1, 2. (a) Vamweni vanonangenyi ngo pamusoro po murangariro wo kuti Mwari ano sangano? (b) Tinozojijenyi pa musoro uno?

VANDHU vamweni vanonanga kudari: “Apana dikano yo kuti muve no sangano rinomutungamirira. Kwamuri, kuva no ushamwari na Mwari zvinokwana.” Ndizvona zvavanonangari here? Zvicinyi zvatiri kuvona?

² Pa musoro uno, ticazovona kuti Jehovha anoita zviro ngo maitiro akarongeka zve anoronga vandhu vake. Tinozobhuyazve ngo pamusoro po zvatinodikana kuita patinoashira ndhungamiriro jo sangano ra Jehovha. (1 VaKorinto 14:33, 40, Shanduro yeNyika Itsva) Pa zana ro kutanga ro makore, vandhu va Jehovha vakatevera ndhungamiriro yo Matahwa zve vakakwanisa kucumaera masoko akanaka mu ndau jakawanda. Mukufanana na ivona, nyamasi uno tinosiya kuti Bhaibheri rititungamirire. Zve tinozwira ndhungamiriro jatinoashira kubva ku sangano ra Mwari. Inga muviyo, tiri kukwanisa kucumaera masoko akanaka pasi pese. Tiri kuramba tino ungano yakacena, ino runyararo zve yakabatana.

3. Zvicinyi zvinomukhohwesa kuti Jehovha ndi Mwari wakarongeka?

³ Tikasota zvakarura Jehovha, tinovona zvakajeka kuti iyena ndi Mwari wakarongeka. “Wakarura nyika ngo uzivi hwake, wakavangisa mudenga ngo hwiru hwake.” (Mazwi Akangwara 3:19) Kuno zvakawanda zvaticikazivi ngo pamusoro po zvakarura Jehovha. Zvokadi, “takazwa basi mwaungu mudoko.” (Jobe 26:14) Asi pa zvishoma zvatinoziva ngo pamusoro po zvaakasika pasi no mugore, tinokwanisa kuvona kuti zvakanasa kurongeka kamare. (Nduyo 8:4, 5) Mamiriau o ndhondho anotenderera mudenga ngo maitiro akarongeka. Zve rangariranyi ngo pamusoro po maparaneta anowanika phedo no zuva, paanonga eciritenderera. Kurongeka uku kunoshamaisa, kuripo basi ngo ndava yokuti Jehovha wakaronga ndhondho no maparaneta kuti zvitenderere ngo maitiro akarongeka. Patinovona kuti “yena wakarura denga” no pasi pano “ngo uzivi,” tinoda kumukuja, kumunamata, zve kuva takagondeka kwaari.​—Nduyo 136:1, 5-9.

4. Ngenyi masientista aakwanisi kudavira mubvunjo muzinji jinosisira?

⁴ Masientista ari kushandisa zviro zvizinji zvaakajija ngo pamusoro po pasi no mugore kuitira kuitisa nane upenyu hwedu. Asi, iwona aaripi kukwanisa kudavira mubvunjo jinosisira. Inga muezaniso, vanojija ngo zvo mugore, avakwanisi kunanga kamare kuti denga rakatangisa kudini, zve ngenyi vandhu, zvinyama, no mamuti zviripo pasi pano. Zve vandhu avakwanisi kudurujira kuti ngenyi vandhu vano cido cakavanga co kurarama kwenda no kwenda. (Mucumaeri 3:11, Shanduro yeNyika Itsva) Thangwe rimwe rinoita kuti vandhu vatame kuwana mupinguro ku mubvunjo iji i ndava yo kuti masientista pomwe no vamweni vanonanga kuti akuna Mwari zve vanokhwijirija jijiso yo uphindu-uphindu. Asi Mwari anotipa mupinguro mu bhuku rake, Bhaibheri.

5. Vandhu vanothembesa kudini mutemo jinotungamirira zvakasikwa?

⁵ Jehovha wakarura mutemo muzinji jinotungamirira zviro zvakasikwa. Mutemo jondhojo ajicinji. Inga muezaniso, vanoshanda no zvo magezi, makanarizadhori, ma injinyero, mapiroto, no vanocekaya peresau pomwe no vamweni vanozwira mutemo iji kuti vaite basa ravo. Inga muzvaniso, ndau inowanika mwoyo pa muviri wo mundhu ndi imweyo pa mundhu umwe nga umwe, ngo kudaro vanocekaya peresau vanokwanisa kuziva pauri, pa kuda kurapa mundhu ari wese. Cimwenizve ngo co kuti vandhu vese vanoziva kuti mundhu akambhuka pa ndau yakakhwirira, angawa kana kutofa. Tinozwira mutemo jinotungamirira zvakasikwa, jakadari inga wo kukwevera zviro pasi, ngokuti tinoda kuramba tecirarama.

6. Tinozvizivisa kudini kuti Jehovha anoda kuti timunamate ngo maitiro akarongeka?

⁶ Jehovha wakaronga mugore ngo maitiro anoshamaisa maningi. Ngokudaro, anodavo kuti vandhu vake vamunamate ngo maitiro akarongeka. Zvokadi, Jehovha wakatipekeja Bhaibheri kuti ritijijise manamatire atingamuita. Kudari tikatevera ndhungamiriro jo Bhaibheri no sangano rake tinozokwanisa kuva no upenyu hunodakajisa.

7. Tingajijenyi kubvira pa matarihwe akaizwa Bhaibheri?

 ⁷ Bhaibheri i cipo cicikapimiki cinobva kuna Mwari. Vajiji vamweni vanonanga kuti Bhaibheri rakaumbwa ngo cikwata mabhuku o ciJudha no o ciKristu akabatanijwa ngo vandhu. Asi Mwari ngaakakheta kuti mbhani vaidikana kutara Bhaibheri, mukuvo wovaidikana kuritara no zvovaidikana kutaremo. Ngo iyo ndava mabhuku ese o mu Bhaibheri anobesera kuzwisisa masoko a Mwari. Kubvira mu bhuku ra Genesi mbhera Apokalipsi, Bhaibheri rinotikhombija kuti kuno ‘jinja’ kana mubarihwana unozoita kuti pasi pano pavezve paradhiso. Takajija kuti ‘jinja’ kana mubarihwana uwu ndi Jesu Kristu zve Umambo hwake hunozovonesa kuti Jehovha ndiyena ano citendehwa co kutonga vandhu vese.​—Verenganyi Genesi 3:15; Mateu 6:10; Apokalipsi 11:15.

8. VaIziraeri vainga vakarongeka ngo njira japi?

⁸ VaIzarei vaitevera Mutemo wovakapuwa ndi Mwari zve vainga vakanasa kurongeka. Inga muezaniso, kwainga no ‘vashandikaji vaiita basa rakarongwa pa musuvo po tende yo kusonganira.’ (Exodo 38:8, Shanduro yeNyika Itsva) VaIziraeri vaingavo no ndhungamiriro ngo maitiro ovaidikana kushandisa pa kucinja kampamento no tabherinake ngo njira yakarongeka. Pa kufamba ko nguva, Mambo Dhavhidhi wakaronga vapiri no VaRevi mu kuzwirana no mabasa avo. (1 Kronike 23:1-6; 24:1-3) VaIziraeri pavaizwira Jehovha, iyena waivakomborera. Ivona vainga vakarongeka zve vainga no runyararo no rubatano.​—Deuteronòmio 11:26, 27; 28:1-14.

9. Ungano jainga jakarongeswa kudini mu zana ro kutanga ro makore?

⁹ Ungano jo mu zana ro kutanga ro makore jaingavo jakarongeka. Kwainga no mukhumbi unotonga, kana kuti, cikwata co vanarume caipekeja ndhungamiriro ungano. Pa kutanga cikwata ici cainga cakaumbwa ngo vapostori. Pa kufamba ko nguva vakuru vamweni vakanghwiniswavo. (Maitiro o Vapostori 6:1-6; 15:6) Jehovha wakatungamirira vo mukhumbi unotonga pomwe no vamweni vaishanda phedo naivona kuti vatare karata jainga no mbhangiro zve ndhungamiriro kuno ungano. (1 Timoti 3:1-13; Tito 1:5-9) Ungano jakabesereka kudini ngo kuteverera ndhungamiriro jo mukhumbi unotonga?

10. Mu zana ro kutanga ro makore zvicinyi zvaiitika ungano pajaiteverera ndhungamiriro jo mukhumbi unotonga? (Vonanyi pikica yo kutanga.)

¹⁰ Verenganyi Maitiro o Vapostori 16:4, 5. Mu zana ro kutanga ro makore, hama jimweni jaifambira ungano kuitira koojibvunja “mithetho yo vapostori no yo madoda,” kana kuti, yo mukhumbi unotonga, waiwanika ku Jerusalema. Ungano jaiteverera ndhungamiriro iji zve ‘jaivangiswa mu kutenda, joengejehwa vatendi, mazuva ese.’ Zvicinyi zvatingajija ku muezaniso wavo zvingatibesera mu ungano nyamasi uno?

11. Vakuru no mabatiri vanoshandira vanodikana kuitenyi pavanoashira ndhungamiriro jo sangano ra Mwari?

¹¹ Zvikwata zvo maCine kana Zvikwata zvo Nyika, vavonereri vo ndharaundha zve vakuru vo ungano vanodikana kuteverera ndhungamiriro jinobva ku sangano ra Mwari. Zvokadi, Bhuku ra Jehovha kamare rinotibvunja kuti tese tinodikana  kuzwira vaya vanotungamirira. (Deuteronòmio 30:16; Vaheberi 13:​7, 17) Vandhu vakagondeka kuna Jehovha asipi vapanduki, zve avan’gun’guti ngo ndhungamiriro jovanoashira. Atidi kuita inga ndi Dhiotrefe, uwo acaireremeja hama jaitungamirira. (Verenganyi 3 Johani 9, 10.) Patinoteverera ndhungamiriro jatinopuwa, tinobesera kuti mu ungano muve no runyararo zve rubatano. Waro tingajibvunjsa kudari: ‘Ndinovangisa hama no hambzaji jangu kuti jive jakagonde kuna Jehovha here? Ndinokasika kuzwira ndhungamiriro jandinoashira mu sangano ra Mwari here?’

12. Vakuru no vabatiri vanoshandira vanogajiswa kudini?

¹² Pa mukuvo waperari, Mukhumbi Unotonga wakaita cinjo pa magajihwe anoitwa vakuru no vabatiri vanoshandira. Pa ‘Mubvunjo jo Vaverengi,’ pa Murindiri wo 15 ya Cikowe gore ro 2014, mu ciShona, pakasanangura kuti mu zana ro kutanga ro makore, mukhumbi unotonga wakapa vavonereri vo ndharaunda mutoro wo kugaja vakuru no vabatiri vanoshandira. Ngokudaro, kubvira mu mweji wa Cikumiyana wo gore ro 2014, vavonereri vo ndharaundha vakava vaciita basa iri. Vakuru vo ungano vanogumisa mavonero avo kuno muvonereri wo ndharaundha okuti kuno hama ingajajwa inga mukuru kana mubatiri anoshandira. Iyena anoeja kunasa kuziva hama yondhoyo no mbhuri yayo. Inga muezaniso, angashanda nayo mu basa ro mu munda. (1 Timoti 3:4, 5) Perepo muvonereri wo ndharaunda anosongana no vakuru. Vari pamwepo, no kungwarira kwese, vanosota Matahwa anosanangura ngo pamusoro po mugariro jinodiwa ku mukuru kana mubatiri anoshandira.​—1 Timoti 3:1-10, 12, 13; 1 Pedru 5:1-3.

13. Tingakhombijisa kudini kuti tiri kuzwira ndhungamiriro jinobva ku vakuru?

¹³ Vakuru vanotipa ndhungamiriro jinobva mu Bhaibheri ngo kuti vanoda kungwarira no kukorondha ungano. Tinodikana kushandira pamwe navo ngokuti ndhungamiriro javo jinobeserazve itusu. (1 Timoti 6:3) Mu zana ro kutanga ro makore vamweni vainga no ‘mararamiro acizivi kun­aka.’ Avacaibata basa asi vainghwinira mu shwiro jo vamweni. Vakuru vakaeja kuvabesera asi ivona vairamba kucinja. Pauro wakabvunja ungano zvoyaidikana kuita no mundhu wakadaro. Iyena wakati: ‘Rambanyi mucimuceukija, sianyi kushamwarijana naye.’ Vaidikana kusiya kushamwarijana naye asi avaicikana kumuvona inga muvengi. (2 VaTesalònika 3:11-15, Shanduro yeNyika Itsva) Nyamasi uno vakuru vanoeja kubesera vandhu vanorerusa mupango ja Mwari, inga muezaniso, wakadari inga wo kunomorari no mundhu acikaripi mutendi. (1 VaKorinto 7:39) Kudari mundhu akaramba kucinja mufambiro wake, vakuru vangatema civaringo co kuita hurukuro inokhombija kuti mufambiro uwu ungashoresa kudini ungano. Kudari hurukuro yondhoyo  ikaitwa pa ungano, munozodini? Kudari munomuziva mundhu ari kunangihwaro, munozosiya kushamwarijana naye here? Mukaita kudaro, mungamubesera kuvona kuti mufambiro wake unomukhuvaza no kunyangaja Jehovha, zve angacinja murangariro. ^[1]​—Vonanyi masoko o kupejisira.

14. Tingabesera kudini kuti ungano irambe yakacena?

¹⁴ Soko ra Mwari rinotibvunja zvinodikana kuitwa ngo vese kuti ungano itame kuva no ushati. Rangariranyi zvakaitika ku ungano yo Korinto. Pauro waidakarira maningi hama no hambzaji jo ungano yondhoyo. Wainga wakabesera uzinji hwavo kujijira cokwadi. (1 VaKorinto 1:1, 2) Waro rangariranyi mazwire aakazova nawo paakazwa kuti umwe wavo wairarama mu uhure zve hama jaimutendera kuti arambe ari mu ungano! Pauro wakabvunja vakuru kuti ‘apuwe Sathana.’ Ivona vaidikana kumubvisa mu ungano, kana kuti waidikana kujingwa. (1 VaKorinto 5:1, 5-7, 12) Nyamasi uno, vakuru vangatema civaringo co kuti ariwese anodikana kujingwa ngokuti wakaita cishaishi cikuru zve aazivi kukhauya. Kudari zvikaitika, tinozotaja wakajingwaya mukuzwirana no zvatinobvunja ngo Matahwa here? Tikaita kudaro, tinozobesera kuti ungano irambe yakacena. Tinobeseravo mundhu wiyana kuvona kuti anodikana kukhauya zve wokumbira kuregerehwa ndi Jehovha.

15. Tinobesera kudini kuti ungano irambe yakabatana?

¹⁵ Ku Korinto kwaingazve no ndhango imweni. Vamweni vaienda kotongesa hama ku banje. Pauro wakabvunjisa kudari: “Amutenderi ngenyi kuxaixihwa?” (1 VaKorinto 6:1-8) Nyamasi uno, vamweni mu ungano vanoita zvitenderano zvo nyagoso no hama perepo voruza mare kana vovona inga kuti hama iyana yavabira. Ngo kudaro vanojiendasa ku tiribhunari. Asi izvi zvingaitisa kuti vandhu vashore Jehovha no vandhu vake. Zvingaviisavo zvineso mu ungano. Bhuku ra Mwari kamare rinotibesera kuvona kuti tinodikana kuramba tino runyararo no hama jedu, pikija zvinotiitisa kuti tiruze mare. ^[2] (Vonanyi masoko o kupejisira.) Zvokadi, Jesu wakajijisa matongero atingaita mapope no kutama kuzwana. (Verenganyi Mateu 5:23, 24; 18:15-17.) Patinozwira ndhungamiriro jake, tinoita kuti ungano irambe ino runyararo no rubatano.

16. Ngenyi vandhu va Mwari vakabatana?

¹⁶ Bhuku ra Mwari kamare rinotibvunja kudari: “Vonanyi kunaka no kudakajisa kwabzo kugara pamwepo inga hama no hama!” (Nduyo 133:1) Pavaizwira Jehovha, vaIziraeri vainga vakarongeka no kubatana.  Mwari wakananga kudari ngo pamusoro po vandhu vake: “Ndozovadira vese pamwepo inga mabvuta mu phandu rakavanga.” (MIKEYA 2:12) Jehovha wakananga kuti vandhu vake vaizojijira cokwadi kubva mu Matahwa zve vaizomushandira vakabatana. Iyena wakati: ‘Ndicaita kuti majinja acinjire ku ndumi yakacena, kuti vese vadanije zina ra Jehovha, kuti vamushandire vakabatana.’ (Sofonia 3:9, Shanduro yeNyika Itsva) Mudakaro wakadini watinawo ngo kunamata Jehovha takabatana!

17. Vakuru vanodikana kuitenyi kudari ari wese akaita cishaishi cikuru mu ungano?

¹⁷ Kudari ari wese akaita cishaishi cikuru, vakuru vo ungano vanodikana kukasika kumupangira ngo maitiro o rudo. Ivona vanoziva kuti Jehovha anoda kuti vangwarire ungano ku ciri cese cingaikwevejera ku zvakashata, zve anoda kuti irambe yakabatana. (Mazwi Akangwara 15:3) Pauro waidisisa hama jake jo Korinto zve wakajipangira pazvakadikana, inga zvatinoverenga pa karata yake yo kutanga kwavari. Tinoziva kuti vakuru kondhoyo vakakasika kuzwira mbhangiro yake, ngo kuti papera mweji munganani, iyena wakavasimba pa karata yo cipiri yaakavatarira. Kudari hama ‘ikadarika icito yazviziva’ [kana kuva no mufambiro ucizivi kunaka], vakuru vanodikana kuibesera ngo maitiro o kunaka mwoyo.​—VaGalàsia 6:1, Shanduro yeNyika Itsva.

18. (a) Ndhungamiriro yo Soko ra Mwari yakabesera kudini ungano jo mu zana ro kutanga ro makore? (b) Zvicinyi zvatinozojija pa musoro unotevera?

¹⁸ Zvakajeka kuti maKristu o mu zana ro kutanga ro makore paaiteverera ndhungamiriro iri mu Bhuku ra Mwari kamare, ungano jao jaigara jakacena, jino runyararo no rubatano. (1 VaKorinto 1:​10; VaEfeso 4:​11-​13; 1 Pedru 3:8) Inga muviyo, hama no hambzaji iji jakakwanisa kucumaera masoko akanaka ku “bzisikwa bzese bziri mu nyika ino.” (VaKolosi 1:​23) Nyamasi unovo, Zvapupu zva Jehovha zvakabatana no kurongeka, zve zviri kucumaera masoko akanaka pasi pese. Musoro unotevera unovozovonesa kuti cido cavo ngocokukuja Tenji Mukuru-kuru Jehovha no kuzwira ndhungamiriro jo Bhuku rake, Bhaibheri.​—Nduyo 71:15, 16.