˈeyë mëj mëj yajmëdoyˈaty mä pënën yëˈë” (Job 26:14). Per oy nëgoo kajaa nganijäˈäwëm wiˈix tijaty ojts dyajkojy diˈib jamˈäjtp tsäjpotm ets yä Naxwiiny, xypyudëjkëm parë yajxon njaygyujkëm ko aktukniwits ak tuknimäˈkxë yˈity (Salmo 8:3, 4). Extëmë mëtsäˈä miyonkˈam jyamˈaty tsäjpotm, per tukniwits tuknimäˈkxë yuˈkxtë, ets nanduˈun kanäägë planeta tukniwits tuknimäˈkxë tnaˈˈawdittë Xëëw. Xyajmonyˈijx xyajmonyjyäˈäwëm wiˈix yˈittë ak maˈkxy, duˈun extëmë Jyobaa tpëjtaky. Ko nbawinmäˈäyëm wiˈixë Jyobaa mëdë wijyˈäjtën ojts dyajkojy tijaty jamˈäjtp tsäjpotm ets yä Naxwiiny, ta nmëjkumayäˈänëm, nmëdunäˈänëm ets ninäˈä ngamastuˈudäˈänëm (Salmo 136:1, 5-9).

4. ¿Tiko ëxpëkyjyaˈay kyaj mbäät tˈatsoowëmbittë tijaty mayë jäˈäy nayajtëëwëdëp?

⁴ Yëˈë ëxpëkyjyaˈaytyëjk të tˈëxpëjkpëtsëmdë wiˈix yˈixëty tijaty jamˈäjtp tsäjpotm ets yä Naxwiiny, diˈib tyam ndukˈoyˈäjtëm. Per kyaj mbäät tˈatsoowëmbittë tijaty mayë jäˈäy nayajtëëwëdëp. Extëm nˈokpëjtakëm, kyaj yajxon ttimnijawëdë wiˈixën meerë tsyondaky tijaty jamˈäjtp tsäjpotm ets yä Naxwiiny ets tiko jyaˈˈatyë jukyˈäjtën. Ets nimayë jäˈäy kyaj tnijawëdë wiˈix tnimaytyäˈäktët tiko kyaj njaˈoogäˈänëm (Eclesiastés 3:11). ¿Tiko jäˈäy kyaj tnijawëdë wiˈix yaˈˈatsoowëmbity kanäk pëky diˈib nayajtëëwëdëp? Tuk pëky, yëˈko nimayë ëxpëkyjyaˈay etsë wiinkpë jäˈäy jyënäˈändë ko kyaj jyamëtyë Dios ets tyukniˈˈixëdë ko duˈunyë tijaty të yajtukˈijxpety. Perë Dios yˈatsoowëmbijtypy mä Biiblyë tijatyë naxwinyëdë jäˈäy myëmääy myëdäjtëp.

5. Jyobaa ojts tpëjtaˈaky kanäk pëkyë anaˈamën mä kyojy pyëjtaˈaky, ¿ti ijxpajtën xytyukˈijxëm ko jëjpˈam ets kyaj ninäjxëm?

⁵ Jyobaa ojts tpëjtaˈaky kanäk pëkyë anaˈamën mä kyojy pyëjtaˈaky etsë tyäˈädë anaˈamën kyaj tyëgatsy. Mayë jäˈäy yëˈë pyanëjkxtëbë tyäˈädë anaˈamën, extëmë elektrisistëty, plomeerëty, injenyeerëty, pënatyë abionk yajˈyoˈoytyëp etsë doktoor. Extëmë doktoor diˈib tsyujktëbë jäˈäy, nyijäˈäwëdëp mä yajpäätyë korasoon. ¿Wiˈix tnijawëdë? Yëˈko ak jaa jäˈäy tmëdatyë kyorasoon. Nan niˈamukë nnijäˈäwëm ko pën tuˈugë jäˈäy kupujtnäjxp mä tuˈugë lugäär diˈib këjxm, seguurë ko kyäˈäjët ets axtë tsojk yˈoogët. ¿Tiko dyuˈunëty? Yëˈko taaˈäjtp tuˈugë mëjääw diˈib xynyaxkuwoˈonëm. Tyäˈädë mëjääw yajtijy gravedad. Pääty pën jukyˈatäˈänëm, jëjpˈam ets kyaj ninäjxëm kanäk pëkyë anaˈamën diˈibë Dios të tpëjtaˈaky mä kyojy pyëjtaˈaky.

6. ¿Tiko mbäät nwinmäˈäyëm ko Jyobaa tsyejpy etsë nyax kyäjpn yˈitët tukniwits tuknimäˈkxë?

⁶ Xyajmonyˈijx xyajmonyjyäˈäwëm wiˈixë Jyobaa ttuknimäˈkxë dyaˈity tijaty jamˈäjtp tsäjpotm ets yä Naxwiiny. Pääty, nan mbäät nwinmäˈäyëm ko Jyobaa tsyejpy etsë kyäjpn yˈittët tukniwits tuknimäˈkxë. Axtë të xymyoˈoyëmë Biiblyë diˈib xytyukniˈˈijxëm wiˈix mbäät nˈawdäjtëm. Pën nbanëjkxëm wiˈixë Jyobaa mëdë kyäjpn xytyuˈumoˈoyëm, ta nëjkx nˈijtëm agujk jotkujk.

7. ¿Ti xytyukniˈˈijxëm extëm ojts yajjäˈäyë Biiblyë?

 ⁷ Biiblyë yëˈë tuˈugë regalë diˈibë Dios të xynyamoˈoyëm. Näägë ëxpëkyjyaˈay jyënäˈändë ko Biiblyë yëˈë myëmiimpy kanäägë liibrë diˈib jyaˈäjttëbë judiyëtëjk ets pënaty myëbëjktë Jesus ets ko kyaj nyaymyënëjkxyëty tijaty myaytyakypy. Perë Dios yëˈë wyinˈijx pënaty jyaˈaytyëp, näˈä ets tijaty kyujayëdëp. Pääty tukëˈëyë tijatyë Biiblyë myaytyakypy naymyënëjkxëp ets xypyudëjkëm parë njaygyujkëm ti diˈibë Dios xytyukniˈˈixëyäˈänëm. Desde Génesis axtë Diˈibʉ Jatanʉp, yajmaytyakp ko jyaˈˈatäˈäny tuˈugë tëëm ääts diˈib yajjëmbitaampy jatëgokë Naxwinyëdë extëm tuˈugë lugäärë tsujpë. Nan myaytyakypy ko tyäˈädë tëëm ääts, yëˈë Jesukristë, ets ko mä yˈanaˈamäˈäny yajnigëxëˈëgaampy ko Jyobaa yëˈëyë diˈib myëdäjtypyë madakën parë xyˈanaˈamëm (käjpxë Génesis 3:15, * Mateo 6:10, TNM * etsë Diˈibʉ Jatanʉp 11:15).

8. ¿Ti xytyukˈijxëm ko ja israelitëty tukniwits tuknimäˈkxë nety yˈittë?

⁸ Dios nan yajxon ojts ttukniwits ttuknimäˈkxë ja Israel gäjpn. ¿Wiˈix? Ko tmooy ja Ley. Extëm nˈokpëjtakëm, tamˈäjtpë netyë toxytyëjkëty diˈib “të yajtukniwitsëdë parë tyundët mä yajnidëkë ja wittëjk mä tyuˈukmuktë” (Éxodo 38:8). Ets ko ja israelitëty tsyënääyëdijttë, nan ojtsë Dios tnigajpxy pënaty jawyiin tsoondëp, wiˈix nyaynyikojëdët ets wiˈix dyajnëjkxtët ja tabernakulo. Ko tiempë nyajxy, ta ja rey David ttukniwijtsë tijaty tyundëp ja saserdotëty etsë lebitëty mä ja templë (1 Crónicas 23:1-6; 24:1-3). Ko ijty ja israelitëty tmëmëdowdë Jyobaa, ta kyunuˈkxëdë, yˈittë tuˈugyë ets agujk jotkujk (Deuteronomio 11:26, 27; 28:1-14).

9. ¿Wiˈixë Diosë kyäjpn yˈijty tukniwits tuknimäˈkxë mä primer siiglë?

⁹ Nan tukniwits tuknimäˈkxë yˈijty ja Diosë kyäjpn mä primer siiglë. Mä tadë tiempë, tamˈäjt diˈib Wyooyoˈoytyë ja Diosë kyäjpn o ja tuk pëky njënäˈänëm, tuk grupë yetyëjk diˈib tyuˈumooytyë ja Dios mëduumbëty. Tim jawyiin yëˈëyë duˈun tuundë ja apostëlëty, per ok, ta nanduˈun pyudëjkëdë pënaty tuundëp mëjjäˈäy (Apostʉlʉty 6:1-6; 15:6). Pënaty wyooyoˈoytyë ja Diosë kyäjpn ets ja mëjjäˈäytyëjk diˈib pudëjkëdë, yëˈë yajtuunëdë Jyobaa parë tnijäˈäyëdë kanääk ja tuˈukmujkën ets tmooytyë ja ëwij käjpxwijën ets tˈanmääytyë wiˈix tijaty yajtunäˈäny (1 Timotee 3:1-13; Titʉ 1:5-9). ¿Wiˈix ja Diosë kyäjpn ttukˈoyˈajty ko ojts tpanëjkxtë extëm yajtuˈumooytyë?

10. Mä primer siiglë, ¿wiˈix ja Dios mëduumbëty ttukˈoyˈäjttë ko ojts tpadundë extëm yajtuˈumooytyë? (Ixë dibujë mä tsyondaˈaky).

¹⁰ (Käjpxë Apostʉlʉty 16:4, 5). Nan tamˈäjt pënaty ojts tkuˈixëdë ja tuˈukmujkën parë “tˈawäˈänëdë myëguˈuktëjk ja ëxpëjkën diˈibë të dyaky ja apostëlëty esë mëjjäˈäytyëjkëty diˈibë ijttëp Jerusalén”. Ets kom pyaduundë wiˈix nyëˈëmooy tyuˈumooyëdë pënaty ojts twooyoˈoytyë ja Diosë kyäjpn, ta ojts “myëjwiinëdë myëbëjkën es bom bom tmëbëjktë waanë may ja jäˈäyëty”. ¿Wiˈix mbäät tyam nbanëjkxëmë yˈijxpajtënë mä nduˈukmujkëm?

11. Pënaty myënëjkxtëbë jëjpˈamˈäjtën, ¿ti mbäät ttundë ko Diosë kyäjpn tyuˈumoˈoyëdët?

¹¹ Pënaty tuundëp Komitee mä Sukursal, sirkuitë, mëjjäˈäytyëjk ets pënaty pyudëjkëbë mëjjäˈäytyëjk, jëjpˈam ets tmëmëdowdët extëmë Diosë kyäjpn tyuˈumoˈoyëdë. Biiblyë  jyënaˈany ko niˈamukë mbäät nmëmëdoˈowëm pënaty xynyëˈëmoˈoy xytyuˈumoˈoyëm (Deuteronomio 30:16; Ebreeʉsʉty 13:7, 17). Pën xëmë nmëmëdoˈowëmë Jyobaa, ta kyaj nëjkx ngujuundakëm o ndëjkëm abajt kutujkpë extëm nyajtuˈumoˈoyëm. Kyaj nˈadëˈëtsäˈänëm extëmë Diótrefes, diˈib kyaj tmëjˈijxy pënatyë nety yajnëjkxtëbë jëjpˈamˈäjtën mä ja tuˈukmujkën (käjpxë 3 Fwank 9, 10). Ko nbaduˈunëm extëm nyajtuˈumoˈoyëm, ta tuˈugyë nyajpatëm ets agujk jotkujk. Pääty nˈoknayajtëˈëwëm: “¿Nˈanmaabyëtsë nmëguˈuktëjk parë xëmë tmëmëdowdëdë Jyobaa? ¿Pojënëts nmëmëdoy ets ngupëjkypyëts wiˈix tijaty ttukniwitsëdë pënaty myënëjkxtëbë jëjpˈamˈäjtën?”.

12. ¿Wiˈix yajwinˈixy pënaty mbäät tyundë mëjjäˈäy o pyudëjkëbë mëjjäˈäy?

¹² Tyää näämnëm, Diˈib wyooyoˈoytyëbë Jyobaa tyestiigëty të dyajtëgatsy wiˈix yajwinˈixtët pënaty tundëp mëjjäˈäy o pyudëjkëbë mëjjäˈäy. Mä rebistë Diˈib Xytyukˈawäˈänëm ojts tnimaytyaˈaky ko mä primer siiglë diˈib Wyooyoˈoytyë Diosë kyäjpn yëˈë ojts ttuknipëktë sirkuitë ets twinˈixtët pënaty tundëp mëjjäˈäy ets pyudëjkëbë mëjjäˈäy (ix mä Diˈib Xytyukˈawäˈänëm 15 äämbë nobiembrë 2014, mä jyënaˈany “Diˈib nääk të nyayajtëwëdë”). Pääty desde septiembrë 2014, yëˈë sirkuitë wyinˈijxtëp pënaty mbäät duˈun tyundë. Ko mëjjäˈäytyëjk tnigäjpxtë tuˈugë nmëguˈukˈäjtëm diˈib mbäät tyuny mëjjäˈäy o pyudëjkëbë mëjjäˈäy, ta ja sirkuitë tˈixyˈaty ja nmëguˈukˈäjtëm mët ja fyamilyë. Mbäät mëët pyëtsëmy käjpxwäˈkxpë (1 Timotee 3:4, 5). Ets ok, ta ja sirkuitë tyuˈukmuky mëdë mëjjäˈäytyëjk parë yajxon tˈixtë pënë tyäˈädë nmëguˈukˈäjtëm kyuytyuumpy extëm jyënaˈany tuˈuk tuˈugë bersikulo diˈib yajpatp mä tyäˈädë tekstë (1 Timotee 3:1-10, 12, 13; 1 Peedrʉ 5:1-3).

13. ¿Wiˈix nyajnigëxëˈkëm pën nduˈunëm extëm ja mëjjäˈäytyëjk xytyuˈumoˈoyëm?

¹³ Mëjjäˈäytyëjk yëˈë yajtuundëbë Biiblyë parë xytyuˈumoˈoyëm, mët ko xymyëmäˈäy xymyëdäjëm ets xykyuentˈatäˈänëm. Pääty, oy ko nduˈunëm extëm xytyuˈumoˈoyëm, pes yëˈë parë ndukˈoyˈäjtëm (1 Timotee 6:3). Mä primer siiglë, tamˈäjtpë nety näägë Dios mëduumbëty diˈib “tijaty tyuundëp oy wiˈix”, kyaj tyunäˈändë ets jeˈeyë ttuktëk ttukwäˈägëdë diˈib kyaj pyäädëdë (2 Tesalonicenses 3:11, TNM). Ja mëjjäˈäytyëjk ojts jyapudëkëdë, per yëˈëjëty kyaj nyayajtëgäjtsëdë. Pablo, ta tˈanmääy ja myëguˈuktëjk wiˈix mbäät nyaygyuentˈatëdë mëdë duˈumbë jäˈäy, jyënany: “[Mˈijxwëˈëmdëp] pënëtyë dëˈën es katë ti mëët xyˈëmuk xykyäjxmuktë”. Jëjpˈamë nety ets kyaj mëdë tyäˈädë jäˈäy nyekytyuˈukmuktët, jeˈeyë ko kyaj duˈun tˈixtët extëmë myëtsip (2 Tesalónikʉ 3:12-15). Tyam, nanduˈunë mëjjäˈäytyëjk tjapudëkëdë pënaty kyaj tmëmëdowdë Diosë yˈanaˈamën. Extëm nˈokpëjtakëm, pën jam tuˈugë nmëguˈukˈäjtëm tnoobyëˈaty tuˈugë jäˈäy diˈib kyaj Tyestiigëty, ta tkäjpxwijtë (1 Korintʉ 7:39). Ets pën kyaj tmëjpëjtaˈaky, ta mëjjäˈäytyëjk dyajnaxët tuˈugë diskursë mä tnimaytyäˈägët ko mbäät axëëk yajnimaytyaˈagyë Diosë kyäjpn ko pën nyaynyoobyëˈatëdët mët tuˈugë jäˈäy diˈib kyaj Tyestiigëty. ¿Ti ndunäˈänëm  ko mëjjäˈäytyëjk dyajnaxëdë duˈumbë diskursë? Ets koxyëp nnijäˈäwëm pën jam yajmaytyakp, ¿nnaygyuentˈatäˈänëm ets jaayë mëët nduˈukmujkëm ko reunyonk o ko mëët nëjkxëm käjpxwäˈkxpë? Pën nduˈunëm duˈun, nëjkxëp nbudëjkëm parë tpëkëdë kuentë ko kyaj yˈoyëty diˈib tyuumpy ets ko kyaj Jyobaa tkupëky. Ets mbäädë net ok wyinmääytyëgatsy ^[1] (ixë notë).

14. ¿Ti mbäät nduˈunëm parë Diosë kyäjpn yˈitët wäˈäts?

¹⁴ Biiblyë xyˈanmäˈäyëm ti mbäät niˈamukë nduˈunëm parë wäˈäts nyaˈijtëmë Diosë kyäjpn. Nˈokjamyajtsëm diˈib tuun jäjtë jam Corinto. Apostëlë Pablo jyantsy tsyejpyë nety ja myëguˈuktëjk diˈib jam tsënääytyëp, pes nimay yëˈë nety të ttuknijawë ja tëyˈäjtën (1 Korintʉ 1:1, 2). Pääty, waˈanë Pablo axëëk nyayjäˈäwë ko tmëdoyˈajty ko tam tuˈugë yetyëjk diˈib mëˈinduump ets kyaj wiˈix yaˈˈanëëmë mä ja tuˈukmujkën. Pablo ta tnijäˈäyë ja mëjjäˈäytyëjk ets tˈanmääy ti tyundëp: “Tukkëdëkëdë tadë jäˈäy ja mëjkuˈugopk Satanás”. Tsojkëbë nety tˈëxkaxtët ja yetyëjk mä ja tuˈukmujkën (1 Korintʉ 5:1, 5-7, 12). Tyam nan mbäädë mëjjäˈäytyëjk tˈëxkaxtë tuˈugë jäˈäy diˈib mëjwiin kajaa të pyokytyuny ets kyaj të jyodëmbity. Pën kyaj mëdë tyäˈädë jäˈäy ndaˈanmujk nwäˈkmujkëm extëmë Biiblyë tniˈanaˈamë, ta nyaˈijtëm wäˈäts ja Diosë kyäjpn (ixë rekuäädrë “¿Ti yˈandijpy?”). Ets nan mbäät nbudëjkëm ja pokyjyaˈay parë jyodëmbitët ets tˈamdowëdë Jyobaa parë pyokymyaˈkxëdët.

15. ¿Wiˈix mbäät oy nˈijtëm mëdë nmëguˈukˈäjtëm ets tuˈugyë nyajpatëm mä tuˈukmujkën?

¹⁵ Mä ja tuˈukmujkën diˈib Corinto nan tamˈäjtpë nety jatuˈugë jotmay. Ko nääk ja Dios mëduumbëty tmëdäjttë tuˈugë jotmay, jamë nety nyayajjäˈtëdë mä kuduunk justisë. Päätyë Pablo yˈanmääyëdë: “Nik waanë oy ko xymyëdanëdët ko mdunëdët axëëk o mdimmaatsëdët” (1 Korintʉ 6:1-8). Nanduˈun tyam jyaty, ta näägë nmëguˈukˈäjtëm diˈib të ttukmuktë tuˈugë negosyë ets niduˈuk të tyëgoy ja myeeny syentääbë o tjawë ko të ja myëguˈuk myeetsyëty. Pääty axtë të net nyayajjäˈtëdë mä kuduunk justisë. Ko duˈun jyaty, ta jäˈäy tkäjpxpäätyë Jyobaa etsë nyax kyäjpn, ets nan mbäät jyapˈatyë jotmay mä ja tuˈukmujkën. Perë Diosë yˈAyuk jyënaˈany ko jëjpˈam ets oy nˈijtëm mëdë nmëguˈukˈäjtëm oy ndimˈyajtëgoˈoyëmë meeny sentääbë ^[2] (ixë notë). Jesus ojts dyakyë käjpxwijën wiˈix mbäät ngäjpxˈoˈoyëmë amay jotmay o ko jam ti nyajtsiptakëm (käjpxë Matewʉ 5:23, 24 etsë 18:15-17). Nˈokpanëjkxëmë kyäjpxwijën, net oy nˈijtëm mëdë nmëguˈukˈäjtëm ets tuˈugyë nyajpatëm mä tuˈukmujkën.

16. ¿Tiko tuˈugyë nyayaˈitëdë Dios mëduumbëty?

¹⁶ Biiblyë jyënaˈany: “¡Okˈixtë! ¡Jantsy oy ets jantsy tsuj ko nmëguˈukˈäjtëm yˈittë tuˈugyë!” (Salmo 133:1). Ko ijty ja israelitëty tmëmëdowdë Jyobaa, ta yˈittë tuˈugyë ets tijaty  ttundë tukniwits tuknimäˈkxë. Etsë Dios ojts tnigajpxy wiˈixë nety yˈitäˈänyë nyax kyäjpn mä tiempë myiny kyëdaˈaky, jyënany: “Jëtuˈunës nyajˈyeˈeymyukaˈany tä yeˈeymyuktën yë [borreegë]” (Miqueas 2:12, TY). Jyobaa nan ojts tnaskäjpxë ko ja kyäjpn tnijawëyaˈany ja tëyˈäjtën diˈib yajpatp mä Biiblyë ets myëdunäˈänëdë tuˈugyë, jyënany: “Nyajtëgatsaambyëtsë yˈayuk ja nax käjpn ets nmoˈoyaˈanyëts tuˈugë ayuk diˈib wäˈäts, parë niˈamukë yëˈëjëty tkäjpxtëdë Jyobaa xyëëw, ets tmëdundët tuˈugyë Jyobaa” (Sofonías 3:9). ¿Këdii ngugäjpxëm ko mbäät nˈawdäjtëmë Jyobaa tuˈugyë?

17. ¿Ti tsojkëp ttundëdë mëjjäˈäytyëjk ko pën mëjwiin kajaa pyokytyunët?

¹⁷ Yëˈë mëjjäˈäytyëjkëty, tsojkëp tjëjwijtsëmbittët tsuj yajxon ja diˈib mëjwiin kajaa të pyokytyuny, pes yëˈëjëty nyijäˈäwëdëp ko Jyobaa kyaj ttseky ets ja pokyjyaˈay diˈib kyaj jyodëmbity dyajmäˈädët ja myëguˈuktëjk. Ko duˈun ttundët, ta ja Diosë kyäjpn yˈittët wäˈäts ets tuˈugyë (Proverbios 15:3). Pablo mëkë nety ttsekyë myëguˈuktëjk diˈib Corinto, pääty tjëjwijtsëmbijty ko dyajtëgoyˈäjttë. Duˈun ttuuny mä ja tim jawyiimbë neky diˈib tyuknigajx ja myëguˈuktëjk, ets ja mëjjäˈäytyëjk diˈib Corinto netyë tmëmëdoowdë extëm ja Pablo myooyëdë käjpxwijën. Pes ko nyaxy tuˈuk poˈo majtsk poˈo, ta Pablo myëjkumääyëdë mä ja myëmajtskpë neky diˈib tuknigajxëdë. Pääty, pën nˈijxëm ko tam tuˈugë nmëguˈukˈäjtëm nyëˈëdëgoyaˈany tyuˈudëgoyaˈany ets kyajnëm tpëkyë kuentë, ta mëjjäˈäytyëjk pyudëkëdët tsuj yajxon (Gálatas 6:1, TNM).

18. 1) Ja Jesusë yˈëxpëjkpëty diˈib jukyˈäjttë mä primer siiglë, ¿wiˈix pyudëjkëdë ko nyaytyuktuˈumooyëdë Diosë yˈAyuk? 2) ¿Ti nˈixäˈänëm mä jatuˈukpë artikulo?

¹⁸ Ja Jesusë yˈëxpëjkpëty diˈib jukyˈäjttë mä primer siiglë, yëˈë naytyuktuˈumooyëdë Dios yˈAyuk, pääty ja Diosë kyäjpn yˈijty wäˈäts, tuˈugyë ets agujk jotkujk (1 Korintʉ 1:10; Éfesʉ 4:11-13; 1 Peedrʉ 3:8). Ets ko duˈun ttuundë, ta ojts tˈëwäˈkx tkäjpxwäˈkxtë ja oybyë ayuk “oytyim määty” (Kolosʉ 1:23). Tyam, nanduˈun tuˈugyë nnayaˈijtëm, tukniwits tuknimäˈkxë ets ngäjpxwäˈkxëmë oybyë ayuk abëtsemy nyaxwinyëdë. Mä jatuˈukpë artikulo yëˈë nˈakˈixäˈänëm ko diˈib niˈigyë ntsojkënyëˈäjtëm, yëˈë nmëjkumayäˈänëmë Jyobaa diˈib myëdäjtypyë madakën parë yˈanaˈamët ets ko nmëmëdowäˈänëm wiˈix xynyëˈëmoˈoy xytyuˈumoˈoyëm mä Biiblyë (Salmo 71:15, 16).