ʼE Fakatuʼutuʼu ʼo Mulimuli Ki Te Tohi ʼa Te ʼAtua
“ ʼAki te poto neʼe faʼu e Sehova te kele. ʼAki te fakasiosio tonu neʼe ina fakatuʼu maʼu te lagi.”—TAAGA LEA 3:19, MN.
KATIKO: 105, 107
1, 2. (1) Kotea ʼe ui e ʼihi ʼo ʼuhiga mo te manatu ʼae ko te ʼAtua ʼe ʼi ai tona kautahi? (2) Kotea ka tou talanoa anai ki ai ʼi te alatike ʼaeni?
KA PALALAU te hahaʼi ʼo ʼuhiga mo te lotu, ʼe natou ui fenei: “ ʼE mole ʼaoga ke takitaki tatou e he kautahi. ʼE tonu pe ia ke tou taupau he ʼu felogoi mo te ʼAtua.” ʼE moʼoni koa te ʼu palalau ʼaia peʼe kailoa?
2 ʼI te alatike ʼaeni, ʼe tou ako ai anai ko Sehova ʼe ina fai ia meʼa fuli ʼi he aluʼaga fakatokatoka pea ʼe ina fakatuʼutuʼu lelei tana hahaʼi. ʼE tou toe vakaʼi ai anai pe kotea te meʼa ʼe tonu ke tou fai moka foaki mai e te kautahi ʼa Sehova ni fakatotonu. (1 Kolinito 14:33, 40, MN) ʼI te ʼuluaki sekulo, neʼe mulimuli te hahaʼi ʼa Sehova ki te ʼu fakatotonu Fakatohi-tapu pea neʼe feala ai tanatou fakamafola te logo lelei ʼi te ʼu koga meʼa kehekehe. Ohage pe ko natou ʼaia, ʼe tou tuku ke takitaki tatou e te Tohi-Tapu ia ʼaho nei. Pea ʼe tou fakalogo ki te ʼu fakatotonu ʼae ʼe tou maʼu mai te kautahi ʼa te ʼAtua. Koia ʼae ʼe feala ai ke tou fakamafola te logo lelei ʼi te malamanei katoa. ʼE tou toe tokakaga foki ki te taupau ʼo te maʼuli maʼa, mo tokalelei pea mo logotahi ʼo te kokelekasio.
KO SEHOVA KO TE ʼATUA ʼO TE FAKATOKATOKA
3. He koʼe ʼe kotou tui papau ko Sehova ʼe ko te ʼAtua ʼo te fakatokatoka?
3 Ka tou mamata kia meʼa fuli ʼae neʼe fakatupu e Sehova, ʼe tou sisio ai ʼe ko te ʼAtua ʼo te fakatokatoka. Koteʼuhi “ ʼaki te poto neʼe faʼu e Sehova te kele. ʼAki te fakasiosio tonu neʼe ina fakatuʼu maʼu te lagi.” (Taaga Lea 3:19, MN) ʼE lahi ʼaupito te ʼu aluʼaga ʼe mole tou iloʼi ʼo ʼuhiga mo te ʼu meʼa ʼae neʼe fakatupu e Sehova. ʼE ko ‘he kiʼi logoaʼa noa pe ʼae ʼe kaku mai kia tatou’ ʼo ʼuhiga mo ia. (Sopo 26:14) Kaʼe ko te kiʼi mahino noa ʼae ʼe tou maʼu ʼo ʼuhiga mo te ʼatulaulau, ʼe ha mai ai te lelei ʼaupito ʼo tona fakatuʼutuʼu. (Pesalemo 8:4, 5) Ko te ʼu lauʼi miliona fetuʼu ʼe feʼoloʼaki ʼi hona aluʼaga fakatokatoka ʼi te ʼatulaulau. Pea kotou fakafuafua age muʼa te takafoliʼi ʼo te laʼa e te ʼu kele. ʼE fakaofoofo te fakatuʼutuʼu e Sehova te feʼoloʼaki ʼa te ʼu fetuʼu mo te ʼu kele. Ka tou fakakaukauʼi ia tana faʼu te lagi pea mo te kele ʼaki tona ʼatamai, ʼe tou fia fakavikiviki, mo tauhi pea mo nonofo agatonu kia te ia.—Pesalemo 136:1, 5-9.
4. He koʼe ʼe mole maʼu e te kau poto te ʼu tali ki te ʼu fehuʼi maʼuhiga?
4 ʼE ako e te kau poto te ʼu faʼahi ʼo te ʼatulaulau mo te kele, pea ʼe natou fakaʼaogaʼi leva ke lelei age totatou maʼuli. Kaʼe ʼe mole natou maʼu he ʼu tali ki te ʼu fehuʼi maʼuhiga. Ohage la, ko te hahaʼi sivi fetuʼu ʼe mole natou lava ui mai pe neʼe kamata feafeaʼi ia te ʼatulaulau, peʼe kotea te tupuʼaga ʼo te maʼuli ʼa te tagata mo te ʼu manu pea mo te ʼulu ʼakau ʼi te kele. Pea ko te tokolahi ʼe mole feala hanatou fakamahino pe koʼe ʼe holi malohi te tagata ki te maʼuli heʼe gata. (Ekelesiasi 3:11) ʼE mole maʼu e te tagata te ʼu tali ki te ʼu fehuʼi ʼaia, koteʼuhi ʼe ui e te kau poto ʼe mole ʼi ai he ʼAtua pea ʼe natou lagolago ki te evolisio. Kaʼe ʼe foaki mai e te ʼAtua te ʼu tali ʼi tana Tohi, ia te Tohi-Tapu.
5. He koʼe ʼe falala te tagata ki te ʼu lao ʼo te natula?
5 ʼE lahi te ʼu lao ʼo te natula neʼe fakatuʼu e Sehova. Pea ko te ʼu lao ʼaia ʼe mole fetogi ʼi he temi. Ko te kau fai hila, mo te kau fai tuio, mo te kau pailate, mo te kau toketa faitafa pea mo ʼihi atu ʼe natou falala ki te ʼu lao ʼaia moʼo fakahoko ʼanatou gaue. Ohage la, ko te toketa faitafa kua ina iloʼi pe te tuʼuʼaga ʼo te mafu he ʼe tatau pe te sino ʼo te tagata fuli. Pea kua tou iloʼi fuli pe, kapau ʼe fakato he tahi mai he koga meʼa maʼoluga, ʼe feala ke mate ai. Koia ʼe tou mulimuli ki te ʼu lao ʼo te natula ke tou maʼuʼuli ai.
TE ʼU FAKATUʼUTUʼU ʼA TE ʼATUA
6. ʼE tou iloʼi feafeaʼi ʼe loto e Sehova ke tauhi age tana hahaʼi ʼi hona aluʼaga fakatokatoka?
6 Neʼe fakatuʼutuʼu e Sehova ia te ʼatulaulau ʼi hona aluʼaga fakaofoofo. Pea ʼe ina loto foki ke tauhi age tana hahaʼi ʼi hona aluʼaga fakatokatoka. ʼAki te Tohi-Tapu, ʼe akoʼi mai ai e Sehova pe ʼe feafeaʼi tatatou tauhi ʼae kia te ia. Pea ʼe hoki tou maʼuʼuli fiafia pe anai mo kapau ʼe tou fakalogo ki ʼana fakatotonu ʼae ʼe ina foaki mai ʼi te Tohi-Tapu pea mo tona kautahi.
7. Kotea ʼae ʼe tou ako mai te faʼahiga tohi ʼo te Tohi-Tapu?
7 Ko te Tohi-Tapu ʼe ko he meʼa ʼofa makehe mai te ʼAtua. ʼE ui e ʼihi tagata sivi Tohi-Tapu, ʼe ko he tohi pe ia neʼe fakatahiʼi ai e te tagata ni tohi Fakasutea mo Fakakilisitiano. Kaʼe neʼe filifili e te ʼAtua pe ko ai ʼae ka ina tohi te ʼu tohi, mo te temi ʼae ka kamata tohi ai pea mo te ʼu manatu ʼae ka natou tohi. Koia ko te Tohi-Tapu katoa ʼe ko he tokoni ke tou mahino ai ki te logo lelei ʼo te ʼAtua. Mai te tohi ʼo Senesi 3:15; Mateo 6:10; Apokalipisi 11:15.
Senesi ki te tohi ʼo Apokalipisi, ʼe fakaha ai ʼe ʼi ai he “hakoga” ka ina toe fakaliliu anai te kele ko he palatiso. Pea neʼe tou ako ko te “hakoga” ʼaia ʼe ko Kilisito Sesu pea ʼe fakalakatonuʼi anai e tona Puleʼaga ia te pule faʼitaliha ʼo Sehova.—Lau ia8. Neʼe ha feafeaʼi te fakatuʼutuʼu lelei ʼo te kau Iselaele?
8 Neʼe mulimuli te kau Iselaele ki te Lao ʼae neʼe foaki age kia natou e te ʼAtua pea neʼe fakatuʼutuʼu lelei ia natou. Ohage la, neʼe ‘fakatuʼutuʼu te ʼu fafine ke natou gaue ʼi te huʼaga ʼo te fale fono.’ (Ekesote 38:8, MN) Neʼe toe foaki te ʼu fakatotonu ʼo ʼuhiga mo te fehikiʼaki ʼo tonatou nofoʼaga pea mo te feʼaveʼaki ʼo te tapenakulo, ʼi hona aluʼaga fakatokatoka. Ki muli age, neʼe fakatuʼutuʼu e Tavite te kau pelepitelo mo te kau Levite ki he gaue makehe ʼi te fale lotu. (1 Koloniko 23:1-6; 24:1-3) ʼI te temi ʼae neʼe fakalogo ai te kau Iselaele, neʼe tapuakiʼi natou e Sehova. Koia neʼe fakatuʼutuʼu lelei ia natou, ke natou maʼuli tokalelei pea mo logotahi.—Tetelonome 11:26, 27; 28:1-14.
9. Neʼe fakatuʼutuʼu feafeaʼi te ʼu kokelekasio ʼi te ʼuluaki sekulo?
9 Neʼe toe fakatuʼutuʼu lelei mo te ʼu kokelekasio ʼi te ʼuluaki sekulo. Neʼe ʼi ai te kolesi pule, neʼe ko he kiʼi kutuga neʼe natou takitaki te ʼu kokelekasio. ʼI te kamata, neʼe faʼufaʼu te kolesi pule ʼaki te kau apositolo kaʼe ki muli age, neʼe toe kau ki ai te tahi ʼu tagata ʼafeā. (Gaue 6:1-6; 15:6) Neʼe takitaki e Sehova ia te kolesi pule pea mo natou neʼe gaue fakatahi ki te fai ʼo te ʼu tohi ki te ʼu kokelekasio. Ko te ʼu tohi ʼaia neʼe ko he ʼu fakatotonu mo he ʼu tokoni. (1 Timoteo 3:1-13; Tito 1:5-9) Neʼe fua lelei feafeaʼi ki te ʼu kokelekasio ia tanatou mulimuli ki te takitaki ʼa te kolesi pule?
10. Kotea neʼe hoko ki te ʼu kokelekasio ʼo te ʼuluaki sekulo ʼi tanatou mulimuli ki te ʼu fakatotonu ʼa te kolesi pule? (Vakaʼi te ʼuluaki pāki.)
10 Lau ia Gaue 16:4, 5. ʼI te ʼuluaki sekulo, neʼe ʼaʼahi te ʼu kokelekasio e ʼihi tehina moʼo fakaha “te u tonuaga [peʼe ko te ʼu tonu] nee fai e te kau apositolo mo te kau matuatua o Selusalemi,” ʼae ko te kolesi pule. Neʼe mulimuli te ʼu kokelekasio ki te ʼu fakatotonu ʼaia pea neʼe natou tuputupu ʼi te tui ʼi te ʼaho fuli. ʼE tokoni feafeaʼi mai kia tatou ia ʼaho nei tanatou faʼifaʼitaki?
ʼE KOTOU MULIMULI KOA KI TANA TAKITAKI?
11. Kotea ʼe tonu ke fai e te kau tagata ʼafeā mo te kau faifekau fakaminisitelio moka natou maʼu he ʼu fakatotonu mai te kautahi ʼo te ʼAtua?
11 Ko te ʼu tehina ʼo te ʼu komite ʼo te Filiale peʼe ʼo te ʼu komite fakafenua, mo te ʼu taupau ʼo te siliko pea mo te kau tagata ʼafeā, ʼe tonu ke natou fakalogo ki te takitaki ʼae ʼe haʼu mai te kautahi ʼo te ʼAtua. Pea ʼe toe ui mai ʼi te Tohi ʼa Sehova ke tou talagafua kia natou ʼe takitaki. (Tetelonome 30:6; Hepeleo 13:7, 17) Ko natou ʼae ʼe nonofo agatonu kia Sehova ʼe mole natou agatuʼu mo meo ʼo ʼuhiga mo te faʼahiga takitaki ʼo natou. Pea ʼe mole tou fia hage ko Tiotefeso, ʼae neʼe mole fakaʼapaʼapa ki te ʼu tehina takitaki. (Lau ia 3 Soane 9, 10.) [1] (Vakaʼi te nota ʼi te fakaʼosi ʼo te alatike) Ka tou mulimuli ki tanatou takitaki, ʼe tou lagolago ai ki te maʼuli tokalelei mo logotahi ʼo te kokelekasio. Koia ʼe lelei ai ke tou fai te ʼu fehuʼi ʼaeni: ‘ ʼE au fakalotomalohiʼi koa ʼoku tehina mo tuagaʼane ke natou nonofo agatonu kia Sehova? ʼE au mulimuli fakavilivili koa ki te takitaki ʼae ʼe au maʼu mai te kautahi ʼo te ʼAtua?’
12. ʼE fakanofo feafeaʼi te kau tagata ʼafeā mo te kau faifekau fakaminisitelio?
12 ʼE heʼeki faʼa fualoa ki ai, neʼe fetogi e te 1 Timoteo 3:4, 5) ʼOsi ʼaia, pea ʼe fono te taupau ʼo te siliko mo te kau tagata ʼafeā. Pea ʼe natou vakavakaʼi ai leva te ʼu vaega Fakatohi-tapu ʼe maʼu ai te ʼu kalitate ʼae ʼe fakamaʼua ki he tagata ʼafeā peʼe ko he faifekau fakaminisitelio.—1 Timoteo 3:1-10, 12, 13; 1 Petelo 5:1-3.
Kolesi Pule ia te faʼahiga fakanofo ʼo te kau tagata ʼafeā mo te kau faifekau fakaminisitelio ʼi te ʼatu kokelekasio. ʼI te alatike “Te ʼu Fehuʼi ʼa Te Kau Lautohi” ʼi Te Tule Leʼo fakafalani ʼo te ʼaho 15 ʼo Novepeli 2014, neʼe fakamahino ai ko te kolesi pule ʼo te ʼuluaki sekulo, neʼe ina fakagafua ki te ʼu taupau feʼoloʼaki ke natou fakanofo te kau tagata ʼafeā mo te kau faifekau fakaminisitelio. Koia, talu mai Sepetepeli 2014, neʼe fakahoko e te ʼu taupau ’o te siliko tanatou gaue ʼaia. Ka manatu te kau tagata ʼafeā ʼo he kokelekasio ki he tehina ke liliu ʼo tagata ʼafeā peʼe ko he faifekau fakaminisitelio, ʼe natou fakaha ki te taupau ʼo te siliko. Hili ia, ʼe ina faigaʼi ke feiloʼiʼaki mo te tehina ʼaia mo tona kiʼi famili. Ohage la, ʼe feala ke nā olo ʼo faifakamafola fakatahi. (ʼE takitaki tatou e te kau tagata ʼafeā ʼaki te Tohi-Tapu, he ʼe natou fia puipui mo tokakaga ki te kokelekasio
13. ʼE tou fakaha feafeaʼi ʼe tou lagolago ki totatou takitaki ʼae e te kau tagata ʼafeā?
13 ʼE akoʼi tatou e te kau tagata ʼafeā ʼaki te Tohi-Tapu, he ʼe natou fia puipui mo tokakaga ki te kokelekasio. Pea ʼe tonu ke tou gaue tahi mo natou heʼe ko te ako ʼaia ʼe fua lelei kia tatou. (1 Timoteo 6:3) ʼI te ʼuluaki sekulo, neʼe ʼi ai ʼihi neʼe “mauli i te piko.” Neʼe mole natou gaue, kaʼe neʼe natou palalau ki te ʼu meʼa ʼe mole natou kau ki ai. Pea neʼe fakatonutonuʼi natou e te kau tagata ʼafeā, kaʼe neʼe mole natou fia fakalogo. Neʼe fakaha ai leva e te apositolo ko Paulo ki te kokelekasio pe ʼe tonu ke feafeaʼi tanatou aga ki te faʼahiga tagata ʼaia, ʼo ina ui fenei: “Kotou fakamaumau ia [peʼe kotou tokakaga ki ai, MN ], pea aua naa kotou toe fakatahi anai mo ia.” Neʼe tonu ki te kokelekasio ke mole toe fakatahi mo te faʼahiga ʼaia, kaʼe neʼe mole fakaʼuhiga leva ko honatou fili. (2 Tesalonika 3:11-15) Ia ʼaho nei, ʼe faigaʼi e te kau tagata ʼafeā ke natou tokoniʼi he tahi ʼe mole ina tokagaʼi te ʼu lekula ʼa te ʼAtua. Ohage la, ko he tehina peʼe ko he tuagaʼane ʼe fakatahi mo he tahi ʼe mole tauhi kia Sehova. (1 Kolinito 7:39) Pea kapau ʼe mole fetogi tana aga, ʼe fai anai e te kau tagata ʼafeā he akonaki ʼe fakamahino ai te ʼu fua kovi ʼo te taʼi aga ʼaia ʼi te kokelekasio. Kapau ʼe fai he akonaki feia ʼi tokotou kokelekasio, kotea anai ka kotou fai? Kapau ʼe kotou iloʼi he tahi ʼe aga feia, ʼe kotou fakamamaʼo anai koa mai ai? Ka kotou fai feia, ʼe lagi kotou tokoni anai ki ai ke mahino ko tana aga ʼe fua kovi pe kia ia pea ʼe mole fiafia ai ia Sehova. [2]—Vakaʼi te nota ʼi te fakaʼosi ʼo te alatike.
KE TAUPAU TE MAʼULI MAʼA, MO TE TOKALELEI PEA MO TE LOGOTAHI ʼO TE KOKELEKASIO
14. ʼE tou taupau feafeaʼi te maʼuli maʼa ʼo te kokelekasio?
14 ʼE fakaha mai e te ʼAtua ʼi tana Folafola pe ʼe kotea ʼe tonu ke tou fai ke mole ulufi ai ʼotatou kokelekasio e te ʼu aga ʼae ʼe kovi. Tou vakaʼi te aluʼaga neʼe hoko ʼi Kolinito. Ko te apositolo ko Paulo neʼe ʼofa mamahi ki ʼona 1 Kolinito 1:1, 2) Kotou fakakaukauʼi age muʼa pe kotea ʼae neʼe ina logoʼi ʼi tana iloʼi ʼae neʼe ʼi ai te tehina neʼe ina fai te aga heʼe ʼaoga, kaʼe neʼe fakagafua pe ke hoko atu tana fakatahi mo te kokelekasio. Neʼe fakatotonu ai e Paulo ke “tuku te tagata aia kia Satana.” Neʼe tonu ke fakamavae e te kau tagata ʼafeā te tagata ʼaia ʼi te kokelekasio. (1 Kolinito 5:1, 5-7, 12) Ia ʼaho nei, ʼe toe feala ke fakamavae he tahi e te kau tagata ʼafeā mo kapau neʼe agahala mamafa pea ʼe mole fakahemala. Kaʼe ʼe tou mulimuli anai koa ki te ʼu fakatotonu Fakatohi-tapu ʼo ʼuhiga mo te aga ʼae ʼe tonu ke tou fai kia natou ʼae kua fakamavae? ʼE mahino ia, ka tou fakalogo, ʼe tou taupau anai te maʼuli maʼa ʼo te kokelekasio. Pea ʼe tou tokoni ai anai ki te kilisitiano ʼaia ke mahino ʼe maʼuhiga ke fakahemala pea ke ina kole te lotofakamolemole ʼa Sehova.
tehina mo tuagaʼane ʼo te kolo ʼaia, pea neʼe tokoni ki te tokolahi ke natou ako te moʼoni. (15. ʼE tou taupau feafeaʼi te maʼuli tokalelei ʼo te kokelekasio?
15 Neʼe ʼi ai te tahi fihifihia ʼi Kolinito. Neʼe ʼave e ʼihi ʼonatou tehina ki te telepinale. Koia neʼe tokoni fenei ai ia Paulo kia natou: “Kotea e mole kotou katakii ai mua te kovi?” (1 Kolinito 6:1-8) Ia ʼaho nei, ko ʼihi ʼi te kokelekasio neʼe natou talaga gaue mo ʼonatou tehina. Kaʼe ki muli age, neʼe puli ai tanatou foʼi falā pea natou manatu neʼe kakāʼi natou e ʼonatou tehina. Koia neʼe tupu ai leva te ʼave ʼo natou ki te telepinale. Ka hoko te ʼu aluʼaga ʼaia, ʼe feala ke manukiʼi ai te huafa ʼo Sehova pea mo tana hahaʼi. Pea ʼe toe feala ai ke hoko ni maveuveu ʼi te loto kokelekasio. ʼO ʼuhiga mo te faʼahi ʼaia, ʼe tokoni mai te ʼAtua ʼaki tana Folafola ke tou maʼuʼuli tokalelei tuʼumaʼu mo ʼotatou tehina, tatau aipe pe ʼe puli ai hatatou foʼi falā. [3] (Vakaʼi te nota ʼi te fakaʼosi ʼo te alatike.) ʼE toe akoʼi mai tatou e Sesu ke tou fakatokatoka ʼotatou faigataʼaia pea mo te ʼu tokakovi. (Lau ia Mateo 5:23, 24; 18:15-17.) Kapau ʼe tou mulimuli lelei ki tana takitaki, ʼe tou taupau ai te maʼuli tokalelei pea mo te logotahi ʼo te kokelekasio.
16. He koʼe ʼe logotahi te hahaʼi ʼa te ʼAtua?
16 ʼE ui fenei mai ʼi te Tohi ʼa Sehova: “Kotou sisio! ʼE ko he meʼa lelei pea mo fakafiafia ki he ʼu tehina hanatou nonofo fakatahi ʼi te logotahi!” (Pesalemo 133:1, MN) ʼI te temi ʼae neʼe fakalogo ai te kau Iselaele kia Sehova, neʼe natou maʼuʼuli ʼi te fakatokatoka pea mo te logotahi. Koia ʼae neʼe fakakikite fenei ai e te ʼAtua: “’E ’au fakatahi’i anai natou ke natou logotahi ohage ko he ki’i faga ovi ’i te loto’a.” (Mikea 2:12, MN) Neʼe toe fakakikite foki e Sehova, ʼe ako anai e tana hahaʼi ia te ʼu moʼoni Fakatohi-tapu pea mo tauhi anai kia te ia ʼi te logotahi. Pea neʼe ina toe ui fenei: “’E au foaki anai ki te haha’i he fetogi, ’e ko he lea ma’a, ke feala hanatou paui fuli ki te huafa ’o Sehova, ke natou tauhi fakatahi kia te ia.” (Sofonia 3:9, MN) ʼE tou loto fakafetaʼi kia Sehova he ʼe tou atolasio kia te ia ʼi te logotahi!
17. Kotea ʼe tonu ke fai e te kau tagata ʼafeā moka agahala mamafa he tahi ʼi te kokelekasio?
17 Ka fai e he tahi he agahala mamafa, ʼe tonu ke foimo fakatonutonuʼi e te kau tagata ʼafeā, kaʼe ʼaki te ʼofa. ʼE natou mahino ʼe loto e Sehova ke puipui te kokelekasio mai te ʼu fakaneke kovi pea ke taupau tonatou maʼuli maʼa mo tanatou logotahi. (Taaga Lea 15:3) Neʼe ʼofa mamahi ia Paulo ki te ʼu tehina ʼo Kolinito. Pea neʼe ina fakatonutonuʼi natou moka neʼe ʼaoga ke fai ohage pe ko tatatou lau ʼi tana ʼuluaki tohi ʼae neʼe ina fai kia natou. Ko te kau tagata ʼafeā neʼe natou mulimuli ki te takitaki ʼa Paulo. ʼE tou iloʼi te faʼahi ʼaia, koteʼuhi ʼi ni mahina ki muli age, neʼe ina vikiʼi natou ʼi tana lua tohi kia natou. Koia kapau ʼe fai e he tehina hana “lakahala ia muʼa ʼo hana iloʼi,” ʼe tonu ke fakatonutonuʼi e te kau tagata ʼafeā, kaʼe ʼaki te ʼofa.—Kalate 6:1, MN.
18. (1) Neʼe tokoni feafeaʼi te takitaki ʼa te Folafola ʼa te ʼAtua ki te ʼu kokelekasio ʼo te ʼuluaki sekulo? (2) Kotea ka tou vakaʼi anai ʼi te alatike ka hoa mai?
18 ʼE ha lelei mai, ʼi te temi ʼae neʼe mulimuli ai te kau Kilisitiano ʼi te ʼuluaki sekulo ki te takitaki ʼa te Tohi ʼa te ʼAtua, neʼe natou taupau ai te maʼuli maʼa, mo te tokalelei pea mo te logotahi ʼi ʼonatou kokelekasio. (1 Kolinito 1:10; Efeso 4:11-13; 1 Petelo 3:8) Pea neʼe feala ai ke fakamafola te logo lelei e te ʼu tehina mo tuagaʼane ʼaia ki “te ʼu fakatupu fuape ʼi te lalo lagi.” (Kolose 1:23, MN) ʼO toe feia pe ia ʼaho nei, ko te hahaʼi ʼa Sehova ʼe logotahi mo fakatuʼutuʼu lelei pea ʼe natou fakamafola te logo lelei ʼi te kele katoa. ʼI te alatike ka hoa mai, ʼe tou vakaʼi ai anai he ʼu fakamoʼoni ʼe ha ai tanatou fia fakakololiaʼi tafitō te Tuʼi ʼAliki ko Sehova mo tanatou fakalogo ki te takitaki ʼo tana Tohi, ia te Tohi-Tapu.—Pesalemo 71:15, 16.
^ [1] (palakalafe 11) ʼE fakaliliu fenei ia 3 Soane 9, 10 ʼi te Tohi-Tapu fakafalani Les Saintes Écritures. Traduction du monde nouveau, MN: “Neʼe au faitohi ki te kokelekasio, kaʼe ko Tiotefeso, ʼae ʼe manako ki te tuʼulaga maʼoluga, ʼe mole ina tali fakaʼapaʼapa he meʼa ʼe ʼavatu ia matou. Koia ʼae kapau ʼe au alu atu, ʼe au fakamanatu atu anai ʼana gaue ʼae ʼe ina lolotoga fai, mo ʼana laukovi ʼo ʼuhiga mo matou. Pea tahi, ʼe mole ina tali fakaʼapaʼapa te ʼu tehina, pea ko natou ʼae ʼe natou fia tali te ʼu tehina, ʼe ina taʼofi pea mo kapu natou ʼi te kokelekasio.”
^ [2] (palakalafe 13) Vakaʼi te tohi Organisés pour faire la volonté de Jéhovah, ʼi te ʼu pasina 134-136.
^ [3] (palakalafe 15) Kapau ʼe kotou fia maʼu he tahi ʼu fakamahino ʼo ʼuhiga mo te ʼu aluʼaga ʼae ʼe feala ke ʼave ai e he tehina ia he tahi tehina ki te telepinale, kotou vakaʼi te tohi “Koutou Haga Nonofo ʼi Te ʼOfa ʼo te ʼAtua,” pasina 223, te kiʼi nota ʼi te lalo pasina.