1, 2. (a) Kodi anthu anango asalonganji thangwi yakubvera citsogolero ca gulu ya Mulungu? (b) Kodi tinadzadinganji mu nsolo uno?

ANTHU anango asalonga: “Ine nkhabe funika kubvera citsogolero ca uphemberi peno gulu. Pinafunika ndi kukhala na uxamwali na Mulungu basi.” Kodi maonero anewa ndi andimomwene?

² Mu nsolo uno, tinadzadinga kuti Yahova asacita pyonsene munjira yadidi, pontho kuti iye asakhunganya atumiki ace. Tinadzadingambo kuti tisafunika kucitanji tingapaswa citsogolero na gulu ya Yahova. (1 Akorinto 14:33, 39) Akristu a mu ndzidzi wa apostolo akhatowezera citsogolero ca Mafala a Mulungu, pontho akhakwanisa kumwaza mphangwa zadidi m’mbuto zizinji. Ninga iwo, ife tisatawira kutsogolerwa na Bhibhlya lero. Pontho tisabvera pitsogolero pinatambira ife mu gulu ya Yahova. Ninga maphindu, tisakwanisa kumwaza mphangwa zadidi pa dziko yonsene yapantsi, mbatiphedzera toera mpingo upitirize kukhala wakucena, wakuphatana na wantendere.

3. Ninji cinakucitisani kunyindira kuti Yahova ndi Mulungu wakucita pinthu munjira yadidi?

³ Tingayang’ana pinthu pidacita Yahova, tisaona kuti iye ndi Mulungu wakucita pinthu munjira yadidi. Yahova ‘akhazikisa dziko yapantsi mwandzeru. Iye acita kudzulu mwaudziwisi.’ (Misangani 3:19) Pana pinthu pizinji pidacita Yahova pyakuti ife nkhabe kupidziwa. Mwandimomwene, ‘pinabva ife thangwi ya iye ndi ninga mafala aciwerewere.’ (Yobe 26:14) Mbwenye pyakucepa pinadziwa ife thangwi ya kudzulu na pantsi pisatiphedza kuona kuti Yahova ndi Mulungu wakucita pinthu munjira yadidi. (Masalmo 8:3, 4) Mamiliyau a nyenyezi zisafamba kudzulu na maplaneta mbakazungulira dzuwa mwakukhonda kudhimana. Pinthu pyenepi pisakwanisika thangwi Yahova acita maplaneta na nyenyezi munjira yadidi. Iye acita ‘kudzulu mwaudziwisi’ na dziko yapantsi. Natenepa, Yahova athema kusimbwa na kulambirwa, pontho tisafunika kukhala akukhulupirika kwa iye.—Masalmo 136:1, 5-9.

4. Thangwi yanji asiyentista nkhabe kwanisa kutawira mibvundzo yakufunika kakamwe?

⁴ Asiyentista asaphatisira pinthu pizinji pinapfundza iwo thangwi ya kudzulu na dziko yapantsi toera kucitisa umaso wathu kukhala wadidi. Mbwenye iwo nee asakwanisa kutawira mibvundzo yakufunika kakamwe. Mwacitsandzo, anyakudziwa pinthu pyakuthambo nkhabe kutipanga undimomwene wakuti kudzulu na pantsi pyatoma tani, peno thangwi yanji anthu, pinyama, tsanga na miti pisagumanika pa dziko. Anthu azinji nkhabe kwanisa kufokotoza thangwi yanji tisafuna kakamwe kukhala kwenda na kwenda. (Koelete 3:11) Thangwi ibodzi inacitisa anthu kusowa matawiro a mibvundzo ineyi ndi yakuti asiyentista na anango asalonga kuti kunja kuno nkhabeko Mulungu, mbapfundzisa kusanduka kwa pinthu. Mbwenye Mulungu asatipasa matawiro kubulukira m’Mafalace, Bhibhlya.

5. Ndi munjira zipi anthu asabvera mitemo yacibaliro?

⁵ Yahova akhazikisa mitemo mizinji yacibaliro, pontho iyo nkhabe cinja. Anyakutsalakana pya magetsi, matubu a madzi, anyakutekenya ndeka, anyakucita operasau na anango asadziwa mitemo ineyi toera kucita mabasa awo. Mwacitsandzo, anyakucita operasau asadziwa makhundu onsene a manungo a munthu. Natenepa, angafuna kucita operasau ntima, asadziwa kuti ndi khundu ipi inagumanika iwo. Pontho tonsene tisadziwa kuti tinganumpha kubuluka padzulu kakamwe, tingagwa pantsi tinafa. Ife tisabvera mitemo yacibaliro, ninga mphambvu yakukwewa pinthu pantsi, thangwi tisafuna kukhala maso.

6. Tisadziwa tani kuti Yahova asafuna kuti anthu amulambire munjira yadidi?

⁶ Yahova acita kudzulu na pantsi munjira yadidi kakamwe. Natenepa, iye asafuna kuti anthu amulambire munjira yadidi. Pontho, Yahova atipasa Bhibhlya toera kutipfundzisa kuti tinamulambira tani. Basi ene mukutowezera citsogolero cinatipasa iye kubulukira m’Bhibhlya na gulu yace, tinakwanisa kukhala na umaso wakutsandzaya.

7. Tinapfundzanji kubulukira munjira idalemberwa Bhibhlya?

 ⁷ Mwandimomwene Bhibhlya ndi muoni wakupambulika wa Mulungu. Anyakupfundza anango asalonga kuti Bhibhlya ndi mabukhu Aciyuda na Acikristu adabvungazwa na anthu. Mbwenye Mulungu asankhula kuti mbani akhafunika kulemba mabukhu anewa, ndzidzi ukhafunika iwo kulemba na mphangwa zikhafuna kulemba iwo. Ndi thangwi yace mabukhu onsene a m’Bhibhlya asatiphedza toera kubvesesa mphangwa za Mulungu. Kutomera Genesi mpaka Apokalipse, Bhibhlya isapangiza kuti mbakudaoneka ‘dzindza’ yakuti mbidacitisa dziko yapantsi kukhala pontho paradhizu. Ife tapfundza kuti ‘mbeu’ ineyi ndi Yezu Kristu, pontho kuti Umambo wace unadzapangiza kuti Yahova athema kutonga piringana onsene.—Lerini Genesi 3:15; Mateo 6:10; Apokalipse 11:15.

8. Ndi munjira ipi Aisraele akhacita pinthu munjira yadidi?

⁸ Aisraele akhatowezera Mwambo udaapasa Mulungu na kucita pinthu munjira yadidi kakamwe. Mwacitsandzo, akazi anango ‘akhadapfundziswa toera kutumikira pa nsuwa wa nsasa wacibverano.’ (Eksodo 38:8) Aisraele akhalimbo na pitsogolero pyakuti anafulusa tani misasa na tabernakulu munjira yadidi. Buluka penepo, Mambo Dhavidhi apfundzisa anyantsembe na Alevi toera kucita basa yakupambulika mu templo. (1 Pya dziko ya Israele 23:1-6; 24:1-3) Mu ndzidzi ukhabvera Aisraele Yahova, iye akhaapasa nkhombo. Iwo akhali mu ntendere, akuphatana na akhacita pinthu munjira yadidi.—Deuteronomyo 11:26, 27; 28:1-14.

9. Kodi Akristu akutoma akhacita tani pinthu munjira yadidi?

⁹ Akristu akutoma akhacitambo pinthu munjira yadidi. Pakhali na mathubo akutonga, akuti ndi nsoka wa amuna akhapereka pitsogolero m’mipingo. Pakutoma, akhacita khundu ya nsoka unoyu ukhali apostolo. Mukupita kwa ndzidzi akulu a mpingo adzacitambo khundu ya nsoka unoyu. (Machitiro 6:1-6; 15:6) Mipingo ikhatambira uphungu na pitsogolero kubulukira m’matsamba. Yahova akhatsogolera mathubo akutonga na abale akhaphata basa na iwo toera kulemba matsamba anewa. (1 Timoti 3:1-13; Tito 1:5-9) Kodi mipingo isaphindula tani mukutowezera citsogolero ca mathubo akutonga?

10. Ninji pikhacitika m’mipingo pikhatowezera iwo pitsogolero pya mathubo akutonga? (Onani cithundzithundzi cakutoma.)

¹⁰ Lerini Machitiro 16:4, 5, NM. Mu ndzidzi wa apostolo, abale anango akhacedzera mipingo toera kudziwisa ‘pidabverana apostolo na akulu a mpingo ku Yerusalemu,’ peno, pidabverana mathubo akutonga. Mipingo ikhatowezera pitsogolero pyenepi, ‘mbipitiriza kuwanga mu cikhulupiro na kuthimizirika ntsiku zonsene.’ Kodi citsandzo cawo cinatiphedza tani mu mpingo wathu lero?

11. Kodi akulu a mpingo na atumiki akutumikira asafunika kucitanji angatambira pitsogolero mu gulu ya Mulungu?

¹¹ Abale a Makomiti ya Filiali peno Makomiti a Dziko, ayang’aniri a cisa na akulu a mpingo asafunika kubvera pitsogolero pinatambira iwo mu gulu ya Mulungu. Mwandimomwene, Mafala a Mulungu  asatipanga toera kubvera ale anatitsogolera. (Deuteronomyo 30:16; Ahebere 13:7, 17) Ale akuti ndi akukhulupirika kwa Yahova nkhabe kupanduka, pontho iwo nkhabe kudungunya angatambira pitsogolero. Ife nkhabe funika kukhala ninga Dyotrefe, wakuti nee akhabvera ale akhatsogolera mu mpingo. (Lerini 3 Jwau 9, 10.) Tingatowezera pitsogolero pinapaswa ife, tisaphedzera mpingo toera kupitiriza kukhala wantendere na wakuphatana. Natenepa tisafunika kubvundzika: ‘Kodi ndisawangisa abale na alongo toera akhale akukhulupirika kwa Yahova? Ndisabvera mwakucimbiza pitsogolero pinatambira ine mu gulu ya Mulungu?’

12. Kodi akulu a mpingo na atumiki akutumikira asakhazikiswa tani?

¹² Ndzidzi wakucepa nduli, Mathubo Akutonga acinja njira inakhazikiswa akulu a mpingo na atumiki akutumikira m’mipingo. “Mibvundzo Inacitwa Na Anyakuleri” mu Ncenjezi wa Bingu ya 15 ya 2014, wafokotoza kuti mu ndzidzi wa Akristu akutoma, mathubo akutonga akhadapasa ayang’aniri a cisa basa yakukhazikisa akulu a mpingo na atumiki akutumikira. Natenepa, kutomera nthanda ya Nyendzi ya caka 2014, ayang’aniri a cisa asacita basa ineyi. Akulu a mpingo angaona kuti m’bale athema toera kutumikira ninga nkulu wa mpingo peno ntumiki wakutumikira, muyang’aniri wa cisa asayesera kudziwa m’bale unoyu na banjace. Mwacitsandzo, muyang’aniri wa cisa anakwanisa kuenda mu utumiki pabodzi na m’bale unoyu. (1 Timoti 3:4, 5) Buluka penepo, muyang’aniri wa cisa asacita nsonkhano na akulu a mpingo. Pa nsonkhano unoyu, iwo asadinga mwacidikhodikho m’Bhibhlya makhaliro akuti nkulu wa mpingo peno ntumiki wakutumikira asafunika kukhala nawo.—1 Timoti 3:1-10, 12, 13; 1 Pedro 5:1-3.

13. Tinapangiza tani kuti tisabvera pitsogolero pya akulu a mpingo?

¹³ Akulu a mpingo asatipasa pitsogolero pya m’Bhibhlya thangwi asafuna kutsidzikiza na kutsalakana mpingo. Ife tisafunika kuabvera thangwi pitsogolero pyenepi pisatiphindulisa. (1 Timoti 6:3) Mu ndzidzi wa mpostolo Paulu, Akristu anango akhali ‘akupanduka.’ Iwo nee akhaphata basa, mbwenye akhafuna kakamwe kucita khundu mu pinthu pyakuti nee pikhali pyawo. Akulu a mpingo akhayesera kuapasa uphungu mbwenye iwo nee akhatawira kucinja. Paulu afokotoza kuti mpingo ukhafunika kutsalakana tani anthu ninga anewa. Iye alonga: ‘Muikheni cidzindikiro na lekani kucita naye uxamwali.’ Iwo nee akhafunika kucita uxamwali na munthu unoyu, mbwenye tayu kuntsalakana ninga nyamalwa. (2 Atesalonika 3:11-15) Mwacitsandzo, akulu a mpingo lero asayeserambo kuphedza munthu anapwaza midida ya Mulungu, mbabanyirana na munthu wakuti nee ndi Mboni ya Yahova. (1 Akorinto 7:39) Khala munthu unoyu asakhonda kucinja, panango  akulu a mpingo asatonga kucita nkhani inafokotoza kuti makhaliro anewa asacitisa anango kulonga mwakuipa mpingo. Kodi akulu a mpingo angacita nkhani ninga ineyi mu mpingo mwanu, munapibva tani? Mungadziwa munthu anacita pyenepi, kodi munasiya kucita naye uxamwali? Pinacita iye nkhabe komeresa Yahova. Natenepa, khala tisafuna kuti iye acinje, tisafunika kutowezera pitsogolero pya akulu a mpingo. ^[1]—Onani cidzindikiro.

14. Kodi tinaphedzera tani mpingo toera kukhala wakucena?

¹⁴ Mafala a Mulungu asatipanga pisafunika ife kucita toera tikhonde kutawirisa pinthu pyakuipa mu mpingo mwathu. Nyerezerani pidacitika mu mpingo Wakukorinto. Paulu akhafuna kakamwe abale na alongo kweneko. Iye aphedza azinji a iwo toera kudziwa undimomwene. (1 Akorinto 1:1, 2) Mphapo nyerezerani kuti Paulu apibva tani pidadzindikira iye kuti m’bale unango ali na makhaliro aulukwali mbwenye abale mu mpingo akhapitiriza kucita naye uxamwali! Paulu apanga akulu a mpingo toera ‘apereke munthu unoyu m’manja mwa Sathani.’ Iwo akhafunika kubulusa munthu unoyu mu mpingo. (1 Akorinto 5:1, 5-7, 12) Lero, panango akulu a mpingo asatonga kubulusa munthu mu mpingo wakuti acita madawo makulu mbakhonda kutcunyuka. Kodi tinatsalakana munthu wakubuluswa mu mpingo mwakubverana na pinalonga Bhibhlya? Tingacita pyenepi, tinaphedzera mpingo toera kukhala wakucena. Pontho tinaphedza munthu unoyu kudzindikira kuti asafunika kutcunyuka na kuphemba Yahova toera amulekerere.

15. Tinakhazikisa tani ntendere na kuphatana mu mpingo?

¹⁵ Abale ku Korinto akhali na nkandzo unango. Anango akhasumira abale awo kwa atongi. Paulu aabvundza: “Munakhonderanji kupirira pyakuipa?” (1 Akorinto 6:1-8) Lero, abale anango mu mpingo asacita malonda na abale awo. Anango asaluza kobiri peno asaona kuti apondererwa. Natenepa asasumira abale awo kwa atongi. Mbwenye pyenepi pingacitika, pisacitisa anango kulonga mwakuipa Yahova na atumiki ace. Pontho pisabweresa nkandzo mu mpingo. Mafala a Mulungu asalonga kuti tisafunika kukhala mwantendere na abale athu, ngakhale kuti pisaphemba kuluza kobiri. ^[2] (Onani cidzindikiro.) Yezu atipfundzisa kuti tinatsalakana tani mikandzo yakunentsa na kukhonda bverana. (Lerini Mateo 5:23, 24; 18:15-17.) Tingabvera pitsogolero pyenepi, tinakhazikisa ntendere na kuphatana mu mpingo.

16. Thangwi yanji atumiki a Mulungu ndi akuphatana?

 ¹⁶ Mafala a Mulungu asatipanga: ‘Onani! Ndi pyakutsandzayisa kakamwe abale angakhala pabodzi mwakuphatana!’ (Masalmo 133:1) Mu ndzidzi ukhabvera Aisraele Yahova, iwo akhali akubverana na akuphatana. Mulungu alonga pya atumiki ace: ‘Ndinadzaagumanya pabodzi, ninga mabira n’thanga.’ (Mikeya 2:12) Yahova alongambo kuti atumiki ace anadzapfundza undimomwene wa Bhibhlya na kuntumikira mwakuphatana. Iye alonga: ‘Penepo ndinadzapasa mitundu ya anthu cilongero cakucena, toera onsene acemere dzina ya Yahova, na kuntumikira phewa na phewa.’ (Sofoniya 3:9) Mphyakutsandzayisa kakamwe kudziwa kuti tisatumikira Yahova mwakuphatana!

17. Kodi akulu a mpingo asafunika kucitanji khala m’bale peno mulongo acita madawo makulu?

¹⁷ Khala munthu unango acita madawo makulu, akulu a mpingo asafunika kutsalakana nkhani ineyi mwakucimbiza, pontho mwaufuni. Iwo asadziwa kuti Yahova asafuna kuti akulu a mpingo atsidzikize mpingo ku makhaliro onsene akuipa toera upitirize kukhala wakucena na wakuphatana. (Misangani 15:3) Paulu akhafuna kakamwe abale a ku Korinto. Ndi thangwi yace, tsamba yakutoma idalemba iye, Paulu afokotoza pinthu pikhafunika iwo kusasanyira. Khala m’bale ‘apeuka mbatoma kufamba munjira yakuipa mwakukhonda dziwa,’ akulu a mpingo asafunika kumphedza mwaufuni.—Agalata 6:1.

18. (a) Kodi pitsogolero pya Mafala a Mulungu pyaphedza tani Akristu akutoma? (b) Tinadzadinganji mu nsolo unatowera?

¹⁸ Pisapangiza pakweca kuti mu ndzidzi ukhatowezera Akristu akutoma pitsogolero pya Mafala a Mulungu, mipingo ikhali mu ntendere, yakuphatana na yakucena. (1 Akorinto 1:10; Aefesi 4:11-13; 1 Pedro 3:8) Na thangwi ineyi, abale na alongo anewa akhakwanisa kumwaza mphangwa zadidi ‘kuna anthu onsene a pantsi pa thambo.’ (Akolose 1:23) Lero, atumiki a Yahova ndi akuphatana mbacita pinthu munjira yadidi, pontho asamwaza mphangwa zadidi pa dziko yonsene yapantsi. Nsolo unatowera, unadzafokotoza umboni unango unapangiza kuti atumiki a Yahova asafuna kupasa mbiri Ntongi Wakudzulu na kubvera pitsogolero pya Mafala a Mulungu.—Masalmo 71:15, 16.