1, 2. 1) ¿Tuku wankgo makgapitsi latamanin xlakata Dios kgalhi akgtum kachikin? 2) ¿Tuku naʼakxilhaw kʼuma artículo?

MAKGAPITSI latamanin wankgo pi ni talakaskin akgtum tamakxtumit xlakata nakakninaniyaw Dios o nakinkapulalinan. Wankgo pi kajwatiya talakaskin tlan natalalinaw. ¿Xlikana tuku wankgo? Kaʼakxilhwi.

² Kʼuma artículo naʼakxilhaw pi akxni Jehová wi tuku tlawa xaʼakgstitum chu liwana lakkaxwili xkachikin (kaʼakxilhti recuadro «¿Tuku kilhchanima?»). Na naʼakxilhaw tuku kilitlawatkan akxni xkachikin kinkawaniyan tuku kilitlawatkan (1 Cor. 14:33, 40). Kxapulana siglo, kstalaninanin Cristo xtlawakgo tuku xwan kxTachuwin Dios. Xlakata chuna tlawakgolh tlan lichuwinankgolh tamakatsin xla Tamapakgsin klhuwa kachikinin. La uku xtatayananin Jehová, mastayaw talakaskin pi wa Biblia nakinkapulalinan chu kgalhakgaxmataw tuku kinkawaniyan xkachikin Dios. Wa xlakata tlan lichuwinanaw tamakatsin xla Tamapakgsin xlikalanka Katiyatni. Nachuna, xaskulunku wi kintamakxtumitkan, makxtum layaw chu anan takaksni.

3. ¿Tuku likatsiyaw pi Jehová ni kaj akglakgwa tlawa taskujut?

³ Akxni lilakpuwanaw tuku Jehová tlawanit, liwana akxilhaw pi ni kaj akglakgwa lakkaxwilinit. Proverbios 3:19 wan pi maklakaskilh «liskgalala» akxni tlawalh Katiyatni chu limaklakaskilh «taʼakgatekgsni» akxni tlawalh akgapun. Pero ni lhuwa tuku katsiniyaw xlakata tuku tlawanit Dios. Wa xlakata Biblia wan pi: «Kaj tsinu kgaxmatnitaw xlakata tuku tlawa» (Job 26:14). Maski chuna, uma tuku tsinu katsiyaw xlakata tuku tlawanit kʼakgapun kinkamakgtayayan nakatsiyaw pi liwana takaxtawilakgonit (Sal. 8:3, 4). Kalilakpuwaw lhuwa millones staku nema ni kaj akglakgwa tatsuwimakgolh kʼakgapun. Na kalilakpuwaw xlakata planetas nema litamakgstilimakgolh Chichini. Liwana talakkaxtawilakgonit xlakata Jehová chuna lakaskilh. Lilakpuwankan pi limaklakaskilh liskgalala akxni tlawalh akgapun chu Katiyatni tlawa pi namalankiyaw, nakakninaniyaw chu ni namakgxtakgaw (Sal. 136:1, 5-9).

4. ¿Tuku xlakata científicos nila kgalhtikgo lhuwa takgalhskinin nema xlakaskinka?

⁴ Científicos lhuwa tuku katsinikgonit xlakata Katiyatni chu tuku anan kʼakgapun. Xlakata uma, kilatamatkan tlakg ni tuwa. Pero nila kgalhtikgonit lhuwa takgalhskinin nema lu xlakaskinka. Akgtum liʼakxilhtit, nila liwana wankgo la kilhtsukulh putum tuku anan kʼakgapun chu tuku xlakata anan latamat kKatiyatni. Chu lhuwa latamanin nila wankgo tuku xlakata ni niputunkgoyaw (Ecl. 3:11). ¿Tuku xlakata lhuwa latamanin ni katsikgo xtakgalhtin umakgolh takgalhskinin? Pulaktum wa pi científicos chu amakgapitsi latamanin wankgo pi ni tu Dios chu masiyakgo evolución. Pero Dios kinkamaxkiyan xtakgalhtin kxtachuwin.

5. ¿Tuku liʼakxilhtit kinkamasiyaniyan pi kimputumkan litamakgtayayaw limapakgsin nema anan?

⁵ Jehová tlawalh putum limapakgsin nema anan chu uma ni talakgpali. Electricistas, plomeros, ingenieros, pilotos, cirujanos chu amakgapitsi latamanin litamakgtayakgo uma limapakgsin xlakata tlan natlawakgo xtaskujutkan. Akgtum liʼakxilhtit, cirujanos katsikgo niku natekgskgo xnakujkan tiku kamakuchikgo. ¿Tuku xlakata? Xlakata kimputumkan kaj lakatum niku kgalhiyaw. Chu kimputumkan katsikgoyaw pi komo nalinkxaw kʼakgatum kiwi, namokgosaw kkatiyatni, max wi tuku nitlan nalaniyaw o max naniyaw. ¿Tuku xlakata? Xlakata wi litliwakga nema kinkalhtanktiyan kkatiyatni. Uma litliwakga wanikan gravedad. Wa xlakata komo ni niputunaw ni kililakatsalatkan umakgolh limapakgsin.

6. ¿Tuku xlakata tlan nalakpuwanaw pi Jehová ni lakaskin kaj akglakgwa nakakninani xkachikin?

⁶ Lu tuwa kanajlakan la Jehová liwana lakkaxwililh tuku anan kʼakgapun. Wa xlakata tlan nalakpuwanaw pi Jehová lakaskin pi xkachikin xatalakkaxlan la nakakninanikgo. Jehová kinkamaxkinitan Biblia xlakata nakinkamasiyaniyan la nakakninaniyaw. Komo natlawayaw tuku wan Jehová chu xkachikin kajwatiya chuna tlan napaxuwayaw.

7. ¿Tuku katsiniyaw xlakata la tatsokgnit Biblia?

⁷ Biblia xtamaskiwin Dios nema nitu xtachuna. Makgapitsi tiku lakputsananikgo Biblia wankgo pi kaj maklhuwa libros xla judíos chu cristianos, nema nipara tsinu latatalakxtumi. Pero Dios lakkaxwililh tiku  xtsokgkgolh, tuku kilhtamaku chu tuku xtsokgkgolh. Wa xlakata putum libros xalak Biblia latatalakxtumi chu kinkamakgtayayan naʼakgatekgsaw tuku kinkamasiyaniputunan Dios. Lata kʼGénesis asta kʼApocalipsis o Revelación, Biblia limasiya pi xʼama tawila «xkam» tiku xtlawalh pi Katiyatni akgtum paraíso xwa. Kinkamasiyaniyan pi uma kam wa Jesucristo chu xTamapakgsin xʼama limasiya pi wa Jehová tiku lakgchan nakinkamapakgsiyan (kalikgalhtawakga Génesis 3:15; Mateo 6:10; Apocalipsis 11:15).

8. ¿La likatsiyaw pi israelitas liwana xtalakkaxtawilakgonit?

⁸ Dios na liwana lakkaxwililh kachikin Israel. ¿La tlawalh? Limaklakaskilh Limapakgsin nema kamaxkilh. Akgtum liʼakxilhtit, xwilakgolh «lakpuskatin tiku xtlawakgo taskujut chuna la xtalakkaxwilinit niku xlaktanukan kchiki niku xtamasta takaknin» (Éx. 38:8). Dios na mastalh limapakgsin xlakata la liwana xlinka campamento chu tabernáculo. Akxni xtitaxtunita kilhtamaku, mapakgsina David lakkaxwililh sacerdotes chu levitas xlakata taskujut nema xtlawakgo ktemplo (1 Crón. 23:1-6; 24:1-3). Akxni israelitas xkgalhakgaxmatkgo Jehová, xkasikulunatlawa. Xlipaxuwakgo takaksni chu akxtum xlakgo (Deut. 11:26, 27; 28:1-14).

9. ¿La xtakaxtawilakgonit congregaciones kxapulana siglo?

⁹ Congregaciones nema xwilakgolh kxapulana siglo na liwana xkalakkaxwilikanit. Ama kilhtamaku xwilakgolh lakgkgolotsin tiku xkapulalinkgo, uma wamputun, makgapitsi lakchixkuwin tiku xpulalinkgo congregaciones. Xapulana kajwatiya apóstoles tiku xlakgayakgo uma taskujut. Pero alistalh na kamakgtayakgolh amakgapitsi lakgkgolotsin (Hech. 6:1-6; 15:6). Jehová tlawalh pi makgapitsin lakgkgolotsin tiku xpulalinankgo chu amakgapitsi kstalaninanin Cristo tiku xkamakgtayakgo xtsokgkgolh cartas niku xwan tuku xlitlawatkan chu tastakyaw xla congregaciones (1 Tim. 3:1-13; Tito 1:5-9). ¿La litamakgtayakgolh congregaciones xlakata tlawakgolh xtastakyawkan lakgkgolotsin tiku xkapulalinkgo?

10. ¿Tuku lalh akxni congregaciones kxapulana siglo tlawakgolh tuku xkawanikgo lakgkgolotsin tiku xkapulalinkgo? (Kaʼakxilhti xapulana dibujo).

¹⁰ (Kalikgalhtawakga Hechos 16:4, 5). Kxapulana siglo, makgapitsi natalan xkalakgapaxiʼalhnankgo congregaciones xlakata xkamakatsinikgolh tuku xlakkaxwilikgonit apóstoles «chu mpuxkunanin lakgkgolun nti xwilakgo kJerusalén». Xlakata congregaciones tlawakgolh tuku xkawanikgonit lakgkgolotsin, «xtakgatanksakgoy kxtakanajlakan nkgamputunu nkanajlanin, na chali chali xtaliwakatilhama». ¿La nachuna natlawayaw kkincongregacionkan?

11. ¿Tuku xlitlawatkan natalan tiku lakgayakgolh taskujut kcongregación akxni xkachikin Dios wi tuku kawani pi natlawakgo?

¹¹ Comités de Sucursal o Comités de País, superintendentes de circuito, siervos ministeriales chu lakgkgolotsin xlikgalhakgaxmatatkan tuku kawanikgo xkachikin Dios. Biblia wan pi kimputumkan kilikgalhakgaxmatatkan tiku kinkapulalinkgoyan (Deut. 30:16; Heb. 13:7, 17). Komo ni namakgxtakgaw Jehová, ni katitalatlawanaw chu natlawayaw tastakyaw nema namakgamakglhtinanaw. Ni litaxtuputunaw la Diótrefes, tiku ni xkamaxki kakni natalan tiku xpulalinkgo congregación (kalikgalhtawakga  3 Juan 9, 10). Akxni tlawayaw tuku kinkawanikanan, makgtayananaw natawila takaksni chu tlan nalatalalin congregación. Wa xlakata kakinkakgalhskinkan: «¿Kkamatliwakglha natalan xlakata tlan natalalinkgo Jehová? ¿Lakapala ktlawa tuku kiwani xkachikin Dios?».

12. ¿La tlawakan akxni laksakkan chatum kgolotsin o siervo ministerial?

¹² Nina makgas lakgkgolotsin tiku pulalinkgo xtatayananin Jehová, lakgpalikgolh la natlawakan xlakata kgolotsin o siervo ministerial nalitaxtu chatum tala. Revista Makatsinina lichuwinalh pi lakgkgolotsin tiku xpulalinkgo xapulana kstalaninanin Cristo kamaxkilh limapakgsin superintendentes viajantes pi wa xwankgolh tiku tlan kgolotsin chu siervo ministerial nalitaxtu (kaʼakxilhti ksección: «Tuku katsiputunkgo tiku likgalhtawakgakgo» krevista Makatsinina 15 xla noviembre kata 2014). Wa xlakata superintendentes de circuito matsukikgolh uma taskujut septiembre kata 2014. Akxni lakgkgolotsin wankgo pi chatum tala tlan naliskuja la kgolotsin o siervo ministerial, superintendente de circuito liskuja xlakata liwana nalakgapasa tala chu xfamilia. Wa xlakata max akxtum talichuwinan Dios (1 Tim. 3: 4, 5). Alistalh superintendente de circuito katatamakxtumi lakgkgolotsin. Liwana akxilhkgo tuku wan Biblia xlakata tuku xlimakgantaxtitkan tiku kgolotsin o siervo ministerial wamputun (1 Tim. 3:1-10, 12, 13; 1 Ped. 5:1-3).

13. ¿La limasiyayaw pi kakgalhakgaxmataw lakgkgolotsin?

¹³ Lakgkgolotsin kinkalipulalinkgoyan Biblia xlakata kuentajtlawaputunkgo chu makgtakgalhputunkgo congregación. Xlakaskinka akxtum nakataskujaw chu natlawayaw tuku nakinkawanikgoyan, xlakata tlan nakinkakitaxtuniyan (1 Tim. 6:3). Xapulana siglo makgapitsi kstalaninanin Cristo ni akgstitum xlamakgolh. Ni kskujputunkgo chu xmakgtanukgo niku ni xkalakgchan. Lakgkgolotsin kastakyawakgolh pero ni talakgpaliputunkgolh. Pablo kawanilh natalan la xkalikatsinikgolh tiku chuna xlikatsikgo kʼuma congregación. Kawanilh: «Kuintaj katlawatit xpalakata, na ni titatalakgxtupiyatit». Natalan nialh akxtum xtalakgolh ama lataman, pero ni xliʼakxilhkgo la xtalamakgasitsinkan (2 Tes. 3:11-15). La uku lakgkgolotsin na kamakgtayaputunkgo kstalaninanin Cristo tiku ni kgalhakgaxmatkgo xtastakyaw Dios. Akgtum liʼakxilhtit, nastakyawakgo chatum tala tiku lakgapasma tiku ni xtatayana Jehová (1 Cor. 7:39). ¿Chu komo ama tala ni nakgaxmata tastakyaw? Lakgkgolotsin max namastakgo akgtum taʼakgchuwin niku nawankgo pi uma tayat, max natlawa pi ni tlan natalichuwinan congregación. ¿Tuku xtlawaw komo lakgkgolotsin xmastakgolh la uma taʼakgchuwin kkincongregacionkan? Komo lakgapasaw tala tiku xpalakata limastamaka ama taʼakgchuwin, ¿nialh akxtum katitalaw? Chuna nalimakgtayayaw  xlakata naʼakxilha pi xtayat ni katimakgtayalh chu nitlan akxilha Jehová. Max ama tala natalakgpali ^[1] (kaʼakxilhti nota niku kgalhsputa artículo).

14. ¿La namakgtayananaw xlakata xaskulunku natawila congregación?

¹⁴ Anta kxTachuwin Dios wan tuku kilitlawatkan xlakata ni naʼanan tuku ni xatlan kcongregación. Kalilakpuwaw tuku lalh kkachikin Corinto. Pablo lu xkapaxki natalan tiku anta xlamakgolh. Lhuwa tiku anta xlamakgolh wa xkamasiyaninit xaxlikana (1 Cor. 1:1, 2). Wa xlakata kalilakpuwaw la makgkatsilh akxni katsilh pi chatum chixku xtlawama talakgalhin xalimaxana, chu congregación xmastama talakaskin. Pablo kawanilh lakgkgolotsin: «Nkalimakamastatit wa yuma nchixku kxmakan Satanás». Xlitamakxtutkan xwanit ama chixku kcongregación (1 Cor. 5:1, 5-7, 12). Kkinkilhtamakujkan, lakgkgolotsin tlan natamakxtukgo tiku ni namakgxtakga lanka talakgalhin. Komo chuna nakalikatsiniyaw la wan Biblia tiku katamakxtukanit, namakgtayananaw xaskulunku natawila congregación (kaʼakxilhti recuadro «¿Tuku kilhchanima?»). Max na nakamakgtayayaw nalakgpalikgo xtayatkan chu naputsakgo pi kakatapatilh Jehová.

15. ¿La natlawayaw xlakata naʼanan takaksni chu akxtum nala kcongregación?

¹⁵ Kcongregación xalak Corinto xwi atanu taʼakglhuwit. Makgapitsi xkalimakgolh kxlakatin mapakgsinanin xtakanajlanin. Pablo kakgalhskilh: «¿Tuku xlakata ni mastayatit talakaskin nakatlawanikanatit tuku nitlan?» (1 Cor. 6:1-8). La uku makgapitsi linatalan tlawakgonit negocios chu makgatsankgakgonit tumin o makgkatsikgo pi xnatalan akgskgawikgolh. Wa xlakata kalinkgonit kxlakatin mapakgsinanin. Komo chuna nala max latamanin nitlan katilichuwinankgolh Jehová chu xkachikin. Max na natlawa pi kaʼanalh taʼakglhuwit kcongregación. Biblia kinkawaniyan pi kakatakgalhiw takaksni kinatalankan, maski namakgatsankgayaw tumin ^[2] (kaʼakxilhti nota niku kgalhsputa artículo). Jesús masiyalh la lakkaxtlawakan taʼakglhuwit chu akxni ni akxtum likatsikan (kalikgalhtawakga Mateo 5:23, 24 chu 18:15-17). Kakgalhakgaxmatwi xtastakyawkan. Chuna namakgtayananaw xlakata naʼanan takaksni chu akxtum natawila congregación.

16. ¿Tuku xlakata makxtum lakgo kskujnin Dios?

¹⁶ Biblia kinkawaniyan: «¡Ka’akxilhtit, snun tlan y lan tamakglhkatsi akxni ti tatapakgsini Dios akxtum tarapaxki la litakam akxni, chatum talaj!» (Sal. 133:1, SXP). Israelitas liwana xtakaxtawilakgonit chu akxtum xwilakgolh akxni kgalhakgaxmatkgolh Jehová. Akxni lichuwinalh xlakata la xʼamakgolh tawilakgo kskujni Jehová, wa: «Makxtum nakkawili,  xtachuna la borregos niku kamakikan» (Miq. 2:12). Jehová na lichuwinalh pi kskujnin akxtum xʼamakgolh skujnanikgo xlakata xʼamakgolh katsinikgo xaxlikana xalak Biblia. Xla wa: «Nakkalilakgpalini xtachuwinkan akgtum xatlan tachuwin, xlakata xputumkan namapakuwikgo Jehová chu akxtum naskujnanikgo» (Sof. 3:9). ¿Ni xlikana pi paxtikatsiniyaw Jehová xlakata akxtum kakninaniyaw?

17. ¿Tuku xlitlawatkan lakgkgolotsin komo chatum tala xalak congregación natlawa lanka talakgalhin?

¹⁷ Komo wi tiku natlawa lanka talakgalhin, lakgkgolotsin tunkun xlistakyawatkan chu nalimasiyanikgo tapaxkit. Katsikgo pi Jehová lakaskin nakuentajtlawakgo congregación xlakata ni natanu tuku nixatlan. Komo chuna natlawakgo makxtum chu xaskulunku natawila (Prov. 15:3). Pablo lu xkapaxki natalan xalak Corinto. Wa xlakata xkastakyawa akxni xtalakaskin. Chuna tlawalh akxni katsokgnanilh xapulana carta. Chu lakgkgolotsin xalak Corinto tunkun tlawakgolh xtastakyaw Pablo. ¿La likatsiyaw? Akxni xtitaxtunita akglhuwa papaʼ, Pablo kawanilh lakwan tachuwin akxni kamalakgachanilh xlimaktiy carta. Wa xlakata komo chatum tala «xliakgchakgxtayalh mpala tu ni tlan», lakgkgolotsin xlimasiyatkan tapaxkit akxni nastakyawakgo (Gál. 6:1).

18. 1) ¿Tuku xlakata tlan kakitaxtunilh congregaciones kxapulana siglo xlakata tlawakgolh tuku wan xTachuwin Dios? 2) ¿Tuku nalichuwinanaw kʼartículo nema aku mima?

¹⁸ Xlakata xapulana kstalaninanin Cristo tlawakgolh tuku wan xTachuwin Dios, congregaciones kgalhikgolh takaksni, xaskulunku tawilakgolh chu akxtum lakgolh (1 Cor. 1:10; Efes. 4:11-13; 1 Ped. 3:8). Xlakata natalan chuna tlawakgolh, tlan kalinikgolh lakwan tamakatsinin «xlipaks nchixkuwin nti, wilakgo nkatuxawat» (Col. 1:23). La uku, tiku skujnaniyaw Dios makxtum layaw chu linaw lakwan tamakatsinin xlikalanka kKatiyatni. Kʼatanu artículo nalichuwinanaw pi tuku tlakg lakaskinaw, wa namaxkiyaw kakni kinTlatkan Jehová chu nakgalhakgaxmataw tuku wan kxTachuwin (Sal. 71:15, 16).