1, 2. (a) Ki sertin dimounn dir lor lefe ki Bondie ena enn lorganizasion? (b) Ki nou pou examine dan sa lartik-la?

KAN koz lor larelizion, sertin dimounn dir: “To pa bizin enn lorganizasion pou gid twa. To zis bizin ena enn relasion personel avek Bondie.” Me eski li vre? Ki bann fe montre?

² Dan sa lartik-la, nou pou trouve ki Zeova fer bann kitsoz dan enn fason ordone ek ki Li organiz so pep. Nou pou gete osi seki nou bizin fer kan lorganizasion Zeova donn nou bann instriksion. (1 Korintien 14:33, 40) Dan premie siek, bann serviter Zeova ti swiv bann instriksion ki ti ena dan bann Lekritir. Ek gras-a sa, zot ti kapav pres bonn nouvel dan boukou landrwa. Parey kouma zot, nou les Labib gid nou azordi ek nou obeir bann instriksion ki lorganizasion Bondie donn nou. Se pou sa rezon-la ki nou reisi pres bonn nouvel dan lemond antie. Sa permet nou osi pou gard nou kongregasion pir, ini, ek dan lape.

3. Ki kitsoz konvink twa ki Zeova Li enn Bondie ki kontan lord?

³ Kan nou get bann kitsoz ki Zeova finn kree, nou trouv  bien ki Li enn Bondie ki kontan lord. Li “finn kree later avek sazes. Li finn bien etabli lesiel avek disernman.” (Proverb 3:19) Ena boukou kitsoz nou pa kone lor bann kitsoz ki Zeova finn kree. Ofet, “nou finn tann zis enn ti son lor Li.” (Zob 26:14) Me sa tigit kitsoz ki nou kone lor liniver la montre nou dan enn fason kler ki liniver bien organize. (Psom 8:3, 4) Bann milyon zetwal vwayaze dan lespas dan enn fason bien ordone. Ek reflesi kouma bann planet dan nou sistem soler tourn otour soley. Enn lord koumsa existe zis parski Zeova finn organiz bann planet ek bann zetwal dan sa fason-la. Kan nou reflesi kouma Li’nn kree later ek “lesiel dan enn fason extraordiner,” nou anvi loue Li, ador Li, ek res fidel anver Li.​—Psom 136:1, 5-9, NW.

4. Kifer bann siantis pa finn kapav reponn bann kestion inportan?

⁴ Bann siantis finn servi seki zot finn aprann lor liniver ek later pou amelior nou lavi. Me zot pa finn kapav reponn boukou kestion inportan. Par exanp, bann astronom pa kapav dir nou exakteman kouma liniver inn aparet ouswa kifer bann dimounn, bann zanimo, ek bann plant existe lor later. Ek laplipar dimounn pa kapav explike kifer bann imin ena enn gran dezir pou viv pou touletan. (Ekleziast 3:11) Enn rezon kifer bann dimounn pa gagn repons pou sa bann kestion-la se parski bann siantis ek lezot dimounn dir ki Bondie pa existe ek zot ankouraz bann dimounn pou krwar dan levolision. Me Bondie donn nou repons sa bann kestion-la dan so Parol Labib.

5. Dan ki fason nou depann lor bann lalwa ki ena dan lanatir?

⁵ Zeova finn kree bann lalwa ki ena dan lanatir ek sa bann lalwa-la pa sanze. Bann elektrisien, plonbie, inzenier, pilot, bann dokter ki oper dimounn, ek boukou lezot ankor depann lor sa bann lalwa-la pou fer zot travay. Anou pran enn lexanp. An zeneral, tou dimounn zot leker dan mem plas. Alor, enn sirirzien kone kotsa li pou trouv leker sak pasian ki li opere. Nou tou kone ki, si enn dimounn zet so lekor depi enn oter, li pou tonbe ek li kapav mor. Nou obeir bann lalwa ki ena dan lanatir, kouma par exanp, lalwa gravite, parski nou anvi viv.

6. Kouma eski nou kone ki Zeova anvi so pep ador Li dan enn fason bien organize?

⁶ Zeova finn organiz liniver dan enn fason vremem extraordiner. Alor, nou kapav sir ki Li anvi so pep ador Li dan enn fason bien organize. Ofet, Zeova finn donn nou Labib pou ansegn nou kouma pou ador Li. Se zis kan nou swiv direksion ki Li donn nou atraver Labib ek so lorganizasion ki nou pou reisi viv ere ek gagn satisfaksion.

7. Ki nou kapav aprann ar fason ki’nn ekrir Labib?

⁷ Labib se enn kado vremem inik ki Bondie finn donn nou. Pou sertin spesialis, Labib se zis enn koleksion bann liv Zwif ek Kretien ki bann dimounn inn met ansam. Me, se Bondie ki’nn deside kisannla pou ekrir sa bann liv-la, kan zot pou ekrir sa, ek ki zot pou ekrir. Se akoz sa ki tou bann liv Labib ed nou pou  konpran mesaz Bondie. Depi Zenez ziska Revelasion, Labib explike ki pou ena enn “desandans” ki pou fer later revinn enn paradi. Ek nou finn aprann ki sa ‘desandans-la’ se Zezi Kris, ek ki so Rwayom pou prouve ki Zeova ena drwa pou diriz tou dimounn.​—Lir Zenez 3:15 *; Matie 6:10; Revelasion 11:15.

8. Dan ki fason bann Izraelit ti bien organize?

⁸ Bann Izraelit ti swiv Lalwa ki Bondie ti donn zot ek zot ti enn pep bien organize. Par exanp, ti ena “bann madam ki ti organize pou servi dan lantre latant kot fer renion.” (Exod 38:8) Bann Izraelit ti gagn osi bann instriksion kouma pou deplas zot bann latant ek tabernak dan enn fason organize. Inpe apre, Lerwa David ti organiz bann travay ki ti fer dan tanp kan li ti donn bann pret ek bann Levit bann travay presi. (1 Kronik 23:1-6; 24:1-3) Kan bann Izraelit ti obeir Zeova, zot ti gagn so benediksion. Zot ti organize ek ti ena lape ek linite parmi zot.​—Deteronom 11:26, 27; 28:1-14.

9. Kouma bann kongregasion dan premie siek ti organize?

⁹ Bann kongregasion dan premie siek osi ti bien organize. Ti ena enn komite santral, setadir, enn group zom ki ti donn bann kongregasion diferan linstriksion. O-koumansman, ti ena zis bann zapot dan sa group-la. Me apre, lezot ansien osi ti form parti dan sa group-la. (Zistwar Bann Apot 6:1-6; 15:6) Zeova ti gid bann manb komite santral, ek lezot frer ki ti travay ansam avek zot, pou ekrir bann let. Dan sa bann let-la, ti ena bann konsey ek bann instriksion pou bann kongregasion. (1 Timote 3:1-13; Tit 1:5-9) Ki benediksion bann kongregasion ti gagne kan zot ti swiv bann instriksion komite santral?

10. Ki ti arive kan bann kongregasion dan premie siek ti swiv bann instriksion komite santral? (Get zimaz dan koumansman lartik.)

¹⁰ Lir Zistwar Bann Apot 16:4, 5, NW. Dan premie siek, sertin frer ti vizit bann kongregasion pou dir zot “bann desizion ki bann zapot ek bann ansien dan Zerizalem ti’nn pran,” setadir bann desizion komite santral. Bann kongregasion ti swiv sa bann instriksion-la ek zot “ti pe kontign vinn for dan lafwa ek zot ti pe ogmante zour apre zour.” Kouma seki nou aprann ar zot lexanp kapav ed nou dan nou kongregasion azordi?

11. Ki bann ansien ek bann asistan ministeryel bizin fer kan zot gagn bann instriksion ar lorganizasion Bondie?

¹¹ Bann manb Komite Biro Nasional ouswa Komite Pei, bann sirveyan sirkonskripsion, bann ansien, ek bann asistan ministeryel bizin obeir bann instriksion ki zot gagne ar lorganizasion Zeova. Ofet, Parol Bondie dir ki nou tou nou bizin obeir bann ki pe diriz nou. (Deteronom 30:16; Ebre 13:7, 17) Bann ki fidel anver Zeova zot pa rebele, ek zot pa plengne akoz bann linstriksion ki zot gagne. Nou pa anvi resanble Diotrefes, ki pa ti ena okenn respe pou  bann frer nome. (Lir 3 Zan 9, 10, NW.) Kan nou swiv bann instriksion ki nou gagne, nou favoriz lape ek linite dan kongregasion. Alor, nou kapav demann noumem: ‘Eski mo ankouraz mo bann frer ek ser pou res fidel anver Zeova? Kan lorganizasion Bondie donn bann instriksion, eski deswit mo swiv sa bann instriksion-la?’

12. Kouma eski nomm bann ansien ek bann asistan ministeryel?

¹² Pa tro lontan, Komite Santral finn sanz fason ki nomm bann ansien ek bann asistan ministeryel dan bann kongregasion. Dan Latour Degard 15 Novam 2014, lartik “Kestion Bann Lekter” explike ki dan premie siek, komite santral ti donn bann sirveyan lotorite pou nomm bann ansien ek bann asistan ministeryel. Se akoz sa ki, apartir Septam 2014, se bann sirveyan sirkonskripsion ki fer bann nominasion. Kan bann ansien dan kongregasion rekomann enn frer pou servi antan ki ansien ouswa asistan ministeryel, sirveyan sirkonskripsion esey konn li ek so fami pli bien. Par exanp, li kapav pres ansam avek frer-la. (1 Timote 3:4, 5) Apre sa, sirveyan sirkonskripsion ek bann ansien zwenn ansam. Zot examinn bien bann verse ki dekrir bann kalite ki enn ansien ouswa enn asistan ministeryel bizin ena.​—1 Timote 3:1-10, 12, 13; 1 Pier 5:1-3.

13. Kouma nou kapav montre ki nou korper avek bann ansien?

¹³ Bann ansien donn nou bann konsey ki sorti dan Labib parski zot anvi protez ek pran swin sak manb kongregasion. Nou bizin korper avek zot parski sa bann konsey-la pou fer nou gagn bann bienfe. (1 Timote 6:3) Dan premie siek, sertin ti “pe amenn enn lavi dezordone.” Zot pa ti pe travay ditou ek zot ti pe pas zot letan mel zot dan bann kitsoz ki pa konsern zot. Bann ansien ti esey disiplinn zot, me zot pa ti anvi sanze. Pol ti dir kongregasion kouma zot ti bizin azir anver bann dimounn koumsa. Li ti dir: “Rey so nom e pa gagn okenn kontak ar li.” Zot ti bizin aret frekant sa dimounn-la, me pa tret li kouma enn lennmi. (2 Tesalonisien 3:11-15) Azordi osi, bann ansien esey ed bann ki pa swiv bann prinsip Bondie, par exanp, enn kikenn ki pe frekant enn dimounn ki pa dan laverite. (1 Korintien 7:39) Si dimounn-la pa’le sanz so kondwit, bann ansien kapav desid pou fer enn diskour ki pou explike kouma sa kalite kondwit-la kapav fer lezot koz an mal lor kongregasion. Si bann ansien fer enn diskour koumsa dan to kongregasion, kouma to pou reazir? Si to konn sa dimounn-la, eski to pou evit frekant li? Si to fer sa, to pou kapav ed li pou realize ki so kondwit  pe fer limem ditor ek ki sa pa fer Zeova plezir. Ek kitfwa sa kapav ed li pou sanz so latitid. ^[1]​—Get not alafin lartik.

14. Kouma eski nou kapav ede pou gard kongregasion pir?

¹⁴ Parol Bondie dir nou seki nou tou nou bizin fer pou gard kongregasion pir. Get seki ti arive dan Korint. Pol ti bien kontan bann frer ek ser dan Korint. Li ti ed boukou parmi zot pou konn laverite. (1 Korintien 1:1, 2) Alor, esey imazine ki li ti resanti kan li ti aprann ki enn parmi zot ti pe amenn enn lavi imoral ek ki bann frer ti permet sa dimounn-la res dan kongregasion! Pol ti dir bann ansien “livre enn zom koumsa ar Satan.” Zot ti bizin tir sa dimounn-la dan kongregasion, setadir, exkli li. (1 Korintien 5:1, 5-7, 12, NW.) Azordi, bann ansien kapav desid pou exkli enn kikenn parski li’nn fer enn pese grav ek li pa’nn repanti. Dan sa sitiasion-la, eski nou pou tret sa dimounn exkli-la parey kouma Labib ankouraz nou pou fer? Si nou fer sa, nou ede pou gard kongregasion pir. Sa kapav ed dimounn-la pou realize ki li bizin repanti ek demann Zeova pardon.

15. Kouma eski nou kapav gard lape dan kongregasion?

¹⁵ Ti ena enn lot problem dan Korint. Sertin ti met zot bann frer lakour. Pol ti demann zot: “Kifer zot pa siport linzistis?” (1 Korintien 6:1-8) Azordi, sertin manb kongregasion finn fer bann kontra komersial avek zot bann frer. Me apre, zot finn perdi zot larzan ouswa zot ena linpresion ki zot frer finn kokin zot. Alor, zot finn met zot bann frer lakour. Me kan zot fer sa, bann dimounn kapav koz an mal lor Zeova ek lor so pep. Ek sa kapav kree bann problem dan kongregasion. Parol Bondie ed nou pou konpran ki nou bizin res anpe avek nou bann frer, mem si nou perdi kas akoz sa. ^[2] (Get not alafin lartik.) Ofet, Zezi finn ansegn nou kouma pou regle bann gro problem ek bann dezakor. (Lir Matie 5:23, 24; 18:15-17, NW.) Kan nou obeir bann komannman Zezi, nou gard lape ek linite dan kongregasion.

16. Kifer eski ena linite parmi pep Bondie?

¹⁶ Dan so Parol, Zeova dir nou: “Gete! Li vremem bon ek li enn plezir pou bann frer res ansam dan linite!” (Psom 133:1, NW.) Kan zot ti obeir Zeova, bann Izraelit ti organize ek zot ti res dan linite. Konsernan so pep, Bondie ti anonse: “Mo pou rasanble zot dan linite kouma enn troupo dan lanklo.” (Mika 2:12) Zeova ti predir osi ki so pep ti pou aprann konn laverite ki sorti dan Labib  ek ki zot ti pou ador Li dan linite. Li ti dir: “Mo pou sanz lang bann pep pou fer li vinn enn lang pir, pou ki zot tou invok nom Zeova, pou ki zot servi Li kot-a-kot.” (Sefania 3:9) Nou bien rekonesan ki nou pe kapav ador Zeova dan linite, pa vre!

17. Ki bann ansien bizin fer kan enn manb kongregasion fer enn pese grav?

¹⁷ Si kikenn fer enn pese grav, bann ansien bizin azir bien vit pou ed li, ek zot pou fer sa avek boukou lamour. Zot kone ki Zeova anvi ki zot protez kongregasion kont bann move linflians, pou ki kongregasion res pir ek ini. (Proverb 15:3) Pol ti bien kontan so bann frer ki ti res Korint. Kan nou lir premie let ki li ti ekrir zot, nou trouve ki li ti donn zot bann konsey bien fran kan zot ti bizin. Nou kone ki bann ansien dan Korint pa ti tarde pou swiv bann instriksion ki Pol ti donn zot parski de-trwa mwa apre, kan Pol ti ekrir zot enn deziem let, li ti felisit zot. Alor, si “enn kikenn pe pran enn move semin avan ki li rann li kont,” bann ansien bizin ed li avek bonte.​—Galat 6:1, NW.

18. (a) Kouma eski bann konsey ki ena dan Parol Bondie ti ed bann kongregasion dan premie siek? (b) Ki nou examine dan prosin lartik?

¹⁸ Li kler ki, kan bann Kretien dan premie siek ti swiv bann konsey ki ena dan Parol Bondie, zot kongregasion ti res pir, ini, ek dan lape. (1 Korintien 1:10; Efezien 4:11-13; 1 Pier 3:8) Gras-a sa, bann frer ek ser dan sa bann kongregasion-la ti kapav pres bonn nouvel “ar tou kreatir anba lesiel.” (Kolosien 1:23) Azordi osi, ena linite parmi pep Zeova ek zot bien organize, ek zot pe pres bonn nouvel partou lor later. Prosin lartik pou donn nou pli boukou prev ki, pli gran dezir ki pep Bondie ena se donn loner Souverin Segner Zeova ek obeir direksion ki Li done gras-a so Parol Labib.​—Psom 71:15, 16.