1-3. Txini yampadduweli Evódia na Síntike? Makani ninga abene anrabeleya dhavi? (Koona foto eli omaromo.)

NINOMURIHA Bibilia sabwa ninoziwa wila nivuru na Mulugu. Bibilia okaana malago menjene anwodha onikamihedha ogomiha makani vina onoogola nigavonya. Kito ninarumele dhavi malago abo? Kobuwela yapadduwile na ayana eeli ottikitteliwa a vyaka zana dhoroma Evódia na Síntike. Bibilia onloga wila awene ela wakulana, mbwenye kanloga sabwaya. Ndowe nitanaalele yapadduweli.

² Voroma Evódia wela wawoba abali ang’onovi, wi aredhe owani-waye. Mbwenye kamuwobile Síntike. Mmalelani Síntike batakuneya murima vewaliye wi abali àdhowile waredha va Evódia ahagalala vaddiddi. Wannubuwela dhahi: ‘Evódiya bakosiha mattanga vani-vaye okodda oddiwoba? Ddobuwela wila nali amarho ebaribari.’ Síntike wobuwela wila Evódia kaziveliwana iyene, vina wela omurebetta. Noona Síntike vina wahawoba abali akakene,  bamuttiya Evódia! Makani aba ahanyonya attu enjene mmulogoni. Bibilia onologa wila Paulo wahasaddeya arogora aba nanda wahakokomeza wila ateyihane. Awene ahiteyihana vina adhowanavi omulaba wawa Mulugu na murenddele.​—Filipi 4:2, 3.

³ Mmilogoni mwehu abali na arogora eena anokanaga makani oligana. Mbwenye nigavirihamo malago a Bibilia, ninele owodha okwaranya makattamihoya. Vina iyo podi orabela makaniya. Nigewelela enloga Bibilia, ninele olagiha wila ninowika ttima Nivuru na Yehova.​—Masalmo 27:11.

4, 5. Bibilia onnivaha malago gani sabwa ya wang’anela etanelelo yehu?

⁴ Masaka meena jorutxa wang’anela etanalelo yehu. Txino ninonyonyeya akala muttu ononiruwana obe ononinyimula sabwa ya mweddelo wehu, ottiyana wa ttebe. Ejo empetxa akala muttuya ologile mbali obe murogora wehu w’omuyani. Kito Mazu a Mulugu annivaha malago gani anwodha onikamihedha?

⁵ Yehova onoziwa wila nlogo na attu ninorutxiwaga wang’anela etanaalelo yawa. Niganyonyeya vaddiddi, iyo txino ninologa elobo musogorhomwa banitxinuwana. Mbibiliani Yehova ononilaga wila nang’anele etanaalelo yehu, onloga dhahi: “Kuhaguvelege onyanyuwa.” Txibarene nigewelela magano aba, ninele orabela makani menjene vina kaninanyonyeyege momaguva! (Kengesa Kohelét 7:9; Gano 16:32.) Bibilia ononaddela wila ninofanyeela olevelelana. Yezu ologa wila akala kaninwodha omulevelela mukwehu, Yehova kananilevelele. (Mateu 6:14, 15) Onovilibihedha wi wakurumuwele vina walevelele attu eena?

6. Txini enapadduwe nigahiwodha wang’anela etanalelo yehu?

⁶ Akala kaninwodha wang’anela etanaalelo yehu, ejo podi onikaniha yubuwelo yonyonyeya, vina yowawidda akwehu. Obe ninele waraviha etanaalelo yabure attu eena mmulogoni. Masiki nitamele ovita ntxiga, musogorhomwa attu etene anele oziwa etanaalelo yehu. Ejo enele onittiya wolapelana na abali ehu. (Gano 26:24-26) Anddimuwa a mulogo anolabihedha malebo wi anikamihedhe onyanyala ntxiga vina niziwe walevelela eena. (Onamakutha 19:17, 18; Roma 3:11-18) Awene aganikamihedha, ninele ofara malago a Nivuru na Yehova?

7, 8. (a) Yehova onsogorhela dhavi nlogo naye? (b) Magano a mweddihedho anfanya iyo mBibiliani bavi?

⁷ Yehova onosogorhela vina onosunziha nikuru naye nili velaboni ya vati. Onkosa dhavi? Iyene omuttoma Kristu wi akale “musorho wa mutugumano,” nanda Kristu omuttoma “mwimeleli wororomeleya, wamalago” wi asunzihe vina avahe malago attu a nlogo na Mulugu. (Éfeso 5:23; Mateu 24:45-47) Dhahene ninga mwakosela nikuru nolamulela  na vyaka zana dhoroma, mwimeleli oddo onomuriha Bibilia sabwani Mazu a Mulugu. (Kengesa 1 Tesalónika 2:13.) Malago gani anfanya iyo mBibiliani?

⁸ Bibilia ononikokomeza woona matugumano mudhidhi wotene. (Ahebreu 10:24, 25) Eji enonilibiha notene wi nirumeelele masunziho a Bibilia. (1 Korinto 1:10) Enonikamihedha otamela “voroma Omwene wa Mulugu.” (Mateu 6:33) Bibilia ononisunziha olaleya numba-numba, vattaddo vina mwego munfanyeya attu gwé. (Mateu 28:19, 20; Merelo 5:42; 17:17; 20:20) Na malago aba anddimuwa a mulogo anotxeniha mulogoya. (1 Korinto 5:1-5, 13; 1 Timóteo 5:19-21) Ononaddela vina wila nikoddelihe maningo ehu, nirabelaga elemelelo na mweddelo onidda Yehova.​—2 Korinto 7:1.

9. Yezu omuttomile ani wi anikamihedhe ononelamo Mazu a Mulugu?

⁹ Attu enjene anubuwela wila kanfanyeela waddeliwa dhili mBibiliani. Mbwenye oromana yaka ya 1919, Yezu onomulabihedha “mwimeleli wororomeleya wamalago” wi akamihedhe attu ononelamo ensunziha Bibilia. Nigewelela malago a Bibilia, mulogo onokala wotxena, wa murenddele vina wowiwanana. Kavivuze dhahi: ‘Ddinomwiwelela Yezu vina ddinovirihamo malago anvaha mwimeleli wororomeleya vina wamalago?’

10. Nivuru na Ezekiyel ninloga dhavi dha nikuru na Yehova nili wirimu?

¹⁰ Bibilia ononipanga wila emeleli a Yehova wirimu bosasanyedheya viina. Motagiha, Ezekiyel wahoona Yehova bageddiha karo yazugunuwa momaguva edhowaga wego kuwego wafuniye odhowa. (Ezekiyel 1:4-28) Karo ejo yatapulela nikuru na Yehova nili wirimu, ninfara malago aye momaguva. Ozugunuwa oko onopatta vina nikuru na velaboni ya vati. Ninowubuwela masadduwo akosiwe mu nikuruni na Yehova mwari mwa vyaka kumi esi dhomariha. Kobuwela wila masadduwoya abo anda na Yehova. Ovanene Yezu Kristu na angelo eena anele otolotxa elaboya eji yotabala. Kavo onakoodde omwiwelela Yehova vina kavo onasadduwele olamulela waye!

11, 12. Txini enkosa nikuru na Yehova masaka abano omariha?

¹¹ Kobuwela enkosa nikuru na Yehova masaka abano omariha. Mabasa a omaga. Matxikwi menjene a abali na arogora, anokosa mabasa a omaga katti ya Anamoona a Yehova a elabo yotene o Warwick, Nova Iorque, U.S.A. Mazana meena a abali anovilevela omaga Numba dh’Omwene na kambirhinya dha katti. Abali abo ovilevela anttomiwa na Mparha wa Omaga wa Elabo Yotene  (Departamento de Construção) oli o Nova Iorque. Ninowatamaalela vopitta abali abo anivilevela mabasa a omaga. Adhari etene a Yehova anovaha esile dhinani wi akamihedhe opitxeliwa mabasa abo a omaga. Yehova onoruriha nlogo naye sabwa ya oviyeviha vina wiwelela onlagihani.​—Luka 21:1-4.

¹² Masunziho. Yehova onoziveliwa wasunziha attu a nlogo naye. (Izaiya 2:2, 3) Kobuwela dhiskola dhinji dhina iyo. Nikaana Eskola ya Apionero, ya Anamalaleya a Omwene, ya Gilead, ya Anameddelela Milogo na Awadhiwa, ya Anddimuwa a Milogo, ya Arumiwi a Mulugu, vina Eskola ya Asogorheli a Katti (Membros da Comissão da Filial) na Awadhiwa. Mu website mwehu, jw.org, ninofanyamo manivuru a dhilogelo dhinjene. Muhikala viina epaddi yamakamaka wa aima vamodha na amambalawa vina epaddi enna miselu dhiswa. Onomulabihedha deretu jw.org mmabasani mwawo a olaleya?

13. Gari gani ena attu a nlogo na Yehova?

¹³ Johagalaliha vaddiddi okosa epaddi ya nikuru na Yehova, vina oziwa ejile enjedhiye mwa iyo! Txibarene, nigamala oziwa enimuzivela Yehova, ninokaana gari ya omwiwelela vina okosa dhili dhapama. Masiki attu enjene akosaga dhovuta, iyo ninofanyeela “widda okosa dhabure” dhahene ninga munkosela Yehova. (Masalmo 97:10) Kaninfanyeela watagiha abale “anona dhapama anira sabure; dhabure anira sapama.” (Izaiya 5:20) Ninfuna nimutamalele Yehova, noona nikale otxena dhipaddi dhetene. (1 Korinto 6:9-11) Yehova ononisunziha dhilobo dhapama modhela Bibilia. Iyo ninomukwela vina ninogana omwiwelela. Noona ji sabwaya enfanyeelihu wiwelela malago aye vamuralani, mmabasani, oskola obe vego-pavego valihu. (Gano 15:3) Nubuwele dhipaddi dhiina dhinfanyeelihu okala owiwelela malago a Mulugu.

14. Amambali anakale dhavi oweddeyana na Yehova?

¹⁴ Washagiha aima. Modhela Bibilia Yehova ohavaha amambali gari na malago a wasunzihana anawa. Amambali a Akristu anokosa guru wi anarave mweddelo onubuwela attu mwilaboni. (Éfeso 2:2) Motagiha, mimburo dhina ababi anowubuwelaga wila, ‘Anasunziha aima ba amai awa.’ Mbwenye Bibilia onolagiha mowooneya wi ababi battomeliwe wasunziha aniwa sabwa ya Yehova. (Éfeso 6:4) Amambali animukwela Yehova anowakamihedha anawa okaana mandano oliba na Yehova, dhahene ninga mwakosela Samuwel waromile bali mwana.​—1 Samuwel 3:19.

15. Nigakosaga dhosakula dhamakamaka ninakale dhavi oweddeyana na Yehova?

¹⁵ Dhosakula dhehu. Nihinatti okosa yosakula enddimuwa, jaderetu opepesa ejile enubuwela vina enimuzivela Yehova wi niwodhe weeddavi na iyene. Enawodhe onikamihedha opepesa ddi Bibilia vina nikuru na Yehova. Motagiha, masaka abano amambali eena ammwalela elabo yina anowattiya anawa mwilaboni mwawa akalaga na abibi awa. Ejiya, awene ankosela wi akaane mudhidhi mwinji w’olaba n’efunelo yowenjedhedha kobiri. Masiki vakalilani yosakula ya muttu-muttu, anfuna okosa elobo ninga eji arome ovivuza: ‘Yehova onoonamo dhavi yosakula eji?’ (Kengesa Roma 14:12.) Jaderetu wubuwela enloga Bibilia nihinatti okosa yosakula yamakamaka wa anamudhi obe mabasa ehu. Ninofuna nikamihedho na Babi wehu, sabwani kavo onwodha osogorhela ttarho dhaye.”​—Jeremiya 10:23.

16. Yosakula gani yakosile mai waana mwana muswa? Txini yamukamihedhi okosa yosakula ninga ejene?

 ¹⁶ Amambali dhahi mudhowelani elabo yina, ahimbala mwana wafunani wi amuttiye na abibe. Momaguva-mwene muyanaya baroma omusunza Bibilia na Anamoona a Yehova. Iyene osunza wila amambali attomeliwa wasunziha anawa sabwa ya Yehova. (Masalmo 127:2; Gano 22:6) Muyana oddu wa muzombwe wahilobela wa Yehova, ninga munlogela Bibilia, akumbiraga wi asunze okosa dhapama. (Masalmo 62:7, 8) Wahiloga makattamiho aye na murogora wamusunza Bibilia na iyene, vina na attu eena a mmulogoni. Masiki amudhaye vamodha na akwaye vamwabihedhani wi amuttiye mwanaye na abibe, iyene wahoona wila kinkala. Mamunaye wahoona wila abali na arogora enjene ankosa guru wi amukamihedhe iyene na mwanayeya. Sabwa ya eji iyene oroma omusunza Bibilia vina woona matugumano na murala waye. Mambali oddu wasanzaya vaddiddi moneliye wi Yehova ohakula malobelo aye!

17. Nifare malago gani nigamusunzaga Bibilia na muttu mwina?

¹⁷ Ofara malago. Akala iyo ninowedda na Mulugu, ninele ofara malago annivaha nikuru naye. Motagiha, kobuwela enfanyeelihu okosa nigaroma osunza na muttu nivuru Txini Ensunziha Bibilia Txibarene? Nihaddeliwa wi nigaromaga-wene nsunzona, nimukamihedhe namasunzaya ononelamo nikuru na Yehova. Iyo podi olabihedha vidiyu Txini Enkosiwa mu Numbani ya Omwene? obe brochura Bani Ankosa Ofuna wa Mulugu Nsaka na Ovanene? Nigagomiha nivuru Ensunziha Bibilia, nimukamihedhe namasunzaya “olibiha nroromelo naye” modhela osunza na iyene nivuru “Kalanivi mu Okwelani Mwa Mulugu”, masiki agamala obatiziwa. (Kolosi 2:7) Weyo onofara malago aba a nikuru na Yehova?

18, 19. Sabwaya jivi enfanyeelihu omutamaalela Yehova?

¹⁸ Nihikaana sabwa dhinjene wi nimutamalele Yehova! Sabwa yoroma jiji “dhehu dhetene dhili na iyene okala wehu, wedda wehu okalawo wehu.” (Merelo 17:27, 28) Iyene onivaha Nivuru naye Bibilia. Dhahene ninga Akristu o Tesalónika, ninoriha nivuru ntti sabwani obo nvaho waye.​—1 Tesalónika 2:13.

¹⁹ Bibilia ononikamihedha onfiyedha Yehova, vina iyene onifiyedha. (Tiago 4:8) Ninotamaalela vaddiddi sabwa ya Babi wehu wodhulu oniwobela okosa epaddi ya nikuru naye. Ninovyona ninga mulogeli munasalmo: “Mutamelení Nabuya [Yehova], vowi ddwapama, onikwela waye kwa mukala-kala.” (Masalmo 136:1) Mmaversuni menjene munasalmo oleba mazu akakene “onikwela waye kwa mukala-kala.” Txibarene, nigeddavi na Yehova vina nigavirihamo malago annivahiye modhela nikuru naye, ninowakela egumi yamukalakala vina ninele omutamaalela na mukala-kala!