1, 2. (a) Andi so sëmbë ta taki te de ta jei taa Gadu abi wan ölganisaasi? (b) Andi woo luku a di woto aki?

SO SËMBË ta taki taa: „Ja musu u dë a wan ölganisaasi di ta tii i. Dë nöö i musu dë mati ku Gadu nöö a bunu kaa.” Ma sö a dë tuutuu ö?

² A di woto aki woo si taa Jehovah an ta du soni fanjanfanjan, söseei woo si unfa a ta seeka dee sëmbë fëën. Woo luku tu andi u musu du te di ölganisaasi u Jehovah da u wan lai (1 Kolenti 14:33, 40). Dee fesiten Keesitu sëmbë bi ta du dee soni dee sikifi a di Wöutu u Gadu. Fëën mbei de bi sa paaja di bunu buka a sömëni kamian. A di ten aki u ta mbei di Bëibel ta tii u tu, kumafa a bi ta tii de a di ten dë. Nöö u ta du dee soni di di ölganisaasi u Gadu ta piki u. Di soni aki ta heepi u fuu sa paaja di bunu buka a hii së u goonliba. U ta mbei möiti be hii u tuu a di kemeente libi limbolimbo a Gadu wojo, fuu libi fiifii ku useei, söseei fuu libi makandi kuma wan famii.

3. Unfa i du dë seiki taa Jehovah da wan Gadu di an ta du soni fanjanfanjan?

³ Te u luku dee soni dee Jehovah mbei, nöö u ta si gbelingbelin taa an dë wan Gadu di ta du soni fanjanfanjan. A „seti di goonsei u di goonliba a wan köni fasi. Ku di köni u si soni a wan bunu fasi a seti liba ala a sö wan fasi taa an sa seki” (Nöngö 3:19). Sömëni soni dë di wa  sabi u dee soni dee Jehovah mbei. Biga „dee soni dee u jei fëën an hia seepiseepi” (Jöpu 26:14). Ma dee pikisö soni dee u sabi u di mundu di u dë aki, ta lei u gbelingbelin taa an dë fanjanfanjan (Psalöm 8:3, 4). Milionmilion teeja ta pusa nango ta ko a liba ala, ma de an ta pusa fanjanfanjan. Pakisei unfa dee palanëti ta bia ta lontu di sonu. Di fasi fa dee palanëti ku dee teeja ta bia ta lontu di sonu ta lei taa Jehovah an buta de fanjanfanjan. Te u ta pakisei unfa a „mbei liba ala a wan köni fasi”, söseei di fasi fa a mbei di goonliba, nöö u ta kë gafëën, u ta kë dini ën, söseei u ta kë hoi useei nëën.​—Psalöm 136:1, 5-9.

4. Faandi mbei dee könima an sa piki dee sömëni soni di sëmbë ta hakisi deseei?

⁴ Könima tei sömëni u dee soni di de lei u di mundu ku di goonliba aki u mbei di libi ko möön suti. Ma de an sa piki na wan u dee fanöudu soni di sömëni sëmbë ta hakisi deseei. Dee sëmbë dee ta lei soni u dee teeja an sa piki u finifini unfa di mundu bigi, nasö faandi mbei libisëmbë, mbeti, ku dee peipei pau, dë a goonliba aki. Nöö sömëni sëmbë an sa konda da u faandi mbei libisëmbë ta kë libi u teego (Peleikima 3:11). Wan u dee soni di mbei sëmbë an sa piki dee hakisi aki, hën da u di dee könima ku woto sëmbë ta taki taa Gadu an dë, söseei u di de ta lei sëmbë di lei de kai evolutie. Ma Gadu ta piki dee hakisi aki a di Wöutu fëën, di Bëibel.

5. Na un fasi libisëmbë ta libi ku dee wëti dee Jehovah buta da dee sömëni soni di a mbei?

⁵ Jehovah buta wëti da dee sömëni soni di a mbei. Nöö dee wëti aki an ta tooka. Dee sëmbë dee ta seeka sitolomu soni, wata soni, masini soni, dee sëmbë dee ta tja opolani, dee data dee ta opalasi sëmbë ku woto sëmbë jeti, ta wooko ku dee wëti aki u du di wooko u de. Di hati u hiniwan sëmbë ta dë a di wan seei kamian, fëën mbei an dë u dee data dee ta opalasi sëmbë go suku naasë a dë. Nöö hii sëmbë sabi taa ee wan sëmbë djombo kumutu a wan heihei kamian, nöö a sa kisi makei nasö a sa dëdë.

6. Unfa u du sabi taa Jehovah an kë u sëmbë ta dini ën fanjanfanjan?

⁶ Jehovah seeka di mundu buta a wan gaan foombo fasi seei. Fëën mbei an kë u dee sëmbë fëën dini ën fanjanfanjan. Ma a da u di Bëibel fuu sa sabi unfa u musu dini ën. Te u ta du dee soni di di Bëibel ku di ölganisaasi fëën ta piki u, nöö nëën ufö woo sa dë waiwai, söseei woo abi wan bunu libi.

7. Andi u sa lei a di fasi fa de bi sikifi Bëibel?

⁷ Di Bëibel da wan apaiti kado di Gadu da u. So u dee könima taki taa di Bëibel da wan buku u wantu Dju ku wantu Keesitu sëmbë di libisëmbë seei buta ko a wan. Ma Gadu hën bi taki ambë ku ambë bi musu sikifi dee buku u Bëibel. A bi taki tu na un ten de bi o sikifi de, söseei andi de bi musu sikifi. Fëën mbei hii dee buku u di Bëibel tuu ta heepi u fuu fusutan di buka u Gadu. Di Bëibel ta lei u a Kenesesi te go miti Akoalimbo, taa wan „mii” bi o ko di bi o mbei di goonliba ko toon wan paladëisi baka. Nöö u lei taa di „mii” aki da Jesosi Keesitu, söseei taa di Könuköndë fëën o heepi u fuu fusutan taa Jehovah hën abi di leti u tii hii sëmbë.​—Lesi Kenesesi 3:15; Mateosi 6:10; Akoalimbo 11:15.

8. Faandi mbei u sa taki taa dee Isaëli sëmbë an bi ta du soni fanjanfanjan?

⁸ Dee Isaëli sëmbë bi ta hoi di Wëti di Gadu bi da de, fëën mbei de an bi ta du soni fanjanfanjan. A di ten dë i bi abi „mujëë di bi ta wooko a di dööbuka u di komakandi tenti” (Ëkisodesi 38:8). Jehovah bi piki dee Isaëli sëmbë unfa de bi musu ta foloisi di kampu u de, ku di tenti u Gadu, a wan bunu fasi. Bakaten Könu Dafiti bi buta mindima ku dee Leifi sëmbë u du wan wooko a di Wosu u Gadu (1 Kloniki 23:1-6; 24:1-3). Te dee Isaëli sëmbë bi ta piki Jehovah buka, nöö a bi ta mbei de feni gaan bunu. De an bi ta du soni fanjanfanjan, ma de bi ta libi fiifii ku deseei, söseei de bi ta libi makandi kuma wan famii.​—Detolonomi 11:26, 27; 28:1-14.

9. Unfa soni bi seeka a dee kemeente u dee fesiten Keesitu sëmbë?

 ⁹ Soni bi seeka bunu a dee kemeente u di ten u dee fesiten Keesitu sëmbë tu. Wan tii kulupu bi dë a di ten dë. Di tii kulupu aki bi dë wantu baaa di bi ta piki dee kemeente andi de musu du. Bigibigi dee apösutu nöö bi dë a di kulupu aki. Bakaten, hën de tei woto gaanwomi ko a di kulupu tu (Tjabukama 6:1-6; 15:6). Jehovah bi ta tii dee baaa u di tii kulupu ku woto baaa dee bi ta wooko makandi ku de, u sikifi biifi manda go da dee kemeente u da de lai, söseei u piki de andi de musu du (1 Timoteo 3:1-13; Titusi 1:5-9). Un wini dee sëmbë u dee kemeente bi ta feni te de bi ta du dee soni di di tii kulupu bi ta piki de?

10. Andi bi pasa di dee sëmbë u dee fesiten kemeente bi ta du dee soni di di tii kulupu bi ta piki de? (Luku di peentje a bigi u di woto.)

¹⁰ Lesi Tjabukama 16:4, 5. A di ten u dee fesiten Keesitu sëmbë, so u dee baaa bi nango luku dee kemeente u piki de „di buka di dee Gaan Tjabukama u Masa Jesosi ku dee oto tiima u keiki [gaanwomi, NW] a Jelusalen bi da de”. Di tii kulupu hën bi da de di buka. Dee sëmbë u dee kemeente bi ta du andi de bi piki de, nöö ’de bi ta kisi kaakiti nango fesi seei a di biibi, nöö hiniwan daka möön hia sëmbë bi ta piki di buka ta ko ta nama ku de’. Andi u sa lei a dee fesiten Keesitu sëmbë di sa heepi u a di kemeente fuu a di ten aki?

11. Andi dee baaa di de buta u tei fesi musu du te di ölganisaasi u Gadu piki de wan soni?

¹¹ Andi dee baaa u di Bëikantoo Komite, nasö Köndë Komite, dee keling-gaanwomi, dee gaanwomi ku dee dinai musu du te di ölganisaasi u Gadu piki de wan soni? Wë hii dee baaa aki di de buta u tei fesi musu du andi di ölganisaasi piki de. Wë di Wöutu u Jehovah ta piki u taa hii u tuu musu ta haika dee sëmbë dee ta tei fesi a di ölganisaasi (Detolonomi 30:16; Hebelejën 13:7, 17). Dee baaa dee ta hoi deseei a Jehovah an ta hopo fia ku ën, nöö de an ta kuutu te di ölganisaasi piki de andi de musu du. De an kë dë kuma Dioteefesi, di an bi abi lesipeki da dee baaa dee bi ta tei fesi. (Lesi 3 Johanisi 9, 10.) Te de ta du dee soni de ta piki de, nöö de ta heepi u fuu libi fiifii ku useei, söseei fuu libi makandi kuma wan famii a di kemeente. Fëën mbei de sa hakisi deseei taa: ’Mi ta da dee baaa ku dee sisa u mi taanga u de hoi deseei a Jehovah u?’ Mi ta du dee soni di di ölganisaasi u Gadu ta piki mi wantewante u?

12. Unfa de ta buta gaanwomi ku dinai?

¹² A dee jaa dee pasa aki di Tii Kulupu tooka di fasi fa de ta buta gaanwomi ku dinai a hii dee kemeente. Di pisi, „Soni di dee lesima hakisi” di dë a di Waktitoren u 15 u ëlufumu-liba u di jaa 2014 ta taki taa a di ten u dee fesiten Keesitu sëmbë, nöö di tii kulupu bi ta da dee baaa dee bi ta du sëndëlengi wooko pasi u buta gaanwomi ku dinai. Sensi di jaa 2014, hën dee keling-gaanwomi ta buta gaanwomi ku dinai. Te dee gaanwomi u di kemeente si taa wan baaa sa toon gaanwomi nasö dinai, nöö di keling-gaanwomi ta mbei möiti u ko sabi hën ku ën wosudendu möön bunu. Kandë a sa wooko ku di baaa a di peleikiwooko (1 Timoteo 3:4, 5). Baka di dë, nöö di keling-gaanwomi ta fan ku dee gaanwomi u di kemeente. De ta luku dee tëkisi dee ta taki u dee fasi di wan gaanwomi nasö wan dinai musu abi.​—1 Timoteo 3:1-10, 12, 13; 1 Petuisi 5:1-3.

13. Unfa u sa lei taa u ta du dee soni di dee gaanwomi ta piki u?

¹³ Dee gaanwomi ta da u lai ku di Bëibel, u di de kë tjubi u, söseei u di de kë luku di kemeente bunu. U musu ta haika de, u di dee soni de ta piki u o tja wini ko da u (1 Timoteo 6:3). A di ten u dee fesiten Keesitu sëmbë, so u dee sëmbë „bi ta tja deseei a wan fasi di an fiti”. De an bi ta kë ta wooko möönsö. Woto sëmbë soni nöö de bi ta waka ta hulu. Dee gaanwomi bi ta mbei möiti u heepi de, ma de an bi kë tooka di fasi fa de bi ta libi. Paulosu bi piki dee sëmbë u di kemeente unfa de musu libi ku dee lö sëmbë dë. A bi taki  taa: „Ee wan sëmbë sai naandë an kë jei di fan, nöö sö wan sëmbë un musu ta köni ku ën e. Wan musu ta hulu ën möönsö.” De an bi musu ta hulu sö wan sëmbë möön, ma de an bi musu libi ku ën kuma hën da wan felantima u de (2 Tesalonika 3:11-15). Dee gaanwomi u di ten aki ta mbei möiti u heepi wan sëmbë di an kë hoi dee wëti u Gadu. Sö wan sëmbë sa dë wan baaa nasö wan sisa di mbei buka u toou ku wan sëmbë di an dë wan dinima u Jehovah (1 Kolenti 7:39). Ee di sëmbë an kë tooka di fasi fa a ta libi, nöö dee gaanwomi sa hoi wan taki di o lei u taa dee lö libi dë sa mbei woto sëmbë taki hogi u di kemeente. Ee dee gaanwomi hoi sö wan taki a di kemeente ka i dë, nöö andi joo du? Ee i sabi ambë de ta taki, joo hulu di sëmbë dë jeti ö? Te ja ta hulu sö wan sëmbë möön, nöö a sö wan fasi i sa heepi ën faa ko fusutan taa di fasi fa a ta libi, sa tja hogi ko dëën, söseei taa di libi fëën an ta kai ku Jehovah, nöö kandë a sa tooka di fasi fa a ta libi. ^[1]​—Luku di pisi a kaba u di woto.

14. Unfa u sa heepi useei fuu libi limbolimbo a Gadu wojo a di kemeente?

¹⁴ Di Wöutu u Gadu ta piki u andi hii u tuu musu du sö taa hogilibi an ko a dee kemeente fuu. Luku andi bi pasa a Kolenti. Paulosu bi lobi dee baaa ku dee sisa u Kolenti. A bi heepi sömëni u de u ko sabi di tuutuu lei (1 Kolenti 1:1, 2). Fëën mbei pakisei unfa a bi fii di a bi ko sabi taa wan u de bi ta libi fanafiti a di së u manu ku mujëë soni, söseei taa dee baaa bi ta disa sö wan sëmbë a di kemeente! Paulosu bi piki dee gaanwomi taa „un tei di sëmbë dë nöö un tuwëën disa da di didibi”. De bi musu puu sö wan sëmbë a di kemeente (1 Kolenti 5:1, 5-7, 12). A di ten aki dee gaanwomi sa puu wan sëmbë a di kemeente, ee di sëmbë du wan gaan zöndu nöö an kë tjali u di soni di a du. Ee sö a ko pasa, nöö woo libi ku di sëmbë kumafa di Bëibel ta piki u taa u musu libi ku ën u? Ee u du andi di Bëibel ta taki, nöö u ta heepi useei fuu libi limbolimbo a Gadu wojo a di kemeente. Nöö a sö wan fasi u sa heepi di sëmbë faa ko fusutan taa a musu tjali u di soni di a du, söseei taa a musu hakisi Jehovah faa dëën paadon.

15. Unfa u sa ta libi fiifii a di kemeente?

¹⁵ Wan woto bookohedi bi dë a di kemeente a Kolenti. So u dee baaa bi ta tja woto baaa go a kuutu. Paulosu bi hakisi de taa: „Andi mbei wan sa disa unu seei be otowan nöö ta du hogihogi ku unu?” (1 Kolenti 6:1-8) A di ten aki, so baaa nasö sisa mbei buka u du wan wooko ku wan woto baaa nasö wan woto sisa, ma de lasi di möni u de, nasö de ko feni taa di baaa nasö di sisa u de ganjan de. Fëën mbei de tja di baaa nasö di sisa u de go a kuutu. Ma te sö wan soni pasa, nöö a sa mbei sëmbë taki hogi u Jehovah ku dee sëmbë fëën. Di soni aki sa tja toobi ko a di kemeente. Di Wöutu u Gadu ta heepi u fuu si taa u musu ta libi fiifii ku dee baaa ku dee sisa fuu, aluwasi u musu lasi möni. ^[2] (Luku di pisi a kaba u di woto.) Ma Jesosi bi lei u unfa u musu seeka wan toobi. (Lesi Mateosi 5:23, 24; 18:15-17.) Te u ta du dee soni di Jesosi piki u, nöö woo ta libi fiifii, söseei woo ta libi makandi kuma wan famii a di kemeente.

16. Unfa a du ko taa dee sëmbë u Gadu ta libi makandi kuma wan famii?

 ¹⁶ Di Wöutu u Jehovah ta piki u taa: „Luku unfa a bunu, söseei unfa a suti te baaa ku baaa ta libi makandi!” (Psalöm 133:1) Te dee Isaëli sëmbë bi ta piki Jehovah buka, nöö de an bi ta du soni fanjanfanjan, ma de bi ta libi makandi kuma wan famii. Gadu bi taki u dee sëmbë fëën taa: „Mi o mbei de dë kuma wan hipi sikapu a wan peni dendu” (Mika 2:12). Jehovah bi taki söseei taa dee sëmbë fëën bi o ko sabi di tuutuu lei a di Wöutu fëën, söseei de bi o dini ën makandi kuma wan famii. A bi taki taa: „A di ten dë mi o lei dee sëmbë di soifi töngö, sö taa hii de tuu sa kai di në u Jehovah, u de sa dini ën makandi” (Sefanja 3:9). U dë ku tangi a hati seei taa u sa dini Jehovah makandi kuma wan famii!

17. Andi dee gaanwomi musu du te wan sëmbë a di kemeente du wan gaan zöndu?

¹⁷ Ee wan sëmbë du wan gaan zöndu, nöö dee gaanwomi musu heepi ën wantewante a wan suti fasi. Dee gaanwomi sabi taa Jehovah kë u de tjubi di kemeente da hiniwan fasi u libi di an bunu, söseei a kë u de heepi dee baaa ku dee sisa u libi makandi, söseei u de libi limbolimbo a Gadu wojo (Nöngö 15:3). Paulosu bi lobi dee baaa ku dee sisa fëën a Kolenti gaanfa seei, nöö a bi ta bai de a soni te a bi dë fanöudu, kumafa u ta lesi a di fosu biifi di a bi manda da de. U sabi taa wantewante dee gaanwomi u Kolenti bi du dee soni di Paulosu bi piki de, u di wantu liba baka di dë a bi gafa de a di u tu biifi di a bi manda da de. Ee wan baaa nasö wan sisa „du wan soni di an kai ku Gadu”, nöö dee gaanwomi musu heepi ën a wan suti fasi.​—Galasia 6:1.

18. (a) Unfa dee soni dee sikifi a di Wöutu u Gadu bi heepi dee sëmbë u dee kemeente u dee fesiten Keesitu sëmbë? (b) Andi woo luku a di woto di ta ko?

¹⁸ A dë gbelingbelin u si taa te dee fesiten Keesitu sëmbë bi ta du dee soni dee dë a di Wöutu u Gadu, nöö de bi ta libi limbolimbo a Gadu wojo, de bi ta libi fiifii ku deseei, söseei de bi ta libi makandi kuma wan famii (1 Kolenti 1:10; Efeise 4:11-13; 1 Petuisi 3:8). Dee soni aki hën bi heepi dee baaa ku dee sisa aki u de sa paaja di bunu buka a „hii goonliba” (Kolosën 1:23). A di ten aki seei dee sëmbë u Jehovah an ta du soni fanjanfanjan, ma de ta libi makandi kuma wan famii, söseei de ta paaja di bunu buka a hii di goonliba. A di woto di ta ko, woo si möön soni di ta lei taa de kë gafa Jehovah, di Möön Hei Gadu, söseei taa de kë du dee soni dee a sikifi a di Wöutu fëën, di Bëibel.​—Psalöm 71:15, 16.